Abril

Umi hénte ndojeroviáiramo Jesús sakrifísiore, Ñandejára okonsidera chupekuéra iñenemígo. Upévare, ñande jareko pe rresponsavilida ñamombeʼúvo umi héntepe ikatuha oiko chuguikuéra Ñandejára amígo. Apóstol Juan oskrivi vaʼekue: “Ojeroviáva pe Taʼýrare ohupytýta jeikove opaveʼỹva, pe naiñeʼẽrendúiva pe Taʼýrape katu ndohupytymoʼãi jeikove opaveʼỹva, ha Ñandejára pochy rendy opytáta hiʼári” (Juan 3:36). Javyʼaiterei ningo jaikuaávo Jesús sakrifísio rupive ikatuha jaiko Jehová amígoramo (2 Cor. 5:18-20). Jaikuaa rupi pe añetegua tuicha ñanepytyvõ ñamboʼe hag̃ua umi héntepe la Biblia, ikatu hag̃uáicha oñemoag̃ui hikuái Ñandejárare. Upéva ningo iñimportanteterei, ha ikatu jajapo japredika rupi ñande rapichápe. w16.07 4:8-10

Primeroite voi, pe padrenuéstrope Jesús ojerure toñesantifika Jehová réra. Ñandejára imarangatu, upévare opa mbaʼe ojapóva oĩ porã, umíva apytépe ileikuéra. Péro Hardín de Edénpe Satanás okuestiona pe derécho Jehová orekóva omoĩ hag̃ua léi yvyporakuérape. Haʼe ijapu oheja vai hag̃ua Jehovápe, ha péicha omongyʼa upe téra porãite (Gén. 3:1-5). Jesús ndojoguaiete Satanáspe, haʼe ohayhu ipyʼaite guive Itúa réra ha ojapo opa ikatúva osantifika hag̃ua (Juan 17:25, 26). ¿Mbaʼéichapa haʼe omomarangatu Ñandejára réra? Umi mbaʼe ojapo ha omboʼévare. Péicha Jesús oipytyvõ umi héntepe ohechakuaa hag̃ua Jehová léi ihustoha, ha entéro mbaʼe heʼíva ñandéve jajapo hag̃ua haʼeha ñanevenefisiorãnte (Sal. 40:8-10). Jesús ifiél Jehovápe omano peve. Péicha haʼe ohechauka peteĩ kuimbaʼe perfékto ikatuha ojapo opa mbaʼe Jehová oipotáva. w17.02 2:2-4

Pe Ovecharaʼy oñeñeʼẽha ko téxto haʼe hína Jesucristo. Haʼe oĩrõ guare ko yvy ape ári oñehenói vaʼekue chupe “Ñandejára Ovecharaʼy, oipeʼáva yvyporakuéra pekádo” (Juan 1:29). Jaʼekuaa Jesús omereseha ñamombaʼe chupe upe haguére. Ajépa ndaipóri ótro omeʼẽva hekove yvyporakuéra pekadór rehehápe. Añetehápe Jesús haʼe “Rréi umi rreikuéra ári ha Mburuvicha mburuvichakuéra ári. Haʼe añoite hína pe ikatuʼỹva omano, oikóva peteĩ lugár omimbipávape, avave ikatuʼỹháme og̃uahẽ, chupe avave ndohechái vaʼekue ha ndaikatúi ojehecha” (1 Tim. 6:14-16). Oime vaʼerã reñeñandu umi ánhel ipoderósova oñeñandu haguéicha. Haʼekuéra opurahéi: “Pe Ovecharaʼy ojejuka vaʼekue omerese ojehovasa ha oñemeʼẽ chupe podér, mbaʼerepy, arandu, puʼaka, ñemombaʼe ha tekomimbipa” (Apoc. 5:12). Añetehápe Jehová ha Jesúspe oñemombaʼe vaʼerã katuete, ndajajapóiramo upéva ndaikatumoʼãi jahupyty jeikove opaveʼỹva (Sal. 2:11, 12; Juan 5:23). w17.03 1:3, 4

Jefté oikuaa porã pe Léi Mosáika ha umi mbaʼe ohasa vaʼekue tetã Israel. Haʼe opensa meme mbaʼéichapa Jehová otrata ipuévlope, upéicha rupi ontende mbaʼépa oĩ porã ha mbaʼépa oĩ vai (Juec. 11:12-27). Jefté oipuru umi mbaʼe oikuaáva odesidíta jave álgo. Haʼe oikuaa porã Jehová ndoipotaiha isiervokuéra ipochy ha oñevenga, síno oipota ojoayhu hikuái. Avei pe Léi rupive oaprende oporotrata porã vaʼerãha, oĩramo jepe ndaijaʼéiva hese (Éx. 23:5; Lev. 19:17, 18). Oime vaʼerã Jefté oikuaa raʼe José ehémplo, ha upéva tuicha oipytyvõ chupe. Haʼe katuete oikuaáne José oiporiahuvereko hague iñermanokuérape, ndaijaʼéiramo jepe hese hikuái (Gén. 37:4; 45:4, 5). Oiméne Jefté ojepyʼamongeta rakaʼe ko ehémplore, ha upéva oipytyvõ chupe orreaksiona hag̃ua Jehová oipotaháicha. Katuete ningo Jefté osufrieterei iñermanokuéra otrata vaírõ guare chupe, péro haʼe nomboguapýi ijehe umi mbaʼe. Chupe g̃uarã iñimportanteve odefende Jehová réra ha ipuévlope (Juec. 11:1-3). w16.04 1:8, 9

