Febrero

Jehová heʼírõ guare Noépe ojapo hag̃ua pe árka, haʼe ndoikuaái kuri mbaʼéichapa ojapóta. Haʼe ojerovia vaʼerã kuri Jehováre, ha la Biblia heʼi Noé ojapo hague Ñandejára “heʼi hagueichaite chupe”. ¿Mbaʼépa ojehupyty upe haguére? Pe árka rupive ojesalva Noé ha ifamiliakuéra. Noé haʼe vaʼekue avei peteĩ túa ikatupyrýva, pórke ojerovia Ñandejára arandúre. Haʼe omboʼe porã ifamiliakuérape ha omoĩ chupekuéra ehémplo porã. Hiʼarive ijetuʼu hendive, pórke pe ama guasu mboyve umi hénte iñañaiterei vaʼekue (Gén. 6:5). Oiméramo nde peteĩ túa, ¿mbaʼéichapa ikatu rejapo “ojeʼe hagueichaite” ndéve? Ehendu vaʼerã Jehovápe. Eheja tanepytyvõ remongakuaa hag̃ua ne família. Esegi umi konsého haʼe omeʼẽva Iñeʼẽ ha iñorganisasión rupive. Sapyʼánte tuakuéra oñehaʼãmbaitéramo jepe omboʼe porã ifamíliape, lomímo jeýnte ikatu oheja hikuái Jehovápe. Péro tuakuéra ojapóramo la ikatúva guive ohekomboʼe hag̃ua umi mitãme, ikonsiénsia potĩta opytávo ha ndoperdemoʼãi la esperánsa ifamília ikatúne hag̃ua oñemoag̃ui jey Jehováre. w18.03 páh. 30 párr. 10, 11

¿Noiméipa hína ñaporoinvitase jepi, péro upéi jaju ñapensa ndaikatumoʼãiha jajapo upéva? Por ehémplo, ikatu ñaneotĩ ha ñapensa ñane invitadokuéra ndovyʼamoʼãiha. Ikatu avei ñanemboriahu ha jajepyʼapy ndaikatumoʼãi rupi jaofrese ñande visítape umi ótro ermáno oofreséva. Péicha jave iporã ñanemanduʼa natekotevẽiha ñande róga iporãiterei japororresivi hag̃ua. Ñaneamávlerõ ha ñande róga iñordenádo ha ipotĩramo, ñane invitadokuéra ovyʼaitereíta avei ñanendive. Ñande ningo ñainvita ñane ermanokuérape jahayhúgui chupekuéra, upévare ndajaikói vaʼerã jajepyʼapyeterei ótra kósare. Aníkena ñanderesarái iñimportantetereiha jahechauka ñañeinteresaha ñane invitadokuérare (Filip. 2:4). Entéro ermáno ningo omombeʼuse umi mbaʼe ohasáva. Ha ñainvita jave chupekuéra, jareko oportunida ñahendu hag̃ua umi mbaʼe ohasa vaʼekue. Peteĩ ansiáno heʼi: “Ainvita rupi ermanokuérape che rógape, antende porãve chupekuéra ha ikatu avei aikuaa heta mbaʼe chuguikuéra, por ehémplo mbaʼéichapa oikuaa kuri pe añetegua”. Jahechaukáramo ñañeinteresaha ñane invitadokuérare, katuete jahasa porãitereíta oñondive. w18.03 páh. 17 párr. 15-17

Tuakuéra ningo oipytyvõse ifamíliape odesidi porã hag̃ua opa mbaʼe. Haʼekuéra oikuaa ndovaleiha ojoko chupe oimérõ ojevautisaséma, pórke upéva ikatu odesanima ifamíliape (Sant. 4:17). Péro ojevautisa mboyve, tuakuéra ohecha raẽ vaʼerã añetehápepa ifamília oĩma preparádo oiko hag̃ua chugui Jesús disípulo. Heta superintendénte ojepyʼapy ohechávo oĩha heta mitãrusu ha mitãkuña michĩ guive oikuaámava pe añetegua, péro ndojevautisáiva gueteri. La majoría umíva apytégui oho rreunionhápe, osẽ predikasiónpe ha heʼi ijehe haʼeha testígo de Jehová. ¿Péro mbaʼérepa upéicharõ ndojedesidíri ojevautisa? Sapyʼánte ituakuéra voi heʼi chupekuéra ohaʼarõvénte hag̃ua. w18.03 páh. 8 párr. 1, 2

