Febrero

¿Mbaʼéichapa pe aguánte ‘ñanembokatupyry’? Pe téxto ojesitáva koestedía omyesakã ñandéve: “Ikatu hag̃uáicha perekopaite peikotevẽva, peneresãi opa mbaʼépe ha pejapo porã opaite mbaʼe” (Sant. 1:4). Jahasa jave peteĩ provléma ijetuʼúvare ikatu ñañemeʼẽ enkuénta tekotevẽha ñanepasiensiave, ñandeagradesído ha japorohayhuve. Ha ñaaguantáramo pe pruéva, jahechauka porãve koʼã kualida, ha ñamehorave kómo kristiáno. Upévare ani jadesovedese Jehovápe nañaaguantaséi haguére peteĩ provléma ijetuʼúva. Ñapensamína mokõi ehémplore. Primero: Ñamoĩ chupe ñañehaʼãha hína jaipeʼa ñane akãgui peteĩ pensamiénto vai. Péicha jave ani jasegi ñapensa upévare, ha jajerure Jehovápe tañanepytyvõ jaipeʼa hag̃ua ñane akãgui upe mbaʼe naiporãiva. Segundo: Ñamoĩ chupe peteĩ ñane hénte ndoipotaiha jaservi Jehovápe. Péicha jave ani ñañentrega, síno jasegi jaservi Jehovápe. Ani ñanderesarái tekotevẽha ñaaguanta ikatu hag̃uáicha Jehová ñandeguerohory (Rom. 5:3-5; Sant. 1:12). w16.04 2:15, 16

Heta persóna oñemombaʼeguasu openságui irrása, ikultúra, isiuda térã ipaís iñimportanteveha ótrogui. Péro Jehová nopensái peteĩ persóna térã grúpo de persóna iñimportanteveha. Chupe g̃uarã entéronte peteĩchapa. Haʼe voi ñandeapo vaʼekue diferentepa ojuehegui, péro upéva ndeʼiséi ndaikatuiha javyʼa oñondivepa. Ñandejára ndojeruréi ñamboyke hag̃ua ñande kultúra, péro ndoipotái avei ñañemoimportánte ha jaapoʼi ñande rapichakuérape (Rom. 10:12). Jaikórõ ñañembotuicha ñane nasionalidáre, ijetuʼúta ñandéve ñañemantene hag̃ua neutrál. Upéva oiko vaʼekue síglo primérope. Upérõ oĩ vaʼekue unos kuánto kristiáno evréo omboykéva umi viúda griégape (Hech. 6:1). ¿Mbaʼéichapa ikatu jaikuaa oimépa ñañepyrũ hína ñañemombaʼeguasu? Ñamoĩ chupe peteĩ ermáno térã ermána ótro paisgua omeʼẽha ñandéve peteĩ suherénsia. ¿Jarrechasátapa ensegída la heʼíva, ha jaʼéta: “Che paíspe ningo ojejapo porãve upéva”? Ñapensárõ upéicha, tekotevẽ ñanemanduʼa pe téxto koestediaguáre. w16.04 4:12, 13

Jesús ningo opredika vaʼekue “umi marandu porã oñeʼẽva Ñandejára Rréinore”, ha oipota avei idisipulokuéra ojapo upéva. ¿Mávapa umi oñeʼẽva Ñandejára Rréinore “opa tetãyguápe”? (Mat. 28:19). Umi testígo de Jehová añoite. Peteĩ paʼi oservímava diferénte paíspe, heʼi peteĩ ermánope káda paíspe oporandu hague umi Testígope mbaʼe mensáhepa la opredikáva hikuái. Pe paʼi omombeʼu: “Enterovetéva ningo ivyroiterei pórke peteĩchapa orresponde hikuái: ‘Pe marandu porã oñeʼẽva Ñandejára Rréinore’”. Péro añetehápe umi Testígo ndaivyroiete hína. Haʼekuéra ningo kristiáno verdadéro ha oiko peteĩ ñeʼẽme (1 Cor. 1:10). Ko rrevísta hérava Ñemañaha Oanunsia Jehová Goviérno, oñeʼẽ avei Ñandejára Rréinore. Káda número oñeimprimi haimete 59 millón ha oñeguenohẽ 254 idiómape. Ndaipóri ótra rrevísta peichaite peve ojekuaáva opárupi ko yvy ape ári. w16.05 2:6

