Enero

Koʼág̃arupi heta superintendénte ohechakuaa heta ansiáno ndodedikaguasuiha tiémpo ombokatupyry hag̃ua umi ermánope, tahaʼe imitãva térã ijedávape, ikatu hag̃uáicha oñangareko avei pe kongregasiónre. Oimérõ nde peteĩ ansiáno, katuete reikuaa iñimportantetereiha rembokatupyry ótrope. Avei reikuaa porã oñekotevẽtereiha ermáno ikatúva oipytyvõ kongregasiónpe koʼág̃ama voi, ha koʼýte oĩve vove kongregasión pyahu (Is. 60:22). La Biblia heʼi voi ansianokuéra ‘omboʼe vaʼerãha ótrope’. Upéicharõ jepe, ikatu oime ijetuʼu ndéve reñemotiémpo rejapo hag̃ua upéva. ¿Mbaʼérepa? Pórke reñangareko vaʼerã ne famíliare ha rembaʼapo vaʼerã remantene hag̃ua chupekuéra. Hiʼarive rereko heta rresponsavilida kongregasiónpe ha oñepresenta jepi avei provléma tekotevẽva pyaʼe reñatende. Upéicharõ jepe, tekotevẽ oñembokatupyry umi ermánope ombaʼapove hag̃ua kongregasiónpe. Tuichaiterei ningo oipytyvõ kongregasiónpe oĩramo heta ermáno ikatupyrýva. w15 15/4 1:2, 3

Oiméramo oñemeʼẽve ndéve rresponsavilida kongregasiónpe, ani repensa ikatumaha rekambia ojejapo lája heta mbaʼe. Nemanduʼákena ikatutaha rejapo kámbio pe kongregasión oikotevẽramo añoite, térã Jehová organisasión heʼíramo ojejapo vaʼerãha. Aníkena rekambiase mbaʼeve rejaposégui reínte. Reñehaʼãramo resegi umi instruksión omeʼẽ vaʼekue ndéve umi ansiáno nembokatupyry vaʼekue, rehechaukáta rerrespetaha chupekuéra, ha umi ótro ermáno okonfiáta avei nderehe. Ág̃a neexperiensiave vove, ikatútama rejapo umi kámbio oúva Jehová organisasióngui ikatu hag̃uáicha pe kongregasión oho tenonde gotyo. Ohasávo pe tiémpo, rehecháta Jehová nepytyvõha. Ha ikatu voi hína rejapo hetave mbaʼe umi ansiáno nemboʼe vaʼekuégui (Juan 14:12). w15 15/4 2:17

Ikatu hína rehasa peteĩ provléma ijetuʼuetereíva, ha Pábloicha reikotevẽ ndesalváva “pe león jurúgui” (2 Tim. 4:17). ¿Mbaʼépa rejapo vaʼerã upéicha jave? Tekotevẽterei rejerovia Jehováre. Por ehémplo, ikatu oime reñangareko hína peteĩ ne hénte hasývare, ha rejeruréma Ñandejárape tanepytyvõ regueropuʼaka hag̃ua upe situasión ha redesidi porã hag̃ua. Jehová ningo ontende umi mbaʼe rehasáva, ha katuete nepytyvõta reaguanta hag̃ua ha resegi hag̃ua reservi porã chupe. Upévare, aníkena rejepyʼapyeterei reiméramo koichagua situasiónpe. Sapyʼánte ikatu repensa Ñandejára nanepytyvõiha. Por ehémplo, ikatu umi doktór noñemoĩri peteĩ ñeʼẽme orrekomenda hag̃ua peteĩ tratamiénto ou porãvétava ne hénte hasývape. Térã ne hentekuéra ou rangue nepytyvõ, ombyaiverei hikuái la situasión. Upéicha jave, koʼýte reñemoag̃ui vaʼerã Jehováre ha esegi ejerure chupe nemombaretemi hag̃ua (1 Sam. 30:3, 6). Upéi, rehechakuaa rire mbaʼéichapa Ñandejára nepytyvõ ko situasiónpe, reñemoag̃uivéta hese ha rehecháta haʼeha ne Amígo. w15 15/4 4:10, 11

Jehová siervokuéra oikuaa porã Satanás oexistiha. La Biblia heʼi Satanás oipuru hague peteĩ mbóipe oñeʼẽ hag̃ua Évape (Gén. 3:1-5). Avei heʼi oñeʼẽ hague Jehovándi heʼírõ guare Job oserviha chupe por interés (Job 1:9-12). Upéi oñeʼẽ avei Jesús ndive omoñuhãsérõ guare chupe (Mat. 4:1-10). Ha oiko rire rréi Jesúsgui áño 1914-pe, Satanás oñepyrũ oataka umi kristiáno unhídope oĩva ko yvy ape ári (Apoc. 12:17). Koʼag̃aite peve pe Diablo oataka entéro oservívape Jehovápe, tahaʼe unhído térã ambue ovechakuéra. Ikatu hag̃uáicha ñandepuʼaka hese, tekotevẽ ñañemoĩ ikóntrape ha jajerovia mbarete. Satanás ningo pe persóna ijorgullosovéva. ¿Mbaʼérepa jaʼe upéva? Pórke odesafia pe derécho Jehová orekóva ogoverna hag̃ua. Hiʼarive ojapo ikatúva guive yvyporakuéra oadora hag̃ua chupe Jehovápe rangue. Koʼã mbaʼe ohechauka Satanás ijorgullosoitereiha. Upévare, ñandepuʼaka hag̃ua hese, tekotevẽ ñaneumílde (1 Ped. 5:5). w15 15/5 2:3, 4

