સેવાકાર્યમાં આપણી આવડત વધારે કેળવીએ—કોઈ પણ સમયે સાક્ષી આપવાની પહેલ કરીએ

કેમ મહત્ત્વનું: ઘર ઘરના પ્રચારકાર્યમાં ઘણી વાર લોકો ઘરે મળતા નથી. તેઓ કદાચ આવી જગ્યાએ મળી શકે. જેમ કે, બસ કે રેલવેમાં મુસાફરી કરતી વખતે, દવાખાનામાં રાહ જોતી વખતે, સ્કૂલ કે નોકરીની રિસેસમાં. યહોવાની ઇચ્છા છે કે દરેક લોકોને રાજ્યનો સંદેશો જાણવાની તક મળે. (૧ તીમો. ૨:૩, ૪) લોકોને સાક્ષી આપી શકીએ માટે વાતચીત શરૂ કરવા આપણે પહેલ કરવી જોઈએ.

કઈ રીતે કરી શકીએ:

સમજી વિચારીને નક્કી કરો. શું વ્યક્તિ મળતાવડી અને વાત કરે એવી લાગે છે? શું નિરાંતે વાત કરી શકાય એવા સંજોગો છે? અમુક પ્રકાશકો વ્યક્તિની સામે જોઈને સ્માઈલ આપે છે. જો સામેથી વ્યક્તિ પણ સ્માઈલ આપે, તો તેઓ સાથે વાત કરવાનો પ્રયત્ન કરે છે.
તમને વાત કરવામાં ડર લાગતો હોય તો, મનમાં ટૂંકી પ્રાર્થના કરી શકો.—નહે. ૨:૪; પ્રે.કૃ. ૪:૨૯.
કદાચ ‘કેમ છો’ કહીને વાત શરૂ કરી શકો. ઈસુએ સીધેસીધું રાજ્ય વિશે જણાવીને સમરૂની સ્ત્રી સાથે વાત શરૂ કરી ન હતી. (યોહા. ૪:૭) કોઈ વાર વાત શરૂ કરવા માટે વખાણ પણ કરી શકાય. જેમ કે, “તમારા બાળકો તો બહુ સારા છે.” સવાલ પૂછીને પણ તમે વાત શરૂ કરી શકો: “ગઈ કાલે તમે સમાચાર સાંભળ્યા હતા?”
વાત શરૂ થઈ ગયા પછી સાક્ષી આપવાની તક શોધો. પણ ઉતાવળ કરશો નહિ. આરામથી વાત કરો. વ્યક્તિને રસ પડે એવું કંઈક જણાવો જેથી, તેમને વધારે જાણવાની ઇચ્છા થાય અને સવાલ પૂછે. દાખલા તરીકે, કુટુંબ વિશે વાત કરતા હો તો, આમ કહી શકો: “બાળકોનાં ઉછેર વિશે મને અમુક ભરોસાપાત્ર સલાહ જાણવા મળી છે.” સમાચાર વિશે વાત કરતા હો તો, આમ કહી શકો: “મને એક સારા સમાચાર વાંચવામાં ઘણો આનંદ આવ્યો.” સાક્ષી આપતા પહેલા વાત અટકી જાય તો, નિરાશ થશો નહિ.
સમજદારી બતાવો. ધ્યાન રાખો કે બીજાઓને એવું ન લાગે કે આપણે પોતાના વિચારો તેઓ પર થોપી બેસાડીએ છીએ. બાઇબલમાંથી કોઈ વિચાર જણાવતા પહેલાં સવાલ પૂછીને એ જાણવાની કોશિશ કરો કે ધાર્મિક બાબતોમાં તેને રસ છે કે નહિ.
પત્રિકા કે બીજું સાહિત્ય સાથે રાખો જેથી, રસ ધરાવનાર વ્યક્તિને આપી શકાય.

આ મહિને આમ કરો:

દર અઠવાડિયે ઓછામાં ઓછી એક વ્યક્તિને કોઈ પણ સમયે સાક્ષી આપવાનો પ્રયત્ન કરો.