Jehová siervokuéra ningo ymaite guive oñerreuni. Por ehémplo, umi kristiáno ypykue siémpre oñembyaty vaʼekue oadora hag̃ua Jehovápe ha oaprende hag̃ua heta mbaʼe chugui. Oime vaʼerã ñande avei jahaseterei umi rreunionhápe. Péro oiko haguéicha umi kristiáno ypykuére, heta vése ijetuʼu ñandéve jaha meme hag̃ua rreunionhápe. Sapyʼánte tekotevẽ ñambaʼapo heta órare, térã ñanerembiapoiterei ha ñanekaneʼõma. Ani hag̃ua jaheja koʼã mbaʼe ñandejoko, ñanemanduʼa vaʼerã umi rreunión iñimportantetereiha. Heta ñane ermáno ha ermána ndaikatúi jepi oho rreunionhápe pórke hasy. Umi ansiáno oipytyvõkuaa koʼãichagua ermánope ikatu hag̃uáicha ohendu umi rreunión, tahaʼe teléfono térã gravasión rupive. w16.04 3:3

Ñañemantene hag̃ua neutrál, tekotevẽ jasegi umi Ñandejára siérvo yma guare ehémplo. Oĩ heta ipyʼaguasu vaʼekue, ha odesidi porã rupi ikatu kuri oñemantene neutrál. Epensamína Sadrac, Mesac ha Abednégore. Haʼekuéra oñenega vaʼekue oadora peteĩ monuménto orrepresentáva pe goviérno babilonio (Dan. 3:16-18). Ko rreláto oipytyvõma hetaiterei Testígope ipyʼaguasu ha oñenega hag̃ua oadora pe vandéra ipaispegua. Jesús oĩrõ guare ko yvy ape ári noñentremetéi vaʼekue polítikape ni mbaʼeveichagua provléma odividívape umi héntepe. Haʼe oikuaa iñehémplo oipytyvõtaha idisipulokuérape. Jesús heʼi umi idisípulope ipyʼaguasu hag̃ua. Umi ermáno ñane kongregasiongua ikatu avei ñanepytyvõ ñañemantene hag̃ua neutrál. Haʼekuéra oikuaáramo ñane situasión, ikatu hína ñanemokyreʼỹ. Jajerurékena chupekuéra toñemboʼe ñanderehe. Péro ñande avei jaapoja vaʼerã ñane ermanokuérape ha ñañemboʼe hesekuéra (Mat. 7:12). w16.04 4:16, 18

¿Ojerurépa umi testígo de Jehová pláta irreunionkuéra ha umi asambleahápe? Nahániri. Entéro umi gásto oĩva Jehová organisasiónpe, ojepaga kontrivusión voluntária rupive (2 Cor. 9:7). Áño 2015-pe, umi testígo de Jehová odedika 1.930 millones de óra opredika hag̃ua pe marandu porã, ha ojapo 9 millones de estúdio bíblico grátis káda mes. Chupekuéra ndojepagái opredika haguére, ha vyʼápe oipuru irrekursokuéra ojapo hag̃ua ko tembiapo. Peteĩ investigadór heʼi umi testígo de Jehováre: “Chupekuéra g̃uarã iñimportanteterei opredika ha oporomboʼe [...]. Ha ndoikói rupi ombosuéldo umi omoakãvape chupekuéra, saʼive avei umi gásto”. Upéicharõ, ¿mbaʼépa ñanemomýi japredika hag̃ua? Jahecháma haguéicha, ñande nañahaʼarõi ojepaga ñandéve, síno jajapo ko tembiapo jahayhúgui Jehovápe ha umi héntepe. Péicha ñakumpli pe profesía oĩva pe téxto koestediaguápe. w16.05 2:9

Ñamboyke vaʼerã umi vyʼarã ikatúva omoinge ñane akãme deséo vai. Ñantende porãramo mbaʼépa Jehovápe ombojeguaru, ifasilvéta ñandéve jaikuaa hag̃ua mbaʼe lívro, pelíkula ha huégopa ikatu jaelehi. Ha natekotevẽmoʼãi ñaporandu ótrope mbaʼépa iporãve jajapo. Pyʼỹinte ningo oĩ mas de una fórma jadesidi hag̃ua peteĩ mbaʼe oĩ porãva ha katuete Jehová oguerohorýva. Péro jadesidíta jave peteĩ mbaʼe iñimportánteva, iporã jajerure konsého umi ansiáno térã umi ermáno iñexperiensiavévape (Tito 2:3-5; Sant. 5:13-15). Upéva ndeʼiséi jaipotaha umi ótro odesidi ñanderehe, síno ñapensa porã vaʼerã mbaʼépa heʼi la Biblia ha upéi ñandete jadesidi (Heb. 5:14). Apóstol Pablo heʼi vaʼekue: “Káda uno ogueraháta ikárga” (Gál. 6:5). w16.05 3:15, 16

