Junio

Jefté ningo peteĩnte ifamília. Itajýra oservíta pe tavernákulope oikove aja pukukue, ha núnka nomendamoʼãi ni naimembymoʼãi. Upéicha Jefté ndorekomoʼãi ni peteĩ desendiénte orresivítava iñerénsia (Juec. 11:34). Upéicharõ jepe, Jefté heʼi: “Ajapóma peteĩ promésa Jehovápe, ha ndaikatúi apyrũ che ñeʼẽre” (Juec. 11:35, TNM). Ijetuʼúramo jepe, Jefté ohechauka ojeroviaitereiha Jehováre, ha haʼe ovendesi chupe. ¿Rejapónepa nde peichagua sakrifísio? Jajededikárõ guare Jehovápe ñapromete kuri chupe jajapotaha opa mbaʼe haʼe oipotáva, ha ndaiporimoʼãiha ótra kósa iñimportantevéva upévagui. Avei jaikuaáma kuri sapyʼánte ijetuʼutaha ñandéve ñakumpli hag̃ua ñapromete vaʼekue. Péro, ¿mbaʼéichapa ñarreaksiona ojejerure jave ñandéve jajapo hag̃ua peteĩ mbaʼe nañandegustáiva? Nañapensáiramo ñandejehe ha ñaimérõ dispuésto jajapo hag̃ua Jehová oipotáva, jahechaukáta ñakumpliha ñande promésa. Jajesakrifikáramo jepe Jehová rehehápe, upéva ndahaʼéi jey mbaʼeve ñakomparávo umi vendisión jarresivívare (Mal. 3:10). w16.04 1:11, 14, 15

Jesús oipuru espíritu sánto odirihi hag̃ua pe kongregasión. Pe espíritu sánto ñanepytyvõ ani hag̃ua jaʼa umi tentasiónpe, japredika hag̃ua pyʼaguasúpe ha jadesidi porã hag̃ua. Upévare, jajapókena ikatúva guive jaha meme hag̃ua umi rreuniónpe ha jarresivi hag̃ua Ñandejára espíritu sánto. Umi atýpe pyʼỹinte jastudia mbaʼéichapa oñekumpli umi profesía oĩva la Bíbliape. Upéva ñanepytyvõ ñaime hag̃ua segúro Jehová katuete okumplitaha opa mbaʼe oprometéva ñandéve. Ñane ermanokuéra avei ñanemokyreʼỹ, ndahaʼéi umi diskúrso rupivénte, síno okomenta ha opurahéi jave ikorasõite guive umi kántiko (1 Cor. 14:26). Ñañemongeta jave hendivekuéra, tahaʼe oñepyrũ mboyve térã opa rire umi rreunión, haʼete voi ku ñandepiroʼýva japytávo, pórke jahechakuaa jarekoha amígo oñeinteresa añetéva ñanderehe (1 Cor. 16:17, 18). w16.04 3:6, 7

Jesús heʼi vaʼekue isegidorkuéra opredika ha omboʼe vaʼerãha pe marandu porã “oparupiete ko yvy ape ári” (Mat. 24:14). Haʼekuéra oipytyvõ vaʼerã umi hénte “opa tetãyguápe oiko hag̃ua chuguikuéra” Jesús disípulo. Upéva heʼise ko tembiapo ojejapotaha ko yvy tuichakuére. Umi testígo de Jehová añoite okumpli pe profesía Jesús omeʼẽ vaʼekue: opredika pe marandu porã oparupiete ko yvy ape ári. ¿Mbaʼérepa jaʼe upéva? Por ehémplo, Estados Unídospe oĩ 1.200.000 rupi testígo de Jehová, péro oĩ 600.000 líder rrelihiósonte omoakãva diferénte rrelihión upe paíspe. Ko yvy tuichakuére oĩ ménos de 400.000 saserdóte Iglésia Katólika Románape, péro oĩ mas de 8 millón testígo de Jehová opredikáva voluntáriamente 240 paíspe. Péicha jahecha testígo de Jehová añoite opredikaha ko múndo tuichakuére, ha ko tembiapo rupive oñembotuicha Jehovápe (Sal. 34:1; 51:15). w16.05 2:13, 14

La majoría umi hénte oiko iñakãre, ha péicha rupi oĩ heta provléma. Heta persóna opensa orekoha derécho odesidívo mbaʼépa oĩ porã ha mbaʼépa oĩ vai. Haʼekuéra oñemombaʼeguasu, opensa ijehénte, ha siémpre orekose pe primer lugár opa mbaʼépe. Avei nointeresái chupekuéra operhudikáramo ótrope umi mbaʼe odesidíva. Opa umívare ojeiko vaipa (Gén. 3:1-5). Pe Sermón del Móntepe katu Jesús omboʼe vaʼekue idisipulokuérape mbaʼépa ojapo vaʼerã oiko hag̃ua pyʼaguapýpe, sapyʼánte upéva ijetuʼúramo jepe. Por ehémplo, heʼi chupekuéra tekotevẽha ipyʼaporã, oiko pyʼaguapýpe ha oñehaʼã vaʼerãha ani hag̃ua ipyʼaro. Avei heʼi tekotevẽha pyaʼe voi osolusiona iprovlémaramo hapichakuérandi, ha ohayhu vaʼerãha iñenemigokuérape (Mat. 5:5, 9, 22, 25, 44). w16.05 1:4, 5

