આપણું જીવન અને સેવાકાર્ય સભા માટે સૂચનાઓ

વિષય

૧. આપણું જીવન અને સેવાકાર્ય સભામાં ભાગ લેનારા બધાને આ માહિતી મદદ કરશે. તેઓએ પોતાનો ભાગ તૈયાર કરતા પહેલાં આપણું જીવન અને સેવાકાર્ય—સભા પુસ્તિકા અને આ સૂચનાઓ પર ધ્યાન આપવું જોઈએ. બધા જ પ્રકાશકોને સભામાં ભાગ રજૂ કરવા માટે ઉત્તેજન આપો. જેઓ મંડળમાં નિયમિત ભાગ લે છે અને બાઇબલના ધોરણો પ્રમાણે જીવન જીવે છે, તેઓ પણ સભામાં વિદ્યાર્થી ભાગો રજૂ કરી શકે. જો કોઈ વ્યક્તિ પ્રકાશક ન હોય અને તે વિદ્યાર્થી તરીકે ભાગ આપવા ચાહે, તો જીવન અને સેવાકાર્ય સભા નિરીક્ષક તેને એ વિશેની જરૂરી લાયકાતો જણાવશે. સભા નિરીક્ષક વ્યક્તિને જણાવશે કે તે વિદ્યાર્થી બનવા તૈયાર છે કે નહિ. આ ચર્ચા, બાઇબલ અભ્યાસ લેનાર વ્યક્તિની (અથવા, યહોવાના સાક્ષી હોય એવા માતા-પિતાની) હાજરીમાં કરવી જોઈએ. વિદ્યાર્થી માટેની લાયકાતો અને બાપ્તિસ્મા ન પામેલા પ્રકાશક બનવા માટેની લાયકાતો સરખી જ છે.—od પ્રકરણ ૮ ફકરો ૮.

સભાની ઝલક

૨. એક મિનિટ. ગીત અને પ્રાર્થના પછી, જીવન અને સેવાકાર્ય સભાના ચેરમેન, સભામાં જે ભાગોની ચર્ચા કરવામાં આવશે એ વિશે રસ જગાડશે. ચેરમેને એવા મુદ્દા પર ભાર મૂકવો જોઈએ, જેનાથી મંડળને લાભ થાય.

બાઇબલમાં રહેલો ખજાનો

૩. ટૉક: દસ મિનિટ. જીવન અને સેવાકાર્ય સભા પુસ્તિકામાં આ ભાગનો વિષય અને એના બે કે ત્રણ મુખ્ય વિચારો આપેલા છે. આ ટૉક વડીલ અથવા યોગ્ય લાયકાત ધરાવતા સહાયક સેવકે આપવી જોઈએ. જ્યારે અઠવાડિયાના બાઇબલ વાંચનમાં બાઇબલનું નવું પુસ્તક શરૂ થાય, ત્યારે એની પ્રસ્તાવનાનો વીડિયો બતાવવામાં આવશે. ટૉક આપનાર ભાઈ વીડિયોને અને વિષયને પોતાની ટૉકમાં ચમકાવી શકે. સભા પુસ્તિકામાં આપેલા મુદ્દાઓને તેમણે જરૂર જણાવવા જોઈએ. તેમણે ચિત્રોનો એ રીતે ઉપયોગ કરવો જોઈએ, જેથી મુખ્ય વિચારો પર ભાર આપી શકે. વિષયને લગતી બીજી માહિતી મુખ્ય મુદ્દો ચમકાવવા મદદ કરતી હોય, તો એનો પણ ઉપયોગ કરી શકે.

૪. કીમતી રત્નો: દસ મિનિટ. આ ભાગમાં સવાલ-જવાબ છે. એમાં શરૂઆતમાં કે છેલ્લે કંઈ કહેવું નહિ. આ ભાગ વડીલ અથવા યોગ્ય લાયકાત ધરાવતા સહાયક સેવકે આપવો. ભાગ લેનાર ભાઈએ બંને સવાલો પૂછવા જોઈએ. તે નક્કી કરી શકે કે આપેલી કલમો વાંચવી જોઈએ કે નહિ. ભાઈ-બહેનોએ ૩૦ સેકંડમાં કે એનાથી ઓછા સમયમાં જવાબ આપવો જોઈએ.

