Mayo

Jefté oikuaa Jehová noipytyvõiramo chupe, ndaikatumoʼãiha osalva Israélpe umi ammonítagui. Upévare opromete Jehovápe oipytyvõramo ipuévlope ogana hag̃ua, oofresetaha chupe pe primera persóna osẽva hógagui orresivi hag̃ua chupe. Jefté heʼi oikuaveʼẽtaha Jehovápe upe persónape haʼerõguáicha peteĩ “ofrenda quemada” (Juec. 11:30, 31, TNM). Jefté ndeʼiséi kuri ojukataha pe primera persóna osẽvape orresivi chupe. Haʼe oikuaa porã Jehová ndoipotaiha ojejuka peteĩ persónape ha oñekuaveʼẽ sakrifísioramo (Deut. 18:9, 10). Pe ofrenda quemada haʼe vaʼekue peteĩ rregálo espesiál oñemeʼẽva Jehovápe. Upéicharõ, Jefté opromete omeʼẽtaha Jehovápe peteĩ persóna oservítava chupe pe tavernákulope oikove aja pukukue. Jehová ojerovia Jefté promésare ha oipytyvõ chupe ogana hag̃ua pe gérra (Juec. 11:32). Jefté og̃uahẽvo hógape, itajýra osẽ orresivi chupe. Pe kuñataĩ ningo itajýra peteĩmi ha itúa ohayhueterei chupe. ¿Mbaʼépa ojapóta Jefté? ¿Okumplítapa ipromésa? w16.04 1:11-13

Ndaʼareguasúi ojestudia hague pe lívro Acerquémonos a Jehová la majoría umi kongregasiónpe. Ko lívro oipytyvõ hetaiterei ermánope omombaʼeve hag̃ua umi kualida porãite Jehová orekóva, ha ikatu hag̃uáicha ohayhuve chupe. Avei umi ermáno komentário omokyreʼỹeterei kuri chupekuéra. Umi rreuniónpe ñaaprende avei heta mbaʼe Ñandejára Ñeʼẽgui, ñahendúvo umi diskúrso, pe lektúra de la Biblia ha jahechávo umi demostrasión. Umi rreunión ñanemboʼe avei ñamoĩ hag̃ua en práktika opa mbaʼe ñaaprendéva la Bíbliagui (1 Tes. 4:9, 10). Por ehémplo Ñemañaha Ñehesaʼỹijo ñanemokyreʼỹ ñambaʼapove hag̃ua Jehová servísiope, ñañemboʼe porãve hag̃ua chupe, ha ñaperdona hag̃ua ñane ermanokuérape ofalla jave ñanendive. Umi rreunión jarekóva éntre semána katu ñanemboʼe ikatu hag̃uáicha japredikakuaa, ha ñaipytyvõ umi héntepe oaprende hag̃ua la Biblia omboʼéva (Mat. 28:19, 20). w16.04 3:4, 5

La Biblia omombeʼu oĩ hague unas kuánta persóna iprovléma vaʼekue ótrondi. Oñepyrũre lívro de Génesis oñeʼẽma unos kuántore. Por ehémplo, Caín ipochy vaʼekue Abel rehe ha ojuka chupe (Gén. 4:3-8). Lamec ojuka peteĩ mitãrusúpe oinupã haguére chupe (Gén. 4:23). Abrahán sirvientekuéra oiko vai Lot sirvientekuérandi (Gén. 13:5-7). Agar odespresia Sárape, ha Sara katu ipochy Abrahándi (Gén. 16:3-6). Ismael iprovléma oĩva entérondi, ha entéronte iprovléma avei hendive (Gén. 16:12). ¿Mbaʼéicha rupípa la Biblia oñeʼẽ koʼã mbaʼére? Pórke umi situasión ohasa vaʼekue koʼã persóna ohechaukáta ñandéve mbaʼéichapa ikatu ñambohovái umi provléma ha jaiko pyʼaguapýpe ñande rapichándi. Jaikuaaháicha, ñande ñaneimperfékto ha ikatu avei jahasa umi provléma haʼekuéra ohasa vaʼekue. Oiméramo upéicha, jasegi vaʼerã umi ehémplo porã oĩva la Bíbliape. w16.05 1:1, 2

Jesús ha idisipulokuéra oho vaʼekue opredika hag̃ua umi lugár oĩhárupi hénte, tahaʼe kállere, merkádore, térã umi hénte rogaitépe voi (Mat. 10:11; Luc. 8:1; Hech. 5:42; 20:20). Ohóvo hikuái de kása en kása, ohechauka oĩha dispuésto opredikávo opaichagua persónape. ¿Ha mbaʼépa ojapo umi testígo de Jehová? Haʼekuéra añoite la opredikáva Jesús ogovernamaha áño 1914 guive. Umi Testígo iñeʼẽrendu Jesúspe ha omotenonde pe predikasión. Peteĩ lívrope heʼi: “Umi testígo de Jehová [...] siémpre imanduʼa iñimportanteveha omombeʼu umi héntepe pe fin hiʼag̃uimaha, ha omboʼe chupekuéra mbaʼépa ojapo vaʼerã ojesalva hag̃ua” (Pillars of Faith—American Congregations and Their Partners). Añetehápe, umi testígo de Jehová osegi oipuru umi método Jesús ha idisipulokuéra oipuru vaʼekue opredika hag̃ua. w16.05 2:10, 12

