Wekirajaainjatka anain sünain tü outkajawaakat Wakuwaʼipa otta Waʼyataain nümüin Maleiwa
NOWIENPÜROʼU 2-8
KOROLO KOJUTUSÜ SULUʼUKA TÜ WIWÜLIAKAT | ÉXODO 39, 40
«Naainjain Moisés süpüshuaʼa tü aluwataanakalü anain nia»
(Éxodo 39:32) Kettaakalaka süpüshuaʼa tü aʼyatawaa sünainpünaakat tü aʼwaajüleekat Maleiwa. Naaʼinrüin na israeliitakana süpüshuaʼa tü aluwataanakalü anain Moisés nutuma Jeʼwaa. Naaʼinrüin shia maaʼayaka nüküjain Jeʼwaa.
(Éxodo 39:43) Nünaʼlaapa Moisés tü naʼyataainkat, niʼrüin sünain naaʼinrüin süpüshuaʼa tü nuluwataakalü anain Jeʼwaa. Anakalaka nünüiki Moisés namüin.
(Éxodo 40:1, 2) Nümakalaka Jeʼwaa nümüin Moisés: 2 «Noʼu chi palajachikai kaʼi soʼu tü palajatkat kashi, püshaʼwaleʼereerü tü aʼwaajüleekat Maleiwa.
(Éxodo 40:16) Naaʼinrüin Moisés süpüshuaʼa tü nuluwataakalü anain nia Jeʼwaa. Naaʼinrüin shia maaʼayaka nüküjain nümüin.
Püchajaa süchiki kaaʼürüi suluʼu tü Wiwüliakat
(Éxodo 39:34) tü sütakat anneerü atiinyajuushika süka ishosü awayannaka saaʼu, tü sütakat foca awayannaka saaʼu otta tü kuluulu sütaüjiakat.
(Éxodo 40:34) Suʼunakalaka tü sirumakat saaʼumüin tü aʼwaajüleekat Maleiwa, eekalaka tü nüpülainkat Jeʼwaa suluʼu tü aʼwaajüleekat.
NOWIENPÜROʼU 9-15
KOROLO KOJUTUSÜ SULUʼUKA TÜ WIWÜLIAKAT | LEVÍTICO 1-3
«Tü asülajünakat nümüin Maleiwa»
(Levítico 1:3) »›Nuʼutuinjachire wayuu wanee paaʼa jee anneerü süpüla saʼajünüin nümüin Jeʼwaa, acheküshi naapüin chi eekai tooloin jee nnojoikai ayuulin. Niʼikajaainjachi nia nümülatuʼumüin Jeʼwaa soʼuluʼumüin tü aʼwaajüleekat.
(Levítico 2:1) »›Nüsülajüinjachire wanee wayuu süchon pünajüt nümüin Jeʼwaa, shiainjatü naapaka tü ariina eekai yütchoin soʼu. Niʼyotuinjatü seita saaʼu otta nijitüinjatü olíbano saaʼu.
(Levítico 2:12) »›Eesü süpüla saapünüin nümüin Jeʼwaa maʼaka saaʼin tü palajatkat süchon aʼttiee, nnojotpejeʼe eʼitaanajatüin shia saaʼu tü aʼajüleekat maʼaka saaʼin tü wunuʼu jemetakat eejuu.
(Levítico 3:1) »›Nüsülajüinjachire wayuu wanee paaʼa nümüin Jeʼwaa süpüla anajiraainjachin nia nümaa, niale wanee paaʼa toolo jee jierüle shia, acheküsü naapüin nümüin tü eekai nnojoluin ayuulin.
Püchajaa süchiki kaaʼürüi suluʼu tü Wiwüliakat
(Levítico 2:13) »›Süpüshuaʼa tü süchon pünajüt püsülajüinjatkat nümüin kaʼakainjatü ichii. Jalia maʼakajayaai ichii tü süchon pünajüt paapüinjatkat nümüin chi Pümaleiwasekai süka shiain apansaajiain tü pütchikat.
