Febrero

Ñande jaservíva Jehovápe jahupytýma peteĩ mbaʼe ijojahaʼỹva: jaikóma Ñandejára amígoramo. Ha iñimportanteterei ningo ñamombarete ñane amista hendive. ¿Mbaʼérepa? Pórke ñane imperfeksión ha pe múndo oĩva Satanás poguýpe ikatu hína ombyai ñane amista Jehovándi. ¿Haʼépa hína Jehová ne Amígo? ¿Reñemoag̃uisevépa hese koʼẽ koʼẽre? Santiago 4:8, haʼéva pe téxto koestediagua, ohechauka mbaʼéichapa ikatu jahupyty upéva. Jahechaháicha, nde ha Jehová pesegi hag̃ua peiko oñoamígoramo, mokõivéva pejapo vaʼerã peteĩ mbaʼe: nde reñemoag̃ui vaʼerã Ñandejárare, ha haʼe katuete oñemoag̃uíta nderehe. Amáske reñemoag̃ui hese, reñandúta haʼe oĩha nde ykére ha haʼeha ne Amígo tee. Péicha oñeñandu vaʼekue Jesús, ha upévare heʼi: ‘Pe chembou vaʼekue añetehápe oikove [...]. Ha che aikuaa chupe’ (Juan 7:28, 29). w15 15/4 3:1, 2

Ñamoĩ chupe oñemosẽha kongregasióngui peteĩ ne família. Nde reikuaa porã la Biblia voi heʼiha mbaʼéichapa retrata vaʼerã umi expulsádope (1 Cor. 5:11; 2 Juan 10). Péro nde rehayhu ne famíliape ha repensa voi ijetuʼuetereiha rekumpli hag̃ua upe mandáto. ¿Mbaʼéichapa Jehová ikatu nepytyvõ upe situasiónpe? Haʼe katuete nemombaretéta neñeʼẽrendu hag̃ua chupe, ha resegi hag̃ua rejapo umi mbaʼe haʼe oguerohorýva. Ekonfiána Ñandejárare ha eaprovecha upe situasión reñemoag̃uive hag̃ua hese. Upéicharõ, jahayhúramo jepe ñane héntepe, jahayhuve vaʼerã Jehovápe (Mat. 22:37, 38). ¿Mbaʼérepa? Pórke jahechaukáramo jahayhuveha Ñandejárape, ñaipytyvõvéta ñane hentekuérape, tahaʼe umi oservívape Jehovápe, umi ndahaʼéivape Testígo, térã umi expulsádope. Oiméramo peteĩ ne família ojexpulsa raʼe ha rejepyʼapy hína upévare, emombeʼu Jehovápe mbaʼéichapa reñeñandu (Filip. 4:6, 7). w15 15/4 4:14, 16

Ndaivaíri ñañesenti porã umi mbaʼe jahupytývare, jajapóvare térã jarekóvare, por ehémplo ñane família rehe, ñande kultúrare, térã ñane nasionalidáre (Hech. 21:39). Péro ñañemombaʼeguasúramo ikatu japyta vai ñane amigokuérandi, ha koʼýte Jehovándi. Jaikóramo ñañembotuicha, nañandegustamoʼãi umi konsého oñemeʼẽva ñandéve, ha ikatu voi ñamboyke umíva (Sal. 141:5). Umi persóna ijorgullósava opensa ivaletereiha ha iñimportanteveha umi ótrogui. Ha Jehová ndaijaʼéi umichaguáre (Ezeq. 33:28; Amós 6:8). Péro Satanás ovyʼa umi hénte oñemombaʼeguasu jave haʼéicha. Por ehémplo, katuete ovyʼáne raʼe ohechávo mbaʼéichapa Nemrod, Absalón ha pe rréi de Egipto oñembotuicha ha ijejapo (Gén. 10:8, 9; Éx. 5:1, 2; 2 Sam. 15:4-6). w15 15/5 2:5, 6

Jesús oĩrõ guare ko yvy ape ári, osegi Itúva ehémplo ha omeʼẽ avei heta persónape umi mbaʼe oikotevẽva (1 Cor. 1:24). Péro haʼe ndojapói upéva ohechauka hag̃ua ipoderosoitereiha, síno ojepyʼapýgui umi héntere. Hetaiterei persóna oúva heta siudágui oho Jesús rapykuéri (Mat. 14:13). Upéi kaʼaruetéma, ha Jesús disipulokuéra ohechakuaa umi hénte ikaneʼõ ha iñembyahyimaha. Upémarõ heʼi hikuái Jesúspe tomondo umi héntepe ojogua hag̃ua hoʼu vaʼerã (Mat. 14:14-21). ¿Mbaʼépa ojapo Jesús? Jesús ojapo peteĩ milágro: oipuru cinco pan ha mokõi pira omongaru hag̃ua hetaiterei persónape. La Biblia heʼi voi enterovete okaru hague “hyg̃uatãha meve”. Okarupa rire, umi hénte ipíla jeýma ikatu hag̃uáicha oviaha ha oho hógape (Luc. 9:10-17). Ojekarupa rire, umi disípulo ombyaty pe tembiʼu hembýva 12 kanásto renyhẽte. w15 15/6 1:8, 9