Jadesidi jave Jehovápe ogustaháicha, ñañemoag̃uive hese, ha haʼe ñandeguerohory ha ñanevendesi (Sant. 4:8). Avei ñande fe imbaretevéta. Ha jajepyʼamongetáramo umi mbaʼe jaleévare la Bíbliape, ñantendevéta mbaʼéichapa opensa Jehová. Añetehápe, ñande jasegíta ñaaprende heta mbaʼe Jehovágui (Job 26:14). Ñañehaʼãmbaitéramo koʼág̃ama voi ñaaprendeve Jehovágui, ñanearandúta ha ñandekatupyrýta jadesidi porã hag̃ua (Prov. 2:1-5). Jaikuaaháicha, yvyporakuéra opensáva ha ojaposéva pyʼỹinte okambia, péro Jehová núnka nokambiái. Pe salmísta heʼi vaʼekue: “Jehová odesidíva, osẽ porã katuete ha ndahaʼéi sapyʼaiterãnte. Umi mbaʼe opensáva ojapo ni mbaʼevéicharõ nokambiái” (Sal. 33:11, TNM). Upéicharõ, ikatu hag̃uáicha siémpre jadesidi porã, jaikuaa vaʼerã mbaʼéichapa Jehová opensa ha jajapo vaʼerã umi mbaʼe chupe ogustáva. w16.05 3:17

Jehová ningo la omoag̃uíva ijehe umi persóna ipyʼaporãvape. Upévare ndovaléi jahusga avavépe, tahaʼe ñane ermanokuérape térã umi hénte oĩvape ñande territóriope (Juan 6:44). Ñarrekonoséramo Jehová haʼeha ñande Alfaréro, arakaʼeve nañapensavaimoʼãi ñane ermanokuérare, síno jahechakuaáta Ñandejára osegiha omoldea chupekuéra (Is. 64:8). Jehová oikuaa mbaʼépa haʼekuéra oreko ipyʼapýpe ha iñimperfektoha gueteri hikuái. Avei oikuaa mbaʼeichaite pevépa káda persóna ikatu okambia (Sal. 130:3). ¿Mbaʼéichapa jasegikuaa Jehová ehémplo? Ani ñapensa vai ñane ermanokuérare. Ikatu voi ñambaʼapo Ñandejárandi ha ñaipytyvõ chupekuéra ikatu hag̃uáicha osegi okambia tekotevẽhápe (1 Tes. 5:14, 15). Umi ansiáno koʼytevéntema omoĩ vaʼerã ehémplo koʼã mbaʼépe (Efes. 4:8, 11-13). w16.06 1:4-6

Japredika jave pe marandu porã, jahechauka vaʼerã ñaneumildeha ha jarekoha umi kualida oúva pe espíritu sántogui (Gál. 5:22, 23). Jasegívo Jesús ehémplo, umi hénte ñanerenduseve ha ikatu voi ñandetrata porã japredika jave chupekuéra. Por ehémplo, Austráliape, mokõi Testígo og̃uahẽ opredika peteĩ kuñakaraípe, péro haʼe ipochyeterei ha otrata vai chupekuéra. Upéicharõ jepe, umi Testígo ohendu porãnte chupe. Tiémpo rire, pe kuñakarai ombyasyeterei otrata haguére péicha umi ermánope, ha oskrivi pe sukursálpe: “Ajediskulpase ningo umi mokõi persóna og̃uahẽ vaʼekuéndi ógape. Haʼekuéra ipasiénsia ha cherrespeta, péro che katu cheorgullosaiterei ha amaltrata chupekuéra. Chevyraiterei ningo pórke mokõi persóna oñeʼẽva Ñandejára Ñeʼẽre ou cherendápe, ha che arrechasa chupekuéra”. Ko ehémplo ohechauka iñimportanteha ñaneamávle japredika jave. Jahechaháicha, pe predikasión ovenefisia umi japredikávape ha ñanevenefisia ñandéve, pórke ñanepytyvõ ñamehora hag̃ua. w16.06 2:12, 13

Entéro ningo ñanase imperfékto (Rom. 5:12, 19). Upévare, sapyʼánte peteĩ ermáno ikatu heʼi térã ojapo peteĩ mbaʼe ñanemoñeñandu vaietereíva. ¿Mbaʼépa jajapóta oikóramo upéva? ¿Jasegítapa jahayhu Jehovápe ñande pyʼaite guive? ¿Térãpa ñañemomombyrýta chugui ha iñorganisasióngui? Ñapensamína Elí kásore. Elí haʼe vaʼekue peteĩ saserdóte prinsipál Israélpe, ha oreko mokõi itaʼýra nokumplíriva Jehová Léi. La Biblia heʼi: “Elí raʼykuéra katu iñaña ha ndorrespetái Jehovápe” (1 Sam. 2:12, TNM). Elí ohechakuaa itaʼyrakuéra ndojapoiha iporãva, upéicharõ jepe ndokorrehíri chupekuéra. Tiémpo rire, Jehová okastiga Elí ha itaʼyrakuérape, ha nopermitivéima idesendientekuéra oservi kómo saserdóte prinsipál (1 Sam. 3:10-14). Ñapensamína jaikoha Elí tiémpope ha jahecha itaʼyrakuéra hembiapo vaietereiha, péro haʼe ndokorrehíri chupekuéra. ¿Mbaʼépa jajapóta? ¿Jahejátapa ko situasión omokangy ñande jerovia, ha upéva káusare ndajaservivéi Jehovápe? w16.06 4:5, 6