૫. બાઇબલ વાંચન: ચાર મિનિટ. આ વાંચન ભાઈએ કરવું. તેમણે શરૂઆતમાં કે છેલ્લે કંઈ કહેવું નહિ, પણ સળંગ વાંચી જવું. સભાના ચેરમેન ખાસ કરીને વિદ્યાર્થીને આ મુદ્દાઓ પર સારી રીતે વાંચવામાં મદદ આપી શકે: ભૂલો કર્યા વગર વાંચવું, સમજાય એ રીતે સરળતાથી વાંચવું, યોગ્ય ભાર મૂકવો, યોગ્ય જગ્યાએ અટકવું, અવાજનો ચઢાવ-ઉતાર તેમજ સહેલાઈથી વાંચવું. બાઇબલ વાંચન લાંબું અથવા ટૂંકું હોઈ શકે છે, એટલે જીવન અને સેવાકાર્ય સભા નિરીક્ષકે સોંપણી આપતી વખતે વિદ્યાર્થીની ક્ષમતાને ધ્યાનમાં રાખવી જોઈએ.

સેવાકાર્ય માટે પોતાને તૈયાર કરીએ

૬. પંદર મિનિટ. આ ભાગ એ રીતે તૈયાર કરવામાં આવ્યો છે, જેથી પ્રચારની પ્રેક્ટિસ કરવા અને વાતચીતની કળા નિખારવા મદદ મળે. સાથે જ, પ્રચાર અને શીખવવાની આવડત કેળવવા મદદ મળશે. જરૂર પડે તો, વડીલોને પણ વિદ્યાર્થી ભાગ આપી શકાય. સભા પુસ્તિકામાં સોંપણીની બાજુના કૌંસમાં અભ્યાસના મુદ્દાઓ આપેલા હોય છે. દરેક વિદ્યાર્થીએ એ મુદ્દાઓ પર કામ કરવું જોઈએ. એ મુદ્દા શીખવવાની કળા અથવા પ્રેમથી શીખવીએ ચોપડીમાંથી લેવામાં આવે છે. કેટલીક વાર, ચર્ચાનો ભાગ હોય છે. એ ભાગ વડીલે અથવા યોગ્ય લાયકાત ધરાવતા સહાયક સેવકે આપવો જોઈએ.—ચર્ચાના ભાગ કેવી રીતે ચલાવવા એ માટે ફકરો ૧૫ જુઓ.

૭. વાત શરૂ કરો: આ ભાગ ભાઈ કે બહેન આપી શકે. આ ભાગ બે ભાઈઓ આપી શકે અથવા બે બહેનો આપી શકે. પણ એક જ કુટુંબના સભ્ય હોય તો કોઈ પણ આપી શકે, જેમ કે પતિ-પત્ની, મા-દીકરો. વિદ્યાર્થી અને તેમને મદદ કરનાર ઊભા રહીને અથવા બેસીને ભાગ રજૂ કરી શકે.—આ સોંપણીની માહિતી અને સેટિંગ્સ વિશે વધુ માહિતી માટે, ફકરા ૧૨ અને ૧૩ જુઓ.

૮. ફરી મળવા જાઓ: આ ભાગ ભાઈ કે બહેન આપી શકે. આ ભાગ બે ભાઈઓએ આપવો જોઈએ અથવા બે બહેનોએ આપવો જોઈએ. (km ૫/૯૭-E પાન ૨) વિદ્યાર્થી અને તેમને મદદ કરનાર ઊભા રહીને અથવા બેસીને ભાગ રજૂ કરી શકે. વિદ્યાર્થી દૃશ્યથી બતાવશે કે ફરી મળવા જઈએ ત્યારે શું કહેવું.—આ સોંપણીની માહિતી અને સેટિંગ્સ વિશે વધુ માહિતી માટે, ફકરા ૧૨ અને ૧૩ જુઓ.

૯. શિષ્યો બનાવો: આ ભાગ ભાઈ કે બહેન આપી શકે. આ ભાગ બે ભાઈઓએ આપવો જોઈએ અથવા બે બહેનોએ આપવો જોઈએ. (km ૫/૯૭-E પાન ૨) વિદ્યાર્થી અને તેમને મદદ કરનાર ઊભા રહીને અથવા બેસીને ભાગ રજૂ કરી શકે. આ ભાગ જાણે બાઇબલ અભ્યાસ ચાલતો હોય એ રીતે બતાવવો જોઈએ. એમાં પહેલા કે છેલ્લા કંઈ ખાસ કહેવાની જરૂર નથી, સિવાય કે ભાગ લેનાર એવા કોઈ મુદ્દા પર કામ કરી રહ્યા હોય. સોંપેલી બધી માહિતી વાંચવી હોય તો વાંચી શકો, પણ એ જરૂરી નથી.

