Julio

Jefté rajy ohechauka ojeroviaitereiha Ñandejárare. Oiméne haʼe katuete omendase ha imembyse rakaʼe, péro omboyke koʼã mbaʼe oservi porã hag̃ua Jehovápe. ¿Ikatúpa ñande avei jajesakrifika Jehová rehehápe? ¿Mbaʼéichapa ikatu jasegi Jefté ha itajýra ehémplo? Heta Testígo imitãva odesidi nomendái térã naifamíliai, por lo ménos peteĩ tiémpore. ¿Mbaʼérepa? Odedikave hag̃ua tiémpo Jehová servísiope. Heta ermáno ijedavéva katu oipurupa rangue itiémpo ifamília ha inietokuérandi, omboyke avei tiémpo oipuru hag̃ua Jehová servísiope. Oĩ avei ermáno oipytyvõva oñemopuʼã hag̃ua Salón del Reino. Ótro katu oho Eskuéla Oñembokatupyryve hag̃ua umi Opredikávape ha upéi ova ótra kongregasión oñekotevẽvehápe opredika vaʼerã. Heta oĩ avei omohenda porãva itiémpo ikatu hag̃uáicha opredikave. Jehová ningo arakaʼeve ndahesaraimoʼãi umi sakrifísio ojapóvagui koʼã ermáno (Heb. 6:10-12). Ha nde, ¿reimépa dispuésto rejapóvo sakrifísio reservive hag̃ua Jehovápe? w16.04 1:16, 17

Jesús oñekompara vaʼekue peteĩ pastór rehe ha okompara idisipulokuérape peteĩ ovecha atýre. Ñapensamína: Ñamoĩ chupe oĩha 5 ovecha. Mokõi oĩ peteĩ kámpope, ótro mokõi katu oĩ ótro hendápe, ha peteĩmi oĩ haʼeño ótro ládo. ¿Jaʼétapa koʼã 5 ovecha haʼeha peteĩ ovecha atýnte? Nahániri, pórke peteĩ ovecha aty oĩ vaʼerã oñondivepa ha osegi vaʼerã ipastórpe. Péicha avei, ñande ñaime vaʼerã ñane ermanokuérandi, ha upearã jaha vaʼerã rreunionhápe. Tekotevẽ ñañerreuni ñane ermanokuérandi ikatu hag̃uáicha oiko ñandehegui peteĩ “ovecha aty” ha jasegi peteĩ ‘ovecharerekuápe’. Ñane rreunionkuéra ñanepytyvõ ñaime hag̃ua unído, oĩháicha unído peteĩ família ojoayhúva (Sal. 133:1). Oĩ ningo heta ermáno orekóva ihénte oñemoĩva hesekuéra oservi rupi Jehovápe. Péro Jesús opromete vaʼekue omeʼẽtaha chupekuéra peteĩ família ohayhúva ha oñangarekóva hesekuéra (Mar. 10:29, 30). Jaha memérõ rreunionhápe, ikatu hína oiko ñandehegui peteĩ túa, sy, ermáno ha ermána koʼãichagua ermáno espirituálpe g̃uarã. Ñapensávo koʼã mbaʼére jajapose ikatúva guive ani hag̃ua jajavy ni peteĩ rreunión. w16.04 3:9, 10

Ñande ningo ñamombaʼeguasu Jehovápe ñañemboʼévo, japredikávo ha jaha jave rreunionhápe. Péro koʼã mbaʼe ndoservimoʼãi ñandéve nañasolusionáiramo umi provléma jarekóva ñane ermánondi. Ndaikatumoʼãi jaiko Jehová amígoramo nañaperdonáiramo ñande rapichápe ofalla jave ñanendive (Luc. 11:4; Efes. 4:32). Jehová oipota isiervokuéra oporoperdona ha ojogueraha porã opavavéndi. Upévare iporã ñañeporandu: “¿Ijetuʼúpa chéve aperdona hag̃ua che ermánope? ¿Lomímontepa avyʼa oĩramo che ypýpe pe persóna cheofende vaʼekue?”. Oiméramo ñañemeʼẽ enkuénta tekotevẽha ñaporoperdonakuaa, jajerure vaʼerã Jehovápe tañanepytyvõ ñamehora hag̃ua. Haʼe katuete ohendúta ñane ñemboʼe ha ñanepytyvõta (1 Juan 5:14, 15). w16.05 1:6, 7

¿Arakaʼe pevépa japredika vaʼerã? Jesús heʼi vaʼekue pe marandu porã ojepredika vaʼerãha og̃uahẽ meve “pe ára pahaite”. Ñande testígo de Jehová jasegi japredika koʼã ára pahápe, ijetuʼúramo jepe. Ha ikatu jajapo upéva Jehová espíritu sánto ñanepytyvõ rupi (Hech. 1:8; 1 Ped. 4:14). Heta persóna rrelihiósa heʼi: “Peẽ pesẽ pepredika, péro ore hína la roguerekóva pe espíritu sánto”. Péro, ¿siértopa upéva? Ñapensamína: ¿Ikatútapa jasegi japredika koʼã ára pahápe nañanepytyvõirire pe espíritu sánto? Ni mbaʼevéicharõ. Heta rrelihión ningo oñehaʼãma opredika ojapoháicha umi testígo de Jehová, péro sapyʼaitépe ojedeha jey hikuái. Ótro katu osẽ opredika, péro peteĩ tiémporente. Oĩ avei umi ohóva de kása en kása, péro noñeʼẽi hikuái Ñandejára Rréinore. Opa umívare ikatu jaʼe koʼã persóna ndojapoiha pe tembiapo Jesús omanda vaʼekue. w16.05 2:13, 16