¿Mbaʼérepa ikatu ñaĩ segúro oñekumplitaha Jesús opromete vaʼekue? Jesús heʼi vaʼekue: “Pende Ru yvagapegua oikuaa voi peẽ peikotevẽha opa koʼã mbaʼe”. Jehová oikuaáma mbaʼépa ñaikotevẽ, ñande jaikuaa mboyve jepe (Filip. 4:19). Por ehémplo, haʼe oikuaáma mbaʼe ao ha tembiʼúpa ñaikotevẽta. Ha oikuaa avei ñande ha ñane família ñaikotevẽha peteĩ lugár jaiko hag̃ua. Upéicharõ, Jehová katuete oñenkargáta jahupyty hag̃ua umi mbaʼe añetehápe ñaikotevẽva. Ikatu ñai segúro haʼe omeʼẽ rasapataha ñandéve umi mbaʼe ñaikotevẽva, jajapóramo opa mbaʼe haʼe oipotáva ha ñamotenondéramo Irréino. Avei, ñaime porãramo Jehovándi javyʼavéta ha ñañekontentáta jarekóma guive jaʼumi ha ñamonde vaʼerã (1 Tim. 6:6-8). w16.07 1:17, 18

Jesús sakrifísio rupive, ikatu ñañemoĩ porã jey Jehovándi. Upéva heʼise ikatuha oiko ñandehegui iñamígo ha ñaime pyʼaguapýpe hendive. Pablo heʼi umi kristiáno unhídope: “Ojeʼémarõ ñanderehe ñanderekojojaha jajerovia rupi, jaikókena pyʼaguapýpe Ñandejára ndive, ñande Ruvicha Jesucristo rupive. Jajerovia rupi Jesús rehe ojavri pe tape Ñandejára ohechauka hag̃ua ñandéve mbaʼeporã ijojahaʼỹva, jahupytýmava voi koʼág̃a” (Rom. 5:1, 2). ¡Ajépa javyʼaite ikatu haguére ñaime porã Jehovándi ha jaiko iñamígoramo! Daniel heʼi vaʼekue umi ára pahápe umi unhído oipytyvõtaha hetápe “ojuhu hag̃ua pe hustísia” (Dan. 12:3). Haʼekuéra opredika pe marandu porã oñeʼẽva pe Rréinore ha omboʼe umi “ambue ovechakuérape” Jehová Léi (Juan 10:16). Péicha oipytyvõ koʼã persónape hekojoja hag̃ua Ñandejára renondépe. Koʼã mbaʼe ojehupyty Ñandejára mbaʼeporã ijojahaʼỹva rupive (Rom. 3:23, 24). w16.07 3:10, 11

Umi ánhel oreko rupi rrelasión sexuál umi kuñándi, ha ifamiliakuéra osẽ tuichaicha, oiko voi chuguikuéra higánte. La Biblia ohenói koʼãvape nefilím. Upe tiémpope, “umi hénte iñaña ha ojapo hetaiterei mbaʼe vai ko yvy ape ári” (Gén. 6:1-5, TNM). Jehová heʼi vaʼekue oguerutaha peteĩ Ama Guasu ohundi hag̃ua umi iñañávape. Noé opredika umi héntepe oavisa hag̃ua chupekuéra mbaʼépa la oikótava. Upévare la Biblia heʼi Noé haʼe hague “peteĩ kuimbaʼe opredikáva umi mbaʼe hekopeguáva” (2 Ped. 2:5). Péro umi hénte nopenái hese. Chupekuéra g̃uarã iñimportanteve pe ñemenda térã umi traváho. Jesús heʼi voi kuri ñane tiémpo ojoguataha avei Noé tiémpope (Mat. 24:37-39). Koʼág̃a ñande jaavisa umi héntepe Jehová ohunditaha ko múndo aña. Péro la majoría nohenduséi pe mensáhe oñeʼẽva pe Rréinore. ¿Mbaʼépa ikatu ñaaprende Noé tiémpope oiko vaʼekuégui? Iporã ningo ñamenda ha ñanefamília, péro ndajahejái vaʼerã koʼã mbaʼe ñandedistrae ha upéva káusare ndajarahavéi enkuénta Jehová ára guasu og̃uahẽmbotaitemaha. w16.08 1:8, 9