Jehová opromete ñandéve hetaiterei mbaʼe porã. Ñapensáramo umívare, katuete javyʼavéta ha jasegíta jaservi Jehovápe ñande pyʼaite guive. ¿Ndépa reñeimahina mbaʼeichaitépa revyʼáta rehupyty vove umi mbaʼe Jehová oprometéva, tahaʼe yvágape térã ko yvy ape ári? Oiméramo ereko esperánsa reikovévo ko yvy ape ári, eñeimahinamína rembaʼapoha hína ne amigokuérandi pejapo hag̃ua ko yvýgui peteĩ hardín neporãva. Peichagua traváho ningo nembovyʼaitereíta, pórke umi ermáno oporohayhúva omoakãta pe tembiapo. Entéro persóna oĩva upépe, ohayhúta Jehovápe ndéicha avei. Hiʼarive neresãita, nembaretéta ha ndaiporimoʼãi mbaʼeve ndepyʼapýva. Revyʼaitereíta ikatúta haguére reipuru nde kapasida reipytyvõ hag̃ua nde rapichakuérape ha remombaʼeguasu hag̃ua Jehovápe. Ha umi omanóva oikove jey vove, ikatúta hína reipytyvõ chupekuéra oikuaa hag̃ua avei Jehovápe (Juan 17:3; Hech. 24:15). Ñañeimahina jave koʼã mbaʼe, ndajaperdéi hína ñane tiémpo, pórke jaikuaa porã katuete oñekumplitaha (Is. 11:9; 33:24; 35:5-7; 65:22). w15 15/5 3:15

Jehová podér rupive, Jesús okonverti y víno iporãvape. Ha ojapo heta porã voi ikatu hag̃uáicha ohupyty entéro umi invitádope (Juan 2:6-11). Jesús núnka ndoipurúi vaʼekue ipodér ivenefisiorãnte. Por ehémplo, oñenega kuri pe Diablo omboligárõ guare chupe okonverti hag̃ua ita pánpe (Mat. 4:2-4). Jesús oipuru ipodér oipytyvõ hag̃ua umi héntepe. Ñande avei ikatu jasegi iñehémplo ha ‘ñandepojera ñande rapichándi’ (Luc. 6:38). ¿Mbaʼépa ikatu jajapo ñande rapichakuéra rehehápe? Ikatu ñainvita chupekuéra ñande rógape okaru hag̃ua ñanendive, térã jahasaʼimi tiémpo rreunión rire umi oikotevẽvandi ajúda, por ehémplo ojapo hag̃ua idiskúrso. Ikatu avei ñaipytyvõ umi opredika ramóvape ikatupyryve hag̃ua. Ñanembaʼerechakuaáramo ha ñaipytyvõ umi oikotevẽvape, jasegi hína Jesús ehémplo. w15 15/6 1:3, 4, 6

Jasegíramo ñaneñeʼẽrendu Ñandejárape, jahecháta pe milágro tuichavéva oikótava ko yvy ape ari: jarekóta oportunida jahasávo pe gran trivulasión. Ha opa rire Armagedón oikóta hetave milágro, por ehémplo yvyporakuéra mbeguekatúpe hesãita ohóvo ohupyty peve perfeksión (Is. 35:5, 6; Apoc. 21:4). Ndaiporimoʼãvéima oikotevẽtava lénte, vastón, muléta ni sílla de rruéda. Péicha umi ojesalváva pe Armagedónpe ikatúta ombaʼapo vyʼápe ojapo hag̃ua ko yvýgui peteĩ paraíso (Sal. 115:16). Jaleévo umi milágro Jesús ojapo vaʼekue, ñanekyreʼỹ japytávo, pórke jaikuaa porã koʼẽrõite ndaiporimoʼãveimaha mbaʼeveichagua mbaʼasy (Apoc. 7:9). Koʼã milágro ohechauka porãiterei mbaʼeichaitépa Jesús ñanderayhu (Juan 10:11; 15:12, 13). Avei ohechauka ñandéve Jehová ohayhuetereiha isiervokuérape (Juan 5:19). w15 15/6 2:16, 17

Áño 1914-pe, Európape oñepyrũ peteĩ gérra upéi ojagarráva ko yvy tuichakue, ha upérõ hetaiterei persóna omano ñembyahýigui. Opakuévo pe gérra 1918-pe, ou peteĩ grípe ivaietereíva. Heta hénte ningo omano pe gérra káusare, péro pe grípe ojuka hetaitereive persónape. Koʼã mbaʼe okumpli pe señál Jesús oprofetisa vaʼekue, ha ohechauka haʼe oñepyrũmaha ogoverna yvágape 1914-pe (Mat. 24:3-8; Luc. 21:10, 11). Upe áñope Jesús “osẽ ipuʼaka hag̃ua iñenemigokuérare ha omohuʼã hag̃ua iñorairõ” (Apoc. 6:2). Jesús omosẽ Satanás ha idemoniokuérape yvágagui ha opoi chupekuéra yvy gotyo. Upe guive oñekumpli pe téxto kostediagua. w15 15/6 4:13

