Waaʼinmaja tü jülüjakat waaʼin
1. ¿Kasaichi sünülia tü outkajawaa miyoʼu piamakat kaʼi oʼtteetka settienpüroʼu 2012? ¿Jamüsü choʼujaaka wekirajaain sünain?
1 Niʼiküin Jesuu na nikirajüinkana sünain alinjachin napüla Jeowa süka süpüshuaʼa naaʼin otta jülüjüinjachin nia naaʼin waneepia (Mat. 22:37, 38). Akumajünüsü sukuwaʼipa tü outkajawaakalüirua miyoʼu süpüla anainjatüin watuma tü sünainpünaakat waaʼin. Aküjünüitpa wamüin sünülia tü outkajawaa miyoʼu apünüinkat kaʼi: «Paaʼinmaja tü paaʼinkat». Sünülia tü outkajawaa miyoʼu waneekat kaʼi oʼtteetka settienpüroʼu 2012 shia: «Wule watuma tü waaʼinkat» otta tü outkajawaa miyoʼu piamakat kaʼi shia: «Waaʼinmaja tü jülüjakat waaʼin», suluʼujeejatü shia Mateo 22:37. Sükaaliinjeena waya tü outkajawaa miyoʼu piamakat kaʼi süpüla anain sukuwaʼipa watuma tü jülüjakat waaʼin nuʼupala Jeowa.
2. Püküja tü pütchi asouktüneetkat eʼipajee.
2 ¿Kaseerü ekirajaanaka anain? Soteesü waaʼin tü ekirajaanakat anain sujutaapa tü outkajawaakat. Makalaka anain washajüle tü asouktüneetkat shiʼipajee pütchikalüirua tüü:
• ¿Kasa waaʼinrüinjatka suulia jülüjüin waaʼin tü jülüjakat naaʼin na manoujüinsaliikana?
• ¿Jamüinjatü nakaaliinjia watuma na wayuu asürünnakana ekii?
• ¿Kasa wayuu jülüjüinjatka waaʼin?
• ¿Kaseerü weʼraka anale watuma tü jülüjakat waaʼin?
• ¿Jamüinjatü sukuwaʼipa watuma süpüla anainjatüin nutuma Jeowa tü jülüjakat waaʼin?
• ¿Kasa naaʼinrüinjatka na kaʼwayuuseekana, na wayuu kachonshiikana otta nachonnii süpüla talatajiraain naya?
• ¿Kasa waaʼinrüinjatka süpüla watüjaain saaʼu keraain waya süpüla nükalia Jeowa?
• ¿Jamaluʼulu eeinjatüin waaʼin süpüla tü waaʼinrüinjatkat?
• ¿Jameerü nakuwaʼipa na oonookana sümaa tü nekirajaakalü anain?
3. ¿Jamüshii woʼunüinjanaka sünain tü outkajawaa miyoʼu piamakat kaʼi? ¿Jamüsü jülüjüinjatka waaʼin tü ekirajaanajatkat anain otta waainjüinjatka shia?
3 Keeʼireesü naaʼin Satanaa numojujeʼerüin tü jülüjakat waaʼin otta nüchajaain maʼin sukuwaʼipa tia (2 Cor. 11:3, NM). Makalaka choʼujaain waaʼinmajüin tü jülüjakat waaʼin, jülüjüin waaʼin tü jülüjakat naaʼin Kürisüto otta wayouktüin nakuwaʼipa na manoujüinsaliikana (1 Cor. 2:15,16). Wachajaa sukuwaʼipa süpüla chain waya sünain tü outkajawaa miyoʼu piamakat kaʼi otta jülüja maʼin waaʼin tü ekirajaanajatkat anain. Waainjüle tü aküjünajatkat wamüin sünain tü outkajawaakat, sükaaliinjeena waya süpüla eeinjatüin waaʼin süpüla waʼyataain nümüin Maleiwa süka süpüshuaʼa waaʼin (1 Ped. 1:13).