૧૦. તમારી માન્યતા વિશે સમજાવો: જ્યારે આ ભાગ ટૉક તરીકે હોય, ત્યારે કોઈ ભાઈ એ ટૉક આપશે. આ ભાગ ચર્ચા તરીકે હોય ત્યારે, કોઈ ભાઈ અથવા બહેન એ ભાગ આપી શકે. આ ભાગ બે ભાઈઓ આપી શકે અથવા બે બહેનો આપી શકે. પણ એક જ કુટુંબના સભ્ય હોય તો કોઈ પણ આપી શકે, જેમ કે પતિ-પત્ની, મા-દીકરો. વિદ્યાર્થીએ મુખ્ય વિષયને સ્પષ્ટ અને કુશળતાથી સમજાવવા આપેલા સાહિત્યનો ઉપયોગ કરવો જોઈએ. એ સાહિત્ય બતાવવું અથવા એનો ઉલ્લેખ કરવો કે નહિ, એ વિદ્યાર્થી નક્કી કરી શકે.

૧૧. ટૉક: આ સોંપણી કોઈ ભાઈને આપવી. તે મંડળમાં ટૉક આપતા હોય એ રીતે રજૂ કરશે. જ્યારે આ ટૉક પ્રેમથી શીખવીએ પુસ્તિકાના વધારે માહિતી ક ના મુદ્દા પર હોય, ત્યારે ભાઈ એ કલમો પ્રચારમાં કઈ રીતે વાપરી શકાય એના પર ભાર આપશે. દાખલા તરીકે, તે સમજાવી શકે કે એ કલમ ક્યારે વાપરી શકાય, કલમનો અર્થ શું થાય અને કલમનો ઉપયોગ કરીને કઈ રીતે વ્યક્તિ સાથે વાત કરી શકાય. જ્યારે ટૉક પ્રેમથી શીખવીએ પુસ્તિકાના પાઠમાંથી કોઈ એક મુદ્દા પર હોય, ત્યારે એ મુદ્દો પ્રચારમાં કઈ રીતે લાગુ કરી શકાય એના પર વિદ્યાર્થી ભાર આપશે. જો ભાઈ-બહેનોને ફાયદો થતો હોય, તો વિદ્યાર્થી પાઠના મુદ્દા ૧માં આપેલા દાખલા પર અથવા પાઠમાં આપેલી બીજી કલમો પર ધ્યાન દોરી શકે.

૧૨. માહિતી: આ ફકરામાં આપેલું અને નીચે આપેલું માર્ગદર્શન “વાત શરૂ કરો“ અને “ફરી મળવા જાઓ“ ભાગ માટે છે. જો બીજું કશું જણાવવામાં આવ્યું ન હોય, તો વિદ્યાર્થીનો ધ્યેય સામેવાળી વ્યક્તિને સરળ બાઇબલ સત્ય બતાવવાનો અને ફરી મુલાકાત માટે પાયો નાખવાનો હોવો જોઈએ. વિદ્યાર્થીએ એવો વિષય પસંદ કરવો જોઈએ, જે સમયસરનો હોય અને પોતાના વિસ્તારમાં લાગુ પડતો હોય. સાહિત્ય અથવા વીડિયો શીખવવાના સાધનોમાંથી લેવો કે નહિ, એ વિદ્યાર્થી જાતે નક્કી કરશે. ગોખેલી રજૂઆતને બદલે, વિદ્યાર્થીએ વાતચીતની કળાનો ઉપયોગ કરવો જોઈએ. જેમ કે, વ્યક્તિનો વિચાર કરવો અને સહેલાઈથી વાતચીત કરવી.

