OBHEASACHO LEKH 39
GIT 54 Hich Vatt Jivitachi
Sasnachem Jivit ‘Favo Asloleank’ Rokddich Modot Korat
“Sasnachem jivit favo aslolea sogleamnim bhavarth dovorlo.”—ITIHAS 13:48.
MUKHEL MUD’DO
Ami lokank Bible obheasa vixim kednam sangchem ani mittingek kednam apounchem tem ami hea lekhant polloitolim.
1. Lok poilech pavtti bori khobor aikotat tednam kitem kortat? (Itihas 13:47, 48; 16:14, 15)
POILEA xekddeant Kristanvamnim Jezu vixim porgottlem tednam zaitea zannamnim rokddench sot apnnailem. (Itihas 13:47, 48; 16:14, 15 vachat.) Teach bhaxen aizui, thoddim zannam poilech pavtti bori khobor aikotat tednam khuxal zatat. Ani thoddim survatek sot aikonant zalear pasun, tim uprant aikonk xoktat. Tor sasnachem jivit ‘favo aslolo’ lok melltta tednam ami kitem korunk zai?
2. Porgottnnechem kam ani garden-ant kam kortolea eka munxachem kam ek-sarkem koxem asa?
2 Ami porgottnnechem kam, garden-ant kam kortolea eka munxachea kamak sor korunk zata. Garden-ant piklolem foll melltta tednam to tem kaddtta, punn her follam pikosor, to tea zhaddachi toxench her zhaddanchi kallji gheit ravta. Zoxem to tea zhaddank udok ani sarem ghalit ravta. Teach bhaxen, bori khobor aikonk toiar aslolo ek munis amkam melltta tednam, taka zata titlea begin Jezucho xis zaunk modot korunk ami fuddem sortat. Punn teach borabor, sot xikonk titlim umed dakhoinant tankam Deva vixim ani Bible-a vixim zannam zalʼlean koso faido zatolo tem zannam zaunk ami modot korit ravtat. (Ju. 4:35, 36) Ek munis sot xikonk umed dakhoita vo na tem zannam zalʼlean taka koxi modot korchi zata tem amkam kollttolem. Tor bori khobor aikonk sodhtoleank ami poilech pavtti mellttat tednam, tankam rokddich koxi modot korunk zata tem atam polloum-ia. Toxench Jehova sangata ixttagot zoddunk ani sotant vaddavoll korit ravonk ami tankam koxi modot korunk zata tem-ui polloum-ia.
LOK UMED DAKHOITAT TEDNAM
3. Bori khobor aikonk umed dakhoitat toslim munxam mellttat tednam ami kitem kortat? (1 Korintkarank 9:26)
3 Bori khobor aikonk umed dakhoitat toslim munxam mellttat tednam, tankam Jehova vixim xikounk ani taka lagim soronk modot korunk ami rokddench panvl ghetat. Tor ami poilech bhettek tankam Bible obheasa vixim sangtat ani mittingek apoitat.—1 Korintkarank 9:26 vachat.
4. Thoddim zannam Bible xikonk rokddinch toiar zaunk xoktat kai? Ek udharonn diat.
4 Bible obheasa vixim sangat. Thoddim zannam Bible xikonk rokddinch toiar zatat. Hea vixim amkam Canada-nt ravpi eke tornatte bailechem udharonn asa. Eka Brestarak ti kartta lagim aili ani tinnem Sasnak Khuxalkaien Jieiat! hi pustika ghetli. Kartta lagim aslole bhoinnin tika ami funkott Bible pasun xikoitat mhunn sanglem. Ti bail Bible xikonk toiar zali ani tannim dogaimnim eka-mekacho fon number ghetlo. Uprant tea disak, te bailen bhoinnik message keli ani kednam Bible xikonk zata kai mhunn vicharlem. Bhoinnin tika Sonvarak ieum kai mhunn vicharlem tednam, te bailen mhunnttlem, “Ami faleam korum-ia? Hanv free asam.” Tor tannim dusrea disak, tem mhunnttlear Sukrarak Bible obheas kelo ani Aitarak ti bail mittingek aili. Tea uprant ti sotant vaddavoll korit ravli.
5. Bible obheas suru korunk vell lagta tednam ami kitem korunk zai? (Chitram pasun polloiat.)
5 Punn tea baile bhaxen soglinch Bible xikonk rokddinch umed dakhoinant. Thoddeank Bible obheas suru korunk vell lagot. Tor poilim ami, tankam avoddtta tea vixoi-acher ulovop suru korunk poddot. Ek-na-ek dis tim Bible obheas suru kortolim mhunn ami bhorvonso dovorlear ani amkam tanchi porva asa mhunn dakhoilear, thoddea vella bhitor tim ghoddie Bible obheas suru korit. Tor obheas suru korunk ami kitem sangonk zata? Ho prosn thoddea porgottnnarank ani pioneer bhav-bhoinnank vicharlolo.