Jasegiséramo Cristo ehémplo, tekotevẽ jaikuaa mbaʼéichapa haʼe opensa, oñeñandu ha ojapo entéro mbaʼe. Jesúspe g̃uarã iñimportanteve vaʼekue iñamista Jehovándi opa mbaʼégui. Ñande ñañehaʼãramo ñahaʼanga Jesúspe, jajoguavéta avei Jehovápe. Upévare ñañehaʼã vaʼerã ñapensa Jesús opensaháicha. ¿Mbaʼépa ñanepytyvõta upearã? Jesús disipulokuéra ojesareko porã kuri umi milágro haʼe ojapóvare, ohendu mbaʼéichapa haʼe omboʼe umi héntepe, ohecha mbaʼéichapa otrata opaichagua persónape ha ohechakuaa hikuái Jesús ojapoha Jehová oipotáva (Hech. 10:39). Ñande koʼág̃a ndaikatúi jahecha Jesúspe. Péro jareko umi rreláto oñeʼẽva hese, umíva ñanepytyvõ jaikuaa porã hag̃ua chupe. Jalee ha jajepyʼamongeta jave umi mbaʼe jatopávare lívro de Mateo, Marcos, Lucas ha Juánpe ikatu ñaaprende Jesús opensa lája. Umi mbaʼe ñanepytyvõta jaguata hag̃ua “hekoitépe ipyporére” ha ñapensa hag̃ua “Cristo opensa haguéicha” (1 Ped. 2:21; 4:1). w18.02 páh. 22 párr. 15, 16

Ymaite guive, Ñandejára siervokuéra oaprende Jehovágui mbohapy hendáicha: pe kreasión rupive, umi ótro siérvo ifiélva rupive, ha ohechávo mbaʼéichapa Jehová ovendesi chupekuéra iñeʼẽrendu haguére (Is. 48:18). Noé ojesarekóvo pe kreasiónre, oñemeʼẽ enkuénta oĩha heta mbaʼe ohechaukáva Ñandejára oexistiha. Avei upéicha oaprende Ñandejára orekoha heta kualida porã. Koʼã mbaʼe oipytyvõ Noépe ontende hag̃ua Jehová ipoderosoitereiha, ha haʼe añoite haʼeha pe Dios verdadéro (Rom. 1:20). Péicha rupi Noé ndahaʼéi vaʼekue okreénteva Ñandejára oexistiha, síno ou ojerovia mbarete hese. Noé oiméne oaprende raʼe Jehovágui ihentekuéra rupive. Por ehémplo, itúa Lamec ojerovia vaʼekue Jehováre ha onase Adán omano mboyve gueteri. Noé avuélo ningo haʼe vaʼekue Matusalén. Itataravuélo katu haʼe vaʼekue Jared, ha omano Noé orekórõ guare 366 áño (Luc. 3:36, 37). Noé omombaʼeterei entéro mbaʼe oaprendéva, ha upéva omomýi chupe oservi hag̃ua Jehovápe (Gén. 6:9). w18.02 páh. 9 párr. 4, 5

Ñande ningo nañahaʼarõiete ñandetrata vai ñane ermanokuéra térã ñane hentekuéra. Upéicha rupi ikatu ñañeñandu vaieterei oikóramo umi mbaʼe. ¿Mbaʼépa jajapokuaa ndaikatúiramo ñanderesarái la oiko vaʼekuégui? ¿Jasegítapa ñandepochy, inklusíve heta áñore? ¿Térãpa jasegíta umi konsého oĩva la Bíbliape ha ñasolusiona pyaʼe umi provléma? Amáske jaheja ohasa heta tiémpo, ijetuʼuvéta ñasolusiona hag̃ua pe provléma. ¿Mbaʼépa ikatu rejapo reime porã jey hag̃ua hendive? Primeroite voi eñemboʼe vaʼerã Jehovápe. Ejerure chupe tanepytyvõ eñemongeta porãnte hag̃ua upe ermánondi. Aníkena nderesarái upe ermáno neofende vaʼekue haʼeha avei Jehová amígo, ha haʼe ohayhuetereiha iñamigokuérape (Sal. 25:14). Jehová ningo otrata porãiterei iñamigokuérape, ha haʼe oipota ñande avei jajapo upéva (Prov. 15:23; Mat. 7:12; Col. 4:6). Segundo, epensa porã vaʼerã la erétavare. Oiméne ningo pe ermáno noñemeʼẽinte enkuénta ikatu hague neofende. Nemanduʼa vaʼerã ikatuha nde avei erekoʼimi la kúlpa pe oiko vaʼekuére. w18.01 páh. 10 párr. 15, 16

La majoría umi hénte oĩva ko múndope ndoporohayhúi. Péro Jehová siervokuéra ndaupéichai, haʼekuéra ohayhu añete hapichápe ha ymaite guive voi ojapo upéicha. Jesús heʼi vaʼekue pe segundo mandamiénto iñimportantevéva oĩva pe Léi Mosáikape haʼeha hína jahayhu ñande rapichakuérape. Sólamente pe primer mandamiénto heʼíva jahayhu vaʼerãha Ñandejárape la iñimportantevéva chugui (Mat. 22:38, 39). Jesús heʼi vaʼekue avei umi kristiáno verdadérope ojekuaataha ojoayhu rupi (Juan 13:35). Haʼekuéra ohayhúta iñenemigokuérape jepe (Mat. 5:43, 44). Jesús ningo siémpre ohechauka vaʼekue ohayhu añeteha umi héntepe. Haʼe oho peteĩ puévlogui ótrope oñeʼẽ hag̃ua umi persónape umi mbaʼe porã Ñandejára Rréino ojapótavare. Omonguera avei umi siégope, ikarẽvape, ilépravape, nohendúivape, ha omanóvape jepe omoingove jey (Luc. 7:22). Ha ndahaʼéi upévante, omano kuri entéro yvypóra rehehápe. Upévare ikatu jaʼe Jesús osegi hague itúa ehémplo, pórke haʼe oporohayhueterei vaʼekue. Koʼág̃a avei, testígo de Jehová oparupigua ohaʼanga Jesúspe ohayhúvo hapichápe. w18.01 páh. 29, 30 párr. 11, 12