૧૩. સેટિંગ્સ: વિદ્યાર્થીએ પોતાના વિસ્તારના સંજોગોને ધ્યાનમાં રાખીને સેટિંગ રજૂ કરવું જોઈએ. દાખલા તરીકે:

(૧) ઘર-ઘરનો પ્રચાર: આ સેટિંગમાં ઘરે-ઘરે જઈને, ફોન દ્વારા અને પત્ર દ્વારા પ્રચાર કરવાનો સમાવેશ થાય છે. ઘર-ઘરનાં પ્રચારમાં અગાઉ મળ્યા હોય એવી વ્યક્તિને ફરી મળવાનો પણ એમાં સમાવેશ થાય છે.

(૨) તક મળે ત્યારે પ્રચાર: આ સેટિંગમાં સામાન્ય વિષય પર વાત શરૂ કરીને, તક મળે ત્યારે આવા લોકોને ખુશખબર જણાવવાનો સમાવેશ થાય છે: જેઓને આપણે કામ પર, શાળામાં, પડોશમાં, બસ કે ટ્રેનમાં અથવા દરરોજના કામ દરમિયાન મળવાનું થાય છે.

(૩) જાહેરમાં પ્રચાર: આ સેટિંગમાં ટ્રોલી દ્વારા ખુશખબર જણાવવી, વેપારી વિસ્તારમાં, શેરીમાં, બાગ-બગીચાઓમાં, વાહનો પાર્ક કરવાની જગ્યાઓમાં અથવા જ્યાં લોકો મળે ત્યાં ખુશખબર જણાવવાનો સમાવેશ થાય છે.

૧૪. વીડિયો અને સાહિત્યનો ઉપયોગ: વિદ્યાર્થી ચાહે તો સંજોગોને ધ્યાનમાં રાખીને વીડિયો અથવા સાહિત્યનો ઉપયોગ કરી શકે. વિદ્યાર્થીના ભાગમાં વીડિયો હોય અથવા વિદ્યાર્થી વીડિયો બતાવવા ચાહે, તો તેણે વીડિયોનો ઉલ્લેખ કરવો જોઈએ અને એના પર ચર્ચા કરવી જોઈએ, વીડિયો પ્લે કરવાની (ચલાવવાની) જરૂર નથી.

યહોવાના સેવકો તરીકે આપણું જીવન

૧૫. ગીત પછી, આ ભાગ ૧૫ મિનિટનો હશે. એમાં એક અથવા બે ભાગો હશે. એમાંથી શીખવા મળશે કે બાઇબલના સિદ્ધાંતો કેવી રીતે જીવનમાં લાગુ પાળી શકીએ. જણાવવામાં આવ્યું ન હોય તો એ ભાગો વડીલ અથવા યોગ્ય લાયકાત ધરાવતા સહાયક સેવક આપી શકે છે. જો મંડળની જરૂરિયાતોનો ભાગ હોય તો એ ભાગ વડીલે જ લેવો જોઈએ. જો સભા પુસ્તિકામાં ચર્ચા લખ્યું હોય તો, લેખના મુખ્ય મુદ્દાને ચમકાવવા ભાઈ બીજા સવાલો પણ પૂછી શકે છે. ભાગ લેનાર ભાઈએ શરૂઆત ટૂંકી રાખવી જોઈએ, જેથી મુખ્ય મુદ્દાઓ માટે અને ભાઈ-બહેનોના જવાબો માટે પૂરતો સમય હોય. જો કોઈ વ્યક્તિનું ઇન્ટરવ્યૂ હોય, તો શક્ય હોય ત્યારે તેણે ઇન્ટરવ્યૂ પોતાની જગ્યા પરથી આપવાને બદલે સ્ટેજ પરથી આપવું જોઈએ.

