Agosto

Gedeón ha isoldadokuéra oñorairõ peteĩ gérra ijetuʼúva, ha ikaneʼõitereíma hikuái. Pe pyhare pukukue omuña 32 kilómetrorema umi madianítape ha umi omoirũvape chupekuéra. Koʼãva ningo heta áñorema omaltrata umi isrraelítape. Upévare Gedeón ha umi 300 soldádo ndaikatúi oheja reívo chupekuéra. Upémarõ osegi hikuái omuña iñenemigokuérape ohundipa peve (Juec. 7:22; 8:4, 10, 28). Ñande avei ñañorairõ peteĩ gérra ijetuʼuetereíva ha ñanemokaneʼõva. Ñane enemigokuéra hína Satanás, ko múndo ha ñane imperfeksión. Ñande apytépe oĩ ermáno ha ermána heta áñorema ogerreáva koʼã mbaʼéndi, ha Jehová ñanepytyvõ rupi, heta vésema ñagana ko ñorairõ. Péro jaikuaaháicha neʼĩra gueteri opa ko gérra. Sapyʼánte ikatu ñanekaneʼõma ñañorairõ hague, térã ñahaʼarõ hague oñehundi ko múndo. Jesús heʼi voi umi ára pahápe jahasataha heta provléma ijetuʼúva, ha oĩtaha ñandepersegíva. Péro heʼi avei ñaaguantáramo, ñaganataha ko gérra (Luc. 21:19). w16.04 2:1, 2

Umi rreuniónpe jastudia la Biblia ha ñaaprende mbaʼépa Jehová oipota jajapo, ha mbaʼéichapa oipota jaiko (Is. 30:20, 21). Heta persóna ndoservíriva Jehovápe péro ohóva rreunionhápe, orrekonose Ñandejára ñandegiaha (1 Cor. 14:23-25). Jehová odirihi ñane rreunionkuéra ijespíritu sánto rupive, ha opa mbaʼe ñaaprendéva upépe ou chugui. Upéicharõ, jaha jave rreunionhápe ñahendu hína chupe, ñañandu mbaʼeichaitépa ñanderayhu ha ñañemoag̃ui hese. Jesús ningo pe omoakãva pe kongregasión, ha haʼe heʼi: “Oĩháme mokõi térã mbohapy oñembyatýva che rérape, che avei aime upépe ijapytepekuéra” (Mat. 18:20). La Biblia heʼi avei Jesús oĩha umi kongregasiónpe (Apoc. 1:20–2:1). Añetehápe Jehová ha Jesús oĩ ñanendive ha ñanemombarete ñaime jave umi rreuniónpe. ¿Mbaʼéichapa Jehová oñeñandu ohechávo ñañehaʼãmbaiteha ñañemoag̃ui hag̃ua hese ha Itaʼýrare? w16.04 3:13, 14

Peteĩ ermána oho osaluda mokõi ermánope. Péro peteĩva oñeofende pe ermána osaluda lájare chupe. Oho rire pe ermána, pe ipochýva oñepyrũ ojekeha chugui. Upémarõ pe ótro ermáno omomanduʼa chupe pe ermána oservimaha Jehovápe 40 áñore, ohasamaha heta mbaʼe ijetuʼúva, ha oasegura chupe oiméne noñemeʼẽinte hague enkuénta la heʼi vaʼekuére. Upéva omopensa pe ermáno ipochy vaʼekuépe, ha heʼi: “Siertoite la eréva”. Upémarõ ombohasa reínte la oiko vaʼekue. ¿Mbaʼépa ñaaprende ko ehémplogui? Ikatuha jadesidi mbaʼéichapa ñarreaksionáta oĩ jave ñaneofendéva. Japorohayhúramo, ikatúta ñambohasa reínte ñane ermanokuéra ofallaʼimi jave ñanendive (Prov. 10:12; 1 Ped. 4:8). Jehová omombaʼeterei pe persóna “oheja reírõ ojeʼéva hese” (Prov. 19:11). Upéicharõ, oĩramo heʼíva térã ojapóva peteĩ mbaʼe ñaneofendéva, iporã ñañeporandu: “¿Ikatúpa ambohasa reínte la oikóva? ¿Tekotevẽ piko amboguapyeterei chejehe upéva?”. w16.05 1:8, 9

¿Máva mávapa opredika umi marandu porã ko tiémpope? Ñande testígo de Jehová añoite. ¿Mbaʼérepa jaʼe upéva? Pórke japredika pe mensáhe oñeʼẽva Ñandejára Rréinore. Ñande voi jaha jaheka umi héntepe. Avei japredika jahayhúgui Jehovápe ha ñande rapichakuérape. Ha ñane predikasión rupive ñag̃uahẽma hetaiterei hénte opa tetãguápe, ha japredika diferénte idiómape. Hiʼarive jasegíta jajapo ko tembiapo og̃uahẽ meve pe fin. ¡Ajépa iñimportantete ko tembiapo jajapóva koʼã ára pahápe! Péro, ¿mbaʼépa ñanepytyvõ japredika hag̃ua pe marandu porã ko yvy tuichakuére? Upe jaleéva pe téxto koestediaguápe. Jehová ningo katuete ñanemombaretéta jasegi hag̃ua japredika pe marandu porã Jesucristo omanda haguéicha (2 Tim. 4:5). w16.05 2:17, 18