Jaiko rupi “umi ára pahápe”, pe situasión ijetuʼu ha hasy jagueropuʼaka hag̃ua (2 Tim. 3:1-5). Péro ikatu hag̃uáicha jajeprotehe, ñañemoag̃uive vaʼerã Ñandejárare. Añetehápe ningo pe téxto koestediaguápe Pablo ndeʼíri hína umi omendáva odeskuida vaʼerãha imatrimónio. Péro jaiko rupi umi ára pahápe, koʼýte iñimportanteve umi kristiáno omendáva omotenonde Jehovápe (Mat. 6:33). Koʼã tiémpo ijetuʼuetévape, heta matrimónio osẽ vai. ¿Mbaʼéichapa umi omendáva ikatu ovyʼa ha osẽ porã? Tekotevẽ oñemoag̃ui Jehováre ha ipuévlore, ojapo vaʼerã la Biblia heʼíva, ha oheja vaʼerã pe espíritu sánto ogia chupekuéra. Ojapóramo hikuái upéicha, ohechaukáta orrespetaha “Ñandejára omoĩ vaʼekue oñondive peteĩ júgo guýpe” (Mar. 10:9). w16.08 2:17, 18

Tekotevẽterei ningo oñembokatupyry hetave ermánope oñangareko hag̃ua kongregasiónre. Pablo heʼi Timotéope: “Oĩ heta hénte heʼikuaáva añeteha umi mbaʼe rehendu vaʼekue chehegui; umi mbaʼe emoĩ umi kuimbaʼe iñeʼẽrendúva kárgope, péicha haʼekuéra ikatupyrýta omboʼe hag̃ua ótrope” (2 Tim. 2:1, 2). Pablo oservi vaʼekue kómo ansiáno ha apóstol, upévare Timoteo oaprende heta mbaʼe chugui. Por ehémplo, oaprende opredikakuaa ha oipytyvõ porãve hag̃ua ermanokuérape kongregasiónpe (2 Tim. 3:10-12). Pablo oipota vaʼekue Timoteo ikatupyry, upévare oñemotiémpo oipytyvõ hag̃ua chupe (Hech. 16:1-5). ¿Mbaʼéichapa ansianokuéra ikatu osegi Pablo ehémplo? Ikatu oinvita umi siérvo ministeriálpe ojapo hag̃ua hendivekuéra visíta de pastoréo. Péicha haʼekuéra ikatupyryvéta oporomboʼe hag̃ua, ipasiensiavéta ha oporohayhuvéta. Avei ohejáta Jehová omboʼe chupekuéra oñangareko porã hag̃ua umi ermánore. w16.08 4:16, 17

La Biblia heʼi avei sapyʼánte peteĩ persónagui ikangyha ijyva térã ipo. Upéva heʼise pe persóna ouha oñedesanima ha operde la esperánsa (2 Crón. 15:7; Heb. 12:12). Jaikuaaháicha, jaiko hína ko múndo añáme oĩva Satanás poguýpe, upévare heta vése jahasa asy. Pyʼỹinte jajepyʼapyeterei rupi, jaju ñañedesanima ha ñanekangy. Haʼete jajepokua ha jajepykuáva, ha ndajaikuaái mbaʼépa jajapóta (Prov. 12:25). ¿Mbaʼérepa sapyʼánte ñañeñandu jepi upéicha? Ikatu ñañeñandu vaieterei omano rupi peteĩ persóna jahayhúva, ñanderasykatu, térã jajepersegi rupi. Ikatu oime ijetuʼu ñane situasión ekonómika, ha ñañehaʼã hína ñamoĩ ñane famíliape umi mbaʼe oikotevẽva. Kon el tiémpo, koʼã mbaʼe ikatu ñanemokangy ha jaju ndajavyʼavéi. Péro ikatu ñaime segúro Jehová oĩha dispuésto ñanepytyvõ hag̃ua (Is. 41:10, 13). w16.09 1:2, 4

Ñaneimperfékto rupi, oime vaʼerã ñañehaʼã hína ani hag̃ua jajapo peteĩ mbaʼe vai ñandestiráva. Oĩ oñehaʼãva ipositivove hag̃ua predikasiónpe, ótro katu oñeñandu haʼeño térã hasykatu. Ha algúnope ijetuʼueterei operdona hag̃ua peteĩ oofende vaʼekuépe chupe. Jaservíramo jepe Jehovápe heta áñorema térã ramónte, entéronte ñañehaʼã vaʼerã ñamboyke umi mbaʼe ikatúva ñandestorva ñande servísiope. Aníkena arakaʼeve ñanderesarái Ñandejára opremiataha umi iñeʼẽrendúvape chupe. Jajerurékena Jehovápe tomeʼẽ ñandéve ijespíritu sánto. Pe orasión ha pe espíritu sánto ñanemombaretéta jajapo hag̃ua iporãva, péicha Jehová ñanevendesíta. Avei, ñañehaʼãmbaite vaʼerã jalee la Biblia káda día, ñañemotiémpo jajapo hag̃ua ñande estúdio personál ha ñande estúdio de família (Sal. 119:32). w16.09 2:10, 11