૧૬. મંડળમાં બાઇબલ અભ્યાસ: ત્રીસ મિનિટ. આ ભાગ યોગ્ય લાયકાત ધરાવતા વડીલને આપવો. (જો વડીલો ઓછા હોય, તો જરૂર પડ્યે લાયકાત ધરાવતા સહાયક સેવકને આ ભાગ આપી શકાય છે.) વડીલોના જૂથે નક્કી કરવું કે મંડળમાં કોણ બાઇબલ અભ્યાસ ચલાવવા માટે યોગ્ય છે. જેઓને બાઇબલ અભ્યાસ ચલાવવા માટે પસંદ કરવામાં આવે, તેઓએ સરસ રીતે અભ્યાસ લેવો અને સમયસર એને પૂરો કરવો. તેમણે મુખ્ય કલમો ચમકાવવી અને એ માહિતી રોજિંદા જીવનમાં કઈ રીતે લાગુ કરી શકાય એ શીખવવું. તેઓએ સવાલ-જવાબ ભાગને કેવી રીતે ચલાવવો, એ વિશેની સંગઠને આપેલી માહિતીનો ઉપયોગ કરવો. (w૨૩.૦૪ પાન ૨૪, બોક્સ) અભ્યાસની માહિતીને સારી રીતે આવરી લીધા પછી, અભ્યાસને વધારે લંબાવવો જોઈએ નહિ. જો શક્ય હોય તો, દર અઠવાડિયે અલગ-અલગ ભાઈઓએ અભ્યાસ ચલાવવો જોઈએ અને વાંચન કરવું જોઈએ. કોઈ વાર એવું બને કે સભાના ચેરમેન અભ્યાસનો સમયને ઘટાડવાનો કહે, તો અભ્યાસ ચલાવનાર ભાઈ નક્કી કરશે કે તે કેવી રીતે કરશે. તે કદાચ અમુક ફકરાઓ ન વંચાવવાનું નક્કી કરી શકે.

છેલ્લે બે બોલ

૧૭. ત્રણ મિનિટ. સભાના ચેરમેન યાદ રાખવા જેવા મુદ્દાઓને ચમકાવશે. જો સમય હોય તો ચેરમેન, ભાઈ-બહેનોને પૂછી શકે કે તેઓને સભામાંથી કયા મુદ્દા ગમ્યા. તેમણે આવતા અઠવાડિયાની સભાની ઝલક આપવી. જો સમય હોય તો, આવતા અઠવાડિયે જે વિદ્યાર્થીઓના ભાગ છે તેઓના નામ તે જણાવી શકે છે. જણાવવામાં આવ્યું હોય એ પ્રમાણે, જાહેરાતો કે પત્રો ચેરમેને આ સમયે વાંચવા જોઈએ. પ્રચારની ગોઠવણો કે પ્રાર્થનાઘરની સાફ-સફાઈ જેવી માહિતી પ્લેટફોર્મ પરથી જણાવવી નહિ, પણ એને ઈન્ફોર્મેશન બોર્ડ પર મૂકવી જોઈએ. જ્યારે ચેરમેને વધારે પત્રો વાંચવાના હોય કે જાહેરાતો જણાવવાની હોય અને સમય ખૂટતો હોય ત્યારે શું કરવું જોઈએ? તે અગાઉથી “યહોવાના સેવકો તરીકે આપણું જીવન” ભાગ લેતા ભાઈઓને તેઓના ભાગ વહેલા પૂરા કરવાનું કહી શકે. (ફકરા ૧૬ અને ૧૯ જુઓ.) ગીત અને પ્રાર્થનાથી સભા પૂરી કરવી જોઈએ.

શાબાશી અને સલાહ

૧૮. દરેક વિદ્યાર્થીના ભાગ પછી, સભાના ચેરમેન પાસે લગભગ એક મિનિટ હોય છે. જેમાં ચેરમેન વિદ્યાર્થીને સોંપેલા અભ્યાસ મુદ્દાને આધારે શાબાશી અને સલાહ આપી શકે. જ્યારે ચેરમેન વિદ્યાર્થીને ભાગ રજૂ કરવા બોલાવે ત્યારે, વિદ્યાર્થી કયા મુદ્દા પર કામ કરે છે એ જણાવવાની જરૂર નથી. પણ વિદ્યાર્થી ભાગ પતે પછી, તેમણે શું સારું કર્યું એ વિશે થોડા શબ્દો કહેવા. પછી, ચેરમેન જણાવી શકે કે વિદ્યાર્થી કયા અભ્યાસ મુદ્દા પર કામ કરતા હતા. સાથે જ એ પણ જણાવી શકે, કે તેમણે એ મુદ્દા પર શું સારું કર્યું, અથવા ક્યાં વધારે સારું કરવાની જરૂર છે. ચેરમેનને લાગે કે દૃશ્યના કોઈ ભાગમાંથી વિદ્યાર્થી અથવા ભાઈ-બહેનોને વધારે શીખવા મળશે, તો એના પર તે ભાર આપી શકે છે. એ ઉપરાંત, સોંપેલા અભ્યાસ મુદ્દા પર કે બીજા કોઈ મુદ્દા પર વિદ્યાર્થી વધારે પ્રગતિ કરી શકે એવી બાબતો વિશે સલાહ આપવાની હોય તો, સભા પછી ચેરમેન અલગથી કે બીજા કોઈ સમયે તેમને જણાવી શકે. એ સલાહ પ્રેમથી શીખવીએ પુસ્તિકા, શીખવવાની કળા ચોપડીમાંથી અથવા મિનિસ્ટ્રી સ્કૂલ (HI) પુસ્તકમાંથી હશે.—સભાના ચેરમેન અને સહાયક સલાહકાર (ઓગ્ઝિલરી કાઉન્સિલર) શું કામ કરે છે, એ વિશે વધારે જાણવા માટે ફકરા ૧૯, ૨૪ અને ૨૫ જુઓ.