Jadesidi jave ñaneñeʼẽrendu Ñandejárape ha ñañehaʼãmbaitérõ jajapo hembipota, jahechauka jahayhuha chupe ha jaipotaha haʼe ñandeguerohory. Satanás heʼi vaʼekue Jehová ndorekoiha derécho ñanegoverna hag̃ua. Péro ñande ñañemoĩrõ Jehová poguýpe, jahechauka hína jaipotaha haʼe ñanegoverna. Ha ikatu ñaĩ segúro ñande Ru ñanderayhuetéva omombaʼetereiha ñañehaʼã haguére jajapo opa mbaʼe haʼe heʼíva (Job 2:3-5; Prov. 27:11). Ñañehaʼãmbaite jave ñavense ñande devilida, ijetuʼúramo jepe, jahechauka jaapojaha Jehovápe ha ñañemoĩha ipoguýpe. Jehová oipota ‘ñañehaʼãmbaite’ jasegi iñehémplo ikatu hag̃uáicha ñamehora kómo kristiáno (2 Ped. 1:5-7; Col. 3:12). Haʼe oipota avei ñañatende umi mbaʼe ñapensávare ha ñakontrola umi mbaʼe ñañandúva (Rom. 8:5). Jajapo jave upéicha, jahechakuaa la Biblia ñanepytyvõha ñakambia hag̃ua, ha upéva ñanembovyʼaiterei. w16.05 4:12, 13

Jehová ningo ñandekuaa porãiterei. Upévare ñanemoldea jave oreko enkuénta ñande defektokuéra, ohecha mbaʼépa ndaikatumoʼãi jajapo, ha oikuaa mbaʼe mbaʼépepa ñamehoráma jahávo (Sal. 103:10-14). Ñantende porã hag̃ua mbaʼéichapa Jehová ñanderecha, ñapensami mbaʼéichapa Jesús orreaksiona vaʼekue ijapostolkuéra ofalla mimírõ guare. Sapyʼánte haʼekuéra ojodiskutími oimoʼãgui oĩha iñimportantevéva ijapytepekuéra. Ñande ñaimérire upépe, ¿mbaʼépa ñapensa vaʼerãmoʼã umi apóstolre? Ikatu ñapensa ojoguaha hikuái peteĩ ñaiʼũ hasývape oñemoldea hag̃ua. Péro Jesús nopensái vaʼekue upéicha. Haʼe oikuaa ikatuha oipytyvõ umi apóstolpe okambia hag̃ua. Upévare ipasiénsia, ipyʼaporã, ha ohechauka chupekuéra mbaʼéichapa iñumílde vaʼerã (Mar. 9:33-37; 10:37, 41-45; Luc. 22:24-27). Upéi, Jesús oikove jey rire, umi apóstol orresivi espíritu sánto, ha upe guive ndoipyʼapyvéima chupekuéra mávapa iñimportanteve. Upéva rangue, oñehaʼãmbaite hikuái ojapo porã pe tembiapo Jesús onkarga vaʼekue chupekuéra (Hech. 5:42). w16.06 1:10

Jehová haʼe pe úniko Dios verdadéro, ha ndaipóri ótro dios haʼeichagua (2 Sam. 7:22). Moisés heʼírõ guare umi isrraelítape “Jehová ningo peteĩnte”, omomanduʼa chupekuéra Jehovápe añoite omombaʼeguasu vaʼerãha. Heta puévlo oĩva Israel jerére oadora vaʼekue umi dios fálsope, ha oimoʼã idioskuéra ikatuha okontrola pe naturalésa. Péro umi isrraelíta idiferénte vaʼerã chuguikuéra. Por ehémplo, umi ehípsio oadora vaʼekue peteĩ dios héravape Ra, pe dios del sol. Avei oadora peteĩ diósa héravape Nut, haʼéva pe diósa del siélo. Ha Gébpe, haʼéva pe dios de la tiérra; ha Hápipe, pe dios del rrío Nilo. Avei oadora hikuái heta animálpe. Péro Jehová ohechauka haʼe añoite ipoderosoha omboúrõ guare umi 10 plága. Umi kananéope g̃uarã katu pe dios iñimportantevéva haʼe vaʼekue Baal. Haʼekuéra oimoʼã ko dios omeʼẽha chupekuéra vída. Avei opensa hikuái ko dios odominaha pe yvága, pe ama ha umi torménta. Heta lugárpe, umi hénte opensa Baal oñangarekoha hesekuéra (Núm. 25:3). Péro umi isrraelíta siémpre imanduʼa vaʼerã Jehová añoite haʼeha “Ñandejára tee”, ha “ndaiporiha ótro haʼeichagua” (Deut. 4:35, 39, TNM). w16.06 3:4, 5

