Atüjüinjana waya aküjaa pütchi: washaja suluʼu karaloukta nanülia na wayuu ekirajaweekana

Müshi Pablo nümüin Timoteo: «Ee paaʼin sünain tü pukuaippakat suulia paaʼinrajüin kasa mojusü jee suulia pikirajüin sünain kasa naatajatü» (1 Tim. 4:16). Tü nümakat Pablo nümüin Timoteo, shiiʼiyatüin wamüin watüjüinjanain maʼin aküjaa pütchi. Müsüjeseʼe wekirajaʼawalinjatüin anain suluʼu Waʼyataain nümüin Maleiwa wanee pütchi jeketü kanüliaka «Atüjüinjana waya aküjaa pütchi». Wekirajaʼawalinjatü anain suluʼu tia pütchikat tü waaʼinrajatkat süpüla watüjüinjanain maʼin aküjaa pütchi. Anasü müleka waaʼinrüle kashiwai tü aküjünakat wamüin yala. Sajaʼttiamüin wanee kashi, eesü süpüla waküjüin süchiki tü kasa anasü weʼrakat sünainjee waaʼinrüin tia. Waküjüinjatü tia suluʼu tü outkajawaakat Waʼyataain nümüin Maleiwa. Sünain ekirajaayakat tüü, waashajaainjatü achiki jamüin anaka ashajaa suluʼu karaloukta nanülia na wayuu ekirajaweekana wamaa sünain tü Wiwüliakat.

¿Jamüsü waaʼinrajatka shia? Shia sutuma wouyantüinjanain wachikuaʼa eemüin na wayuu ekirajaweekana wamaa sünain tü Wiwüliakat otta wekirajüinjanain naya süchiki tü shiimainkat nüchiki Maleiwa. Waaʼinrüle tia, müsü waʼyonokoi wüin saaʼu wanee waüyee wapünajaka suluʼu naaʼin (Mat. 28:​19, 20; 1 Cor. 3:6-9). Müshiijeseʼe waleʼejüinjanain wachikuaʼa nepialuʼumüin na wayuukana süpüla yootuin waya namaa süchiki tü naashajaweekalü achiki otta süpüla waashajaakalüinkat achiki namaa. Müsüjeseʼe anain maʼin washajüle suluʼu karaloukta nanülia na wayuu ekirajaweekana wamaa sünain tü Wiwüliakat.