Añetehápe ningo hetaiterei hénte hekokyʼa, péro upéva ndeʼiséi ñande ndaikatumoʼãiha ñanderekopotĩ. Jehová ikatu hína ñanepytyvõ jaiko hag̃ua haʼe oipotaháicha. Péro ikatu hag̃uáicha Jehová ñandeguerohory, ñamboyke vaʼerã umi mbaʼe chupe ndogustáiva. Péro ñaneimperfékto rupi sapyʼánte ikatu ñandestira pe inmoralida, umi pirápe ostiraháicha pe karnáda. ¿Mbaʼépa ikatu jajapo oúramo ñane akãme peteĩ pensamiénto kyʼa? Pyaʼe jaipeʼa vaʼerã, pórke jasegínteramo ñapensa hese ikatu imbareteve ha oñepresenta vove peteĩ oportunida jaju japeka. La Biblia heʼi: “Umi mbaʼe jajaposéva oñembohapóramo ñande pyʼapýpe, upéva omoheñói pekádo” (Sant. 1:14, 15). Jahechaháicha, ñañatende porã vaʼerã mbaʼépa ñapensa. Ñamboykéramo umi deséo vai, ndajaʼamoʼãi inmoralida sexuálpe ni ndajasufrimoʼãi pe pekádo káusare (Gál. 5:16). w15 15/6 3:1-3

Jehová okreárõ guare Adán ha Évape, ko yvy ape ári ojejapo vaʼekue hembipota. Upévare haʼe heʼi kuri opa mbaʼe “iporãitereiha” (Gén. 1:31, NM). Péro upéi Satanás opuʼã ikóntrape, ha upe guive la majoría umi hénte ndojapói Ñandejára oipotáva. Upéicharõ jepe, koʼág̃a oĩma mas de ocho millón de persóna oservíva Jehovápe. Haʼekuéra ojerure tojejapo Ñandejára volunta ko yvy ape ári, péro ndahaʼéi ojerurénteva, síno oñehaʼã voi ojapo. Oñehaʼãmbaite hikuái oiko Ñandejára oipotaháicha ha oñeʼẽ hapichakuérape kyreʼỹme pe Rréinore. Ñande jaservíva Jehovápe jasegíta jajerure chupe tojejapo hembipota ko yvy ape ári, ha jasegíta jajerure upéva haʼe ohundi peve iñenemigokuérape. Upe rire oikóta ko yvýgui peteĩ paraíso ha hetaiterei persóna omano vaʼekue oikove jeýta (Juan 5:28, 29). ¡Epensamíntena mbaʼeichaitépa javyʼáta jahecha jey vove umi jahayhúva omano vaʼekuépe! w15 15/6 4:15, 17

Ñane puvlikasionkuéra pyʼỹinte oñeʼẽ pe paraíso espirituálre. Péro, ¿idiferéntepa pe paraíso espirituál pe témplo espirituálgui? Si, idiferénte. Jahecha haguéicha, pe témplo espirituál haʼe hína umi médio Jehová oprepara vaʼekue ikatu hag̃uáicha jaadora chupe. Péro pe paraíso espirituál katu haʼe pe pyʼaguapy ha unida oĩva Jehová puévlope. Ko paraíso rupive ojekuaa porã mávapa oreko Ñandejára aprovasión ha oservi chupe haʼe oipotahaichaite (Mal. 3:18). Áño 1919 guive Jehová ojevale yvyporakuéra imperféktore oñangareko, omombareteve ha ombotuicha hag̃ua pe paraíso espirituál. ¡Ajépa ñanemokyreʼỹete upéva! Péro iporã ñañeporandu: “¿Añehaʼãmbaitépa hína ikatu hag̃uáicha amoporãve pe paraíso espirituál? ¿Amombaʼépa pe priviléhio ikatu haguére ambotuicha Jehovápe?”. w15 15/7 1:10, 11

