Marzo

Umi ansiáno ohayhueterei umi ermáno ikongregasionguápe, ha upévare oñehaʼãmbaite omboʼe ótrope umi mbaʼe haʼekuéra oaprendéma vaʼekue (Sal. 71:17, 18). Umi ansiáno oñehaʼãva ombokatupyry ótrope, tuichaiterei oipytyvõ omombareteve hag̃ua pe kongregasión. ¿Mbaʼérepa? Pórke péicha oĩta hetave ermáno ikatupyrýva oipytyvõtava pe kongregasiónpe oĩ hag̃ua unida, ha oservi porã hag̃ua Jehovápe koʼã ára pahápe. Ha upéva koʼýte oñekotevẽvéta og̃uahẽ vove pe jehasa asy guasu (Ezeq. 38:10-12; Miq. 5:5, 6). Upévare ansianokuéra, oiméramo ndapededikái hína tiémpo peipytyvõ hag̃ua umi ermánope ohupyty hag̃ua priviléhio, pejapóma vaʼerã upéva koʼág̃a guive. Oime vaʼerã heta rembaʼapo kongregasiónpe ikatu hag̃uáicha rekumplipa umi ne rresponsavilida. Upéicharõ jepe, reipeʼaʼimímante vaʼerã tiémpo umívagui ikatu hag̃uáicha reipytyvõ ótrope ohupyty hag̃ua priviléhio (Ecl. 3:1). Rejapóramo upéicha, rehechauka hína ndereperdeiha tiémpo, ha umi ermáno rembokatupyrýva tuichaiterei oipytyvõta kongregasiónpe upe rire. w15 15/4 1:8-10

Jaikuaa ningo la Biblia heʼíva ikatuha oipytyvõ opaichagua tapichápe. Péro ikatu avei ñanepytyvõ káda únope ñanemoag̃ui hag̃ua Ñandejárare. Upévare tekotevẽ jahechakuaa mbaʼéichapa ñañeñandu hína jalee ha jastudia jave la Biblia. Iñimportánte avei ñapensa mbaʼéichapa ikatu ñakumpli umi mbaʼe ñaaprendéva. Jajapóramo péicha, jahechakuaáta Jehová oñeʼẽha ñandéve. Ha jahechávo haʼe ñanepytyvõha, koʼýte ñañemoag̃uive hese (Heb. 4:12; Sant. 1:23-25). Jahechamína peteĩ ehémplo. Mateo 6:19, 20-pe Jesús heʼi: “Anive pembyaty mbaʼerepy ko yvy ape ári”. ¿Mbaʼéichapa ñañeñandu jalee rire ko téxto? Oiméramo ñamotenonde hína Ñandejárape ñande rekovépe, katuete ñañandúta haʼe ñandeguerohoryha. Péro oiméramo jahechakuaa tekotevẽha jaiko sensillomie ha ñambaʼapove Jehová servísiope, ñañandúta haʼe ohechaukaha hína ñandéve mbaʼépa tekotevẽ ñande jajapo ñañemoag̃uive hag̃ua hese. w15 15/4 3:3-5

“Ñande ningo Ñandejára ajudánte” avei ha haʼe omanda ñandéve ‘japredika hag̃ua umi marandu porã’ (1 Cor. 3:9; 1 Tes. 2:4). Ñasẽ meméramo predikasiónpe, Jehová katuete omeʼẽta ñandéve opa mbaʼe ñaikotevẽva (Mat. 6:33). Upéicha avei, ifasilvéta ñandéve ñahaʼarõ hag̃ua Ñandejára okontesta peve ñane ñemboʼe. Eñehaʼãkena káda día emombareteve ne amista Jehovándi. Oñepresentáramo peteĩ provléma ijetuʼuetereíva, eaprovechákena upéva reñemoag̃uive hag̃ua Jehováre. Relee ha restudia vaʼerã la Biblia ha eñemotiémpo rejepyʼamongeta hag̃ua hese. Esegíkena eñemboʼe ha embaʼapo meme Jehová servísiope. Rejapóramo koʼã mbaʼe, katuete Jehová nepytyvõta rembohovái hag̃ua umi provléma rerekóva koʼág̃a ha umi ikatúva oñepresenta amo gotyove. w15 15/4 4:17, 18

Pe orgúllo káusare ikatu ojeiko vaipa kongregasiónpe. Japorodespresiárõ térã ñapensáramo ñaneimportanteveha ótrogui, ikatu hína jaʼe térã jajapo peteĩ mbaʼe omoñeñandu vaítava ñande rapichápe (Prov. 12:18). La Biblia ñanepytyvõ ani hag̃ua ñandeorgullóso ha ñapensa ñaneimportanteveha ótrogui. Por ehémplo, Proverbios 16:5 heʼi: “Umi oñembotuicháva ombojeguaru Ñandejárape”. Ha Hechos 17:26 heʼi: “Haʼe ojapo vaʼekue peteĩ kuimbaʼégui opaite tetãnguéra”. Upéicharõ, ikatu jaʼe enterovéva ñande haʼeha peteĩ rrásante pórke entéro jaju Adángui. Añetehápe ningo naisentidomoʼãi voi ñapensa Ñandejára ojapo hague algúna rrása iñimportantevéva ótrogui. Ñañeporandumína: “¿Apensápa cheimportanteveha umi persóna de ótra rrása térã de ótro paísgui?”. Péicha ñapensáramo, ñameʼẽta hína oportunida Satanáspe ombyai hag̃ua pe kongregasión, ha upéva káusare ermanokuéra ikatu ou ndojoayhuvéi ha ndaiporimoʼãi unida (Juan 13:35). Ñandepuʼaka hag̃ua Satanásre, ñañehaʼãmbaite vaʼerã ani hag̃ua ñandeorgullóso (Prov. 16:18). w15 15/5 2:8, 9