Jehová ohecha mbaʼépa yvyporakuéra oreko ipyʼapýpe, ha oikuaa porã káda únope (1 Sam. 16:7b). Haʼe oformárõ guare pe kongregasión kristiána, omoag̃ui ijehe ha Itaʼýrare umi persóna haʼetévaicha naipohãvéimava (Juan 6:44). Por ehémplo oiporavo peteĩ fariséo héravape Sáulo. Jehová ohecha Saulo pyʼapy ha nopensái haʼeha peteĩ ñaiʼũ ndaikatumoʼãiva omoldea (Prov. 17:3). Ñandejára ohechakuaa ikatuha ‘oiporavo chupe oikuaauka hag̃ua’ pe marandu porã oñeʼẽva Jesúsre “umi tetãnguérape, umi mburuvicha guasúpe, ha Israel raʼykuérape” (Hech. 9:15). Ñandejára oiporavo avei heta persónape ha omoldea umívape, ikatu hag̃uáicha oiko chuguikuéra “kambuchi ojepuru porãtava”. Umi oiporavóva apytépe oĩ vaʼekue ikaʼúva, hekovaíva ha imondáva (Rom. 9:21; 1 Cor. 6:9-11). Péro oikuaa rire hikuái Jehovápe, ojerovia hese ha oheja haʼe omoldea chupekuéra. w16.06 1:4

Jehová ñanepytyvõ jajogua hag̃ua umi ñaiʼũ huʼũ porãvape ha ifásilva oñemoldea hag̃ua. Upearã ojevale la Bíbliare, pe kongregasión ha pe predikasiónre. Umi alfaréro ningo oipuru y omohuʼũ hag̃ua pe ñaiʼũ. Péicha avei jaleéramo la Biblia káda día ha jajepyʼamongeta hese, Jehová ikatúta ñanemoldea porãve. Haʼe omanda vaʼekue umi rréi de Israélpe okopia hag̃ua pe Léi ha olee hag̃ua káda día (Deut. 17:18, 19). Umi apóstol ohechakuaa vaʼekue avei tekotevẽha olee ha ojepyʼamongeta Ñandejára Ñeʼẽre opredika hag̃ua. Haʼekuéra oskrivírõ guare umi Escrituras Griegas, heta vése osita pe Escrituras Hebréasgui, térã omensiona umi mbaʼe oĩva upépe. Ha opredika jave, omokyreʼỹ hikuái umi héntepe olee hag̃ua Ñandejára Ñeʼẽ (Hech. 17:11). Ñande avei jahechakuaa iñimportantetereiha jalee la Biblia káda día ha jajepyʼamongeta umi mbaʼe jaleévare (1 Tim. 4:15). Upéva ñanepytyvõta ikatu hag̃uáicha ñaneumílde ha jaheja Jehová ñanemoldea. w16.06 2:10

Ñane tiémpope, Jehová siervokuéra ohechauka ohayhuha hapichakuérape oikóramo jepe gérra. Por ehémplo, pe segunda gérra mundiál aja omano kuri 55 millón de persóna. Péro umi testígo de Jehová ndopartisipái umi gerrahápe ni ndojukái avavépe (Miq. 4:1, 3). Upéicha rupi, haʼekuéra ipotĩ Ñandejára renondépe (Hech. 20:26). Amás día umi oservíva Jehovápe hetave ohóvo, orekóramo jepe peteĩ enemígo ipoderósova. Ko enemígo hína Satanás, haʼéva “ko múndo jára” (2 Cor. 4:4). Satanás odomina umi organisasión polítika ha umi médio de komunikasión. Ha oipuru koʼã mbaʼe ojokoségui pe predikasión. Péro núnka ndaikatumoʼãi ojapo upéva. Satanás oikuaa mbykypaitemaha itiémpo, upévare koʼýte oñehaʼã ñanemomombyry hag̃ua Jehovágui (Apoc. 12:12). w16.06 4:3, 4