Ñamoĩ chupe jajagarraseha ñande prekursorádo, ha upearã jajapóma heta kámbio ikatu hag̃uáicha hembyve ñandéve tiémpo. Péro nañaiméi segúro javyʼátapa nañandekosahetáiramo ha saʼírõ ñande pláta. Jaikuaaháicha, la Biblia ndeʼíri jajapo vaʼerãha katuete ñande prekursorádo. Ñande ikatúnte avei jaservi porã Jehovápe kómo puvlikadór. Péro Jesús opromete vaʼekue Jehová ovendesitaha entéro umi ojesakrifikávape pe Rréino rehehápe (Luc. 18:29, 30). La Biblia heʼi avei Jehová ovyʼaha jajapóramo opa ikatúva jaservi porã hag̃ua chupe, ha oipotaha javyʼa iservísiope (Sal. 119:108). Ñañemboʼéramo Jehovápe ha jajepyʼamongeta koʼã mbaʼe la Biblia heʼívare, jadesidíta peteĩ mbaʼe ou porãva ñandéve, ha Jehová ñanevendesíta. w16.05 3:13

Heta provléma oñemensionáva umi puvlikasión osẽvape mitãrusukuérape g̃uarã, ndahaʼéi haʼekuérante la ohasáva. Por ehémplo, entéronte jajejokokuaa vaʼerã, ñadefende umi mbaʼe jagueroviáva, ha jagueropuʼaka vaʼerã oĩ jave ñandejopýva jajapo hag̃ua ivaíva. Avei ñamboyke vaʼerã umi júnta vai ha umi vyʼarã ikatúva ñandeperhudika. Umi puvlikasión mitãrusukuérape g̃uarã oñeʼẽ koʼã témare ha hetave mbaʼére. Oiméramo nde nanemitãvéima, lomímonte ikatu reñevenefisia koʼã informasióngui. ¿Mbaʼérepa? Pórke umi konsého oĩva pype oñeguenohẽ la Bíbliagui ha entérope ikatu ideprovécho. Umi puvlikasión ojejapóva mitãrusukuérape g̃uarã oipytyvõ chupekuéra ombohovái hag̃ua iprovléma ha avei oñemoag̃uive hag̃ua Jehováre. Ha umi ijedavéva ikatúnte avei oñevenefisia (Ecl. 12:13). w16.05 5:15, 16

“Jehová ningo peteĩnte”, ha upéva ñanemokyreʼỹeterei. Avei upéva omombarete kuri umi isrraelítape ikatu hag̃uáicha oaguanta heta mbaʼe ijetuʼúva oikérõ guare pe Tiérra Prometídape. Ñandéve avei ñanemombaretéta jajesalva hag̃ua ou vove pe gran trivulasión, ha jaiko hag̃ua pyʼaguapýpe ha unído pe Paraísope. Upéicharõ, jasegíkena ñamombaʼeguasu Jehovápe añoite. Avei jahayhu ha jaservi chupe ñane korasõ mbytete guive, ha opa ñane arandu ha mbaretekue reheve. Ñañehaʼãmbaitékena jaiko pyʼaguapýpe ha peteĩ ñeʼẽme ñane ermanokuérandi. Péicha jajapóramo, Jesús ñandeguerohorýta ha heʼíta ñandéve: “Peju peẽ che Ru ohovasa vaʼekue ha pereko penembaʼerã pe Rréino ojeprepara vaʼekue peẽme g̃uarã, ko múndo oñepyrũ guive” (Mat. 25:34). w16.06 3:2, 20

Jaikóramo ñañemombaʼeguasu, ikatu ñamoĩ exkúsa jajapo jave peteĩ mbaʼe noĩporãiva. Ha upéva oikóramo, jajoguáta umi ñaiʼũ hatãmbávape ndaikatúiva oñemoldea. Peteĩ ermáno ñaneofendéramo, térã ñambyasyetereírõ japerde haguére peteĩ priviléhio, ¿mbaʼéichapa ñarreaksionáta? ¿Jahechaukátapa ñandeorgullosoha, térãpa ñañehaʼãmbaitéta ñañemoĩ porã jey pe ermánondi ha jasegi ñaneñeʼẽrendu Jehovápe? (Sal. 119:165; Col. 3:13). Jaikórõ jajapo peteĩ mbaʼe Jehovápe ombojeguarúva, ha ñamoʼã la jajapóva, ikatu hína nañapenavéi Jehová konséhore. Upéva oikóramo jasegíta japeka (Ecl. 8:11). Peteĩ ermáno ojepokuaáva kuri ohecha pornografía heʼi: “Añemeʼẽʼỹre enkuénta añepyrũ akritika umi ansiánope”. Umi mbaʼe vai ojapóva ko ermáno, operhudikáma iñamista Jehovándi. Péro ojepillárõ guare, umi ansiáno pyaʼe voi oipytyvõ chupe, ha haʼe oasepta pe ajúda. Añetehápe entéronte ñaneimperfékto ha jajavy. Ikatu sapyʼánte ñañepyrũ jataky ñande rapichakuérare, térã ñamoĩ exkúsa ñanerembiapo vai jave. Oikóramo ñanderehe upéva, iporãve jajerure Jehovápe tañanepytyvõ ha tañaneperdona, ñamboyke rangue ikonsého. w16.06 2:5, 6