Jehová opromete umi unhídope oikotaha opa árare yvágape, ha ‘ambue ovechakuérape’ katu ko yvy ape ári. Ha ág̃a jaiko vove pára siémpre ndaiporimoʼãvéima mbaʼeve ñanembosufríva (Juan 10:16; 17:3; 1 Cor. 15:53). Péro Ñandejára ohecha oĩha gueteri heta mbaʼe ñanembohasa asýva, ha ombyasyeterei upéva. La Biblia heʼi haʼe osufrieterei hague ohechárõ guare umi isrraelíta ohasa asy (Is. 63:9). Ha tiémpo rire, ipuévlo omopuʼã jeýrõ guare pe témplo, Jehová ohecha iñenemigokuéra ombosufriha chupekuéra. Upérõ haʼe heʼi: “Oimeraẽ opokóva che retãyguáre, opoko che resaʼỹire” (Zac. 2:8). Jehová ningo ñanderayhueterei, ha upévare ñanepytyvõse ohecháramo jasufri. Haʼe ñanderayhu peteĩ sy ohayhuháicha imembyraʼy (Is. 49:15). ¿Mbaʼéichapa ikatu jasegi Jehová ehémplo? Ñañeimahina vaʼerã mbaʼéichapa ñañeñandúta ñaiméramo ñande rapicha osufríva lugárpe (Sal. 103:13, 14). w15 15/5 4:2

¿Heʼisépa raʼe Jesús ndaiporomoʼãveimaha imboriahúva? Nahániri. Haʼe ohechaukánte umi hénte imboriahuha oĩ rupi governánte ikorrúptova ha opensáva ijehénte. Péro Ñandejára opromete oipeʼaitetaha pe povrésa ko yvy ape árigui (Sal. 72:16). Umi milágro Jesús ojapo vaʼekue ohechauka porãiterei haʼe katuete ñanepytyvõtaha (Mat. 14:14-21). Ñapensávo koʼã mbaʼére ñanekyreʼỹ japytávo. Mbaʼégui voi piko ndajaipurusemoʼãi ñane tiémpo ñaipytyvõ hag̃ua ñande rapichápe (Sal. 45:1; 49:3). Jaikuaaháicha, ñande ndaikatúi jajapo milágro, péro si ikatu ñamombeʼu umi héntepe umi promésa porãite oĩva la Bíbliape. Añetehápe upéva ñane rresponsavilida hína (Rom. 1:14, 15). w15 15/6 1:7, 10, 11

Upéva heʼise umi mbaʼe ñapensáva ha jajapóva ogusta vaʼerãha Jehovápe. Ñande ningo iñamígo, upéicha rupi ñañehaʼã ñapensa umi mbaʼe ipotĩvare ani hag̃ua ñambopochy chupe (Sal. 24:3, 4; 51:6; Filip. 4:8). Jehová oikuaa ñaneimperfektoha ha sapyʼánte ndaikatuiha ñakontrola ñane pensamiénto. Upéicharamo jepe, ñañehaʼãmbaite vaʼerã ñamboyke umi deséo vai ha ñapensa umi mbaʼe iporãvare. Ha ani ñanderesarái Jehová oñeñandu vaiha ñapensa jave umi mbaʼe tieʼỹre (Gén. 6:5, 6). Ñañemboʼe meméramo Jehovápe, haʼe ñanepytyvõta ñamboyke hag̃ua umi deséo vai. Avei omeʼẽta ñandéve ijespíritu sánto ha ñanemombaretéta ñanderekopotĩ hag̃ua. Ikatu voi jaʼe chupe ñapensaseha umi mbaʼe haʼe oguerohorývare. w15 15/6 3:4, 5