Apóstol Pablo heʼi vaʼekue: “Pehejaite vaʼerã pende reko tuja ha umi mbaʼe pejapo vaʼekue yma. Umi mbaʼe pejaposéva ha pendegueraháva tape vaíre ombyaíma pende reko tuja. Akóinte pembopyahu vaʼerã pepensa lája, ha pemonde vaʼerã pe teko pyahu ojejapo vaʼekue Ñandejára oipotaháicha ha oñemopyendáva tekojoja ha jerovia teetépe” (Efes. 4:22-24). Pe fráse “akóinte pembopyahu vaʼerã”, heʼise siémpre tekotevẽtaha ñañehaʼã ikatu hag̃uáicha ñakambia ha ‘ñamonde pe teko pyahu’. Upévare, oiméramo jepe are guivéma jaservi Jehovápe, lomímonte jasegíta ñaaprende chugui heta mbaʼe iporãitereíva. La Biblia ikatu ñanepytyvõ ñakambia hag̃ua, ha amás día jasegi porãve hag̃ua iñehémplo. w16.05 4:8, 9

Ñane tiémpope, Jehová ojevale peteĩ paraíso espirituál rehe ikatu hag̃uáicha ñanerekomboʼe ha ñanemoldea (Is. 64:8). Ko paraísope ñañeñandu segúro, jaikóramo jepe peteĩ múndo añáme. Ha iñimportanteveha katu, jaikuaa Jehovápe ha ñañandu haʼe ñanderayhuha (Sant. 4:8). Pe múndo pyahúpe ñañevenefisia porãvéta pe paraíso espirituálgui. Avei jadisfrutáta peteĩ yvy iporãitereívape Ñandejára Rréino poguýpe. Upe tiémpope, Jehová osegíta ñanemoldea ha ñanerekomboʼe ñaimoʼãʼỹháicha (Is. 11:9). Upépe ñandeperféktotama, ha ifasilvétama ñandéve ñaaprende Ñandejáragui ha ñaneñeʼẽrendu chupe opa mbaʼépe. Opa umívare, jahejákena Jehová tañanemoldea. Jahechaukákena chupe jaagradeseha ñanderayhu haguére peichaite peve. w16.06 1:8, 9

Áño 1473-pe a.C., Moisés oñeʼẽ vaʼekue umi isrraelítape ojedespedi hag̃ua chuguikuéra, ha omensiona umi mbaʼe oĩva Deuteronomio 6:4-pe. Upérõ umi isrraelíta oĩ kuri Moábpe okrusa hag̃uáichama pe rrío Jordán ha ojagarra hag̃ua pe Tiérra Prometída (Deut. 6:1). Moisés odirihíma pe puévlope 40 áñore. Ha koʼág̃a omokyreʼỹse chupekuéra ikatu hag̃uáicha ipyʼaguasu, ojerovia Jehováre ha iñeʼẽrendu chupe. ¿Mbaʼérepa? Pórke oikuaa ohasataha hikuái heta provléma ijetuʼúva. Upévare, Moisés omeʼẽ rire chupekuéra umi Diez Mandamiénto ha unos kuánto Léi, haʼe omomanduʼa chupekuéra peteĩ mbaʼe iñimportantetereíva oĩva Deuteronomio 6:4, 5. Umi isrraelíta ningo oikuaa voi Jehová ‘peteĩnteha’. Haʼekuéra oadora vaʼekue peteĩ Dióspente, ojapo haguéicha iñantepasadokuéra. w16.06 3:2, 3

Jesús heʼi vaʼekue koʼã mbaʼe oĩrõ guare ko yvy ape ári. Haʼe hína upe odirihítava pe Armagedón, upévare ikatu jaʼe haʼe koʼág̃a oikuaamaha arakaʼépa oñepyrũta ko gérra (Apoc. 19:11-16). Péro ñande ndajaikuaáiti mbaʼe día ni mbaʼe órapa og̃uahẽta pe fin. Upévare iñimportanteterei ñañatende porã. Jehová odesidíma arakaʼépa oñepyrũta pe gran trivulasión, ha upe día hiʼag̃uimbaitéma. La Biblia heʼi voi: “Upe día nog̃uahẽmoʼãi tárde” (Hab. 2:1-3). ¿Mbaʼérepa jaʼekuaa siertoha upéva? Umi mbaʼe Jehová heʼíva oikotaha, siémpre oñekumpli itiempoitépe. Haʼe opromete osalvataha isiervokuérape pe gran trivulasiónpe, ha omeʼẽtaha chupekuéra vída etérna pe múndo pyahúpe. Upéicharõ, ikatu ñaĩ segúro haʼe katuete okumplitaha ipromésa. Upévare, jaikoséramo pe múndo pyahúpe, tekotevẽterei ñaĩ alérta. w16.07 2:4-6

