Septiembre

La Bíbliape ojepuru jave pe palávra aguánte ndeʼiséi jagueropuʼakanteha peteĩ situasión ijetuʼúva. Heʼise avei ñambohovái porãha umi provléma. Ñaaguantárõ ikatúta ñandepyʼaguasu, ñaneñeʼẽrendu ha ñanepasiénsia. Peteĩ lívro heʼi: “Pe aguánte ñanepytyvõ ani hag̃ua ñañentrega jahasa jave umi situasión ipohýiva ha jajerovia mbarete hag̃ua. Ñaaguanta jave, umi provléma nañandereitýi. Avei ñanepytyvõ ñañekonsentra hag̃ua umi mbaʼe porã jahupytysévare, ha ani hag̃ua ñapensaiterei ñane situasiónre”. Pe mborayhu ñanepytyvõ ñaaguanta hag̃ua (1 Cor. 13:4, 7). Por ehémplo, jahayhu rupi Jehovápe ikatu jagueropuʼaka oimeraẽ mbaʼe haʼe opermitíva jahasa (Luc. 22:41, 42). Jahayhu rupi ñane ermanokuérape ikatu ñaaguanta idefektokuéra (1 Ped. 4:8). Jahayhu rupi ñane ména térã ñane rembirekópe, ikatu ñaaguanta umi ‘provléma’ ohasáva umi matrimónio oĩ porãva jepe. Ha peichagua mborayhu ñanepytyvõ ñamombareteve hag̃ua ñane matrimónio (1 Cor. 7:28). w16.04 2:3, 4

Pe palávra griéga ojetradusíva “ojesareko meme” heʼise umi kristiáno ypykue oñehaʼãmbaite hague oñerreuni oadora hag̃ua Jehovápe. Péro pe goviérno romano ha umi líder rrelihióso oñepyrũ opersegi chupekuéra, ha ijetuʼuvéma oñerreuni hag̃ua hikuái. Upéicharõ jepe, umi kristiáno ojapo opa ikatúva osegi hag̃ua oñembyaty iñermanokuérandi. Koʼág̃arupi ñande jaservíva Jehovápe javyʼaiterei jareko haguére oportunida ñañerreuni hag̃ua. Ñapensamína ermáno George Gangas ehémplore. Haʼe oservi vaʼekue kómo miémbro del Kuérpo Governánte mas de 22 áño. Ko ermáno heʼi vaʼekue: “Chéve g̃uarã ndaipóri voi mbaʼeve igustovéva umi rreunióngui, pórke upépe akomparti ermanokuérandi ha chekyreʼỹeterei apytávo”. Upéi heʼi avei: “Che ningo ahaseterei voi umi rreuniónpe”. ¿Ndépa reñeñandu avei ermáno Gangas oñeñandu haguéicha rreunionhápe? Oimérõ upéicha, eñehaʼãmbaitékena siémpre reime rreunionhápe ne ermanokuérandi, sapyʼánte ijetuʼúramo jepe. Ehechauka Jehovápe repensaha rréi David opensa haguéicha. Haʼe heʼi vaʼekue: “Jehová, che ahayhueterei nde róga” (Sal. 26:8, TNM). w16.04 3:16-18

Sapyʼánte ningo ikatu jaʼe térã jajapo peteĩ mbaʼe oofendéva peteĩ ermánope. ¿Mbaʼépa jajapo vaʼerã péicha jave? Jaha vaʼerã ñañeʼẽ pe ermánondi. Péro ani ñanderesarái maʼerãpa jaha hína. Ndahaʼéi ñagana hag̃ua pe diskusión, térã jaipotágui pe ñaneofende vaʼekue orrekonose oreko hague la kúlpa. Jaha hína ñane ermáno rendápe ñasolusiona hag̃ua pe provléma ha jaiko jey hag̃ua pyʼaguapýpe. Abrahán ha isovríno Lot hymba heta vaʼekue, ha isirvientekuéra oñepyrũma oiko vai ofaltapa rupi chupekuéra lugár omongaru hag̃ua iñanimalkuéra. Péro Abrahán ndoikovaiséi, upévare heʼi Lótpe haʼe raẽ toiporavo pe lugár iporãvéva oho hag̃ua oiko (Gén. 13:1, 2, 5-9). ¡Ajépa iporãite Abrahán ehémplo! Haʼe nopensái ijehénte, síno oikose pyʼaguapýpe isovrínondi. ¿Ikatúpa jaʼe Abrahán ojeperhudika hague imbaʼeporã haguére? Nahániri. Upe riremínte Jehová opromete ovendesi hetataha chupe (Gén. 13:14-17). Jasegíramo umi konsého bíblico ha mborayhúpe ñasolusiona umi provléma, Jehová nañanderejareimoʼãi, síno tuicha ñanevendesíta. w16.05 1:11, 12