સમય

૧૯. કોઈ પણ ભાગ માટે વધારે સમય લેવો ન જોઈએ. સભાના ચેરમેને પણ વધારે સમય ન લેવો જોઈએ. જો જીવન અને સેવાકાર્ય સભા પુસ્તિકામાં જણાવેલા સમય પહેલાં બધી માહિતી સારી રીતે રજૂ કરી દીધી હોય, તો સમય પૂરો કરવા માટે વધારાની માહિતી જણાવવાની જરૂર નથી. જો સભાના કોઈ પણ ભાગમાં વધારે સમય જાય, તો સહાયક સલાહકારે અથવા ચેરમેને તેઓને ખાનગીમાં સલાહ આપવી. (ફકરો ૨૪ અને ૨૫ જુઓ.) ગીતો અને પ્રાર્થનાઓ સાથે આખી સભા ૧ કલાક અને ૪૫ મિનિટની હોવી જોઈએ.

સરકીટ નિરીક્ષકની મુલાકાત

૨૦. સરકીટ નિરીક્ષકની મુલાકાત હોય ત્યારે, જીવન અને સેવાકાર્ય સભા પુસ્તિકાના કાર્યક્રમમાં એક ફેરફાર થશે. એ અઠવાડિયે મંડળ બાઇબલ અભ્યાસને બદલે સરકીટ નિરીક્ષક ૩૦ મિનિટનું સેવા પ્રવચન આપશે. એ પ્રવચન અગાઉ, ચેરમેન સભામાં જે શીખવા મળ્યું એને ચમકાવશે, આવતા અઠવાડિયાની સભાની ઝલક આપશે, કોઈ જાહેરાત હોય તો એ જણાવશે અને પત્રો વાંચવાના હોય તો એ વાંચશે. એ પછી, ચેરમેન સરકીટ નિરીક્ષકને પ્રવચન માટે આમંત્રણ આપશે. સેવા પ્રવચન આપ્યા પછી, સરકીટ નિરીક્ષકે પોતે જે ગીત પસંદ કર્યું હોય એનાથી સભા સમાપ્ત કરશે. તે ચાહે તો પ્રાર્થના માટે બીજા કોઈને કહી શકે. સરકીટ નિરીક્ષકની મુલાકાત વખતે મંડળની ભાષામાં સ્કૂલના બીજા ક્લાસ ચલાવવામાં નહિ આવે. જો બીજું કોઈ ગ્રૂપ હોય, તો તેઓ પોતાની સભા બીજા રૂમમાં ચલાવી શકે. પણ પછી જ્યારે સરકીટ નિરીક્ષક સેવા પ્રવચન આપે ત્યારે તેઓ મંડળ સાથે જોડાઈ જશે.

સંમેલન કે મહાસંમેલનનું અઠવાડિયું

૨૧. સંમેલન કે મહાસંમેલનના અઠવાડિયે કોઈ સભા રાખવામાં નથી આવતી. મંડળના ભાઈ-બહેનોને યાદ અપાવવું જોઈએ કે એ અઠવાડિયાની સભાની માહિતી દરેકે પોતે અથવા કુટુંબ સાથે જોવી.

સ્મરણપ્રસંગનું અઠવાડિયું

૨૨. જો સ્મરણપ્રસંગ સોમવારથી શુક્રવાર વચ્ચે આવતો હોય, તો જીવન અને સેવાકાર્ય સભા રાખવામાં નહિ આવે.