(Ezequiel 43:24) Püsülajeerü shia nümüin Jeʼwaa otta nejiteerü ichii na sacerdootekana saaʼu sümaa naʼajeerüin shia nümüin Jeʼwaa.
(Levítico 3:17) »›Pütchikat tüü süpülajatü kaʼikat süpüshuaʼa otta namüinjatü napüshuaʼa na juuʼuliwoʼukana, jaʼitaina jalain kepiain naya: nnojoliinjana jia eküin saaʼusü otta süsha mürüt›».
NOWIENPÜROʼU 16-22
KOROLO KOJUTUSÜ SULUʼUKA TÜ WIWÜLIAKAT | LEVÍTICO 4, 5
«Waapa nümüin Jeʼwaa tü saʼanasiainkat wanee kasa»
(Levítico 5:5, 6) »›Kaainjarale wanee wayuu sutuma naainjain tia kasakalüirua, nüküjainjatü süchiki tü naainjalakat. 6 Jee müsia naapüinjatü nümüin Jeʼwaa tü nüsülajüinjatkat saaʼujee tü naainjalakat, naapüinjatü wanee anneetchon jiet jee shiale wanee kaaʼula. Süchikijee, naapüinjatü shia chi sacerdootekai nümüin Jeʼwaa süpüla sülaʼajaanüinjatüin naainjala chia wayuukai nuulia.
(Levítico 5:7) »›Isale nüchiki wanee wayuu naapüin wanee anneerü nümüin Jeʼwaa, anasü napülee nümüin piamasü wawaachi jee shiale piamasü süchonnii toomasü saaʼujee tü naainjalakat. Naapüinjatü wanee wüchii saaʼujee tü naainjalakat jee tü wane oʼutunajatü aaʼin süpüla saʼajünüin nümüin Jeʼwaa.
(Levítico 5:11) »›Nnojorüle nümaʼana chi wayuukai piamasü wawaachi jee shiale piamasü süchon toomasü, asülajüinjachi nia saaʼujee tü naainjalakat süpüshi wanee efá ariina yütchonkalü oʼu. Nnojotsü niʼyotuinjatüin seita saaʼu otta nnojotsü nijitüinjatüin olíbano saaʼu süka shiain tü naapüinjatkat saaʼujee tü naainjalakat.
Püchajaa süchiki kaaʼürüi suluʼu tü Wiwüliakat
(Levítico 5:1) »›Kaainjarale wanee wayuu süka naapüin mojuin nünüiki wanee wayuu oʼupalaa otta niʼrüle sümaa nütüjaain saaʼu süchiki tia, nnojorüle nüküjain süchiki, asoutajachi saaʼu naainjala.
(Levítico 5:15, 16) «Kaainjarale wanee wayuu nuʼupala Jeʼwaa sümaa nnojoluin naaʼinjeein shia, acheküshi naapüin nümüin Jeʼwaa saaʼujee tü naainjalakat wanee anneerü nnojoikai ayuulin. Tü nüliapalakat wanee anneerü süka nneerü pülaata pansaainjatü shia sümaa saawain tü süliapalakat tü eekat suluʼu tü aʼwaajüleekat. 16 Awalaajüinjachi nia saaʼu tü naainjalakat süka mojutuin nutuma tü aʼwaajüleekat Maleiwa otta aapüinjachi nia sooʼomüin sülia. Naapüinjatü süpüshuaʼa tia nümüin chi sacerdootekai. Niasaʼa chi sacerdootekai, naapüinjachi chi anneetkai nümüin Jeʼwaa süpüla sülaʼajaanüinjatüin naainjala chi kaainjalashikai.