Jesús ndeʼíri pe padrenuéstrope: “Emeʼẽna chéve che rembiʼurãmi”. Upéva rangue haʼe heʼi: “Emeʼẽna oréve ore rembiʼurãmi”. Jahechamína mbaʼépa ojapo peteĩ superintendénte de sirkuíto hérava Victor, oservíva Áfricape. Haʼe heʼi: “Aagradese Jehovápe che ha che rembireko natekotevẽi haguére rojepyʼapy rokaru ni ropaga hag̃ua alkilér. Umi ermáno omoĩmba oréve koʼã mbaʼe. Péro ajerure Jehovápe toipytyvõmi umi ermáno ohasávape nesesida ombohovái hag̃ua iprovlemakuéra”. Ikatu ningo ñandéve ndofaltái jaʼumi vaʼerã, péro oĩ heta ermáno imboriahúva térã ohasa asýva oiko rupi desástre naturál. Aníkena ñanderesarái ñañemboʼe vaʼerãha hesekuéra. Péro ikatu avei jajapo heta mbaʼe ñaipytyvõ hag̃ua umi ermánope. Por ehémplo, ikatu ñakomparti hendivekuéra umi mbaʼe jarekóva. Ikatu avei ñameʼẽ ñane kontrivusión pe obra mundiálpe g̃uarã. Jaikuaa ningo koʼã kontrivusión ojepuruha oñepytyvõ hag̃ua umi ermáno oikotevẽvape (1 Juan 3:17). w15 15/6 5:4-6

Proféta Isaías heʼi vaʼekue ohasávo pe tiémpo oikotaha heta kámbio Ñandejára organisasiónpe, pe párte oĩvape ko yvy ape ári (Is. 60:17). Umi Testígo ipyahúva Jehová organisasiónpe ha avei umi imitãva, oiméne ohendu oiko hague koʼã kámbio oĩgui omombeʼúva chupekuéra, térã olee rupi umi puvlikasiónpe. Péro oĩ ermáno ijedavéva ohecha vaʼekue koʼã kámbio. Haʼekuéra oĩ konvensído Jehová oipuruha Jesucrístope ogia hag̃ua iñorganisasiónpe. Ñahendúramo chupekuéra oñeʼẽ jave umi kámbiore, katuete jajeroviavéta Jehováre. Entéronte ñañeʼẽ vaʼerã ótrope Jehová organisasiónre. Ko múndo henyhẽramo jepe hénte iñañávagui, oĩ hetaiterei ermáno oikóva peteĩ paraíso espirituálpe oĩháme pyʼaguapy ha unida. Jaʼekuaa upéva haʼeha peteĩ milágro. w15 15/7 1:12, 13

Pe Armagedón rupive oñembotuicháta Jehová réra porãite. Umi persóna oñekomparáva ‘kavaráre’ oñehundíta, ha ndaiporimoʼãvéima hénte aña ko yvy ape ári (Mat. 25:31-33, 46). Péro pe “aty guasu” ojesalváta. Ñande ningo jaikuaáma mbaʼépa oikóta koʼẽrõite. Upévare, jasegíkena jajapo apóstol Pedro heʼi vaʼekue espíritu sánto rupive: “Peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive. Akóinteke penemanduʼa ha pehaʼarõ Jehová ára. [...] Upéicharõ che ermanokuéra pohayhuetéva, pehaʼarõ rupi koʼã mbaʼe, peñehaʼãmbaitékena penepotĩ Ñandejára renondépe, ani oĩ pende pype mbaʼeve ivaíva, ha peiko porã hendive” (2 Ped. 3:11, 12, 14). Upéicharõ, aníkena ñapermiti umi kreénsia fálsa omongyʼa ñane adorasión. Upéva rangue jasegi jaapoja ñande pyʼaite guive Jesucrístope, pe rréi oguerútava pyʼaguapy. w15 15/7 2:17, 18

Heta ñane ermáno ombaʼapo pohýi ojapo hag̃ua umi Salón del Reino ko yvy tuichakuére. Haʼekuéra odiseña, omopuʼã térã orremodela okovraʼỹre mbaʼeve. Noviembre de 1999 guive ojejapóma 28.000 Salón del Reino. Upéicharõ, koʼã 15 áño ohasa vaʼekuépe, kómo promédio ojejapo cinco Salón káda día. La Biblia omokyreʼỹ umi oĩ porãvévape ekonómikamente oipytyvõ hag̃ua umi ‘saʼive orekóvape’ (2 Cor. 8:13-15). Upévare Jehová organisasión oipuru porã umi kontrivusión voluntária oñemeʼẽva, ha avei oorganisa porã umi ermáno ha ermána ojeofresévape ombaʼapo hag̃ua. Péicha umi kongregasión irrekursoʼivéva orekóma peteĩ lugár porã oadora hag̃ua Jehovápe. w15 15/7 4:9-11

Jesús omeʼẽ umi profesía oñeʼẽva umi ára paháre ontende hag̃uáicha umi persóna oĩva alérta añoite. Péicha haʼekuéra ohechakuaáta pe fin og̃uahẽtamaha. Upévare ñande jaservíva Jehovápe ‘ñañatende porã jaikóvo’ (Mat. 24:27, 42). Áño 1914 guive jahecha mbaʼéichapa oñekumplipaite ohóvo umi profesía, ha ñaĩ segúro ñaimemaha umi ára pahápe ha “ko múndo ára pahaite oñemoag̃uimaha”. Jehová odesidíma arakaʼépa ohundíta ko múndo vaiete (Mat. 24:3). Jahecha haguéicha, tekotevẽ ñaĩ alérta ha preparádo. ¿Mbaʼérepa? Primero, ñaneñeʼẽrenduségui Crístope. Ha segundo, pórke jaguerovia oñekumplimaha umi profesía oñeʼẽva umi ára paháre. ¿Mbaʼérepa ñapensa upéicha? Ndahaʼéi jarovia rupi oimeraẽ mbaʼe reínte, síno jahechakuaágui umi profesía oĩva la Bíbliape añetehápe oñekumplimaha. w15 15/8 2:8, 9