Jesús omomanduʼa idisipulokuérape mbaʼéichapa Jehová oñangareko ikreasiónre. Ko okasiónpe Jesús omoĩ kómo ehémplo “umi lírio oĩva ñúre”. Oñeʼẽvo umi líriore, ikatu imanduʼa raʼe umi gladiólo, hasínto, íris ha tulipánre. Koʼã yvoty iporã porã ha natekotevẽi ojapo ijaorã. Upéicharõ jepe, Jesús heʼi kuri “ni Salomón haʼéramo guare pe mburuvicha iplatavéva, noñemondéi vaʼekue haʼekuéraicha”. Ñapensamína Jesús heʼívare upe rire: “Ñandejára péicha omondéramo umi ñana okakuaáva ñúre, [...] ¿mbaʼéicha piko pejeroviaʼiete ha ndapehechakuaái koʼytevéntema haʼe omeʼẽtaha peẽme pende aorã?” (Mat. 6:29, 30). Jehová ningo katuete omeʼẽta isiervokuérape oikotevẽva. Péro umi disípulo ojeroviaʼieterei (Mat. 8:26; 14:31; 16:8; 17:20). Haʼekuéra oñemeʼẽ vaʼerã enkuénta Jehová oñeinteresaha káda únore, ha siémpre oñangarekotaha hesekuéra. Ha ñande, ¿jajeroviápa ñande pyʼaite guive Jehová omeʼẽtaha ñandéve opa mbaʼe ñaikotevẽva? w16.07 1:15, 16

Jehová omeʼẽ ñandéve ñaikotevẽva guive ikatu hag̃uáicha ñaaguanta ha ñambohovái umi provléma oñepresentáva ñandéve (1 Ped. 1:6). Jahechaháicha, Jehová imbaʼeporãiterei ñanendive heta hendáicha nañamereséiramo jepe, ha upévare jarresivi heta vendisión. Por ehémplo haʼe ñaneperdona japeka jave. Jehová imbaʼeporãiterei rupi, operdona umi mbaʼe vai jajapóva. Péro upearã, ñande jahechauka vaʼerã ñañarrepentiha ha ñañehaʼãmbaite anivéma hag̃ua jajapo pe ivaíva (1 Juan 1:8, 9). Pablo oñeʼẽvo Ñandejárare, heʼi: “Haʼe ñaneguenohẽ pytũmby poguýgui ha ñanemoĩ Itaʼýra ohayhuetéva rréinope. Haʼe opaga ñanesãso hag̃ua ha oñeperdona hag̃ua ñande pekádo” (Col. 1:13, 14). Jaagradeséramo Jehovápe ojapo vaʼekuére ñanderehehápe, katuete ñambotuicháta chupe. Ha haʼe ñaneperdona rupi, ikatu jarresivi heta vendisión iporãitereíva. w16.07 3:7-9

Ivaieterei ningo la Satanás ojapo vaʼekue hardín de Edénpe. Upéicharõ jepe, Jehová ojapo tekotevẽva guive ani hag̃ua japyta esperansaʼỹre. Ko esperánsa oĩ pe primera profesíape jatopáva la Bíbliape. Umi ánhel hekojojáva apytégui Ñandejára oiporavo peteĩme ikatu hag̃uáicha ohundi Satanáspe, ha jarrekupera jey Adán ha Eva operde vaʼekue. Upéicha, entéro yvypóra iñeʼẽrendúva ikatúta oiko opa árare ko yvy ape ári, Jehová oipota haguéicha ymaite guive (Juan 3:16). Adán ha Eva ojerrevela rire Ñandejára kóntrape, ombyai imatrimónio ha operhudika avei entéro umi omendávape upe rire. Por ehémplo, Eva ha opavave kuñanguéra heta osufri imembýta jave. Avei umi tembireko oipotaitereíta iména ohechauka ohayhuha chupe, ha odependetereíta hese. Iména odomináta chupe ha oĩta voi omaltratáva hembirekópe, oikoháicha jepi koʼág̃arupi (Gén. 3:16). La Biblia heʼi menakuéra mborayhúpe omoakã vaʼerãha hogapy, ha tembirekokuéra orrespeta vaʼerãha iménape (Efes. 5:33). Umi matrimónio kristiáno ojoapojáramo, ojeíta heta akãrasýgui. w16.08 1:6, 7

Oĩ heta kristiáno iména térã hembireko ndahaʼéiva Testígo. Péro ndahaʼéi upe haguére ojeseparátamava hikuái (1 Cor. 7:12-14). La Biblia heʼi: “Pe ména ojeroviaʼỹva imarangatu hembireko rupive, ha pe tembireko ojeroviaʼỹva imarangatu iména rupive”. ¿Mbaʼérepa jaʼekuaa imarangatuha pe persóna ojeroviaʼỹva? Pórke hembiayhu oservi hína Jehovápe. Umi mitã imarangatu avei, ha Ñandejára oñangareko hesekuéra. Oĩ heta experiénsia ohechaukáva umi ména térã tembireko oservíva Jehovápe, oipytyvõ hague hembiayhúpe oiko hag̃ua chugui Testígo. Apóstol Pedro heʼi umi tembirekópe orrespeta vaʼerãha iménape. Haʼe heʼi: “Peñemoĩ vaʼerã pene ména poguýpe, upéicha oĩramo naiñeʼẽrendúiva Ñandejára Ñeʼẽme, ikatúta ojerovia Ñandejárare ojeʼeʼỹre chupe mbaʼeve, hembireko hekoporã rupi. Upéva oikóta haʼekuéra ohechágui mbaʼéichapa penderekopotĩ ha perrespeta chupekuéra pende pyʼaite guive” (1 Ped. 3:1-4). w16.08 2:14, 15