Gog de Magog oataka vove Ñandejára puévlope, oĩta gueteri kristiáno unhído ko yvy ape ári. ¿Mbaʼépa jajapóta oñepyrũ vove pe atáke? La Biblia heʼi: “Peẽ napeñorairõmoʼãi koʼág̃a. Pepyta pende lugárpe ha pehecha mbaʼéichapa Jehová pendesalva”. Upéi heʼi avei: “Ani pekyhyje ni peñemondýi” (2 Crón. 20:17, NM). Jahecháma haguéicha, algún moméntope Gog oataka rire Ñandejára puévlope, umi unhído oĩtava gueteri ko yvy ape ári, ojeguerahapáta yvágape. ¿Mbaʼépa oikóta upéi? Apocalipsis 17:14 heʼi Ñandejára enemigokuéra oñorairõtaha “pe Ovecharaʼy kóntrape, péro haʼe ipuʼakáta hesekuéra”, pórke pe Ovecharaʼy haʼe hína “mburuvichakuéra Ruvicha ha Rréi omandáva entéro rréire”. Jesucrístope omoirũta “umi oñehenóiva, ojeporavóva ha ojepytasóva Ñandejára ykére”, ha haʼekuéra ipuʼakáta iñenemigokuérare. Péicha jahecha Jesús ha umi 144.000 rréi omoirũva chupe, osalvataha Ñandejára puévlope oĩva ko yvy ape ári. w15 15/7 2:16

Jehová ningo hína upe ñaneinvitáva jaha hag̃ua rreunionhápe. Upévare ñañatende vaʼerã ñañemonde ha ñañekomporta lájare. Ndovaléi avei jaiko ñamoĩ rrégla ha jaʼe mbaʼépa oĩ porã térã mbaʼépa oĩ vai. Rreunión aja ndajaikói ñamondo mensáhe, ñañemongeta ótra persónandi, ni jaʼu algúna kósa. Ha tuvakuéra omboʼe vaʼerã ifamíliape ani hag̃ua oiko ohuga ni odipara pe Salónpe. Jesús ohechárõ guare pe témplope oĩha ombaʼevendéva, ipochyeterei ha omosẽmba chupekuéra (Juan 2:13-17). Ñande ningo jaha Salónpe jaadora hag̃ua Jehovápe ha ñaaprende hag̃ua chugui. Upévare ndajaikói jajapo negósio ñaime aja upépe (embojoja Nehemías 13:7, 8 heʼívare). w15 15/7 4:7, 8

La Biblia heʼi umi hénte iñañavetaha “umi ára pahápe” (2 Tim. 3:13; Mat. 24:21; Apoc. 12:12). Upévare ñande jaikuaa nomehoramoʼãiha la situasión, síno amás día ivaivereitaha. Péro, ¿heʼisépa upéva ñahaʼarõ vaʼerãha oiko peteĩ sarambi opárupi ou mboyvemi pe fin? Ikatu oĩ opensáva káda tetãme oĩtaha gérra ha opárupi oĩtaha ñembyahýi ha mbaʼasy, oñepyrũ mboyvemi pe ‘jehasa asy guasu’ (Apoc. 7:14). Péro, ¿ikatúpa jaʼe oikotaha koʼã mbaʼe? Nahániri, pórke oikóramo upéva entéronte, tahaʼe umi orrechasáva la Biblia jepe, ohechakuaáta oñekumpliha umi profesía. Péro Jesús heʼi vaʼekue la majoría umi hénte ndohechakuaamoʼãiha ñaimemaha umi ára pahápe ha ‘nopenamoʼãiha mbaʼevére’. Haʼe heʼi avei pe fin og̃uahẽtaha umi hénte oimoʼãʼỹetére (Mat. 24:37-39). Ñapensávo umi mbaʼe Jesús heʼi vaʼekuére, jahechakuaa natekotevẽiha ivaive la situasión ko múndope oñepyrũ hag̃ua pe gran trivulasión (Luc. 17:20; 2 Ped. 3:3, 4). w15 15/8 2:6, 7

¿Ikatúpa jaʼe jajavyha heta mbaʼe iporãva jajepreparáramo koʼág̃ama jaiko hag̃ua pe paraísope? Nahániri. Ndaipóri ótra kósa ikatu vaʼerã ñanembovyʼave Ñandejára servísiogui. Ñande ningo ndajaservíri Jehovápe jajesalvaségui ou vove pe fin, térã oĩgui ñandeovligáva. Haʼe ñandeapo vaʼekue voi ñamombaʼeguasu hag̃ua chupe. Hiʼarive haʼe ñanderayhueterei ha ñandegia. Jaadoráramo chupe ha ñañehaʼãmbaitérõ siémpre ñaime porã hendive, katuete javyʼaitereíta (Sal. 63:1, 2). Umi ermáno heta áñorema oservíva chupe, okomprováma javyʼaitereiveha jaservívo Jehovápe (Sal. 1:1-3; Is. 58:13, 14). w15 15/8 3:16