¿Ikatútapa jajediverti ha japytuʼu pe paraísope? Si, ikatúta. Jehová ñandeapo vaʼekue jadisfruta hag̃ua umi mbaʼe ñandegustávagui. Hiʼarive opromete omeʼẽtaha ñandéve umi mbaʼe jaipotáva (Ecl. 2:24). Péro igústoramo jepe jajediverti ha japytuʼu, ñanemanduʼa vaʼerã jadisfrutaveha koʼã mbaʼégui ñamotenondéramo Jehovápe. Upéicharõ, pe paraísope ikatúta avei japytuʼu ha jajediverti, péro siémpre iñimportantevéta jaservi Jehovápe. Upévare, jaikókena koʼág̃a guive ñaimerõguáicha pe múndo pyahúpe ha ñapensa meme umi vendisión jahupytývare jaservi haguére Ñandejárape (Mat. 6:33). Ndaikatúi ningo ni ñañeimahinamba mbaʼeichaitépa javyʼáta jaiko vove Ñandejára múndo pyahúpe. Jahechaukákena ñaimeseha upépe ha jajeprepara koʼág̃a guive. w15 15/8 3:17, 18

Jesús oikórõ guare ko yvy ape ári, haʼe vaʼekue peteĩ kuimbaʼe perfékto. Péro isy ha itúva, iñermanokuéra ha entéro umi ótra persóna iñimperfékto. Hiʼarive sapyʼánte idisipulokuéra oñembotuicha ha opensa ijehénte. Por ehémplo, pe pyhare haʼe omano mboyve, haʼekuéra oñepyrũ ojodiskuti oiporavoségui mávapa iñimportanteve ijapytepekuéra (Luc. 22:24). Upéicharõ jepe, Jesús okonfia ág̃ante haʼekuéra omadurataha ha oformataha peteĩ kongregasión oĩva peteĩ ñeʼẽme. Upévare, upe pyharépe oñemboʼe idisipulokuérare, ikatu hag̃uáicha oĩ unído haʼe ha Itúva oĩháicha unído. Heʼi voi Jehovápe: “[Toiko] chuguikuéra peteĩnte, ñande peteĩnteháicha avei” (Juan 17:21, 22). w15 15/9 1:10, 11

¿Mbaʼérepa Pedro okyhyje kuri oguatávo pe y ári? La Biblia heʼi nomañavéi hague Jesúsre, síno pe torméntare (Mat. 14:24-32). Péicha rupi ikangy ijerovia ha oñepyrũ oñapymi. Pe yvytu ha umi oláda ikatu ñakompara umi provléma ha umi tentasión oñepresentávare káda día. Péro ani ñanderesarái Jehová ikatuha ñanemombarete ñaaguanta hag̃ua, ijetuʼúramo jepe umi mbaʼe jahasáva. Ñapensaitereíramo ñane provlemakuérare, ikatu avei ñande fe ikangy ha jaduda Jehová ñanepytyvõtaha. Kualkiér kristiánogui ikatu ikangy ijerovia. ¿Mbaʼérepa jaʼe upéva? Pórke la Biblia heʼi pe fálta de fe haʼeha “pe pekádo ndahasyietéva ñandereity hag̃ua” (Heb. 12:1). Pédrore oiko haguéicha, ñande avei ikatu japerde ñande fe jajúramo jajepyʼapyeterei ñane provlemakuérare. w15 15/9 3:1, 6, 7

Jarresivi jave peteĩ rregálo, katuete jaagradese upe persónape, ha jaipurúvo upe rregálo ñademostra chupe ñandeagradesidoha. Jehová omeʼẽmbaite ñandéve opa mbaʼe ñaikotevẽva jaikove ha javyʼa hag̃ua. Ha ñande jaagradeseterei chupe koʼã mbaʼére. ¡Ajépa ojekuaa porãiterei Jehová ñanderayhuha! Upévare ñande jahechaukase avei jahayhuha chupe. Jehová omeʼẽ vaʼekue heta mbaʼe porã umi isrraelítape. Heta tiémpore omoĩmbaite chupekuéra opa mbaʼe oikotevẽva oikove hag̃ua. Avei omeʼẽ chupekuéra Léi, oikuaa hag̃ua hikuái mbaʼépa ojapo vaʼerã (Deut. 4:7, 8). Por ehémplo pe Léi heʼi: “Regueru vaʼerã nde Jára Jehová rógape iporãnguete umi primeroite remonoʼõ vaʼekuégui” (Éx. 23:19, NM). Umi isrraelíta oipotáramo Jehová ovendesi chupekuéra tekotevẽ iñeʼẽrendu ha omeʼẽ chupe pe iporãvéva. Péicha ohechaukáta hikuái oagradeseha Jehovápe (Deut. 8:7-11). w15 15/9 5:5, 6