Ikatu ningo reiméma preparádo rejevautisa hag̃ua nemitãitirõ jepe. Péro ndaikatúi reikuaa mbaʼe pruévapa oñepresentáta ndéve amo gotyove ¿Mbaʼépa nepytyvõta ndefiél hag̃ua? Siémpre ereko vaʼerã enkuénta reñemeʼẽma hague Jehovápe. Upéva heʼise repromete hague pe Rréi del univérsope reservitaha chupe toiko la oikóva, ohejáramo jepe Jehovápe nde sy, nde túa térã ne amigokuéra (Sal. 27:10). Tahaʼe haʼéva situasiónpe, ejerure vaʼerã Jehovápe tanepytyvõ siémpre rekumpli hag̃ua pe promésa rejapo vaʼekue chupe (Filip. 4:11, 12). Jehová ningo ndepota iñamigorã. Péro jaikuaaháicha, ndahaʼéi la ifásilva remantene hag̃ua upe amista ha rehupyty hag̃ua pe salvasión. Filipenses 2:12 heʼi: “Peñehaʼãmbaitékena Ñandejára pendesalva hag̃ua”. Ñapensa porã vaʼerã mbaʼépa jajapóta ani hag̃ua ñañemomombyry Jehovágui, ha ñandefiél hag̃ua chupe toiko la oikóva. Ñanemanduʼa vaʼerã avei umi oservi arémava Jehovápe jepe sapyʼánte ofalla hague avei. Upévare, aníkena ejeroviaiterei ndejehe. w17.12 páh. 24 párr. 4, 6, 7

Jehová omeʼẽ ñandéve pe oportunida jaapoja hag̃ua umi traváho ojejapóva iñorganisasiónpe. Ha upéva peteĩ priviléhio tuichaitereíva. Haʼe opromete ñanevendesitaha katuete jajapóramo upéva (Mal. 3:10). Haʼe heʼi voi oho porãvetaha umi ipojerávape (Prov. 11:24, 25). Ha ndahaʼéi upévante, la Biblia heʼi voi: “Javyʼaiteve ñameʼẽvo, ñandéve oñemeʼẽ rangue” (Hech. 20:35). Umi mbaʼe jaʼe ha jajapóva rupive ikatu hína ñamboʼe ñane família ha umi ipyahúvape, oikuaa hag̃ua mbaʼéichapa ikatu avei omeʼẽ hikuái ikontrivusión ha ohupyty heta vendisión. Opa mbaʼe jarekóva ningo ou Jehovágui. Upévare, ñameʼẽramo chupe umi mbaʼe jarekóvagui, jahechauka jahayhuha chupe ha ñamombaʼeha la omeʼẽva ñandéve. Umi israelita omeʼẽrõ guare ikontrivusión ojejapo hag̃ua pe témplo, “pe puévlo ovyʼa ojapo haguére [...] ofrénda voluntária” (1 Crón. 29:9). Ñande avei jasegi vaʼerã ñandepojera Jehovándi ha ñameʼẽ chupe pe haʼe omeʼẽvagui ñandéve. Upéicha jajapóramo, javyʼa ha ñañeñandu porãitereíta. w18.01 páh. 21 párr. 18, 19

Pe primera rresurreksión oiko Cristo presénsia oñepyrũ riremi. Umi unhído oikovéva pe jehasa asy guasu aja “ojegueraháta [...] pe araíre” (1 Tes. 4:13-17; Mat. 24:31). ¿Mbaʼépa heʼise upéva? Umi ojeguerahátava yvágape ndopytamoʼãiha “ñemanóme” heta tiémpore, síno “peteĩ tesapirĩme” oñekambiáta hikuái “ipu vove pe última trompéta” (1 Cor. 15:51, 52). Ñane tiémpope, la majoría umi kristiáno ifiélva ndahaʼéi unhído, ha ndojeporavói oho hag̃ua yvágape ogoverna Crístondi. Upéva rangue ohaʼarõ “ Jehová ára”, oñehunditahápe ko múndo aña. Ndajaikuaái ningo arakaʼetépa oúta pe fin, péro jaikuaa porã hiʼag̃uimbaitemaha (1 Tes. 5:1-3). Ñandejára múndo pyahúpe oikóta peteĩ rresurreksión idiferénteva. Ko yvy ape ári opuʼã jeýta hetaiterei persóna omano vaʼekue ikatu hag̃uáicha oiko peteĩ paraísope. Haʼekuéra orekóta peteĩ esperánsa iporãitereíva, pórke oikóta chuguikuéra yvypóra perfékto, ha núnka nomanomoʼãvéima. w17.12 páh. 11 párr. 15; páh. 12 párr. 18, 19