NOWIENPÜROʼU 23-29
KOROLO KOJUTUSÜ SULUʼUKA TÜ WIWÜLIAKAT | LEVÍTICO 6, 7
«Aapüinjana waya analuʼut»
(Levítico 7:11, 12) »›Anuu tü aluwataanakalü anain na wayuu asülajüinjanaka wanee kasa süpüla anajiraain naya nümaa Jeʼwaa. 12 Nüsülajüinjatüle wanee kasa süpüla naapüin analuʼut, acheküshi naapüinjachin pan koʼucheinka maʼakakat soolojia jee aainjuushikat süka seita, kayeeta pasanuachenka maʼakakat soolojia jee ashulennaka seita saaʼu otta pan koʼucheinka aainjuushikat süka ariina yütchonka oʼu, anainjatü saainjia otta shiishitüinjatü shia.
(Levítico 7:13-15) Naapüinjatü tü nüsülajüinjatkat nümüin Jeʼwaa sümaʼaleʼeya tü pan koʼuchenkat kaʼakaka soolojia otta tü nüsülajüinjatkat süpüla anajiraainjachin nia nümaa Jeʼwaa. 14 Saʼaka tü nüsülajüinjatkat, naatayaa müinjatü tü pan naapüinjatkat nümüin Jeʼwaa. Tia, nümüinjatü chi sacerdootekai achülüʼitirakai süsha tü mürüt aapünakat süpüla anajiraainjachin wanee wayuu nümaa Maleiwa. 15 Noʼu chia kaʼikai, ekünajatü niʼiruku chi mürüt oʼutunakai aaʼin süpüla anajiraainjachin wanee wayuu nümaa Maleiwa. Nnojotsü nünaajaainjatüin süpüshi süpüla waneemüin kaʼi.
(Levítico 7:20) »›Eere wanee wayuu nnojoikai wulein akuwaʼipa noʼuluʼu Jeʼwaa jee niküle niʼiruku chi mürüt aapünakai nümüin Jeʼwaa süpüla anajiraain wayuu nümaa, oʼutunajachi aaʼin.
Püchajaa süchiki kaaʼürüi suluʼu tü Wiwüliakat
(Levítico 6:13) Chuwatüinjatü waneepia tü sikikat suluʼu tü aʼwaajüleekat Maleiwa. Nnojotsü ayokojoonüinjatüin.
(Levítico 6:25) «Pümaa nümüin Aarón otta namüin na nüchonniikana: ‹Tüü shia tü naapüinjatkat wanee wayuu saaʼu tü naainjalakat. Oʼutunajatü aaʼin nuʼupala Jeʼwaa tü naapakat chi wayuu kaainjalakai, aainjünajatü tia eere suʼutunawalin aaʼin tü aʼajünüinjatkat nümüin Jeʼwaa. Shia wanee kasa kojutukat maʼin.
NOWIENPÜROʼU 30–TISIENPÜROʼU 6
KOROLO KOJUTUSÜ SULUʼUKA TÜ WIWÜLIAKAT | LEVÍTICO 8, 9
«Shiimain sünain anain wakuwaʼipa nutuma Jeʼwaa»
(Levítico 8:6-9) Nürütkeʼerakalaka Moisés Aarón namaa na nüchonniikana otta noʼoojirüin naya süka wüin. 7 Naʼatakalaka nünain Aarón wanee kuluulu otta tü nüseʼeruʼupünaainjatkat, naʼatüin nünain wanee kuluulu matünoulesat, naʼatüin tü kuluulu kanüliakat efod otta nijittaain nüseʼeruʼupünaa wanee kuluulu eʼinuushi icheka atuma nüsheʼin. 8 Naʼatakalaka nünain wanee kuluulu naaʼintoʼupünaa sümaa niʼitaain sünain tü kanüliakat Urim otta Tumin. 9 Süchikijee, naʼatüin sünain nikii wanee ekiaalajana kojutka maʼin, kanainka wanee müsü aka saaʼin kotse aainjuushi süka ooro, shiyaawasesü tia nukataluushin süpüla aʼyatawaa nümüin Jeʼwaa. Naaʼinrüin Moisés maaʼayaka nüküjain Jeʼwaa nümüin.
