Marzo

Jefté ermanokuéra ndaijaʼéi vaʼekue hese ha oenvidia chupe. Upévare omosẽ chupe hikuái pe lugár oikohágui, jepe pe yvy imbaʼe kuri pórke haʼe taʼýra ypykue (Juec. 11:1-3). Tiémpo rire, umi ansiáno Israelgua ojerure asýrõ guare chupe ajúda, haʼe naiprovlémai oipytyvõ hag̃ua chupekuéra (Juec. 11:4-11). Jeftépe g̃uarã iñimportanteve odefende Jehová réra ha ipuévlope, upévare nomboguapýi ijehe umi mbaʼe vai ojejapo vaʼekue hese. Jefté ojedesidi ojeroviataha Jehováre, upévare haʼe ovendesi chupe ha umi israelítape (Heb. 11:32, 33). ¿Mbaʼépa jajapóne peteĩ ermáno ñanedesepsionáramo, térã haʼetéramo ñandéve reiete ñandetrata vaíva? Katuete ñañeñandu vaíta, péro ani ñamboyke Jehovápe upe haguére. Jasegi Jefté ehémplo ha jaipuru umi konsého oĩva la Bíbliape. Avei jaha meme vaʼerã rreunionhápe, jahasa tiémpo ermanokuérandi ha ñaneñeʼẽrendu Jehovápe opa mbaʼépe. Koʼã mbaʼe ñanepytyvõta ñambohovái hag̃ua umi situasión ijetuʼúva, ha ñamoĩ hag̃ua ehémplo porã ótrope, Jefté ojapo haguéicha (Rom. 12:20, 21; Col. 3:13). w16.04 1:7, 9, 10

Ñande ningo tekotevẽterei ñaaguanta ipahaite peve, ndahaʼéi peteĩ tiémporente. Ñapensamína ñaimeha rríope peteĩ várkope, ha peichaháguinte pe várko oñepyrũha oñapymi. Jajesalvaséramo, tekotevẽ jayta pe orílla peve. Péicha avei, ñaimeséramo pe paraísope tekotevẽ ñaaguanta ipahaite peve. Jasegíkena apóstol Pablo ehémplo. Péicha ikatúta jaʼe: “Ñande nañanekaneʼõi” (2 Cor. 4:16). Apóstol Pablo oĩ vaʼekue segúro Jehová oipytyvõtaha chupe oaguanta hag̃ua ipahaite peve. Ñande avei ñapensa vaʼerã upéicha. Pablo heʼi: “Che añetehápe aguerovia ni ñemano, ni jeikove, ni ánhel, ni goviérno, ni umi mbaʼe koʼág̃a oĩva koʼápe, ni umi mbaʼe oútava, ni umi podér, ni umi mbaʼe oĩva yvate ni ipypukuhápe, ni mbaʼeveichagua kreasión, ndaikatumoʼãiha ñandepeʼa Ñandejára mborayhúgui, ojehechaukáva ñande Ruvicha Cristo Jesús rupive” (Rom. 8:37-39). w16.04 2:17, 18

Jajerure Jehovápe tañanemoarandu ñarrekonose hag̃ua oĩ jave peteĩ situasión ikatuhápe ijetuʼu ñandéve ñañemantene neutrál. Jajerure chupe tañanepytyvõ ñambohovái porã hag̃ua koʼã situasión. Sapyʼánte ikatu jajegueraha préso térã jajepersegi ñaneñeʼẽrendúgui Jehovápe. Oiméramo upéicha, ñañemboʼe vaʼerã Jehovápe tañanembopyʼaguasu ñamombeʼu hag̃ua ótrope mbaʼérepa nañañentremetéi polítikape. Jehová katuete ñanepytyvõta ñaaguanta hag̃ua oimeraẽ situasión ijetuʼúva (Hech. 4:27-31). Haʼe omeʼẽ ñandéve Iñeʼẽ ñanemombarete hag̃ua. Jajepyʼamongetárõ umi téxtore, jasegíta ñañemantene neutrál. Ñañehaʼã vaʼerã jalee ha ñamemorisa umi téxto, peichahágui ndaikatuvéiramo jareko peteĩ Biblia. La Biblia ñanepytyvõ ñaime hag̃ua segúro Jehová katuete okumplitaha ipromesakuéra. Ha upe esperánsa ñanemombaretéta ñaaguanta hag̃ua jajepersegi jave (Rom. 8:25). Ikatu jaiporavo umi versíkulo omombeʼúva umi mbaʼe jadisfrutaséva pe múndo pyahúpe. Koʼág̃ama voi ikatu ñañeimahina oñekumpliha umíva ha ñaimeha upépe. w16.04 4:14, 15

