Marzo

¿Oĩ piko ñane kongregasiónpe la ndokaeporãiva ñandéve? Nañañehaʼãiramo jajapo álgo ñakambia hag̃ua la ñapensáva hese, jasegíta ndajachaʼéi ñande rapicháre. La Biblia heʼi japororresivi porãramo ikatuha jajogueraha porãve ñane rapichándi, umi ñane enemígondi jepe (Prov. 25:21, 22). Oĩramo peteĩ mbaʼe nandegustáiva ne ermánore, iporãta reinvitáramo chupe nde rógape. Upéva ikatu hína nepytyvõ rekambia hag̃ua la repensáva hese ha rejogueraha porãve hag̃ua hendive. Ikatu voi reñepyrũ rehechakuaa umi kualida porã Jehová ohecha vaʼekue hese oguerúrõ guare chupe iñorganisasiónpe (Juan 6:44). Ñainvitávo umi ermánope jahayhúgui chupekuéra, koʼýte nohaʼarõiramo ñandehegui jajapo upéva, ikatu hína ñañemoag̃uive hesekuéra. ¿Mbaʼépa ikatu jajapo pe mborayhu ñanemomýi hag̃ua? Pe konsého oĩva pe téxto koestediaguápe ñanepytyvõkuaa. Ñapensa vaʼerã mbaʼépepa ivaleve ñandehegui umi ermáno. Ikatu jahechakuaa ojeroviaveha, oaguantáma hague hetave mbaʼe ha umícha. Jahechakuaáramo umi kualida porã orekóva hikuái jahayhuvéta umi ermánope ha ifasilvéta ñandéve jarresivi porã hag̃ua chupekuéra. w18.03 páh. 17 párr. 18, 19

Tuakuérape ningo ijetuʼueterei jepi ojapo hag̃ua Jehová heʼíva ifamília oúramo oñemosẽ kongregasióngui. Peteĩ ermána heʼi la oiko vaʼekue hese imembykuña oñemosẽrõ guare kongregasióngui ha oho hógagui. Haʼe heʼi: “Aheka umi puvlikasiónpe peteĩ mbaʼe oservi vaʼerã chéve de exkúsa ahasa hag̃ua tiémpo che memby ha che niétandi”. Péro iména mborayhúpe oipytyvõ chupe ohechakuaa hag̃ua haʼekuéra noĩveimaha rresponsávle ifamíliare, ha iñimportantetereiha ojapo hikuái Jehová heʼíva. Tiémpo rire ifamília ovolve jey kongregasiónpe. Isy heʼi: “Haʼe orerrespetaiterei oikuaágui orefiél hague Ñandejárape. Añetehápe rojogueraha porãiterei koʼág̃a”. Oiméramo ne família oñemosẽ kuri kongregasióngui, ¿ejeroviátapa Jehováre “nde pyʼaite guive”, térãpa rejeroviáta “umi mbaʼe nde repensávare oĩ porãha”? (Prov. 3:5, 6). Upéicharõ, pesegíkena peẽ tuakuéra pejerovia Jehová pendegia ha pendekorrehi lájare, sapyʼánte ijetuʼúramo jepe peneñeʼẽrendu hag̃ua. Iporã ningo enterovéva jaasepta pe disiplína oúva Ñandejáragui ha ani ñañemoĩ hese. w18.03 páh. 31 párr. 12, 13

La Biblia nomoĩri peteĩ eda jajevautisa hag̃ua. Mateo 28:19 heʼi ñamboʼe vaʼerãha peteĩ persónape ikatu hag̃uáicha oiko chugui Jesús segidór. Pe palávra disípulo heʼise peteĩ persóna oaprende ha ontende porãha umi mbaʼe Jesús omboʼe vaʼekue ha iñeʼẽrenduseha chupe. Upéicharõ tuakuéra omboʼe vaʼerã ifamíliape imichĩete guive ikatu hag̃uáicha oñemeʼẽ Jehovápe ha oiko hag̃ua chugui Jesús disípulo. Jaikuaaháicha, peteĩ mitãraʼy ndaikatumoʼãi gueteri okumpli umi rrekisíto ojevautisa hag̃ua, péro la Biblia ohechauka porã umi mitã okakuaamiémava ikatumaha ontende ha omombaʼe Ñandejára Ñeʼẽ omboʼéva. Por ehémplo, Timoteo odesidi vaʼekue oservi Jehovápe imitã reheve. Haʼe ou vaʼekue ojeroviaiterei Jehováre (2 Tim. 1:5; 3:14, 15). Upéi haʼe orekórõ guare 20 áñorupi térã upe mboyvemi ja oĩma preparádo orresivi hag̃ua umi asignasión espesiál kongregasiónpe (Hech. 16:1-3). w18.03 páh. 9 párr. 4, 5