Pe fe ñanepytyvõ jajapo hag̃ua heta mbaʼe haʼetévaicha núnka ndaikatumoʼãiva jajapo (Mat. 21:21, 22). Por ehémplo, Pedro oreko rupi fe, oguata kuri pe y ári. Ñande avei jajapóma heta sakrifísio jajerovia rupi. Oime vaʼerã ñakambiáma heta mbaʼépe, upévare umi hénte ohechakuaa koʼág̃a ñanediferenteha. Ñande jajapo kuri koʼã kámbio jahayhúgui Jehovápe ha haʼe ñanepytyvõgui (Col. 3:5-10). Avei jajerovia rupi, ñañemeʼẽ Jehovápe ha jaiko iñamígoramo. Mbaʼeve ningo ndaikatúi vaʼerãmoʼã jajapo Ñandejára nañanepytyvõirire. ¿Mbaʼérepa iñimportánte avei pe fe? Pórke ñanemombarete ñambohovái hag̃ua Satanáspe (Efes. 6:16). Ñande fe ñanepytyvõ avei jagueropuʼaka hag̃ua umi provléma. Jehová ningo opromete omeʼẽtaha ñandéve opa mbaʼe ñaikotevẽva jajeroviáramo hese ha jaservi porãramo chupe (Mat. 6:30-34). Jarekóramo fe, ikatúta avei jaiko opa árare pe paraísope (Juan 3:16). w15 15/9 3:4, 5

¿Mbaʼérepa la Biblia heʼi Jehová “raẽve ñanderayhu” hague? Pórke haʼe ombou Itaʼýrape omano hag̃ua ñanderehehápe. Apóstol Pablo heʼi: “Ñandejára [...] ohechauka ñanderayhuha, Cristo omanóvo ñanderehehápe ñande pekadór aja gueteri” (Rom. 5:8). Pe mborayhu haʼe hína pe kualida iñimportantevéva Jehová orekóva. Upévare Jesús heʼi vaʼekue pe mandamiénto iñimportantevéva haʼeha kóva: “Rehayhu vaʼerã Jehová nde Járape nde pyʼaite guive, ne álma rugua guive ha opa ne arandu ha ne mbaretekue reheve” (Mar. 12:30). Jehová oipota jahayhu chupe ‘ñande pyʼaite guive’. Chupe ningo oofendetereíta jahayhuvéramo ótra persónape térã ótra kósa. Upévare tekotevẽ jahechauka jahayhuha chupe umi mbaʼe ñapensávare ha jajapóvare. Upéva heʼise jahayhuha Jehovápe ‘ñane arandu ha ñanembaretekue reheve’ (Miq. 6:8). w15 15/9 5:1-3

Sapyʼánte ningo nañañemeʼẽi enkuénta mbaʼéichapa Jehová ñanepytyvõ. ¿Mbaʼérepa? Ikatu hína jajepyʼapyeterei ñane provlemakuérare ha ñanderesarái Jehová heta vésema ñanepytyvõ hague. Upéva oiko vaʼekue Elíasre. Haʼe ningo peteĩ kuimbaʼe ipyʼaguasúva. Péro rréina Jezabel ojukasérõ guare chupe, hesarái Jehová oipytyvõma hague chupe ymave. La Biblia heʼi haʼe okyhyjeterei hague ha ojerure Jehovápe tohejamínte chupe omano (1 Rey. 19:1-4). ¿Mbaʼépa ojapo vaʼerã kuri Elías ikyreʼỹ jey hag̃ua? Tekotevẽ kuri ohechakuaa mbaʼéichapa Jehová oipytyvõ chupe (1 Rey. 19:14-18). Job ohasa vaʼekue avei peteĩ situasión ijetuʼúva. Haʼe ojepyʼapyetereígui iprovlémare, nopensái kuri Jehová opensaháicha (Job 42:3-6). Ñande avei jahasa jave algún provléma, ikatu nañañemeʼẽi enkuénta Jehová ñandeajudaha. ¿Mbaʼépa ñanepytyvõta péicha jave? Ikatu ñapensa mbaʼépa heʼi la Biblia umi provléma jahasávare. Upéicha Jehová haʼéta peteĩ persóna rreál ñandéve g̃uarã. w15 15/10 1:15, 16