Jesús ehémplo ñanemboʼe arakaʼeve ndajahejái vaʼerãha Jehovápe ni ipuévlope. Ñande ningo ñañemeʼẽ enkuénta mbaʼéichapa Jehová ñandegia koʼã ára pahápe. Por ehémplo, ñanepytyvõ japredika hag̃ua ko yvy tuichakuére. Añetehápe ndaipóri ótra organisasión ojapóva upéva. Hiʼarive Ñandejára ñanemboʼe ikatu hag̃uáicha javyʼa ha jaiko peteĩ ñeʼẽme. La Biblia heʼíma vaʼekue voi mbaʼéichapa oñeñandúta Ñandejára siervokuéra: “Haʼekuéra vyʼapópe opurahéita, pyʼarorýgui henyhẽta” (Is. 65:14). Umi hénte ko mundopegua ningo ndovyʼái ni ndorekói esperánsa. Péro ñande javyʼa pórke Jehová ñandegia ha ñanepytyvõ jajapo hag̃ua heta mbaʼe porã. Jasegíkena ñamotenonde Jehovápe ha ñaneñeʼẽrendu chupe. w16.06 4:10-12

Yma ningo umi puévlope oñemoĩ vaʼekue guárdia oñangareko hag̃ua pe siudáre. Jerusalén ha umi ótra siuda tuichavéva oreko vaʼekue murálla ijyvatetereíva ani hag̃ua oike iñenemigokuéra. Umi guárdia oñemboʼy umi murálla ári ohecha porã hag̃ua mombyry guive mbaʼépa oiko pe siuda jerére. Oĩ avei guárdia opytáva umi okẽme pe siuda entrádape. Enterovénte tekotevẽ vaʼekue oĩ alérta ára ha pyhare. Ha ohecha vove hikuái ouha iñenemigokuéra, oavisa vaʼerã umi oikóvape pe siudápe (Is. 62:6). Umi guárdia oikuaa porã ndokéi vaʼerãha ni michĩmi, ha oñatende vaʼerãha umi mbaʼe oikóvare. Ndojapóirõ hikuái upéva, heta persóna ikatu omano (Ezeq. 33:6). Áño 70-pe, umi soldádo romano oike Jerusalénpe. Pe istoriadór Josefo heʼi umi guárdia oñenkargáva pe Tórre de Antóniare, oĩva pe murálla kóstare, opyta hague oke. Upévare umi romano oike pe Tórrepe ha ohasa pe témplope. Upéi ohapy hikuái pe témplo ha ohundi pe siuda kompletoite. Péicha oñemohuʼã pe gran trivulasión ohasa vaʼekue umi hudío. w16.07 2:2, 7, 8

Ñandejára mbaʼeporã ijojahaʼỹva rupive, jahupyty heta vendisión. Péro naiporãi ñamoĩ exkúsa ñane rembiapo vai hag̃ua, ñaimoʼãgui Jehová oheja reitanteha opa mbaʼe. Umi kristiáno ypykue tiémpope, oĩ vaʼekue umi “notĩriva hembiapo vai hag̃ua ha heʼíva ikatuha ojapo upéicha Ñandejára imbaʼeporãiterei rupi” (Jud. 4). Amalisia koʼã kristiáno naiñeʼẽrendúiva oimoʼã siémpre ikatuha opeka, pórke opensa Jehová operdonatanteha voi chupekuéra. Hiʼarive omboliga umi ermánope hembiapo vai hag̃ua haʼekuéraicha. Koʼág̃a avei, oimeraẽ ojapóva péicha ohechauka ndorrespetaiha Ñandejára espíritu sánto, “omeʼẽva mbaʼeporã ijojahaʼỹva” (Heb. 10:29). Ñane tiémpope Satanás ogueroviauka heta kristiánope ikatuha opeka, pórke Ñandejára operdonatanteha voi chupekuéra. Jehová oĩ dispuésto operdonávo umi oñarrepentívape. Péro avei oipota ñañehaʼã pono jareko umi deséo ojapoukátava ñandéve umi mbaʼe vai. w16.07 3:16, 17

Umi omendáva ikatu ojedivorsia ha omenda jey sólamente iparéha omoakãratĩramo chupe. Péro peteĩ omendáva ikatu odesidi operdona iména térã hembireko ofalla vaʼekuépe. Upéva ojapo kuri proféta Oseas, hembireko Gómer omoakãratĩrõ guare chupe. Avei Jehová operdona vaʼekue umi israelítape oñarrepentírõ guare hikuái (Os. 3:1-5). Péro peteĩ persóna oikuaáramo iména térã hembireko otraisiona hague chupe, ha upéicharõ jepe oreko jey rrelasión sexuál hendive, ohechaukáma operdona hague chupe. Oikóramo upéva, upe persóna ndorekovéima váse bíblica ojedivorsia hag̃ua. Jesús heʼi rire la ojesitáva pe téxto koestediaguápe oñeʼẽ avei umi odesidívare nomendái, ha heʼi: “Pe odesidíva ojapo upéicha, oĩ porã ojapóramo upéicha” (Mat. 19:10-12). Heta kristiáno odesidi opyta soltéro pórke ndoipotái mbaʼeve odistrae chupe oservi porã hag̃ua Jehovápe. Ha ñande jaguerohory vaʼerã peichagua ermáno ha ermánape. w16.08 1:15, 16