(Levítico 8:12) Shiasaʼa süchikijee, niʼyotuin Moisés seita saaʼu nikii Aarón otta aneekünüshi süpüla wanee aʼyatawaa anasü maʼin.
(Levítico 9:1-5) Soʼu tü mekiisatkat kaʼi, nuunejirüin Moisés Aarón namaa na nüchonniikana otta na laülaashiikana chaa Israel. 2 Jee nümaka nümüin Aarón: «Paapa nümüin Jeʼwaa saaʼujee tü paainjalakat wanee paaʼachon nnojoikai ayuulin otta wanee anneerü toolo, puʼutuinjatü naaʼin otta paʼajüinjatü nümüin Jeʼwaa. 3 Pümeechikalaka namüin na israeliitakana: ‹Jaapa wanee kaaʼula toolo nümüin Jeʼwaa saaʼujee tü jaainjalakat otta jaapa wanee paaʼachon toolo otta wanee anneetchon eekai nnojolin ayuulin jee waneeinakana juya süpüla noʼutunuin aaʼin otta naʼajünüin nümüin Jeʼwaa. 4 Süpüla anajiraainjanain jia nümaa Jeʼwaa jaapüinjatü nümüin wanee paaʼa toolo otta wanee anneetchon süpüla suʼutunuin aaʼin nümüin otta jaapa nümüin süchon aʼttiee kaʼakaka seita. Jaainja tia süka niiʼiyalaainjachin Jeʼwaa jümüin soʼu kaʼikat tüü›». 5 Nalüʼüjaka suluʼumüin tü aʼwaajüleekat süpüshuaʼa tü nuchuntakat Moisés namüin. Narütkaakalaka napüshuaʼa na israeliitakana otta shawashawatshii naya nümülatuʼu Jeʼwaa.
(Levítico 9:23, 24) Nikerotakalaka Moisés nümaa Aarón suluʼumüin tü aʼwaajüleekat, nojuʼitapa chejee, naküjakalaka wanee pütchi analuʼut namüin na wayuukana. Warattuuijaa müsia joo nutuma Jeʼwaa naaʼu na wayuukana, 24 eejaaka wanee siki iipünaajee nutuma Jeʼwaa, jotokoloko tü asijuushi eʼitaanakat saaʼu tü aʼajüleekat sümaʼaleʼeya tü saüsükat. Neʼrapa na wayuukana tia alatakat, naʼwaatakalaka süka ponuin naaʼin shia jee nasapainkalaka naya.
Püchajaa süchiki kaaʼürüi suluʼu tü Wiwüliakat
(Levítico 8:6) Nürütkeʼerakalaka Moisés Aarón namaa na nüchonniikana otta noʼoojirüin naya süka wüin.
(Levítico 8:14-17) Nuchuntaka Moisés nüntinnüin nümüin chi paaʼa toolo aapünüinjachikai saaʼu saainjala wayuu. Niʼitaakalaka Aarón namaa na nüchonniikana najapü saaʼu nikii chi paaʼa aapünakai saaʼu saainjala wayuu. 15 Nuʼutuin Moisés naaʼin chi paaʼakai otta nüshulerüin nüsha sünain suʼuwa tü aʼajüleekat. Sutuma tia naainjakat wulesü tü aʼajüleekat nutuma. Süpüshi nüsha chi paaʼakai niʼyotuin saʼatoʼu tü aʼajüleekat süpüla wuleinjatüin shia jee süpüla saʼajünüin mürüt yala saaʼu saainjala wayuu. 16 Naapaakalaka Moisés saüsü niyüülain chi paaʼakai, saüsü tü nüpanakat otta tü nüchüʼükat sümaʼaleʼeya saüsü, naʼajakalaka shia saaʼu tü aʼajüleekat. 17 Shiasaʼa tü niʼirukukat chi paaʼakai, tü nütakat jee tü nüchaʼakat, naʼajirüin shia Moisés wattaluʼu suulia tü pueulokot, maaʼayaka nüküjain shia Jeʼwaa nümüin.