Jesús oñekonsentra vaʼekue pe predikasiónre, ha ndohejái mbaʼeve odistrae chupe. Por ehémplo, peteĩ jey opredikapa rire Capernáumpe, heta hénte ojerure chupe opytave hag̃ua upépe. Péro Jesús heʼi porã chupekuéra: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore. Upearã ningo añembou vaʼekue” (Luc. 4:42-44). Jaikuaaháicha, Jesús oho vaʼekue mombyrymbyry opredika hag̃ua. Haʼe ombaʼapoiterei, ha iperféktoramo jepe, sapyʼánte ikaneʼõ ha opytuʼuse (Luc. 8:23; Juan 4:6). Peteĩ díape, Jesús omboʼe hína kuri idisipulokuérape peteĩ mbaʼe iñimportánteva. Ha peichaháguinte peteĩ kuimbaʼe ojerure chupe ajúda ikatu hag̃uáicha osolusiona peteĩ provléma orekóva iñermánondi. Pe kuimbaʼe heʼi: “Mboʼehára, eremína che ermánope tombojaʼo chéve umi mbaʼe oheja vaʼekue oréve ore ru”. Péro Jesús oñenega osolusiona upe provléma (Luc. 12:13-15). w15 15/10 3:10, 11

Pe mborayhu haʼe pe kualida iñimportantevéva orekóva Jehová. Haʼe ningo ndahaʼéi oporohayhúnteva, síno haʼe voi mborayhu. Entéro mbaʼénte ojapo oporohayhu rupi. ¡Ajépa javyʼaite pe mborayhu omomýi haguére chupe okrea hag̃ua ko univérso ha entéro oikovévape! Jehová ningo ohayhu opa mbaʼe ojapo vaʼekue, upévare jaikuaa porã haʼe katuete okumplitaha entéro mbaʼe oprometéva ñandéve. Por ehémplo, haʼe ñanderayhu rupi omoĩ “peteĩ ára ohusga hag̃ua tekojojápe entéro yvypórape”, ha ojapóta upéva Itaʼýra Jesucristo rupive (Hech. 17:31). Ñande ñaime segúro Jesús ñandehusgataha tekojojápe. Upe rire entéro yvypóra iñeʼẽrendúva Ñandejárape oikóta vyʼápe opa árare. w15 15/11 3:1, 2

Japredika jave oĩ persóna ñanerendúva ha oĩ avei nañanerenduséiva. Péro tahaʼe haʼeháicha, Jehová oipota siémpre jasegi la Biblia heʼíva. Avei ñadefende jave umi mbaʼe jagueroviáva, ñañeʼẽ vaʼerã ‘pyʼaporãme ha jahechauka jarrespetaha ñande pyʼaite guive ñande rapichápe’. Péicha jahechauka avei jahayhuha chupekuéra (1 Ped. 3:15). Umi hénte nañanerenduséiva ipochýramo jepe, lomímonte jasegi vaʼerã Jesús ehémplo ha jahechauka jahayhuha chupekuéra. La Biblia heʼi Jesúsre: “Umi hénte ojaʼo vaipárõ guare chupe, haʼe ndojeréi ojaʼo vaipa chupekuéra; ohasa asýrõ guare, haʼe noamenasái umi ombohasa asývape chupe; upéva rangue ohejánte opa mbaʼe upe oporohusgáva tekojojápe kárgope” (1 Ped. 2:23). Upéicharõ, umi hénte ñandetrata vaírõ jepe, ñande ñaneumílde ha jasegi ko konsého: “Ani pemyengovia ivaíva, ivaívape; ni pejaʼo umi pendejaʼóvape. Upéva rangue, peñeʼẽ vaʼerã chupekuéra pyʼaporãme” (1 Ped. 3:8, 9). w15 15/11 4:17, 18

Jesús ningo pyʼỹinte heʼi vaʼekue umi disípulope ohayhuha chupekuéra (Juan 15:9). Avei ohasa tiémpo hendivekuéra (Mar. 6:31, 32; Juan 2:2; 21:12, 13). ¿Mbaʼéichapa peẽ sy ha túva ikatu pesegi Jesús ehémplo? Erékena ne famíliape rehayhuha chupe, ha avei ehechauka chupe haʼe iñimportanteha ndéve g̃uarã (Prov. 4:3). Por ehémplo, peteĩ Testígo Australiagua hérava Samuel, omombeʼu: “Chemichĩrõ guare, papa oleémi chéve káda pyhare ake mboyve Che lívro omombeʼúva istória oĩva Ñandejára Ñeʼẽme. Upéi, orresponde chéve umi mbaʼe aporandúva, cheañuã ha cheretũ. Tiémpo rire, añesorprende aikuaávo papa ndokakuaái hague peteĩ família ikariñósova apytépe. Upéicharõ jepe, haʼe oñehaʼãmbaite ohechauka chéve mbaʼeichaitépa cherayhu. Upéicha rupi aju ajepokuaaiterei hese, avyʼa ha añeñandu segúro hendive”. Nde avei rejepokuaárõ ere ne famíliape rehayhuha chupe, haʼe oñeñandúta Samuel oñeñandu haguéicha itúvandi. Upévare, eañuã ha ehetũkena chupe siémpre. Emboyke tiémpo reñemongeta, rekaru ha rehuga hag̃ua hendive. w15 15/11 1:3, 4