Jesús oikuaa vaʼekue idisipulokuéra ojepyʼapytaha hemikotevẽre, por ehémplo hoʼu ha omonde vaʼerãre. Upévare heʼi: “Anive pejepyʼapyeterei”. Jesús oipytyvõse chupekuéra ontende hag̃ua mbaʼérepa ndovaléi oñekevrantaiterei. Haʼe oikuaa idisipulokuéra ojepyʼapyetereíramo umi mbaʼe oikotevẽvare, ikatu hína hesarái umi mbaʼe iñimportantevévagui. Jesús oñeinteresa vaʼekue hesekuéra, upévare pe Sermón del Móntepe 4 vése voi heʼi chupekuéra ani hag̃ua ojepyʼapyeterei (Mat. 6:27, 28, 31, 34). Jesús oikuaa mbaʼépa oikotevẽ umi hénte. Haʼe oikuaa avei isegidorkuéra ohasataha heta mbaʼe ijetuʼúva “umi ára pahápe” (2 Tim. 3:1). Jahechaháicha, koʼág̃arupi heta persónape ijetuʼu okonsegi hag̃ua itravahorã, ha hiʼarive opa mbaʼénte hepypa. Heta lugárpe umi hénte imboriahueterei, ha ohupyty asy hoʼumi vaʼerã. Péro Jesús ontende porã vaʼekue umi persóna rekove iñimportanteveha pe tembiʼúgui ha aógui. w16.07 1:8, 9

Ñañehaʼãvéramo jepe, ndaikatumoʼãinte voi ñakumplipa opa mbaʼe Jehová ojeruréva, upévare nañamereséi haʼe imbaʼeporã ñanendive, ñamerese guei ñamano. Rréi Salomón heʼi vaʼekue: “Ndaipóri avave ko yvy apére siémpre ojapo porãva opa mbaʼe” (Ecl. 7:20, TNM). Tiémpo rire, Pablo heʼi entéronte opekaha ha upévare avave “ndohupytýi Ñandejára rekomimbipa”. Upéi heʼi avei: “Pekádo káusare ñamano” (Rom. 3:23; 6:23a). Jehová ohayhuetereígui yvyporakuérape, ombou Itaʼýra peteĩete omano hag̃ua ñanderehehápe. Upéva hína pe pruéva tuichavéva ohechaukáva imbaʼeporãha ñanendive nañamereséiramo jepe (Juan 3:16). Pablo heʼi vaʼekue Jesús rehe: “Koʼág̃a jahecha oñembotuicha ha oñemeʼẽ hague chupe tekomimbipa haʼe omano haguére. Ñandejára imbaʼeporãiterei rupi, haʼe omano opavave rehehápe” (Heb. 2:9). Upéicharõ, pe rregálo Jehová omeʼẽva ñandéve haʼe hína “jeikove opaveʼỹva ñande Ruvicha Cristo Jesús rupive” (Rom. 6:23b). w16.07 3:3, 4

Ymaite guive ningo oĩ omendáva. Péro, ¿mbaʼéichapa oñepyrũ vaʼekue pe matrimónio, ha maʼerãpa? Jaikuaáramo koʼã mbaʼe ñanepytyvõta javyʼave hag̃ua ñane matrimóniope, ha jahecha hag̃ua hekopete ko rregálo porãite Jehová omeʼẽva. Ñandejára okrea Adánpe, haʼéva pe primer kuimbaʼe, ha heʼi chupe ombohéra hag̃ua umi animálpe. Adán ohecha entéro umi animál orekoha iparéha, péro haʼe katu “ndorekói iñirũrã oipytyvõ vaʼerã chupe”. Upémarõ Ñandejára omonge Adánpe, oipeʼa chugui peteĩ ikostílla, ha ojapo chugui peteĩ kuña. Upéi Ñandejára omeʼẽ Adánpe hembirekorã (Gén. 2:20-24). Jahechaháicha, pe matrimónio haʼe peteĩ rregálo oúva Jehovágui. Heta tiémpo upe rire, Jesús heʼi jey Jehová heʼíma vaʼekue pe hardín de Edénpe: “Kuimbaʼe ohejáta itúva ha isýpe, ojoajúta hembirekóre, ha mokõivégui oikóta peteĩntema” (Mat. 19:4, 5). Jehová oipuru kuri Adán kostílla ojapo hag̃ua Évape, upévare oime vaʼerã ontende porã raʼe hikuái Jehová oipotaha siémpre oĩ oñondive. Ñandejára ndoipotái umi omendáva ojedivorsia, ni ndoipotái oreko hikuái mas de una paréha. w16.08 1:1, 2