Chitrant dakhoilʼlea munxank kitem sanglolean tim Bible obheas korunk toiar zatolim oxem tumkam dista? (Peregraf 5 polloiat)a
6. Kitem sanglolean lokam lagim porot ulounk amkam modot zaunk xokta?
6 Tannim sanglem ki thoddea desamnim “Bible obheas,” “Bible kors” vo “xikom-ia,” him utram uzar korchea bodlek, “Bible-a vixim uloum-ia,” “tea vixim zannam zaum-ia” ani “tantunt kitem sanglam tem polloum-ia,” oxem ami mhunnonk zata. Ani tea munxam lagim porot ulounk ami tankam oxem sangonk zata: “Jivitantlea mhotvachea prosnanche zobab amkam Bible-ant mellttat. Tantuntle thodde ami polloum-ia?” vo “Bible fokot ek dhormik pustok nhoi, punn sodanchea jivitant pasun tem faideak poddtta.” Uprant ami sangonk zata, “Haka chodd vell lagchona. 10-15 minttanch puro.” Ani oxem sangtana, “Ami dor sumanak ietolim” oxem mhunnona zalear borem. Karonn oxem mhunnttlear, tannim amkam dor sumanak mellonkuch zai oxem tankam distolem.
7. Apunn xiktat tem sot mhunn thoddeank kednam kollon ailam? (1 Korintkarank 14:23-25)
7 Mittingek apoiat. Apostl Pauluchea disamnim thoddim zannam poilech pavtti Kristi sobhent ailea uprant tim xiktalim tem sot mhunn tankam kollon ailem oxem dison ieta. (1 Korintkarank 14:23-25 vachat.) Ani aizui oxench zaunk xokta. Zaitim novim zannam mittingek ailea uprant sotant begin vaddavoll kortat. Tor tankam mittingek kednam apounchem? Sasnak Khuxalkaien Jieiat! pustokachea odheai 10-ant, mittingek ieunk apounnem asa. Punn ami to odheai xikosor ravchim nhoi. Ami tankam poilech pavtti mellttana, jahir bhaxonnacho vixoi, vo Pahrogopur-antlo ek mudʼdo sangon, sumanachea xevottak zata tea mittingek apounk zata.
8. Ami lokank mittingek apoitat tednam tankam kitem somzaunk zata? (Izaias 54:13)
8 Lokank mittingek apoitat tednam, her bhoktechea zagear jem zata tachea poros amcheo mittingo koxeo veglleo asat tem ami somzaunk zata. Udharonnak, ek bhoinnichem Bible vidʼdhearthi poilech pavtti Pahrogopur Obheasak ailem tednam, tannem oxem vicharlem: “Bhag korta taka sogleanchim nanvam khobor asat?” Tednam bhoinnin taka sanglem ki ami soglim eka-mekachim nanvam zannam zaunk vavr kortat. Karonn akʼkhi sobha ek famil koxi zaun asa. Tednam tannem bhoinnik sanglem ki tachea igorjent choddxea zannank eka-mekachim nanvam khobor nant. Toxench, amcheo mittingo anik ek vatten veglleo asat mhunn ami somzaunk zata. (Izaias 54:13 vachat.) Tem mhunnttlear, ami Jehovachi bhokti korunk, tachea koddlean xikonk ani eka-mekak urba diunk thoim hajir zatat. (Heb. 2:12; 10:24, 25) Tea pasot amcheo mittingo manddavollin zatat ani thoim kosleoch riti-rivazo asonant. (1 Kor. 14:40) Tea bhair, amchem Raj-ghor sadem ani sogleank xikonk melltta toxem design kelʼlem asta. Toxench ami rajkaronnant bhag ghenant mhunnttoch, ami thoim rajki vixoi-ancher bhasabhas korinant, vo amkam kitem sarkem dista vo disona tea vixim vad-vivad korinant. Raj-ghorant Kitem Ghoddta? ho video vidʼdheartheank dakhoilʼlean, thoim kitem zata tem tankam kollttolem.
9-10. Mittingek ieunk konnui fattim-fuddem zata zalear ami tankam kitem sangonk zata? (Chitr pasun polloiat.)