Áño 1919-pe, peteĩ grúpo de estudiánte de la Bíbliape oñenombra kuri “tembiguái jeroviaha ha iñarandúva”. Upe tiémpope, pe tembiguái oguenohẽma puvlikasión vívlika prinsipálmente idióma ingléspe, ikatu hag̃uáicha oñekomunika Ñandejára puévlondi. Péro koʼág̃a ko tembiguái oguenohẽma puvlikasión oñeʼẽva la Bíbliare mas de 700 idiómape. Koʼã mbaʼe ohechauka porã Ñandejára puévlo oikotevẽ hague peteĩ Biblia oñentende porãva ha ojetradusíva pe orihinálpe oĩhaichaite. Upévare oñeforma peteĩ grúpo de ermáno ikatu hag̃uáicha otradusi la Biblia. Ko grúpope oñehenói Comité de Traducción de la Biblia del Nuevo Mundo, ha pe traduksión ojapo vaʼekue hikuái osẽ 6 tómope, áño 1950 guive 1960 peve. Ermáno Knorr oipota vaʼekue pe Traducción del Nuevo Mundo oipytyvõ heta héntepe oikuaa hag̃ua Jehovápe. w15 15/12 1:15, 17

¿Mbaʼépa ñanepytyvõta jatopa hag̃ua umi “ñeʼẽ oporombopyʼarorýva”? Ikatu ñaaprende umi palávra pyahu jaleévo la Biblia ha ñane puvlikasionkuéra. Ha oĩramo palávra nañantendéiva, ikatu ñaporandu mbaʼépa heʼise, térã jaheka diksionáriope. Avei ikatu jasegi Jesús ehémplo. La Biblia heʼi Jehová ‘ohekomboʼe hague chupe omokyreʼỹ hag̃ua’ umi osufrívape (Is. 50:4). Avei ñapensa vaʼerã mbaʼéichapa omoñeñandúta ótrope umi mbaʼe jaʼéva (Sant. 1:19). Ikatu ñañeporandu: “¿Mbaʼéichapa pe cherendúva ontendéta la haʼétava? ¿Mbaʼéichapa omoñeñandúta chupe?”. w15 15/12 3:12

Jesús heʼi haguéicha, “umi ehérsito [rrománo] omongora Jerusalén”. Jesús heʼi kuri mbaʼépa ojapo vaʼerã umi kristiáno oiko vove upéva: umi Judeagua, koʼýte umi oikóva Jerusalénpe, pyaʼe osẽ vaʼerã upégui (Luc. 21:21-24). Upérõ ojapo 28 áño Jesús oprofetisa hague oikotaha upéva. Upe guive umi kristiáno evréo oĩva Judéape ombohovái heta provléma ha persekusión. Upéicharõ jepe, oñehaʼãmbaite hikuái iñeʼẽrendu Ñandejárape (Heb. 10:32-34). Péro upéi og̃uahẽ peteĩ tiémpo ipohyivehápe pe situasión (Mat. 24:20, 21; Heb. 12:4). Haʼekuéra osegiséramo iñeʼẽrendu Jesúspe, tekotevẽ ojerovia ipyʼaite guive ha oaguanta umi mbaʼe ijetuʼuetéva arakaʼeve ndohasáiva gueteri (Heb. 10:36-39). Upévare Jehová, ijespíritu sánto rupive omomýi Páblope oskrivi hag̃ua umi kristiánope pe kárta hérava Hebreos. Ko kárta rupive oprepara chupekuéra ogueropuʼaka hag̃ua umi mbaʼe ijetuʼuetéva oútava. w16.01 1:1, 2