Umi líder rrelihióso heʼíva ijehe kristianoha noñeʼẽi umi héntepe Ñandejára Rréinore. Ha oimérõ oñeʼẽ pe Rréinore, heʼínte haʼeha peteĩ mbaʼe jarekóva ñane korasõme (Luc. 17:21). Haʼekuéra nomboʼéi umi héntepe pe Rréino haʼeha peteĩ goviérno yvagapegua oĩva Jesucristo pópe. Ni ndeʼíri ko goviérno osolusionataha entéro umi provléma oĩva ko múndope ha oipeʼataha opa mbaʼe vai (Apoc. 19:11-21). Upéva rangue, oñeʼẽ hikuái Jesús rehe Navidad ha Semána Sánta javénte. Jahechaháicha, haʼete voi umi líder rrelihióso ndoikuaáiva mbaʼépa Jesús ojapóta ogoverna vove. Ha haʼekuéra nontendéi rupi mbaʼe mensáhepa Jesús opredika vaʼekue, nontendéi avei maʼerãpa opredika vaʼerã. Umi kristiáno verdadéro ndopredikái ombyaty hag̃ua pláta ni omopuʼã hag̃ua umi tupao de lúho ha tuichaicháva. Ñandejára Ñeʼẽ ndojepurúi vaʼerã ojejapo hag̃ua negósio (2 Cor. 2:17). Umi opredikáva nohaʼarõi vaʼerã ojepaga chupekuéra opredika haguére (Hech. 20:33-35). w16.05 2:7, 8

Ñapensamína ótro ehémplore. Ñamoĩ chupe ndegustaha ha reipuruseha umi ao reikuaáva omolestataha algún ermánope. Péro la Biblia ndeʼíri mbaʼeve umi ao ndegustávare. Upéicharõ, ¿mbaʼéichapa reikuaáta mbaʼépa Jehová opensa upe témare? La Biblia heʼi: “Upéicha avei aipota umi kuña oñemoporã jave, toñemonde hekópe ha taiñakãguapy, ani otrensa iñakãrague ni oiporu óro, pérla ni ao hepyetereíva. Upéva rangue oiko vaʼerã hikuái umi kuña omombaʼeguasúva Ñandejárape oikoháicha” (1 Tim. 2:9, 10). Ko konsého oñemeʼẽ enterovévape g̃uarã. Upéva heʼise kuimbaʼekuéra ojapo vaʼerãha avei koʼápe heʼíva. Ñañemondéramo hekópe porã, jahechaukáta ñaneinteresaha umi ótro opensáva. Ñande ningo ndajaipotái ñane ermanokuéra oñeñandu vai térã oñeofende, pórke jahayhu chupekuéra (1 Cor. 10:23; Filip. 3:17). w16.05 3:14

Adán opuʼã rire Ijapohare rehe, ndahaʼevéima Ñandejára raʼy. Péro heta idesendiénte odesidi oñemoĩ Jehová poguýpe (Heb. 12:1). Koʼãva iñumílde ha iñeʼẽrendu Ijapoharépe. Péicha oñemoĩ hikuái Satanás kóntrape ha ohechauka oipotaha Jehovápe Ituarã ha Ijalfarerorã (Juan 8:44). Koʼã persóna iñeʼẽrendúva ñanemomanduʼa pe jaleévare pe téxto koestediaguápe. Ñande jaservíva Jehovápe ñañehaʼãmbaite avei jasegi umi isrraelíta ehémplo. Upévare ñaneumílde ha ñaneñeʼẽrendu ñande Apoharépe. ¡Ajépa tuichaite mbaʼe Jehová haʼe haguére ñande Túa! Ñande ningo jaipota voi haʼe ñanemoldea, upévare iporã ñañeporandu: “¿Ajoguápa peteĩ ñaiʼũ huʼũ porãvape Ñandejára ikatúva oipuru ojapo hag̃ua peteĩ mbaʼyru iporãitereíva? ¿Ha mbaʼépa apensa che ermanokuérare? ¿Ahechakuaápa Jehová osegiha omoldea chupekuéra?”. w16.06 1:2, 3

Koʼág̃a pe múndo pyahu hiʼag̃uimbaitéma, ha jahasa hína heta mbaʼe ijetuʼúva tekotevẽhápe jahechauka jajeroviaha Jehováre ñande pyʼaite guive. Por ehémplo, ¿mbaʼépa ñapensa pe promésa oĩvare Mateo 6:33-pe? Enterovéva iporã jajepyʼamongeta ha ñañeporandu koʼã mbaʼe: “¿Ahechaukápa umi mbaʼe ajaposéva ha adesidívare ajeroviaha Jesús heʼi vaʼekuére? ¿Amboykénepa rreunión térã predikasión aganave hag̃ua pláta? ¿Mbaʼépa ajapóta che travahohápe ojejeruréramo chéve ambaʼapove hag̃ua, térã oĩrõ chejopyetereíva ajapo hag̃ua ivaíva? ¿Ahejátapa ko múndo chemoldea ha cheguenohẽ Jehová rapégui?”. Ñamoĩ chupe peteĩ ermáno ndosegiseiha umi konsého bíblico oñeʼẽva umi júnta vaíre, umi vyʼarãre, térã umi oñemosẽvare kongregasióngui. Ñañeporandumína: “¿Ndoikói mbaʼépa hína koʼã mbaʼe cherehe?”. Ñañemeʼẽrõ enkuénta ñañepyrũha ñanedesovediénte, pyaʼe jajepyʼamongeta vaʼerã jaikuaa hag̃ua mbaʼéichapa oĩ ñande fe. Añetehápe, pyʼỹinte jahecha vaʼerã mbaʼéichapa ñaĩ Jehová renondépe, ha upearã jaipuru vaʼerã la Biblia. w16.06 2:8, 9