Apóstol Pablo oprofetisa vaʼekue oĩtaha kristiáno ojerrevelátava ha omboʼétava japu kongregasiónpe (Hech. 20:28-30; 2 Tes. 2:3, 4). Pe kongregasión kristiána oñeforma rire, ndohasái ni 100 áño ha oñekumplíma ko profesía. Upe rire ijetuʼu kuri ojekuaa hag̃ua máva mávapa oservi Jehovápe haʼe oipotahaichaite. Péro heta año rire, Jehová ojevale Jesucrístore ohechauka hag̃ua mávapa añetehápe oaprovecha umi médio haʼe oprepara vaʼekue ojeadora hag̃ua chupe. Áño 1919-pe g̃uarã hesakã porãma máva mávapa oreko Jehová aprovasión. Umi kristiáno okambia kuri heta mbaʼépe ikatu hag̃uáicha oadora Jehovápe haʼe oipotahaichaite (Is. 4:2, 3; Mal. 3:1-4). Upe guive oñepyrũ oñekumpli peteĩ visión ohecha vaʼekue Pablo. Jehová podér rupive, Pablo ohecha peteĩ mbaʼe oikótava tenonderãme (2 Cor. 12:2-4). w15 15/7 1:6-8

¿Ikatúpa jaʼe upéicharõ oikotaha peteĩ arrevatamiénto ha umi unhído ohotaha yvágape ikuérpo reheve? Heta persóna heʼíva ijehe kristianoha orovia ko enseñánsa fálsa. Opensa hikuái Jesús outaha ogoverna ko yvy ape ári ha oguerahataha yvágape umi kristiánope ikuerpokuéra reheve, ha enterove ohechataha koʼã mbaʼe oikóva. Péro la Biblia ndeʼíri ojehechataha Jesúspe ou vove, síno heʼi haʼe outaha “umi arai ári” ha ojekuaataha “yvágare pe Yvypóra Raʼy [señál]” (Mat. 24:30). Avei la Biblia heʼi porã “soʼo ha tuguy ndaikatuiha oike Ñandejára Rréinope”. Upéicharõ, ¿mbaʼéichapa ojegueraháta yvágape umi unhído oĩtavape gueteri ko yvy ape ári? La Biblia heʼi primero ‘oñekambiataha hikuái’, térã oiko raẽ vaʼerãha chuguikuéra espíritu. Ha “upéva oikóta peteĩ tesapirĩme, ipu vove pe última trompéta” (1 Cor. 15:50-53). Ñande ndajaipurúi pe palávra arrevatamiénto jaexplika hag̃ua upe oikótava umi unhídore, pórke hetápe omopensa pe enseñánsa fálsare. Péro jaikuaa porã umi unhído oĩtava gueteri ko yvy ape ári pe gran trivulasiónpe, ojeguerahataha yvágape peteĩ tesapirĩme, péro oiko raẽ vaʼerãha chuguikuéra espíritu. w15 15/7 2:14, 15

Umi Salón del Reino haʼe umi lugár prinsipál oñemombaʼeguasu hag̃ua Jehovápe. Ñandéve g̃uarã umi rreunión haʼe hína peteĩ rregálo oúva Ñandejáragui. ¿Mbaʼérepa jaʼe upéva? Pórke ñanepytyvõ ñañemoag̃uive hag̃ua hese. Avei umi rreunión rupive Jehová organisasión ñanemokyreʼỹ ha ñanerekomboʼe. Umi informasión jarresivíva rreunionhápe haʼete hína aliménto Jehová ha Jesús omeʼẽva káda semána. Añetehápe ningo tuicha priviléhio ñañeinvita haguére jakaru hag̃ua “Jehová meságui” (1 Cor. 10:21). Jehová heʼi porã ñandéve jaha vaʼerãha rreunionhápe ikatu hag̃uáicha jaadora chupe ha ñañomokyreʼỹ hag̃ua ñane ermanokuérandi (Heb. 10:24, 25). Ñande ningo jarrespetaiterei Ñandejárape, upévare jajapo ikatúva guive ani hag̃ua jafalta rreunionhápe. ¿Mbaʼéichapa jahechauka ñamombaʼeha umi rreunión? Jastudia porãvo umi informasión oñehesaʼỹijótava ha ñañehaʼãvo ñakomenta. w15 15/7 4:3, 4

Iñimportanteterei ñaĩ alérta ha preparádo. Ñandejára organisasión pyʼỹinte heʼi ñandéve ‘ñahaʼarõ vaʼerãha Jehová ára’, ha ñapensa meme vaʼerãha umi promésa oñekumplítavare pe múndo pyahúpe (2 Ped. 3:11-13). Síglo primérope, umi kristiáno ohechauka vaʼekue oĩha alérta ha preparádo. Ha ñande koʼytevéntema ñaime vaʼerã preparádo, pórke hiʼag̃uimbaitéma pe fin. ¿Mbaʼérepa ikatu jaʼe pe fin hiʼag̃uimbaitemaha? Pórke pe profesía Jesús omeʼẽ vaʼekue ohechauka haʼe oñepyrũmaha ogoverna ha “ko múndo ára pahaite oñemoag̃uimaha”. Por ehémplo, áño 1914 guive ko múndo ivai vaive ohóvo. Avei pe marandu porã oñeʼẽva Ñandejára Rréinore ojepredika hína ko yvy tuichakuére (Mat. 24:3, 7-14). Jesús ndeʼíri kuri mboy tiémpopa oduráta umi ára paha. Upéicharõ, ñaime vaʼerã preparádo, pórke pe fin og̃uahẽta en kualkiér moménto. w15 15/8 2:4, 5

