¿Jamüinjatü nekirajia na eiwaʼaliikana aküjüliin pütchi?
1. ¿Jamüsü paaʼin puʼttaiwaʼaya sünain aküjaa pütchi?
1 ¿Sotusü paaʼin puʼttaiwaʼaya sünain aküjaa pütchi sainküin piichi? Eeshi mmorüle pia soʼu kaʼikat tia. Akatsaʼa jimatüsü paaʼin süka eejachin pümaa süpüla nükaaliinjüin pia chi ekirajakai pia jee niale wanee aküjüi pütchi. Maaʼulu yaa, atüjüichipa pia aküjaa pütchi otta yapashi pia süpüla pikirajüin na jekennuukana sünain aküjaa pütchi.
2. ¿Kasa natüjüinjatka na eiwaʼaliikana aküjüliin pütchi?
2 Na eiwaʼaliikana aküjüliin pütchi, choʼujaasü natüjüin aküjaa pütchi sümüin wayuu, aashajeʼeraa pütchi suluʼujee tü Wiwüliakat, ouyantaa nachikuaʼa, ekirajaa jee oʼttaa sünain ekirajaa sünain tü Wiwüliakat. Atüjüinjana aküjaa pütchi suluʼu oikkaalee, wopu jee kaaye. ¿Jamüinjatü nakaaliinjia putuma? Sükajee tü pukuwaʼipakat otta tü püküjakat nümüin süpüla nünoukteʼerüin.
3. ¿Jamüsü nakaaliinjia watuma na waneeinnua sükajee wakuwaʼipa?
3 Sükajee wakuwaʼipa. Niiʼiyatüin Jesuu namüin na nikirajüinkana jamüinjatüin süküjia pütchi natuma (Luc. 8:1; 1 Ped. 2:21). Püshata akuwaʼipaakat tia wanaa sümaa pujuʼitüinjachin nümaa wanee jekechi sünain aküjaa pütchi, mapülee putuma tü pünüikinjatkat süpüla nüshatüin shia, eesü süpüla shiain tü pütchi suluʼukat tü karaloukta wamaʼanakat. Pujuʼitapa nümaa, püküja pütchi suluʼu wanee jee shiale piamasü piichi süpüla naapüin pünüiki, pujuʼitapa suluʼujee wanee piichi püsakira nia sünain jamüin saaʼin nümüin tü pünüikikat. Sutuma tia, kojuteerü nümüin ojuʼitaa namaa na waneeinnua sünain aküjaa pütchi otta mapüleejeerü nümüin oonowaa sümaa tü püküjakat nümüin süchikijee nüküjüin pütchi.
4. ¿Kasa waaʼinrajatka süpüla wakaaliinjüin wanee jekechi süchikijee nüküjüin pütchi?
4 Püküja tü nünoukteʼerüinjatkat. Nikirajüin Jesuu na nikirajüinkana sünain sukuwaʼipa tü aküjaakat pütchi (Mat. 10:5-14). Paainja tia wanaa sümaa niain aküjüin pütchi chi jekechikai, paapaja nünüiki. Pujuʼitapa suluʼujee wanee piichi pipelisitaaja nia süka anain nutuma wanee kasa naainjaka, jaʼitairü piʼrüin choʼujaain nünoukteʼerüin wanee kasa. Nnojo püküjamaatüin nümüin tü nünoukteʼerüinjatkat, paʼatapaja aneerüle shia nutuma suluʼumüin tü wanee piichikat. Eeshi mmorüle neʼe nia. Soto paaʼin nnojoluin wanaawain tü wakuwaʼipakat otta wainmain sukuwaʼipa saainjia tü kasakalüirua (1 Cor. 12:4-7).
5. ¿Jamüinjatü pünüiki püküjüinjatüle tü nünoukteʼerüinjatkat wanee eiwaʼai aküjaa pütchi?
5 Eeshi niale achuntüin pümüin kasain nünoukteʼerüinjatüin sünain nünüiki. Nnojorüle müin shia, paashajaa nümaa sümaa anain pünüiki. ¿Jamüinjatü sukuwaʼipa? Müsü nanüiki noʼutku na aküjülii pütchi atüjakana maʼin: «¿Eesü süpüla taküjüin pümüin wanee kasa pünoukteʼerüinjatka?» «Saaʼin pümüin, ¿jamüsü sukuwaʼipa putuma?». Eeshi süpüla pümüin: «Toʼttaiwaʼaya sünain aküjaa pütchi, kapüleesü maʼin tamüin..., akatsaʼa tü akaaliinjakat taya shia...». Eesü anale paashajeʼerawaire nümaa tü karalouktakat Razonamiento. Akatsaʼa nnojo püküjüin wainma kasa nümüin, püküja neʼe waneesia kasa nünoukteʼerüinjatka sünain nünüiki.
6. Sünain tü aküjaakat pütchi, ¿jamüsü süpüla kasain wanee kachueera süka wanee kachueera?
6 Kasasü wanee kachueera süka wanee kachueera. Mayaapejeʼe nütüjüin maʼin aküjaa pütchi Timoteo, aluwataanüshi nia nutuma Pablo sünain ayatüinjachin nikirajaain otta laülaain naaʼin sünain anoujaa (1 Tim. 4:13, 15). Jaʼitairü sülatüin kojuya juya süchikijee puʼttüin sünain aküjaa pütchi, ayata kooʼomüin putuma tü pütüjaakat aaʼu. Pütüja nanainjee na püküjakana amaa pütchi jaʼitaina nayain na pütüjakana oulia. Eeja paaʼin süpüla pükaaliinjüin na puwalayuukana, na jekennuukana aküjüliin pütchi süpüla natüjüin maʼin aküjaa tü pütchi anasükat (Pro. 27:17).