Ñañepyrũrõ guare jaservi Ñandejárape, katuete jajapóne raʼe heta kámbio. Ha jajevautisa rire jepe, jasegi ñakambia. Ñaneimperfékto rupi, siémpre jasegi vaʼerã ñamehora (Filip. 3:12, 13). Tahaʼe ñanemitã térã ñandeedáma, iporã ñañeporandumi: “¿Cheespiritualvépa ahávo? ¿Ajoguavépa ahávo Crístope? ¿Amombaʼépa umi rreunión ha añekomporta porã aĩ jave upépe? ¿Mbaʼe mbaʼérepa añemongetave? ¿Mbaʼépa ohechauka añemonde ha ajearregla lája, ha mbaʼéichapa ajagarra algúno oñemoñeʼẽ jave chéve? ¿Ajepokuaápa astudia meme la Biblia? ¿Mbaʼépa ajapo oñepresenta jave chéve peteĩ tentasión? ¿Oikóma piko chehegui peteĩ kristiáno madúro?” (Efes. 4:13). Koʼã mbaʼe ikatu ñanepytyvõ jaikuaa hag̃ua ñaĩ porãpa hína espirituálmente. w18.02 páh. 24 párr. 4, 5

Ñane tiémpope oiko hína peteĩ mbaʼe arakaʼeve ndoikóiva gueteri. La Biblia heʼíma haguéicha, Jehová ombyaty hína hetaiterei héntepe, “peteĩ aty guasu [...] oúva opa tetã, trívu ha puévlogui ha oñeʼẽva opaichagua idióma”. Ko aty guasu ningo haʼe “peteĩ tetã ipoderósova”. Mas de ocho millón de persónama oĩ pype ha vyʼápe oservi hikuái Ñandejárape “ára ha pyhare” (Apoc. 7:9, 15; Is. 60:22). Arakaʼeve ndojehecháiva gueteri peichaite peve heta persóna ohayhúva Ñandejárape ha hapichakuérape. La Biblia heʼi avei ko tiémpope umi hénte ndoservíriva Ñandejárape idiferenteha, haʼekuéra ojehayhu ijupénte. Apóstol Pablo oskrivíma vaʼekue voi mbaʼéichatapa la hénte koʼã ára pahápe. Haʼe heʼi: “Umi hénte ijehénte ojepyʼapýta, iplatarayhúta, [...] oikóta vyʼarã rapykuéri ohayhu rangue Ñandejárape” (2 Tim. 3:1-4). Umi persóna ohayhúva koʼã mbaʼe, ndohayhúi Ñandejárape. Koʼãichagua persóna oĩva ko múndope ijegoísta ha ombohasa asy enterovépe. w18.01 páh. 22 párr. 1, 2

Noé oikuaa porã rupi Jehovápe ojerovia mbarete hese ha avei iñarandu. Ha ndahaʼéi upévante, oipytyvõ avei chupe ani hag̃ua ojapo mbaʼeve ikatu vaʼerã omoñeñandu vai Jehovápe. Por ehémplo, haʼe siémpre “oiko Ñandejára oipotaháicha” ha ndojeheʼái umi persóna ndorrespetáivare Ñandejárape. Haʼe ndohejái avei ogueraha vai chupe umi demónio ou vaʼekue ko yvy ape ári ha oñembohetéva yvypóraicha. Katuete ningo umi hénte ndojeroviáiva Ñandejárare oiméne omombaʼeterei raʼe ohechávo mbaʼéichapa umi demónio ipoderóso, ha oiméne oadorase voi chupekuéra (Gén. 6:1-4, 9). Péro Noé oikuaa porã vaʼekue yvyporakuérape añoite Ñandejára heʼi hague ifamília hag̃ua ha omyenyhẽ hag̃ua ko yvy (Gén. 1:27, 28). Upéicha rupi, ohechárõ guare umi demónio omenda umi kuñáre ha ifamília hikuái, haʼe oikuaa upéva oĩ vaiha. Koʼýte oiméne oĩ raʼe segúro upeichaha ohechávo mbaʼéichapa umi demónio família tuichaicha ha imbareteterei. Tiémpo rire Ñandejára oavisa kuri Noépe oguerutaha pe dilúvio ohundi hag̃ua umi iñañávape. Noé ojerovia kuri Jehová okumplitaha la heʼíva, ha upévare ojapo pe árka. Upéicha, haʼe ha ifamiliakuéra ojesalva (Heb. 11:7). w18.02 páh. 9 párr. 8