Ñane tiémpope, ko yvy tuichakuére oĩ peteĩ organisasión ohayhúva ha oservíva Ñandejárape. Ko organisasiónpe oñehenói testígo de Jehová. Añetehápe ningo haʼekuéra ndahaʼéi perfékto, síno ojavy mimi jepi avei. Upéicharõ jepe, Jehová ogia ipuévlope ijespíritu sánto rupive. Áño 1914-pe, saʼi gueteri oĩ umi oservíva Jehovápe. Péro haʼe ovendesi pe predikasión, upéicha rupi hetaiterei persóna oaprende la Biblia omboʼéva ha oiko avei chuguikuéra testígo de Jehová. Ñandejára oprofetisáma vaʼekue voi upéva, heʼívo la jaleéva pe téxto koestediaguápe, heʼihápe avei: “Che, Jehová, ambotuicháta chupe itiempoitépe”. Añetehápe ningo jahechakuaa porãiterei ko profesía oñekumpliha ñane tiémpope. Jehová puévlo haʼete peteĩ tetã tuicháva. Koʼág̃a oĩma mas de 8 millón Testígo ko yvy tuichakuére. Ha jaikuaaháicha, heta país ndorekói pe kantida de persóna hetãme. w16.06 4:1, 2

Jesús oĩ vaʼekue segúro Itúa oñangarekotaha yvyporakuérare, pórke umi guyraʼíre jepe oñangareko porã (1 Ped. 5:6, 7). Ñande jaikuaa Jehová nomoĩmoʼãiha ñande jurúpe la jaʼu vaʼerã. Upévare ñambaʼapo térã ñañemitỹ vaʼerã ñakonsegi hag̃ua ñane remikotevẽ, ha ndovaléi ñaneateʼỹ. Jehová katuete ñanevendesíta ñañehaʼã haguére. Péro sapyʼánte ivaíramo ñane situasión, haʼe ikatu omomýi ótrope okomparti hag̃ua ñanendive orekomíva. Jesús ndeʼíri kuri Jehová omeʼẽha umi guyraʼípe peteĩ lugár oiko hag̃ua. Péro jaikuaaháicha, ombokatupyry ha omeʼẽ chupekuéra oikotevẽva ikatu hag̃uáicha ojaitypo. Péicha avei Jehová ikatu ñanepytyvõ jajuhu hag̃ua peteĩ lugár idesentemíva jaiko hag̃ua ñane famíliandi. Jesús oñeʼẽvo umi guyráre, imanduʼáne raʼe haʼe omeʼẽtaha hekove yvyporakuéra rehehápe (embojoja Lucas 12:6, 7 heʼívare). Añetehápe ningo haʼe nomanói vaʼekue umi guyraʼi térã ótro animál rehehápe, síno omano ñanderehehápe, ikatu hag̃uáicha jaikove opa ára g̃uarã (Mat. 20:28). w16.07 1:11-13

¿Mbaʼérepa japeka ha ñamano? La Biblia heʼi: “Peteĩ kuimbaʼe káusare ningo pe ñemano ogoverna”. Enterovéva ningo jaju Adángui, upévare ñaneimperfékto ha ñamano (Rom. 5:12, 14, 17). Péro ikatu jadesidi jahejátapa pe pekádo ñanedomina térãpa nahániri. Jahechauka vaʼerã jajeroviaha Cristo sakrifísiore. Péicha jaheja ñanedomina Ñandejára mbaʼeporã ijojahaʼỹva (Rom. 5:20, 21). Ñande ningo pekadór gueteri, péro ndahaʼéi upe haguérente jahejátamava pe pekádo ñanedomina. Upéva rangue, jajavy jave jajerure Jehovápe ñaneperdona hag̃ua. ¿Mbaʼépa jahupyty Ñandejára imbaʼeporãiterei haguére ñanendive? Pablo heʼi: “Ñandejára ohechauka imbaʼeporãitereiha. [...] Upéva ñanerekomboʼe ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:11, 12). w16.07 3:5, 6

Adán ha Eva naiñeʼẽrendúi kuri Ñandejárape, upévare imatrimónio nosẽporãi. Pe “mbói ypykue” heʼi Évape hoʼúramo pe yvyramáta oikuaaukávagui “mbaʼépa iporã ha mbaʼépa ivai”, iñarandutaha Ñandejáraicha. Pe “mbói” ombotavýva Évape añetehápe haʼe vaʼekue Satanás. Haʼe heʼi kuri chupe hoʼúramo pe frúta, ikatutaha odesidi “mbaʼépa oĩ porã ha mbaʼépa oĩ vai”. Eva hoʼúntema pe frúta heʼiʼỹre mbaʼeve iménape. Péicha ohechauka ndorrespetaiha pe omoakãvape chupe. Upéi omeʼẽ avei Adánpe, ha haʼe hoʼúnte avei pe frúta. Péicha ohechauka naiñeʼẽrenduiha Ñandejárape (Apoc. 12:9; Gén. 2:9, 16, 17; 3:1-6, TNM). Jehová oporandurõ guare Adánpe mbaʼérepa naiñeʼẽrendúi chupe, Adán okulpa hembirekópe. Ha Eva katu okulpa pe mbóipe ombotavy haguére chupe (Gén. 3:12, 13, TNM). Jahechaháicha, exkúsamante omoĩ hikuái. Adán ha Eva naiñeʼẽrendúi ha irrevélde, upévare Jehová okondena chupekuéra. Umi omendáva oipotáramo osẽ porã imatrimónio, iñeʼẽrendu vaʼerã Jehovápe ha oĩ vaʼerã rresponsávle umi mbaʼe ojapóvare. w16.08 1:1, 4, 5