Pe paraísope jarekóta opa mbaʼe ñaikotevẽva javyʼa hag̃ua. Péro la ñanembovyʼavétava siémpre haʼe hína ñane amista Jehovándi (Mat. 5:3). Jadisfrutáta jaservívo Jehovápe ha ndaiporimoʼãi mbaʼeve iñimportantevétava upévagui. Upévare, ikatu hag̃uáicha jaiko pe paraísope, koʼág̃ama voi ñamotenonde vaʼerã ñande servísio Jehovápe (Mat. 6:19-21). ¿Mbaʼéichapa ikatu jadisfrutave jaservívo Jehovápe? Por ehémplo, ñamoĩkuaa méta ñande servísiope. Oiméramo nde peteĩ mitãrusu térã mitãkuña, iporãta repensáramo mbaʼéichapa reaprovecháta ne huventu reservívo Jehovápe. Ikatu rejeprepara reservi hag̃ua de tiémpo kompléto. Ñane puvlikasionkuérape osẽ jepi mbaʼe mbaʼépa rejapo vaʼerã rehupyty hag̃ua upéva. Avei ikatu reñemongeta umi ermáno heta tiémporema oservívandi de tiémpo kompléto. Reipurúramo ne tiémpo reservi hag̃ua Jehovápe, reaprendéta heta mbaʼe ndepreparátava reiko hag̃ua pe paraísope. w15 15/8 3:13, 14

Umi mbaʼe porã oúva Ñandejára espíritugui haʼe avei mbaʼeporã, jejokokuaa ha pasiénsia (Gál. 5:23). Koʼã mbaʼe ikatu oipytyvõ umi kristiáno madúrope ikatu hag̃uáicha itrankílo, ipasiénsia ha igústo hag̃ua ñaime hendivekuéra. Avei haʼekuéra oñekontrolakuaa ohasa jave umi situasión ijetuʼúvare. Ha oĩramo odesepsionáva chupekuéra, oaguanta ha ndoperdéi la esperánsa. Ostudia jave la Biblia katu oheka umi konsého oipytyvõtava chupekuéra oikuaa hag̃ua mbaʼépa oĩ porã ha mbaʼépa oĩ vai. Upéi oipuru pe oaprendéva odesidi porã hag̃ua. Haʼekuéra ningo iñumílde ha orrekonose siémpre iporãveha jasegi umi konsého Jehová omeʼẽva ha jarrespeta umi léi haʼe omoĩva. Avei opredika hikuái kyreʼỹme ha ojapo opa ikatúva oĩ hag̃ua unida kongregasiónpe. Ikatu ningo are guivéma jaservi jaikóvo Jehovápe, térã ramónte. Upéicharõ jepe, iporã enterovéva ñañeporandu: “¿Mbaʼépepa tekotevẽ amehora ikatu hag̃uáicha ajoguave Jesúspe?”. w15 15/9 1:6, 7

Umi disípulo ohecha Jesúspe oguataha oúvo pe y ári. Pedro heʼi chupe ikatúpa avei haʼe oguata pe y apére. Jesús heʼi chupe ikatuha. Upémarõ Pedro osẽ pe kanóagui, oñepyrũ oguata pe y ári ha oho Jesús oĩha gotyo. Péro sapyʼaitérõ g̃uarã oñepyrũma oñapymi. ¿Mbaʼérepa oiko hese upéva? Pórke omaña pe torméntare ha okyhyjeterei. Upéi Pedro pyaʼe ojerure ajúda Jesúspe, ha Jesús ojagarra chupe ipógui ha heʼi pe jaleéva pe téxto kostediaguápe (Mat. 14:24-32). Jesús heʼírõ guare Pédrope ikatuha oho hendápe, haʼe oguejy pe kanóagui ha oguata pe y ári. Pedro oĩ kuri segúro Jehová oipytyvõtaha chupe, oipytyvõháicha Jesúspe. Ko ehémplo ikatu ñakompara ñane situasiónre. Ñañepyrũrõ guare jastudia la Biblia, ñaaprende kuri Jesús ñaneinvitaha ñamoirũ hag̃ua chupe, ikatu hag̃uáicha oiko ñandehegui idisípulo. Upéi ñañemeʼẽ Jehovápe ha jajevautisa. ¿Mbaʼérepa jajapo koʼã mbaʼe? Pórke ndajadudái ni michĩmi Jehová ha Jesús ñanepytyvõtaha (Juan 14:1; 1 Ped. 2:21). w15 15/9 3:1, 3

Umi túva ohayhúva ifamíliape oprotehe chupekuéra umi pelígrogui. Ñapensamína: oĩ jave peteĩ mbaʼe ikatúva olastima ñande resa, pyaʼe voi ñasapymi. Péicha avei, Jehová ohechávo jajapeligraha, pyaʼe voi orreaksiona ñandeprotehe hag̃ua. Añetehápe, Jehová oñangareko ñanderehe ñanderayhúgui (Zac. 2:8). Péro sapyʼánte oĩ Jehová siérvo omanóva iñeʼẽrendu haguére chupe. Upéva oiko vaʼekue disípulo Estébanre ha ambue siervokuérare. Upéicharõ jepe, Jehová siémpre oprotehe ipuévlope Satanás ñuhãgui (Efes. 6:10-12). La Biblia ha umi puvlikasión rupive, haʼe ñandeavisa umi pelígrogui. Por ehémplo, heʼi ñandéve jaipurukuaa vaʼerãha Internet, ndajaikói vaʼerãha pláta rapykuéri, ni ndajahechái vaʼerãha umi pelíkula ha videohuégo itieʼỹva ha ivioléntova. ¡Ajépa ojekuaa porãite Jehová oñangarekoha ñanderehe ha ñanderayhuha! w15 15/9 4:15, 17