Oiméramo nde repeka vai raʼe, Jehová nepytyvõse reime porã jey hag̃ua hendive. Upearã eheja vaʼerã haʼe tanepytyvõ umi ansiáno rupive (Prov. 24:16; Sant. 5:13-15). Aníkena rehaʼarõiterei rejapo hag̃ua upéva, pórke upévare odepende hína reikove hag̃ua pára siémpre. Péro, ¿mbaʼépa ikatu rejapo resegínteramo reñeñandu vai umi mbaʼe rejapo vaʼekuére Ñandejára neperdonámarõ jepe? Sapyʼánte apóstol Pablo oñeñandu vai vaʼekue imanduʼávo umi mbaʼe vai ojapo vaʼekuére yma. Haʼe heʼi: “Che ningo pe michĩvéva umi apóstol apytépe ha namereséi ojeʼe cherehe haʼeha apóstol, ymave apersegi rupi Ñandejára kongregasión” (1 Cor. 15:9). Jehová ningo oikuaa porã vaʼekue Pablo ojapo hague heta mbaʼe vai. Upéicharõ jepe, haʼe oguerohory chupe ha oipota vaʼekue Pablo ohechakuaa upéva. Nde avei reñarrepentíramo nde pyʼaite guive repeka haguére ha remombeʼúramo Jehovápe, ha tekotevẽramo umi ansiánope avei, Jehová katuete neperdonáta. Nderedudái vaʼerã upévagui, ha easepta haʼe neperdonáma hague (Is. 55:6, 7). w18.01 páh. 11 párr. 17, 18

Ikatu hag̃uáicha oiko ñandehegui Jehová amígo tekotevẽ ñahendu ha ñañeʼẽ chupe. Ñande ikatu ñahendu Jehovápe jajapo jave ñande estúdio personál. Upearã jalee ha jajepyʼamongeta vaʼerã la Bíbliare ha umi puvlikasión oñeʼẽvare hese. Péro jastudia la Biblia ndeʼiséi ñamemorisánte vaʼerãha umi mbaʼe oĩva pype ojejapoháicha jepi koléhiope oñerrendi hag̃ua. Upéva rangue, ikatu ñakompara peteĩ viáhe igustoitereívare, ikatutahápe retopa ha reikuaa heta mbaʼe ipyahúva. Restudia jave la Biblia retopa heta detálle nepytyvõva reikuaave hag̃ua Jehovápe. Upéicha reñemoag̃uivéta hese ha haʼe avei oñemoag̃uivéta nderehe. Jehová organisasión ningo omeʼẽ heta erramiénta ikatúva nepytyvõ rejapo hag̃ua nde estúdio personál. Por ehémplo, ñande sítio jw.org-pe retopáta Guías de estudio “¿Qué enseña realmente la Biblia?”. Umíva nepytyvõta remombareteve hag̃ua nde jerovia ha redefendekuaa hag̃ua umi mbaʼe regueroviáva (Sal. 119:105). w17.12 páh. 25 párr. 8, 9

Ko téxto heʼíva katuete oñekumplíta pórke “ko yvy henyhẽta Jehová enseñánsagui”. Umi animál ningo ndaikatúi oaprende umi mbaʼe Jehová omboʼéva. Upévare jaʼekuaa ko profesía oñeʼẽha umi héntere (Is. 11:6, 7). Heta ermáno ha ermána oñekomporta vaʼekue lóvoicha oikuaa mboyve Jehovápe, péro koʼág̃a oiko porã hapichándi. Ikatu jalee algúno ermáno rembiasakue ñande sítio jw.org-pe umi artíkulo héravape “La Biblia okambia chupekuéra”. Ñandejára siervokuéra apytépe oĩ la ojeporta vaʼekue ymave animálcha, péro koʼág̃a omondéma “pe teko pyahu ojejapo vaʼekue Ñandejára oipotaháicha ha oñemopyendáva tekojoja ha jerovia teetépe” (Efes. 4:23, 24). Heta persóna oaprende jave Jehovágui ohechakuaa tekotevẽha ojapo la haʼe oipotáva. Upévare ojapo kámbio umi mbaʼe ogueroviávape, opensa lájape, ha umi mbaʼe ojapóvape avei. Hasýramo jepe koʼã kámbio, lomímonte okonsegi ojapo hikuái pórke Jehová oipytyvõ ijespíritu rupive umi ojaposévape hembipota. w18.01 páh. 31 párr. 15, 16

