Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
TISIENPÜROʼU 7-13
KOROLO KOJUTUSÜ SULUʼUKA TÜ WIWÜLIAKAT | LEVÍTICO 10, 11
«Aireeinjachi maʼin Jeʼwaa wapüla noulia na wapüshikana»
(Levítico 10:1, 2) Mapa, Nadab otta Abihú, na nüchonniikana Aarón, naapaain tü süpülajanakat shimechi siki. Nachuwajaakalaka siki suluʼu jee nejitaka saaʼu tü wunuʼu jemetakalü eejuu jee nachuwajaaka siki nümüin Jeʼwaa sümaa nnojoluin nuluwataain naya. 2 Sujuʼitakalaka wanee siki yaa nümaʼanajee Jeʼwaa otta saʼajakalaka naya, outushiijeseʼe naya nuʼupala Jeʼwaa.
(Levítico 10:4, 5) Neenajüinjeseʼe Moisés Misael otta Elzafán, na nüchonniikana Uziel, chi nülaülakai Aarón. Anuujese nünüiki namüin: «Jalainna yaamüin. Jiyula na juwalayuukana chejee eere tü paü palajatkalü otta jiʼikajaa naya wattamüin». 5 Ayatüsia naainjain tia, nayuluin na outushiikana wattamüin sümaa nanainjatüin tü naanala katünoulekat, naainjain tia maʼakaajüle nümüin Moisés namüin.
(Levítico 10:6, 7) Anuukalaka nünüiki Moisés nümüin Aarón otta nümüin Eleazar otta Itamar, na wanee nüchonniikana: «Ayataʼaya jaaʼinmajüin juʼwala otta nnojo jüchatajaain jüsheʼin suulia outajüin jia otta suulia jashichijaain Jeʼwaa sümüin tü pueulokot. Na juwalayuukana, na nuuʼuliwoʼukana Israel, aʼyalajeena naalii na wayuu nuʼutakana aaʼin Jeʼwaa süka siki. 7 Nnojo juʼunüin soʼuluʼujee tü aʼwaajüleekat Maleiwa. Jaainjale tia, outeena jia süka jamüin, aneekuushin jia nutuma Jeʼwaa sükajee shiʼyotunüin seita jemeta eejuu jaaʼu». Ayatüsia naainjain tü nümakat Moisés namüin.
Püchajaa süchiki kaaʼürüi suluʼu tü Wiwüliakat
(Levítico 10:8-11) Anuukalaka nünüiki Jeʼwaa nümüin Aarón: 9 «Jikerolopa chaa eere taʼwaajünüin, nnojoishi pia asüinjachin wiino namaa na püchonniikana otta müsia waneirua asüüshi. Nnojotsü jaainjainjatüin tia suulia outajüin jia. Taikaleʼerüin pütchikat tüü süpüla naainjainjatüin shia na puuʼuliwoʼukana süpüla kaʼikat süpüshuaʼa. 10 Müle shia putuma piyaawateerü aaʼu tü kasa wulesükat suulia tü mojukalü atuma wanee kasa otta tü kasa wulekat maʼin suulia tü kasa yarüttüsükat, 11 otta jikirajüinjana na israeliitakana sünain süpüshuaʼa tü nuluwataakalü anain jia Jeʼwaa nükajee Moisés».
(Levítico 11:8) Nnojotsü piküinjatüin tü shiʼirukukat otta nnojotsü pipettüinjatüin shia, süka jamüin, shiain wanee kasa yarüttüsü.
TISIENPÜROʼU 14-20
KOROLO KOJUTUSÜ SULUʼUKA TÜ WIWÜLIAKAT | LEVÍTICO 12, 13
«Tü watüjaka süchiki tü lepra aküjünakat suluʼu tü Pütchi Aapünakat nümüin Moisés»
(Levítico 13:4, 5) Müleka kasuutarüle tü ourulakat sünain nüta otta nnojorüle keinyoluin shia jee nnojorüle kasuuin nuʼwala, nuluwataainjachi nia chi sacerdootekai süpüla nükatannüinjachin nümüiwaʼa chi ayuuishikai soʼu akaratshi kaʼi. 5 Soʼu tü akaratshikat kaʼi niʼrajaainjachi nia chi sacerdootekai. Müleka naawalaale suulia tia ayuuliikat otta nnojorüle shia nütoutajee, aluwataanüinjachi nia nutuma chi sacerdootekai süpüla nükatannüinjachin chi ayuuishikai soʼu akaratshi kaʼi sooʼomüin.
(Levítico 13:45, 46) Chi wayuu kanainkai ayuuliikat tüü chatatuainjatü nüsheʼin otta walatüin nuʼwala. Nükoʼoyoluinjatü niimata otta aʼwaatüinjachi nia sümaa nümüin: ‹¡Yarüttüshi taya, yarüttüshi taya!›. 46 Ayateechia yarüttüin nia saakataleepa nuulia tü ayuuliikat, sutuma yarüttüin nia kepiainjachi nia nümüiwaʼa, wattainjatü nipia noulia na waneinnua.