Ñañehaʼãmbaitéramo japorohayhu ha ñanembaʼeporã, nañaenvidiamoʼãi ñande rapichápe. Ñandejára Ñeʼẽ heʼi: “Pe mborayhu ipasiénsia ha imbaʼeporã, naiñenvidiósoi” (1 Cor. 13:4). Ani hag̃ua ñaneenvidióso, jahecha vaʼerã opa mbaʼe Jehová ohechaháicha. Upévare Iñeʼẽme oñekompara pe kongregasión peteĩ kuérpore, ha ñande jarekórõ enkuénta upéva, ñantende porãvéta ñane ermanokuérape. La Biblia heʼi: “Peteĩvape oñembotuicháramo, enterove umi ótro ovyʼapa hendive” (1 Cor. 12:16-18, 26). Oikóramo peteĩ mbaʼe porã ñane ermánore, javyʼa vaʼerã hendive, ndahaʼéi ñaenvidia vaʼerã chupe. Ñapensamína rréi Saúl raʼy ehémplore, hérava Jonatán. Davídpe ojeporavo vaʼekue oiko hag̃ua chugui rréi, péro Jonatán naiñenvidiósoi, jepe haʼe opyta vaʼerã kuri itúa rendaguépe. Upéva rangue Jonatán omokyreʼỹ Davídpe ha oapoja chupe (1 Sam. 23:16-18). ¿Ikatúpa ñande avei japorohayhu ha ñanembaʼeporã Jonatán ojapo haguéicha? w17.11 páh. 27 párr. 10, 11

Ñande kristianokuéra ningo natekotevẽi ñakumpli pe Léi Mosáika heʼíva. ¿Mbaʼérepa upéicharõ Jehová omoĩ upe Léi la Bíbliape? Oipotágui ñantende “umi mbaʼe iñimportantevéva”, térã ñantende maʼerãpa oñemoĩ pe Léi, ha jajapo la ñaaprendéva (Mat. 23:23). Pe Léi Mosáikape oĩ “heta mbaʼe omopyendáva pe añetegua”. Umíva ñanemboʼe heta mbaʼe Jehovágui ha opensa lájagui (Rom. 2:20). Por ehémplo, umi siuda de rrefúhio omboʼe ansianokuérape ohusga vaʼerãha tekojojápe. Avei ñanemboʼe entérope jajoayhu ha jajoporiahuvereko vaʼerãha (Zac. 7:9). Ñande nañaimevéiramo jepe pe Léi poguýpe, Jehová nokambiái. Pe hustísia ha miserikórdia iñimportanteterei gueteri chupe g̃uarã. ¡Ajépa tuichaite mbaʼe jaservi haguére Ñandejárape! Ñañehaʼãmbaitékena jasegi iñehémplo porãite ha jajerrefuhia hese. w17.11 páh. 13, 14 párr. 2, 3; páh. 17 párr. 18, 19

Oiméramo nde peteĩ ermáno rejapóva jepi diskúrso, ojekuaa vaʼerã umi téxto haʼeha umi mbaʼe iñimportantevéva nde diskúrsope (Juan 7:16). Upévare eñatende vaʼerã mbaʼéichapa ejapo nde diskúrso ha mbaʼéichapa reipuru umi ehémplo térã umi istória. Nemanduʼa vaʼerã umi téxto bíblico la orresaltave vaʼerãha la nde diskúrsope. Aníkena repensa relee haguérente la Biblia remboʼemaha la upépe heʼíva. Reipurúramo hetaiterei téxto, hasyvéta umi nerendúvape imanduʼa hag̃ua umívare upe rire. Upévare eiporavo porã vaʼerã umi téxto releétava. Upéi elee, emyesakã, emoĩ ehémplo ha ere mbaʼéichapa ikatu ñamoĩ en práktika (Neh. 8:8). Repreparáta jave peteĩ voského de diskúrso, eñehaʼã vaʼerã entende mbaʼéichapa umi téxto omopyenda umi mbaʼe omboʼeséva pe voského. Péro la iñimportantevéva hína ejerure vaʼerã Jehovápe tanepytyvõ remboʼe porã hag̃ua ermanokuérape Iñeʼẽ (Esd. 7:10). w17.09 páh. 26 párr. 11, 12

