Tü palajanakat watuma
1. ¿Jamüsü shiiʼiyatia nutuma Jesuu shiain kojutüin nümüin tü aküjaakat pütchi?
1 Shia palajanaka nutuma Jesuu tü aküjaakat pütchi. Süka naaʼinrüin maʼin tia, waraittüshi nia sainküinpünaa Palestina sünain aküjaa pütchi sümüin wainma wayuu. Otta müsia, nnojotsü wainmain kasa nümaʼana shiiʼiree nükatalüin maʼin kaʼi süpüla aküjaa pütchi otta shiainjatüin jülüjüin maʼin naaʼin (Mat. 8:20). Wanaa sümaa naʼalijinneein natuma na wayuukana süpüla niiyajüin na ayuuishiikana, müshi nia namüin: «Acheküshi taküjüinjachin tü pütchi anasükat suluʼupünaa tü pueulokat süpüshua, süchiki nukuaippa Maleiwa sünain aluwatawaa, süka shiain ajütünüin apüla taya» (Luc. 4:43).
2. ¿Jamüsü kojutüka nümüin Jesuu tü aküjaakat pütchi?
2 ¿Jamüsü kojutüka nümüin Jesuu tü aküjaakat pütchi? Shia süka keeʼireein maʼin naaʼin wulein nünülia Maleiwa (Mat. 6:9, NM). Otta müsia süka alin nüpüla chi Nüshikai, naaʼinreein tü Keeʼireekat naaʼin otta oonoweeshi sümüin tü Nuluwataakat anain nia (Juan 14:31). Otta müsia jülüjüshii naaʼin na wayuukana otta nükaaliinjeein naya (Mat. 9:36, 37).
3. ¿Jamüsü süpüla weeʼiyatüin shiain palajanain watuma tü aküjaakat pütchi?
3 Süshatia nukuwaʼipa Jesuu. Eesü kapüleere wamüin jülüjüin waaʼin tü jülüjakat naaʼin Jesuu süka wainmain tü kaʼi amülouikat watuma sünain aaʼinraa tü kasa aainjünakat maaʼulu otta sutuma tü kasa weʼrakat otta waapajaka (Mat. 24:37-39; Luc. 21:34). Makalaka choʼujaain waaʼinrüin tü kasa kojutükat maʼin otta wakatalüin kaʼi süpüla yapain waya süpüla aküjaa pütchi otta ojuʼitaa weinshi (Fili. 1:10, NM). Otta taasia, nnojoluinjatü kachiiruain waaʼin wainma kasa jee nnojoluinjana sünainpünaain waya tü kasa aainjünakat mmapaʼa (1 Cor. 7:31, NM).
4. ¿Jamüsü anaka watüjaale saaʼu tü palajanainjatkat watuma maaʼulu?
4 Wanaa sümaa palitchoin kaʼi eeka nüpüleerua wanee wayuu eeka kekiin, niyaawata aaʼu kasain palajanainjatüin nutuma. Weʼitaa wanee shiyaawase, shiʼiteere wanee juya wawaimaajatü, shia jülüjaka maʼin naaʼin wanee wayuu anainjatüin nakuwaʼipa na nüpüshikana otta naapirüin na kepiakana nüʼütpaʼa. Tü wanee kasakalüirua eesü süpüla naainjüin shia mapeena, ¿aashimüin? Müsia Armagedón, alüʼütsü süpüla süntajatüin (Sof. 1:14-16; 1 Cor. 7:29, NM). Keeʼireere waaʼin katüin woʼu otta noʼu na aapajakana wanüiki, jülüjüinjatü waaʼin tü wakuwaʼipakat otta tü wekirajiakat naʼaka na wawalayuukana otta na waneeinnua. (1 Tim. 4:16, NM). Süpüla katüin woʼu, choʼujaasü shiain palajanain watuma tü aküjaakat pütchi.