Jajevautisa mboyve ningo tekotevẽ kuri tuicha ñakambia jaiko hag̃ua la Biblia heʼiháicha. Péro koʼág̃a jasegi vaʼerã ñakambia heta mbaʼépe ikatu hag̃uáicha jajogua Jehová ha Crístope (Efes. 5:1, 2; 1 Ped. 2:21). Por ehémplo, ikatu oime jahechakuaa ñaneexihentetereiha ótrondi, jakyhyje oñepensa vaírõ g̃uarã ñanderehe, ñanechismóso térã jareko ambue defékto. ¿Ijetuʼuetereípa ñandéve ñakambia koʼã mbaʼépe? Ñanemanduʼa vaʼerã jasegiha gueteri ñaneimperfékto (Col. 3:9, 10). Upévare jasegíta jajavy mimi, ojapóramo jepe heta tiémpoma jajevautisa hague. Ikatu voi sapyʼapyʼa ou ñane akãme umi deséo térã pensamiénto naiporãiva, térã ijetuʼu ñandéve ñavense hag̃ua peteĩ devilida. Añetehápe ningo ndaikatumoʼãi voi sapyʼaitépe ñavensepaite umi devilida jarekóva (Sant. 3:2). w16.05 4:3-5

Sapyʼánte oĩ heʼíva: “Chefamília riréma avalorave pe disiplína omeʼẽ vaʼekue chéve che tuakuéra”. ¿Mbaʼérepa oĩ opensáva upéicha? Pórke jakakuaapa riréma ñamombaʼeve pe disiplína, ha upépe ae ñañemeʼẽ enkuénta ñande tuakuéra ñandekorrehi hague ñanderayhu rupínte (Heb. 12:5, 11). Jehová ningo ñanderayhu pórke ñande ifamília. Upéicha rupi ipasiénsia ñandekorrehi ha ñanemoldea hag̃ua. Haʼe oipota jadesidi porã, javyʼa ha jahayhu chupe haʼe ñanderayhuháicha (Prov. 23:15). Jehová ndoipotái jasufri ni ñamano nañañarrepentíri haguére ñande pekádogui (Efes. 2:2, 3). Jaikuaa mboyve Jehovápe, ikatu oime ñande karákter naiporãmbái raʼe. Péro Ñandejára ñanepytyvõ ñakambia hag̃ua ha koʼág̃a tuicha ñamehora (Is. 11:6-8; Col. 3:9, 10). w16.06 1:7, 8

La majoría umi mitã ningo iñumílde ha oaprendese voi heta mbaʼe ipyahúva (Mat. 18:1-4). Upévare tuakuéra oipytyvõ vaʼerã ifamília michĩvape oaprende ha omombaʼe hag̃ua pe añetegua (2 Tim. 3:14, 15). Péro upearã tekotevẽ haʼekuéra voi ohayhu pe añetegua ipyʼaite guive, ha okumpli la Biblia heʼíva. Ojapóramo hikuái upéicha, umi mitãme ifasilvéta ohayhu ha iñeʼẽrendu hag̃ua Jehovápe. Avei haʼekuéra ohechakuaáta orresiviha pe disiplína, Jehová ha ituakuéra ohayhu rupi chupekuéra. Jasegíramo ñaneumílde ha ñaneñeʼẽrendu Jehovápe, haʼe ñandeguerohorýta, Daniélpe oguerohory haguéicha (Dan. 10:11, 19). Jehová siémpre ñanemoldeáta la Biblia, ijespíritu ha iñorganisasión rupive. w16.06 2:14, 17

Jehová ningo oguerohory ha ohayhueterei vaʼekue Davídpe (1 Sam. 13:13). Péro David jepe upéi ou opeka. Peteĩ jey, oñeno peteĩ tembireko ahénondi, hérava Bat-seba. Ko kuñakarai ména haʼe vaʼekue David soldádo, hérava Urías, ha oĩ kuri gerrahápe. Upéi la hembireko opyta hyeguasu Davídgui. David katu ndoipotái avave oikuaa la ojapo vaʼekue. Upémarõ ohenoika Uríaspe omondo hag̃ua chupe hógape. David oipota Urías oreko rrelasión sexuál hembirekóndi. Péicha entéronte opensáta pe mitã túa haʼeha Urías. Péro Urías ndohói hógape. Upémarõ David oñenkarga ikatu hag̃uáicha Urías omano pe gerrahápe. David ha ifamiliakuéra heta osufri haʼe ojapo haguére koʼã mbaʼe vaiete (2 Sam. 12:9-12). Péro Jehová oiporiahuvereko Davídpe ha operdona chupe. Jehová oikuaa porã David ojaposeha la iporãva (1 Rey. 9:4). Jaikórire upe tiémpope, ¿mbaʼéichapa ñarreaksiona vaʼerãmoʼã jaikuaárire David ojapo vaʼekue? ¿Jasegítapa jaservi Jehovápe? w16.06 4:7