Peteĩ jey Pedro opromete vaʼekue arakaʼeve ndohejamoʼãiha Jesúspe, umi ótro ojapóramo jepe upéva (Mar. 14:27-31, 50). Péro ojejagarra rire Jesúspe, entéro umi apóstol oheja rei chupe, ha Pedro jepe oavandona chupe. Upéi tres vése voi oasegura ndoikuaaiha Jesúspe (Mar. 14:53, 54, 66-72). Péro Pedro oñeñandu vaieterei la ojapo vaʼekuére ha oñarrepenti. Upévare Jehová operdona chupe ha upéi oheja ikárgope heta rresponsavilida. Ñande jaikórire upe tiémpope, ha ñahendu la Pedro ojapo vaʼekue, ¿jasegítapa jajerovia Jehováre? ¿Ñanemanduʼáta Jehová oiporiahuverekoha pe persónape, ha omeʼẽnteha chupe tiémpo ikatu hag̃uáicha oñarrepenti? Péro pe ofalla vaíva noñarrepentíriramo, ¿ñakonfiátapa Jehová ohechaha opa mbaʼe oikóva, ha itiempoitépe osolusionataha pe situasión? Tekotevẽramo Jehová ikatu hína omosẽ kongregasióngui pe persóna noñarrepentírivape. Upéicharõ, ñakonfia vaʼerã Jehová katuete ojapotaha la oĩ porãvéva. w16.06 4:8, 9

Ñandejára imbaʼeporãiterei rupi ñanendive, ñanekonsola jahasa jave peteĩ mbaʼe ijetuʼuetereíva ha ñanekevrantáva (Sal. 51:17). Ojepersegírõ guare umi kristiáno Tesalonicaguápe, Pablo oskrivi chupekuéra la jatopáva pe téxto koestediaguápe. ¡Ajépa javyʼaite Jehová ñanekonsola ha ojepyʼapy haguére ñanderehe! Ñande ningo pekadór, ha Jehová reheʼỹ ndajarekomoʼãi esperánsa (Sal. 49:7, 8). Péro haʼe omeʼẽ ñandéve peteĩ esperánsa iporãitereíva. ¿Mbaʼépa hína upéva? Jesús heʼi vaʼekue: “Che Ru oipota opavave oikuaáva pe Taʼýrape ha ojeroviáva hese, oikove opa ára g̃uarã” (Juan 6:40). Upéicharõ, Jehová imbaʼeporã rupi, jareko esperánsa jaikove hag̃ua opa árare. Pablo heʼi vaʼekue avei: “Ñandejára ohechauka imbaʼeporãitereiha omeʼẽvo salvasión opaichagua tapichápe” (Tito 2:11). w16.07 3:14, 15

Ñandejára puévlo ningo ndoaseptái umi otraisionáva iména térã hembirekópe. Péro ñapensamína peteĩ kristiáno omendáva oñentremeteha ótra persónare. Upéi ou ojedivorsia hembirekógui ha omenda pe ótrare. Koichagua ermáno noñarrepentíriramo, oñemosẽta kongregasióngui ikatu hag̃uáicha ipotĩ Ñandejára puévlo (1 Cor. 5:11-13). Ha ovolvese jeýramo kongregasiónpe, ohechauka vaʼerã oñarrepentiha ipyʼaite guive (Luc. 3:8; 2 Cor. 2:5-10). ¿Mboy tiémpopa ohasa vaʼerã ikatu hag̃uáicha ovolve jey Jehová puévlope? Ndaikatúi ñamoĩ peteĩ tiémpo espesífiko. Péro ikatu ohasa uno, dos térã hetave áño pe pekadór ohechauka hag̃ua oñarrepentiha, ha upéi ae ojeasepta jey chupe kongregasiónpe. Upéicharõ jepe, upéi oñemboʼýta “Ñandejára trivunál renondépe” (Rom. 14:10-12). w16.08 1:12, 13

Apóstol Pablo oguerohory vaʼekue umi ermáno oñehaʼãmbaitévape ohupyty priviléhio kongregasiónpe. Umi mbaʼe heʼíva ñanemopensa peteĩ persóna oñehaʼãmbaitévare ojagarra álgo oĩva mombyry chugui, ha upearã oipysopaitéva ijyva. Por ehémplo, ñapensami peteĩ ermáno oserviseha kómo siérvo ministeriál. Haʼe ohechakuaa tekotevẽha oñehaʼãve omehora hag̃ua kómo kristiáno. Ñamoĩ chupe ko ermáno omehoraha heta mbaʼépe, ha oñenombra chupe siérvo ministeriál. Upéva ndeʼiséi noñehaʼãvéima vaʼerãha, síno osegi vaʼerã omehora ikatu hag̃uáicha okumpli umi rrekisíto ha oiko chugui ansiáno. Heta ermáno oñehaʼãmbaite okambia tekotevẽhápe, ku “oipysorõguáicha ijyva”, ikatu hag̃uáicha oservi porãve Jehovápe. Por ehémplo, ikatu hína oĩ oserviséva de prekursór, ombaʼaposéva Betélpe, térã oipytyvõséva omopuʼã ha omyatyrõ hag̃ua Salón del Reino. w16.08 3:3, 4