¿Mbaʼérepa heta omendáva ou tuicha iprovléma? Ikatu oime imatrimónio nosẽi haʼekuéra ohaʼarõ haguéicha, ha upévare oñedesepsiona térã ipochy voi. Oĩ iprovlémava idiferénte rupi ikriánsa, térã mokõivéva orreaksionágui de diferénte fórma ohasa jave peteĩ situasión ijetuʼúva. Ótro katu iprovléma ihentekuéra káusare, noĩri de akuérdo oipuru lájare ipláta, térã ohekomboʼe lája ifamíliape. Upéicharõ jepe, la majoría umi matrimónio kristiáno ikatu osolusiona iprovléma, pórke osegi umi konsého oĩva la Bíbliape. Oĩ jave provléma igráveva, umi omendáva ojerure vaʼerã ajúda ansianokuérape. Haʼekuéra ningo iñexperiénsia heta, ha ikatu oipytyvõ umi matrimóniope osegi hag̃ua umi konsého oĩva la Bíbliape. Entéro omendáva ojeruréramo Jehovápe espíritu sánto, ikatúta ojapo la Biblia heʼíva, ha oiko oñemandaháicha kristianokuérape (Gál. 5:22, 23). w16.08 2:11-13

Jesús oreko vaʼekue heta mbaʼe ojapo vaʼerã. Péro umi hénte ohenduse jave chupe, haʼe oñemotiémpo ha omboʼe chupekuéra heta mbaʼe. Peteĩ jey hetaiterei hénte oho hendápe pe y kóstape. Upémarõ Jesús ojupi peteĩ kanóape ha upe guive omboʼe chupekuéra. Upéi omboʼese avei Pédrope peteĩ mbaʼe iñimportánteva. Upévare, peteĩ milágro rupive oipytyvõ chupe onohẽ hag̃ua hetaiterei pira. Upéi Jesús heʼi chupe pe jaleéva pe téxto koestediaguápe. La Biblia omombeʼu Pedro ha umi oĩva hendive oheja hague opa mbaʼe ha omoirũ Jesúspe (Luc. 5:1-11). Peteĩ kuimbaʼe hérava Nicodemo oaprendeseve vaʼekue Jesúsgui. Péro haʼe oĩ pe trivunál hudío iñimportantevévape. Upévare, oho Jesús rendápe pyhare rei pono ojehecha chupe. Jesús orresivi porãnte Nicodémope, ha oñemotiémpo omyesakã hag̃ua chupe heta mbaʼe (Juan 3:1, 2). Jesús siémpre omboyke tiémpo ikatu hag̃uáicha omombarete umi hénte jerovia. Ñande avei ñaime vaʼerã dispuésto jaha jeývo javisita umi persónape, ha ñaipytyvõ chupekuéra ontende hag̃ua la Biblia. w16.08 4:10, 11

Tekotevẽ ningo ñanedesénte ha ñarrekonose Jehová ipotĩ ha isantoha. Avei iñimportánte jahechakuaa opa mbaʼe haʼe omandáva katuete ñanepytyvõitereiha. Ñanedesénte ha ñaneumildeséramo, jajapóta Ñandejára omandáva ñandéve, ha jarekóta enkuénta ñande rapichakuéra opensáva ha oñandúva. Ñande aóre ojekuaa porã vaʼerã jaserviha Jehovápe. Haʼe omandáva ñandéve iporãiterei, upévare nañaneprovlémai jajapo hag̃ua umíva. Entéro ermáno ha ermána omerese ojefelisita chupekuéra oñemonde haguére hekoitépe ha ojeporta porã haguére. Koʼã mbaʼe ningo oipytyvõ ikatu hag̃uáicha umi hénte ipyʼaporãva oñeinteresa pe mensáhe oĩvare la Bíbliape. Avei ombotuicha Jehovápe ha ombovyʼa chupe. w16.09 3:18-20

Jacob oĩ vaʼekue desidído oñorairõtaha ohupyty peve Ñandejára vendisión (Gén. 32:24-26). Ha Jehová ovendesi chupe noñentregái rupi. Upévare ombohéra chupe Israel, heʼiséva “Oñorairõva Ñandejárandi”. Jehová oguerohory Jacóbpe ha ovendesi chupe. Ñande ñañehaʼã vaʼerã avei ñakonsegi upéva. Raquel haʼe vaʼekue Jacob rembireko, ha Jacob ohayhueterei chupe. Raquel ohechase avei mbaʼéichapa Jehová okumplíta pe promésa ojapo vaʼekue iménape. Péro, Raquel ndaikatúi imemby, ha upéva omoñeñandu vaieterei vaʼekue kuñanguéra upe tiempopeguápe. ¿Mbaʼépa ojapo Raquel ojechámarõ upe situasiónpe? Arakaʼeve ndoperdéi la esperánsa. Oñemboʼe meme Jehovápe ikatu hag̃uáicha ogueropuʼaka upe situasión. Jehová ohendu iñemboʼe, ha kon el tiémpo ovendesi chupe ikatu hag̃uáicha imemby (Gén. 30:8, 20-24). w16.09 2:6, 7