Ñande testígo de Jehová ñañatende porã pe adverténsia Jesús omeʼẽ vaʼekuére. Upévare jaikuaa porã jaikoha umi ára pahápe ha saʼíma ofaltaha og̃uahẽ hag̃ua pe “jehasa asy guasu” (Dan. 12:4; Mat. 24:21). Jesús oprofetisa haguéicha, Jehová siervokuéra opredika ko yvy tuichakuére pe marandu porã oñeʼẽva pe Rréinore. Avei haʼe heʼi haguéicha, koʼág̃a jahecha opárupi hetaveha gérra, mbaʼasy, terremóto, ñembyahýi, ha umi hénte iñañaverei ha iviolentoveha. Hiʼarive, pe rrelihión fálsa ohesareapa ha ombotavy umi héntepe (Mat. 24:7, 11, 12, 14; Luc. 21:11). Upévare, ñande jaipotaitereíma Jesús ou ikatu hag̃uáicha okumpli Itúa volunta (Mar. 13:26, 27). Ndajaikuaái ningo arakaʼetépa oñepyrũta pe jehasa asy guasu. w16.07 2:2-4

Jehová imbaʼeporãiterei rupi ikatu ñañemboʼe chupe. Jesús rupive ikatu ñañemboʼe oimeha óra, ha upéva peteĩ priviléhio ijojahaʼỹva. Pablo heʼi vaʼekue: “Haʼe rupive ñande ñañeʼẽ pyʼaguasúpe, ha jajeroviágui hese, kyhyjeʼỹre ikatu ñañemoag̃ui Ñandejárare” (Efes. 3:12). Pablo ñanemokyreʼỹ ñañemboʼe hag̃ua Jehovápe ñaikotevẽ jave ajúda. Haʼe heʼi vaʼekue: “Ñandejára ñandeporiahuverekóta ha imbaʼeporãta ñanepytyvõ hag̃ua ñaikotevẽ jave” (Heb. 4:16b). Upévare, ñaneprovléma jave ikatu jajerure Jehovápe ajúda. Haʼe ipyʼaporã rupi ñanepytyvõ, ndahaʼéiramo jepe iñovligasión. Pyʼỹinte ojevale ñane ermanokuérare upearã. Ñandejára okontesta rupi ñane ñemboʼe, ikatu jaʼe: “Jehová chepytyvõ hína, ndakyhyjemoʼãi, ¿mbaʼe piko ojapóta cherehe peteĩ yvypórante?” (Heb. 13:6). w16.07 3:12, 13

Noé ha umi mbohapy itaʼýra peteĩnte hembireko vaʼekue. Péro pe Dilúvio rire, la majoría umi kuimbaʼe ou hembireko heta. Heta hénte katu hekokyʼaiterei vaʼekue ku mbaʼeveʼỹrõguáicha. Oĩ voi orekóva rrelasión sexuál idioskuéra renondépe oadora hag̃ua chupekuéra. Abrahán ha Sara ovárõ guare Canaánpe, ohecha umi hénte upepegua hekovaiha ha nomombaʼeiha pe matrimónio. Upévare Jehová ohundi kuri Sodoma ha Gomorra. Péro Abrahán idiferentete umi héntegui. Haʼe omoakã porã vaʼekue ifamília. Ha Sara avei ehémplo porã pórke orrespeta iménape (1 Ped. 3:3-5). Abrahán omomenda vaʼekue itaʼýra Isaácpe peteĩ kuña oadorávare Jehovápe. Tiémpo rire, Isaac osegi avei iñehémplo ha omomenda Jacóbpe Jehová siérvare. Umi 12 trívu Israelgua ou Jacob raʼykuéragui. w16.08 1:10

Ko profesía oñekumpli hína koʼã ára pahápe. Por ehémplo, áño 2015-pe oĩma kuri 8.220.105 testígo de Jehová opredikáva oparupiete ko yvy ape ári. Jehová avei oprofetisa vaʼekue: “Che, Jehová, pyaʼe ha hiʼaraitépe ajapóta”. Upéva heʼise jarekovetaha traváho jajapo hag̃ua. ¿Ñañehaʼãmbaitépa hína jajapo opa ikatúva japredika ha ñamboʼe hag̃ua ñande rapichakuérape pe marandu porã? Heta ermáno ha ermána ojapo iprekursorádo rregulár térã auxiliár. Oĩ katu ováva umi lugár oĩvehápe nesesida, térã ombaʼapo jejopýva omopuʼã hag̃ua umi Salón del Reino. Jahechaháicha, entéronte jareko heta mbaʼe jajapo vaʼerã “ñande Ruvicha servísiope” (1 Cor. 15:58). w16.08 3:1, 2