Ñandejára puévlo ningo oĩ vaʼekue prisionéro Babilóniape 70 áñore, ha áño 537-pe a.C. ojelivera chupekuéra. Ovyʼaiterei ningo hikuái ikatu haguére oho jey Jerusalénpe omyatyrõ hag̃ua pe témplo, ha ikatútagui oadora jey Jehovápe. Un áño rire, umi israelita omoĩma pe témplo simiénto. Upéicha rupi, 16 áñoma ohasa ha Jehová témplo neʼĩraiti oñetermina. Upévare Jehová omomanduʼa kuri ipuévlope anive hag̃ua opensa ijehénte, ha oñemboja jey hag̃ua hese. Upévare, áño 520-pe Jehová omondo proféta Zacaríaspe omomanduʼa hag̃ua ipuévlope maʼerãpa haʼe olivera kuri chupekuéra Babilóniagui. Zacarías réra ningo heʼise voi “ Jehová imanduʼa”. Umi israelita hesaráiramo jepe mbaʼépa Jehová ojapo hesehapekuéra, haʼe ndahesaráiri chuguikuéra (Zac. 1:3, 4). Jehová opromete oipytyvõtaha ipuévlope ikatu hag̃uáicha ojeadora jey chupe haʼe oipotaháicha. Péro heʼi avei umi israelítape oadora vaʼerãha chupe ipyʼaite guive ikatu hag̃uáicha haʼe oguerohory chupekuéra. w17.10 páh. 21, 22 párr. 2, 3

Umi doktór heʼi japoroporiahuverekóramo, ñaneresãi ha jajogueraha porãveha ñande rapichándi. Ñaipytyvõ jave umi osufrívape katuete javyʼave, ñandepositivove, nañañeñandúi ñaneaño ha ñapensave umi mbaʼe iporãvare. Jahechaháicha, ñande voi ñañevenefisia ñaipytyvõramo ótrope. Jahayhu ha ñaipytyvõramo ñande rapichápe, ñane konsiénsia oĩta trankílo jaikuaágui jajapoha Jehová oipotáva. Jaiporiahuverekóramo ótrope, ñanepytyvõta ñañatende porã hag̃ua ñane famíliare, jajogueraha porãve hag̃ua ñane ména térã ñane rembirekóndi ha ñane amigokuérandi. Avei, peteĩ persóna imbaʼeporãva oikotevẽramo, katuete oĩta oipytyvõva chupe (Mat. 5:7; Luc. 6:38). Jahechaháicha, tuicha ñanevenefisia jaiporiahuverekórõ ñande rapichápe. Péro ñande jajapo upéva jasegise rupi Jehová ehémplo, ha ñamombaʼeguasu hag̃ua chupe. Ndaipóri ningo haʼéicha oporohayhu ha oporoporiahuverekóva (Prov. 14:31). w17.09 páh. 12 párr. 16, 17

Jesús ningo rréi ha saserdóte, ha oñenkarga chupe “omopuʼã hag̃ua Jehová témplo”. Áño 1919-pe ojapo kuri upéva omosãsórõ guare Ñandejára puévlope Babilonia Guasu poguýgui. Avei upérõ Jesús omoĩ porã jey pe kongregasión ha onombra pe tembiguái jeroviaha ha iñarandúvape. Ko grúpo de ermáno unhído odirihi pe tembiapo iñimportantetéva ojejapóva ko yvy ape ári, pe témplo espirituál tuichaitéva korapýpe (Mat. 24:45). Jesús omopotĩ avei Ñandejára siervokuérape ikatu hag̃uáicha omombaʼeguasu hikuái Jehovápe haʼe oipotaháicha (Mal. 3:1-3). Jesús ha umi 144.000 rréi ha saserdóte ogovernáta Mil Áñore. Upe tiémpo aja oipytyvõta hikuái entéro yvypóra iñeʼẽrendúvape iperfékto hag̃ua. Umi rréi ha saserdóte omohuʼã vove itraváho, Jehová siervokuéra iñeʼẽrendúva añoite opytáta ko yvy ape ári. Upe tiémpope ojeadora jeýta Jehovápe haʼe oipota haguéicha iñepyrũ guive. w17.10 páh. 29 párr. 15, 16

Peteĩ persóna oporojuka vaʼekue por aksidénte, pyaʼe oho vaʼerã peteĩ siuda de rrefúhio hiʼag̃uivévape ikatu hag̃uáicha ojeporiahuvereko chupe (Jos. 20:4). Haʼe pyaʼe og̃uahẽ vaʼerã pe siudápe ha opyta vaʼerã upépe omano meve pe saserdóte prinsipál, péicha añoite ikatúta oikove. Jahechaháicha, pe oporojuka vaʼekue ojesakrifika heta vaʼerã kuri. Haʼe tekotevẽ oheja itraváho, hóga ha ndorekovéima liverta oho hag̃ua ohosehápe. Ijetuʼúramo jepe upéva, haʼe oikuaa hekove ovaleveha oimeraẽ sakrifísiogui. Koʼág̃a avei, peteĩ pekadór oñarrepentíva ohejaite vaʼerã hembiapo vai ikatu hag̃uáicha Ñandejára operdona chupe. Avei omboyke vaʼerã oimeraẽ mbaʼe ikatúva ogueraha vai chupe ha opeka jey. Peteĩ opekáva ojapóramo tekotevẽva guive ohejaitéma hag̃ua umi mbaʼe vai, ohechaukáta hína Jehovápe ojepyʼapyha isituasiónre, ha omombaʼetereiha haʼe oiporiahuvereko haguére chupe (2 Cor. 7:10, 11). w17.11 páh. 10 párr. 10, 11