Nehemías ohórõ guare Jerusalénpe, ohecha mbaʼéichapa iñenemigokuéra ótro paisgua oamenasa umi judíope ani hag̃ua osegi omopuʼã Jerusalén murálla. Pe siuda ningo ndojeprotehéi, ha umi judío katu oñedesanimaiterei. Péro, ¿mbaʼéichapa oñeñandu Nehemías? ¿Oñedesanimápa avei? Nahániri. Moisés, Asá ha ótro Ñandejára siérvo yma guare ojapo haguéicha, Nehemías ojerovia Jehováre. Nehemías oñemboʼe ha ojerure ajúda Jehovápe, ha haʼe ohendu chupe (Éx. 17:8-13; 2 Crón. 14:8-13). Ñandejára oipuru “ipodér” omombarete hag̃ua umi judíope (Neh. 2:17-20; 6:9). Ha ñande, ¿jajeroviápa Jehová oipuruha koʼág̃a “ipodér” ñanemombarete hag̃ua? w16.09 1:9

Holándape, osẽ vaʼekue peteĩ diáriope mbaʼéichapa oñemonde umi líder rrelihióso oho jave irreunionkuérape. Avei omombeʼu umi líder rrelihióso apytépe heta oĩha oñemondéva chupekuéra ogustaháichante, koʼýte haku rupi. Ko diáriope oñeñeʼẽ avei umi testígo de Jehováre, ha heʼi haʼekuéra oñemonde porãha oho jave iñasambleahápe. Pyʼỹinte ningo testígo de Jehovápe ojeguerohory oñemonde lájare. Apóstol Pablo heʼi vaʼekue entéro kristiánope “toñemonde hekópe ha taiñakãguapy”, pórke péicha ojapo vaʼerã oservíva guive Ñandejárape (1 Tim. 2:9, 10). Ko konsého osegi vaʼerã avei kuimbaʼekuéra, Pablo oñeʼẽramo jepe kuri kuñanguérare. Entéro jaservíva Jehovápe ñañehaʼã ñañemonde hekópe, pórke jaikuaa chupe g̃uarã iñimportantetereiha upéva (Gén. 3:21). Ñandejára ningo pe orekóva derécho heʼi hag̃ua ñandéve mbaʼépa jajapo vaʼerã, ha Iñeʼẽme omombeʼu mbaʼéichapa oipota ñañemonde. Upévare, jaiporavóta jave mbaʼépa ñamondéta, ñapensa vaʼerã mbaʼépa ogusta Jehovápe. w16.09 3:1, 2

Oĩ persóna ostudiasetereíva umi profesía bíblica. Ótro katu okompara la Biblia heʼíva umi sientífiko, arkeólogo ha istoriadorkuéra heʼívare. Epensamína Génesis 3:15-re. Jehová omeʼẽ kuri ko profesía iñimportantetéva Adán ha Eva opuʼãrõ guare hese ha igoviérnore. Kóva haʼe pe primera profesía omombeʼúva Ñandejára Rréino ohechaukataha Jehová añoite ogoverna vaʼerãha ko univérso. Avei, ko profesía ohechauka pe Rréino rupive ojepeʼapaitetaha umi sufrimiénto. ¿Mbaʼéichapa ikatu restudia Génesis 3:15 heʼíva? Ñepyrũrã eanota umi ótro téxto omombeʼúva algún detálle ko profesíagui. Upéi einvestiga arakaʼépa ojeskrivi umi versíkulo, ha emoĩ en órden. Rejapóvo péicha, rehechakuaáta umi eskritór bíblico ndoikói hague la mísma épokape. Upéicharõ jepe, káda uno oipytyvõ hesakãve hag̃ua ohóvo upe profesía. Rejapo rire koʼã mbaʼe, rehechakuaáta Jehová oipuru hague ijespíritu sánto ogia hag̃ua umi eskritórpe. w16.09 4:8

Peteĩ tiémpope, apóstol Pedro omboyke vaʼekue umi ndahaʼéivape judío. Péro upéi, okambia ohóvo mbeguekatúpe (Hech. 10:28, 34, 35; Gál. 2:11-14). Ñande avei ñañehaʼã vaʼerã ñakambia oimérõ jahechakuaa ñañepyrũha jaapoʼi ñande rapichápe, térã ñanefanatikoitereírõ ñane retãre (1 Ped. 1:22). ¿Mbaʼépa ikatu ñanepytyvõ? Siémpre jaraha vaʼerã enkuénta ñaneimperfektoha, ha tahaʼe haʼéva pe país ñanase hague, ñanemanduʼa vaʼerã avave nomereseiha ojesalva (Rom. 3:9, 10, 21-24). Upévare, ani ñaimoʼã ñaneimportanteveha ótrogui. Ñapensa vaʼerã apóstol Pablo opensa haguéicha. Haʼe heʼi vaʼekue umi kristiáno ndahaʼeveimaha “extráño ni arrivéño”, síno haʼeha Ñandejára família (Efes. 2:19). Upévare, jahechakuaárõ ñañepyrũha jadespresia ñande rapichápe, tekotevẽ ñakambiaite, péichamante jahechaukáta ñañemondeha pe “teko pyahúgui” (Col. 3:10, 11). w16.10 1:9