Umi israelita osẽ rire Egipto poguýgui, oataka chupekuéra umi amalequita. ¿Mbaʼépa ojapo umi israelita? Moisés heʼi Josuépe odirihi hag̃ua umi israelítape pe ñorairõme. Upéi Moisés ojupi peteĩ sérrope namombyrýiva chuguikuéra, ha oraha hendive iñermáno Aarón ha ótro kuimbaʼe héravape Hur. Upe guive, ojekuaa porã pe lugár oñeñorairõha. Moisés oikuaáma mbaʼépa ojapóta ikatu hag̃uáicha umi israelita ogana. Haʼe ojagarra pe vastón Jehová omeʼẽ vaʼekue chupe, ha ohupi yvate gotyo. Moisés ohupi aja ijyva, Jehová omombarete umi israelítape ogana hag̃ua ohóvo iñenemigokuérape. Péro Moisés ijyva kaneʼõ jave ha omboguejy la ijyva, umi amalequita ogana. Upémarõ Aarón ha Hur pyaʼe oipytyvõ Moiséspe. La Biblia heʼi mbaʼépa ojapo hikuái: “Ogueru Moiséspe peteĩ ita oguapy hag̃ua hiʼári. Ha oguapy rire upépe, haʼekuéra ojoko Moiséspe ijyva ani hag̃ua omboguejy, ha upéicha oĩ hikuái kuarahy oike peve”. Amo ipahápe, umi israelita ogana, Ñandejára ipyapy mbarete rupi (Éx. 17:8-13, TNM). w16.09 1:5-7

Pablo oĩ segúro ikatutaha ogueropuʼaka idevilida oñemboʼéramo Jehovápe, okonfiáramo haʼe oipytyvõtaha chupe ha ojeroviáramo Jesús sakrifísiore. Ha ñande, ¿ikatútapa jagueropuʼaka avei ñande devilida? Ikatúta jajapo upéva jasegíramo Pablo ehémplo, jajeroviáramo Jesús sakrifísiore ha ñakonfiáramo Jehováre ñande pyʼaite guive, jajerovia rangue ñandejehénte. Sapyʼánte Jehová ikatu opermiti jahasa peteĩ situasión ijetuʼuetereívare, jahechauka hag̃ua jajeroviápa hína hese. Por ehémplo, ¿mbaʼépa jajapóta peteĩva ñane hénte hasyetéramo, térã ojejapo hese peteĩ inhustísia? Ha, ¿mbaʼépa jajapóta oikóramo ñanderehe upéva? Jajeroviáramo Jehováre ñande pyʼaite guive, jajeruréta chupe tañanemombarete ikatu hag̃uáicha jasegi ñandefiél, javyʼa ha ñañemoag̃uive hese (Filip. 4:13). Umi kristiáno yma guare ha koʼag̃agua ehémplo, ohechauka porã ñañemboʼéramo Jehovápe, haʼe katuete ñanemombarete ha ñanembopyʼaguasutaha jasegi hag̃ua ñaaguanta. w16.09 2:14, 15

Síglo primérope pe kongregasión kristiánape oñepresenta kuri peteĩ provléma. Umi judío ótro lugargua oñeʼẽva griego ipochy oñemboyke haguére iviudakuérape. Upémarõ, umi apóstol oiporavo 7 kuimbaʼe osolusiona hag̃ua ko provléma. Entéro umi kuimbaʼe oreko kuri téra griego, amalisia umi apóstol ojapo upéva ikatu hag̃uáicha umi viúda oñeñandu porã hendivekuéra (Hech. 6:2-6). Entérope ningo ñandeafekta ñande kultúra, péro sapyʼánte ndajahechakuaái upéva (Rom. 12:2). Hiʼarive ikatu ñahendu ñane vesíno, ñane kompañéro de eskuéla térã de traváho oapoʼiha umi hénte ótro tetãguápe, térã odespresia chupekuéra ipire kolór diferénte haguére. Upévare iporã ñañeporandumi: “¿Noiméi piko che apensa hína avei haʼekuéraicha? ¿Mbaʼéichapa arreaksiona oĩ jave oñembohorýva che nasionalida térã che kostúmbrere?”. w16.10 1:7, 8

Ñamaña jave pe naturalésare ha ñapensávo hese, jahechakuaa entéro mbaʼénte ojejapo porãiterei hague. “Jajeroviágui jahechakuaa” oĩha peteĩ Apohare, ndajahecháiramo jepe chupe. Ñañemeʼẽ enkuénta iñarandu ha ipyʼaporãitereiha (Heb. 11:3, 27). Ñande ikatu avei ñaaprendeve jaleévo umi sientífiko odeskuvri vaʼekue. Heta mbaʼe haʼekuéra odeskuvríva, oĩ koʼã puvlikasiónpe: vidéo Las maravillas de la creación, umi folléto Obra de un Creador ha El origen de la vida, ha pe lívro ¿Existe un Creador que se interese por nosotros? Heta vése rrevísta ¡Despertad! oentrevista umi sientífikope térã ótra persónape, ha omombeʼu hikuái mbaʼérepa koʼág̃a ojerovia Ñandejárare. Avei, pe seksión “¿Casualidad o diseño?” omyesakã heta mbaʼe umi animál ha pe naturalésagui, ha ohechauka umi sientífiko okopiaha chugui idiséño térã ombaʼapo lája. w16.09 4:4, 5