¿Ndépa rehechakuaa mbaʼéichapa Jehová nepytyvõ? Por ehémplo, oĩ ermáno heʼíva Jehová oipytyvõ hague chupe ojuhu hag̃ua pe rrelihión verdadéra. Ótro katu heʼi omokyreʼỹeterei hague chupe peteĩ mbaʼe ohendu vaʼekue rreunionhápe. Térã oĩ omombeʼúva Ñandejára orresponde hague chupe iñorasión. Hetápe avei Jehová oipytyvõ ohupyty hag̃ua peteĩ méta omoĩ vaʼekue iservísiope. Ha oĩ avei heʼíva Jehová omeʼẽ hague chupe oikotevẽva ohejárõ guare peteĩ traváho oipeʼapaitéva chugui itiémpo, ha nahembyvéima chupe oho hag̃ua rreunionhápe térã predikasiónpe (Heb. 13:5). Jehová haʼéramo ñane amigoite ha ‘ñandepyʼapy potĩ’, jahechakuaáta haʼe ñanepytyvõha heta hendáicha. ¿Mbaʼéichapa ikatu ‘ñandepyʼapy potĩ’? Ñapensa meme vaʼerã umi mbaʼe iporãvare ha ñañehaʼãmbaite ani hag̃ua jajapo ivaíva (2 Cor. 4:2). w15 15/10 1:17, 19

Unos kuánto griégo oho kuri Jerusalénpe ofesteha hag̃ua pe Páskua umi hudíondi. Haʼekuéra ohecha umi mbaʼe Jesús ojapóva pe témplope ha oñesorprende. Upémarõ oporandu apóstol Felípepe ikatúpa oñemongeta hikuái Jesúsndi, péro Jesús ndoaseptái. ¿Mbaʼérepa? Pórke oikuaa ohóramo oñemongeta hendivekuéra, ikatuha oĩ hetave oapojáva ha odefendéva chupe. Ha upéva oikóramo ikatu hína ostorva oñekumpli hag̃ua Jehová volunta. Ha jaikuaaháicha, Jesús omano vaʼerã ñanderehehápe okumpli hag̃ua Ñandejára rembipota. Upéi omombeʼu idisipulokuérape saʼíma ofaltaha haʼe omano hag̃ua, ha heʼi: “Pe ohayhúva hekove, ohundíta; péro pe ndaijaʼéiva hekovére ko múndope, ohupytýta jeikove opaveʼỹva”. Upéi opromete chupekuéra pe oĩva pe téxto kostediaguápe (Juan 12:20-25). Katuete ningo Felipe omombeʼúne raʼe koʼã mbaʼe umi griégope. Jesús oñemeʼẽmbaite vaʼekue predikasiónpe, péro ndahaʼéi upévante la ojapóva. w15 15/10 3:13, 14

Jesús disipulokuéra oiko oikónte ojodiskuti openságui oĩha iñimportantevéva ijapytepekuéra. Jesús ndohejareíri upe provléma. Haʼe ohechakuaa tekotevẽha ipasiénsia, upévare okorrehi chupekuéra heta vése. Péro ndojapói upéva oimeha órante, síno oheka pe oportunida iporãvéva (Mar. 9:33-37). Katuete ningo nde rehayhu ne famíliape, ha upévare rekorrehi jepi chupe. Ojapo jave peteĩ mbaʼe noĩporãiva, reexplika pe mitãme mbaʼérepa oĩ vai la ojapóva, ha sapyʼánte errepeti jey chupe upéva unas kuánta vése. Péro, ¿mbaʼépa ikatu rejapo ni upeichavérõ nopenáiramo nderehe? (Prov. 22:15.) Esegi Jesús ehémplo. Nepasiénsiakena ne famíliare, eñemoñeʼẽ ha ekorrehi chupe mborayhúpe. Eheka pe lugár ha moménto okonvenivéva rekorrehi hag̃ua chupe. Peteĩ ermána Sudafricagua hérava Elaine, omombeʼu: “Mama ha papa núnka ndachekorrehíri pochýre. Péicha rupi ahechakuaa cherayhuha hikuái”. w15 15/11 1:5, 6

¿Mbaʼépa oiko vaʼerãmoʼã ñandehegui Jehová nañanderayhúirire? Yvyporakuéra osegíta ogoverna Satanás poguýpe, pe dios iñañaitéva odomináva ko múndo (2 Cor. 4:4; 1 Juan 5:19; Apoc. 12:9, 12). ¡Ajépa ivaiete vaʼerãmoʼã ñane situasión! Satanás opuʼã vaʼekue Jehováre ha okuestiona pe derécho Ñandejára orekóva ogoverna hag̃ua ko univérso. Hiʼarive oinsinua haʼe ogoverna porãvetaha (Gén. 3:1-5). Péro Jehová iñarandueterei, ha upévare oheja ohasa tiémpo ojehecha hag̃ua siértopa la heʼi vaʼekue Satanás. Ha amo ipahápe, ojekuaa porãiterei Satanás ni yvyporakuéra nogovernaporãiha. w15 15/11 3:3, 4