¿Mbaʼépa ñanepytyvõta jajeroviave hag̃ua? Jehová omeʼẽ ñandéve la Biblia. Pype jatopa mbaʼépa jajapo vaʼerã ikatu hag̃uáicha javyʼa. Upévare, iporãta jaleéramo la Biblia káda día ha jasegi umi konsého oĩva pype (Sal. 1:1-3; Hech. 17:11). Jehová avei omeʼẽ ñandéve “hiʼupy hiʼoraitépe” pe “tembiguái jeroviaha ha iñarandúva” rupive (Mat. 24:45). Umi Ñandejára siérvo yma guare ojapo haguéicha, ñande avei tekotevẽ jalee meme umi promésa Jehová ojapo vaʼekue, ha jajepyʼamongeta umívare. Upéva ñanepytyvõta siémpre ñaneñeʼẽrendu hag̃ua chupe, ha jasegi hag̃ua ñahaʼarõ Irréino ogovernátava ko yvy tuichakue (Heb. 11:1). ¿Mbaʼépa oipytyvõ umi Ñandejára siérvo yma guarépe ojeroviave hag̃ua? Haʼekuéra ojerure vaʼekue ajúda Jehovápe, ha ohecha mbaʼéichapa haʼe ombohovái chupekuéra iñemboʼe (Neh. 1:4, 11; Sal. 34:4, 15, 17; Dan. 9:19-21). w16.10 3:7, 8

Jesús heʼi vaʼekue jahayhu vaʼerãha Jehovápe, pórke péva haʼe “pe mandamiénto tuichavéva oĩva pe Léipe” (Mat. 22:35-40). Heta vése umi eskritór bíblico oñeʼẽ jave pe mborayhúre omensiona avei pe fe. Upéva ohechauka la Bíbliape iñimportantetereiha koʼã mokõi kualida. Pablo omokyreʼỹ vaʼekue umi kristiánope omoʼã hag̃ua ipytiʼa “jerovia ha mborayhúpe” (1 Tes. 5:8). Ha Juan heʼi Ñandejára omanda hague jajerovia vaʼerãha “Itaʼýra Jesucristo rérare, ha jajoayhu vaʼerã haʼe omanda haguéicha ñandéve” (1 Juan 3:23). Péro Pablo avei heʼi: “Koʼág̃a opyta koʼã mbohapy mbaʼe: jerovia, esperánsa ha mborayhu; ha pe tuichavéva koʼãvagui haʼe hína mborayhu” (1 Cor. 13:13). Pablo heʼi iñimportanteveha pe mborayhu, pórke koʼẽrõite natekotevẽmoʼãvéima jajerovia Jehová promesakuérare oñeʼẽva pe múndo pyahúre. Upérõ g̃uarã jaikótama peteĩ paraísope, la Biblia opromete haguéicha. Péro siémpre tekotevẽta jahayhu Ñandejárape ha ñande rapichápe. w16.10 4:15-17

Síglo primérope oĩ vaʼekue ermáno ovisitáva umi kongregasión. Haʼekuéra omombeʼu umi ermánope “mbaʼépa odesidi raʼe umi apóstol ha ansiáno oĩva Jerusalénpe”, haʼéva hína pe Kuérpo Governánte (Hech. 16:4). Umi kongregasión osegi umi instruksión, ha péicha rupi “ojerovia mbareteve ha oñemboheta hetave koʼẽ koʼẽre”. ¿Mbaʼépa jajapo vaʼerã jarresivi jave instruksión Jehová organisasióngui? La Biblia heʼi ñaneñeʼẽrendu vaʼerãha (Deut. 30:16; Heb. 13:7, 17). Umi ifiélva orrespeta Jehovápe ha ndojekehái orresivi jave peteĩ instruksión. Ñande ningo ndajajoguaséi Diótrefespe. Haʼe ndorrespetái vaʼekue umi omoakãvape kongregasión (3 Juan 9, 10). Jasegi jave umi instruksión, ñaipytyvõ hína oĩ hag̃ua pyʼaguapy ha unida kongregasiónpe. Entéronte iporã ñañeporandu: “¿Amokyreʼỹpa ermanokuérape iñeʼẽrendu hag̃ua Jehovápe? ¿Añehaʼãpa pyaʼe asegi umi instruksión?”. w16.11 2:10, 11

Umi judío iñeʼẽrendúva oiko trankílo Babilóniape. Ojeheja chupekuéra oiko ojepokuaaháicha voi, ha oviaha lívremente upe tetãrupi. Upe tiémpope, Babilonia haʼe vaʼekue pe lugár prinsipál ojejapoha negósio. Unos kuánto dokuménto yma guare omombeʼu heta judíogui oiko hague komersiánte vale ha artesáno katupyry. Oĩ voi ijapytepekuéra irríko jepe vaʼekue. Jahechaháicha, umi judíope ndojerekói vaʼekue esklávoicha, ojereko haguéicha umi israelítape Egíptope (Éx. 2:23-25). Péro, ¿Ikatúnepa umi israelita oadora jey Ñandejárape haʼe oipotaháicha? Upérõ ningo ijetuʼu vaʼekue oiko hag̃ua upéva, pórke umi babilonio núnka ndopoíri hembiguaikuéragui. Upéicharõ jepe, Jehová opromete kuri omosãsotaha ipuévlope. Ha upeichaite oiko, haʼe siémpre okumpli ipromesakuéra (Is. 55:11). w16.11 4:3, 5