Jaipotáramo Jehová ñanderayhu, ñande avei jahayhu vaʼerã ñane ermanokuérape (1 Juan 3:16). ¿Mbaʼéichapa ikatu ñademostra chupekuéra upéva? Jesús ohechauka ñandéve iñehémplo rupive mbaʼéichapa jahayhu vaʼerã ñande rapichakuérape. Haʼe oĩrõ guare ko yvy ape ári, oipytyvõ umi persóna hekomirĩvape. Omonguera vaʼekue umi hasývape, siégope, noñeʼẽivape, ohenduʼỹvape ha oguataʼỹvape (Mat. 11:4, 5). Jesús ndojoguaiete umi líder rrelihiósope, pórke haʼe omboʼeseterei voi umi hénte oikuaasévape Ñandejárape (Juan 7:49). Haʼe ohayhu umi iñumíldevape ha oñehaʼãmbaite oipytyvõ chupekuéra (Mat. 20:28). Ñande avei ñañehaʼã vaʼerã ñaipytyvõ umi ermáno ñane kongregasionguápe, koʼýte umi ijedavévape. Ñañemeʼẽvo enkuénta mbaʼeichaitépa Jehová ñanderayhu, ñanekyreʼỹve avei jahechauka hag̃ua jahayhuha ñane ermanokuérape. w16.01 2:12-14

¿Tekotevẽpa umi ambue ovechakuéra oikuaa mbaʼéichapa héra entéro umi unhído oikóva ñane tiémpope? Nahániri, ha añetehápe ndaikatúi voi ojekuaapa, pórke ni umi unhído oĩva ko yvy ape ári ndaikatúi gueteri oasegura ohotaha yvágape. Haʼekuéra orresivi peteĩ invitasión Ñandejáragui, péro iñeʼẽrendu vaʼerã hikuái ipahaite peve ikatu hag̃uáicha oho yvágape. Satanás oikuaa upéva, ha oñehaʼãmbaite oity chupekuéra umi “proféta japu” rupive (Mat. 24:24). Umi unhído ikatúta oikuaa ohótapa yvágape Jehová okonfirma vove chupekuéra. ¿Mbaʼe moméntopepa oiko upéva? Jehová okonfirma chupekuéra omano mboyve hikuái, térã oñepyrũ mboyvemi pe “jehasa asy guasu” (Apoc. 2:10; 7:3, 14). w16.01 4:2, 3

Epensamíntena: pe predikasión rupive oñekumpli avei Ñandejára volunta. Jehová oipota kuri yvyporakuéra oikove opa árare, péro Adán ojerreveláramo jepe ikóntrape, Ñandejára nokambiái hembipota. Jehová ndohejareíri yvyporakuérape, síno ojapo tekotevẽva guive ñandepeʼa hag̃ua pekádo ha ñemanógui. Por ehémplo, ombou Jesúspe omeʼẽ hag̃ua hekove ñanderehehápe. Ha ikatu hag̃uáicha ideprovécho ñandéve upe sakrifísio, ñaneñeʼẽrendu vaʼerã Ñandejárape. Péro upearã jaikuaa vaʼerã mbaʼépa haʼe ojerure ñandehegui. Jesús omboʼe vaʼekue upéva idisipulokuérape ha omanda chupekuéra omboʼe hag̃ua avei ótrope. Upéicharõ, japredika jave umi héntepe ha ñaipytyvõ chupekuéra oñemoag̃ui hag̃ua Ñandejárare, ñambaʼapo hína Jehovándi ikatu hag̃uáicha umi hénte osẽ pekádo ha ñemano poguýgui. Péicha jahechauka hína jahayhuha chupekuéra ha Jehovápe. “Haʼe oipota opaichagua tapicha ojesalva ha oikuaa porã pe añetegua.” (1 Tim. 2:4.) w16.01 5:15, 16

Ezequías túa hérava Acaz nomoĩri chupe ehémplo porã, upévare ikatu kuri oñeamarga térã ipochy Jehovándi, péro haʼe ndojapói upéva. Ñane tiémpope, heta persóna ou oñeamarga ha “ipochy Jehováre” térã iñorganisasiónre (Prov. 19:3, NM). Oĩ katu oimoʼãva ihentekuéra naiñeʼẽrendúi haguére Jehovápe, haʼekuéra natekotevẽveimaha oñehaʼã okambia. Opensa ikuentaveha oiko ogustaháicha chupekuéra, térã osegínte ojapo ituakuéra ojapóva, hembiapo vaíramo jepe hikuái (Ezeq. 18:2, 3). Péro, ¿iporãpa ñapensa upéicha? Ezequías ehémplo ohechauka káda persóna ikatuha odesidi mbaʼépa ojapóta. Ndahaʼéi tuakuéra omoĩ haguére mal ehémplo, ifamiliakuéra katuete osegi vaʼerãha ojapo upéva. Ndovaléi ningo ñandepochy Jehováre, pórke haʼe ndorekói la kúlpa oiko haguére umi mbaʼe vai (Job 34:10). Añetehápe tuakuéra ikatu hína omboʼe ifamíliape hekoporã hag̃ua térã iñaña hag̃ua (Prov. 22:6; Col. 3:21). Péro upéva ndeʼiséi ñande tuakuéra odesiditamaha mbaʼeichagua persónatapa ñande. Jehová omeʼẽ káda únope kapasida jadesidikuaa hag̃ua ñandejehegui (Deut. 30:19). w16.02 2:8-10