(Levítico 13:52) Naʼajüinjatü tia kuluutkat süka eein sünain tü ayuulii outasiroʼu lepra münakat, naʼajüinjatü tü kuluut aʼanuushikat, tü aainjuushikat süka laana otta lino jee shiale wanee kasa saʼatakat wayuu sünain, eere shiiʼiyalaain tü ayuuliikat. Aʼajünajatü shia soʼu siki.
(Levítico 13:57) Ayatülejeʼeya shiiʼiyalaain tü ayuuliikat jala yaa sünain tü kuluutkat jee shiale sünain tü kuluut aʼanuushikat jee shiale wanee kasa saʼatakalü wayuu sünain, akooʼomüinraasüjaʼa mata tü ayuuliikat. Aʼajünajatü soʼu siki tia kuluut ayuuliimaajatkat.
Püchajaa süchiki kaaʼürüi suluʼu tü Wiwüliakat
(Levítico 12:2) «Püma namüin na israeliitakana: ‹Müleka ipuorule wanee wayuu jee jemeyurule shia sümaa toolochoin chi süchonkai, yarüttüsüjaʼa mata shia soʼu akaratshi kaʼi maʼakaajüle yarüttüin shia wanaa sümaa kakashiain shia.
(Levítico 12:5) »›Müleka jemeyurule shia sümaa jietchoin tü süchonkat, yarütteerüjaʼa mata shia soʼu 14 kaʼi maʼaka yarüttüin shia wanaa sümaa kakashiain shia. Ayateerüjaʼa müin shia soʼu 66 kaʼi wulereepaʼaya shia suulia tü ishakat.
(Levítico 12:3) Soʼu tü mekiisatkat kaʼi oʼyotoonojotü nüta chi joʼuukai.
TISIENPÜROʼU 21-27
KOROLO KOJUTUSÜ SULUʼUKA TÜ WIWÜLIAKAT | LEVÍTICO 14, 15
«Wuleinjana waya waʼwaajapa Jeʼwaa»
(Levítico 15:13-15) »›Mawasainpa chi wayuukai otta wulepa nia, alatajatü akaratshi kaʼi süpüla wuleinjachin nia, nüshijaainjatü nüsheʼin otta oʼoojuinjachi nia shiroku wanee wüin eekai palatüin, wuleechikalaka nia. 14 Soʼu tü mekiisatkat kaʼi niʼikajaainjatü nümüin Jeʼwaa piamasü wawaachi jee shiale piamasü süchonnii toomasü, niʼikajaainjatü shia nümüin chi sacerdootekai soʼuluʼumüin tü aʼwaajüleekat Maleiwa. 15 Chi sacerdootekai naapüinjatü wanee wüchii süpüla sülaʼajaanüinjatüin naainjala chia wayuukai otta müsia tü wane wüchiikat süpüla saʼajünüin nümüin Maleiwa. Achunteechi chi sacerdootekai nümüin Jeʼwaa süpüla sülaʼajaanüin naainjala chia wayuukai saaʼujee kawasain nia.
(Levítico 15:28-30) »›Makashiapa tü wayuukat alatajatü akaratshi kaʼi süpüla wuleinjatüin shia. 29 Soʼu tü mekiisatkat kaʼi shiʼikajaainjatü nümüin chi sacerdootekai piamasü wawaachi jee shiale piamasü süchonnii toomasü, shiʼikajaainjatü shia nümüin chi sacerdootekai soʼuluʼumüin tü aʼwaajüleekat Maleiwa. 30 Chi sacerdootekai naapüinjachi wanee wüchii süpüla sülaʼajaanüinjatüin saainjala tü wayuukat otta müsia tü wane wüchiikat süpüla saʼajünüin nümüin Maleiwa. Achunteechi chi sacerdootekai nümüin Jeʼwaa süpüla sülaʼajaanüin saainjala tia wayuukat saaʼujee kakashiain shia.
(Levítico 15:31) »›Müinjatü sukuwaʼipa jutuma, wattaluʼuinjana jutuma na israeliitakana suulia tü kasa yarüttüsükat suulia outajüin naya saaliijee naʼyarülajüin eere taʼwaajünüin, tü yaakat pasanain nanain.
Püchajaa süchiki kaaʼürüi suluʼu tü Wiwüliakat
(Levítico 14:14) »Niasaʼa chi sacerdootekai naapajeerü süpüshi nüsha chi mürüt oʼutuushikai aaʼin jee nushulerüinjatü sünain nücheʼe chi wayuukai, tü nücheʼe yaakat nikialuʼujee otta nushulerüinjatü shia sünain tü shiikat najapü, tü nikialuʼujeekat, nushulerüinjatü shia sünain tü shiikat nuuʼui, tü nikialuʼujeekat.
(Levítico 14:17) Shiasaʼa tü seita apütaakat sünain süpaʼa najapü chi sacerdootekai, nushulerüinjatü shia sünain nücheʼe chia wayuukai, tü nücheʼe yaakat nikialuʼujee otta nushulerüinjatü shia sünain tü shiikat najapü, tü nikialuʼujeekat. Nushulerüinjatü shia sünain tü shiikat nuuʼui, tü nikialuʼujeekat, nushulerüinjatü tü seitakat eere paala sushulennüin nüsha chi anneetchonkai.