Jesús oporomboʼérõ guare oñeʼẽmi vaʼekue heta héntepe, péro avei omboʼe peteĩteĩme. Haʼe siémpre iñamávle. Por ehémplo, peteĩ jey oñeʼẽ peteĩ kuña oho vaʼekuépe onohẽ y peteĩ pósogui, siuda de Sicar ypýpe (Juan 4:5-30). Ótra vuéltape katu oñemongeta peteĩ impuésto kovrahándi hérava Mateo Leví. Jesús oinvita ko kuimbaʼépe omoirũ hag̃ua chupe, ha Mateo oasepta. Upéi Mateo oinvita Jesús ha unas kuánta persónape okaru hag̃ua hógape. Upépe Jesús oñemongeta avei heta héntendi (Mat. 9:9; Luc. 5:27-39). Peteĩ kuimbaʼe hérava Natanael oñeʼẽ vai vaʼekue umi Nazaretgua rehe, haʼéva Jesús válle. Péro Jesús lomímonte iñamávle hendive. Upéicha rupi Natanael okambia opensáva Jesúsre ha oikuaaseve chugui (Juan 1:46-51). Ñande avei ñanderorýramo ñande rapichakuérandi, ñanerendusevéta hikuái japredika jave. Ñamboʼékena umi ipyahúvape Jehová organisasiónpe, iñamávle ha oporotratakuaa hag̃ua. Péicha opredikáta hikuái kyreʼỹme. w16.08 4:7-9

Koʼág̃arupi heta omendáva odesidi ojesepara térã ojedivorsia ndaikatúigui osolusiona hikuái iprovléma. Péro Jesús ohechauka pe separasión ndahaʼeiha vyrorei. Upévare orrepeti Ñandejára heʼíma vaʼekue voi pe matrimóniore. Upéi heʼi avei: “Avave ndoipeʼái vaʼerã ojuehegui Ñandejára omoĩ vaʼekue oñondive peteĩ júgo guýpe” (Mat. 19:3-6; Gén. 2:24). Jahechaháicha, Jehová oipota umi omendáva siémpre opyta oñondive (1 Cor. 7:39). Entéronte ñanemanduʼa vaʼerã jajechataha Jehovándi umi mbaʼe jajapóvare. Upéva ñanepytyvõta ñasolusiona pyaʼe hag̃ua umi provléma, ivaive mboyve pe situasión. w16.08 2:10, 11

Ñande ningo siémpre ñai vaʼerã alérta. ¿Mbaʼérepa iñimportánte upéva? Pórke ñane enemigokuéra ikatu ñandeataka ñaimoʼãʼỹve jave, téra ñanekangy jave. Upéva heʼise jasegíramo ñañemoĩ pe ivaívare, ikatuha ñandepuʼaka hese. Péro nañañatendéiramo ha jaju nañañorairõvéi, Satanás, imúndo aña ha umi ñande devilida ikatu ñanegana. Upévare, aníkena arakaʼeve ñañentrega, ñañedesanima térã jaju nañañorairõvéi (1 Ped. 5:9). Ani ñanderesarái ñande ñañorairõha ikatu hag̃uáicha Ñandejára ñandeguerohory. Siémpre jarekóramo enkuénta upéva, ikatúta ñagana. Hebreos 11:6 heʼi pe oñemoag̃uíva Jehováre, “oguerovia vaʼerã haʼe añetehápe oikoveha ha omyengovia porãha umi oñehaʼãvape ipyʼaite guive ojapo hembipota”. Jahechaháicha, jaipotáramo Jehová ñanevendesi, ñañehaʼãmbaite vaʼerã (Hech. 15:17). w16.09 2:4,5

La Biblia ningo ideprovechoiterei jadesidi hag̃ua Jehová oipotaháicha. Péro péva ndeʼiséi ñande ndaikatumoʼãiha jalehi umi ao ñandegustáva. Añetehápe káda uno ikatu jadesidi upéva, ha mboýpa jagastáta jajogua hag̃ua ñande aorã. Péro iporã ñanemanduʼa ñande ao tekotevẽha ipotĩ ha idesénte. Avei odepende hína pe okasiónre ha pe lugár jaikoháre jadesidi hag̃ua mbaʼéichapa ñañemondéta. Ndaikatúi ningo jaʼe ifasilha ñakonsegi hag̃ua ao idesénteva. Heta negosioháre oñevende umi ao oĩva a la módante. Upévare, kuñanguéra oñemotiémpo vaʼerã ikatu hag̃uáicha otopa umi polléra, vlúsa ha vestído idesénteva. Kuimbaʼekuéra oñehaʼãmbaite vaʼerã avei otopa hag̃ua umi tráhe ha pantalón idesénteva. ¿Mbaʼérepa iñimportánte upéva? Primero, pórke umi ermáno ohechakuaáta ñañehaʼãha ñañemonde hag̃ua hekópe. Ha segundo katu, ñambotuicháta Jehovápe. Tahaʼe haʼéva pe sakrifísio jajapóva Jehová rehehápe, ñanembovyʼaitereíta. w16.09 3:15, 16