Ñaneumílderamo, jasegíta ko konsého Jesús omeʼẽ vaʼekue: “Peẽ peikuaa ojeʼe hague: ‘Rehayhu vaʼerã nde rapichápe, ha nderechaʼéi vaʼerã ne enemígore’. Che katu haʼe peẽme: Akóintekena pehayhu pene enemigokuérape ha peñemboʼe umi pendepersegívare. Péicha pehechaukáta peẽ haʼeha pende Ru yvagapegua raʼy, haʼe ningo oheja osẽ kuarahy iñaña ha hekoporãvape g̃uarã; ha omongy hekojoja ha hekojojaʼỹvape g̃uarã” (Mat. 5:43-45). Upéicharõ, ‘jahayhu vaʼerã ñane enemigokuérape’, ñandetrata vaíramo jepe hikuái. Siémpre jahechauka vaʼerã jahayhuha Jehovápe ha ñande rapichápe. Ha oĩramo ndaijaʼéiva ñanderehe térã nohenduséiva pe marandu porã, lomímonte iporã ñaipytyvõ chupekuéra oikotevẽ jave. w15 15/11 4:17, 19, 20

Ñandejára siervokuéra oipuru pe kapasida orekóva oñekomunika hag̃ua, ikatu hag̃uáicha omombaʼeguasu Jehovápe ha oñeʼẽ hese ótrope. Ñane tiémpope katu, jaipuru pe kapasida ikatu hag̃uáicha jatradusi la Biblia, ha ñaipytyvõ ñande rapichakuérape oikuaa hag̃ua Jehovápe. La Biblia ojetradusíma heta idiómape. Péro heta traduksión ndaijexáktoi. Upévare, umi ermáno ojapo vaʼekue pe Traducción del Nuevo Mundo, oñepresentáva áño 1950 guive, oñehaʼãmbaite otradusi pe eskritúra orihinálpe oĩhaichaite. Haʼekuéra odesidi orekotaha enkuénta mbohapy mbaʼe otradusi aja: 1) Ombotuicháta Ñandejára réra ha omoĩmbaitéta upe téra umi lugár oaparese haguépe umi téxto orihinálpe (Mat. 6:9). 2) Ijáma guive ha oñentendétaramo, otradusíta hikuái palávra por palávra, péro noñentendemoʼãirõ, otradusíta hikuái umi idéa. 3) Oipurúta umi palávra ndahasýiva ojelee, ha oñentende porã hag̃ua (Neh. 8:8). Koʼág̃a peve Jehová organisasión oñehaʼãmbaite osegi koʼã mbohapy mbaʼe ojapo hag̃ua pe Traducción del Nuevo Mundo, oĩmava mas de 130 idiómape. w15 15/12 2:1, 2

Noñembopuporãiramo pe trompéta, umi soldádo ikatu oñekonfundipa ha ndojapói la ojapo vaʼerã (1 Cor. 14:9). Péicha avei ikatu oiko ñañeʼẽ lájare. La Biblia heʼi ndajaipurúi vaʼerãha ñeʼẽ hasýva oñentende hag̃ua, ni ndajaikói vaʼerãha jajereterei jaʼéta jave álgo. Péro ñañatende vaʼerã ani jajepokuaa ñañeʼẽ derécho guasu ha ñamoñeñandu vai ñande rapichápe. Jesús oñeʼẽ lája ndahasýi vaʼekue oñentende hag̃ua. Ñapensamína pe diskúrso ojapo vaʼekuére oĩva Mateo kapítulo 5 al 7-pe. Upérõ haʼe ndoipurúi hetaiterei palávra oexplikáta jave álgo, ni umi palávra ijetuʼúva oñentende hag̃ua oipotágui umi hénte heʼi hese oñeʼẽkuaaitereiha. Jesús heʼíva noofendéi avavépe. Haʼe omyesakã heta mbaʼe iñimportánteva, péro upearã oipuru umi palávra isensíllova. Pe diskúrsope omboʼe kuri idisipulokuérape natekotevẽiha ojepyʼapyeterei hemikotevẽre. Ha ani hag̃ua hesarái hikuái upévagui, heʼi chupekuéra imanduʼa hag̃ua Jehová siémpre omongaruha umi guyrakuérape. Upéi oporandu: “¿Ndapevalevéingaʼu piko peẽ chuguikuéra?” (Mat. 6:26). ¡Ajépa isensilloite Jesús oñeʼẽ lája! w15 15/12 3:13, 14