Jehová omanda ñandéve ñanembaʼeporã ha jarresivi porã hag̃ua ñane ermanokuérape (1 Juan 3:17). Péro jajapo vaʼerã upéva ñande pyʼaite guive. Upévare iporã ñañeporandu: “¿Ainvitápa che rógape sólamente che amigokuérape ha umi ermáno orekóvape priviléhio iñimportánteva kongregasiónpe? ¿Chembaʼeporãpa umi ndaikuaaporãivandi ha avei umi ndaikatumoʼãivandi omyengovia chéve?” (Luc. 14:12-14). Ñamoĩ chupe peteĩ ermáno odesidi vai hague álgo ha oikotevẽ ajúda, térã ñainvita jepi peteĩ persónape ñande rógape, péro núnka ndoagradeséiva ñandéve. ¿Mbaʼépa jajapóta upéicha jave? Koʼã situasiónpe jajapo vaʼerã pe téxto koestediagua heʼíva. Katuete ningo javyʼáta jarresivi porãramo ñande rapichakuérape ha jajapóramo upéva ñande pyʼaite guive (Hech. 20:35). w17.10 páh. 9 párr. 12

Potifar rembireko ojegusta kuri Josére, haʼéva “peteĩ mitãkariaʼy porã ha imbaretéva”. Upévare pyʼỹinte pe kuña oñekuaveʼẽ vaʼekue chupe. Péro José oĩ desidído ndoʼamoʼãiha upe tentasiónpe. Upéi, pe kuñakarai ojagarrárõ guare chupe ijaógui oñeno hag̃ua hendive, haʼe osẽ odipara upégui ¿Mbaʼépa ikatu ñaaprende José ehémplogui? Oñepresentáramo peteĩ tentasión, ñañehaʼãmbaite vaʼerã jagueropuʼaka (Prov. 1:10). Heta ermáno oikuaa mboyve Jehovápe, ojepokuaa vaʼekue okaru rasa, okaʼu, opita, ojedroga, hekovai térã ojapo ambue mbaʼe ivaíva. Koʼã ermáno ojevautisa rire jepe ikatu ostira jey chupekuéra koʼã mbaʼe. Oikóramo ñanderehe upéicha, ñapensa vaʼerã mbaʼéichapa japytáta Jehová renondépe ndajajejokóiramo. Upévare jahecha vaʼerã mbaʼéicha javépa ikatu oñepresenta pe tentasión, ha mbaʼépa jajapokuaa jajehekýi hag̃ua upe situasióngui (Sal. 26:4, 5; Prov. 22:3). Peichahágui oñepresentáramo peteĩ tentasión, jajerure Jehovápe tañanemoarandu ha tañanepytyvõ jajejokokuaa hag̃ua. w17.09 páh. 4, 5 párr. 8, 9

¿Mbaʼéichapa ikatu jahechauka jaikoseha Jehová amígoramo? Ñañehaʼãmbaitévo ani hag̃ua ñañentremeteterei umi negósiope, ha jahekávo umi “mbaʼerepy teetéva”. Abrahán ningo ojapo vaʼekue upéva. Haʼe iñeʼẽrendu Jehovápe ha oheja pe siuda irrikoitéva hérava Ur oiko hag̃ua óga kárpape, omombaʼeve rupi iñamista Jehovándi (Heb. 11:8-10). Abrahán ojerovia meme Ñandejárare ojerovia rangue umi mbaʼerepýre (Gén. 14:22, 23). Jesús omokyreʼỹ umi hendive oĩvape osegi hag̃ua koʼãichagua persóna ifiélva ehémplo. Peteĩ jey, haʼe heʼi vaʼekue peteĩ mitãkariaʼy irríkovape: “Rejaposéramo hekopete opa mbaʼe, tereho evende nde kosakuéra ha emeʼẽ umi imboriahúvape. Upéicha reguerekóta mbaʼerepy yvágape, ha eju chemoirũ” (Mat. 19:21). Pe kuimbaʼe ndojeroviái kuri Ñandejárare Abrahán ojapo haguéicha. Péro oĩ vaʼekue heta ótra persóna ojerovia meme vaʼekue Jehováre. w17.07 páh. 10 párr. 12

Abrahán okrusa rire rrío Éufrates, ohasa jey 430 áño, ha upépe ae ifamiliarégui oñeforma pe tetã oikótava pe Yvy Oñepromete vaʼekuépe (Éx. 12:40-42; Gál. 3:17). Abrahán oĩ vaʼekue dispuésto ohaʼarõvo, pórke ni michĩmi ndodudái Jehová okumplitaha ipromésa. Haʼe ojerovia vaʼekue hese (Heb. 11:8-12). Abrahán ovyʼa kuri ndohecháiramo jepe oñekumpli entéro umi mbaʼe Ñandejára opromete vaʼekue chupe. Añetehápe haʼe ovyʼaitereíta oñemoingove jey vove chupe pe paraísope. Katuete oñesorprendéta olee vove umi mbaʼe ojeʼéva hese ha ifamíliare heta párte la Bíbliape. Avei ovyʼaitereíta ontende vove iñimportánte hague la ojapóva oñekumpli hag̃ua Jehová rembipota, por ehémplo pe oñeʼẽva pe desendénsia oñepromete vaʼekuére. Og̃uahẽ vove upe tiémpo, Abrahán ohechakuaáta nohaʼarõreíri hague. w17.08 páh. 5, 6 párr. 10, 11