La Biblia rupive Jehová omeʼẽ ñandéve umi mandáto ohechauka porãva mbaʼépa haʼe oipota jajapo, térã ndoipotái. Por ehémplo, heʼi ndovaleiha ñamonda, jakaʼu, jaadora umi imáhen, térã ñanderekovai (1 Cor. 6:9, 10). Ha Ñandejára Raʼy Jesucristo, omeʼẽ vaʼekue avei idisipulokuérape peteĩ mandáto iñimportantetereíva: “Tapeho pemboʼe umi hénte opa tetãyguápe oiko hag̃ua chuguikuéra che disípulo; ha pevautisa Túva, Taʼýra ha espíritu sánto rérape. Ha pemboʼe chupekuéra ojapo hag̃ua opa mbaʼe amanda vaʼekue peẽme. Ha ¡péina!, aiméta penendive opa ára, og̃uahẽ meve huʼãme ko múndo ára paha” (Mat. 28:19, 20). Opa mbaʼe Jehová ha Jesús omandáva ñandéve, katuete ñanevenefisia. Ñandejára Léi ñanemboʼe ñañangareko hag̃ua ñandejehe ha ñane famíliare, ha ñanepytyvõ ikatu hag̃uáicha ñaneresãi ha jaiko vyʼápe. Ha iporãveha katu, jajapóramo opa mbaʼe Jehová omandáva ñandéve, umíva apytépe japredika pe marandu porã, haʼe katuete ñandeguerohory ha ñanevendesíta. w16.05 3:1

Jahejáramo Jehová espíritu ñandegia ifasilvétama ñandéve ñavense hag̃ua ñande devilida. Avei Jehová oguerohorýta umi mbaʼe ñapensáva, jaʼéva ha jajapóva. (Luc. 11:13; Gál. 5:22, 23). Upéicharõ jepe, tekotevẽta káda día jajekuida ani hag̃ua ñandereity ñande devilida (Prov. 4:23). Ñapensáramo mbegueterei ñamehoraha jahávo, ani ñanderesarái ndaikatumoʼãiha voi ñakambia sapyʼaitépe. Upearã ningo tekotevẽ ñanepasiénsia ha jasegi ñañehaʼã ikatu hag̃uáicha la Biblia ñanepytyvõ ñakambia hag̃ua. Ñepyrũrã ikatu hína jajeovliga jajapo hag̃ua pe iporãva. Péro kon el tiémpo ikatútama ñapensa ha ñañekomporta Jehovápe ogustaháicha, pórke jajoguavétama jahávo chupe (Sal. 37:31; Prov. 23:12; Gál. 5:16, 17). w16.05 4:14, 16

Koʼág̃arupi Jehová oipuru la Biblia, ijespíritu sánto ha pe kongregasión ñanemoldea hag̃ua. Jaipotáramo la Biblia ñanemoldea, jalee ha jajepyʼamongeta vaʼerã hese. Avei jajerure vaʼerã Ñandejárape tañanepytyvõ ñaneñeʼẽrendu hag̃ua chupe. Rréi David heʼi vaʼekue Jehovápe: “Pyharepyte apensa nderehe” (Sal. 63:6, TNM). Avei haʼe oskrivi kuri: “Jehová ningo omeʼẽ chéve heta konsého, ha amombaʼeguasúta chupe upévare. Sapyʼánte pyharekue jepe apensa ha ahechakuaa mbaʼépepa tekotevẽ amehora” (Sal. 16:7, TNM). David ojepyʼamongeta vaʼekue Jehová konséhore, ha oheja umíva omoldea umi mbaʼe opensáva ha oñandúva. Ha sapyʼánte ijetuʼúramo jepe chupe osegi hag̃ua peteĩ konsého, lomímonte oasepta (2 Sam. 12:1-13). ¿Mbaʼéichapa ikatu ñaneumílde ha ñaneñeʼẽrendu Jehovápe ojapo haguéicha David? Iporã ñañeporandumi: “Alee jave la Biblia, ¿ajepyʼamongetápa Jehová konséhore ha aheja umíva omoldea apensáva ha añandúva? ¿Tekotevẽpa amehorave ahávo?” (Sal. 1: 3). w16.06 1:11

Enterovéva ningo ñaneimperfékto ha jajavy. Upévare ñanepasiénsia vaʼerã, ha ani ñanderesarái ñane ermanokuéra heʼi térã ojapotanteha voi peteĩ mbaʼe noĩporãiva. Avei ndovaléi jarahaiterei enkuénta ótro ojavy jave, pórke upéicha ndajavyʼamoʼãi Jehová servísiope. Hiʼarive ñande fe oúta ikangy, ha ikatu voi jaheja Jehová organisasión. Upéva oikóramo, ndaikatumoʼãi jaservi Jehovápe ni ndajarekomoʼãvéima esperánsa jaiko hag̃ua pe múndo pyahúpe. Upéicharõ, ¿mbaʼépa ñanepytyvõta jasegi hag̃ua jaservi Jehovápe vyʼápe, oĩramo jepe ñaneofendéva? Ñanemanduʼa meme vaʼerã ko promésa porãitére: “Péina ajapóta yvága pyahu ha yvy pyahu. Yma guare opytáta tesaráipe, avave naimanduʼamoʼãi hese” (Is. 65:17, TNM; 2 Ped. 3:13). Upéicharõ, aníkena jaheja mbaʼeve ñanemomombyry Jehová ha ikongregasióngui. Péichamante haʼe ohupytykáta ñandéve entéro koʼã mbaʼe porãite. w16.06 4:13, 14