Iporã emboʼe ne famíliape ohechakuaa hag̃ua ovyʼavetaha ojapóramo la Biblia heʼíva (Sal. 1:1-3). Por ehémplo, ikatu ere chupe oñeimahina hag̃ua oikotaha peteĩ íslape, ha oiporavo vaʼerãha umi oikótavape hendive. Upéi eporandukuaa: “¿Mbaʼeichagua persónapa reiporavóta ikatu hag̃uáicha entéro pejogueraha porã ha peiko pyʼaguapýpe?”. Upéi eleekuaa Gálatas 5:19-23, emboʼe hag̃ua ne famíliape mokõi mbaʼe iñimportánteva. Primero, Jehová ñanemboʼeha mbaʼépa jajapo vaʼerã javyʼa ha jajogueraha porã hag̃ua ñande rapichakuérandi koʼág̃ama voi. Ha segundo, haʼe ohechaukaha ñandéve mbaʼéichapa jaikóta pe múndo pyahúpe (Is. 54:13; Juan 17:3). Avei ikatu ere chupe mbaʼéichapa la Biblia oipytyvõ umi ermánope. Upearã pehekakuaa ñane puvlikasionkuérape umi ermáno rembiasakue. Por ehémplo, pe seksión hérava “La Biblia okambia chupekuéra”, osẽva jepi Ñemañaháme. w16.09 5:13, 14

Ñanerembiapoitereíramo jepe, ñañemotiémpo vaʼerã jajapo hag̃ua ñande estúdio personál ha ñande estúdio de família (Efes. 5:15, 16). Aníkena ñañekontenta jalee haguérente heta informasión, térã jajeprepara rupi ñakomenta hag̃ua rreunionhápe. Jastudia vaʼerã jajeroviave hag̃ua Jehováre, ha jaheja vaʼerã la Biblia opoko ñane korasõre. ¿Mbaʼépa jajapo vaʼerã ñakonsegi hag̃ua upéva? Jastudia jave, ndahaʼéi ñapensánte vaʼerã umi ótro oikotevẽtavare, síno avei umi mbaʼe ñande ñaikotevẽvare (Filip. 1:9, 10). Heta vése, ñainvestiga jave rreunionrã, predikasionrã, térã jajapo hag̃ua peteĩ diskúrso, nañapensái jepi mbaʼéichapa umi informasión ikatu ñanepytyvõ ñandéve voi. Ñamoĩmína peteĩ ehémplo: Peteĩ kosinéro otantea raẽ hembiʼu oservi mboyve. Péro otantea haguérente ndeʼiséi hína oñealimentamaha. Haʼe hoʼu vaʼerã avei umi tembiʼu iñaliméntova hesãi hag̃ua. Péicha avei, siémpre jastudia vaʼerã la Biblia ikatu hag̃uáicha ñane amista Jehovándi imbarete. Ha jastudia jave, jaraha vaʼerã enkuénta umi mbaʼe ñande ñaikotevẽva. w16.10 2:10, 11

La Biblia omyesakã mbaʼépa heʼise pe fe (Heb. 11:1). Primero, heʼise “jagueroviaha pyʼamokõiʼỹre oikotaha katuete umi mbaʼe ñahaʼarõva”. Ñande ningo ñahaʼarõ oñekumpli umi mbaʼe Ñandejára opromete vaʼekue. Avei ñaime segúro opataha entéro mbaʼe vai ha jaikotaha peteĩ paraísope. Segundo, pe fe heʼise “jaikuaa porãha añeteha umi mbaʼe jagueroviáva, ndajahecháiramo jepe umíva”. Por ehémplo, ñande ndajahechái Jehovápe, Jesucrístope, umi ánhelpe, ni pe Rréino oĩva yvágape, péro jaikuaa porã oexistiha. Upéicharõ, ¿mbaʼéichapa ikatu jahechauka jajeroviaha Ñandejára promesakuérare ha umi mbaʼe ndajahecháivare? Ikatu jahechauka upéva jaiko lájare, umi mbaʼe jaʼévare ha avei umi mbaʼe jajapóvare. w16.10 4:6

Jehová ha Jesús ningo ovaloraiterei opa mbaʼe jajapóva hesehapekuéra, sapyʼánte ndaikatúiramo jepe jajapo heta mbaʼe (Luc. 21:1-4; 2 Cor. 8:12). Ñande ningo jaikuaa ñane ermanokuéra ijedáva oñehaʼãmbaiteha oho hag̃ua rreunionhápe ha osẽ hag̃ua opredika. ¿Ñamokyreʼỹpa hína chupekuéra ha jahechauka ñamombaʼeha umi esfuérso ojapóva? Jaaprovecha vaʼerã umi oportunida oñepresentáva ñaporomokyreʼỹ hag̃ua. Jahecha jave peteĩ persóna ojapo porãha peteĩ mbaʼe, ani jaduda jaguerohory hag̃ua chupe. Apóstol Pablo ha Bernabé ohórõ guare Antioquía de Pisídiape, umi omoakãva pe sinagóga heʼi chupekuéra: “Ermanokuéra, perekóramo peteĩ marandu omokyreʼỹ vaʼerã koʼã héntepe koʼág̃a ikatu peje”. Pablo oaprovecha pe oportunida omokyreʼỹ hag̃ua umi héntepe (Hech. 13:13-16, 42-44). Ñaanimáramo ñande rapichakuérape, katuete oĩta avei ñanemokyreʼỹva (Luc. 6:38). w16.11 1:3, 15, 16

