‹Kamanee jia sümüin wayuu süpüshua›
1. ¿Jarat tü pütchi sotojooinjatkat waaʼin saashichijaale wayuu wooʼomüin suʼunnaa waküjüin pütchi sümüin?
1 Wayuu kamaneeshii napüshuaʼa na aʼyataakana nümüin Jeowa. Aküjüshii naya pütchi anaka atuma sukuwaʼipa wayuu (Is. 52:7). Eepajaʼa na wayuu jashichijaakana wantapaatapa nepialuʼu sünain waküjüin pütchi namüin. Wekirajaa sünain tü waaʼinrüinjatkat, süpüla kamaneein waya namüin na wayuu aashichijaakana wooʼomüin (Roma 12:18).
2. ¿Jamüsü choʼujaaka maʼin kekiinjanain waya?
2 Wayuu kekiinjana waya. Eeshii na wayuu jashichijaakana wamüin saaliinje tü pütchi wekirajakalü anain, eetaashi joo na wayuu jashichitüjüliikana wapüla sutuma sülatüin wanee kasa namüin. Nnojotsü jamajatüin namüin waneeinnua wayuu tü pütchi wekirajakalü anain, sutuma jaa müin naya sümüin perulawaa aashajaanaka nachiki na aküjüliikana pütchi nüchiki Jeowa (2 Cor. 4:4). Wayuu kekiinjana maʼin waya suʼunnaa tia süpüla kamaneeinjanain waya, wayaawatüinjatü aaʼu eein süpüla sülatüin tia, jaʼitasüjeʼe nnojoluin shiain saaʼujee tü pütchi wekirajakat (Prov. 19:11).
3. ¿Kasa wayuu waaʼinrüinjatka süpüla weeʼiyatüin kojutüin wamüin na wayuu waküjakana amüin pütchi?
3 Kojutüinjatü wamüin wayuu. Suluʼu tü mma waküjakalü aluʼu pütchi, wainma na wayuu anoujakana sünain naata kasa (2 Cor. 10:4). Nnojorülejeʼe naapajeein naya wayuukana tü pütchi waashajaainjatkalü achiki namüin, nayajaʼa neʼe aneekaka tia. Nnojotsü mojutüinjatüin wamüin tü nanoujakalü anain na wayuu waküjakana amüin pütchi, nnojotsü joo waküjüinjatüin namüin nnojoluin kasain natüjaain aaʼu. Najünajaale waya, oʼunamaatüinjana waya yalejee sümaa weeʼiyatüin kojutüin naya wamüin.
4. ¿Kasa waaʼinrüinjatka süpüla kemeʼeriain wanüiki waküjapa pütchi?
4 Kemeʼeriainjatü wanüiki waashajaapa. Kemeʼeriainjatü wanüiki sümüin wayuu, jaʼitairü mojuin sünüiki wamüin, kamaneeinjanaʼaya neʼe waya sümüin (Col. 4:6; 1 Ped. 2:23). Nnojoishii waya aʼülüjiraainjanain namaa na wayuukana, aashajaainjana waya namaa süchiki tü wanaawakat sünain wanoula. Kamaneeinjana waya namüin wasakirapa naya sünain tü nayouktajakalü aaʼujee tü pütchi waashajaakalü achiki namaa. Jashichire maʼin naya, shia anaka aluʼu woʼunamaatüle noulia (Prov. 9:7; 17:14).
5. ¿Kasa anasü weʼreetka müleka kamaneere waya sümüin wayuu wanaa sümaa waküjüin pütchi?
5 Kamaneere waya sümüin wayuu mayaapejeʼe jashichin naya wamüin, soteerü naaʼin wanee kaʼi kamaneeinkain waya namüin, shiajeseʼe nüntapa joo wanee wawala sünain nüküjüin pütchi suluʼujeejatka tü Wiwüliakat namüin, naapajeerü shia (Roma 12:20, 21). Nnojotsü jaralüin atüjaain saaʼu wawaleechire mapa wanee wayuu jashichijaapuʼukai saalin waküjüin pütchi nümüin (Gal. 1:13, 14). Anale nukuwaʼipa wanee wayuu waküjakai amüin pütchi watta kaʼi jee jaʼitasüjeʼe nnojoluin anain shia, ayatüinjanaʼaya waya kamaneein sümüin wayuu, wachecherüinjatü waaʼin suulia jashichijaain waya. Waʼwaajüin Jeowa müle wakuwaʼipa jee müsia aneerü maʼin sukuwaʼipa wekirajia (2 Cor. 6:3).