Katsüinsü wanoula sutuma tü jayeechikalüirua

Nüsülajala Jehová wamüin tü jayeechikalüirua. Eesü süpüla anain naaʼin wanee wayuu sutuma, talatüin naaʼin jee sütütüleʼerüle naaʼin. Müsia neʼe waaʼin waapajapa tü jayeechi eʼitaanakat suluʼu JW Broadcasting^®. Antüsü suluʼumüin waaʼin jee arütkaashii waya nünainmüin Jehová sutuma.

Alatüsü suulia 70 jayeechi aainjünakat soʼujee juyakat 2014 otta eesü wanee alatüsü suulia 500 anüikii saainjünakalü aluʼu. Eesüjaʼa jülüjale paaʼin: «¿Jamüsüche saainjia tia jayeechikalüirua? ¿Jara akürawaajaka shia?».

Tü aainjünakat süpüla sukumajünüin wanee jayeechi

Jülüja saaʼin Comité de Enseñanza naʼyataain na wawalayuu aʼyataakana suluʼu Audio y Video otta na wawalayuu jülüjakana aaʼin sukuwaʼipa tü jayeechikalüirua süpüla saainjünüinjatüin waneirua jayeechi maʼaka saaʼin tü eʼitaanakat suluʼu Broadcasting. Poloo apünüinshii na wawalayuu jülüjakana aaʼin sukuwaʼipa tü jayeechikalüirua, nakumajüin tü sukuwaʼipainjatkat, nanouteʼerüin shia, jülüjasü naaʼin tü choʼujaakat süpüla sükürawaajünüin jee waneirua kasa. Na wawalayuu aʼyataakana suluʼu Comité de Enseñanza naneeküin wainma wawalayuu suluʼujeejanakana kojuya mma süpüla nakaalinjainjanain. Naʼakajee naya wawalayuukana, eeshii na ashajüliikana jayeechi na atalejüliikana otta eeʼirajülii. Nnojotsü yaletüin naaʼin na wawalayuukana, aʼyataashii naya nümüin Jehová süka süpüshuaʼa naaʼin otta nnojotsü nachajaain kojutuin naya atumawaa sünainjee tü naʼyataainkat.

¿Jamüsü sukuwaʼipa saainjia tü jayeechikalüirua? Na wawalayuu aʼyataakana suluʼu Comité de Enseñanza naneeküin wetsiikulo suluʼujee tü Bibliakat süpüla saainjünüinjatüin tü jayeechikat jee süpüla sütanalüin naaʼin na aapajakana shia. Akaʼaya na wawalayuu jülüjakana aaʼin sukuwaʼipa tü jayeechikalüirua naneeküin chi atalejüinjachikai otta chi ashajuushika tü jayeechikat. Akürawaajünüsü tü jayeechikat süpüla naapajüin shia palajana na wawalayuu aʼyataakana suluʼu Comité de Enseñanza otta süpüla nanouteʼerüinjatüin tü jayeechikat choʼujaale shia. Kettaapa tia natuma, na wawalayuu jülüjakana aaʼin sukuwaʼipa tü jayeechikalüirua nanouteʼerüin shia süpüla sükürawaajünüin. Naatawai eere sükürawaajünüin tü jayeechikalüirua, eesü sükürawaajünüle shia suluʼu Weteet jee shiale nepialuʼu waneinnua wawalayuu.

Wainma kasa choʼujaakat namüin na wawalayuukana süpüla naainjain jee nakürawaajüin wanee jayeechi. Choʼujaasü programa süpüla ashajaa jayeechi, tü atalejünüinjatkat sünain tü jayeechikat, mezcladores de sonido, micrófono otta emiyoʼujia pütchi. Kojutusü maʼin sülia wanee micrófono, eesü eekai 100 dólar sülia, 1.000 dólar jee sülataleere sülia tia. Jamüsüjaʼa soʼu juyakat 2020, 116.000 dólar akataajünaka süpüla shiyaʼlajünüin tü choʼujaakat süpüla sukumajünüin tü jayeechikalüirua.

¿Kasa aainjünaka süpüla kasetirain tü nneetkat? Nnojoishii ounejaanüin watta naalii wawalayuu süpüla naʼyataain suluʼu Weteet sünain akumajaa tü jayeechikalüirua, aneekünüshii waneinnua wawalayuu süpüla nakaalinjainjanain nepialuʼujee otta nnojoishii kottuin napüshuaʼa na wawalayuukana sünain atalejaa, katataawashii naya sünain tia otta akumajünüsü shia mapa süka computador.

«Atütülaasü taaʼin sutuma»

Kamalainsü namüin na wawalayuukana naapajüin tü jayeechikat. Anuu sünüiki Tara, wanee wawala chejeʼewat Alemania: «Mojuwaisü maʼin taaʼin, jimatapejeʼe taaʼin sutuma tüü jayeechikalüirua, süka taapüin shia suluʼu tanüikipala, antüsü suluʼumüin taaʼin, müsü nujuupatakai taaʼin Jehová». Otta müsü nünüiki Dimitri, wanee wawala kepiakai Kazajistán: «Kamalainshaatasü tamüin taapajüin tü jayeechikat, tatüjaa aaʼu suluʼujeejatüin tü Bibliakat tü aküjünakat suluʼu otta sükatsüinrüin tü tanoulakat».

Anuu tü sümakat Delia, wanee wawala kepiaka Sudáfrica: «Atütülaasü taaʼin sutuma tü jayeechikalüirua, jamüsüjaʼa mojule taaʼin jee kasale alatüin tamüin eesü anamaatüle taaʼin sutuma».

Eesü jayeechi kamalainkat maʼin namüin waneinnua wawalayuu. Jamüshijaʼa Lerato chejeʼewaikai Sudáfrica, müsü nünüiki: «Müsü chakai taaʼin suluʼu tü paraiisükat taapajüle tü jayeechi kanüliakat Muy cerca otta tü kanüliakat Maa suluʼukai paaʼin jeketkat mma. Müsü teʼrakai süchikuaʼa tü teikat süsoʼiraain saaʼin jee sujuupatüin taya».

Eesü wanee jayeechi akaalinjaka maʼin wanee wawala chejeʼewat Sri Lanka süpüla yalayalainjatüin maʼin saaʼin. Anuu tü sümakat: «Soʼu wanee kaʼi airuʼutsü maʼin sünüiki tamüin wanee profesora noʼupala na koleejiajiraakana tamaa, saaʼinrüin tia süka taküjalin pütchi nüchiki Jehová. Eimmolojoosü taaʼin, nnojotsü asoutuin taya sümüin. Shiasaʼa tantapa miichipaʼa, süküjain maama tamüin anain taapajüle tü jayeechi kanüliakat Fuerte tú serás, tayaawatüin saaʼu sutuma tü jayeechikat choʼujaain maʼin tekirajaainjatüin süpüla tasoutuin saaʼu tanoula. Taashajaaka sümaa tü profesorakat waneemüin kaʼi, saapajüin tanüiki jee süküjain tamüin shiyaawatüitpain saaʼu tü tanoujakalü anain. Anataʼaleesüjaʼa maʼin tü nupueulosekat Jehová eeka sutuma jayeechi anaka maʼin katchinka atuma wanoula».

Jalejeekuwat tü nneerü aainjünaka aka tü jayeechikalüirua, sünainjeejatü tü nneerü jüsülajakat süpüla süküjünüinjatüin tü pütchikat sainküin mmakat süpüshuaʼa. Asülajünawaisü shia suluʼupünaa donate.jw.org. Waapüin analuʼutkat jümüin süka jüsülajüliin maʼin.