Pe fráse “Jehová ningo peteĩnte” heʼise avei ikatuha siémpre jajerovia hese ha haʼe katuete okumpliha oprometéva. Ñandejára núnka nokambiái, ni ndaijapúi. ¿Mbaʼéichapa ohechauka upéva? Por ehémplo, Jehová opromete vaʼekue Abrahánpe idesendientekuéra oikotaha pe Tiérra Prometídape. Haʼe ojapo heta milágro ohechauka hag̃ua chupekuéra nokambiái hague. Ha 430 áño upe rire okumpli ipromésa (Gén. 12:1, 2, 7; Éx. 12:40, 41). Heta áño upe rire, Jehová heʼi umi isrraelítare haʼekuéra haʼeha itestígo. Haʼe heʼi chupekuéra: “Che nakambiái. Che mboyve ni che rire, ndaipóri ótro”. Ha ohechauka hag̃ua núnka nokambiaiha la opromete vaʼekue, heʼi: “Che núnka nakambiái” (Is. 43:10, 13, TNM; 44:6; 48:12). Añetehápe umi isrraelíta oreko vaʼekue pe priviléhio oservívo Jehovápe, pórke haʼe núnka nokambiái ha siémpre ikatu ojejerovia hese. Ha ñande avei koʼág̃a jareko upe priviléhio (Mal. 3:6; Sant. 1:17). w16.06 3:6, 7

Koʼág̃arupi, la majoría umi goviérno oreko heta soldádo ha umi sistéma de segurida imodérnova, ovihila hag̃ua umi frontéra. Péicha ojasegura ani hag̃ua mbaʼeve ni avave oapeligra pe país. Péro koʼã goviérno ndohechakuaái oĩha peteĩ goviérno ipoderosovéva yvágape, ha pe Mburuvicha haʼe hína Jesucristo. Koʼẽrõitéma Cristo goviérno oñorairõta entéro umi goviérno ko yvy arigua kóntrape (Is. 9:6, 7; 56:10; Dan. 2:44). ¡Hiʼãitéma ningo og̃uahẽ upe tiémpo! Péro tekotevẽ ñaime preparádo upe árape g̃uarã. Upévare ñande ñañatende porã hína mbaʼéichapa oñekumpli umi profesía oĩva la Bíbliape, ha jasegi jaservi porã Jehovápe (Sal. 130:6). Ñande jaiko ko múndo ára pahaitépe, upévare tekotevẽ ñañatende porã ikatu hag̃uáicha ñaĩ alérta. Amáske hiʼag̃ui pe fin, ijetuʼuvéta ñañemantene hag̃ua alérta. Itristetereíta ningo koʼág̃a japytáramo jake. w16.07 2:2, 9, 10

Pablo ningo oikuaa porã nomereseiha Ñandejára imbaʼeporã hendive, pórke heta opersegi vaʼekue umi kristiánope. Pablo omano mboyvemi, oskrivi vaʼekue Timotéope: “Aagradeseterei ñande Ruvicha Cristo Jesúspe, haʼe omeʼẽ chéve podér ha ojerovia rupi cherehe oheja che kárgope ajapo hag̃ua peteĩ tembiapo” (1 Tim. 1:12-14). ¿Mbaʼe tembiapópa raʼe upéva? Pablo heʼi vaʼekue umi ansiáno Efesoguápe: “Nacherakateʼỹi che rekovére, ikatúma guive adipara ko karréra ipahaite peve ha amohuʼã pe tembiapo ñande Ruvicha Jesús omeʼẽ vaʼekue chéve, aikuaauka hag̃ua hekoitépe umi marandu porã oñeʼẽva Ñandejára mbaʼeporã ijojahaʼỹvare” (Hech. 20:24). Pablo opredika kyreʼỹ vaʼekue, ha péicha omoĩ ñandéve ehémplo porã. Umi mbaʼe haʼe ojapóva, ohechauka oagradeseha Ñandejárape imbaʼeporãiterei haguére hendive. w16.07 4:1-3

Oime vaʼerã ñande katuete ñambaʼaposeve Jehová servísiope. Péro ñapensamína hetáma ñahaʼarõ hague algún priviléhio kongregasiónpe, ha ndajahupytýi, térã jaservi porãseve Jehovápe ha ñane sirkunstánsia nomeʼẽi. Ñapensamína Abrahán ehémplore. Jehová opromete kuri chupe ifamiliataha, péro ohasa heta áño, ha upéi ae Sara hyeguasu ha onase Isaac. Abrahán ipasiénsia ha siémpre ojerovia Jehováre ohaʼarõ aja (Gén. 15:3, 4; 21:5; Heb. 6:12-15). Heta vése ningo ijetuʼu ñanepasiénsia (Prov. 13:12). Péro jaikóramo ñapensaiterei ñane situasiónre, katuete ñañedesanimáta. Ikuentave jaipuru porã ñane tiémpo ñamehorave hag̃ua kómo kristiáno. Jaleéramo la Biblia ha jajepyʼamongeta hese, ñanearanduvéta, ñaneentendidovéta ha jadesidi porãta. Péicha káda día ikatúta jaipuru umi mbaʼe ñaaprendéva jadesidi hag̃ua Jehová oipotaháicha. Por ehémplo, jaikuaáta mbaʼéichapa jatrata vaʼerã ótrope, mbaʼéichapa jaipuru vaʼerã ñande pláta, ha mbaʼéichapa ñañemonde ha jajediverti vaʼerã. w16.08 3:9-11