Jehová oipytyvõ avei isiervokuérape ikatu hag̃uáicha ‘odefende’ pe derécho orekóva opredika hag̃ua (Filip. 1:7). Por ehémplo, oĩ jave goviérno oproivíva ñandehegui pe predikasión, ñande jagueraha upe káso umi trivunálpe ñadefende hag̃ua upe derécho. Koʼág̃a peve ñaganáma 268 káso umi trivunál iñimportantevévape oĩva ko yvy tuichakuére. Áño 2000 guive, pe Tribunal Europeo de Derechos Humanos osẽ ñande favórpe 24 kásope. Jahechaháicha, Jehová oipytyvõ hína ipuévlope, ha ndaipóri ojoko vaʼerã upéva (Is. 54:17). ¿Mbaʼépa Jehová ojapove oipytyvõ hag̃ua isiervokuérape? Por ehémplo, ñanepytyvõ japredika hag̃ua ko yvy tuichakuére (Mat. 24:14; Hech. 1:8). Avei entéro jaservíva Jehovápe ñaime unído, tahaʼe haʼéva ñande país, ñande rrása ha ñane idióma. Añetehápe ningo ko múndope ndaipóri ótra rrelihión oĩva unído ñandéicha. Heta persóna ndoservíriva Jehovápe jepe heʼi: “Añetehápe Ñandejára oĩ pende apytépe” (1 Cor. 14:25). ¡Ajépa koʼã mbaʼe ohechauka porã Jehová ñanepytyvõha! (Is. 66:14.) w15 15/10 1:13, 14

Apóstol Pablo heʼi vaʼekue ‘ani hag̃ua jaipurupaite ko múndo’ (1 Cor. 7:29-31). Upéva heʼise ndajahejái vaʼerãha umi mbaʼe oĩva ko múndope hoʼupa ñane tiémpo. Jaikuaaháicha, naentéroi umi mbaʼe oĩva pype ivai, péro nañapenáiramo pe konsého Pablo omeʼẽ vaʼekuére, ikatu hína nahembyvéi ñandéve tiémpo jaservi porã hag̃ua Jehovápe (Efes. 5:15-17). ¿Mbaʼépepa ikatu ohopa ñandehegui ñane tiémpo? Por ehémplo, umi diversiónpe, paséope, ñasẽterei de kómpra, jahecha téle, jahechaiterei notisiéro térã depórte, jaheka umi aparáto elektróniko osẽ ramovéva, ñamondo mensáhe ha umícha. Hetápe ningo koʼã mbaʼe oenvisiaitéma (Ecl. 3:1, 6). Satanás oipuru ko múndo ikatu hag̃uáicha ñandedistrae ha jaheja rei Jehovápe. Haʼe ojapóma vaʼekue upéva umi kristiáno ypykuére, ha koʼag̃aite peve osegi oipuru ko múndo ñanemoñuhã hag̃ua (2 Tim. 4:10). Upévare iporã jajepyʼamongeta pe téxto kostediaguáre. w15 15/10 3:7, 8

Manóah ha hembireko ningo ifamíliata ha ovyʼaiterei hikuái, péro haʼekuéra oikuaa upéva haʼeha peteĩ rresponsavilida tuicháva. Upe tiémpope ningo umi hénte Israelgua hembiapo vaieterei. ¿Mbaʼéichapa Manóah ha hembireko omboʼéta ifamíliape ohayhu ha oservi hag̃ua Ñandejárape? Manóah ojerure Jehovápe ombou jey hag̃ua pe ánhel hendapekuéra. Haʼe heʼi chupe: “Ikatúramo toumi jey ore rendápe ne remimbou, ikatu hag̃uáicha heʼi oréve mbaʼéichapa romongakuaa vaʼerã pe mitã” (Juec. 13:1-8, NM). Oiméramo nde peteĩ sy térã peteĩ túva, katuete rentendéta mbaʼéichapa oñeñandu vaʼekue Manóah. Nde avei ereko pe rresponsavilida remboʼévo ne famíliape oikuaa ha ohayhu hag̃ua Jehovápe (Prov. 1:8). ¿Mbaʼépa nepytyvõta rekumpli porã hag̃ua upe rresponsavilida? Ejapo vaʼerã káda semána pe Estúdio de Família. Péicha pe mitã oaprendéta heta mbaʼe Jehovágui ha la Bíbliagui (Deut. 6:6-9). w15 15/11 1:1, 2

Añetehápe ningo nde ndaikatúi reikuaa mbaʼépa opensa hína ne família, péro ikatu reñehaʼãmbaite rentende chupe. Jehová nepytyvõta rehecha hag̃ua umi mbaʼe porã ojapóva. Ha sapyʼánte ojavy jave, ani repensa ni ere ne famíliare naipohãveimaha. Iporãvéta eréramo chupe reñemeʼẽha enkuénta oñehaʼãha hína, ha rehechakuaaha umi mbaʼe porã ojapóva. Upévare, efelisitákena chupe omehora jave. Ha ija vove, emeʼẽve chupe rresponsavilida, ikatu hag̃uáicha omehorave ohóvo. Jesús ojapo vaʼekue péicha idisipulokuérandi. Un áño imédio oikuaa rire Natanaélpe, onombra chupe apóstol, ha Natanael okumpli porã pe rresponsavilida (Luc. 6:13, 14; Hech. 1:13, 14). Esegíkena Jesús ehémplo, ha eñatende ani hag̃ua nde káusare ne família opensa ndovaleiha mbaʼeverã. Upéva rangue, emokyreʼỹ ha efelisita chupe. Ere chupe nde ha Jehová pevyʼaitereiha heseve, ha péicha ohechakuaáta ideprovechotaha Jehová servísiope. w15 15/11 2:15, 16