(Levítico 14:25) Nuʼuteechikalaka aaʼin chi anneetchon aapünüinjachikai nümüin Maleiwa saaʼu wanee aainjalaa, niasaʼa chi sacerdootekai naapaajeerü süpüshi nüsha chi mürüt oʼutuushikai aaʼin jee nushulerüinjatü sünain nücheʼe chi wayuukai, tü nücheʼe nikialuʼujeekat otta nushulerüinjatü shia sünain tü shiikat najapü, tü nikialuʼujeekat, nushulerüinjatü shia sünain tü shiikat nuuʼui, tü nikialuʼujeekat.
(Levítico 14:28) Shiasaʼa tü seita apütaakat sünain süpaʼa najapü chi sacerdootekai, nushulerüinjatü shia sünain nücheʼe chia wayuukai, tü nücheʼe nikialuʼujeekat otta nushulerüinjatü shia sünain tü shiikat najapü, tü nikialuʼujeekat. Nushulerüinjatü shia sünain tü shiikat nuuʼui, tü nikialuʼujeekat, nushulerüinjatü tü seitakat eere paala sushulennüin nüsha chi anneetchonkai.
(Levítico 14:43-45) »Ayatülejeʼeya sujuʼitüin tü ayuuliikat sünain tü miichikat mayaapejeʼe süsünneʼennüin tü ipakalüirua otta soojunüin sütoutajee miichikat jee sukumajünüin süchikuaʼa, 44 ekeroteechi chi sacerdootekai otta nünaʼlaajeerü amüin tü miichikat. Müleka sükooʼomüinraale tia ayuuliikat suluʼu tü miichikat shiajaʼa mata wanee lepra outasiroʼu. Yarüttüsü tü miichikat. 45 Nuluwataajeerü wayuu süpüla sujuʼttinnüin tü miichikat, tü ipakalüirua, tü wunuʼukalüirua, tü yeesokat otta tü kasa sünainkat tü miichikat jee süpüshuaʼa tia, alüʼüjüneerü shia wattamüin suluʼujee tia mmakat. Alüʼüjüneerü shia eemüin süpülee tü yarüttüsükat.
TISIENPÜROʼU 28– ENEEROʼU 3
KOROLO KOJUTUSÜ SULUʼUKA TÜ WIWÜLIAKAT | LEVÍTICO 16, 17
«¿Jamüsü wanainpünaaka tü Kaʼi Sülatinnakalü oʼu Naainjala na israeliitakana?»
(Levítico 16:12) »Süchikijee tia, najapateerü shimechi siki soʼujee tü aʼajüleekat sükajee tü ajapajüleekat otta najapateerü piantua ajapatshi wanee wunuʼu jemeta eejuu. Ekeroteechi nia sümaa eemüin tü paükat.
(Levítico 16:13) Nijiteerü soʼu sikikat tü wunuʼu jemetakat eejuu, naaʼinreerü tia nuʼupala Jeʼwaa, kaiteetkalaka shia saaʼu tü Jurasükeet suluʼukat tü aʼwaajüleekat. Tia süpülajatü nnojolinjachin outuin nia.
(Levítico 16:14, 15) »Nütülittireerü süka najapü süpüshi nüsha chi paaʼakai, shiʼipoʼujee tü jurasükeetkat yaa wüinpejeeruʼu sünain. Nütülittireerü süka najapü süpüshi nüsha chi paaʼakai yaa süpüleeruajee tü jurasükeetkat, naainjainjatü tia akaratshitua. 15 »Süchikijee, nuʼuteechi aaʼin chi kaaʼulachonkai, chi süpülajaikai sülatinnüin saainjala tü pueulokot niʼikajaainjatü tia ishakat süchiiruajee tü kuluutkat. Shiasaʼa tia ishakat meerü sukuwaʼipa nutuma maʼakaajüle naainjain süka tü nüshakat chi paaʼakai. Nütülittireerü tü ishakat saaʼu tü jurasükeetkat otta yaa süpüleeruajee.
Püchajaa süchiki kaaʼürüi suluʼu tü Wiwüliakat
(Levítico 16:10) Akaisaʼa chi kaaʼulachon nümüinjachikai Azazel chi ashantanajünakai aaʼu, eʼikajaanüinjachi nümaʼanamüin Jeʼwaa süpüla nülatirüinjatüin naainjala jee süchikijee, ajütünüinjachi nia chaa isashiipaʼa nümüin Azazel.
(Levítico 17:10, 11) »›Niküle isha wanee israeliita jee niale wanee wayuu naatakai oumain kepiakai jaʼaka, ashichijaweechi taya nooʼomüin otta toʼuteechi aaʼin nia. 11 Tü kataakalü oʼu sünainsü tü ishakat otta teʼitaain shia jümüin saaʼu tü aʼajüleekat süpüla sülaʼajaain jaainjala, süka shiain alaʼajaain saainjala wayuu tü ishakat.