Remokyreʼỹ vaʼerã ne famíliape oipuru hag̃ua iñimahinasión. Péva oipytyvõta chupe opensa, ontende, ha oguerovia hag̃ua umi mbaʼe oaprendéva la Bíbliagui. Epensamína pe téxto koestediaguáre ¿mbaʼéichapa ikatu reipuru ehechauka hag̃ua ne famíliape la Biblia ouha Ñandejáragui? Eipytyvõ chupe oipuru hag̃ua iñimahinasión. Por ehémplo, ikatu ere Job tiémpope ijetuʼúne hague umi héntepe orovia hag̃ua ñane planéta ovevyinteha pe espásiope. Haʼekuéra opensáne raʼe entéro mbaʼe oguapýmante vaʼerãha ótra kósa ári opyta hag̃ua hendápe. Upe tiémpope ndaipóri kuri teleskópio ni náve espasiál ojehecha hag̃ua ko yvy ovevyiha pe espásiope. ¿Mbaʼépa ñaaprende ko ehémplogui? Ohasáramo jepe hetaiterei tiémpo ojeskrivi hague la Biblia, umi mbaʼe heʼíva guive siérto, pórke Jehová voi oskrivika vaʼekue (Neh. 9:6). w16.09 5:9, 12

Jajeroviáramo Jehováre ha Jesúsre, nañañekontentamoʼãi jaikuaánteramo umi mbaʼe haʼekuéra ojapo vaʼekue ha ojapótava ñanderehehápe. Upéva rangue, ñande pyʼaite guive jaikóta haʼekuéra oipotaháicha, ha ñaipytyvõta ótrope oikuaa hag̃ua avei chupekuéra. Jaikoséramo opa ára g̃uarã pe múndo pyahúpe, jajerovia vaʼerã Jehováre ha ñañehaʼãmbaite vaʼerã ani hag̃ua mbaʼeve omokangy ñande fe. Pe fe ningo ikatu ñambojoja peteĩ plántare. Ikatu hag̃uáicha peteĩ plánta hogue vérde asy ha okakuaa porã, tekotevẽ jarrega meme. Ndajajapóiramo upéicha, hoguemanombáta ha ipirúta. Péicha avei, ñañehaʼãmbaite vaʼerã jasegi hag̃ua jajerovia Ñandejárare (Tito 2:2; 2 Tes. 1:3; Luc. 22:32; Heb. 3:12). w16.10 4:4, 5

Daniel ha iñamigokuérape ojeguerahárõ guare Babilóniape, umi babilonio ojopy chupekuéra oasepta hag̃ua ikostúmbre ha irrelihión. Omboʼe umi mitãrusúpe oñeʼẽ hag̃ua “caldeokuéra ñeʼẽme”, ha okambia chuguikuéra héra umi téra babilóniore (Dan. 1:3-7). Daniélpe ombohéra Beltsasar. Upe téra ojerreferi pe dios iñimportantevévare oĩva Babilóniape. Oiméne Nabucodonosor oipota Daniel opensa ko dios ipuʼaka hague Jehováre (Dan. 4:8). Daniélpe oofrese hikuái umi tembiʼu iporãvéva, péro haʼe “ojedesidi ipyʼaite guive noñekontaminamoʼãiha” umi tembiʼúre, pono odesovedese Ñandejára léi (Dan. 1:8). Daniel ostudia meme vaʼekue Ñandejára Ñeʼẽ iñidiomaitépe, hebréope. Péicha haʼe osegi omombarete ijerovia oĩramo jepe ótro tetãme (Dan. 9:2). Haʼe oĩ rire 70 áñorupi Babilóniape, entéronte oikuaáiti chupe héra hebréore: Daniel (Dan. 5:13). w16.10 2:7, 8

