AYATAʼAYA PIKIRAJÜIN WAYUU
EKIRAJAAYA 7
Ayataʼaya pükaalinjain wayuu
Pütchi shiyuʼluushika anainjee: «Mojoʼlooinkalaka naya sünain ekirajaa jee sünain aküjaa pütchi» (Aluw. 5:42).
Tü sukuwaʼipakat nutuma Pablo
1. Pünaja tü VIDEOKOT jee shiale paashajeʼerüin Aluwataaushikana 19:8-10. Süchikijee tia püsakira sünain pütchikat tüü:
1. ¿Kasa naainjaka Pablo süpüla nükaalinjain na wayuu kamalainkana amüin tü pütchikat mayaainjeʼe eein na wayuu ayoutakana shia?
2. ¿Jeʼratua nukua Pablo namaʼanamüin na wayuu kamalainkana amüin tü pütchikat otta jeʼra nükalia sünain aaʼinraa tia?
Tü watüjakat nünainjee Pablo
2. Choʼujaasü maʼin wouyantüinjanain namaʼanamüin na wayuu waküjakana amüin pütchi süpüla wekirajüinjanain naya sünain tü Bibliakat.
Waaʼinra tü naaʼinrakat Pablo
3. Puuyanta nümaʼanamüin chi wayuukai soʼu tü kaʼi anashiikalü oʼu shia nümüin. Püsakira paaʼin sünain tüü: «¿Jaratche tü kaʼi anakat süpüla yootuinjachin taya nümaa chi wayuukai? ¿Jalasü anashiin süpüla yootuin taya nümaa chi wayuukai? ¿Joujainjachin yootokai taya nümaa?». Eeshi süpüla puuyantüin nümaʼanamüin chi wayuukai jaʼitasü nnojoluin shiain tü oora anashiikalü oʼu shia pümüin.
4. Püsakira chi wayuukai joujain anain süpüla yootuin pia nümaa püchikuaʼa. Süchikijee yootuin pia nümaa, püsakira jaralüin tü oora anashiikalü oʼu nümüin süpüla yootuinjachin pia püchikuaʼa nümaa, anashi puʼunule nümaʼanamüin soʼu tü oora nümakat pümüin.
5. Ayataʼaya puuyantüin sümaʼanamüin wayuu. Nnojo jülüjain paaʼin nnojoluin kasajatüin nümüin wanee wayuu tü pütchi püküjakat sünainjee neʼe nnojoiwalin nia nipialuʼu jee kupaʼawaire nia (1 Cor 13:4, 7). Ayataʼaya puuyantüin nümaʼanamüin chi wayuukai, jülüjeepejeʼe paaʼin jeʼratuwaichin puʼunuin nümaʼanamüin (1 Cor. 9:26).