Yalayalashii waya sutuma tü weeʼirajakat nümüin Jeʼwaa

Eeʼirajüshi Pablo nümaa Silas nümüin Jeʼwaa wanaa sümaa püreesain naya (Alu 16:25). Otta eeʼirajapuʼushii nümüin Jeʼwaa na wawalayuu chajanakana püreesain Sachsenhausen wanaa sümaa naluwataain na kanüliakana nazi chaa Alemania otta wanaa sümaa najütünüin chamüin Siberia. Shiiʼiyatüin tia wamüin, yalayalain waaʼin sutuma weeʼirajüin nümüin Jeʼwaa kasale alatüin wamüin.

Ojuʼiteerü joo alijunaikiruʼu tü jeketkat karaloukta weeʼirajüinjatka aka nümüin Jeʼwaa, anuu sünülia: Cantemos con gozo a Jehová. Eepa shia wamaʼana, wooʼulaka tü jayeechikat waʼwaajapa Jeʼwaa sümaa wapüshi (Éf 5:19). Wooʼulakünüle aaʼin, soteerü waaʼin tü jayeechikat nutuma chi naaʼinkai Maleiwa. Sotusü waaʼin tü kasa waʼatapajakat sutuma tü jayeechikat. Katchinsü waaʼin sutuma. Anale waaʼin, talateena waya sünain eeʼirajaa nümüin Jeʼwaa (1Cr 15:16; Sl 33: 1-3). Müsüjeseʼe kojutüinjatüin wamüin tü weeʼirajakat nümüin Jeʼwaa.

PIʼITAA TÜ VIDEOKOT EEʼIRAJUUSHI KATCHINKA ATUMA NAAʼIN SULUʼU TÜ KAATSETKAT. OTTA PÜSAKIRA SÜNAIN TÜÜ:

• ¿Kasa alataka nümüin chi wawalakai Frost nüshajaka anainjee wanee jayeechi?

• ¿Jamüsü naaʼin na wawalayuu chajanakana püreesain Sachsenhausen sutuma tü jayeechikat?

• ¿Kasa sükatchinraka anain waaʼin tü jayeechi weeʼirajakat nümüin Jeʼwaa?

• ¿Jarat tü jayeechi pütüjeekalü apüleerua süpüla piiʼirajüin nümüin Jeʼwaa?