Áño 1919 guive Jesús ojevale pe tembiguái jeroviaha ha iñarandúvare ikatu hag̃uáicha oipytyvõ isegidorkuérape ontende hag̃ua la Biblia ha osegi hag̃ua upépe heʼíva (Mat. 24:45-47). Jajapóramo Ñandejára Ñeʼẽ heʼíva, ñaipytyvõta pe kongregasión ipotĩ hag̃ua, oiko hag̃ua pyʼaguapýpe ha peteĩ ñeʼẽme. Upévare iporã ñañeporandu: “¿Ahechaukápa cheñeʼẽrenduha Jesúspe ajapóvo pe tembiguái jeroviaha heʼíva?”. La Biblia ohechauka Ñandejára organisasión ojedirihi porãha yvágape. Por ehémplo, Ezequiel ohecha vaʼekue peteĩ visiónpe Jehová ohoha peteĩ kárrope, ha pe kárro okuʼe pyaʼetereiha haʼe ohoseha gotyo (Ezeq. 1:4-28). Koʼẽrõitéma Jesús ha umi ánhel ohundíta ko múndo aña. Upépe oñembotuicháta Jehová réra ha ojekuaa porãta haʼe añoite ogoverna vaʼerãha enterovévape. w16.11 3:9, 10

Umi Jesús disípulo ypykue ojapo haguéicha, ñande avei ñaaprende heta mbaʼe ha ñañomokyreʼỹ umi rreunión rupive (1 Cor. 14:31) Oimérõ heta tiémporema jaservi Jehovápe, lomímonte ñaikotevẽ ótro ñanemokyreʼỹ. Ñapensamína Josué ehémplore. Haʼe ningo heta áñorema oservi vaʼekue Ñandejárape, upéicharõ jepe, Jehová oipota Moisés omokyreʼỹ chupe. Upévare omanda Moiséspe: “Enombra Josuépe opyta hag̃ua nde rekoviarã, emokyreʼỹ ha emombarete avei chupe. Pórke haʼe hína pe ohasátava ko puévlo renonderã, ha haʼe ogueraháta chupekuéra ojagarra hag̃ua pe yvy nde rehechátava hína” (Deut. 3:27, 28, TNM). Josué oikotevẽ kuri oñemokyreʼỹ chupe, pórke oñorairõ vaʼerã heta enemígondi, ha noganamoʼãi kuri entéro umi gérra (Jos. 7:1-9). Koʼág̃arupi ñande avei ikatu ñamokyreʼỹ umi ansiáno ha superintendénte de sirkuítope. Haʼekuéra ombaʼapo jejopy okuida hag̃ua Jehová siervokuérape. w16.11 1:13

Umi Estudiánte de la Biblia oikuaauka ihéntepe, iñamigokuérape ha entéro umi oĩvape pe iglésiape ndoapojaveimaha pe rrelihión fálsape. Haʼekuéra oipota ojekuaa ko múndo tuichakuére Babilonia Guasu haʼeteha peteĩ kuña rekovai. Upévare éntre diciembre de 1917 ha oñepyrũre 1918, umi Estudiánte de la Biblia kyreʼỹme omosarambi opárupi 10 millones de tratádo. Upe tratádope oĩ peteĩ artíkulo hérava “Babilonia Guasu hoʼáma”. ¡Umi paʼi ningo okapumoʼã! Upéicharõ jepe umi Estudiánte de la Biblia ndoguevíri. Haʼekuéra oĩ desidído osegi opredika ha ojapo ko téxto heʼíva: “Ore oreñeʼẽrendu vaʼerã Ñandejárape ore ruvicháramo, yvyporakuérape rangue” (Hech. 5:29). ¿Mbaʼépa ohechauka ñandéve koʼã mbaʼe? Umi kristiáno noĩri hague Babilonia Guasu poguýpe pe primera gérra mundiál aja. Upérõ haʼekuéra ojei ohóvo chugui, ha oipytyvõ hína ótrope ojapo hag̃ua avei upéva. w16.11 5:2, 4

Koʼápe Pablo oñeʼẽ mokõi kláse de persónare. Heʼi oĩha “umi ojaposéva hete rembipota” ha “umi oikóva espíritu sánto poguýpe”. Ikatu oĩ opensáva Pablo oñeʼẽ hague umi kristiánore ha umi ndahaʼéivare Ñandejára siérvo. Péro ñanemanduʼa vaʼerã haʼe oskrivi hague umi kristiáno ojeporavóvape imarangatu hag̃ua (Rom. 1:7). Jahechakuaa upéicharõ, Pablo oñeʼẽ hague umi kristiánore “ojaposéva hete rembipota”, ha umi kristiáno “oikóva espíritu sánto poguýpe”. Pablo heʼi kuri: “Yma jaikórõ guare ñaneakãre, pe Léi ñanemomýi jajapo hag̃ua ñande rete rembipota vai” (Rom. 7:5). Ko versíkulope Pablo oexplika umi hénte ojapóva “hete rembipota”, ohejaha umi deséo vai odomina chupekuéra ha oiko hikuái iñakãre. w16.12 2:5, 7

