Wekiraja wayuu süka tü poyeetokot Pütchi anasü nutuma Maleiwa
1. ¿Jamüsü anaka maʼin tü poyeetokot Pütchi anasü?
1 Anasü maʼin ekirajaa wayuu süka tü poyeetokot Pütchi anasü nutuma Maleiwa. Weʼrüin tia, wanaa sümaa wekirajaain sünain tü pütchi suluʼukat Waʼyataain nümüin Maleiwa ojuʼitaka juulioʼu. Suluʼu poyeetokot tüü, nnojotsü ashajünüin tü pütchi suluʼujeejatkat tü Wiwüliakat, müsü mayaa süpüla nachajaain na wayuukana tü pütchikat suluʼu Nawiwüliase. Tü karalouktairua weitajakat, süpülajatü nekirajaain na wayuukana namüiwaʼa, aluʼusaʼa poyeetokot tüü, ekirajaanajatü anain nümaa wanee ekirajüi. Paapüinjatüle poyeetokot tüü nümüin wanee wayuu, püküja nümüin jamüin sukuwaʼipa shikirajia wayuu süka. Kamalainjeerü sümüin wayuu atüjawaa saaʼu tü pütchi anasükat nutuma Maleiwa (Mat. 13:44).
2. ¿Jamüinjatü wekirajia süka tü poyeetokot Pütchi anasü soʼu tü palajatkat wakua?
2 Soʼu tü palajatkat wakua: Eeshi süpüla pümüin: «Aküjünüsü maʼin maaʼutpünaa süchiki kasa mojusü sümüin wayuu, ¿anouktaajeetche ee tü kasa mojusükat sainküin mmakat? [Puuʼulaa nusouktai.] Anasü waaʼin sutuma tü sümakat tü Wiwüliakat. Suluʼu karalouktakat tüü, aküjünüsü süpüshi tü kasa süküjaka achiki tü Wiwüliakat». Piiʼiyata nümüin tü pütchichein süsapoʼujeekat tü poyeetokot otta püsakira nia jaralüin tü pütchi anakat nümüin. Nüneekapa wanee pütchi, pikirajaa nia sükajee otta piiʼiyata nümüin jamüin shikirajia wayuu süka tü poyeetokot. Wanee kasa eeka süpüla paaʼinrüin shia püsouktüin shiʼipajee wanee pütchi sükajee tü poyeetokot otta süka tü Wiwüliakat, püneeküinjatü shia palajana. Eere wanee video suluʼu jw.org sünainpünaaka tia ekirajaayakat, eesü süpüla piiʼiyatüin shia namüin na wayuukana.
3. Püküja jamüinjatüin shikirajia wayuu süka tü poyeetokot Pütchi anasü.
3 Wekirajapa wayuu süka: 1) Paashajeʼera tü pütchi yuuikat süshajia süpüla sütüjaainjatüin saaʼu wayuu kasain waashajaainjatüin achiki. 2) Süchikijee, paashajeʼera tü pütchikat. 3) Paashajeʼera suluʼujee tü Wiwüliakat tü pütchikat «püleeja» makat. Süpüla shiyaawatüin wayuu saaʼu tü pütchikat suluʼujee tü Wiwüliakat, püchajaa sukuwaʼipa anainjatüin püsakiria. 4) Müleka piamale jee apünüinre tü pütchi aashajeʼennajatkat, paainja tü aküjünüitpakat suluʼu pütchi 2 otta 3. Eere wanee video asouktaka shiʼipajee tü asakinnakalü anain, piiʼiyata shia müleka nnojotyürüle piiʼiyatüin shia 5) Sajaʼttiamüin püma namüin na wayuukana nasouktai shiʼipajee tü pütchikat, anale nasouktia, nayaawatüinjaʼa saaʼu tü pütchikat.
4. ¿Kasa waaʼinrüinjatka süpüla watüjain maʼin süpüleerua tü poyeetokot Pütchi anasü?
4 Pütüjainjatü apüleerua tü poyeetokot süpüla pikirajüin wayuu süka. Süpülapünaa püntüin nünainmüin chi pikirajüinkai, anasü jülüjüle paaʼin nukuwaʼipaka süpüla pükaaliinjainjachin nia sükajee tü wersiikulokot suluʼuka tü poyeetokot (Prov. 15:28; Aluw. 17:2, 3). Aneerü maʼin pümüin ekirajaa wayuu süka tü poyeetokot, müleka pütüjale maʼin süpüleerua.