Umi imitãvéva ningo imbareteve ha hesãi, upévare ikatu ojapo hetave mbaʼe Jehová servísiope (Prov. 20:29). Heta ermáno ha ermána imitãva gueteri ombaʼapo Betélpe oñeimprimihápe umi lívro. Oĩ umi oipytyvõva oñemopuʼã ha oñemyatyrõhápe umi Salón del Reino. Ótro katu oñekuaveʼẽ oipytyvõ hag̃ua umi oiko haguépe desástre naturál. Heta prekursór avei oaprende ótro idióma, térã ova ótro lugárpe opredika hag̃ua. Peteĩ salmísta heʼi vaʼekue: “Umi oñehaʼãvape oñemoag̃ui Jehováre ndofaltamoʼãi mbaʼevete” (Sal. 34:10). Jajapóramo ikatúva guive Jehová servísiope, javyʼáta pórke jaikuaa upéva ombopyʼaroryha chupe. Péicha Jehová katuete oñangarekóta ñanderehe, opromete haguéicha ñandéve. w16.08 3:5, 8

Jehová oreko podér ñanepytyvõ hag̃ua, ha ñanemombarete ijespíritu sánto rupive (1 Crón. 29:12). Ñandepuʼakasérõ Satanás ha imúndore, iñimportanteterei jajerure Ñandejárape ijespíritu sánto (Sal. 18:39; 1 Cor. 10:13). Jehová ñanemokyreʼỹ Iñeʼẽ rupive, ha ñande jaagradeseterei chupe upévare. Hiʼarive, heta mbaʼe porã ñaaprende ñane puvlikasionkuéra osẽvagui káda mes. Ñanemanduʼamína avei heʼívare Zacarías 8:9, 13. Koʼã mbaʼe ojeʼe vaʼekue oñemopuʼã jeýrõ guare pe témplo, péro koʼág̃a peve ñanemokyreʼỹeterei. Jehová avei ñanemombarete umi rreunión, asambléa ha eskuéla bíblica rupive. Umi mbaʼe ñaaprendéva upépe, ñanepytyvõ jaservi hag̃ua chupe ñande pyʼaite guive, ñamoĩ hag̃ua méta, ha ñakumpli porã hag̃ua umi rresponsavilida jarekóva kómo kristiáno (Sal. 119:32). Ha nde, ¿reaprovechapaitépa hína koʼã mbaʼe Jehová omeʼẽva nemombarete hag̃ua? w16.09 1:10, 11

Pe Léi Mosáika ohechauka Jehovápe ombojeguaruha oĩramo kuña oñemondéva kuimbaʼéicha, térã kuimbaʼe oñemondéva kuñáicha. Ha koʼág̃a oĩ de modaite upéva (Deut. 22:5). Pe Léi ñanemboʼe Jehovápe ndogustaieteha umi ao ojejapóva kuimbaʼekuérape g̃uarã, péro omopínta kuñáva chupekuéra. Ha avei ndoguerohorýi umi ao omondéva kuñanguéra, péro omopínta kuimbaʼéva chupekuéra. La Bíbliape oĩ heta téxto ikatúva ñanepytyvõ jadesidíta jave mbaʼéichapa ñañemondéta. Koʼãva ideprovécho ñandéve haku tiémpo térã roʼy tiémpope, tahaʼe haʼéva pe tetã jaikoha térã pe kostúmbre ojesegíva upépe. Ñande ningo nañaikotevẽi peteĩ lísta ohechaukáva mbaʼeichagua aópa jaipurukuaa, ha mbaʼépa ndovaléi jaipuru. Jajegiáramo la Biblia heʼívare, ikatútante avei ñamonde umi ao ñandegustáva. w16.09 3:3, 4

Umi kuimbaʼe oskrivi vaʼekue la Biblia ipyʼaguasu ha núnka ndaijapúi. Upe tiémpope, umi eskritór omoʼã jepi umi mbaʼe vai oikóva hetãme ha ojapóva igovernantekuéra. Péro Jehová profetakuéra ndaupéichai vaʼekue. Haʼekuéra ndoikói omombeʼu umi mbaʼe porãnte ojapóva umi israelita ha igovernantekuéra (2 Crón. 16:9, 10; 24:18-22). Avei omombeʼu haʼekuéra voi ofalla jave ha ambue Ñandejára siérvo (2 Sam. 12:1-14). Jasegi jave umi konsého oĩva la Bíbliape oho porãve ñandéve, ha upéva ohechauka porã ouha Ñandejáragui (Sal. 19:7-11). La Biblia oipytyvõma heta persónape ohechakuaa hag̃ua orovia hague oikóvo heta japu (Sal. 115:3-8). Por ehémplo, heta héntepe g̃uarã pe naturalésa haʼete peteĩ dios. Ótro katu orovia yvyporakuéra osolusionataha umi provléma jaiko porãve ha javyʼave hag̃ua. Péro ñapensáramo umi mbaʼe ojapómava koʼág̃a peve, ndajahechamoʼãi mbaʼeveguasu. La Biblia añoite ikatu opromete ñandéve heta mbaʼe porã (Sal. 146:3, 4). w16.09 4:10, 11