La Biblia heʼi umi ohótavare yvágape: “Káda uno oikove jeýta otoka vove chupe”. Upéva heʼise upe rresurreksión oikotaha en órden. Ñande avei ñaĩ segúro ko yvy ape ári oñemoingove jeytaha en órden umi omano vaʼekuépe. Péro ikatu ñañeporandu: “¿Arakaʼépa orresusitáta umi omano ramovéva? ¿Oikove jeýtapa hikuái oñepyrũre Jesús Goviérno de Mil Áño ikatu hag̃uáicha orresivi chupekuéra ihénte ha iñamigokuéra? ¿Ha mbaʼépa jaʼekuaa umi kuimbaʼe ifiélva omoakã vaʼekuére yma Ñandejára puévlope? ¿Haʼekuéra raẽpa orresusitáta pe múndo pyahúpe ikatu hag̃uáicha oipytyvõ Ñandejára siervokuérape oñeorganisa porã hag̃ua? ¿Ha mbaʼépa jaʼekuaa umi persóna ndoservíri vaʼekuére Jehovápe? ¿Arakaʼépa oikove jeýta hikuái, ha moõpa?”. Oiméne oĩ heta mbaʼe jaikuaaséva, péro koʼág̃a natekotevẽi jajepyʼapy umívare. Iporãve ñahaʼarõnte ha jahecha mbaʼéichapa oñekumpli. Ñande ñamombarete vaʼerã ñande jerovia Jehováre ñahaʼarõ aja oñekumpli koʼã mbaʼe. Jesús rupive, haʼe oasegura kuri omoingove jeytaha umi persóna oĩvape imemóriape (Juan 5:28, 29; 11:23). w17.12 páh. 12 párr. 20, 21

¿Rehechakuaápa mbaʼéichapa ko konsého ikatu oipytyvõ ne famíliape? Jehová omanda menakuérape: “Peẽ menakuéra, pesegíkena pehayhu pene rembirekópe ha ani pendepochy ha pesapukái vaipa chupekuéra”. Peteĩ ména ohayhúva hembirekópe ohechauka hína omombaʼeha chupe. ¿Mbaʼérepa jaʼe upeichaha? Pórke haʼe ohendu la hembireko opensáva ha oikuaauka chupe iñimportanteha la heʼíva (1 Ped. 3:7). Ndaikatúiramo jepe siémpre ojapo la haʼe ojeruréva, ohendúramo hembirekópe katuete odesidi porãvéta (Prov. 15:22). Pe ména ohayhúva hembirekópe ndoikói oexihi ojerrespeta hag̃ua chupe. Upéva rangue oñehaʼã ogana pe rrespéto. Pe ména ohayhúramo hembireko ha ifamiliakuérape, entéronte ovyʼáta oservívo Jehovápe ha ohupytýta hikuái pe prémio, térã pe jeikove opaveʼỹva. w17.11 páh. 28 párr. 12; páh 29 párr. 15

Áño 60 o 61-rupi, apóstol Pablo oĩ aja préso Rómape oskrivi vaʼekue umi kristiáno Colosasguápe. Haʼe oexplika chupekuéra tekotevẽha ontende opa mbaʼe pe espíritu rupive, upéva heʼise ohecha vaʼerãha hikuái opa mbaʼe Jehová ohechaháicha (Col. 1:9). Pablo heʼi: “Koʼã mbaʼe haʼe peẽme ani hag̃ua avave penembotavy ñeʼẽkuaápe. Peñatendéke ani avave oipuru yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare ha umi mbaʼe oñepensávare ko múndope, ha ndoipurúi Cristo omboʼéva” (Col. 2:4, 8). Pablo omyesakã mbaʼérepa heta mbaʼe ojegueroviáva noĩporãi, ha mbaʼérepa ogustaite umi héntepe. Por ehémplo, koʼã idéa ikatu omopensa algúnope iñakãporãveha ótrogui térã iñimportanteveha hapichágui. Upémarõ Pablo oakonseha umi ermánope ani hag̃ua opensa ko múndope oñepensaháicha, ha omboyke hag̃ua umi mbaʼe vai (Col. 2:16, 17, 23). w17.11 páh. 20 párr. 1

¿Mbaʼépa omboyke vaʼerã peteĩ kristiáno ikatu hag̃uáicha Ñandejára osegi oiporiahuvereko chupe? Haʼe oheja vaʼerã la ikatúva ogueraha vai chupe, jepe ojapose gueteri umi mbaʼe (Mat. 18:9). Por ehémplo, ne júnta nemboligáramo rejapo hag̃ua peteĩ mbaʼe ivaíva, ¿resegítapa rejeheʼa hesekuéra? Ijetuʼúramo ndéve rejejoko hag̃ua pono remokõ rasa, ¿mbaