Abril

Oĩ vaʼekue peteĩ ánhel haʼéva kuri Jehová amígo. Péro peteĩ día oñepyrũ opensa yvyporakuéra ikatuha oadora chupe Ñandejárape rangue, ha ndoipeʼái rupi upe mbaʼe vai iñakãgui, ou opeka (Sant. 1:14, 15). Haʼe opuʼã vaʼekue Ñandejára Jehováre ha “omboyke pe añetegua”, upéicha rupi oiko chugui “pe japu ruvicha” (Juan 8:44). Ndajaikuaái ningo mbaʼéichapa héra vaʼekue ko ánhel, péro oñehenói chupe Satanás. Haʼe ningo Jehová ha yvyporakuéra enemigoite hína. La Biblia ñanepytyvõ ñantende hag̃ua mbaʼeichaitépa iñaña. Por ehémplo, ohenói chupe Satanás, heʼiséva “oñemoĩva ótrore”. Haʼe ndaijaʼéi Ñandejára goviérnore ha opuʼã ikóntrape. Satanás ndoipotaiete voi Jehová ogoverna. w15 15/5 1:1, 2

Añetehápe ningo jastudia jave la Biblia, jatopa jepi mbaʼépepa ñamehora vaʼerã jaservi porãve hag̃ua Ñandejárape. Péro jatopa avei hetaiterei mbaʼe ohechaukáva mbaʼeichagua persónapa Jehová, ha mbaʼe mbaʼépa haʼe ojapo ñanderayhúgui. Ñaaprendévo koʼã mbaʼe, jahayhuve chupe, haʼe avei ñanderayhuve, ha upéicha ñamombareteve ñane amista. Ñañemoag̃ui hag̃ua Jehováre, jastudia vaʼerã la Biblia jaikuaa porãve hag̃ua chupe. Jesús heʼi vaʼekue voi: “Umi hénte ohupyty hag̃ua jeikove opaveʼỹva, tekotevẽ ndekuaa porãve ohóvo, nde Ñandejára teete ha peteĩetévape ha Jesucrístope, upe nde rembou vaʼekue” (Juan 17:3). Ñaaprendéramo jepe heta mbaʼe ideprovéchova jalee jave la Biblia, iñimportanteve hína jastudia ‘jaikuaa porãve’ hag̃ua Jehovápe (Éx. 33:13; Sal. 25:4). Oiméramo Ñandejára ñane Amígo, ndajadudamoʼãi chugui la Biblia nomombeʼupáiramo jepe mbaʼérepa haʼe ojapo raʼe peteĩ mbaʼe. w15 15/4 3:6-8

Ndaʼaréi oñeporandu unos kuánto ansiáno iñexperiénsiavape mbaʼépa ojapo hikuái ombokatupyry hag̃ua umi kuimbaʼépe kongregasiónpe. Koʼã ansiáno haʼéramo jepe de diferénte país, umi suherénsia omeʼẽva ojojogua lénto, jepe káda ermáno situasión idiferénte. Upéva ohechauka umi konsého vívliko oñemeʼẽva oñembokatupyry hag̃ua umi ermánope, ideprovechoha entéro kongregasión oĩvape ko yvy tuichakuére. Ñepyrũrã, pe ansiáno oprepara vaʼerã pe ermáno korasõ, ikatu hag̃uáicha omboʼe chupe. ¿Mbaʼérepa? Jahechamína peteĩ ehémplo. Peteĩ chokokue ningo katuete oprepara raẽ pe yvy oñemitỹ hag̃ua. Upéicharõmante pe semílla heñói ha okakuaa porãta. Upéicha avei peteĩ ansiáno ombokatupyryséva ótro ermánope, primero oprepara raẽ vaʼerã pe ermáno korasõ. Péicha haʼe oĩtama oaprende hag̃uáicha. Ha ¿mbaʼéichapa ikatu oprepara pe ermáno korasõ? Upearã ikatu osegi proféta Samuel ehémplo opreparárõ guare Saúlpe odirihi hag̃ua Israélpe (1 Sam. 9:15-27; 10:1). w15 15/4 1:11, 12

Heta mbaʼe ko múndo oikuaveʼẽva ivai, ha haʼe oipuru umíva ñanemoñuhã hag̃ua. Por ehémplo, oikuaveʼẽ ñandéve umi mbaʼe ñandestiráva ikatu hag̃uáicha jadesovedese Ñandejárape. Ha ojapo voi ikatúva guive jahayhuve hag̃ua ko múndo ha ani hag̃ua ñañehaʼã Jehová servísiope (1 Juan 2:15, 16). Síglo primérope oĩ vaʼekue kristiáno hoʼáva ko ñuhãme. Upéva oiko vaʼekue peteĩ ermánore oipytyvõva Páblope, hérava Demas. Pablo heʼi: “Demas chereja ohayhu rupi ko múndo” (2 Tim. 4:10). ¿Mbaʼépa la ostira vaʼekue Démaspe? La Biblia nomombeʼúi upéva. Péro ikatu oime omombaʼeve raʼe pe pláta, omombaʼe rangue Jehová servísio. Demas ikatu kuri ojapo heta mbaʼe iporãitereíva oservívo Jehovápe, péro odesidi vai ha ojavy upe oportunida. Ko múndo ningo ni mbaʼevéicharõ ndoikuaveʼẽmoʼãi kuri chupe peteĩ mbaʼe iporãvéva Jehová ikatúvagui oofrese (Prov. 10:22). w15 15/5 2:10, 11

Jesús oikuaa vaʼekue umi hénte ohasa asyha umi líder rrelihióso káusare. Haʼekuéra ijapu ha oinventa umi rrégla Ñandejára nomandáiva, ha upévare umi hénte okyhyje chuguikuéra (Mat. 23:4; Mar. 7:1-5; Juan 7:13). Péro Jesús ningo ndoroviái umi japu ni ndokyhyjéi chuguikuéra, upéicha rupi ontende mbaʼéichapa oñeñandu umi hénte. La Biblia heʼi: “Jesús omañávo umi héntere ombyasyeterei chupekuéra, ohechágui mbaʼéichapa oiko asyeterei ha isarambipa hikuái umi ovecha herekuaʼỹvaicha” (Mat. 9:36). Jesús osegi Itúva ehémplo, upévare oiporiahuvereko ha mborayhúpe otrata umi héntepe. Haʼe oipytyvõ chupekuéra ohecháramo ohasa asyha hikuái. Upéva oaprende kuri Itúvagui. Peteĩ jey, Jesús ha ijapostolkuéra oviaha mombyry opredika hag̃ua. Ha ikaneʼõiterei rupi hikuái oheka peteĩ lugár opytuʼu hag̃ua. Péro upéi Jesús ohecha heta hénte ohenduseha chupe oporomboʼe jave. Ikaneʼõramo jepe, Jesús ohechakuaa koʼã hénte oikotevẽha ajúda. Upévare “oñepyrũ omboʼe chupekuéra heta mbaʼe” (Mar. 6:30, 31, 34). w15 15/5 4:3, 4

Proverbios kapítulo 8-pe oñeñeʼẽ pe arandúre haʼerõguáicha peteĩ persóna. Ko kapítulope heʼi pe arandu orrepresentaha hína Jesúspe ou mboyve ko yvy ape ári. Ha heʼi Ñandejára okreárõ guare entéro mbaʼe, Jesús oipytyvõ hague chupe opa mbaʼépe. Avei omombeʼu haʼeha peteĩ persóna ombaʼapokuaáva ha ikatupyrýva. Katuete Jesús ovyʼáne raʼe oipytyvõrõ guare Ñandejárape ojapo hag̃ua pe yvága ha ko yvy. La Biblia heʼi Jesús oguerohoryeterei hague opa mbaʼe Ñandejára ojapo vaʼekue, péro ohayhuveha yvyporakuérape (Prov. 8:22-31). ¿Mbaʼéichapa Jesús ohechauka ohayhuetereiha Ñandejárape ha yvyporakuérape? Oúvo ko yvy ape ári “opaga ha oguenohẽ hag̃ua hetápe pekádo poguýgui” (Filip. 2:5-8; Mat. 20:28). w15 15/6 2:1, 2

¿Ndépa reagradese Jehovápe opa mbaʼe ojapóvare nderehehápe? Upéicharõ, ejededika chupe ha ejevautisa. Rejededikávo Jehovápe repromete hína chupe siémpre rejapotaha ivolunta. Ani rekyhyje reñekompromete hag̃ua Jehovápe. Haʼe ningo iporãvante oipota ndéve g̃uarã ha nerrekompensáta neñeʼẽrendúramo chupe (Heb. 11:6). Reñemeʼẽvo Jehovápe ha rejevautisa, katuete oho porãvéta ndéve. Jaʼéma haguéicha, Jehová oipota pe iporãvéva ndéve g̃uarã. Péro Satanás opensa ijehénte ha ndoikuaaséi ndehegui mbaʼeve. Rejapóramo chupe ogustáva, haʼe ndorekói mbaʼeve iporãva oofrese hag̃ua ndéve (Apoc. 20:10). w16.03 2:16, 18, 19

Jaikoséramo Jehová amígo teéramo, ndajadudái vaʼerã haʼe ñanerenduha ñañemboʼe jave chupe. Ñapensamíntena Jesús rehe. Haʼe oĩrõ guare yvágape ningo ohecha kuri mbaʼéichapa Ñandejára okontesta yvyporakuéra ñemboʼe. Upéi oúrõ guare ko yvy ape ári, haʼe voi oñemboʼe ha omombeʼu Jehovápe mbaʼépa opensa ha mbaʼéichapa oñeñandu. Una ves, oñemboʼe chupe peteĩ pyhare pukukue (Luc. 6:12; 22:40-46). Jesús avei omboʼe vaʼekue idisipulokuérape oñemboʼe hag̃ua. ¿Ojapónepa raʼe koʼã mbaʼe opensáramo Ñandejára nohenduiha umi orasión? Nahániri. Haʼe oikuaa porã Jehová ohenduha umi ñemboʼe. Ñande avei jaguerovia ñande pyʼaite guive Ñandejára ñanerenduha ñañemboʼe jave chupe (Sal. 65:2). w15 15/4 3:11, 13

Reñemboʼéramo ne famíliandi, haʼe ohechakuaáta iñimportanteha jajerovia Jehováre. Peteĩ ermána Brasilgua hérava Ana, heʼi: “Oĩ jave provléma ore famíliape, por ehémplo avuélo umía hasýrõ guare, papa ha mama ojerure ajúda Jehovápe odesidi porã ha ogueropuʼaka hag̃ua pe situasión ijetuʼuetéva. Haʼekuéra ojepyʼapyetereírõ jepe, ohechauka ojeroviaha Ñandejárare ha oheja opa mbaʼe ipópe. Upéva chepytyvõ ajeroviave hag̃ua Jehováre”. Jahechaháicha, reñemboʼe jave ne famíliandi, ndahaʼéi hesénte nemanduʼa vaʼerã, síno ejerure Jehovápe tapenepytyvõ peẽ sy ha túvape. Por ehémplo, ikatu ejerure Jehovápe tanembopyʼaguasu repredika hag̃ua ne vesínope, térã ne patrón omeʼẽ hag̃ua ndéve permíso ikatu hag̃uáicha reho asambleahápe. Péicha ne família ohecháta rejeroviaha Jehováre ha osegíta ne ehémplo. w15 15/11 1:7, 8

Peteĩ persóna ojevautisaséva ha osegiséva Jesús ehémplo, ojapo vaʼerã upéva ohayhúgui Jehovápe. Ha ikatu hag̃uáicha amás día ohayhuve ohóvo chupe, ojepyʼamongeta vaʼerã Jesús sakrifísiore (2 Cor. 5:14, 15; 1 Juan 4:9, 19). Reñemotiémporamo repensa hag̃ua ko rregálo porãite Jehová omeʼẽvare, nekyreʼỹvéta rehechauka hag̃ua reagradeseha chupe. Epensamína ko ehémplore. Ñamoĩ chupe rejahoga potaitemaha, péro peichahágui ou peteĩ persóna ndesalva. ¿Mbaʼépa rejapóta nenohẽ rire pe ýgui? ¿Rehótapa nde rógape reagradeseʼỹre chupe? Katuete ningo nderejapomoʼãi upéva, síno reiméta agradesído chupe tóda la vída. Péicha avei Jehová ha Jesús ñandesalva ñanderayhueterei rupi. Avei haʼekuéra rupive jareko esperánsa jaikove hag̃ua opa árare pe Paraísope. ¡Ajépa jaagradesete chupekuéra upe haguére! w16.03 2:16, 17

Jehová ojeroviaiterei Itaʼýrare, pórke haʼe ifiél vaʼekue oĩro guare hendive hetaiterei tiémpo yvágape. Ha oĩro guare ko yvy ape ári, Jesús iñeʼẽrendu vaʼekue Ñandejárape omano meve, osufrietereíramo jepe. ¿Mbaʼépa ikatu jahupyty haʼe omano haguére ñanderehehápe? Jareko oportunida jaikove hag̃ua opa árare pe paraísope. Ha apóstol Juan oskrivi: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive” (1 Juan 4:9, 10). w15 15/11 3:13, 14

Enterovete ningo ñanase pekadór ha ñamano Adán kúlpare, upévare avave ndaikatúi heʼi noikotevẽiha Jesús sakrifísiore. Ñandejára siérvo iñeʼẽrenduvéva jepe oikotevẽ upéva. Enterove ñarrekonose vaʼerã Ñandejára operdonaha ñandéve peteĩ déuda tuichaitereíva. ¿Mbaʼépa jajapo vaʼerã jahechauka hag̃ua ñandeagradesidoha? Iporã ñañeporandu: “¿Chetrata vaípa raʼe peteĩ ermáno? ¿Hasýpa chéve aperdona hag̃ua chupe?”. Upéi ñapensa Jehová ojapo vaʼekuére ha jasegi iñehémplo. Haʼe ningo siémpre oĩ ‘ñaneperdona hag̃uáicha’ (Sal. 86:5, NM; Neh. 9:17). Jaagradeséramo Jehovápe ñaneperdona haguére, katuete ñaperdonáta avei ñande rapichápe ñande pyʼaite guive. Jaipotáramo Jehová ñanderayhu ha ñaneperdona, ñande avei jahayhu ha ñaperdona vaʼerã ñane ermanokuérape (Mat. 6:14, 15). Añetehápe ningo ñaperdona haguére ñande rapichápe nokambiamoʼãi umi mbaʼe oiko vaʼekue yma, péro katuete okambiáta ñane renonderã ha ñanepytyvõta jahupyty hag̃ua heta mbaʼe porã. w16.01 2:5, 15-17

Jesús heʼi vaʼekue koʼã mbaʼe oipytyvõ hag̃ua Pédrope ha umi ótro disípulope oñeimahina hag̃ua ogovernamaha yvágape Jesús ndive, ha oipytyvõha yvyporakuérape ohupyty jey hag̃ua perfeksión. Heta Ñandejára siérvo oipuru iñimahinasión omombarete hag̃ua ijerovia. Por ehémplo, Abel oñeimahina mbaʼéichapa oñekumplíta Jehová promésa, ha ojerovia rupi umívare, Jehová oguerohory chupe. Abrahán avei opensa meme vaʼekue mbaʼéichapa oñekumplíta pe promésa oñeʼẽva pe “desendiénte” rehe (Gén. 3:15, NM). Upéva oipytyvõ chupe iñeʼẽrendu hag̃ua Jehovápe ombohováirõ jepe heta provléma. Moisés avei opensa meme vaʼekue pe rrekompénsa Jehová oprometévare, ha upévare ohayhuve chupe ha osegi iñeʼẽrendu (Heb. 11:26). Ñande avei ñañeimahina meméramo mbaʼéichapa jaikóta Ñandejára okumpli vove oprometéva ñandéve, koʼýte jahayhuvéta chupe ha jajeroviavéta hese. w15 15/5 3:17, 18

Jaipotáramo oiko ñandehegui kristiáno madúro, jajapo vaʼerã Jesús ojapo haguéicha. Haʼe ningo noñekontentái vaʼekue oikuaáma haguére umi enseñánsa iñimportantevéva oĩva Ñandejára Ñeʼẽme. Ñande avei tekotevẽ “jaikuaa porã” Ñandejára Ñeʼẽ. Ñahesaʼỹijo porã vaʼerã la Biblia, pórke jaikuaa ‘umi okakuaapámava hoʼuha tembiʼu hypyʼũva’ (Efes. 4:13, Heb. 5:14). Upearã ñaprograma vaʼerã mbaʼépa jastudiáta. Por hémplo, jalee vaʼerã la Biblia káda día, ha káda semána jajapo vaʼerã ñande estúdio personál ha ñande estúdio de família. Jastudia jave la Biblia, ñañehaʼã vaʼerã ñantende mbaʼépa Jehová opensa ha mbaʼépa oñandu, ha upéi jareko enkuénta koʼã mbaʼe jadesidíta jave. Jajapóramo upéicha, ñane amista Jehová ndive imbaretevéta. w15 15/9 1:5, 9, 10

Jesús oikuaa porã mbaʼéichapa ofunsiona ko planéta, ha oĩrõ guare ko yvy ape ári ohechauka vaʼekue orekoha ipoguýpe pe naturalésa. Epensamíntena ko situasiónre: Pe oláda ojejapete pe kanóare ha pe y oikepa chupekuéra. Pe torménta hyapu hatã ha pe kanóa okacha vaipa. Upéicharõ jepe, Jesús oke hína, pórke ikaneʼõ kuri. Umi disípulo katu okyhyjeterei. Upémarõ haʼekuéra omombáy chupe ha heʼi: “¡Oresalvamína ore Ruvicha, romanombátamako!” (Mat. 8:25). ¿Mbaʼépa ojapo Jesús? Opuʼã ha heʼi pe yvytu ha pe márpe: “¡Epytaitéke! ¡Ekirirĩetéke!” (Mar. 4:39). “Ha pe torménta ohasaite.” Péicha ojekuaa porã Jesús orekoha podér odomina hag̃ua pe naturalésa. w15 15/6 1:12-14

Jesús omboʼe rire pe padrenuéstro, omoĩ peteĩ ehémplo ñanepytyvõva jahechakuaa hag̃ua natekotevẽiha jajepyʼapyeterei ñane remikotevẽre. Haʼe heʼi kuri Jehová okuidaha umi lírio oĩvare pe ñúre, ha upéi oporandu: “¿Mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã?”. Upéi heʼi avei: “Ani pejepyʼapyeterei koʼẽrõ g̃uarãre” (Mat. 6:30-34). Koʼã mbaʼe Jesús heʼi vaʼekue ñanemboʼe ndovaleiha jajepyʼapyeterei umi mbaʼe ñaikotevẽvare, síno javyʼáma vaʼerãha jahupytymívare káda día. Upéicharõ, ikatu hína jajerure Jehovápe peteĩ lugár jaiko hag̃ua, peteĩ traváho ñañemantene hag̃ua, ha tañanemoarandu ikatu hag̃uáicha jadesidi porã oiméramo ñanderasykatu. Péro oĩ peteĩ mbaʼe iñimportantevéva jajerure vaʼerã ñane ñemboʼépe. ¿Mbaʼépa hína upéva? Peteĩ jey Jesús heʼi vaʼekue: “Yvypóra noikotevẽi pan rehe añónte oikove hag̃ua, oikotevẽ guei opaite mbaʼe Jehová heʼívare” (Mat. 4:4). Upéva heʼise jajerure vaʼerãha Jehovápe osegi hag̃ua omeʼẽ ñandéve opa mbaʼe ñanemoag̃uivétava hese. w15 15/6 5:4, 7, 8

¿Jajerurépa siémpre Jehovápe tañanepytyvõ jasegi hag̃ua ñaneñeʼẽrendu chupe ñambohovái jave umi tentasión? Oiko mboyve ñandehegui Testígo, katuete ñandegustáne raʼe algúna kósa naiporãiva, ha oiméne jajapo voi raʼe upéva. Upéicha rupi, ikatu sapyʼánte ñandestira jey umi mbaʼe vai. Péro Jehová ikatu ñanepytyvõ ñakambia hag̃ua. Por ehémplo, ñañeʼẽmína rréi David rehe. Haʼe oreko vaʼekue rrelasión sexuál peteĩ tembireko ahénondi. Péro upe rire oñarrepenti ha ojerure Jehovápe ‘tomopotĩ’ chupe ikorasõ ha toipytyvõ chupe ikatu hag̃uáicha iñeʼẽrendu (Sal. 51:10, 12). Ñande kásope avei, oiméramo jareko umi deséo vai, jajerure vaʼerã Jehovápe ajúda. Haʼe añoite ikatu ñanepytyvõ ñaneñeʼẽrendu hag̃ua chupe ha ñakontrola kuaa hag̃ua ñapensáva ha jajapóva (Sal. 119:133). w15 15/6 3:5, 6

Heta testígo de Jehová iñexperiensiavéva ohecha mbaʼéichapa umi kámbio omoporãve Ñandejára organisasiónpe. Por ehémplo, ymave káda kongregasión oreko vaʼekue peteĩ siérvo de kongregasión, káda sukursálpe oĩ peteĩ siérvo de sukursál, ha pe séde mundiál katu odirihi vaʼekue pe presidénte de la Sociedad Watch Tower. Koʼã ermáno orekóramo jepe iñajudánte, haʼekuéra jey odesidi vaʼerã opa mbaʼe. Ha upéicha ojejapo vaʼekue káda kongregasiónpe, káda sukursálpe ha pe séde mundiálpe. Péro áño 1972 guive oñekambia upéva, umi grúpo de ansiáno odesidíma oñondivepa. Por ehémplo, káda kongregasiónpe ogia peteĩ grúpo de ansiáno, káda sukursálpe oĩ peteĩ Komite de Sukursál, ha testígo de Jehová organisasión katu odirihi peteĩ grúpo de ansiáno unhído, oñehenóiva Kuérpo Governánte. Koʼág̃arupi Jehová organisasión ontende porãve la Biblia, upévare ojejapo umi kámbio ñanevenefisiaitereíva. Por ehémplo, ojedesidíta jave peteĩ mbaʼe, ndahaʼevéima peteĩ persónante la odesidíva. Entéro umi ansiáno Jehová omeʼẽva “rregáloramo” oñopytyvõ odesidi hag̃ua umi mbaʼe ovenefisiátava ermanokuérape (Efes. 4:8). w15 15/7 1:14, 15

Koʼág̃arupi heta hénte opensa hetã, irrása térã ikultúra iñimportanteveha umi ótrogui, upévare ndaijaʼéi hikuái ojuehe. Péro ñande jaservíva Jehovápe nañapensái upéicha, pórke jahayhu Ñandejárape ha jajapose opa mbaʼe haʼe oipotaháicha (1 Juan 5:3). Upévare, tahaʼe haʼéva pe lugár jaikoha térã ñanase hague, siémpre ñañehaʼã jasegi umi konsého haʼe omeʼẽva. Ñandéve g̃uarã iñimportanteve hína jaapoja Jehovápe ha igoviérno (Mat. 6:33). Upévare ikatu jaʼe ‘ndajajeheʼaiha ko múndore’ (Is. 2:4; Juan 17:11, 15, 16). Heta persóna opensa ipaís, ikultúra térã ikostumbrekuéra iporãveha umi ótrogui. Oĩ avei umi ifanatikoitereíva iclúb rehe térã ohuga jave ipaís. Upévare oĩ heta kompeténsia, ha avei oĩ ndaijaʼéiva ojuehe térã ojuka voi hapichápe idiferénte haguére chugui. Ikatu avei umi goviérno odesidi umi mbaʼe iñinhústova. ¿Ñañemoĩtapa jakopi avei hesekuéra, térãpa ñakirirĩmítante? Ñañatendékena ani peichahágui ñañentremete ko múndore. w15 15/7 3:1, 2

Jehová ningo ipotĩ ha ohaʼarõ ñande avei jajapo opa mbaʼe hekoitépe. Upévare oipota siémpre pe Salón ipotĩ ha iñordenádo (1 Cor. 14:33). Jehová oipota ipotĩ pe adorasión ñameʼẽva chupe ha umi mbaʼe ñapensáva. Avei oipota ñanekondúkta porã ha ñanepotĩ físikamente (Apoc. 19:8). Ñamantenéramo potĩ asy ñane Salón, nañatĩmoʼãi ñainvita hag̃ua umi héntepe. Ha haʼekuéra ou vove Salónpe, ohechakuaáta ñande jaikoseha peteĩ múndo pyahu ipotĩvape. Avei ohechakuaáta hikuái ñamombaʼeguasuha peteĩ Dios ipotĩvape, ojapótava ko yvýgui peteĩ paraíso neporãva (Is. 6:1-3; Apoc. 11:18). Tahaʼe haʼéva pe lugár jaikoha, térã mbaʼépa opensa umi hénte upepegua, ñande ñamopotĩ porã vaʼerã ñane Salón ha entéro mbaʼe oĩ vaʼerã ordenádo. ¿Mbaʼérepa upéva iñimportantete? Pórke upépe ñamombaʼeguasu Jehovápe (Deut. 23:14). w15 15/7 4:13-15

Áño 1914-pe, umi kristiáno ohechakuaa Jesús oñepyrũmaha ogoverna, ha ontende hikuái pe fin ikatuha og̃uahẽ en kualkiér moménto. Upémarõ ojeprepara hikuái. ¿Mbaʼéichapa ojapo upéva? Haʼekuéra oñepyrũ opredika meme. Marcos kapítulo 13-pe, Jesús heʼi pe ogajára ikatuha og̃uahẽ ‘de madrugáda, térã koʼẽmbotávo’. Upéva heʼise ikatuha og̃uahẽ tardemie umi tembiguái ohaʼarõvagui. Péro tahaʼe haʼéva pe óra og̃uahẽva pe ogajára, haʼekuéra oĩ vaʼerã alérta. ¿Mbaʼépa ñanemboʼe upéva? Ojapóramo jepe heta áñoma ñahaʼarõ hague og̃uahẽ pe fin, upéva ndeʼiséi ofaltaitiha heta tiémpo. Koʼág̃a eñeimahinami reimemaha Ñandejára múndo pyahúpe. Rehechapaite kuri mbaʼéichapa oñekumpli umi mbaʼe Jehová heʼi vaʼekue oikotaha umi ára pahápe. Katuete ningo rejeroviave Jehováre ha reime segúro okumplipaitetaha umi mbaʼe oprometéva (Jos. 23:14). Avei reagradeseterei Jehovápe ogueru haguére pe fin itiempoitépe, ha omanda haguére isiervokuérape oĩ hag̃ua alérta ha preparádo (Hech. 1:7; 1 Ped. 4:7). w15 15/8 2:10, 11, 14

Koʼág̃arupi heta hénte oñentretene umi mbaʼe Jehovápe ndogustáivare, umíva apytépe pe violénsia, inmoralida sexuál, máhia ha demonísmo. Koʼã mbaʼe osẽ iporãrõguáicha Internétpe, télepe, pelíkulape, lívro ha rrevístape. Por ehémplo, heta paíspe yma ndojeaseptái vaʼekue umi hekovaívape, térã ojekastiga voi umi oporojukávape. Péro koʼág̃a oñepermitíma koʼã mbaʼe vai ha oĩ léi oprotehéva koʼãichagua persónape. Jehová katu núnka nokambiái, ha yma guive koʼag̃aite peve ndaijaʼéi umi mbaʼe vaíre (Rom. 1:28-32). Primer síglope, umi héntepe ogusta vaʼekue avei pe violénsia ha pe inmoralida sexuál. Péro umi kristiáno ypykue noñentretenéi koʼã mbaʼére, pórke haʼekuéra orrespeta Ñandejára heʼíva. Upéicha rupi heta hénte oñembohory hesekuéra ha opersegi chupekuéra. Umi hénte ‘nontendéi mbaʼérepa haʼekuéra ndosegíri ojapo umi mbaʼe ivaietéva hendivekuéra’ (1 Ped. 4:4). w15 15/8 4:2, 3

Umi kristiáno madúro ojapo opa ikatúva oĩ hag̃ua unida kongregasiónpe (Efes. 4:1-6, 15). Enterovéva ñañehaʼã vaʼerã ñambaʼapo peteĩ ñeʼẽme ñane ermanokuérandi. Péro upearã tekotevẽ ñaneumílde. Por ehémplo, ¿mbaʼépa jajapo peteĩ ermáno ofalláramo térã ñaneofendéramo? ¿Nañañeʼẽvéimapa chupe, térãpa ñañehaʼãmbaite ñaĩ porã jey hag̃ua hendive? Ñañehaʼãramo ñasolusiona umi provléma tuichave mboyve, jahechaukáta ñanemaduroha espirituálmente. ¿Ndépa reñehaʼãmbaitéta oĩ hag̃ua unida kongregasiónpe? w15 15/9 1:12, 13

Jesús oĩ vaʼekue segúro la Biblia ouha Jehovágui ha pype oĩha umi konsého ideprovechovéva. Ikatu hag̃uáicha jajerovia mbarete Jesús ojerovia haguéicha, káda día jalee vaʼerã la Biblia, jastudia ha jajepyʼamongeta vaʼerã umi mbaʼe ñaaprendévare. Ha oimérõ oĩ umi mbaʼe nañantendeporãiva, tekotevẽ ñainvestiga ha ani japyta ñantende porãʼỹre. Por ehémplo, ¿reimépa segúro jaikoha umi ára pahápe? Oiméramo reduda hína, iporãta restudiárõ umi profesía oñeʼẽva umi ára paháre. ¿Redudápa Jehová okumplitaha opa mbaʼe opromete vaʼekue? Oimérõ upéicha, ikatu rehesaʼỹijo umi profesía oñekumplíma vaʼekue. ¿Reimépa konvensído umi konsého oĩva la Bíbliape ideprovechoha ñane tiémpope? Releéramo umi ermáno rembiasakue, ohechaukáva mbaʼéichapa la Biblia oipytyvõ chupekuéra okambia hag̃ua, nde fe imbarete jeýta (1 Tes. 2:13). Nde ikatu avei resegi Jesús ehémplo ha ejepyʼamongeta meme umi mbaʼe porãite Jehová opromete vaʼekuére ndéve (Heb. 12:2). Iñimportánte avei repensa Jehová opromete hague umi mbaʼe ndéve g̃uarã avei. w15 15/9 3:16, 17

¿Mbaʼéichapa ikatu jahechauka jahayhuha Ñandejárape? Por ehémplo, ñameʼẽkuaa ñane kontrivusión kongregasiónpe térã jaapoja hag̃ua pe obra mundiál. Ikatu ningo ñanemboriahu ñakontrivui hag̃ua, upéicharõ jepe jaipurukuaa pe jarekomíva jahechauka hag̃ua jahayhuha Jehovápe (2 Cor. 8:12). Péro ikatu avei ñademostra upéva de ótra fórma. Ñande ikatu avei jahechauka jahayhuha Jehovápe ñakonfiávo hese. ¿Mbaʼérepa jaʼe upéva? Jesús ningo heʼi vaʼekue ndovaleiha jajepyʼapyeterei ñane remikotevẽre. Jehová opromete omeʼẽmbataha ñandéve koʼã mbaʼe jaservíramo chupe ñande pyʼaite guive (Mat. 6:31-33). Ñande jajerovia haʼe katuete okumplitaha ipromésa. Jaikuaaháicha, jahayhúramo peteĩ persónape ñakonfia avei hese. Upévare, amáske ñakonfia Jehováre, koʼýte ñademostráta jahayhuha chupe (Sal. 143:8). Iporã ñañeporandumi: “¿Ahechaukápa aiko lájare ahayhuha Jehovápe? ¿Ajeroviápa haʼe omeʼẽtaha chéve káda día pe aikotevẽva?”. w15 15/9 5:7, 8

¿Ndépa repensa ikatutaha rejesalva ou vove pe jehasa asy guasu? Ikatu hag̃uáicha jajesalva, tekotevẽ jajerovia mbarete. Apóstol Pedro heʼi vaʼekue ‘jahechauka vaʼerãha ñande fe imbareteha’ (1 Ped. 1:7). Pe jehasa asy guasu ningo hiʼag̃uimbaitéma, ha ikatu hag̃uáicha jajesalva “ñaime [vaʼerã] umi ojeroviáva apytépe” (Heb. 10:39). Upévare ñañehaʼã vaʼerã káda día ñamombareteve jahávo ñande fe. Péichamante Jesús ñandesalváta ou vove ohundi hag̃ua ko múndo aña. Peteĩ kuimbaʼe ojerure haguéicha Jesúspe, ñande avei ikatu jajerure Jehovápe: “¡Chepytyvõna amombareteve hag̃ua che jerovia!” (Mar. 9:24). Ha ikatu avei jajerure Ñandejárape umi apóstol ojerure vaʼekue Jesúspe: “Orepytyvõna rojeroviave hag̃ua” (Luc. 17:5). w15 15/10 2:1, 2

Pablo odesidi omboyke umi oportunida oikuaveʼẽva pe múndo ha omotenonde “umi mbaʼe iñimportantevéva”. Oñemeʼẽmbaite Jehová servísiope ha oviaha opredika hag̃ua heta lugár rupi, por ehémplo Síriape, Asia Menor, Macedonia ha Judéape. Upévare heʼi: “Cheresarái umi mbaʼe tapykuépe opyta vaʼekuégui, ha añehaʼãmbaite ahupyty umi mbaʼe oĩva che renonderãme. Aha meme tenonde gotyo ahupyty hag̃ua pe prémio” (Filip. 1:10; 3:8, 13, 14). Pablo ningo soltéro vaʼekue, upéicha rupi orekove oportunida oñemeʼẽmbaite hag̃ua Jehová servísiope (1 Cor. 7:32-35). Koʼág̃arupi oĩ heta ermáno ha ermána odesidíva nomendái ikatu hag̃uáicha oservi porãve Jehovápe (Mat. 19:11, 12). Jepive ningo umi soltéro saʼive irresponsavilida umi omendávagui. Péro tahaʼe haʼeháicha, enterovéva ñañatende vaʼerã ani hag̃ua mbaʼeve ñandedistrae ñande servísiope. Iporã ñañeporandu: “¿Mbaʼéichapa aipuru hína che tiémpo? ¿Tekotevẽpa akambiaʼimi algúna kósa ajepokuaáva ajapo, ikatu hag̃uáicha chetiempove Jehovápe g̃uarã?”. w15 15/10 3:15, 16

Ko múndo ningo ivai vaive ohóvo. La Biblia heʼi voi “yvypóra ndaikatuiha ijehegui reínte oiporavo haperã” (Jer. 10:23, NM). Ha upévango siertoite hína. Koʼag̃aite peve jahechakuaa Jehová nomeʼẽi hague yvyporakuérape kapasida ni derécho oiko hag̃ua heseʼỹ. Ñandejára oheja oikove umi hénte aña, pórke upéicha ojehechauka haʼe añoite ogoverna porãha. Koʼẽrõite Jehová ohundíta entéro iñañávape. Upe rire oĩ jeýramo okuestionáva pe derécho haʼe orekóva ogoverna hag̃ua, pyaʼe voi ohundíta umívape. Jehová orekótama pruéva ohechauka hag̃ua umi persóna naiñeʼẽrendúiva pyaʼe oñehundi vaʼerãha, ha natekotevẽmoʼãvéima opermiti oiko umi mbaʼe vai. w15 15/11 3:5, 6

Jesús ningo oñeʼẽseterei vaʼekue Ñandejára Rréinore umi héntepe. Upéicha rupi oĩrõ guare ko yvy ape ári, oñeʼẽ pe Rréinore mas de 100 vése. Añetehápe, chupe g̃uarã ndaipóri vaʼekue ótro téma iñimportantevéva (Mat. 12:34). Jesús orresusita riremi, ojeaparese kuri mas de 500 persónape (1 Cor. 15:6). Amalisia koʼã persónape la Jesús omanda vaʼekue opredika hag̃ua “umi hénte opa tetãyguápe”. Péro ko tembiapo ijetuʼúta kuri, pórke Jesús heʼi chupekuéra opredika vaʼerãha “og̃uahẽ meve huʼãme ko múndo ára paha”. Ñande japredika jave, ñaipytyvõ hína oñekumpli hag̃ua ko profesía (Mat. 28:19, 20). Haʼe omeʼẽ isiervokuérape “opa mbaʼe porã” ikatu hag̃uáicha ojekuaa opárupi pe marandu porã. w15 15/11 5:1-3

Idióma evréope Ñandejára réra oreko 4 létra. Ha upe téra oĩ heta kópia de la Biblia yma guarépe oĩva idióma evréope, por ehémplo pe Rollo del mar Muértope. Avei Ñandejára réra ojetopa unas kuánta kópiape ojejapo vaʼekue pe Septuagíntagui. Koʼã kópia ojejapo kuri áño 200 a.C guive, áño 100 d.C. peve. Heta persóna oñesorprende ohechávo Ñandejára réra oĩha hetaiterei vése umi kópia antíguape. Jahechaháicha, Ñandejára réra oñemoĩ vaʼerã la Bíbliape. Péro heta Bíbliape ndojepurúi upe téra. Por ehémplo, áño 1901-pe osẽ vaʼekue peteĩ Biblia hérava American Standard Version. Pype oĩ vaʼekue Ñandejára réra. Péro 1952-pe ojerrevisa ko Biblia, ha umi traduktór nomoĩvéima Ñandejára réra, pórke opensa hikuái ndovaleiha ojepuru. Heta Biblia oĩva ingléspe ha ótro idiómape, ndoipurúi avei Ñandejára réra. w15 15/12 2:3-5