Javyʼaiterei ñaime rupi Jehová puévlope ha jaikuaa haguére umi mbaʼe haʼe ojeruréva ñandehegui. Ñande ningo jaikuaáma mbaʼépa Ñandejára oguerohory, upévare ñaneñeʼẽrendu vaʼerã chupe ha jajapo iporãva. Oĩramo jepe heta persóna hembiapo vaíva, Jehová oipota ñanediferénte. Haʼe heʼi: “Pemboykete umi mbaʼe ivaíva, penembojeguaru vaʼerã umíva” (Sal. 97:10, TNM). Arakaʼeve ndajajoguaséi “umi heʼívape oĩ porãha pe oĩ vaíva, ha oĩ vaiha umi mbaʼe iporãva” (Is. 5:20, TNM). Ñande ñambovyʼase Ñandejárape, upévare jadesidi ñanepotĩtaha opa mbaʼépe (1 Cor. 6:9-11). Jahayhu rupi Jehovápe ha ñaneñeʼẽrenduségui chupe, jajapo haʼe heʼíva ñande rogapýpe, kongregasiónpe, ñande traváhope, eskuélape ha opa hendápe. w16.11 3:13

Umi Estudiánte de la Biblia añetehápe ojapose la oĩ porãva Ñandejára renondépe. Éntre 1914 ha 1919, oĩ vaʼekue algúna kósa haʼekuéra tekotevẽva ontende porãve. Por ehémplo haʼekuéra nontendepáiti kuri mbaʼépa heʼise iñeʼẽrendu vaʼerãha hikuái pe goviérnope. Ñandejára puévlo noñemantenéi vaʼekue neutrál tódo el tiémpo pe gérra aja. El 30 de mayo de 1918, pe presidénte Estados Unidosgua ojerure umi héntepe oñemboʼe hag̃ua pe pas rehehápe. Rrevísta The Watch Tower omokyreʼỹ avei umi Estudiánte de la Bíbliape ojapo hag̃ua upéva. Oĩ voi ermáno oapojáva ekonómikamente pe gérra, ha oĩ avei oñepresentáva oho hag̃ua oñorairõ. Jahechaháicha, tekotevẽ kuri ontende porãve hikuái la Biblia heʼíva. Péro koʼã mbaʼe ndeʼiséi Babilonia Guasu oreko hague chupekuéra ipoguýpe. Upéva rangue, haʼekuéra ontende kuri osẽte vaʼerãha pe rrelihión japúgui. Upe tiémpope saʼíma ofalta kuri ojeiete hag̃ua hikuái pe rrelihión fálsagui (Luc. 12:47, 48). w16.11 5:9

¿Mbaʼérepa Pablo oakonseha kuri umi unhídope ani hag̃ua oiko “hete rembipota” rapykuéri? ¿Mbaʼérepa entéro kristiáno tekotevẽ avei oñatende? Pórke umi deséo vai ikatu odomina oimeraẽ Ñandejára siérvope. Por ehémplo Pablo heʼi vaʼekue oĩha kristiáno Rómape ojapóva “hete oipotávante”. Upéva heʼise oĩ hague oñemeʼẽva tekovaípe, okaru rasáva, térã oñentregáva tahaʼe haʼéva deséo vaípe, ha upéva la iñimportantevéva chupekuéra g̃uarã (Rom. 16:17, 18; Filip. 3:18, 19; Jud. 4, 8, 12). Upéicha avei, peteĩ tiémpore oĩ vaʼekue kongregasión de Coríntope peteĩ kristiáno oñenóva “itúva rembirekóndi” (1 Cor. 5:1). Jahechakuaa upéicharõ mbaʼérepa umi kristiáno ypykue tekotevẽ kuri oñatende ani hag̃ua ojapo “hete rembipota” (Rom. 8:5, 6). Ko konsého iporãiterei avei ñandéve g̃uarã. w16.12 2:5, 8, 9

Ñamombeʼúrõ peteĩ persóna ñakonfiávape mbaʼéichapa ñañeñandu, ikatu ñanepytyvõ ñañekevrantaiterei jave. ¿Mávandipa ikatu ñañemongeta? Ikatu ñane ména térã ñane rembirekóndi, peteĩ ñane amigoiténdi, térã peteĩ ansiáno kongregasionguándi. Haʼekuéra ikatu ñanepytyvõ ñantende porãve hag̃ua pe situasión jahasáva. La Biblia heʼi avei: “Ndaiporihápe oguapýva oñemongeta porã mbaʼeve nosẽporãi, péro oĩramo omeʼẽva konsého porã ojehupyty heta mbaʼe” (Prov. 15:22, TNM). Umi rreunión ikatu avei ñanepytyvõ ani hag̃ua ñañekevrantaiterei ñane provlemakuérare. Káda semána jaha jave rreunionhápe, jahasa tiémpo umi ermánondi ha ñañomokyreʼỹ (Heb. 10:24, 25). Péicha rupi ñanembareteve ha ifasilve ñandéve ñambohovái hag̃ua umi mbaʼe ñandepyʼapýva (Rom. 1:12). w16.12 3:17, 18