Jehová ombou rupi Itaʼýra omano hag̃ua ñanderehehápe, operdona kuri Pablo ha ambue kristiáno síglo primeropegua pekádo. Jehová ounhi chupekuéra espíritu sánto rupive oiko hag̃ua chuguikuéra itaʼýra. Haʼekuéra osegíramo iñeʼẽrendu, oikóta yvágape ha ogovernáta Crístondi. Umi kristiáno oikóramo jepe ko yvy ape ári, Pablo heʼi chupekuéra: “Pepensa vaʼerã pemanomaha ha ndaikatuveimaha pepeka”. Ikatu hag̃uáicha ontende hikuái, Pablo omoĩ chupekuéra Jesús ehémplo. Haʼe heʼi Jesús omano rire, orresusita hague peteĩ espíritu ikatuʼỹvaicha omano, upévare “pe ñemano ndaipuʼakavéima hese”. Péicha avei umi kristiáno haʼete ku omanómava, pórke okambiaite ha ndohejavéima umi deséo vai odomina chupekuéra. Pablo heʼi chupekuéra: “Pepensa vaʼerã avei pende rekove ojeporutaha ojejapo hag̃ua Ñandejára oipotáva, peẽ haʼégui Cristo Jesús disípulo” (Rom. 6:9, 11). w16.12 1:9, 10

Pe téxto koestediagua ndeʼiséi tódo el tiémpo ñapensa ha ñañeʼẽtaha Jehováre térã la Bíbliarente voi. Umi kristiáno síglo primeropegua ojapo vaʼekue avei ambue mbaʼe, por ehémplo okaru, omenda, ifamília, ha ombaʼapo. Koʼág̃arupi Ñandejára siervokuéra ohasa porã avei ojapóvo koʼã mbaʼe (Mar. 6:3; 1 Tes. 2:9). Pablo ha ambue kristianokuéra síglo primero guare, ndohejái vaʼekue itraváho térã ótra kósa hoʼupa chuguikuéra itiémpo. Por ehémplo, Pablo ojededika vaʼekue ojapo óga kárpa. Péro upéva ndahaʼéi la iñimportantevéva chupe g̃uarã. Haʼe omotenonde Ñandejára servísio, oñemeʼẽmbaite predikasiónpe ha omboʼe Jehová Ñeʼẽ hapichápe (Hech. 18:2-4; 20:20, 21, 34, 35). Umi ermáno Romagua osegi vaʼerã kuri Pablo ehémplo, ha ñande avei tekotevẽ jajapo upéva (Rom. 15:15, 16). w16.12 2:5, 15, 16

Jehová ovalora entéro mbaʼe jajapóva hesehápe. Haʼe ñanembyasy ñañandu jave ndajavaleiha mbaʼeverã, térã ñapensáramo ndaikatumoʼãiha jajapo porã peteĩ mbaʼe. Oñangareko ñanderehe jajepyʼapy jave ñanefamília remikotevẽre. Haʼe ñanentende ndaikatúiramo jaservi chupe ymave guaréicha, tahaʼe ñanderasykatu térã ñañedeprimi rupi (Heb. 6:10, 11). La Biblia heʼi Jehováre: “Nde ningo rehendu umi hénte ñemboʼe”. Upévare, ani ñanderesarái chupe ointeresaha umi mbaʼe ñandepyʼapýva (Sal. 65:2, TNM). Pe “Túva oporoporiahuverekóva ha Ñandejára omeʼẽva opaichagua konsuélo”, omeʼẽta ñandéve opa mbaʼe ñaikotevẽva ani hag̃ua ñañemomombyry chugui. Upearã, sapyʼánte oipuru ñane ermanokuérape (2 Cor. 1:3). Jehová ovyʼa jaiporiahuvereko jave ñande rapichakuérape (Mat. 6:3, 4). Jehovápe g̃uarã haʼete ku hendive voi ñandepyʼaporãva ñaipytyvõ jave ñane ermanokuérape. Hiʼarive haʼe opromete ñanepremiataha upe haguére. w16.12 4:13, 14

Jesús oĩrõ guare ko yvy ape ári, orrechasa umi tentasión omoĩva Satanás (Mat. 4:10). Ha pe pyhare omano mboyve, Jesús heʼi Itúape ojaposeha hembipota. Haʼe heʼi: “Che Ru, eipeʼamína chehegui ko kópa. Péro ani oiko che aipotáva, síno nde reipotáva” (Luc. 22:42). ¿Ikatúpa ñande avei jasegi Jesús ehémplo, jadesidívo opa mbaʼe ñambotuicha hag̃ua Jehovápe ha jajapo hag̃ua hembipota? Añetehápe, ñande ikatu jasegi Jesús ehémplo pórke Ñandejára ñandeapo avei ijoguaháramo (Gén. 1:26). Péro ñande ñanediferénte Jehovágui. ¿Mbaʼérepa jaʼe upéva? Pórke la Biblia heʼi jareko haguére liverta ndeʼiséi ikatutamaha jajapo jajaposéva guive. Upéva rangue jarrespeta vaʼerã umi límite Ñandejára omoĩva ñandéve. Por ehémplo, pe tembireko orrespeta vaʼerã iménape, ha umi mitã iñeʼẽrendu vaʼerã isy ha itúape (Efes. 5:22; 6:1). w17.01 2:4, 5