Hebreos kapítulo 11-pe oñeñeʼẽ umi kuimbaʼe ha kuña yma guare rehe ojeroviaitereíva Jehová promesakuérare. Haʼekuéra nopensái vaʼekue ohotaha yvágape, pórke Jesús ou rire ko yvy ape ári ae heʼi oĩtaha ohóva upépe (Gál. 3:16). Upéva rangue, haʼekuéra oreko esperánsa oikotaha opa árare ko yvy ape ári peteĩ paraísope (Sal. 37:11; Is. 26:19; Os. 13:14). Hebreos 11:13 oñeʼẽ koʼã Jehová siérvo iñeʼẽrendúvare, ha heʼi: “Enterove haʼekuéra ojerovia omano meve, noñemeʼẽiramo jepe chupekuéra umi mbaʼe oñepromete vaʼekue. Péro haʼekuéra ohecha umíva mombyry guive, ha orresivi vyʼápe”. Haʼekuéra oreko vaʼekue esperánsa oikóvo peteĩ múndo pyahúpe, ha oñeimahina voi oikoha upépe. Peteĩva koʼã Ñandejára siérvo haʼe vaʼekue Abrahán. Jesús heʼi kuri Abrahán ovyʼaiterei hague “ohaʼarõgui” og̃uahẽ pe tiémpo (Juan 8:56). Sara, Isaac, Jacob ha hetave persóna iñeʼẽrendúva ohaʼarõ kuri og̃uahẽ pe día Ñandejára Rréino ogoverna vove ko yvy tuichakuére (Heb. 11:8-11). w16.10 3:4, 5

Jehová ñanepytyvõ ijespíritu sánto rupive jaikuaa porã hag̃ua chupe ha Itaʼýrape, ha avei jajerovia hag̃ua hesekuéra (Luc. 10:21). ¿Mbaʼéichapa ikatu jaagradese Jehovápe upévare? Ñamombaʼe vaʼerã pe amista jarekóva hendive Jesús rupive, “pe Mburuvicha ñanepytyvõva jajerovia hag̃ua hekoitépe” (Heb. 12:2). Avei ñañehaʼã vaʼerã jajeroviave. Upearã siémpre ñañemboʼe vaʼerã Jehovápe ha jastudia Iñeʼẽ (1 Ped. 2:2). Ñane rembiapóre ojekuaáta jajeroviápa añetehápe Jehová promesakuérare. Por ehémplo, ñañeʼẽta umi héntepe Ñandejára Rréinore ha ñaipytyvõta chupekuéra omoirũ hag̃ua avei Jesúspe. Upéicharõ, “jajapo memékena iporãva opavave rehehápe, péro koʼýte ñane ermanokuéra rehehápe” (Gál. 6:10). Ñañehaʼã vaʼerã jaipeʼaite ñande “reko tuja” ha umi mbaʼe jajapo vaʼekue yma (Col. 3:5, 8-10). w16.10 4:11, 12

Ñanesorprende ningo jahechávo mbaʼéichapa Jehová oorganisa ko univérso. Haʼe oipota avei ipuévlo oĩ organisádo omombaʼeguasu hag̃ua chupe. Jehová omeʼẽ ñandéve Iñeʼẽ jaikuaa hag̃ua mbaʼéichapa jaadora vaʼerã chupe. Jajapóramo la Biblia ha iñorganisasión heʼíva, javyʼáta ha oho porãta ñandéve. Umi israelita oñeorganisa porã vaʼekue pe Léi Mosáika rupive. Por ehémplo, umi “kuña ombaʼapo pe tavernákulo entrádape, káda uno asegún pe traváho oñemeʼẽ vaʼekue chupekuéra” (Éx. 38:8, TNM). Tiémpo rire, rréi David oorganisa umi saserdóte ha levítape ombaʼapo hag̃ua pe témplope (1 Crón. 23:1-6; 24:1-3). Umi kongregasión síglo primeropegua oñeorganisa porã vaʼekue avei. Pe Kuérpo Governánte odirihi umi kongregasión. Ñepyrũrã ko grúpope oĩ kuri umi apóstol (Hech. 6:1-6). Jehová ogia vaʼekue avei ijespíritu rupive koʼã kuimbaʼépe, oskrivi hag̃ua konsého ha instruksión umi kongregasiónpe (1 Tim. 3:1-13; Tito 1:5-9). w16.11 2:3, 6, 8, 9