Jehová oipytyvõ ipuévlope ogana hag̃ua umi amalequítape ha pe ehérsito Etiopiaguápe. Avei, omombarete Nehemíaspe ha umi judíope omopuʼã jey hag̃ua Jerusalén murálla. Péicha avei, Jehová ñanemombaretéta jasegi hag̃ua japredika jarekóramo jepe heta mbaʼe ñandepyʼapýva, oĩramo oñemoĩva ñanderehe térã nohenduséiva pe mensáhe jagueraháva (1 Ped. 5:10). Jehová ndojapomoʼãi peteĩ milágro ikatu hag̃uáicha oñesolusionamba ñane provlemakuéra. Ñaaguantaséramo, ñamoĩ vaʼerã ñande párte. Jalee vaʼerã la Biblia káda día, jajeprepara rreunionrã ha ndajafaltái. Avei jajapo vaʼerã ñande estúdio personál, ñande estúdio de família ha jajerure Jehovápe tañanepytyvõ. Jaaprovechapaite vaʼerã umi mbaʼe Jehová omeʼẽva ñandéve ñanemokyreʼỹ hag̃ua. Jahechakuaáramo nañanekyreʼỹmbaiha jajapo hag̃ua peteĩ mbaʼe Jehová ojeruréva, ñañemboʼe vaʼerã chupe. Péicha jahecháta mbaʼéichapa ijespíritu ñanemombarete jajapose hag̃ua opa mbaʼe haʼe oipotáva. w16.09 1:12

Apóstol Pablo oakonseha vaʼekue umi kristiánope opyta hag̃ua soltéro. Upéicharõ jepe orrekomenda vaʼekue avei pe jaleéva ñande téxto koestediaguápe. Upéi heʼi: “Péro ndojejokokuaáirõ tomendánte hikuái, cháke iporãvéta omendáramo oiko rangue iñakãraku”. Peteĩ persóna ndojejokokuaáiramo ikuentave omenda, pórke pe matrimónio ikatu oipytyvõ chupe ani hag̃ua ojejavyky térã hoʼa inmoralida sexuálpe. Péro umi soltéro opensa vaʼerã orekómapa eda omenda hag̃ua. Pablo heʼi: “Oĩramo opensáva ndaikatumoʼãiha ojejoko, ha ndahaʼéi la imitãitereíva, upéicharõ haʼe ojapo vaʼerã ko mbaʼe: tomenda omendaséramo, upéva ndahaʼéi pekádo” (1 Cor. 7:9, 36; 1 Tim. 4:1-3). Umi mitãrusu ha mitãkuña oĩ pe eda iñakãrakuvehápe, péro ndahaʼéi upe haguérente ñande ñamboligátava chupekuéra omendántema hag̃ua. ¿Mbaʼérepa? Pórke ikatu hína pe mitãrusu térã mitãkuña neʼĩra gueteri iñakãguapy porã ha noĩri preparádo omenda hag̃ua. w16.08 1:17

Umi hénte omañávo ñane píntare, oñeimahina jepi mbaʼeichagua persónapa ñande (1 Sam. 16:7). Jaservi rupi Jehovápe, nañamondeséi peteĩ ao ñandegusta rupínte, térã ikómodogui reínte ñandéve. Ñande ningo jarahase enkuénta la Biblia heʼíva. Upévare, ndajaipuruiete umi ao ñandejopypáva, mbykýva térã iséxiva, ha péicha jaju jahechauka umi mbaʼe ndajahechaukái vaʼerã. Sapyʼánte oĩ oñeñandu vaíva pórke ótro oñemonde vai, térã omaña vaʼerã ótro ládo ani hag̃ua omaña hese. Péro ñande ndajaipotái avave oñeñandu vai ñande káusare. Umi hénte ñanderrespetavéta ha omombaʼevéta Jehová organisasión, ñanepotĩramo, jajearregla porãrõ, ha ñamondéramo umi ao idesénteva. Ñane ehémplo ikatu avei omomýi chupekuéra oñemoag̃uise hag̃ua Jehováre, ha oĩve hag̃ua dispuésto ñanerendúvo japredika jave chupekuéra. w16.09 3:5, 6

Eñeʼẽ jave ótra persónandi pe kreasiónre térã la Bíbliare, eñehaʼã eaverigua raẽ mbaʼépa oguerovia. Oĩ oroviáva pe evolusión ha avei okree Ñandejára oexistiha. Koʼãichagua persóna opensa Ñandejára oipuru hague pe evolusión okrea hag̃ua opa mbaʼe oikovéva. Ótro katu ojerovia pe evolusiónre pórke oñemboʼe eskuéla ha koléhiope. Oĩ avei ndojeroviavéiva Ñandejárare pórke odesepsiona chupe umi rrelihión. Opa umívare, reñeʼẽ jave peteĩ persónandi eporandu raẽ chupe mbaʼépa orovia ha mbaʼérepa. Rejapysaka porãramo hese, haʼe ikatu avei nerendu porã. ¿Mbaʼépa ikatu rejapo oĩramo oñembohorýva nderehe rejerovia haguére Ñandejárare? Nderrespetuóso vaʼerã, ha ejerure chupe toexplika ndéve mbaʼéichapa haʼe opensa oñepyrũ hague oexisti entéro mbaʼe oikovéva. Ikatu ere chupe oiméramo pe evolusión siérto hína, pe primera sélula oaparese vaʼekue tekotevẽta hague oñemultiplika. Peteĩ profesór de kímika heʼi: “Ñanesorprende jahechávo mbaʼéichapa peteĩ sélula jepe oikotevẽ hetaiterei mbaʼe ombaʼapo porã hag̃ua”. w16.09 4:12, 13