Jehová oipota isiervokuéra ojoayhu ha oñopytyvõmba (Luc. 22:24-27). Jesús ojapo vaʼekue ikatúva guive oporopytyvõ hag̃ua, ha omeʼẽ voi hekove ñanderehehápe (Mat. 20:28). Dorcas “imbaʼeporãiterei ha oipytyvõ [vaʼekue] umi oikotevẽvape” (Hech. 9:36, 39.) Ótra kristiána hérava María, “heta ombaʼapo” vaʼekue umi ermáno Romagua rehehápe (Rom. 16:6). ¿Mbaʼéichapa ikatu ñamboʼe umi ipyahúvape ohechakuaa hag̃ua iñimportanteha ñaipytyvõ ermanokuérape? Ñainvitakuaa chupekuéra ñanemoirũ hag̃ua javisita jave umi ermáno ijedávape térã hasykatúvape. Tuvakuéra katu orahakuaa ifamíliape ojapo hag̃ua avei upéva, opyta porãma guive. Ansianokuéra ikatu oraha hendive umi imitãvape térã ipyahúvape ohóta jave umi ermáno rógape omyatyrõ hag̃ua algúna kósa, térã oraha jave chupekuéra tembiʼu. Umi imitãva ha umi ipyahúva Jehová organisasiónpe ohecháramo ñañangarekoha ojuehe, haʼekuéra avei ojapóta upéva. (Rom. 12:10). w16.08 4:13, 14

Fránciape peteĩ ermána heʼi: “Che profesorkuéra oñesorprende voi oĩ jave alúmno oroviáva la Biblia omboʼéva”. Koʼág̃arupi heta persóna ndoroviái Ñandejára ñandeapo hague. Oiméramo nde peteĩ mitãrusu térã mitãkuña reservíva Jehovápe, térã reaprende hína chugui, reikuaaséne mbaʼéichapa ikatu rehechauka Ñandejára haʼeha ñande Apohare. La Biblia ñanepytyvõ ñapensa porã hag̃ua umi mbaʼe jalee ha ñahendúvare. Avei ñanepytyvõ ñandete jadesidi hag̃ua mbaʼépa jaroviáta. Ñandejára Ñeʼẽ heʼi pe arandúre: “Upéva ndeprotehéta ha ikatúta redesidi porã”. ¿Mbaʼéichapa ndeprotehéta pe arandu? Nepytyvõta remboyke hag̃ua umi japu ha rejeroviave hag̃ua Jehováre (Prov. 2:10-12). Jaikuaa porã vaʼerã Jehovápe ikatu hag̃uáicha jajerovia hese ñande pyʼaite guive (1 Tim. 2:4). Upévare, relee jave la Biblia térã umi puvlikasión bíblica, iporã epytaʼimi jepi ha epensa umi mbaʼe releévare ikatu hag̃uáicha rentende porã. w16.09 4:1-3

Iñimportanteterei ningo jasegi ñañehaʼã jahasáramo jepe heta provléma ñanemitãrõ guare, térã ñapensáramo ñane situasión naipohãveimaha. Siémpre ñanemanduʼa vaʼerã Jehová katuete ñanevendesitaha jasegíramo ñañehaʼã (Gén. 39:21-23). Ikatu oime ñande jahasa hína umi provléma ijetuʼúvare. Por ehémplo, ikatu ojejapo ñanderehe peteĩ inhustísia, reiete ndojechaʼéi ñanderehe, oĩ oñembohorýva térã ñandeperhudikaséva iñenvidióso rupi. Péro ani ñanekangy, ñapensa guei umi mbaʼe oipytyvõ vaʼekuére Jacob, Raquel ha Josépe osegi hag̃ua oservi hikuái vyʼápe Jehovápe. Haʼekuéra omombaʼeterei kuri pe amista orekóva Jehovándi, upévare haʼe omombarete ha ovendesi chupekuéra. Koʼã Ñandejára siérvo osegi olucha, ha oñehaʼãmbaite avei ojapo umi mbaʼe ojeruréva Jehovápe iñemboʼépe. Kristianokuéra oikóva koʼã ára pahápe, oñehaʼãmbaite vaʼerã avei osegi hag̃ua ojerovia Jehová promesakuérare. Ha ñande, ¿ñaĩpa avei dispuésto jaluchávo ñakonsegi hag̃ua Jehová vendisión? w16.09 2:8, 9