Ikatu oĩ heʼíva ndéve: “Che aguerovia pe evolusión pórke umi sientífiko heʼi siertoha. ¿Nde piko mbaʼéicha regueroviáta Ñandejára oexistiha, si avave núnka ndohecháiva chupe?”. Heta persóna ningo opensa péicha. Añetehápe ndaipóri umáno ohecháva Ñandejárape, ni haʼe okreárõ guare peteĩ mbaʼe (Juan 1:18). Péro umi oroviáva pe evolusión, ogueroviánte avei peteĩ mbaʼe ndohecháiva. Ni peteĩ sientífiko, ni ótra persóna arakaʼeve ndohecháiva peteĩ ser vívo oevolusionaha. Por ehémplo, ndaipóri ohecháva peteĩ tejúgui oikoha jagua, térã peteĩ kaʼígui oikoha umáno (Job 38:1, 4). Enterovéva ñahesaʼỹijo porã vaʼerã umi mbaʼe ojeʼéva jahecha hag̃ua siértopa, ha jadesidi mbaʼépa jagueroviáta. Romanos 1:20 heʼi: “Ndaikatúiramo jepe ojehecha Ñandejárape, ko múndo ojejapo ypy guive, hembiapokuére umi hénte ikatu ohecha mbaʼeichaguápa haʼe, ohecha ipodér opaʼỹva ha haʼeha Ñandejára, upévare haʼekuéra ndaikatúi onega Haʼe oĩha”. w16.09 4:4

Jehová omeʼẽ vaʼekue léi umi israelítape otrata hag̃ua mborayhúpe umi extranhérope. Por ehémplo, omeʼẽ léi opermitíva umi extranhérope omonoʼõ pe kosécha rembyre (Lev. 19:9, 10). Jehová ndahaʼéi omandánteva umi israelítape orrespeta hag̃ua umi extranhérope, síno oipota avei oñemoĩ ilugarpekuéra (Éx. 23:9). Umi israelita oiko mboyve Egíptope, umi egipcio ndaijaʼéi vaʼekue hesekuéra idiferénte haguére (Gén. 43:32; 46:34; Éx. 1:11-14). Ñandejára puévlo heta ohasa asy vaʼekue tetã ahénope, upéicha rupi Jehová oipota otrata umi extranhérope “peteĩ israelítaicha” (Lev. 19:33, 34, TNM). Jehová ningo nokambiái, koʼag̃aite peve haʼe oñeinteresaiterei umi extranhéro oasistívare rreunionhápe (Deut. 10:17-19; Mal. 3:5, 6). Ñapensamíntena umi mbaʼe ohasáva umi extranhéro. Por ehémplo, ikatu oime nontendeporãi pe idióma térã ojeapoʼi chupekuéra. Upévare, ñanderorýkena hendivekuéra ha ñañehaʼã ñaipytyvõ chupekuéra (1 Ped. 3:8). w16.10 1:3-5

Disípulo Santiago oñeʼẽrõ guare pe fe rehe, heʼi avei: “¿Mbaʼéicha piko rehechaukáta rejeroviaha nderejapóiramo tembiapo iporãva? Che ahechaukáta ndéve che jerovia che rembiapo porã rupive” (Sant. 2:18). Santiago heʼi jarekoséramo fe, ndahaʼéi jakreétanteva Ñandejára oexistiha. Umi demónio jepe oikuaa porã Ñandejára oexistiha, péro ndojeroviái hese. Haʼekuéra opuʼã guei Jehováre (Sant. 2:19, 20). Peteĩ persóna orekóva fe ningo ojapose umi mbaʼe Ñandejára oguerohorýva. Abrahán ojapo vaʼekue upéva. Santiago heʼi hese: “Ñande ru Abrahán oikuaveʼẽ itaʼýra Isaácpe pe altár ári, ha Ñandejára heʼi hese hekojojaha ohecha rire hembiapokue. Nde rehecha haʼe ohechauka hague ijerovia hembiapo rupive, ha hembiapo rupi ojerovia hekoitépe” (Sant. 2:21-23). Upéi Santiago heʼi umi mbaʼe jatopáva pe téxto koestediaguápe. w16.10 4:8

Umi sientífiko oaprende heta mbaʼe pe univérsogui ha ko yvýgui, ha oipuru umi mbaʼe oaprendéva ojapo hag̃ua heta mbaʼe ideprovéchova ñandéve. Péro haʼekuéra ndaikatúi orresponde heta porandu iñimportánteva. Por ehémplo, umi astrónomo ndaikatúi oexplika mbaʼéichapa oñepyrũ vaʼekue ko univérso, térã mbaʼérepa ko planétape oĩ yvypóra, animál ha plánta. La majoría ndaikatúi avei oexplika mbaʼérepa jaikosete opa árare. Heta sientífiko ha ambue tapicha heʼi Ñandejára ndoexistiriha, ha omboʼe hikuái pe evolusión. Upéicha rupi heta hénte ndaikatúi ombohovái umi porandu iñimportantetéva. Péro Ñandejára orresponde koʼã mbaʼe la Biblia rupive. Jehová omoĩ vaʼekue heta léi odomináva ikreasión ha koʼã léi nokambiái. Umi elektrisísta, ploméro, inheniéro, pilóto, siruháno ha ambue tapicha oreko enkuénta koʼã léi ombaʼapo hag̃ua. w16.11 2:4, 5