Koʼág̃arupi avei ñanderasy térã jahasa umi situasión ndaikatúiva ñakambia. Péicha jave, jaheja vaʼerã Jehová pópe umi mbaʼe ñandepyʼapýva jaikuaágui oñangarekotaha ñanderehe (1 Ped. 5:6, 7). Avei ñañehaʼãmbaite vaʼerã ani hag̃ua jafalta rreunionhápe, ha jaaprovecha opa mbaʼe Jehová omeʼẽva ñandéve omombarete hag̃ua ñande fe (Heb. 10:24, 25). ¿Mbaʼépa ikatu ojapo umi sy ha túa ifamília oñemomombyrýramo Jehovágui? Por ehémplo, proféta Samuel ndaikatúi vaʼekue ojopy itaʼyrakuéra okakuaapámavape ifiél hag̃ua (1 Sam. 8:1-3). Haʼe ohejánte pe situasión Jehová pópe, ha ojapo ikatúva guive iñeʼẽrendu hag̃ua Ñandejárape ha ombovyʼa hag̃ua chupe (Prov. 27:11). Koʼág̃arupi avei, heta sy ha túa ojecha peichagua situasiónpe. Haʼekuéra oikuaa Jehová oĩha dispuésto oasepta jeývo umi pekadór oñarrepentívape (Luc. 15:20). Umi sy ha túa oĩva ko situasiónpe oñehaʼãmbaite ifiél, ha oreko esperánsa iñehemplokuéra ikatuha omomýi ifamíliape oñemoag̃ui jey hag̃ua Jehováre. w17.01 1:15, 16

Umi persóna iñumíldeva orrekonose ojavy jave, ohendu ótro heʼíva ha oikuaa ikatuha oaprende chugui. Añetehápe Jehová oguerohoryeterei peichagua persónape. La Biblia heʼi umi persóna iñumíldeva oikuaaha moõ pevépa omeʼẽ ikapasida, ha orrekonose oĩha heta mbaʼe ikatuʼỹva ojapo, tahaʼe noñepermitíri rupi chupe térã ndaikatupyrýigui upearã. Opensa rupi upéicha, orrespeta hapichápe ha otrata porã chupe. Nañañatendéiramo, ikatu ñañembotuicha ñañemeʼẽʼỹre enkuénta. Por ehémplo, ikatu ñapensa ñaneimportanteveha ñande rapichakuéragui pórke jareko algún priviléhio kongregasiónpe térã peteĩ ñane amígo oreko rupi (Rom. 12:16). Térã ikatu voi ñañepyrũ jajechaukase (1 Tim. 2:9, 10). Ỹrõ jaʼeséma voi ótrope mbaʼépa ojapo térã ndojapói vaʼerã (1 Cor. 4:6). w17.01 3:6-8

Ñane tiémpope, ojepredika arakaʼeve ojejapoʼỹ haguéicha. Avei Jehová organisasión oipuru meme pe teknolohía ikatu hag̃uáicha oñemog̃uahẽ opárupi pe marandu porã. Péro sapyʼánte ijetuʼu upéva umi ijedavévape, pórke tekotevẽ oaprende heta mbaʼe ha ojeadapta (Luc. 5:39). Avei naimbaretevéima hikuái ymave guaréicha. Upéicha rupi iporãiterei umi iñexperiensiavéva ombokatupyrýramo umi imitãvévape (Sal. 71:18). Añetehápe ningo heta vése ndahaʼéi la ifasilpáva umi orekóvape heta priviléhio omeʼẽve hag̃ua rresponsavilida umi imitãmiévape. Umi iñexperiensiavéva ikatu ombyasy operdéta haguére peteĩ asignasión omombaʼetereíva, térã omeʼẽta rupi peteĩ priviléhio ogustáva chupekuéra. Avei ikatu ojepyʼapy openságui umi imitãvéva ndaikatumoʼãiha ojapo porã umi asignasión. Térã ikatu voi opensa naitiempoiha okapasita hag̃ua ótrope. ¿Ha mbaʼépa ikatu jaʼe umi imitãvévare? Tekotevẽ ipasiénsia hikuái noñemeʼẽiramo chupekuéra hetave rresponsavilida. w17.01 5:3, 4

Jesúsgui oiko peteĩ kuimbaʼe perfékto, haʼe haguéicha Adán (Juan 1:14). Péro Jesús idiferénte vaʼekue Adángui, pórke haʼe okumpli opa mbaʼe Jehová ohaʼarõva peteĩ kuimbaʼe perféktogui. Ohasáramo jepe heta mbaʼe ijetuʼúva, siémpre okumpli Ñandejára Léi heʼíva. Jesús omeʼẽ hekove perfékto opavave rehehápe, ñandepeʼa hag̃ua pekádo ha ñemano poguýgui. Haʼe iperfékto ha iñeʼẽrendu opa mbaʼépe Ñandejárape, péicha ojapo vaʼerã kuri Adán (1 Tim. 2:6). Upe sakrifísio rupive entéro kuimbaʼe, kuña ha mitã oreko oportunida oikove hag̃ua opa árare (Mat. 20:28). Jahechaháicha, Jesús sakrifísio iñimportanteterei oñekumpli hag̃ua Jehová propósito (2 Cor. 1:19, 20). w17.02 1:15, 16