Áño 607-pe a.C., rréi Nabucodonosor II Babiloniagua oataka Jerusalén peteĩ ehérsito tuichaitereíva reheve. La Biblia heʼi ko rréi ojuka hague espádape heta kuimbaʼe imitãvape. “Haʼe nombyasýi umi mitãrusu ha mitãkuñáme, umi ijedávape ni umi hasývape”. Upéi, “ohapy Ñandejára añetegua témplo, oity Jerusalén murálla, ohapy umi tórre ha ohundipaite la oĩva” (2 Crón. 36:17, 19, TNM). Heta tiémpore, Ñandejára omondo iprofetakuérape oavisa hag̃ua ipuévlope umi babilonio oatakataha chupekuéra osegínterõ omboyke Iléi. Avei, heta judíope ojejukáta ha umi ojesalváva ojegueraháta Babilóniape. Upéicha rupi, oiméne umi judío noñesorprendéi raʼe Jerusalén oñehundírõ guare. w16.11 4:1, 2

Adán káusare pe pekádo oike ko múndope ha oafekta entéro yvypórape. Upévare la Biblia heʼi: “Peteĩ kuimbaʼe káusare ningo pe ñemano ogoverna”. Péro Jehová ohechauka mbaʼeporã ijojahaʼỹva ha ojapo tekotevẽva guive ikatu hag̃uáicha yvyporakuéra ojesalva “peteĩ kuimbaʼe rupive: Jesucristo” (Rom. 5:12, 15, 17). “Peteĩ kuimbaʼe iñeʼẽrendúgui heta héntere ojeʼéta hekojojaha”. Avei ikatúta ohupyty hikuái “jeikove opaveʼỹva ñande Ruvicha Jesucristo rupive” (Rom. 5:19, 21). Ñapensamína ko mbaʼére: Jehová noĩri vaʼekue ovligádo omeʼẽ hag̃ua Itaʼýra ñanderehehápe. Péro haʼe imbaʼeporã enterovévandi ha ojapo tekotevẽva guive ikatu hag̃uáicha jajei pekádo ha ñemano poguýgui. Ndaipóri ni peteĩva ñandeapytépe omereséva Ñandejára ha Jesús ojapo vaʼekue. ¡Ajépa jaagradesete chupekuéra ñaneperdona haguére, ha omeʼẽ rupi ñandéve esperánsa jaiko hag̃ua pára siémpre! Upévare, jahechaukákena opa mbaʼe jajapóvape ñamombaʼeha Ñandejára mbaʼeporã ijojahaʼỹva. w16.12 1:1, 6, 7

Pablo oavisa porã vaʼekue: “Ñapensa meméramo ñande rete rembipotáre, ñamanóta” (Rom. 8:6). ¿Mbaʼépa heʼise upéva? Ñapensa meméramo ñande rete rembipotáre, ikatu ñañemomombyry Jehovágui ha amo gotyove katu ñamanóta. Péro oiméramo jepe jajapo hína la ivaíva, ikatu ñakambia. Ñanemanduʼamínte pe kuimbaʼe hekovaívare oiko vaʼekue Coríntope ha oñemosẽ vaʼekue kongregasióngui. Ojekorrehi rire chupe, haʼe ou okambia, omboykete umi deséo vai ha oñepyrũ jey oservi Jehovápe tekopotĩme (2 Cor. 2:6-8). Ko kuimbaʼe ojapo kuri “hete rembipota”, upéicharõ jepe ou okambia ha oheja umi mbaʼe vai ojapo vaʼekue oikóvo. Ñane tiémpope, peteĩ kristiáno oñepyrũramo ojapo umi mbaʼe Jehová ndoguerohorýiva, ikatu avei okambia. Umi konsého Pablo omeʼẽva ñanepytyvõkuaa ñakambia hag̃ua tekotevẽhápe. w16.12 2:5, 12, 13

¡Ajépa tuichaite ñandevevýi jahejávo Jehová pópe umi mbaʼe ñandepyʼapýva! Ñande ñaĩ segúro Jehová ojapotaha “hetaitereive mbaʼe jajerure térã ñaimoʼãvagui” (Efes. 3:20). Jahechaháicha, haʼe noprometéi ojapotaha heta mbaʼe ñanepytyvõ hag̃ua, síno “hetaitereive mbaʼe jajerure térã ñaimoʼãvagui”. Jarresivi hag̃ua pe prémio Jehová oprometéva, jajerovia vaʼerã hese ñanekorasõ mbytete guive ha ñaneñeʼẽrendu chupe. Moisés heʼi vaʼekue umi israelítape: “Jehová katuete penevendesíta pe yvy Jehová pende Jára omeʼẽvape peẽme penembaʼerã. Péro upearã pejapopaite vaʼerã opa mbaʼe Jehová pende Jára heʼíva peẽme, ha pekumplipaite vaʼerã koʼã mandamiénto ameʼẽva peẽme koestedía. Jehová pende Jára penevendesíta oprometéma haguéicha peẽme” (Deut. 15:4-6, TNM). ¿Ndépa reĩ segúro Jehová nevendesitaha resegíramo reservi chupe fiélmente? ¡Ajépa ni michĩmi ndajadudái upévagui! w16.12 4:8, 9