Ñapensamína mbaʼépa oiko vaʼekue Nabot ha Zacarías rehe. Chupekuéra ojejapi itápe omano meve, iñeʼẽrendu rupi Jehovápe (1 Rey. 21:3, 15; 2 Crón. 24:20, 21). Daniélpe katu ojepoi peteĩ yvykuápe oĩháme heta león vareʼa, ha mbohapy iñamígope ojepoi peteĩ órno hakuetereívape. Enterovéva koʼã kuimbaʼe oĩ dispuésto omanóvo, ani hag̃ua oadora umi dios fálsope (Dan. 3:16-18, 20, 28; 6:13, 16, 21-23; Heb. 11:33, 34). Heta proféta oaguanta avei umi mbaʼe ijetuʼúva. Por ehémplo, oĩ oñembohorýva hesekuéra, térã ojegueraha chupekuéra préso. Umíva apytépe oĩ Micaya ha Jeremías. Avei ambue proféta “oiko vaʼekue okañy kañy desiértore, serrohárupi, itakuárupi ha yvykuápe”, Elías ojapo haguéicha. Upéicharamo jepe, entéro koʼã proféta ifiél, pórke oguerovia “pyʼamokõiʼỹre oikotaha katuete” umi mbaʼe ohaʼarõva (Heb. 11:1, 36-38; 1 Rey. 18:13; 22:24-27; Jer. 20:1, 2; 28:10, 11; 32:2). w16.10 3:10, 11

Iñimportanterei ningo jarresivi porã umi extranhérope oho jave hikuái Salónpe. Sapyʼánte haʼekuéra hiʼotĩ ha ijetuʼu chupekuéra ojeheʼa hag̃ua. Ikatu avei opensa umi persóna ótra rrása térã ótro tetãgua iñimportanteveha chuguikuéra. Upévare, ñande voi tekotevẽ mborayhúpe ñañemboja hendapekuéra ha jahechauka ñañeinteresaha hesekuéra. Ikatu avei jaipuru JW Language ñaaprende hag̃ua algún salúdo pe persóna idiómape (Filip. 2:3, 4). Sapyʼánte ningo ndajaikuaái ni mbaʼépa jaʼéta ñañemongeta jave peteĩ extranhérondi. ¿Mbaʼépa ikatu jajapo péicha jave? Ñamombeʼukuaa chupe algúna kósa, por ehémplo umi mbaʼe ñandegustáva térã jajapóva jepi. Jajapóramo péicha, ikatu jahechakuaa hína jajojoguaha heta mbaʼépe. Ñanemanduʼa vaʼerã avei káda kultúra orekoha umi kostúmbre iporãva ha avei umi naiporãmbáiva. w16.10 1:13, 14

La Biblia heʼi enterovéva ikatuha ñamoĩ ñande párte pe kongregasión ipotĩ hag̃ua. Jahechamína mbaʼépa oiko vaʼekue kongregasión de Coríntope. Pablo ohayhu vaʼekue umi ermáno upepeguápe. Haʼe oipytyvõ hetápe oaprende hag̃ua pe añetegua (1 Cor. 1:1, 2). Ñañeimahinamína mbaʼéichapa oñeñandu oikuaárõ guare oĩha upépe hekovaíva, ha umi ermáno osegiha ojeheʼa hese. Pablo heʼi umi ansiánope: “Pemeʼẽ vaʼerã pe kuimbaʼe Satanáspe”. Haʼekuéra omosẽ vaʼerã upe hembiapo vaívape kongregasióngui (1 Cor. 5:1, 5-7, 12). Koʼág̃a avei, umi ansiáno ikatu omosẽ kongregasióngui peteĩ ermánope noñarrepentíriramo. Oikóramo upéva, jatrata vaʼerã upe persónape la Biblia heʼiháicha. Péicha ñaipytyvõta pe kongregasión osegi hag̃ua ipotĩ. Avei ñaipytyvõta pe hembiapo vaívape ohechakuaa hag̃ua tekotevẽha oñarrepenti ha ojerure Jehovápe toperdonami chupe. w16.11 2:14