La Biblia oipuru jave pe palávra tekokyʼa noñeʼẽi pe tekovaírente. Ikatu avei ojerreferi peteĩ persóna opitávare térã omombeʼúvare chíste tieʼỹ (2 Cor. 7:1; Efes. 5:3, 4). Jaʼekuaa avei peteĩ persóna hekokyʼaha hembiapo vaíramo ñemiháme, por ehémplo oleéramo lívro tieʼỹ térã ohecháramo pornografía. Peteĩ persóna ojepokuaáramo ojapo koʼã mbaʼe, ikatu oñepyrũ ojejavyky ha péicha hekokyʼáma. Umi persóna ojepokuaáva ohecha pornografía, tódo el tiémpoma oreko pe deséo vai iñakãme ha oñenvisia pe séxore. Umi expérto heʼi koʼãichagua persóna ojoguaitereiha umi oñenvisiávape vevída térã drógare. Jahechaháicha, umi ojepokuaáva ohecha pornografía tuicha ojeperhudika ijupe voi. Heta hénte orekóva ko vísio opyta otĩeterei, norrendivéi itraváhope, iprovléma hogapýpe, ojedivorsia ha oĩ voi katu ojesuisidáva. w17.08 páh. 19 párr. 8, 9

Umi israelita oho jeýrõ guare Jerusalénpe, pe salmísta imanduʼa mbaʼéichapa Jehová oipytyvõ kuri chupekuéra. Añetehápe pe salmísta ipyʼaguapy oikuaávo Ñandejára oasegura porãha Jerusalén rokẽ oprotehe hag̃ua isiervokuérape. Sapyʼánte ningo jajepyʼapyeterei jepi ñane provlemakuérare, péro Jehová ñanemoarandu ñambohovái porã hag̃ua umíva. Pe salmísta heʼi: “Ñandejára omanda pe yvýpe mbaʼépa oipota oiko, ha sapyʼaitépe oikóma la haʼe heʼíva”. Upéi pe salmísta oñeʼẽ niéve, eláda ha amandáure, ha oporandu: “¿Máva piko oaguantáta la ára roʼy?”. Upéi heʼi avei: “Ñandejára omanda ha pe iélo hykupa” (Sal. 147:15-18). Jehová ningo oikuaa entéro mbaʼe ha ndaipóri ikatuʼỹva ojapo. Haʼe oreko ipoguýpe pe niéve ha pe amandáu, upéicharõ katuete ñanepytyvõkuaa ñambohovái hag̃ua oimehaichagua situasión ijetuʼúva. w17.07 páh. 20 párr. 14, 15

Jehová goviérno ningo la iporãvéva ha tekotevẽ jaapoja ñande pyʼaite guive. ¿Mbaʼérepa? Pórke Jehová okrea vaʼekue entéro mbaʼe, upévare haʼe añoite omerese ogoverna tahaʼe yvágape térã ko yvy ape ári. Satanás ndokreái mbaʼevete asy, upévare nomereséi ogoverna ko univérso. Haʼe, Adán ha Eva opuʼã vaʼekue Jehováre, ha péicha ohechauka omboykeha igoviérno (Jer. 10:23). Haʼekuéra oreko kuri liverta odesidi ha ojapo hag̃ua la ojaposéva, péro upéva ndeʼiséi orekoha derécho oñemoĩvo Ijapoharére. Jahechaháicha, koʼã rrevélde opuʼãvo Ñandejárare oipuru vai pe liverta orekóva odesidi hag̃ua. Ñande yvyporakuéra ñaikotevẽ Jehová ñanegoverna ha ñandegia. w17.06 páh. 27, 28 párr. 2-4

Ñamombaʼéramo pe predikasión jasegíta japredika oĩramo jepe ñandepersegíva, ojapo haguéicha apóstol Pablo (Hech. 14:19-22). Por ehémplo, áño 1930 guive 1944 peve ojepersegi mbarete vaʼekue ñane ermanokuéra Estados Unidosguápe. Upéicharõ jepe haʼekuéra osegi opredika. Umi autorida ojokosérõ guare pe predikasión, ñane ermanokuéra ogueraha umi káso trivunálpe ha heta vése ogana hikuái. Áño 1943-pe, ermáno Nathan Knorr omensiona peteĩva umi káso ñagana vaʼekue pe Tribunal Supremo de Estados Unídospe. Haʼe heʼi ndaikatumoʼãi hague oñepresenta ni peteĩ káso pe trivunálpe umi ermáno ndopredikavéirire. Avei heʼi umi ermáno oparupigua osegi rupi opredika, ohechauka hague umi opuʼãva ikóntrape ndaikatuiha ojoko chupekuéra. Jahechaháicha, ñamombaʼéramo pe predikasión ndajahejamoʼãi mbaʼeve ñandejoko jasegi hag̃ua japredika. Ñamombaʼéramo pe predikasión, nañapensamoʼãi iñimportanteha jajapónte heta óra káda mes. Upéva rangue, ñañehaʼãmbaitéta jaikuaauka “hekoitépe umi marandu porã” (2 Tim. 4:5). w17.06 páh. 11, 12 párr. 11, 12