Heta mbaʼe jareko jaagradese hag̃ua Jehovápe. Haʼe rupivénte jaexisti. Haʼe omeʼẽ avei ñandéve Iñeʼẽ, la Biblia. Ha ojapo haguéicha umi kristiáno Tesalonicagua, ñamombaʼeterei ko rregálo porãite jahechakuaágui haʼeha peteĩ mensáhe oúva Ñandejáragui (1 Tes. 2:13). La Biblia ñanepytyvõ ñañemoag̃ui hag̃ua Jehováre, ha péicha haʼe oñemoag̃ui avei ñanderehe (Sant. 4:8). Jaagradeseterei chupe opermiti haguére ñaime iñorganisasiónpe. Katuete ñañeñandu pe salmísta oñeñandu haguéicha. Haʼe heʼi: “Peagradese Jehovápe pórke haʼe ivuenoiterei. Haʼe siémpre oporohayhu ha ndofallái avavéndi” (Sal. 136:1, TNM). Salmo 136-pe, 26 vése voi ojerrepeti pe fráse “haʼe siémpre oporohayhu ha ndofallái avavéndi”. Upéicharõ, ñandefiélramo Jehovápe ha jajapóramo iñorganisasión heʼíva, jaikóta opa ára g̃uarã ha haʼe siémpre oĩta ñande ykére. w16.11 3:18, 19

Lívro ¿Mbaʼépa ñanemboʼe la Biblia? heta vése osita Romanos 5:12. Jastudia jave ñane famíliandi térã ótra persónandi kapítulo 3,  5 ha 6, oime vaʼerã katuete jalee ko téxto ñamyesakã hag̃ua mbaʼérepa ko yvy ndahaʼéi gueteri peteĩ paraíso, mbaʼérepa tekotevẽ kuri Jesús omano ñanderehehápe, ha mbaʼérepa ñamano. Péro ko versíkulo ikatu avei ñanepytyvõ jaagradese hag̃ua Jehovápe haʼe haguére ñane amígo, jaiko hag̃ua haʼe oipotaháicha ha jasegi hag̃ua ñahaʼarõ oñekumpli ipromesakuéra. Ñambyasýramo jepe, entéronte ñande pekadór ha káda día jajavy. Péro Jehová oikuaa porã ñaneimperfektoha, ha oĩ dispuésto ñaneperdonávo (Sal. 103:13, 14). Jesús omboʼe vaʼekue jajerure vaʼerãha Ñandejárape ñaneperdona hag̃ua (Luc. 11:2-4). Upévare, oiméramo Jehová ñaneperdonáma umi mbaʼe vai jajapo vaʼekuére, ndovaléi jasegi ñañeñandu vai umívare. w16.12 1:1-3

Umi kristiáno Romagua ojepyʼamongeta vaʼerã kuri oikuaa hag̃ua mbaʼérehepa opensa meme oikóvo. Por ehémplo, ¿opensa memépa raʼe hikuái hete rembipotáre? Koʼág̃arupi avei tekotevẽ ñapensa mbaʼépa hína la iñimportantevéva ñandéve g̃uarã. Ñañeporandumína: “¿Mbaʼérehepa ñañeʼẽ meme jepi? ¿Mbaʼépa añetehápe la jajaposevéva?”. Ikatu ñañemeʼẽ enkuénta todo el tiémpo jaikoha ñapensa umi víno ñatanteasévare, mbaʼéichapa jadekorase ñande róga, umi ao jajoguasévare, umi negósio jajaposévare, térã moõpa jahase de vakasión. Añetehápe ningo koʼã mbaʼe ndaivaíri. Oiméne ñanemanduʼa Jesús ojapo hague víno peteĩ kasamientohápe, ha Pablo katu orrekomenda Timotéope hoʼu hag̃ua “michĩmi víno” (1 Tim. 5:23; Juan 2:3-11). Upéicharõ jepe, ndahaʼéi vaʼekue pe víno la iñimportantevéva chupekuéra g̃uarã. ¿Ha mbaʼépa ikatu jaʼe ñandejehe? ¿Mbaʼépa la iñimportantevéva ñandéve g̃uarã? w16.12 2:5, 10, 11

Jesús opromete vaʼekue idisipulokuérape omotenondéramo Ñandejára Rréino, Jehová oipytyvõtaha chupekuéra (Mat. 6:33). Peteĩ vuéltape apóstol Pedro oporandu Jesúspe: “Ore ningo rohejapaite opa mbaʼe ha romoirũ. ¿Mbaʼépa rohupytýta upévare?” (Mat. 19:27). Jesús ndokorrehíri Pédrope oporandu haguére upéva, síno heʼi oñepremiataha chupekuéra ojesakrifika haguére. Umi apóstol ha ambue Ñandejára siérvo iñeʼẽrendúva ogovernáta Jesúsndi yvágape. Péro heʼi avei oñerrekompensataha umi siérvo fiél koʼag̃aguápe. Jesús heʼi: “Opavave oheja vaʼekue hóga, iñermáno ha iñermanakuéra, isy ha itúva, itaʼyrakuérape térã ijyvy, che réra rehehápe, chupekuéra oñemeʼẽta hetaitereive upe oheja vaʼekuégui, ha ohupytýta jeikove opaveʼỹva” (Mat. 19:29). Entéro omoirũva Jesúspe otopáta kongregasiónpe túa, sy, ermáno, ermána, taʼýra ha tajýra. Ha jaikuaaháicha, upéva tuichave mbaʼe oimeraẽ sakrifísio jajapóvagui Ñandejára Rréino rehehápe. w16.12 4:4, 5