Jaʼe jave ‘jajoayhu vaʼerãha oñoermánoicha’, ñañeʼẽ hína pe mborayhu ñañandúvare ñane hentekuérare térã ñane amigoitére (Juan 11:36). Upéva ndeʼiséi ñande kristiáno jajotratante vaʼerãha haʼerõguáicha oñoermáno. Ñande ningo oñoermanoite voi (Mat. 23:8). Pablo heʼi vaʼekue: “Pejoayhúkena pende pyʼaite guive oñoermáno teéicha. Peñehaʼã peẽ raẽ pehechauka pemombaʼeha pende rapichápe” (Rom. 12:10). Ko téxto ohechauka mbaʼeichaite pevépa jahayhu vaʼerã ñane ermanokuérape. Jahayhúramo entéro kristiánope ñane ermáno teéicha, opavavénte jaikóta oñoamigoitéicha ha siémpre ñaiméta peteĩ ñeʼẽme. Ñande kristiáno tee katu ñahenói “ermáno” entéro oservívape Jehovápe, tahaʼe haʼéva hetã térã irrása (Rom. 10:12). Upéicha rupi entéro jajoayhu oñoermánoicha, pórke upéva voi Jehová ñanemboʼe jajapo vaʼerãha (1 Tes. 4:9). w16.01 1:5, 6

Jahayhúramo Jehová ha Jesúspe, jasegíta japredika ha kyreʼỹme ñamboʼéta umi héntepe la Biblia (Mat. 28:19, 20; Luc. 4:43). Ñañeporandumína: “Og̃uahẽvo pe Konmemorasión tiémpo, ¿ikatúpa añeorganisa porã aservi hag̃ua de prekursór auxiliár ha apredika 30 térã 50 óra?”. Epensamína mbaʼépa ojapo peteĩ ermáno viúdo orekómava 84 áño. Haʼe oimoʼã kuri ndaikatumoʼãveimaha ojapo iprekursorádo auxiliár ijedáma ha hasykatu rupi. Péro umi prekursór oikóva ag̃ui hógagui, ojeofrese ikatu hag̃uáicha oraha chupe veíkulope, ha omeʼẽ hikuái ko ermánope peteĩ território ndoforsamoʼãiva chupe opredika hag̃ua. Upéva oipytyvõ ko ermánope ohupyty hag̃ua 30 óra predikasiónpe. ¿Ikatúpa ñande avei ñaipytyvõ peteĩ ermáno térã ermánape oservi hag̃ua de prekursór auxiliár pe Konmemorasión tiémpope? Añetehápe ningo naentéroi ikatu jajapo ñande prekursorádo, péro entéro ikatu jaipurumie ñane tiémpo ha ñane enerhía jaservi porãve hag̃ua Jehovápe. w16.01 2:7, 11

Umi ambue ovechakuéra ndoikuaáiramo entéro umi unhído réra, ¿mbaʼéichapa okumplíta hikuái pe profesía heʼíva “rohóta penendive”? ¿Mávapepa osegíta hikuái? La Biblia heʼi “diez kuimbaʼe” ipojaitaha “peteĩ hudío” ao ruguáire ha heʼitaha hikuái: “Ore rohóta penendive, rohendúgui Ñandejára oĩha penendive”. Jahechaháicha, pe “hudío” norrepresentái peteĩ persónapente, síno entéro umi unhídope. Umi ambue ovechakuéra oikuaa upéva, upéicha rupi heʼi hikuái ohoha umi unhídondi, térã oserviha hikuái Jehovápe hendivekuéra. Añetehápe natekotevẽi oikuaa hikuái entéro umi unhído réra, oikuaánte vaʼerã mávapa pe grúpo de unhído ikatu hag̃uáicha omoirũ chupekuéra. La Biblia ndeʼíri voi jasegi vaʼerãha peteĩ umánope. Jesúspe añoite jasegi vaʼerã, pórke haʼe la ñande líder (Mat. 23:10). w16.01 4:4

Jaikove aja pukukue entéronte ñaikotevẽ ótro ñanderayhu. Katuete ningo javyʼa jareko haguére amígo ñanderayhúva. Péro oĩ peteĩ mbaʼe ñaikotevẽvéva upévagui: ñaikotevẽ Ñandejára ñanderayhu. ¿Mbaʼépa jajapo vaʼerã upearã? Tekotevẽ jaiko iñamígoramo. Péro heta persóna opensa yvyporakuéra núnka ndaikatumoʼãiha ohupyty upéva. ¿Mbaʼérepa? Pórke Ñandejára ipoderosoiterei. Upéicharõ jepe, ñande jaikuaa porã ikatuha jaiko iñamígoramo. ¿Mbaʼérepa jaʼe upéva? Pórke la Biblia omombeʼu oĩ hague heta persóna haʼe vaʼekue Jehová amígo. Iporã vaʼerã jajepyʼamongeta koʼã persóna rembiasakuére, ha jasegi iñehémplo. Upéicha ikatúta ñamotenonde Ñandejára amista (Sant. 2:23). Abrahán haʼe vaʼekue Jehová amígo, pórke ojeroviaiterei hese. Upévare la Biblia heʼi: “Abrahán hína opavave umi ojeroviáva túva” (Rom. 4:11). w16.02 1:1, 2