Oñepyrũrõ guare umi ára paha áño 1914-pe, oĩ vaʼekue amo 5.000 kristiánorupi orekóva esperánsa oho hag̃ua yvágape. Ohasáramo jepe heta mbaʼe ijetuʼúva osegi opredika hikuái, pórke ohayhu hapichakuérape ha pe espíritu sánto oipytyvõ chupekuéra. ¿Mbaʼépa ojehupyty upe haguére? Koʼág̃a peve oñembyaty hína “peteĩ aty guasu” orekóva esperánsa oiko hag̃ua ko yvy ápe ári opa árare. Ko atýpe oĩma más de ocho millón testígo de Jehová, oñembyatýva mas de 115.400 kongregasiónpe oĩva ko múndo tuichakuére. Ha káda día heta hetave persóna oike pe aty guasúpe. Por ehémplo, septiembre de 2013 guive agosto de 2014 peve, ojevautisa más de 275.500 persóna. Upéva heʼise káda semána ojevautisa hague 5.300 persónarupi. Ñande ningo jajerovia Jehováre ha ñaĩ segúro haʼe voi oskrivika hague la Biblia. Koʼã mbaʼe ñanemomýi ikatu hag̃uáicha ñaipytyvõ umi héntepe oñemoag̃ui hag̃ua Ñandejárare (1 Tes. 2:13). Satanás ndaijaʼéi ñanderehe ha ñandeataka heta hendáicha, upéicharõ jepe ñande jasegi jaiko Jehová amígoramo (2 Cor. 4:4). w15 15/11 4:12, 14, 16

Umi expérto ohesaʼỹijo hetaiterei kópia ha traduksión yma guare, ha otopa hikuái saʼieterei versíkulo idiferenteha ojuehegui. Ha umi errór michĩeterei rupi, nokambiái pe mensáhe iñimportantevéva oĩva la Bíbliape. Upévare, umi persóna ipyʼaporãva ostudiáva la Biblia, oĩ segúro pe Biblia jaipurúva koʼág̃a orekoha el mísmo mensáhe Jehová omeʼẽ vaʼekue isiervokuérape oskrivikárõ guare Iñeʼẽ. Heta persóna iñañáva oñehaʼãmbaite kuri ani hag̃ua la Biblia og̃uahẽ umi héntepe. Péro oñehaʼãmbaitéramo jepe, ndaikatúi ojoko hikuái Ñandejára Ñeʼẽ. Koʼág̃a la Biblia ojetradusíma mas 2.800 idiómape. Oĩramo jepe unas kuánta traduksión ijetuʼu léntova oñentende porã hag̃ua, térã ofaltáva ijexaktove, haimete entéro Bíbliape oĩ pe mensáhe omeʼẽva esperánsa ha oñeʼẽva pe jeikove opaveʼỹvare. w15 15/12 1:13, 14

Umi mbaʼe jaʼéva ikatu omoñeñandu porã térã omoñeñandu vai peteĩ persónape. Upévare ñapensa porã vaʼerã ñañeʼẽ mboyve. Heta hénte ningo ipyʼahatã ha heʼi umi mbaʼe omoñeñandu vaítava hapichápe. “Haʼete ohaimbeʼéva hína ijespáda” ha “oapuntáva iflécha” hese (Sal. 64:3, NM). Koʼãichagua persóna oaprende oñeʼẽ hag̃ua péicha umi pelíkulagui ha prográma de televisióngui. Péro ñande kristiáno ni guaʼuhápe ndajaikói ñaneñeʼẽ arhél, ni nañapensái mbaʼéichapa ñamoñeñandu vaíta ótrope. Ndaivaíringo añete ñañombojaru mimi ñañemongeta jave, péro núnka nañañembohorýi vaʼerã ñande rapicháre ñambopuka hag̃uánte ótrope. La Biblia heʼi porã ñandéve: “Aníkena osẽ pende jurúgui mbaʼeveichagua ñeʼẽ kyʼa, síno umi mbaʼe iporãva ha oporomombaretétava oñekotevẽ jave, péicha umi mbaʼe pejéva ideprovéchota umi penerendúvape” (Efes. 4:29, 31). w15 15/12 3:10

Síglo primérope, pe Kuérpo Governánte omondo kárta umi kongregasiónpe, ha opakuévo oipuru pe fráse “¡Tohoporãitéke peẽme!”. Idióma griégope, upéva heʼise: “Tapeneresãi”. Ko palávra oipuru vaʼekue umi hénte ojedespedi hag̃ua. Péro upéva ohechauka ymaite guive opavavénte oĩ porã ha hesãiseha. Ñaneimperfékto rupi, ndaikatúi jajehekýi umi mbaʼasýgui. Koʼág̃arupi ndaikatúi ñahaʼarõ Jehová ojapotaha milágro ñanemonguera hag̃ua. Péro jaikuaa porã koʼẽrõitéma Ñandejára omeʼẽtaha ñandéve salu perfékta. Apóstol Juan ohecha vaʼekue peteĩ visiónpe “y oporomoingovéva” ha “yvyramáta oporomoingovéva”, ha heʼi koʼã mbaʼe omonguerataha yvyporakuérape (Apoc. 22:1, 2). ¿Oñeʼẽpa raʼe algún pohã naturál ikatúvare jaʼu koʼág̃a térã pe paraísope? Nahániri. Juan oñeʼẽ kuri opa mbaʼe Jehová ha Jesús ojapótavare ikatu hag̃uáicha jaikove opa ára g̃uarã (Is. 35:5, 6). w15 15/12 4:17, 18

