Aainjünajatka sünain tü Outkajawaakat süpüla Aʼyatawaa nümüin Maleiwa
Soʼujee kashikat tüü, aʼwanajaainjatü süküjia tü kasa aainjünakat sünain tü Outkajawaakat süpüla Aʼyatawaa nümüin Maleiwa. Aküjünajatü jooluʼu waneeirua kasa apansaajinnaka otta jeketü suulia tü aküjünakalinkat sünain tü pütchikat «Yapa waya süpüla tü Outkajawaakat süpüla Aʼyatawaa nümüin Maleiwa», ojuʼitaka suluʼu Waʼyataain Nümüin Maleiwa, maayoʼu 2009.
◼ Pütchi. Aküjünajatü tü ekirajaanajatkat anain. Nnojoishi aashajaainjanain na jutkatüshiikana. Jülüjüinjatü naaʼin chi ekirajüinjachikai tü pütchi akaaliinjüinjatkat na wawalayuukana.
◼ Asouktaa shiʼipajee tü asakinnakat anain. Müinjatü aka saaʼin Ekirajawaa sünain La Atalaya, asakinnajatü sünain süpüshuaʼa tü pütchikalüirua. Paliʼirüinjatü nünüiki chi ekirajüinjachikai suʼttajatpa otta sajaʼttajatpa tü ekirajawaakat. Nnojoishi aashajaainjachin maʼin nia. Tü pütchi suluʼujeejatkat tü Wiwüliakat, sünainpünaaka maʼin tü ekirajawaakat aashajeʼennajatü müleka eere minuuto. Nnojotsü aashajeʼennajatüin tü pütchikat, aluʼusaʼa waneejatüle tü aküjünakat.
◼ Ekirajawaa namaa na jutkatüshiikana. Asouktajana na jutkatüshiikana shiʼipajee waneeirua asakiraa. Müsü aka saaʼin wanee pütchi otta eesü asouktaa shiʼipajee.
◼ Eeʼiyataa shiyaawase otta asakinnaa. Süküjünüle shiiʼiyatünüinjatüin shiyaawase wanee ekirajaaya, jülüjüinjatü naaʼin chi ekirajüinjachikai saainjünüin tia mayaapejeʼe nnojoluin choʼujaain niainjachin aainjüin shia. Nüneeküinjana wawalayuu anaka anoula otta anaka atuma sukuwaʼipa tü aainjünajatkat. Yapainjatü tia kojuya kaʼi süpülapünaa tü outkajawaakat müleka eere süpüla saainjünüin. Nnojotsü naaʼinrüinjatüin tia na jekennuukana. Naneekünüle, nayainjana aküjünaka amüin pütchi. Na aainjakana tia, nnojoluinjatü neeʼiyatüin nasapü namüin na jutkatüshiikana. Nüsakinnapa wanee wawala, asouktajachi eejee tü aashajaaleekat, nnojoishi asouktajachin eere joyotüin nia. Supushuaʼa tia, ooʼulakünajatü palajana. Ayatajatü eeʼiyatünüin tü shiyaawasekat otta asakinnüin wanee wawala, jaʼitairü paliʼirüin tü minuuto apütaakat. Chi wawala akumajakai tü aainjünajatkat napüleerua na laülaashiikana jee niale wanee laülaashi, asakinnajana natuma na aʼyataakana neʼipajee süpülapünaa naneeküin wanee wawala süpüla asakinnaa jee eeʼiyataa wanee shiyaawase.
Süküjünüle jamüinjatüin shikirajia wanee pütchi, aainjünajatia shia. Watüjaa aaʼu ‹loteerüin sukuaippa› tü Outkajawaakat süpüla Aʼyatawaa nümüin Maleiwa sutuma tü pütchi aküjünüitpakat (1 Cor. 14:40).