Epensamína reviahaha rehóvo nde veíkulope pyhare peteĩ lugár ndaiporihápe mbaʼeve, ha tapekuʼáre oñembyai la nde áuto. Posívlemente repensáta oĩnepa peteĩ omyatyrõ vaʼerã ndéve la nde áuto. Sapyʼánte oñepresenta avei umi provléma ijetuʼuetereíva ha jajepyʼapyeterei. Jesús ohasa vaʼekue heta mbaʼe ipohýiva. Iñenemigokuéra oñembohory hese, heta ombosufri chupe ha oñemosaingo chupe peteĩ yvyráre. Oime vaʼerã haʼe núnka ndohasái peteĩ situasión ijetuʼuvéva upévagui. (Heb. 12:2, 3). Jesús oaguanta, pórke opensa meme umi mbaʼe ohupytýtavare, koʼýte opensa oipytyvõtaha oñemopotĩ hag̃ua Ñandejára réra, ha ohechaukataha oapojaha Jehová goviérno. Haʼe oikuaa umi pruéva ohasáva opataha, péro pe prémio orresivítava yvágape odurataha pára siémpre. Ñambohovái jave umi situasión ijetuʼúva, iporãta jasegíramo iñehémplo. Ikatu avei ñapensa umi mbaʼe porã jahupytýtavare ñaaguanta haguére, ha ani ñanderesarái umi provléma jahasáva ndaipukuetereimoʼãiha. w16.04 2:10

Heta héntepe nomolestái ikonsiénsia opeka haguére. Upévare nontendéi mbaʼérepa ñaikotevẽterei Jesús sakrifísiore. Haʼekuéra ndoikuaaporãi mbaʼépa pe pekádo, mbaʼéichapa operhudika chupekuéra ha mbaʼépa ojapo vaʼerã ojei hag̃ua ipoguýgui. Ha ipyʼaporãramo hikuái katu, oagradeseterei oaprende haguére Ñandejára ombou hague Itaʼýrape ñandepeʼa hag̃ua pekádo ha ñemano poguýgui. Avei oaprende hikuái Jehová ojapo hague upéva ñanderayhuetereígui ha imbaʼeporã haguére ñanendive, nañamereséiramo jepe (1 Juan 4:9, 10). Jesús sakrifísio haʼe pe pruéva tuichavéva ohechaukáva Ñandejára ñanderayhuha. Upéicha Jehová ohechauka avei ñandéve mbaʼeichaitépa imbaʼeporã ñanendive, nañamereséiramo jepe. Tuicha ñanekonsola jaikuaávo ikatuha oñeperdona ñande pekádo ha japyta konsiénsia potĩ reheve, jajeroviárõ Jesús sakrifísiore (Heb. 9:14). Katuete ningo ñamombeʼuse ñande rapichakuérape koʼã mbaʼe. w16.07 4:6, 7

Jehová oasegura ñandéve operdonataha ñande pekádo jajeroviáramo Jesús sakrifísiore (Hech. 3:19-21). Pe rreskáte rupive Jehová oadopta unos kuánto yvypórape itaʼyrarã ikatu hag̃uáicha oho oiko yvágape. Koʼãva haʼe hína umi unhído (Rom. 8:15-17). Jehová oinvita avei umi “ambue ovechakuérape” oike hag̃ua ifamília apytépe ko yvy ape ári. Koʼã kristiánogui oiko rire yvypóra perfékto, ombohovái vaʼerã pe pruéva paha. Ohechaukáramo hikuái iñeʼẽrenduha, Jehová oadoptáta avei chupekuéra itaʼyrarã (Rom. 8:20, 21; Apoc. 20:7-9). Jehová ohayhúta itaʼyrakuérape opa árare, ha pe rreskáte rupive siémpre ñanevendesíta. Añetehápe avave ndaikatúi oipeʼa ñandehegui ko rregálo ijojahaʼỹva Ñandejára omeʼẽva ñandéve. w17.02 2:15, 16

Aníkena ñanderesarái Jehová raẽ ohecha hague ñanderehe umi mbaʼe porã, ha oipota hague ñañemoag̃ui hese. Haʼe oikuaáma kuri jajavy mimitanteha voi ha jarekoha algúna devilida. Upéicharõ jepe, haʼe ñandepota kuri iñamigorã. Jehová ñanderayhu rupi omeʼẽ ñandéve peteĩ rregálo iporãitereíva: ombou Itaʼýra ko yvy ape ári ikatu hag̃uáicha omano ñanderehehápe (Juan 3:16). Jajavy jave, ñañarrepenti vaʼerã ha jajerure Jehovápe ñaneperdona hag̃ua. Jajerovia rupi Jesús sakrifísiore, ikatu ñaĩ segúro Jehová ñaneperdonataha ha ikatuha jasegi jaiko iñamígoramo ñaneimperféktoramo jepe (1 Tim. 1:15). w16.05 4:6, 7