Jahayhúramo Ñandejárape jajapóta umi mbaʼe omandáva ñandéve, jagueropuʼakáta umi situasión ijetuʼúva ha ñanembojeguarúta umi mbaʼe vai (Sal. 97:10). Satanás ha imúndo oñehaʼãmbaite ñanemokangy ani hag̃ua jahayhuve Ñandejárape. Ko múndope umi hénte ndohechái pe mborayhu Ñandejára ohechaháicha. Haʼekuéra ijehénte ojepyʼapy ohayhu rangue Ñandejárape (2 Tim. 3:2). Satanás múndo oipota jahayhu “ñande rete rembipota vai, ñande resa oipotáva, ha jaiko jajechaukase umi mbaʼe jarekóvare” (1 Juan 2:16). Apóstol Pablo oavisa porã vaʼekue umi kristiánope ndohoporãmoʼãiha chupekuéra oikóramo hete rembipota vai rapykuéri. Haʼe heʼi: “Ñapensa meméramo ñande rete rembipotáre, ñamanóta [...], oikóta ñandehegui Ñandejára enemígo” (Rom. 8:6, 7). Umi persóna oipurupaitéva itiémpo ombyaty hag̃ua pláta ha oñemeʼẽ hag̃ua tekovaípe, amo ipahápe ndovyʼái jey ha oike heta akãrasýpe (1 Cor. 6:18; 1 Tim. 6:9, 10). w17.05 páh. 18 párr. 5, 6

Umi ermáno oĩva kómo rrefuhiádo ohechauka vaʼerã agradeseha opa mbaʼe umi ermáno lokál ojapóva hesehapekuéra. Péicha umi oipytyvõva chupekuéra ikyreʼỹta osegi hag̃ua ojapo upéva. Iporãta umi rrefuhiádo mbeguekatúpe oñehaʼãrõ oñangareko ijehe, upéicha ovyʼavéta, pórke nopensamoʼãi haʼeha peteĩ kárga avavépe, ha ojogueraha porãvéta iñermanokuérandi (2 Tes. 3:7-9). Jahechakuaa upéicharõ umi rrefuhiádo oikotevẽha ñaipytyvõ chupekuéra. Natekotevẽi ñandepláta heta jajapo hag̃ua upéva, ñamboykénte vaʼerã tiémpo ha jahechauka ñañeinteresaha. Ikatu ñaipytyvõ chupekuéra oviahakuaa hag̃ua kolektívope ha ojoguakuaa hag̃ua hiʼupy iporãva ha ndahepýiva. Ikatu avei ñaipytyvõ chupekuéra okonsegi hag̃ua peteĩ mákina de kosér, térã mákina oikytĩ hag̃ua pásto ikatu hag̃uáicha ochangea mimi. Péro amo ipahápe la iñimportantevéva hína ñaipytyvõ chupekuéra oñemoag̃ui hag̃ua kongregasiónre. Oĩramo ñande posivilidápe, ikatu jajeofrese jaraha hag̃ua chupekuéra rreunionhápe. Iporãta avei ñasẽramo japredika hendivekuéra ikatu hag̃uáicha oikuaa mbaʼéichapa oñeʼẽ vaʼerã umi hénte ñande territoriopeguápe. w17.05 páh. 5 párr. 11, 12

Heta persóna omotenonde rupi umi mbaʼe oipotáva ha chupekuéra ogustáva, ndohechái hekópe porã umi mbaʼerepy (1 Cor. 2:14). Avei ndohechakuaái mbaʼépa iporã ha mbaʼépa ivai (Heb. 5:11-14). Koʼãichagua persóna kon el tiémpo oipota potave umi mbaʼerepy, ha amáske oreko noñekontentái (Ecl. 5:10). Péro oĩ hína peteĩ mbaʼe ikatúva jajapo ani hag̃ua ova ñanderehe umi hénte opensa lája. Por ehémplo, jalee meméramo la Biblia ñanepytyvõta ani hag̃ua jahayhu umi mbaʼerepy. Jesús ojepyʼamongeta vaʼekue Jehová arandúre, upéicha rupi omboyke umi tentasión omoĩ vaʼekue chupe Satanás (Mat. 4:8-10). Ani hag̃ua jaju ñamotenonde umi mbaʼerepy, jasegi vaʼerã umi konsého omeʼẽva ñandéve Jehová. Péicha jajapóramo, jahechaukáta jahayhuveha Jesúspe jahayhu rangue umi mbaʼerepy. w17.05 páh. 26 párr. 17