Jehová opromete ñandéve heta mbaʼe iporãitereíva. Por ehémplo, opromete omopotĩtaha héra ha ojapotaha hembipota yvágape ha ko yvy ape ári (Mat. 6:9, 10). Ndaipóri ningo ótra kósa iñimportantevéva koʼã mbaʼe ñahaʼarõvagui. Haʼe opromete avei omeʼẽtaha ñandéve jeikove opaveʼỹva, tahaʼe yvágape térã ko yvy ape ári. ¡Javyʼaitereíta oñekumpli vove koʼã mbaʼe! (Juan 10:16; 2 Ped. 3:13). Entéro jaservíva Jehovápe ñañatende vaʼerã mbaʼéichapa haʼe osegíta ñandegia ha ñanepytyvõ koʼã ára pahápe. Heta oĩ ohupytyséva algúna kósa péro noĩri segúro okonsegítapa la ohaʼarõva. Por ehémplo, oĩ oganaséva lotería, péro ndaikatúi oasegura oganataha. Péro umi persóna orekóva fe, ni michĩmi ndodudái oñekumplitaha Jehová promesakuéra. w16.10 3:1, 2

Jehová ñanembokatupyry imbaʼeporã rupi, ha oheja jadesidi mbaʼéichapa jaipurúta umi avilida omeʼẽva ñandéve (Rom. 12:4-8). Jehová oipota jaipuru ñande avilida ñambotuicha hag̃ua chupe ha ñaipytyvõ hag̃ua ótrope. Umi mbaʼe jajapóva Jehová servísiope ikatu okambia kon el tiémpo. Ñapensamína Jesús ohasa vaʼekuére. Ñepyrũrã, haʼe oiko vaʼekue haʼeño Itúandi (Prov. 8:22). Upéi, oipytyvõ Jehovápe ojapo hag̃ua umi ánhelpe, pe univérso ha yvyporakuérape (Col. 1:16). Upe rire Jehová ombou chupe ko yvy ape ári, onase peteĩ mitãraʼýicha ha upéi oiko chugui peteĩ kuimbaʼe okakuaapámava (Filip. 2:7). Omano rire, oho jey yvágape ha oiko jey chugui peteĩ espíritu. Ha áño 1914-pe oñepyrũ ogoverna Ñandejára Rréino (Heb. 2:9). Amo gotyove katu, omohuʼã vove igoviérno de Mil Áño, ontrega jeýta pe Rréino Jehovápe. Upe tiémpo guive “Ñandejára añoite omoakãta opa mbaʼe” (1 Cor. 15:28). w17.01 3:11, 12

Peteĩ kuñataĩ odesidítarõ guare peteĩ mbaʼe, heʼi iñamígope: “Che ndadesidiséi, eréntemana chéve mbaʼépa ajapo vaʼerã”. Pe kuñataĩ oipotave ojeʼe chupe mbaʼépa ojapo vaʼerã, oipuru rangue pe rregálo ijojahaʼỹva omeʼẽva Ñandejára: pe liverta jadesidi hag̃ua. Ha nde, ¿redesidípa ndejehegui, térãpa reheja ótro odesidi nderehe? ¿Mbaʼépa repensa pe liverta jarekóvare jadesidi hag̃ua? Heta oĩ opensáva ndaikatuiha jadesidi ñandejehegui pórke Ñandejára odesidipáma voi mbaʼépa jajapo vaʼerã. Ótro katu heʼi jajapo vaʼerãha la jajaposéva, upéicha añoite jarekoha liverta. Péro, ¿mbaʼépa heʼi la Biblia? Pype omombeʼu Ñandejára omeʼẽ hague ñandéve arandu ha liverta jadesidi porã hag̃ua. w17.01 2:1, 2

David ningo ikatu kuri opensa itaʼýra noĩriha preparádo odirihi hag̃ua pe óvra tuichaitéva. Pe témplo ningo “iporãiterei vaʼerã”, ha Salomón katu “imitã ha naiñexperiénsiai”. Péro David oikuaa Jehová ikatuha ombokatupyry Salomónpe ojapo hag̃ua ko tembiapo iñimportantetéva. Upévare oñehaʼãmbaite oipytyvõ ikatuháicha, por ehémplo oprepara hetaiterei materiál ojepurútava pe konstruksiónpe. Umi ermáno ijedavéva noñedesanimái vaʼerã tekotevẽta jave omeʼẽve rresponsavilida umi imitãmiévape. Jaikuaaháicha, Jehová rembipota iñimportanteve opa mbaʼégui. Upévare, umi iñexperiensiavéva ombokatupyry vaʼerã umi imitãvévape ikatu hag̃uáicha okumpli porã hetave rresponsavilida Jehová organisasiónpe. w17.01 5:8, 9