9 Punn mittingek ailear Jehovachim Sakxi zaunk poddttolem mhunn bhieun, thoddim zannam thoim ieunk fattim-fuddem zatat. Tor tannim thoim ieun kitem xikoitat tem aikonk zata, ani konnuch tankam kitem-i korunk vo sangonk fors korchona mhunn ami tankam khatri diunk zai. Toxench ghov-bailank ani bhurgeank pasun thoim ieukar asa mhunn ami sangonk zai. Mittingent bhurgeank veglli xikounn mellona. Tor avoi-bapaimnim tankam aplea sangata bosounk zata. Oxe toren tim surokxit asat mhunn tankam khatri astoli. (D.S. 31:12) Toxench mittingek konnachea-i koddlean poixe magonant mhunn ami poilinch sangonk zai. Karonn ami Jezun dilʼli adnea pallttat. Tannem sanglolem: “Tumkam funkott mellʼllam, tumi-i funkott diat.” (Mt. 10:8) Tea bhair, mittingek mharog kopdde ghalunk zai oxem na, punn sade ani nitoll kopdde ghalunk zatat mhunn ami sangonk zata. Karonn Dev amchem bhailem rup nhoi, punn kalliz polloita.—1 Sam. 16:7.
10 Tim mittingek ailear, ami tankam kallzantlean ieukar diunk zai. Toxench, tankam vhoddilank ani bhav-bhoinnank mellounk zai. Bhav-bhoinnank tanchi porva asa mhunn tankam kollttolem tednam, tim chodd korun porot ieit. Tea bhair tanchea lagim Bible na zalear, ami amcho Bible, toxench obheas korchem prokaxon tankam dakhounk vo diunk zata.
Jitlea begin ek munis mittingek ietolo, titlech begin to Jehovak lagim sortolo (Peregraf 9-10 polloiat)
BIBLE OBHEAS SURU ZALEA UPRANT
11. Ami aiknnareachea vellacho valor kortat mhunn koxem dakhounk zata?
11 Bible obheas mellʼllea uprant ami kitem monant dovrunk zai? Ami aiknnareachea vellacho valor kortat mhunn dakhounk zai. Udharonnak, amchea vattarantlea lokank time-ar pavchi sonvoim na zait. Punn ami aiknnareak umkeach vellar pavtolim mhunn sanglam zalear, ami tea vellar pavonk zai. Toxench, ami poile pavtti obheas ghetat tednam chodd vell gheuncho nhoi. Aiknnaro anik zannam zaunk sodhta zalear pasun, obheas thoddeach vella bhitor sompoilear borem mhunn thoddim onnbhov aslolim porgottnnaram sangtat. Tea bhair, obheasa vellar amich ulounchea bodlek, aiknnareak ulounk ani aplea kallzant kitem asa tem sangonk sondhi diunk zai.—Mho. 10:19.
12. Ami survate thaunuch vidʼdheartheak kitem korunk modot korunk zai?
12 Obheas suru kelea uprant, ami survate thaunuch vidʼdheartheak Jehovak ani Jezuk vollkhonk ani tancho mog korunk modot korunk zai. Oxem korunk ami kitem chintʼtat tacher nhoi, punn Bible kitem sangta tacher tachem dhean haddunk zai. (D.I. 10:25, 26) Hea vixim apostl Pauluchem borem udharonn asa. Lokank xikoitana, tannem tanchem dhean Jezucher haddlem. (1 Kor. 2:1, 2) Karonn lokank apli vollokh diunk ani aplo mog korunk xikounk Jehovan Jezuk hea prithumer dhaddlolo. Toxench Paulun sanglem ki bore gunn vaddounk vavr korunk ami vidʼdheartheak modot korunk zai. Zoxem bhavarth, zannvai, somjikai ani Jehovachi bhirant. (St. 19:9, 10, NW; Mho. 3:13-15; 1 Ped. 1:7) He gunn tannem bhangar, chandi ani moladik fatrank sor kele. (1 Kor. 3:11-15) Tor Paulu bhaxen, vidʼdheartheacho bhavarth ghott korunk ani amchea mogall sorginchea Bapa sangata ixttagot korunk taka modot korunk zai.—2 Kor. 1:24.
13. Bible vidʼdheartheak modot kortana ami pasiens ani somjikai koxi dakhounk zata? (2 Korintkarank 10:4, 5) (Chitr pasun polloiat.)