Oĩ persóna ojepyʼapýva umi mbaʼe vai ojapo vaʼekuére ymave. Rréi Davídpe ojopyeterei vaʼekue umi hembiapo vai. Haʼe heʼi: “Ndavyʼavéi ha hetáma ajaheʼo” (Sal. 38:3, 4, 8, 18, TNM). Ko situasiónpe David ohechauka kuri iñaranduha, upévare ojerovia Jehová oiporiahuverekotaha chupe ha operdonataha hembiapo vaikue (Sal. 32:2, 3, 5). Ikatu avei ñandepyʼapy umi mbaʼe jahasáva koʼág̃a. David oskrivírõ guare Salmo 55, okyhyjeterei kuri ojejukárõ g̃uarã chupe (Sal. 55:2-5). Upéicharõ jepe, ndohejái umi preokupasión omomombyry chupe Jehovágui. David ojerure asy Jehovápe oipytyvõmi hag̃ua chupe. Péro oikuaa avei haʼe voi tekotevẽtaha ojapo álgo (2 Sam. 15:30-34). ¿Mbaʼépa ñaaprende chugui? Ndajahejái vaʼerãha umi preokupasión ñanedomina. Upéva rangue, jajapo vaʼerã ikatúva guive ñasolusiona hag̃ua umi provléma, ha jajerovia ñande pyʼaite guive Jehová oñangarekotaha ñanderehe. w16.12 3:14, 15

David oheja Jehová oipytyvõ chupe. Por ehémplo ndaipochýi proféta Natán okorrehírõ guare chupe. Avei oñemboʼe Jehovápe ha omombeʼupaite chupe ipekádo. Péicha ohechauka oĩ porãse jeyha hendive (Sal. 51:1-17). Oñedesanima rangue ipekádo káusare, David ohecha mbaʼépa ikatu oaprende umívagui. Haʼe núnka ndojapovéi umi mbaʼe vai ojapo vaʼekue, ha osegi ifiél omano meve. Jehová arakaʼeve ndahesaraimoʼãi umi mbaʼe porã David ojapo vaʼekuégui hesehápe (Heb. 11:32-34). ¿Mbaʼépa ikatu ñaaprende David ehémplogui? Jajúramo japeka vai, iñimportánte ñañarrepenti ñande pyʼaite guive, ñamombeʼu Jehovápe ñande pekádo ha jajerure chupe tañaneperdona (1 Juan 1:9). Avei ñañeʼẽ vaʼerã umi ansiánondi, haʼekuéra ikatu ñanepytyvõ ñañemoĩ porã jey hag̃ua Jehovándi (Sant. 5:14-16). Jaasepta jave Jehová ajúda, jahechauka hína ñaĩha segúro haʼe ñaneperdonataha. Iporãta avei ñaaprendéramo umi mbaʼe vai jajapo vaʼekuégui, ha jasegi jaservi Jehovápe ñande pyʼaite guive (Heb. 12:12, 13). w17.01 1:13, 14

¿Mbaʼépa heʼise ñañembotuicha? Heʼise jajapoha peteĩ mbaʼe ndajarekóiramo jepe derécho ni autorida jajapo hag̃ua, tahaʼe nañanepasiénsiai rupi térã ñandeorgullósogui. Entéro ningo ñaneimperfékto, upéicha rupi oime vaʼerã jajapóma raʼe peteĩ mbaʼe ohechaukáva ñañembotuicha hague. Péro rréi Saúl ehémplo ohechauka ñañepyrũramo ñañemombaʼeguasu, ñambopochytaha Jehovápe. Salmo 119:21 heʼi mbaʼépa Ñandejára ojapo peichagua persónare: “Nde rekondena umi oñemombaʼeguasúvape” (TNM). ¿Mbaʼérepa Jehová ojapo upéva? ¿Mbaʼérepa ivaiete ñañemombaʼeguasu? Primero, pórke péicha jahechauka hína ndajarrespetaiha Ñandejára ha ñane Governántepe, Jehová. Segundo, jajapóramo peteĩ mbaʼe ndajarekóiva autorida jajapo hag̃ua, ikatu ñaneprovléma ñande rapichándi (Prov. 13:10). Ha tercero, ikatu ñañemotĩ umi ótro ohechakuaávo ñañembotuichaseha (Luc. 14:8, 9). Ndareíri ningo Jehová oipota ñaneumílde. w17.01 3:4, 5