Ne família ohecha jave nde voi rejeroviaitereiha Jehováre, oaprendéta heta mbaʼe. Upévare, esegíkena emombarete nde fe ha ehechauka Jehová haʼeha peteĩ persóna rreál ndéve g̃uarã. Peteĩ matrimónio heʼi haʼekuéra ojepyʼapy jave peteĩ mbaʼére, oñemboʼeha ifamiliakuérandi ha ojerure Jehovápe togia chupekuéra. Haʼekuéra omokyreʼỹ ifamíliape oñemboʼe meme hag̃ua. Avei omokyreʼỹ pe ijypykuépe ojeroviapaite hag̃ua Ñandejárare, tombaʼapo meme pe Rréino rehehápe ha ani hag̃ua ojepyʼapyeterei. Haʼe osegi koʼã konsého ha ohechakuaa mbaʼéichapa Jehová ñanepytyvõ. Koʼã tuakuéra heʼi: “Rohechakuaa ore família ojeroviaveha Jehováre ha Iñeʼẽre”. Tuakuéra, penemanduʼákena ndaikatuiha peovliga pene famíliape ojerovia hag̃ua Jehováre. Por ehémplo, peẽ ikatu peñotỹ ha perrega peteĩ plánta, péro Ñandejára añoite ikatu omongakuaa (1 Cor. 3:6). Upévare, pemboʼékena pene famíliape Ñandejára rape, ha pejerure chupe tapenepytyvõ ijespíritu rupive. Haʼe katuete penevendesíta peñehaʼã haguére (Efes. 6:4). w16.09 5:16-18

Sergio ha hembireko Muriel oservi vaʼekue mas de 3 áño peteĩ kongregasión noñeñeʼẽihápe iñidióma. Péro upéi ohechakuaa ifamília orekóva 17 áño naikyreʼỹveiha predikasiónpe ni rreunionhápe. Sergio heʼi: “Roñemeʼẽvo enkuénta ko situasión ojokoha ore famíliape oprogresa hag̃ua espirituálmente, rodesidi jeýnte roho ore kongregasionkuépe”. Tuakuéra oreko vaʼerã enkuénta mokõi mbaʼe odesidi mboyve ova jeýtapa pe kongregasión oñeñeʼẽhápe pe idióma ifamília ontende porãva. Primero, opytátanterõ hikuái, ohecha vaʼerã itiémpotapa ha oĩpa iposivilidápe oipytyvõ ifamíliape oñemoag̃ui hag̃ua Jehováre, ha omboʼe hag̃ua chupekuéra ótro idióma. Segundo, ohecha vaʼerã hikuái noiméipa ifamíliape ndoitiravéinte pe predikasión ha rreunión, térãpa añetehápe oforsa hína chupe pe idióma. Tuakuéra ikatu odesidi ova jeytanteha pe idióma haʼekuéra ontende porãhápe, umi mitã omombareteve hag̃ua ife (Deut. 6:5-7). w16.10 2:14, 15

Noé ojerovia rupi Jehováre, ojapo peteĩ árka tuichaitereíva. Oime vaʼerã ivesinokuéra oporandu chupe maʼerãpa ojapo upe árka. Ñande jaikuaa porã haʼe nokirirĩri hague, pórke la Biblia heʼi Noé haʼe hague “peteĩ kuimbaʼe opredikáva umi mbaʼe hekopeguáva” (2 Ped. 2:5). Noé omombeʼu umi héntepe Ñandejára oguerutaha peteĩ ama guasu ohundi hag̃ua umi iñañávape. Oime vaʼerã Noé oavisa umi héntepe Jehová heʼi hagueichaite chupe. Ñandejára heʼi kuri: “Adesidíma ahunditaha opa mbaʼe oikovévape, henyhẽma rupi ko yvy umi hembiapo vaívagui”. Ha heʼi avei: “Che aguerúta hína peteĩ Dilúvio ha ahundipaitéta entéro mbaʼe oikovéva ko yvy ape ári. Opa mbaʼe oĩva ko yvy ári oñehundipaitéta”. Upéi, Noé katuete heʼíne raʼe umi héntepe mbaʼépa ojapo vaʼerã hikuái ojesalva hag̃ua. Jehová heʼi kuri Noépe: “Reike vaʼerã pe árkape” (Gén. 6:13, 17, 18, TNM). w16.10 4:7

La Biblia rupive, Jehová omboʼe tuakuérape mbaʼéichapa omongakuaa vaʼerã ifamíliape. Umi kristiáno oñatende vaʼerã ani hag̃ua ova hesekuéra ko múndo opensa lája (Efes. 2:2). Por ehémplo oĩ lugár umi kuimbaʼe opensaha kuñanguéra la omboʼe vaʼerã umi mitãme. Péro la Biblia heʼi porã túa ojapo vaʼerãha upéva (Efes. 6:4). Tuakuéra ohayhúva Jehovápe oñehaʼã ikatu hag̃uáicha ifamília oiko Jehová amígoramo, Samuel haʼe haguéicha (1 Sam. 3:19). Iporã jahecha raẽ mbaʼépa heʼi la Biblia jadesidi mboyve peteĩ mbaʼe iñimportánteva oafektátava ñane famíliape térã ñande traváho. Jaikuaaháicha, ñande ndaikatúi jadesidi porã ñandejehegui reínte, ñaikotevẽterei Ñande Ru yvagapeguáre. w16.11 3:14, 15