Jesús ningo la ogovernáva Ñandejára Rréinope, upévare ohundietéta Satanáspe ha oipeʼapaitéta umi provléma oĩva ikáusare. Jesús oipytyvõ idisipulokuérape ontende hag̃ua Ñandejára Rréino iñimportantetereiha. ¿Mbaʼéichapa ojapo upéva? Ojevautisa riremínte oñepyrũma opredika oparupiete “umi marandu porã oñeʼẽva Ñandejára Rréinore” (Luc. 4:43). Avei heʼi idisipulokuérape oikuaauka hag̃ua héra “mombyryvehápe ko yvy tuichakuére” (Hech. 1:6-8). Ñane tiémpope, pe predikasión rupive heta persóna oreko oportunida ontende hag̃ua mbaʼépa añetehápe pe rreskáte, ha mbaʼépa ojapo vaʼerã hikuái oiko hag̃ua Ñandejára Rréino poguýpe. Ñaipytyvõvo umi unhídope opredika hag̃ua umi marandu porã oparupiete ko yvy ape ári, jahechauka hína jaapojaha Ñandejára Rréino (Mat. 24:14; 25:40). w17.02 2:7, 8

Pe Kuérpo Governánte orekóramo jepe autorida kongregasiónpe, haʼekuéra ontende porã Jesús omoakãha chupekuéra. Apóstol Pablo heʼi vaʼekue Cristo omoakãha pe kongregasión (Efes. 4:15). Umi disípulo ndoipurúi vaʼekue peteĩ apóstol iñimportánteva réra ojekuaa hag̃ua chupekuéra upe térarupi, síno “oñehenói ypy vaʼekue kristiáno umi disípulope. Ñandejára voi ombohéra chupekuéra péicha” (Hech. 11:26). Pablo heʼi entéronte osegi vaʼerãha umi enseñánsa bíblica omboʼéva umi apóstol ha ambue kuimbaʼe omoakãva umi kongregasión. Upéicharõ jepe heʼi avei: “Péro aipota peikuaa Cristo omoakãha entéro kuimbaʼekuérape”. Koʼã kuimbaʼe apytépe oĩ avei pe Kuérpo Governánte. Upéi heʼi: “Ñandejára omoakã hína Crístope” (1 Cor. 11:2, 3). Jahechaháicha, Jehová oiporavo Itaʼýra Jesúspe omoakã hag̃ua umi kongregasión. w17.02 4:7

Jahechauka jave ñamombaʼe ha jarrespetaha ñande rapichápe, ñanepytyvõ ani hag̃ua jaju ñapensaiterei ñandejehe ha jasegi hag̃ua ñaneumílde oĩramo ñandeguerohorýva. Avei ñandeprotehe pórke ndajatropesái peteĩ persóna jarrespetáva oúramo ñanedesepsiona. Avei ñanepytyvõ jasegi hag̃ua Jehová organisasión ykére. Ko organisasión ndoikói ombotuichaiterei ni peteĩ yvypórape, tahaʼe Testígo térã nahániri. Jahechauka jave ñamombaʼeha ñande rapichakuérape, ñambovyʼa hína Jehovápe, ha ndaipóri ambue mbaʼe iñimportantevéva upévagui. Avei, péicha jajapóta haʼe omandáva ha jasegíta ñandefiél chupe. Jehová ikatúta ohechauka Satanás ijapuha, pórke haʼe heʼi avave ndaikatuiha ifiél Ñandejárape (Prov. 27:11). La majoría umi hénte oĩva ko múndope ndoikuaái mbaʼeichaite pevépa ohechauka vaʼerã omombaʼeha hapichápe. Péro ñande javyʼaiterei jaikuaa haguére mbaʼéichapa Jehová oipota jarrespeta ha ñamombaʼe ótrope. w17.03 1:13, 20, 21

Jehosafat omokyreʼỹ avei pe puévlope osegi hag̃ua oadora Jehovápe itúa Asá ojapo haguéicha. Avei omondo kuri unos kuánto kuimbaʼépe Judápe, ikatu hag̃uáicha omboʼe pe puévlope “Jehová lívro de la léi” (2 Crón. 17:7-10, TNM). Hiʼarive, oho pe rréino de Israel territóriope, nórte gotyo, umi sérrore oĩva Efraínpe, ikatu hag̃uáicha “omokyreʼỹ umi héntepe oadora jey hag̃ua Jehovápe” (2 Crón. 19:4, TNM). Jehová ningo oipota entéro umi hénte oikóva ko yvy tuichakuére oaprende chugui, ha ñande ikatu ñaipytyvõ upearã. ¿Ñañehaʼãpa ñamboʼe ñande rapichakuérape Ñandejára Ñeʼẽ káda mes, ikatu hag̃uáicha haʼekuéra avei oservi Jehovápe? ¿Ñañemboʼépa Jehovápe ikatu hag̃uáicha ñanevendesi ha ñanepytyvõ ñamoñepyrũ hag̃ua peteĩ estúdio bíblico? ¿Ñaĩpa dispuésto jaipurúvo pe tiémpo ñamboykéma vaʼekue japytuʼu térã jajediverti hag̃ua? Jehosafat oñehaʼã vaʼekue oipytyvõ hetápe oservi jey hag̃ua Jehovápe, ñande avei ikatu jasegi iñehémplo ha ñaipytyvõ umi inaktívope. w17.03 3:10, 11