Adán ha Eva operde rupi pe perfeksión ndaikatuvéima ohechauka porã umi kualida Jehová orekóva. Adán ha ifamiliakuéra operde pe oportunida oiko hag̃ua pára siémpre. Upéicha rupi entéro umi ifamília iñimperfékto, opeka ha omano (Rom. 5:12). Adán káusare ifamiliakuéra ndaikatuvéima oiko opa ára g̃uarã. Adán ha Eva família onase imperfékto, ha ifamília vove hikuái iñimperféktota avei. Satanás omoĩ Adán ha Évape Jehová kóntrape, ha upe guive oñehaʼã ikatu hag̃uáicha entéro yvypóra ojapo avei upéva (Juan 8:44). Adán ha Eva omboykéramo jepe Jehovápe, haʼe osegi ohayhu yvyporakuérape ha oipota haʼekuéra oiko iñamígoramo. Jehová ndoipotái avave omano (2 Ped. 3:9). Upévare, pyaʼe voi ojapo oñekotevẽva guive ikatu hag̃uáicha yvyporakuéragui oiko iñamígo, ha al mísmo tiémpo nopyrũi iñeʼẽre (Juan 3:16). w17.02 1:12-14

Ñaneumildevéta jajesarekóramo umi mbaʼe porã ojapóvare ñande rapichakuéra, Jehová ojapoháicha. Péicha, jaiko rangue jajechaukase térã jaʼe tódo el tiémpo umi ótrope mbaʼépa ojapo vaʼerã, jajeruréta konsého ha jaaseptáta umi ótro opensáva. Avei javyʼáta ñane ermanokuérandi orresivi jave peteĩ asignasión. Ha jaagradeséta Jehovápe opermiti haguére jaservi chupe (1 Ped. 5:9). Ñaaprendéramo jahecha umi situasión Jehová ohechaháicha, jadesidíta chupe ogustáva. Jastudia, ñañemboʼe ha jajapóramo umi mbaʼe ñaaprendéva, ñane konsiénsia ombaʼapo porãvéta ha ñamotenondéta umi ótrope (1 Tim. 1:5). Ñañehaʼãmbaitéramo jajapo opa koʼã mbaʼe, Jehová ñanembokatupyrýta ha ñanepytyvõta ñaneumildeve hag̃ua (1 Ped. 5:10). w17.01 4:17, 18

Ñane ermanokuéra omerese avei ñamombaʼe ha jarrespeta chupekuéra, koʼýte umi omoakãva Jehová organisasión. Por ehémplo, umi ansiáno, superintendénte de sirkuíto, miémbro del Komité de Sukursál ha umi oĩva pe Kuérpo Governántepe. Haʼekuéra oñangareko Ñandejára siervokuérare, ndareíri la Biblia heʼi koʼã kuimbaʼe oñemeʼẽha ñandéve “rregáloramo” (Efes. 4:8). Upévare omerese ñamombaʼe ha jarrespeta chupekuéra, tahaʼe haʼéva inasionalida, ijestúdio, térã tove taipláta heta térã taimboriahu. Umi kristiáno ypykue omoĩ ñandéve ehémplo porã. Haʼekuéra omombaʼe vaʼekue umi kuimbaʼe omoakãvape kongregasión, ha ñande jajapo avei upéicha. Ñaime jave hendivekuéra, nañamombaʼeguasúi ni ndajatratái chupekuéra haʼeramoguáicha peteĩ ánhel. Péro ñamombaʼeterei ha jarrespeta chupekuéra iñumílde ha ombaʼapo jejopy rupi (2 Cor. 1:24; Apoc. 19:10). w17.03 1:13

Rréi Herodes Agripa I idiferénte vaʼekue Jesúsgui. Peteĩ jey, peteĩ rreunión iñimportántevape, “Herodes omonde ao porã omimbipáva”. Umi hénte ohechávo ha ohendúvo chupe, heʼi: “¡Ko oñeʼẽva ndahaʼéi yvypóra, peteĩ ñandejára voi katu!”. Herodes oipota oñemombaʼeguasu chupe, upéicha rupi “upepete Jehová ánhel okastiga chupe nombotuichái haguére Ñandejárape, upévare haʼe oñepyrũ hasopa ha omano” (Hech. 12:21-23). Jahechaháicha, Jehová ndoiporavói Heródespe omoakã hag̃ua ipuévlope. Jesús katu ohechauka porã Ñandejára voi omoĩ hague chupe kómo líder, pórke haʼe siémpre ombotuicha chupe ha orrekonose Jehová haʼeha pe Líder Tuichavéva odirihíva ipuévlope. Jehová ndoipotái vaʼekue Jesús omoakã ipuévlope unos kuánto áñonte. Oñemoingove jey rire chupe, Jesús heʼi idisipulokuérape: “Opa mbaʼe oĩva yvágape ha yvy ape ári oñemoĩ che poguýpe”. Ha heʼi avei: “¡Péina!, aiméta penendive opa ára, og̃uahẽ meve huʼãme ko múndo ára paha” (Mat. 28:18-20). w17.02 3:20, 21