Javyʼaiterei jahechávo Jehová organisasión ko yvy ape ári okakuaaveha ohóvo. Upéva heʼise heta mbaʼe osegitaha okambia. Koʼã kámbio sapyʼánte ñandeafekta ha hasy ñambohovái porã hag̃ua. Ñaneumílderamo ha ñamotenondéramo Ñandejára rembipota, nañapensamoʼãi ñandejehénte ha ñaneunidovéta. Pablo oskrivi vaʼekue umi kristiáno Corintoguápe: “Ñande retépe oĩ heta párte, ha káda párte ojapo peteĩ mbaʼe idiferénteva”. Upéicha avei, entéro ñaiméva kongregasiónpe jareko diferénte tembiapo (Rom. 12:4, 5). Ñaiméva guive Jehová puévlope jaapojase Ñandejára Rréino ha jajapose la ojejeruréva ñandéve. Umi ermáno ijedáva okapasita vaʼerã umi imitãmiévape. Umi imitãva orresivíramo peteĩ rresponsavilida osegi vaʼerã iñumílde ha orrespeta umi ijedavévape. Umi ermáno omendáva katu oagradeseterei hembireko oapoja jave chupekuéra koʼãichagua situasiónpe. Umi tembireko ikatu avei osegi Priscila ehémplo. Haʼe oapoja meme vaʼekue iména Áquilape tahaʼe haʼéva pe situasión ohasáva hikuái (Hech. 18:2). w17.01 5:15, 16

Gedeón ningo ohechakuaa ndorekoiha mbaʼeve oñemombaʼeguasu hag̃ua. Upéicharõ jepe, ojerovia Jehováre ha oasepta pe asignasión. Upéi ojasegura porã mbaʼépa añetehápe Ñandejára oipota ojapo, ha oñemboʼe chupe oheka hag̃ua igía (Juec. 6:36-40). Gedeón imbarete ha ipyʼaguasu vaʼekue, péro avei iñarandu ha opensa porã kuri ojapo mboyve peteĩ mbaʼe (Juec. 6:11, 27). Upéi umi hénte ojerurérõ guare chupe ogoverna hag̃ua, haʼe ndoaseptái. Okumpli rire pe asignasión Jehová oenkarga vaʼekue chupe, oho jeýnte hógape (Juec. 8:22, 23, 29). Peteĩ persóna oaseptáva peteĩ asignasión pyahu térã orekosevéva rresponsavilida kongregasiónpe, ndeʼiséi naiñumildeiha. La Biblia heʼi iporãha Ñandejára siervokuéra oñehaʼã ikatu hag̃uáicha oprogresa espirituálmente (1 Tim. 4:13-15). Péro natekotevẽi ningo jarresivi peteĩ asignasión pyahu japrogresa hag̃ua. Entéronte ikatu ñamehora kómo kristiáno, ha ñandekatupyryve jaservi porã hag̃ua Jehovápe ha ñane ermanokuérape. w17.01 3:15, 16

Jehová hepyeterei opaga ñandepeʼa hag̃ua pekádo ha ñemano poguýgui (1 Ped. 1:19). Chupe g̃uarã ñande ñandevaliosoiterei, upévare omeʼẽ itaʼýra ohayhuetéva omano hag̃ua ñanderehehápe. Upéicharõ, jaʼekuaa Jesúsgui oiko hague ñande Ru, Adán rekovia (1 Cor. 15:45). Isakrifísio rupive, Jesús omeʼẽ ñandéve oportunida jaiko hag̃ua pára siémpre ha ñaime hag̃ua Ñandejára família apytépe. Pe rreskáte rupive ikatúta ñandeperfékto ha Jehová ñandeasepta jeýta ifamíliaicha sin ke opyrũ iñeʼẽre. Ñapensamíntena mbaʼeichaitépa javyʼáta entéro persóna iñeʼẽrendúva Jehovápe iperfékto vove. Upépe ae, opavave oikóva yvágape ha ko yvy ape ári haʼéta peteĩ família oĩva peteĩ ñeʼẽme, pórke enterovégui oikóta Ñandejára raʼy (Rom. 8:21). Jaagradeséramo Jesús sakrifísio, ñañeʼẽta ñande rapichakuérape ko rregálo porãitére. w17.02 1:17, 19