Jahecha jave umi mbaʼe Ñandejára okrea vaʼekue, ñañemeʼẽ enkuénta haʼe ndojapoiha mbaʼeve sarambikuépe. “Jehová iñarandu ha ontende porã rupi opa mbaʼe omopyenda porã pe yvága ha ko yvy” (Prov. 3:19, TNM). Ñande ningo ni ndajaikuaapái umi mbaʼe haʼe okrea vaʼekue. Añetehápe “ijorillamínte la jahecháva, michĩmínte jaikuaa ha ñahendu umi hembiapokuégui” (Job 26:14, TNM). Péro jahechakuaa opa mbaʼe oĩva ko univérsope oñeorganisa porãha. Por ehémplo, umi estrélla okuʼe pe espásiore ha ndochokapái ojuehe. Avei umi planéta oĩva pe sistéma solárpe ojere pe kuarahýre de fórma ordenáda. Jehová omoĩ entéro mbaʼe hendaitépe. Haʼe “iñarandueterei rupi ojapo pe yvága porãite” ha ko yvy. Koʼã mbaʼére ñambotuicha, jaadora ha ñaneñeʼẽrenduse chupe (Sal. 136:1, 5-9). w16.11 2:3

Malaquías 3:1-3 oexplika mbaʼépa oiko kuri umi Estudiánte de la Bíbliare áño 1914 guive prinsípio de 1919 peve. Jehová, haʼéva “pe Señór verdadéro”, ha Jesucristo “pe mensahéro del pákto” ou ohecha hag̃ua mbaʼéichapa oĩ Ñandejára renondépe Levi raʼykuéra, orrepresentáva umi unhídope. Upéi, Jehová ontendeka porã rire hembipota isiervokuérape ha omopotĩ rire chupekuéra, oĩma preparádo hikuái orresivi hag̃uáicha peteĩ asignasión pyahu. Upévare, áño 1919-pe Jesús onombra “pe tembiguái jeroviaha ha iñarandúva”, ha oenkarga chupekuéra ogia ha omboʼe hag̃ua Jehová siervokuérape (Mat. 24:45). Péicha oñemosãsóma Ñandejára puévlope Babilonia Guasu poguýgui. Upe guive, haʼekuéra oaprendeve ohóvo umi mbaʼe Ñandejára ojapótava, ha amás día ohayhuve chupe. Katuete oagradesetereíne raʼe hikuái Jehovápe omosãso haguére chupekuéra. w16.11 5:14

Ñande ningo jahayhu Jehovápe “haʼe raẽve ñanderayhu rupi” (1 Juan 4:19). Amáske jahayhu Jehovápe jajeroviave hese, ha jaikuaa porã haʼe opremiaha umi ohayhúvape chupe (Heb. 11:6). Jehová ningo orrekompensa isiervokuérape. Upéva haʼe peteĩ kualida iporãitereíva haʼe orekóva. Iñimportanteterei jajerovia Jehováre ñane korasõ mbytete guive. La Biblia heʼi mbaʼépa heʼise pe fe: “Heʼise jagueroviaha pyʼamokõiʼỹre oikotaha katuete umi mbaʼe ñahaʼarõva” (Heb. 11:1). Jahechaháicha, jajerovia Jehováre heʼise ndajadudaiha ni michĩmi haʼe katuete ovendesitaha umi ifiélvape chupe. Ohechaukaháicha pe téxto estediagua, Jehová opromete opremiataha isiervokuéra ojeroviávape hese, ha oipota ñañehaʼãmbaite jahupyty ivendisión. w16.12 4:1-3

Umi oservíva Jehovápe heta áñore jepe ikatu ou oiko “hete rembipota” rapykuéri. Péro, ¿heʼisépa kuri Pablo naiporãiha ñapensa tembiʼúre, ñane traváhore, diversiónre, térã peteĩ jajegustávare? Nahániri, umi mbaʼe ningo ndaivaíri. Jesús jepe ohasa porã vaʼekue okaruhápe, ha omongaru voi hetápe. Avei haʼe omboyke vaʼekue tiémpo opytuʼu hag̃ua. Ha apóstol Pablo oñeʼẽrõ guare umi rrelasión sexuál rehe, heʼi kuri upéva iñimportanteha peteĩ matrimóniope. Pe palávra griéga Pablo oipuru vaʼekue heʼise ñañekonsentra porãha peteĩ mbaʼe ñapensávare térã ñaplaneávare. Peteĩ expérto oexplika vaʼekue umi persóna koʼãichagua oñeinteresaitereiha voi upe ogustávare chupe, ha manterei oñeʼẽ upévare. Upéicha rupi, oheja umi mbaʼe ojaposéva odomina chupe. w16.12 2:5, 9, 10