Umi palávra de ánimo tuichaiterei oporomokyreʼỹ. Rubén heʼi: “Heta áñorema alucha ani hag̃ua apensa ndavaleiha mbaʼeverã. Chemanduʼa peteĩ vuéltape asẽ hague apredika peteĩ ansiánondi. Haʼe ohechakuaa nachekoʼẽporãi hague. Amombeʼu chupe umi mbaʼe añandúva ha haʼe ojapysaka porã cherehe. Ha omensiona chéve heta mbaʼe ajapo porãva. Avei chemomanduʼa Jesús heʼi hague ñande javaleveha umi guyraʼígui. Pyʼỹinte chemanduʼa upe téxtore, pórke opokoiterei cherehe. Chemokyreʼỹeterei ningo umi mbaʼe heʼi vaʼekue chéve” (Mat. 10:31). Ndareíri la Biblia heʼi iñimportanteha ñañomokyreʼỹ meme. Apóstol Pablo oskrivi vaʼekue umi kristiáno hebréope: “Pesegi peñomokyreʼỹ káda día. [...] Ani peichahágui pemohatã pene korasõ pe pekádo penembotavy rupi” (Heb. 3:13). Ajépa ñañeñandu porã oĩ jave ñanemokyreʼỹva. w16.11 1:2, 3

Áño 313-pe d.C., Constantino ogoverna tiémpope Roma, olegalisa pe kristianísmo apóstata. Upe rire, pe iglésia oñepyrũ ombaʼapo umi governánte románondi. Constantino ojapo vaʼekue peteĩ rreunión heta líder rrelihiósondi, ha pe rreuniónpe oñembohéra Concilio de Nicea. Upe rire, haʼe omosẽ pe siudágui peteĩ saserdóte héravape Arrio, pórke noĩri de akuérdo Jesús haʼeha Ñandejára. Upéi, Teodósiogui oiko emperadór de Roma, ha pe Iglésia Katólikape oñemoĩ kómo rrelihión prinsipál pe impériope. Umi istoriadór heʼi umi románogui oiko hague “kristiáno” Teodosio tiémpope. Péro, ¿siértopa upéva? Nahániri, upe tiémpope oiko chuguikuéra kristiáno guaʼu ha péicha oike hikuái Babilonia Guasúpe, oĩháicha avei umi ótra rrelihión japu Rómape. Upéicharõ jepe, upérõ oĩ gueteri kuri kristiáno unhído ifiélva ha ojapo hikuái ikatúva guive oadora hag̃ua Ñandejárape haʼe oipotaháicha (Mat. 13:24, 25, 37-39). w16.11 4:8, 9

La Biblia heʼi: “Pe Aña, okorre oikóvo pende jerére peteĩ león pochýicha ha oñehaʼã omokõ oimeraẽvape” (1 Ped. 5:8; Apoc. 12:17). Upévare ko múndope jahasa heta situasión ipohýiva ha ñanekevrantaitereíva. Ñandejára siervokuéra yma guare ohasa avei koʼãichagua situasiónre. Por ehémplo, rréi David heta vése ojepyʼapyeterei vaʼekue (Sal. 13:2). Avei, apóstol Pablo “káda día [ojepyʼapy] entéro umi kongregasiónre” (2 Cor. 11:28). Ha ñande, ¿mbaʼépa ikatu jajapo ñañekevrantaiterei jave? Ñande Ru yvagapegua ñanderayhuetéva, oipytyvõ isiervokuéra yma guarépe ipyʼaguapy hag̃ua, ha koʼág̃a ñanepytyvõse avei. ¿Mbaʼépa ikatu jajapo Ñandejára ñanepytyvõ hag̃ua? Ñañemboʼe, jalee la Biblia ha jajepyʼamongeta hese, jajerure Jehovápe ijespíritu sánto, ha ñamombeʼu peteĩ persóna ñakonfiávape mbaʼéichapa ñañeñandu. w16.12 3:1, 2

Síglo primérope, Coríntope oĩ vaʼekue kuimbaʼe oikóva kuimbaʼéndi, kuña oikóva kuñándi, omondáva, oporomoakãratĩva, omombaʼeguasúva taʼanga ha ikaʼúva. Péro oikuaa rire Jehovápe, ohayhu chupe ha ou okambia. Haʼekuéra ombyasy umi mbaʼe vai ojapo vaʼekue yma (Rom. 6:21; 1 Cor. 6:9-11). Umi kristiáno Romagua tekotevẽ vaʼekue avei ojapo koʼãichagua kámbio. Pablo heʼi chupekuéra: “Anive pemeʼẽ pende rete pekádope ojapo hag̃ua ivaíva. Upéva rangue peñemoĩ Ñandejára pópe, peikove jeyramoguáicha omanóva apytégui. Pemoĩ pende rete Ñandejára pópe ojapo hag̃ua iporãva” (Rom. 6:13). Pablo oĩ kuri segúro koʼã kristiáno ikatuha ojapo pe iporãva, ha osegitaha oñevenefisia Ñandejára mbaʼeporã ijojahaʼỹvagui. w16.12 1:13