Boaz ojepyʼapy vaʼekue Rut situasiónre, oikuaágui heta mbaʼe ijetuʼuha peteĩ extranhérape g̃uarã. ¿Mbaʼépa ojapo? Haʼe oinvita Rútpe opyta hag̃ua umi kuñataĩndi ani hag̃ua umi kuimbaʼe ombaʼapóva upépe omolesta chupe. Avei, Boaz oñenkarga ikatu hag̃uáicha Rut oreko y ha hoʼumi vaʼerã, orekoháicha umi ótro ombaʼapóva ikokuépe. Jaʼekuaa Boaz ndoapoʼíri hague ko kuña ótro tetãguápe, omokyreʼỹ guei chupe (Rut 2:8-10, 13, 14). Boaz imbaʼeporã Rut ndive pórke ko kuña imbaʼeporã avei isuégra Noemíndi. Péro ndahaʼéi upévante la Rut ojapóva, haʼe odesidi avei oservi Jehovápe. Boaz imbaʼeporãvo hendive, ohechauka osegiha Jehová ehémplo (Rut 2:12, 20; Prov. 19:17). Ñane tiémpope avei, ñanembaʼeporãrõ opaichagua tapichándi ikatu ñaipytyvõ chupekuéra oikuaa hag̃ua pe añetegua, ha ohechakuaa hag̃ua mbaʼeichaitépa ohayhu chupekuéra Jehová (1 Tim. 2:3, 4). w16.10 1:10-12

Ñande jajeroviavéta Jehováre jahecháramo haʼe ohenduha ñane ñemboʼe, ha omeʼẽha ñandéve umi mbaʼe ñaikotevẽva hiʼoraitépe (1 Juan 5:14, 15). Upévare, jasegíkena jajerure Jehovápe ijespíritu sánto ikatu hag̃uáicha jajeroviave hese (Luc. 11:9, 13). Ñañemboʼe jave Jehovápe, ndahaʼéi jajerurénte vaʼerã chupe umi mbaʼe ñaikotevẽva. Iporãta ñañemboʼéramo káda día jaagradese ha ñambotuicha hag̃ua chupe umi mbaʼe porã ojapóvare (Sal. 40:5). Avei ñañemboʼe vaʼerã ñane ermanokuéra rehehápe, oĩva ko yvy tuichakuére, por ehémplo “umi oĩvare préso”. Nañanderesarái vaʼerã avei ñañemboʼe hag̃ua umi ermáno omoakãvare kongregasión. Jahecha jave mbaʼéichapa Jehová okontesta ñane orasión, ñañemoag̃uivéta ha jajeroviavéta hese (Heb. 13:3, 7). w16.10 3:8, 9

Ñane tiémpope, Jehová puévlo oheja pe espíritu sánto ogia chupekuéra. Upéicha rupi, ojerovia Irréinore ha oñemoĩ ifavórpe (Gál. 5:22, 23). Heta mbaʼe porã ningo ikatu jahupyty jajerovia ha jajoayhúramo. Ko yvy tuichakuére ñaiméma mas de ocho millón ermáno ha ermána jaikóva unído ha pyʼaguapýpe kongregasiónpe. Jehová ñanepytyvõ rupi añoite ningo ikatu ñaime unído, ha upévare haʼe omerese ñambotuicha chupe (Is. 55:13). Jaagradeseterei Ñandejárape omeʼẽ haguére ñandéve pe oportunida jajesalva hag̃ua jajerovia rupi. Jehová osegíta oipytyvõ hetaiteve persónape okonfia hag̃ua hese. Og̃uahẽta hína pe día ko yvy henyhẽtaha yvypóra perfékto ha hekojojávagui, ha entéronte vyʼápe ombotuicháta Jehovápe opa ára g̃uarã. w16.10 4:18, 19

Jasegi vaʼerã umi instruksión omeʼẽva ñandéve umi ansiáno. Síglo primérope, oĩ vaʼekue “oikóva hekopeʼỹ”. Umichagua tapicha hekorei ha oiko oñentremete ótro ojapóvare. Umi ansiáno oñehaʼã kuri oipytyvõ chupekuéra, péro nokambiaséi hikuái. Apóstol Pablo heʼi kuri mbaʼéichapa ojetrata vaʼerã koʼãichagua tapichápe. Haʼe heʼi: “Pemarka chupe ha anive pejeheʼa hese”. Péro péva ndeʼiséi avei otratatamaha chupekuéra iñenemígoramo (2 Tes. 3:11-15). Koʼág̃a avei, umi ansiáno oñehaʼã oipytyvõ umi ndojapóivape la Biblia heʼíva, por ehémplo oĩramo ojegustáva peteĩ ndahaʼéivare Testígo (1 Cor. 7:39). Pe persóna nokambiaséiramo, ansianokuéra ikatu odesidi ojapo peteĩ diskúrso de señalamiénto. Ojejapóramo peichagua diskúrso ne kongregasiónpe, ¿mbaʼéichapa rejagarráta? Ha reikuaáramo mávarepa oñeñeʼẽ, ¿resegítapa rehasa tiémpo hendive? Rehendúramo pe adverténsia oñemeʼẽ vaʼekue ikatu hína reipytyvõ pe persónape oheja hag̃ua hembiapo vai. w16.11 2:13