Jehová oiporavo vaʼekue umi israelítape oiko hag̃ua chuguikuéra “ipuévlo espesiál”, ha péicha okumpli hag̃ua pe promésa ojapo vaʼekue iñamígo Abrahánpe (Gén. 22:15-18). Jehová odesidi jave peteĩ mbaʼe, siémpre ohechauka oporohayhu ha hekojojaha. Por ehémplo, haʼe ohechauka koʼã kualida okorrehírõ guare umi israelita naiñeʼẽrendúivape. Péro oñarrepenti rire hikuái, haʼe ohechauka ohayhu ha oiporiahuverekoha chupekuéra. Jehová heʼi: “Che amongueráta chupekuéra. Che voi adesidi ahayhutaha chupekuéra” (Os. 14:4, TNM). Jahechaháicha, Ñandejára oipuru pe liverta orekóva oipytyvõ hag̃ua ótrope, ha péicha oheja ñandéve peteĩ ehémplo iporãitereíva. Jehová ojapo umi ánhel ha yvyporakuérape odesidi hag̃ua ijehegui. Ñandejára okrea vaʼekue Jesúspe raẽvete. Ojapo chupe ijoguaháramo, ha omeʼẽ chupe pe liverta odesidi hag̃ua (Col. 1:15). Ou mboyve ko yvy ape ári, Jesús odesidi iñeʼẽrendu Jehovápe, oapoja rangue Satanáspe opuʼãrõ guare Ñandejárare. w17.01 2:3, 4

Sapyʼánte ndaikatuvéi jajapo heta mbaʼe yma guaréicha, térã oñepresenta ñandéve peteĩ oportunida jajapove hag̃ua Jehová servísiope. Ikatu avei ñanemitã, ñandeeda térã ñanderasykatu. Péro Jehová oikuaa porã mbaʼéichapa ñandedeprovechovéta chupe. Haʼe arakaʼeve nohaʼarõi jajapo peteĩ mbaʼe noĩriva ñande posivilidápe. Ñandejára omombaʼeterei opa mbaʼe jajapóva hesehápe. Jesús vyʼápe okumpli vaʼekue umi asignasión Itúa omeʼẽva chupe, ha ñande avei ikatu jajapo upéva (Prov. 8:30, 31). Pe persóna iñumíldeva orrekonose mbaʼépa añetehápe ikatu ojapo. Upévare ovyʼa umi asignasión orekóvare kongregasiónpe. Haʼe ndojesarekói umi ótro ojapóvare, síno ovyʼa umi mbaʼe haʼe ikatúvare ohupyty Jehová organisasiónpe. Peichagua persóna oikuaa porã Jehová haʼeha la omeʼẽva umi rresponsavilida. Avei orrespeta umi ermánope ha oipytyvõ chupekuéra, ha orrekonose Jehová omeʼẽha káda únope peteĩ asignasión kongregasiónpe (Rom. 12:10). w17.01 3:13, 14

Sapyʼánte umi ermáno imitãvéva odirihi koʼág̃a umi tembiapo ojapóva umi ermáno ijedavéva. Upéicharõ jepe, umi imitãvéva oñehaʼã vaʼerã oaprende chuguikuéra. Timoteo ningo imitãiteve vaʼekue apóstol Páblogui, upéicharõ jepe haʼekuéra ombaʼapo oñondive heta áñore. Pablo heʼi umi ermáno Corintoguápe: “Amondo pene rendápe Timotéope, haʼe ningo che raʼy ahayhuetéva, ojapóva hekoitépe ñande Ruvicha rembiapo. Haʼe penemomanduʼáta mbaʼéichapa che ajapo opa mbaʼe aservívo Cristo Jesúspe (1 Cor. 4:17). Ko téxto heʼíva ohechauka Pablo ha Timoteo ombaʼapo porãiterei hague oñondive. Pablo oñemotiémpo omboʼe hag̃ua Timotéope, ha Timoteo oaprende porã chugui. Pablo ojeroviaiterei Timotéore ha oĩ segúro oñangareko porãtaha umi ermáno ha ermána oĩvare Coríntope. Iporãta avei ansianokuéra osegíramo Pablo ehémplo ha ombokatupyry umi kuimbaʼépe oñatende hag̃ua kongregasiónre. w17.01 5:13, 14

Añetehápe Jehová ndoipotái avave omano. Haʼe rupive ningo entéro persóna oikove, upévare omoingove jey vove umi omano vaʼekuépe, Jehová haʼéta Ituakuéra (Sal. 36:9). Ndareíri Jesús heʼi Jehová haʼeha ñande Ru yvagapegua (Mat. 6:9). Jehová oenkarga Jesúspe omoingove jey hag̃ua umi omano vaʼekuépe (Juan 6:40, 44). Upévare Jesús heʼi: “Che hína pe ñemoingove jey ha che rupive oikove jey umi hénte” (Juan 11:25). Jesús heʼi vaʼekue avei: “Oimeraẽ ojapóva Ñandejára rembipota, upéva hína che ermáno, che ermána ha che sy” (Mar. 3:35). Jehová oipota “peteĩ aty guasu avave ndaikatúiva oipapa” oservi chupe. Ko aty guasúpe oĩta persóna oúva opa tetã ha trívugui, ha oñeʼẽva opaichagua idióma. Haʼekuéra ojerovia Jesús sakrifísiore ha iñeʼẽrendu ipyʼaite guive Ñandejárape. Avei ombotuicha chupe ha heʼi: “Pe salvasión ou Ñandejáragui, oguapýva pe trónope ha pe Ovecharaʼy rupive” (Apoc. 7:9, 10). w17.02 2:10, 11