જીવન અને સેવાકાર્ય સભા નિરીક્ષક

૨૩. વડીલોના જૂથે પસંદ કર્યા હોય એવા એક વડીલ જીવન અને સેવાકાર્ય સભા નિરીક્ષક તરીકે સેવા આપશે. સભા વ્યવસ્થિત રીતે ચાલે અને સભાને લગતું બધું માર્ગદર્શન પાળવામાં આવે એ જોવાની જવાબદારી સભા નિરીક્ષકની છે. તેમણે સહાયક સલાહકાર સાથે સભા વિશે વાત કરતા રહેવું જોઈએ. જીવન અને સેવાકાર્ય સભા પુસ્તિકા બહાર પડે ત્યારે, સભા નિરીક્ષકે બને એટલું જલદી બે મહિનાનું શેડ્યૂલ તૈયાર કરવું જોઈએ. તે નક્કી કરશે કે વિદ્યાર્થી ભાગ કોણ હાથ ધરશે. એટલું જ નહિ, તે એ પણ નક્કી કરશે કે બીજા ભાગોની અને ચેરમેનની સોંપણી કોણ હાથ ધરશે. ચેરમેનની સોંપણી ફક્ત એવા ભાઈઓને આપવી જોઈએ, જેઓને વડીલોના જૂથે મંજૂરી આપી હોય. (ફકરા ૩-૧૬ અને ૨૪ જુઓ.) સભા નિરીક્ષકે વિદ્યાર્થીને ભાગ આપતી વખતે આ વાતોનું ધ્યાન રાખવું જોઈએ: જેમ કે, વિદ્યાર્થીની ઉંમર, અનુભવ અને આપેલી માહિતી વિશે તે સારી રીતે વાત કરી શકશે કે નહિ. તેમણે સભાના બીજા ભાગો પણ સમજી-વિચારીને સોંપવા જોઈએ. દરેક વ્યક્તિને તેની સોંપણી ઓછામાં ઓછા ત્રણ અઠવાડિયા અગાઉ મળી જવી જોઈએ. વિદ્યાર્થી ભાગો માટે આપણું જીવન અને સેવાકાર્ય સભાની સોંપણી (S-૮૯) ફોર્મ વાપરો. જીવન અને સેવાકાર્ય સભા નિરીક્ષકે ખાતરી કરવી જોઈએ કે દર અઠવાડિયાની સભાનું શેડ્યૂલ ઈન્ફોર્મેશન બોર્ડ પર અગાઉથી લગાવેલું હોય. સભા નિરીક્ષકને મદદ કરવા વડીલોનું જૂથ બીજા કોઈ વડીલ અથવા સહાયક સેવકને કહી શકે છે. જોકે, વિદ્યાર્થી ભાગો સિવાયના ભાગો કોણ હાથ ધરશે, એ ફક્ત વડીલોએ જ નક્કી કરવું જોઈએ.

જીવન અને સેવાકાર્ય સભા ચેરમેન

૨૪. દર અઠવાડિયે જીવન અને સેવાકાર્ય સભાના ચેરમેન એક વડીલ હશે. (જ્યાં વડીલો ઓછા હોય ત્યાં જરૂર પડ્યે યોગ્ય લાયકાત ધરાવતા સહાયક સેવકોનો ઉપયોગ થઈ શકે.) તે પહેલેથી તૈયારી કરશે કે શરૂઆતમાં અને સમાપ્તિમાં શું કહેવું. તે એ પણ જણાવશે કે સભાના બધા ભાગો એક પછી એક કોણ લેશે. મંડળમાં ઓછા વડીલો હોય તો, સભાના અમુક ભાગ રજૂ કરવાની જવાબદારી ચેરમેન પોતે નિભાવી શકે. ખાસ કરીને, એવા ભાગ જેમાં ફક્ત વીડિયો જ બતાવવાનો હોય અને કોઈ ચર્ચા કરવાની ન હોય. એક ભાગ પૂરો થાય અને બીજો શરૂ થાય એની વચ્ચે ચેરમેન જે ટીકા આપે એ થોડા જ શબ્દોની હોવી જોઈએ. વડીલોનું જૂથ નક્કી કરશે કે ચેરમેન તરીકે સેવા આપવા કોણ યોગ્ય છે. પછી યોગ્ય લાયકાત ધરાવતા વડીલો અલગ અલગ અઠવાડિયે ચેરમેન રહી શકે. તમારા મંડળના સંજોગો પ્રમાણે, જીવન અને સેવાકાર્ય સભા નિરીક્ષકનો ચેરમેન તરીકે બીજા વડીલો કરતાં વધારે ઉપયોગ થઈ શકે. જો વડીલ મંડળ બાઇબલ અભ્યાસ ચલાવી શકતા હોય, તો તે સભાના ચેરમેન તરીકે પણ સેવા આપી શકે. એક વાતનું ખાસ ધ્યાન રાખજો, કે જે વડીલ ચેરમેન હોય તે વિદ્યાર્થીને સારું કરે ત્યારે પ્રેમથી શાબાશીના બે શબ્દો કહેશે અને જરૂર પડ્યે પ્રેમથી સલાહ આપશે. ચેરમેનની જવાબદારી છે કે સભા સમયસર પૂરી થાય. (ફકરા ૧૭ અને ૧૯ જુઓ.) જો ચેરમેન ચાહે અને પ્લેટફોર્મ પર જગ્યા હોય, તો બીજું સ્ટેન્ડિંગ માઇક્રોફોન ત્યાં ગોઠવી શકાય. એ માઇકનો ઉપયોગ ચેરમેન વિદ્યાર્થીઓને બોલાવવા કરી શકે. ચેરમેન બોલાવે ત્યારે જે ભાઈનો ભાગ છે, તે મુખ્ય માઇક્રોફોન આગળ આવીને ઊભા રહી શકે. અથવા, બાઇબલ વાંચન હોય ત્યારે અને સેવાકાર્ય માટે પોતાને તૈયાર કરીએ ભાગ હોય ત્યારે ચેરમેન સ્ટેજ પર ટેબલ ગોઠવીને બેસી શકે. એમ કરવાથી સમય બચી શકે છે.