Jehová ningo ñandeapo porãiterei vaʼekue. Omeʼẽ ñandéve pe kapasida ikatu hag̃uáicha ñasolusiona umi provléma ha ñapensa ñane renonderãre (Prov. 2:11). Avei ñanepytyvõ jahupyty hag̃ua ñane méta (Filip. 2:13). Jehová omeʼẽ ñandéve pe konsiénsia, upéicha rupi jaikuaa mbaʼépa oĩ porã ha mbaʼépa oĩ vai. Ñane konsiénsia ñanepytyvõ ani hag̃ua japeka, ha oimérõ jajavy jakorrehi hag̃ua umi mbaʼe vai jajapo vaʼekue (Rom. 2:15). Iñeʼẽ ningo ñanemokyreʼỹ jey jey ikatu hag̃uáicha jaipuru ñande kapasida jajapo hag̃ua iporãva. Por ehémplo, Escrituras Hebréaspe heʼi: “Umi oplanea porãva la ojapótava, katuete osẽ porã”. Heʼi avei: “Oimeraẽ mbaʼe ikatúva rejapo reikove aja, rejapo vaʼerã nde pyʼaite guive” (Prov. 21:5; Ecl. 9:10, TNM). Escrituras Griegas Cristiánaspe katu heʼi: “Jareko aja oportunida, jajapo memékena iporãva opavave rehehápe”. Ha ótra pártepe heʼi: “Ñandejára omeʼẽ káda únope peteĩ rregálo, ha oñemeʼẽ haguéicha peẽme, peiporupaitékena upéva peservi hag̃ua ótrope” (Gál. 6:10; 1 Ped. 4:10). Jahechaháicha, Jehová oipota jajapo umi mbaʼe ñanevenefisiátava ñandéve ha avei ótrope. w17.01 1:1, 2

Adán ha Eva opeka rupi, entéro yvypóra ñaneimperfékto ha ñamano. Upéicharõ jepe jareko gueteri pe liverta jadesidi hag̃ua. Upéva ojekuaa porã Ñandejára otrata lájare umi israelítape. Por ehémplo, Jehová oheja kuri haʼekuéra oelehi oikosépa ipuévloramo (Éx. 19:3-6). Pe nasión oasepta oiko Ñandejára puévloramo ha oñekompromete orrespetataha umi límite oñemoĩva chupekuéra. Haʼekuéra heʼi: “Ore rojapóta opa mbaʼe Jehová heʼíva guive” (Éx. 19:8, TNM). Ñambyasýramo jepe, upe rire umi israelita opyrũ iñeʼẽre. Ko ehémplo ñanemboʼe peteĩ mbaʼe iñimportantetereíva: ñamombaʼéramo pe liverta jarekóva jadesidi hag̃ua, ñaneñeʼẽrendúta Jehovápe ha ñañemoag̃uíta hese. w17.01 2:9

Jeroboán ogoverna vaʼekue Israel, péro naiñeʼẽrendúi Jehovápe. Haʼe omopuʼãka kuri peteĩ altár siuda de Betélpe ojeadora hag̃ua upépe peteĩ dios fálsope. Upévare Jehová omondo Judágui iprofétape ikatu hag̃uáicha ontrega ko rréipe peteĩ mensáhe okondenáva chupe. Ko proféta ojapo Ñandejára heʼi haguéicha, ha Jehová oprotehe chupe Jeroboángui (1 Rey. 13:1-10). Jehová omanda kuri pe profétape ani hag̃ua okaru ni hoyʼu Israélpe, ha ojevývo hógape oho hag̃ua ótro tapérupi. Upépe ojotopa peteĩ karai ijedávandi, ha heʼi chupe orekoha peteĩ mensáhe Jehovágui. Ko karai oinvita pe profétape oho hag̃ua hógape okaru ha hoyʼu. Kavalete Jehová heʼi kuri chupe ani hag̃ua ojapo koʼã mbaʼe, upéicharõ jepe haʼe naiñeʼẽrendúi ha oho pe karaíndi. Jehovápe ndogustái la ojapóva. Pe proféta oho jeývo hógape, peteĩ león osẽ haperãme ha ojuka chupe (1 Rey. 13:11-24). Ndajaikuaái ningo mbaʼérepa pe proféta ohendu kuri pe karai ijedávape, iñeʼẽrendu rangue Jehovápe. Péro ojekuaa porã tekotevẽ hague iñumildeve. w17.01 4:1-3

Jaʼekuaa pe primera fráse oĩva la Bíbliape isensilloha, péro avei hypyʼũeterei. Upépe heʼi: “Iñepyrũme Ñandejára ojapo vaʼekue yvága ha yvy” (Gén. 1:1, TNM). Añetehápe saʼieterei jaikuaa umi mbaʼe Jehová ojapo vaʼekuégui ko univérso tuichakuére. Por ehémplo nañantendeporãi mbaʼépa pe espásio, pe lus ha pe graveda (Ecl. 3:11). Péro Jehová omombeʼu ñandéve mbaʼépa opensa ojapo ko yvýgui ha yvyporakuéragui. Haʼe ñandeapo ijoguaháramo ha oipota vaʼekue jaiko vyʼápe ko yvy ape ári (Gén. 1:26). Péicha yvyporakuéra haʼéta Ñandejára raʼy, ha Ñandejára katu haʼéta ñande Túa. Génesis kapítulo 3 omombeʼu Jehová propósito ojejokoʼimi hague (Gén. 3:1-7). Péro jaikuaaháicha, ndaipóri mbaʼeveichagua provléma Jehová ndaikatúiva osolusiona, ha ndaipóri avave ikatu vaʼerã ojoko chupe (Is. 46:10; 55:11). Upévare, ñande ñai segúro haʼe okumplitaha hembipota itiempoitépe. w17.02 1:1, 2