Pentekostés áño 33-pe, oñemeʼẽ espíritu sánto heta kristiánope. Koʼãva haʼe “peteĩ trívu ojeporavopyre, saserdotekuéra oservíva rréiramo, peteĩ tetã marangatu, peteĩ puévlo Ñandejára mbaʼerã” (1 Ped. 2:9, 10). Umi apóstol oikove aja, oñangareko porã vaʼekue umi kongregasiónre. Péro omano rire hikuái, oĩ kristiáno oñepyrũva omboʼe enseñánsa japu, ha oñehaʼã ogueraha vai umi disípulope. Koʼã kuimbaʼe omombaʼeterei umi enseñánsa oúva Aristóteles ha Platóngui, ha oñepyrũ omboʼe umíva oipuru rangue Ñandejára Ñeʼẽ (2 Tes. 2:6-8). Hiʼarive ijapytepekuéra oĩ kuri umi omoakãva kongregasión. Jesús heʼi idisipulokuérape enterovéva haʼeha oñoermáno. Péro umi kristiáno guaʼu apytépe oñepyrũ oñeforma peteĩ grúpo omoakãva chupekuéra ha oñemombaʼeguasúva (Mat. 23:8). w16.11 4:8

Oiko mboyve ñandehegui kristiáno, oiméne jajapo raʼe heta mbaʼe vai ndajaikuaái rupi Ñandejára ndoguerohoryiha umíva. Upérõ ñande haʼe vaʼekue “tekokyʼa ha tembiapo vai” rembiguái, upéva heʼise “pekádo rembiguái” (Rom. 6:19, 20). Upéi ñaaprende mbaʼéichapa Jehová oipota jaiko, jaju ñakambia, ñañemeʼẽ chupe ha jajevautisa. Jadesidi kuri ñaneñeʼẽrendutaha chupe ha jaikotaha haʼe oipotaháicha. Ñande jajei rire pekádo poguýgui, oiko ñandehegui “hustísia rembiguái” (Rom. 6:17, 18). Upévare iñimportánte ñañeporandumi: “¿Ahejápa umi deséo vai ipuʼaka cherehe, térãpa pyaʼe voi amboyke umíva?”. Ñamombaʼéramo Ñandejára mbaʼeporã ijojahaʼỹva, ñañehaʼãmbaitéta jajapo chupe ogustáva. w16.12 1:11, 12

Ñañehaʼã vaʼerã jaiko trankílo ñande rogapýpe ha ñane ermanokuérandi. Péro ñane imperfékto rupi, sapyʼánte ikatu ñaneprovléma ñane ermanokuérandi. Oikóramo upéva, jasegi vaʼerã Jesús konsého: “Eñemoĩ porã [...] ne ermánondi” (Mat. 5:24). Péicha jave, ani ñanderesarái ñane ermáno ha ñane ermána oserviha avei Jehovápe, “Ñandejára omeʼẽva pyʼaguapy” (Rom. 15:33; 16:20). “Ñapensa meméramo espíritu sánto oguerohorývare” jaikóta avei pyʼaguapýpe Ñandejárandi. Proféta Isaías heʼi vaʼekue: “Nde [Jehová], eñangareko porã umi oñemoĩvare nde pópe; ha resegíta rembopyʼaguapy chupekuéra ojerovia rupi nderehe” (Is. 26:3, TNM; Rom. 5:1). w16.12 2:5, 18, 19

Ñandejára ñanevendesi jaikóramo jepe ko múndo añáme oĩva Satanás poguýpe. Haʼe ojapo tekotevẽva guive omyesakã hag̃ua ñandéve Iñeʼẽ, ha jaiko hag̃ua pyʼaguapýpe ñane ermanokuérandi (Is. 54:13). Jesús opromete haguéicha, Jehová koʼág̃ama voi ovendesi isiervokuérape. Upévare jaiko peteĩ famíliaicha, ñaiméramo jepe opárupi ko yvy tuichakuére (Mar. 10:29, 30). Opavave ohekáva Ñandejárape ipyʼaite guive, ipyʼaguapýta, oñeñandu porãta ha ovyʼáta (Filip. 4:5-7). Aníkena ñanderesarái “tuicha oñemyengoviataha” ñandéve ñañemboʼérõ ñande pyʼaite guive. Upévare, “ikatu hag̃uáicha [jarresivi] Ñandejára opromete vaʼekue”, jajapo vaʼerã hembipota (Heb. 10:35, 36). Jasegíkena ñamombarete ñande jerovia ha jajapo opa ikatúva jaservi hag̃ua Jehovápe. Ñande ñaĩ segúro haʼe katuete ñanepremiataha (Col. 3:23, 24). w16.12 4:17, 20