13 Ami Jezuchi dekh gheun pasiens ani somjikai dakhounk zai. Vidʼdheartheak vaitt disonk xoktat tosle prosn ami vicharche nhoi. Bible-antli umkich xikounn somzonk taka kotthin zata zalear, ami tea vixim bhasabhas korit ravchi nhoi. Punn ami obheas chaluch dovrunk zai ani tea mudʼdea vixim uprant ulounk zai. Bible-antli umkich xikounn manun gheunk ami tacher dobhav ghalcho nhoi. Punn aplem chintop bodlunk ani xikta tem apnnaunk taka vell diunk zai. (Ju. 16:12; Kol. 2:6, 7) Bible-ant khotte xikounnek ‘kholaien riglolea vostunk’ sor kelam jeo “mulla thaun umttun kaddun uddounk” zai. Grik bhaxent Bible-antlea hea versant eka kilʼlea vixim sanglam, zo moddun uddounk poddtta. (2 Korintkarank 10:4, 5 vachat.) Vidʼdhearthi khub vorsam thaun umkich patienni sot mhunn manit aila zalear, ti soddunk taka kotthin zait. Tea pasot, ami eka orthan taka ek novo kilʼlo bandunk, mhunnche Jehovacher visvas dovrunk modot korunk zai. Oxem kelear, tachi chukichi patienni soddun diunk taka sompem zait.—St. 91:9.
Apunn jem xikta tea vixim chintunk ani aplea chintpant bodol korunk vidʼdheartheak vell diat (Peregraf 13 polloiat)
NOVO LOK MITTINGEK IETA TEDNAM
14. Mittingek ailʼlea novea lokam sangata ami koxim vaglolim Jehovak zai?
14 Ami sogleam sangata doiallaien vaglolim Jehovak zai. Lokanchi sonskruti vo ganv vegllo asum, vo tim gorib vo girest asum, ami tanchea sangata bhedbhav kelʼlo Jehovak naka. (Jak. 2:1-4, 9) Tor mittingek ailʼlea novea lokank ami koso mog dakhounk zata?
15-16. Mittingek poilech pavtti ietat tanchi amkam kallji asa mhunn ami koxem dakhounk zata?
15 Thoddim, mittingek kitem zata tem pollounk ieit. Vo dusrea zagear ravpi eka Sakxean tankam mittinge vixim sanglam dekhun ieit. Tor tankam ieukar diunk ami fattim sorchem nhoi. Ami tanchea lagim mogan ulounk zai. Punn oxem kortana, ami chodduch umed dakhounk zaina. Toxench, ami tankam amchea sangata bosounk zata, ani Bible toxench her prokaxonam dakhounk vo diunk zatat. Ami tankam her vattamnim pasun modot korunk zai. Koxi? Raj-ghorant poilech pavtti ailʼlea eka munxan, taka ieukar dilʼlea bhavak sanglem ki to heram bhaxen bore kopdde nhesonk na dekhun, taka borem disonaslem. Tednam bhavan taka sanglem, “Toxem kainch na. Ami mittingek bore toren nhestat tem khorem, punn ami tujeach sarkim munxam.” Tea munxan uprant vaddavoll korun bautizm ghetlo. Bhavan jem sanglolem tem to kednanch visronk na. Tor hea toren amkam dusreanchi kallji asa mhunn ami dakhounk zata. Punn ami zannam zaunchi goroz na vo tankam vaitt disonk xokta tosle prosn ami tankam vicharche nhoi.—1 Ped. 4:15.
16 Tea bhair uloitana, mittingek zobab ditana, ani mittingeche bhag kortana, Sakxi nhoi tea lokam vixim vo tanchea patienni vixim ami respedan ulounk zai. Tankam dukhoitolim vo tim porot kednanch mittingek ieunk sodhchimnant, toslim utram ami uzar korchim nhoi. (Tit. 2:8; 3:2) Ami tanchea patienni vixim kednanch fokannam korchim nhoi. (2 Kor. 6:3) Hea vixim khas korun, jahir bhaxonnam diupi bhavamnim chotrai dovrunk zai. Toxench tannim hem-ui ugddas dovrunk zai ki Sakxi nhoi tea lokank ami uzar kortat tim thoddim utram somzonk kotthin zaunk xokta. Tor tannim tea utrancho orth somzaunk zai.
17. ‘Sasnachem jivit favo aslole’ lok mellttat tednam ami kitem korunk zai?
17 Hea noxttea sonvsaracho xevott lagim pavta toso, ami xis korchem kam anikui nettan korunk zai. Oxem kelʼlean, amkam ‘sasnachem jivit favo aslole’ lok mellonk xoktat. (D.I. 13:48) He lok mellttat tednam, tankam Bible obheasa vixim sangonk vo mittingek apounk ami fattim sorchem nhoi. Oxem toren ami tankam ‘jivitak pavoita tea darvonttea-xim’ ieunk modot kortolim.—Mt. 7:14.
GIT 64 Lunvnnechea Kamant Khuxal Zavop
a CHITRACHI MAHITI: Military thaun retire zalʼlo ek munis aplea sofa-r boson asa ani don bhav tachea lagim uloitat; don bhoinno bizi aslolea eke avoi sangata thoddeach utramnim uloitat.