¿Ikatúpa raʼe umi israelita ohechakuaa Ñandejára espíritu oipytyvõ hague Moiséspe? Si, pórke pe espíritu sánto omeʼẽ podér Moiséspe ojapo hag̃ua milágro ha oikuaauka hag̃ua Ñandejára réra faraónpe, pe governánte ipoderósova (Éx. 7:1-3). Avei, pe espíritu sánto oipytyvõ Moiséspe ipyʼaporã ha ipasiénsia hag̃ua. Añetehápe ojekuaa porãiterei Jehová oiporavo hague Moiséspe ogia hag̃ua ipuévlope. ¿Mávapepa Jehová omeʼẽ avei ijespíritu ogia hag̃ua ipuévlope? La Biblia heʼi: “Josué, Nun raʼy, henyhẽ arandúgui, Ñandejára podér omeʼẽgui chupe” (Deut. 34:9, TNM). Avei, “Jehová omeʼẽ ijespíritu Gedeónpe” (Juec. 6:34, TNM). Ha la Biblia heʼi avei: “Jehová espíritu omeʼẽ fuérsa Davídpe” (1 Sam. 16:13, TNM). Entéro koʼã kuimbaʼe ojerovia rupi Ñandejára espíriture, ojapo heta mbaʼe ndaikatumoʼãiva kuri ojapo ijehegui reínte (Jos. 11:16, 17; Juec. 7:7, 22; 1 Sam. 17:37, 50). w17.02 3:3-5

Entéronte ikatu ñaaprende apóstol Pablo ehémplogui. Haʼe oikuaa umi ermáno orekoha derécho odesidívo la ojapótava ha orrespeta chupekuéra. Koʼág̃a avei umi ansiáno ojapo vaʼerã upéicha omeʼẽ jave konsého umi ermánope. Por ehémplo umi ermáno tekotevẽtarõ odesidi peteĩ mbaʼe, ansianokuéra oipuru Ñandejára Ñeʼẽ ha umi puvlikasión oakonseha hag̃ua chupekuéra. Péro oheja vaʼerã umi ermáno odesidi la ojapótava, pórke amo ipahápe káda uno jajecháta umi mbaʼe jadesidívare. Jahechaháicha, ñande ikatu ñaipytyvõ ótrope ontende hag̃ua umi konsého oĩva la Bíbliape ha ojapo hag̃ua upépe heʼíva. Upéicharõ jepe, káda ermáno odesidi vaʼerã la ojapótava. Ha odesidi porã jave hikuái, tuicha oñevenefisia. Jahechakuaa upéicharõ núnka nañapensái vaʼerãha ikatuha jadesidi ñane ermanokuérare. w17.03 2:11

Pe Kuérpo Governánte ohechauka ojerovia mbareteha ha omotenonde pe predikasión. Ha ñande, ¿jaapojápa chupekuéra ko tembiapo iñimportantetévape? Oimérõ jajapo hína upéva, javyʼáta ñahendúvo la Jesús heʼíva ñandéve: “Pejapóvo iporãva peteĩ koʼã che ermáno michĩvéva rehehápe jepe, cherehehápe pejapo hína” (Mat. 25:34-40). Jesús oho rire yvágape ndohejareíri vaʼekue isegidorkuérape (Mat. 28:20). Haʼe oikuaa porã pe espíritu sánto, umi ánhel ha Ñandejára Ñeʼẽ oipytyvõ hague chupe odirihi hag̃ua idisipulokuérape oĩrõ guare ko yvy ape ári. Upéicha avei haʼe oipytyvõ pe tembiguái jeroviahápe koʼã tiémpope. Pe Kuérpo Governánte osegi “pe Ovecharaʼýpe toho ohohápe” (Apoc. 14:4). Ñande avei jasegi jave umi instruksión omeʼẽva pe Kuérpo Governánte, añetehápe jasegi hína ñande Líderpe, Jesús. Koʼẽrõitéma haʼe ñandegiáta ikatu hag̃uáicha jahupyty pe jeikove opaveʼỹva (Apoc. 7:14-17). Ndaipóri ni peteĩ yvypóra ikatu vaʼerã opromete ñandéve upéva. w17.02 4:17-19

Jajerure vaʼerã Jehovápe tañanepytyvõ, jahasárõ jepe umi provléma michĩva térã tuicháva. Iporã ñapensami koʼã mbaʼére: ¿Jajeroviápa ñandejehénte ñañehaʼã jave ñasolusiona peteĩ provléma? ¿Térãpa jahecha raẽ mbaʼépa heʼi la Biblia ha upéi ñañehaʼã jasegi umi konsého? Ñamoĩ chupe ñane hentekuérape ndogustaiha jaha rreunionhápe ni asambleahápe. ¿Jajerurétapa Jehovápe ohechauka hag̃ua ñandéve mbaʼépa ikatu jajapo ko situasiónpe? Térã ñapensami japerdeha ñande traváho ha ijetuʼuha ñakonsegi hag̃ua ótro. Oĩramo ñanemombaʼaposéva, ¿jaʼétapa chupe jaha vaʼerãha rreunionhápe káda semána? Tahaʼe haʼéva pe situasión jahasáva, ñanemanduʼa vaʼerã pe salmísta heʼi vaʼekuére pe téxto koestediaguápe. w17.03 4:6