Abner oipytyvõ Saúlpe opersegi ha ojuka hag̃ua Davídpe, oikuaa porãramo jepe Ñandejára oiporavo hague Davídpe ojupi hag̃ua kómo sigiénte rréi de Israel (1 Sam. 26:1-5). Ha Saúl omano rire, Abner ndoapojái Davídpe, síno ótro Saúl raʼýpe, hérava Is-bóset. Ha ikatu voi oime Abner ojupise raʼe rréiramo, upévare oñeno peteĩ Saúl rembirekoréndi (2 Sam. 2:8-10; 3:6-11). Péicha avei, Absalón haʼéva rréi David raʼy, naiñumíldei vaʼekue, upévare ndorrespetái Jehovápe. Oikuaáramo jepe Jehová oiporavo hague itúape rreirã, haʼe oipeʼase chugui ipuésto. Upévare “ojapouka peteĩ kárro, ha 50 kuimbaʼe oho henonderã” (2 Sam. 15:1, NM). Avei okonvense heta isrraelítape oapoja hag̃ua chupe. Upéi katu oñehaʼã ojuka itúape (2 Sam. 15:13, 14; 17:1-4). Abner ha Absalón ojapo vaʼekue ohechauka mbaʼépa ikatu oiko ñanderehe nañaneumíldeiramo ha ñandegusta pe puésto térã autorida. Péicha ningo ijetuʼúta ñandéve jarrespeta hag̃ua Jehovápe. Péro jahayhúramo chupe nañapensamoʼãi ñandejehénte. w16.02 4:9-11

Oiméramo ereko fe ha reime segúro siertoha umi mbaʼe regueroviáva, upéva ojekuaáta ne kondúktare. ¿Mbaʼépa heʼise ‘ñanderekomarangatu’? (2 Ped. 3:11.) Upéva heʼise ñanderekopotĩha. Por ehémplo, epensamína umi 6 mése ohasa vaʼekuére. Oñepresentárõ guare peteĩ tentasión, ¿rehechakuaápa raʼe mbaʼépa iporã ha mbaʼépa ivai? (Heb. 5:14.) ¿Nemanduʼápa rejejoko hague ani hag̃ua reʼa peteĩ tentasiónpe, térã ani hag̃ua rejapo ne kompañerokuéra oipotáva rejapo? ¿Rejeporta porãpa siémpre nde eskuéla térã koléhiope? ¿Neñeʼẽrendúpa Jehovápe, térãpa rejapónte ne kompañerokuéra heʼíva, ani hag̃ua oñembohory nderehe hikuái? (1 Ped. 4:3, 4.) Añetehápe ningo entéro ñaneimperfékto, upévare umi oservíva Ñandejárape heta tiémpore jepe ikatu otĩ opredika hag̃ua ótrope. Péro entéro ojededikámava Jehovápe hekopotĩ vaʼerã, ha oñesenti vaʼerã orgullóso haʼe haguére testígo de Jehová. w16.03 2:10, 11

Jehová ojapo ypy guive yvyporakuérape omeʼẽ chupekuéra instruksión. Por ehémplo, hardín de Edénpe heʼi porã Adán ha Évape mbaʼépa ojapo vaʼerã ikatu hag̃uáicha ovyʼa ha oikove opa árare (Gén. 2:15-17). Péro haʼekuéra omboyke Jehová omandáva chupekuéra. Eva ojapo pe mbói heʼíva chupe, ha Adán katu ohendu hembirekópe. Upéicha rupi, mokõivéva opyta osufri, ha upéi omano esperansaʼỹre. Adán ha Eva naiñeʼẽrendúi haguére, entéro yvypóra omano avei. Koʼág̃arupi Jehová omeʼẽ ñandéve instruksión jajehekýi hag̃ua umi pelígrogui, ha jasegi hag̃ua pe tape oporogueraháva jeikove opaveʼỹvape. Jehová haʼete peteĩ pastór ohayhuetereíva ijovechakuérape, ha odirihi chupekuéra umi tape ndaiporihárupi pelígro. w16.03 4:2, 3