Ñande ndaikatúi jadesidi opa mbaʼe ñandegustávante. Péro, ¿jaʼekuaápa jarekoha liverta ndaikatúiramo jepe jajapo upéva? Si, pórke Ñandejára omoĩ ñandéve límite jajehekýi hag̃ua heta akãrasýgui. Ñamoĩmína peteĩ ehémplo ñantende porãve hag̃ua upéva: Epensami rehoha nde kóchepe mombyry peteĩ siudápe, péro ndaipóri léi de tránsito ha káda uno odesidi mbaʼe velosidápepa omaneháta ha mbaʼe karrílpa oipurúta pe rrútape. ¿Reviahánepa trankílo? Nahániri. Péro oĩ rupi léi de tránsito térã límite, enterovévante ipyʼaguapyve ha nopensamoʼãi ojepeʼaha chugui iliverta. Jahechamína Adán káso. Haʼe nopenái umi límite Jehová omoĩ vaʼekuére, ha hoʼu pe yva ojeproivi vaʼekue chugui. Adán oipuru vaígui pe liverta orekóva, entéro yvypóra oiko asy (Rom. 5:12). Aníkena ñanderesarái umi mbaʼe vaieta oikóvare Adán naiñeʼẽrendúi haguére. Upéva ñanemomýita jaipuru porã hag̃ua pe liverta jarekóva, ha jarrespetáta umi límite Jehová omoĩva. w17.01 2:6, 8

Jehová oipota ñaneumílde ha ñarrekonose oĩha heta mbaʼe ndaikatúiva jajapo (Miq. 6:8). Upévare, oñemeʼẽramo ñandéve peteĩ asignasión pyahu, jajerure Jehovápe tañandegia ha tañanepytyvõ. Gedeón ehémplo ñanemomanduʼa Jehová ñandegia ha ñanevendesíramo añoite ikatutaha ñasẽ porã. Tekotevẽ ningo jahecha mbaʼépa Jehová heʼi ñandéve la Biblia ha iñorganisasión rupive. Ani ñanderesarái Jehová iñumílde rupínte ñanembokatupyryha jajapo hag̃ua heta mbaʼe iservísiope, ndahaʼéi ñandevaleterei haguére (Sal. 18:35). Ñaneumílderamo, ndajaikomoʼãi ñapensaiterei ñandejehénte. w17.01 3:17, 18

Jesús oheja ñandéve pe ehémplo iporãvéva ohechaukáva mbaʼéichapa ikatu ñambokatupyry ótrope. Haʼe ningo oikuaa ndopytamoʼãiha tódo el tiémpo ko yvy ape ári. Upéicharõ jepe oĩ segúro idisipulokuéra ikatutaha omosarambi pe marandu porã hetaiteve hendárupi, iñimperféktoramo jepe (Juan 14:12). Haʼe omboʼe porãiterei rupi chupekuéra, oĩma hikuái preparádo opredika hag̃ua opárupi (Col. 1:23). Jesús omano rire, Jehová omoingove jey itaʼýrape ha omeʼẽ chupe hetave traváho ha autorida. La Biblia heʼi omoĩ hague Jesúspe “yvateve opaichagua goviérno, autorida [ha mburuvichágui]” (Efes. 1:19-21). Ñamanóramo jepe fiél Jehovápe og̃uahẽ mboyve Armagedón, jaikuaa porã jaikove jeytaha pe múndo pyahúpe, ha javyʼaitereitaha jajapóvo umi tembiapo ñanembopyʼarorýva. Péro koʼág̃ama voi ikatu javyʼa japredikávo pe marandu porã, ha ñaipytyvõvo ñande rapichakuérape oservi hag̃ua Jehovápe. Upéicharõ, ñanemitã térã ñandeedáramo jepe, lomímonte ikatu jajapo heta mbaʼe “ñande Ruvicha servísiope”. w17.01 5:17, 18

Jesús omeʼẽ hekove “una ves ha opa ára g̃uarã”. Upéva heʼise natekotevẽmoʼãveimaha ojejapo mbaʼeveichagua rreskáte, ni ojepaga ñanderehehápe (Heb. 9:24-26). Adán káusare ñamano, péro Jesús sakrifísio rupive ikatúta jahupyty jeikove opaveʼỹva. Pe rreskáte ñandesalva Satanás múndo añágui ha ñanepytyvõ ani hag̃ua jakyhyje pe ñemanógui (Heb. 2:14, 15). Jehová promesakuéra katuete oñekumplíta, ani voi jaduda ni michĩmi upévagui. Umi léi oĩva pe naturalésape ningo nokambiái, péicha avei, Jehová arakaʼeve nokambiamoʼãi, ni nañambyasymoʼãi jajerovia haguére hese. Haʼe ndahaʼéi omeʼẽnteva ñandéve pe vída, síno avei ñanderayhu. La Biblia heʼi: “Ñande jaikuaa ha jaguerovia Ñandejára ñanderayhuha. Ñandejára ningo mborayhu” (1 Juan 4:16). Ñande jaikuaa Jehová siémpre ojapoha la heʼíva, upévare ñaĩ segúro koʼẽrõitéma ko yvýgui oikotaha peteĩ paraíso neporãva. Yvyporakuéra katu osegíta Jehová ehémplo ha ojoayhúta. Upe tiémpope, entéro Ñandejára siervokuéra oikóva yvágape ha ko yvy ape ári ombotuicháta chupe ha heʼíta: “Ñandejárape tojehovasa ha toñemeʼẽ tekomimbipa, arandu, agradesimiénto, ñemombaʼe, podér ha puʼaka opa ára g̃uarã. Taupéicha” (Apoc. 7:12). w17.02 2:16, 17