Jehová heʼi vaʼekue “diez kuimbaʼe” oúva opaichagua tetãgui ha oñeʼẽva opaichagua idióma ipojaitaha “peteĩ hudío” ao ruguáire ha heʼitaha: “Ore rohóta penendive, rohendúgui Ñandejára oĩha penendive” (Zac. 8:23, NM). Pe “hudío” orrepresenta umi kristiáno Ñandejára oiporavo vaʼekuépe ijespíritu sánto rupive. La Biblia ohenói avei chupekuéra “Israel Ñandejára mbaʼéva” (Gál. 6:16). Ha umi “diez kuimbaʼe” katu orrepresenta umi orekóvape esperánsa oikove hag̃ua ko yvy ape ári. Péro, ¿mbaʼérepa koʼã kristiáno heʼi ‘ohoseha’ umi unhídondi? Pórke Jehová ovendesi umi unhídope, ha avei chupekuéra g̃uarã peteĩ priviléhio omombaʼeguasu Ñandejárape hendivekuéra. Zacarías oprofetisa haguéicha, Jesús heʼi vaʼekue avei Ñandejára siervokuéra oĩtaha unído. Haʼe ohenói “ovechakuéra mbovymi” umi orekóvape esperánsa oho hag̃ua yvágape. Ha umi orekóvape esperánsa oikove hag̃ua ko yvy ape ári katu ohenói “ambue ovechakuéra”. Péro Jesús heʼi mokõive grúpo haʼeha “peteĩ ovecha aty”, ha ogiataha chupekuéra “peteĩ ovecharerekua” (Luc. 12:32; Juan 10:16). w16.01 4:1, 2

Ñande jaservíva Jehovápe ñanerakateʼỹ vaʼerã pe amista jarekóvare hendive. Entéronte ñaneimperfékto ha jaiko peteĩ múndo oĩvape Satanás poguýpe. Upéicha rupi ndahasyiete ova hag̃ua ñanderehe umi hénte opensa lája ha oiko lája. Umi mbaʼe ojejapóva ko múndope haʼete peteĩ rrío osyry hatãva, ha ikatúva ñandegueraha ha ñanembojahoga. Ndajaipotáiramo pe y ipuʼaka ñanderehe, tekotevẽ jayta ha ñasẽ upégui. Peichaite avei ñañehaʼãmbaite vaʼerã ani hag̃ua ipuʼaka ñanderehe ko múndo, ha ombyai ñane amista Jehovándi. Japredika jave, ñañekonsentra umi mbaʼe ideprovéchovare ñandéve, ndahaʼéi umi mbaʼe omokangývare ñande jerovia. Avei upéicha jajeroviave Jehová promesakuérare ha jahayhuve Iléi. Ha upéva ñandeprepara porãve ikatu hag̃uáicha ñambohovái Satanáspe ha imúndo (Efes. 6:14-17). Iporã jaipuruve ñane tiémpo jastudia ha ñaipytyvõ hag̃ua umi ermáno ñane kongregasionguápe. Péicha nahembýi ñandéve tiémpo jajepyʼapyeterei hag̃ua ñane provlemakuérare, ha upéva ñandeprotehe avei. w16.01 5:12, 13

Rut ohayhu vaʼekue Jehovápe. Ndareíri peteĩ isrraelíta hérava Boaz oguerohory chupe ojerrefuhia haguére Ñandejára ‘pepo guýpe’ (Rut 2:12). Umi mbaʼe Boaz heʼi vaʼekue Rútpe, ñanemomanduʼa peteĩ guyraraʼýre oikéva isy pepo guýpe oñemoʼã hag̃ua (Sal. 36:7; 91:1-4). Ha upéva la Rut ojapo vaʼekue. Haʼe oipota Jehová ohayhu ha oprotehe chupe, ha Jehová orrekompensa chupe ojerovia haguére hese. Rut núnka nombyasýi upe odesidi vaʼekue. Koʼág̃arupi oĩ heta persóna oikuaáva Jehovápe, péro ndojerrefuhiái “ipepo guýpe”. Haʼekuéra ndojedesidíri oñemeʼẽ Jehovápe ha ojevautisa. Reiméramo upe situasiónpe, ¿mbaʼépa nepytyvõta? 1) Epensami mbaʼérepa nderejedesidíri reñemeʼẽ Jehovápe. 2) Iporã nemanduʼa enterove jaiporavo vaʼerãha mávapepa jaservíta: Jehovápe, térãpa ótro dióspe oĩva ko múndope (Jos. 24:15). Iporãiteve hína jadesidi jaservi Jehovápe. Ha 3) Nemanduʼa vaʼerã reñemeʼẽramo Jehovápe, rehechaukaha hína rejeroviaha hese. Upéicha haʼe katuete oñangarekóta nderehe ha nepytyvõta neprovléma jave. Ha upéva la Jehová ojapo vaʼekue Rut rehe. w16.02 2:6, 7