Áño 1884-pe oñeforma pe Zionʼs Watch Tower Tract Society ikatu hag̃uáicha ojepredika diferénte idiómape, ha Charles Taze Russell omoakã upe sosieda. Haʼe ohesaʼỹijo porã la Biblia ha ndokyhyjéi heʼi hag̃ua umi héntepe japuha heta enseñánsa omboʼéva umi rrelihión, por ehémplo pe Trinidad ha pe álma nomanoiha arakaʼeve. Haʼe oaprende Cristo ou vove yvyporakuéra ndohechamoʼãiha chupe, ha avei “pe tiémpo oñemeʼẽva umi tetãme” opaha 1914-pe (Luc. 21:24). Ermáno Russell oipuru itiémpo, imbaretekue ha ipláta omboʼe hag̃ua koʼã mbaʼe umi héntepe. Añetehápe ojekuaa porãiterei Jehová ha Jesús oipuru hague ermáno Rússellpe odirihi hag̃ua umi tembiapo upe tiémpo iñimportantetévape. Ermáno Russell ndoipotái vaʼekue avave ombotuicha chupe. Áño 1896-pe oskrivi ndoipotaiha oñemombaʼeguasu chupe ni umi iñirũnguérape. Koʼã ermáno ndoipotái oñehenói chupekuéra de fórma espesiál, ni ndoipotái peteĩ grúpo ogueraha herakuéra. Ermáno Russell heʼi: “Kóva ndahaʼéi yvypóra rembiapo”. w17.02 4:8, 9

Enterovénte jadesidi vaʼerã heta mbaʼe, sapyʼánte umi mbaʼe iñimportantevéva ha ótro naiñimportanteguasúiva. Upéicharõ jepe, umi mbaʼe jadesidíva, katuete ñandeafekta upéi. Jadesidi porãramo, saʼive ñaneprovlémata ha ñandepyʼaguapýta. Péro jadesidi vaíramo, jaikéta heta akãrasýpe ha jajeperhudikáta. ¿Mbaʼépa ñanepytyvõta jadesidi porã hag̃ua? Tekotevẽ jajerovia Ñandejárare, ha ñaime vaʼerã segúro haʼe ñanepytyvõse ha ñanemoaranduseha ikatu hag̃uáicha jadesidi porã. Avei jajerovia vaʼerã la Bíbliare ha umi konsého jatopávare pype (Sant. 1:5-8). Amáske ñañemoag̃ui Jehováre ha jahayhu Iñeʼẽ, ñaimevéta segúro haʼe oikuaaha mbaʼépa iporãve ñandéve g̃uarã. Upéva ñanepytyvõta jahecha hag̃ua mbaʼépa heʼi la Biblia jadesidi mboyve peteĩ mbaʼe. w17.03 2:2, 3

Ojapo haguéicha itúa Asá, Jehosafat ojerovia vaʼekue Jehováre peteĩ ehérsito tuicháva oatakátarõ guare Judá (2 Crón. 20:2-4). Haʼe okyhyje kuri, upémarõ ojerure Jehovápe ajúda. Oñemboʼérõ guare orrekonose haʼekuéra ndaikatumoʼãiha ipuʼaka iñenemigokuérare, avei heʼi haʼe ha pe puévlo ndoikuaaiha mbaʼépa ojapóta. Jehosafat ni michĩmi ndodudái Jehová ikatuha oipytyvõ chupekuéra. Haʼe heʼi vaʼekue jaleéva pe téxto koestediaguápe. Oiko haguéicha Jehosafat rehe, sapyʼánte ikatu jahasa peteĩ provléma ha ñañepyrũ jakyhyje pórke ndajaikuaái mbaʼépa jajapóta (2 Cor. 4:8, 9). Péro ani ñanderesarái Jehosafat ojapo vaʼekuégui. Haʼe oñemboʼe kuri pe puévlo renondépe ha omombeʼu Jehovápe mbaʼeichaitépa oñedesanima hikuái (2 Crón. 20:5). Iporãta umi omoakãva hogapy osegíramo Jehosafat ehémplo. Ojerurekuaa Jehovápe toipytyvõ chupe ha ifamíliape ogueropuʼaka hag̃ua umi situasión ijetuʼúva, ha oikuaa hag̃ua mbaʼépa ikatu ojapo hikuái. Umi omoakãva hogapy notĩri vaʼerã oñemboʼe hag̃ua hogayguakuéra rovake. Péicha ifamília ohechakuaáta mbaʼeichaitépa ojerovia Jehováre. Ñandejára ningo oipytyvõ vaʼekue Jehosafátpe, ha katuete penepytyvõta avei peẽme. w17.03 3:12, 13