Rrevísta Ñemañaha 1 de junio de 1973-pe osẽ vaʼekue ingléspe, heʼi: “¿Ikatúpa ojevautisa umi tapicha ndopoíriva sigarríllo térã nákogui?”. Upéi orresponde ko porandu: “La Biblia ohechauka ndaikatuiha ojevautisa peichagua persóna”. Upéi osita unos kuánto téxto bíblico ha oexplika mbaʼérepa umi persóna ndopoiséiva ko vísiogui, oñemosẽmante vaʼerã kongregasióngui (1 Cor. 5:7). Ko rrégla ningo nomoĩri yvyporakuérante, síno ou “Ñandejáragui, omandáva Iñeʼẽ rupive”. Peteĩ lívro de rrelihión Estados Unidosgua heʼi: “Umi líder kristiáno pyʼỹinte orrevisa umi mbaʼe omboʼéva irrelihión, ikatu hag̃uáicha okambia oiméramo ihentekuérape ijetuʼúta oguerovia hag̃ua térã ndogustáirõ chupekuéra”. Ndaipóri ótra rrelihión oĩva dispuésto ojapopaitévo la Biblia heʼíva ijetuʼúramo isegidorkuérape ojapoháicha umi testígo de Jehová. w17.02 4:15

Umi ansiáno ningo iñumílde, upévare ndoipotái ojetrata chupekuéra peteĩ persóna ifamósovaicha. Haʼekuéra idiferentete voi umi líder rrelihióso koʼag̃agua ha Jesús tiémpope guarégui. Jesús heʼi vaʼekue umi rrelihión omoakãvare: “Oho jave karu guasuhápe oipota umi lugár iñimportantevéva. Ha umi sinagógape katu, oguapyse tenondete. Oipota ojesaluda chupekuéra umi plasahárupi” (Mat. 23:6, 7). Umi ansiáno osegi Jesús heʼi vaʼekue: “Ani peheja avave penerenói Mboʼehára. Pene Mboʼehára ningo peteĩnte, ha peẽ enterovéva oñoermáno. Ha ani peje, ore ru avavépe ko yvy ape ári. Peteĩnte pende Ru, oĩva yvágape. Ani avei peheja avave heʼi peẽme ‘che ruvicha’. Pende Ruvicha ningo peteĩnte, haʼe hína Cristo. Ha pe tuichavéva pende apytépe, oiko vaʼerã pene rembijokuáirõ” (Mat. 23:8-11). Ansianokuéra osegi jave koʼã mbaʼe Jesús heʼi vaʼekue, umi ermáno ohayhu, orrespeta ha omombaʼeve chupekuéra. w17.03 1:14, 15

Jadesidi porãséramo tekotevẽ jaipuru Ñandejára Ñeʼẽ. Káda uno jadesidi vaʼerã mbaʼépa jajapóta, ani jaheja avave odesidi ñanderehe. Upéva rangue, tekotevẽ ñaaprende mbaʼépa iporã Ñandejárape g̃uarã, ha jajapo upéva. Jadesidíramo peteĩ mbaʼe ótro ñanemboliga rupínte, ikatu hína jadesidi vai. Avei péicha jaheja hína ótro odesidi ñanderehe (Prov. 1:10, 15). Upéva ipeligrosoiterei. Ñande jajapo vaʼerã ñane konsiénsia heʼíva, péro ñahekomboʼe vaʼerã la Biblia rupive. Jahejáramo ótro odesidi ñanderehe, añetehápe jajapo hína haʼe oipotáva. Upéva ikatu ogueru ñandéve heta akãrasy. Apóstol Pablo heʼi vaʼekue umi ermáno Galasiaguápe ani hag̃ua oheja ótro odesidi hesekuéra (Gál. 4:17). Kongregasión de Galásiape oĩ vaʼekue ermáno odesidiséva hapicháre. w17.03 2:8-10

Josías oñehaʼãmbaite ikatu hag̃uáicha ombopyʼarory Jehovápe. Oiméramo nde nemitã, ikatu hína resegi Josías ehémplo, ha eñehaʼã eikuaa porãve Jehovápe. Oime vaʼerã Josías oaprende heta mbaʼe Manasésgui, haʼéva ijavuélo oñarrepenti vaʼekue hembiapo vaígui. Nde avei ikatu reaprende heta mbaʼe umi ermáno ijedávagui oĩva ne kongregasiónpe. Haʼekuéra omombeʼukuaa ndéve umi mbaʼe porã Jehová ojapóma vaʼekue hesekuéra. Avei, nemanduʼami mbaʼéichapa oñeñandu kuri Josías oleérõ guare Ñandejára Ñeʼẽ heʼíva. Haʼe oĩ dispuésto ojapóvo opa ikatúva ombovyʼa hag̃ua Jehovápe, ha ensegída ojapo umi kámbio tekotevẽva. Nde avei releéramo la Biblia, reĩvéta desidído neñeʼẽrendu hag̃ua Jehovápe. Upéi ne amista hendive imbaretevéta ha revyʼavéta. Avei reñeʼẽséta voi Jehováre umi héntepe (2 Crón. 34:18, 19). Restudia jave la Biblia ha rehechakuaa tekotevẽha reservi porãve Ñandejárape, eñehaʼãmbaite ejapo umi kámbio, Josías ojapo haguéicha. w17.03 3:18, 19