Abisai ojukasérõ guare Saúlpe oimoʼã kuri oapojaha Davídpe. Péro nontendéi ojapóramo algúna kósa upe persóna Jehová “oiporavo vaʼekuére”, añetehápe ndorrespetaiha hína chupe. David katu nopermitíri chupe ojuka Saúlpe, pórke oikuaa porã opyta vaitaha Jehová renondépe (1 Sam. 26:9-11, NM). ¿Mbaʼépa ñaaprende Abisai opensa vaʼekuégui? Nañaiméiramo segúro mávapepa ñamotenondéta, ñapensa vaʼerã umi konsého bíblicore ikatu hag̃uáicha jadesidi porã. Jaikuaaháicha, entéronte jafavorese jepi ñane hénte ha ñane amigokuérape. Péro ñañatendékena, pórke ñande ñaneimperfékto ha umi mbaʼe ñañandúva ikatu ñandegueraha vai ha ñamboyke Ñandejárape (Jer. 17:9). Peteĩ ñane hénte térã ñane amígo ojapóramo peteĩ mbaʼe ivaíva ha oheja Jehovápe, ñanemanduʼákena ñamotenonde vaʼerãha Jehovápe oimeraẽ ótra persónagui (Mat. 22:37). w16.02 4:5, 6

Iñimportánte ningo ndete rekomprova mbaʼérepa iporãve rejapo Jehová oipotáva. ¿Mbaʼérepa rejapo vaʼerã upéva? Epensamína Timoteo ehémplore. Haʼe oikuaa porã vaʼekue Ñandejára Ñeʼẽ, pórke isy ha ijavuéla omboʼe chupe. Upéicharõ jepe, Pablo heʼi Timotéope: “Nde reñehekomboʼe vaʼekue hekoitépe reguerovia hag̃ua nde pyʼaite guive, upévare akóinte resegi vaʼerã umi mbaʼe reaprende vaʼekue” (2 Tim. 3:14, 15). Timoteo oĩ kuri segúro Ñandejára Ñeʼẽme oĩha pe añetegua. Péro haʼe ndoroviái upéva isy ha ijavuéla oguerovia rupínte, síno oipuru meme iñakã oikuaa hag̃ua mbaʼépa iporã ha mbaʼépa ivai (Rom. 12:1). Restudia porãramo la Biblia, ikatúta rerresponde heta pregúnta, ha rejeaseguráta oimépa siérto umi mbaʼe regueroviáva. Ha oimérõ reduda katu, nepytyvõta pyaʼe reime jey hag̃ua segúro (Hech. 17:11). w16.03 2:3, 4, 7

Umi isrraelíta oviaha jave Jerusalénpe umi fiestarã, entéronte ombaʼapo oñondive. Oprepara hikuái opa mbaʼe oikotevẽtava ha upéi oñopytyvõmba pe viáhe aja. Upéi, og̃uahẽ rire pe témplope, oadora ha oalava hikuái Jehovápe oñondivepa. Ñande koʼág̃a jajeprepara hína jaiko hag̃ua pe múndo pyahúpe. Upévare iñimportánte avei ñaime unído ha ñambaʼapo oñondivepa. Ko múndope umi hénte ojoavypa ha oiko vai oimeraẽ mbaʼére. Péro ñande katu jaiko pyʼaguapýpe ha ñantende porã la Biblia omboʼéva, pórke Jehová ñanepytyvõ. ¡Ajépa jaagradesete chupe! Ñande jaservíva Jehovápe, ñamombaʼeguasu hína chupe haʼe oipotahaichaite. Oñekumpli hína Isaías ha Miqueas oprofetisa vaʼekue. Haʼekuéra heʼi: “Jaha jajupi Jehová montáñape” (Is. 2:2-4, NM; Miq. 4:2-4). Ñaimérõ siémpre unído, koʼẽrõite jahecháta og̃uahẽ vove pe día entéro yvypóra ‘ojoaju ha ombaʼapo porãtahápe oñondive’ oadora hag̃ua Jehovápe. ¡Ajépa iporãite vaʼerã og̃uahẽ vove upe tiémpo! w16.03 3:16, 17

Heta ansiánope ijetuʼu ojuhu hag̃ua tiémpo ikatu hag̃uáicha ombokatupyry ótro ermánope kongregasiónpe. Ikatu oime opensa: “Che aikuaa iñimportanteha ajapo upéva, péro areko heta rresponsavilida kongregasiónpe ha ndaikatúi ambotapykue umíva. Nombyaimoʼãi ningo kongregasiónpe ahaʼarõmie haguére ambokatupyry hag̃ua ótrope”. Péro, ¿siértopa upéva? Añetehápe ningo oñepresenta jepi umi situasión tekotevẽva pyaʼe oñeñatende, péro nereñehaʼãiramo koʼág̃ama voi rembokatupyry hag̃ua umi ermánope, ikatu hína tuichaiterei reperhudika kongregasiónpe. Iñimportánte ningo umi ansiáno omotenonde umi rresponsavilida orekóva kongregasiónpe, péro noñemotiémpoiramo hikuái oipytyvõ hag̃ua ótrope, tárde o tempráno ofaltapáta umi ermáno ikatupyrýva oñatende vaʼerã kongregasiónre. Aníkena repensa naiñimportanteguasuiha térã ndaiporiha apúro reipytyvõ hag̃ua umi ermánope ohupyty hag̃ua priviléhio. Umi ansiáno opensáva kongregasiónre, okumpli porã hembiapo ha tuichaiterei oipytyvõ kongregasiónpe (1 Ped. 4:10). w15 15/4 1:4, 6, 7