Ezequías túa ningo haʼe vaʼekue peteĩva umi rréi iñañavéva oĩ vaʼekue Judápe, péro Ezequías katu peteĩva umi rréi ivuenovéva (2 Rey. 18:6). Haʼe okorrehi umi mbaʼe vai itúa ojapo vaʼekue. Avei omopotĩ pe témplo, ojerure Jehovápe toperdonami pe puévlope ipekadokuéra, ha oitypaite umi taʼanga oĩva Israel tuichakuére (2 Crón. 29:1-11, 18-24; 31:1). Upe rire, pe rréi Senaquerib oatakasérõ guare Jerusalén, Ezequías ohechauka orekoha fe ha ipyʼaguasuha. Avei heʼi pe puévlope okonfia hag̃ua Jehová oñangarekotaha hesekuéra (2 Crón. 32:7, 8). Péro peteĩ jey ou oñemombaʼeguasu, upéicharõ jepe upéi ohechauka iñumildeha ha oasepta Jehová okorrehírõ guare chupe (2 Crón. 32:24-26). Jahechaháicha, Ezequías osẽ porã, pórke odesidíma kuri ndosegimoʼãiha itúva ehémplo. Péicha ohechauka oikoha Jehová amígoramo. Ñande avei jasegi vaʼerã iñehémplo. w16.02 2:11

Ñandepyʼaporãramo jahechauka jahayhu ha jarrespetaha Jehovápe ha ñande rapichápe. Por ehémplo, ñamoĩ chupe reikuaaha peteĩ ermáno ojapo hague peteĩ mbaʼe ivaíva. Katuete ningo ndereipotamoʼãi ipochy nderehe, koʼýte oimérõ ne hénte térã ne amigoite. Péro reikuaa porã avei iñimportanteveha emotenonde Jehovápe. ¿Mbaʼépa ikatu rejapo? Iporãvéta neñeʼẽrendu Jehovápe ha retrata porã ne ermánope, Natán ojapo haguéicha. Ere chupe pyaʼe ojerure vaʼerãha ajúda umi ansiánope. Péro haʼe noñeʼẽiramo, ndete reho vaʼerã reñeʼẽ ansianokuérandi. Péicha rehechaukáta remotenondeha Jehovápe. Ha avei rehechaukáta ndepyʼaporãha ne ermánondi, pórke umi ansiáno mborayhúpe oñemoñeʼẽta chupe, ha oipytyvõta upe ermánope oĩ porã jey hag̃ua Jehovándi (Lev. 5:1). w16.02 4:14

La Biblia heʼi: “Pemombaʼeguasu vaʼerã Ñandejárape pende pyʼaite guive”. Upéva ikatu jajapo ñane ermanokuérandi, por ehémplo, jahávo rreunionhápe ha japredika jave hendivekuéra. Péro ikatu avei ñamombaʼeguasu Ñandejárape ñaneañohápe, por ehémplo ñañemboʼe jave ha jastudiávo la Biblia. Entéro ojededikáva Jehovápe ndohechái koʼã mbaʼe peteĩ kárgaramo, síno oñeñandu rréi David oñeñandu haguéicha. Haʼe heʼi vaʼekue: “Ñandejára, avyʼaiterei ajapo haguére ne rembipota. Che areko nde léi che korasõme” (Sal. 40:8, NM). Upévare, ani nderesarái nde servísio Jehovápe ndaikatuiha odepende nde sy, nde túa ni ótra persónare. Koʼág̃ama nderekopotĩramo ha remombaʼeguasu Ñandejárape nde pyʼaite guive, ojekuaáta nderehe reimeha segúro kóva haʼeha pe rrelihión verdadéra. Avei ojekuaáta nderehe rejaposeha Jehová heʼíva. Péicha rejepreparátama rehóvo rejevautisa hag̃ua. w16.03 2:10, 12, 15

Pe Léi Jehová omeʼẽva umi isrraelítape Moisés rupive, oprotehe chupekuéra pe inmoralida sexuálgui ha umi rrelihión fálsagui, ojepraktikáva umi ótro tetãme. Umi isrraelíta oipotáramo Jehová ovendesi chupekuéra, okumpli vaʼerã pe Léi. Naiñeʼẽrendúiramo hikuái, katuete oho vaíta chupekuéra (Deut. 28:1, 2, 15). Ñandejára siervokuéra oikotevẽ avei umi instruksión ambue mbaʼére. Por ehémplo, Ñandejára Léi oprepara umi isrraelítape ohaʼarõ hag̃ua pe Mesías, pórke haʼe rupive oñekumplíta Ñandejára rembipota. Avei omomanduʼa chupekuéra iñimperfektoha ha oikotevẽha Jesús sakrifísiore, ikatu hag̃uáicha oñeperdona pára siémpre ipekadokuéra (Gál. 3:19; Heb. 10:1-10). Pe Léi rupive ojeprotehe pe Mesías antepasadokuérape, ha upéi oipytyvõ Ñandejára siervokuérape opilla hag̃ua pe Mesías og̃uahẽ vove. Upévare la Biblia heʼi pe Léi haʼe hague “peteĩ gía ñandegueraháva Crístope”. w16.03 4:6, 7