Rrevísta Ñemañaha 15 de julio de 2013, oexplika kuri pe “tembiguái jeroviaha ha iñarandúva” haʼeha peteĩ grúpo de ermáno unhído haʼéva avei pe Kuérpo Governánte. Pe Kuérpo Governánte odesidi oñondivepa umi mbaʼe iñimportánteva oñerreuni jave káda semána. Koʼã rreunión oipytyvõ chupekuéra ikatu hag̃uáicha oñemongeta porã ha oĩve unído (Prov. 20:18). Ndaipóri ermáno iñimportantevéva ijapytepekuéra, upévare káda áño oñoturna hikuái omoakã hag̃ua irreunionkuéra (1 Ped. 5:1). Avei, káda áño oñoturna hikuái omoakã hag̃ua umi 6 komite oĩva pe Kuérpo Governánte kárgope. Ni peteĩva koʼã ermáno nopensái iñimportanteveha pe ótrogui. Haʼekuéra ohechakuaa haʼeha avei tembiguái, upéicha rupi oaprovecha pe aliménto espirituál omeʼẽva pe “tembiguái jeroviaha ha iñarandúva” ha osegi iñinstruksión. Pe Kuérpo Governánte ningo ndahaʼéi perfékto ni Ñandejára noñeʼẽi chupekuéra diréktamente. Haʼekuéra ikatu avei ojavy ontende lája la Biblia térã oorganisa lája algún tembiapo. w17.02 4:10-12

Jahechauka hag̃ua jaagradeseha Jesús sakrifísio, ñañemeʼẽ vaʼerã Jehovápe ha jajevautisa. Péicha ñademostra jajeroviaha pe rreskátere ha ñande haʼeha “Jehová mbaʼe” (Rom. 14:8). Jehová ojapo opa mbaʼe oporohayhu rupi. Haʼe oipota entéro oservíva chupe osegi iñehémplo ha ohayhu hapichakuérape (1 Juan 4:8-11). Jahayhu jave ñande rapichakuérape, jahechauka ñande haʼeha ñande “Ru yvagapegua raʼy” (Mat. 5:43-48). La Biblia heʼi mbaʼépa pe mandamiénto iñimportantevéva: jahayhu Jehovápe. Ha pe segundo haʼe hína jahayhu ñande rapichakuérape (Mat. 22:37-40). Ñañeʼẽramo umi héntepe pe marandu porãre, jahechauka hína jahayhuha chupekuéra. Ñakumpli hag̃ua pe mandáto Jehová omeʼẽva ñandéve, jahayhu vaʼerã umi héntepe ha koʼýte ñane ermanokuérape (1 Juan 4:12, 20). w17.02 2:13, 14

Ikatu ñapensa ndahasyieteha jadesidi hag̃ua upéva, pórke siémpre iporãvéta jaservi Jehovápe. Peteĩ persóna iñarandúva ningo ndoservisemoʼãi peteĩ dios guaʼúpe. Péro umi israelita ipyʼamokõi vaʼekue. La Biblia heʼi haʼekuéra osegi hague oguata mokõi tapére ha ndoikuaái hague mbaʼépa ojapóta. Elías katu iñarandu ha omokyreʼỹ pe puévlope oadora hag̃ua pe Dios verdadéro, Jehovápe. ¿Mbaʼérepa ijetuʼuete vaʼekue umi israelítape odesidi porã hag̃ua? Primero, pórke ndojeroviái Jehováre ha nohenduséi chupe. Avei haʼekuéra nomboykéi tiémpo oikuaa porãve hag̃ua chupe, upéicha rupi nokonfiái hese ha ndodesidiporãi (Sal. 25:12). Segundo, umi israelita opermiti ova hesekuéra umi persóna ótro tetãgua opensa lája, upéicha rupi oñepyrũma oadora avei hikuái umi dios fálsope. Hiʼarive Jehová hetaiterei tiémporema heʼi porã umi israelítape ikatuha oiko hesekuéra upéva (Éx. 23:2). w17.03 2:6, 7

¿Mbaʼéichapa ikatu avei jasegi Ezequías ehémplo? Ikatu oĩ algúna kósa ñandejokóva ñaime porã hag̃ua Jehovándi, térã hoʼuetereíva ñane tiémpo jaservi porã hag̃ua chupe. Koʼág̃arupi heta oĩ ombotuichaitereíva hapichápe, umi ifamósovape térã peteĩ ni ndoikuaáivape. Avei haʼekuéra oipurueterei itiémpo olee hag̃ua umi mbaʼe oskrivíva koʼã persóna térã ohecha hag̃ua umi fóto ohupíva hikuái. Haʼekuéra pyʼỹi oipuru pe rréd sosiál térã ambue mbaʼe oñekomunika hag̃ua hapichakuérandi Internet rupive. Añetehápe ningo ndaivaíri jaipuru koʼã mbaʼe ñañekomunika hag̃ua ñane hénte térã ñane amigokuérandi. Péro naiporãmoʼãi japerdeterei tiémpo koʼã mbaʼépe. Ikatu voi jaju ñañemombaʼeguasu jahecháramo oĩha heta persóna okomentáva térã ogustáva umi fóto jahupíva Internétpe. Avei ikatu ñañeofende ñañemeʼẽramo enkuénta saʼivéma oĩha omañáva umi mbaʼe jahupívare. Iporãta ñañeporandúramo: “¿Añatendépa ani hag̃ua aalavaiterei peteĩ yvypórape? ¿Aikópa hína aperdeterei che tiémpo ajapo hag̃ua umi mbaʼe naiñimportanteguasúiva?” (Efes. 5:15, 16). w17.03 3:14, 17