¿Paaʼinramaatüin shia?
¿Kasa waashajaaka achiki? Shia süchiki wepirajüinjatüin tü karaloukta wamaʼanakat wayakana na Aküjülii pütchi woutiisakana, weeʼiyataka aka wayouktüin isha [Venezuela: dpa-S Ven (Poder en materia de atención médica). Colombia: DCP (Directriz anticipada y carta poder para atención médica)]. Süka nnojoluin watüjaain aaʼu ‹tü alatajatkat wamüin mapeena›, choʼujaasü waneeküin tü wunuʼu wachekakat otta tü aainjünajatkat waka mayeinre waya otta washajüinjatü shia suluʼu tia karalouktakat (Sant. 4:14; Aluw. 15:28, 29, NM). Süpüla watüjaain saaʼu tü waneeküinjatkat, akumajünüsü tü peliikula kanüliakat Asistencia médica sin transfusiones. Necesidades y derechos del paciente. Pünaja shia palajana, süchikijee puʼuraaja otta püküja süka palitchon pütchi tü shikirajakat anain pia sükajee tü asakiraa sünainkat karalouktakat tüü. (Süka suwaʼnnüin wayuu suluʼu tia peliikulakat, wachuntüin namüin na kachonshiikana jülüjüinjanain naaʼin na tepichikana wanaa sümaa nanajüin shia.)
1) ¿Jamüshii naashajaaka nachikuaʼa noʼutku na tottootkana süchiki tü eʼiteʼeraakat isha? 2) ¿Kasa awaʼnnaka sünain apünüinsü wayuu sümaa nnojoluin shiʼitaanüin isha sünain? 3) ¿Jeʼrashii na tottootkana otta na atüjakana awaʼlaa wayuu achekaka naʼwalüin naya sümaa nnojoluin neʼitaain isha nanain? ¿Jamüsü naaʼinraka shia? 4) ¿Kasa aküjünaka süchiki tü eʼiteʼeraakat isha ekirajaanaka anain suluʼu kojuyasü pitaalü? 5) ¿Kasa tü eekat süpüla sülatüin shiʼitaanüle isha sünain wayuu? 6) ¿Jamüsü anaka naashin waneeinnua tottoot nnojorüle shiʼitaanüin isha sünain wayuu? 7) ¿Jamüsü mashaka wanee wayuu? ¿Jeʼra isha ayataka atuma katüin soʼu wanee wayuu? ¿Kasa aainjünajatka süpüla kooʼomüinjatüin shia? 8) ¿Jamüsü süpüla sükooʼomüinjünüin nünain chi ayuuishikai tü kanüliakat eritrocitos (glóbulos rojos)? 9) ¿Kasaichi sünülia tü kasairua nnojotkat amülain maʼin atuma süsha wanee wayuu wanaa sümaa suwaʼnnüin? 10) ¿Eeshi süpüla nuwaʼnnüin wanee jintüi mayeinka maʼin sümaa nnojoluin shiʼitaanüin isha nünain? 11) ¿Kasa tü kojutükat maʼin namüin na tottoot anakana maʼin atuma sukuwaʼipa naʼyataain? 12) ¿Jamüsü choʼujaaka waküjüinjatüin palajana jaralüin tü wunuʼu waneekakat suulia shiʼitaanüin isha wanain? ¿Jamüinjatü süneekia watuma?
Waneeküinjatpa süpüshi tü wunuʼu eeʼiyatünakat suluʼu tü peliikulakat, waneeküinjatü shia waneʼewai wakua pansaa sümaa tü shikirajakat anain waya tü Wiwüliakat. ¿Pütüjaaitpa aaʼu tü wunuʼu pücheküinjatkat otta tü aainjünajatkat püka otta naka na püchonniikana? ¿Pipirajüitpa tü karaloukta piiʼiyatakat aka piyouktüin isha? Pikirajaa sünain süpüshuaʼa tü kasa sünainpünaakat tü ishakat suluʼu tü karalouktakat «Ayata alin jüpüla Maleiwa», ekirajaaya 7 otta pikirajaa sünain tü karaloukta achuunajünakat suluʼu. Pikirajaa sünain tü pütchi kanüliakat «¿Jamüsü tanüiki süchiki tü ayuʼnnakat saʼakajee isha otta tü aainjünakat süka?» suluʼu Waʼyataain Nümüin Maleiwa, nowienpüroʼu, 2006. Pünaʼla pansaale süshajia putuma tü püneekakat suluʼu tü karaloukta piiʼiyatakat aka piyouktüin isha. Natüjaainjatü aaʼu tia na wayuu asouktüinjanakana paaʼu otta wanee püpüshi nnojoikai anoujüin.
[Epiikürape suluʼu süpanaka 3]
• ¿Pütüjaaitpa aaʼu tü wunuʼu pücheküinjatkat otta tü aainjünajatkat püka otta naka na püchonniikana?
• ¿Pipirajüin otta pülüʼüjüin waneepia tü karaloukta piiʼiyatakat aka piyouktüin isha jamaleere pukuwaʼipa eepünaale pia?