Nañakontroláiramo umi deséo vai, ikatu jaju ñañemombaʼeguasu. Hetárema oiko upéva oipotágui ótro ombotuicha chupe, iñenvidióso térã ndojejokói rupi ipochy jave. La Biblia omombeʼu oĩ hague persóna ijorgullósova, por ehémplo Absalón, Uzías ha Nabucodonosor. Péro Jehová oumilla chupekuéra upe haguére (2 Sam. 15:1-6; 18:9-17; 2 Crón. 26:16-21; Dan. 5:18-21). ¿Mbaʼérepa sapyʼánte ikatu ñapensa peteĩ persóna tekotevẽha iñumildeve? Ñapensamína Abimélec ha Pédrore (Gén. 20:2-7; Mat. 26:31-35). ¿Ikatúpa jaʼe hesekuéra oñemombaʼeguasu hague? ¿Oĩpa raʼe algúna kósa ndoikuaáiva hikuái, térãpa oĩ umi mbaʼe ojapónteva opensa porãʼỹre? Ñande ndajaikuaái mbaʼépa oreko kuri ipyʼapýpe koʼã kuimbaʼe, upévare ndovaléi jahusga chupekuéra. w17.01 3:9, 10

Ojapo haguéicha pe viúda, heta kristiáno koʼag̃agua oĩ segúro omotenondéramo Ñandejára Rréino, Jehová katuete omeʼẽta chupekuéra opa mbaʼe oikotevẽva (Mat. 6:33). Jahechamína Malcolm káso. Heta tiémpore haʼe oservi kuri Jehovápe hembirekóndi. Haʼekuéra ohasa vaʼekue umi mbaʼe iporãva ha ijetuʼúva. Malcolm heʼi: “Ndajaikuaái ningo mbaʼe situasiónpa ikatu oñepresenta. Heta vése umi mbaʼe jahasáva ijetuʼu jagueropuʼaka hag̃ua. Péro Jehová ovendesi umi ohekávape igía”. ¿Mbaʼe konséhopa omeʼẽ ko ermáno? Haʼe heʼi: “Eñemboʼe Jehovápe ikatu hag̃uáicha rejapo heta mbaʼe iservísiope. Eñekonsentra umi mbaʼe ikatúvare rejapo, ha ani umi mbaʼe ndaikatúivare”. Ko múndo aña “oho vai vaive”, ha jaikuaa amás día oikotaha hetave mbaʼe vai (2 Tim. 3:1, 13). Upévare ndajahejái vaʼerã umíva ñanedesanima. Upéva rangue, jajerovia Jehováre ha ñañekonsentra umi mbaʼe ikatúvare jajapo. w17.01 1:17-19

David ojapose vaʼekue Jehovápe peteĩ óga, térã témplo. Péro Natán rupive, Jehová heʼika Davídpe pe jaleéva pe téxto koestediaguápe. Upéicharõ jepe, Jehová opromete Davídpe siémpre oĩtaha hendive. Péro oikuaauka chupe peteĩva itaʼýra omopuʼãtaha pe témplo. ¿Mbaʼéichapa orreaksiona David? (1 Crón. 17:1-4, 8, 11, 12; 29:1, TNM). David ningo omopuʼãseterei vaʼekue pe témplo Jehovápe g̃uarã, upévare ikatu kuri ou oñedesanima. Péro upéva rangue, oapoja itaʼýra Salomónpe ha oipytyvõ oñeorganisa hag̃ua umi ombaʼapótavape, ha ombyaty iérro, kóvre, pláta, óro ha yvyra. Tiémpo rire pe konstruksiónpe oñehenói Salomón témplo. Péro David ndojepyʼapýi kuri ndojeʼemoʼãi haguére haʼe omopuʼã hague pe témplo. Upéva rangue omokyreʼỹ itaʼýrape heʼívo: “Koʼág̃a che raʼy, Jehová toĩ nendive ikatu hag̃uáicha resẽ porã emopuʼãvo Jehová nde Jára róga. Haʼe ningo heʼíma voi kuri nde rejapotaha” (1 Crón. 22:11, 14-16, TNM). w17.01 5:6, 7

Oĩramo jepe ñandepersegíva, ñañehaʼãmbaite jaiko Jehová oipotaháicha. Ñaneñeʼẽrendu jave chupe, ñambotuicha hína héra (Mat. 5:14-16). Avei, péicha jahechauka umi léi haʼe omeʼẽva iporãha ha Satanás haʼeha peteĩ tekove japu. Sapyʼánte ningo jajavy ñaneimperfékto rupi, péro péicha jave ñañarrepenti ha ñañehaʼãmbaite ani hag̃ua jajapove mbaʼeve omongyʼátava Jehová réra. Oiméramo ñande haʼe unhído térã ñaime “ambue ovechakuéra” apytépe, Jehová operdona ñande pekádo jajeroviáramo Jesús sakrifísiore. Haʼe oasepta isiérvoramo umi oñemeʼẽvape chupe. Umi unhído hekojoja Jehová renondépe, ha haʼe oreko chupekuéra itaʼýraramo. Avei umi “ambue ovechakuéra” hekojoja henondépe, ha oiko chuguikuéra Ñandejára amígo (Juan 10:16; Rom. 5:1, 2; Sant. 2:21-25). Pe rreskáte rupive, koʼág̃ama voi ikatu ñaime porã ñande Túa renondépe ha ñasantifika héra. w17.02 2:5, 6