સહાયક સલાહકાર

૨૫. સહાયક સલાહકારની જવાબદારી છે કે તેમણે વડીલોને અને સહાયક સેવકોને તેઓની કોઈ પણ ટૉક કે ભાગ વિશે ખાનગીમાં સલાહ આપીને મદદ કરવી, પછી ભલે એ જીવન અને સેવાકાર્ય સભાનો કોઈ ભાગ હોય, જાહેર પ્રવચન હોય, ચોકીબુરજ કે મંડળમાં બાઇબલ અભ્યાસ ચલાવતા હોય અથવા વાંચતા હોય. —ફકરો ૧૯ જુઓ.

સ્કૂલના બીજા ક્લાસ

૨૬. મંડળમાં વિદ્યાર્થીઓની સંખ્યાને ધ્યાનમાં રાખીને, મંડળો ચાહે તો વિદ્યાર્થી ભાગો માટે બીજા ક્લાસની ગોઠવણ કરવાનું વિચારી શકે. બીજા ક્લાસ માટે એક યોગ્ય સલાહકાર હોવા જરૂરી છે અને એ વડીલ હોય તો વધારે સારું. જરૂર પડ્યે યોગ્ય લાયકાત ધરાવતા સહાયક સેવકને આ જવાબદારી સોંપી શકાય. વડીલોના જૂથે નક્કી કરવું જોઈએ કે સલાહકાર તરીકે કોને પસંદ કરવા. એ પણ નક્કી કરવું જોઈએ કે એ ક્લાસ એક જ ભાઈ ચલાવશે કે પછી અલગ અલગ ભાઈઓને વારાફરતી એ જવાબદારી સોંપવામાં આવશે. સલાહકારે ફકરા ૧૮માં આપેલા માર્ગદર્શન પ્રમાણે કરવું જોઈએ. જો બીજા ક્લાસ રાખવામાં આવે, તો બાઇબલમાં રહેલો ખજાનો કાર્યક્રમમાં કીમતી રત્નોના ભાગ પછી, વિદ્યાર્થીઓને બીજા ક્લાસમાં જવા માટે કહેવું જોઈએ. છેલ્લા વિદ્યાર્થી ભાગ પછી, બધાં ભાઈ-બહેનો ફરીથી મંડળની મુખ્ય સભામાં જોડાઈ જશે.

વીડિયો

૨૭. સભામાં વીડિયો પણ બતાવવામાં આવે છે. અઠવાડિયા દરમિયાન થતી સભા માટે આ વીડિયો JW લાઇબ્રેરી^® એપ દ્વારા પ્રાપ્ય હશે, જે અલગ અલગ સાધનોમાં ડાઉનલોડ કરી શકાય છે.

S-38-GU 9/25