¿Kooʼomüinjeerü piʼyataain nümüin Maleiwa?
1. ¿Kasa kooʼomüinjatka atuma waʼyataain maatsoʼu, awüriiroʼu otta maayoʼu?
1 ¿Eesüche süpüla kooʼomüin piʼyataain nümüin Maleiwa soʼu kashika maatsoʼu, awüriiroʼu otta maayoʼu? Eesü jouktaleʼurüle jee nujuʼitüle maalü chi Kaʼikai eere kepiain pia otta wakasionle pia suulia aʼyatawaa jee koleejiaa. Anasü maʼin aküjaa pütchi suʼunnaa tia. Jee ounejaaneena na wayuukana soʼujee awüriiroʼu 2 sünain tü outkajawaa eejeetkat awüriiroʼu 17 süpüla Sotuin Waaʼin ouktüin Jesuu. Süchikijee tia, eeshii süpüla ayatüin wouyantüin nanainmüin na wayuu outkajaakana otta wounejaain naya süpüla naapajüin tü pütchi aküjüneekat soʼu tü semaana oʼttakat awüriiroʼu 25. Wainma tü kasa kooʼomüinjatkat atuma waʼyataain maatsoʼu, awüriiroʼu otta maayoʼu.
2. ¿Jarat tü wanee kasa anashaatakat maʼin kooʼomüinka atuma waʼyataain?
2 Pürekutsoot aaʼusiliaat pia. Wanee sukuwaʼipa anaka maʼin süpüla kooʼomüin waʼyataain nümüin Maleiwa shia pürekutsoorüle aaʼusiliaat waya. Süka wainmain tü waʼyataainkat, choʼujaasü watüjaain saaʼu tü waainjüinjatkat otta waʼwanajaain sükalia tü waainjawaikat (Pro. 21:5). Eesü eeitpale tü paainjüinjatkat soʼu tia kashikalüirua. Akatsaʼa nnojorüle choʼujaain maʼin shia, eesü süpüla paainjüin shia mapeena (Fili. 1:9-11). Püküja namüin waneeinnua wawalayuu pürekutsooleein pia süka eein süpüla pürekutsoolüin naya wanaa pümaa.
3. ¿Kasa naaʼinrüinjatka na wayuukana sümaa napüshi süpüla kooʼomüin naʼyataain?
3 Eesü süpüla jaainjüin tüü: jaashajaa süchiki tü jüsaʼwateekat amüin soʼu tü Ai Juʼwaajakat oʼu Maleiwa sümaa Jüpüshi (Pro. 15:22). Müleka jükaaliinjiraale eeshii süpüla pürekutsoolüin noʼutku jüpüshi soʼu wanee jee kojuya kashi. ¿Jama jiʼrüle isain shia jüchiki? Eesü süpüla jüchajaain sukuwaʼipa süpüla kooʼomüin jiʼyataain sünain aküjaa pütchi maʼaka aliikawai jee kamaʼawaire jia sünain aküjaa pütchi saawanoʼu jee rimiinkoʼu.
4. ¿Kasa weʼreetka kooʼomüinre waʼyataain maatsoʼu, awüriiroʼu otta maayoʼu?
4 Niʼrüin Jeowa süpüshuaʼa tü waainjakat süpüla waʼyataain nümüin otta kojutüsü shia nümüin (Heb. 6:10). Talatüshii waya waʼyataale nümüin Jeowa otta wakaaliinjüle na wayuukana (1 Cró. 29:9; Aluw. 20:35). ¿Eesüche süpüla kooʼomüin piʼyataain nümüin Maleiwa maatsoʼu, awüriiroʼu otta maayoʼu? Paainjüle tia, talateechi pia otta piʼreerü kasa anasü sünainjee.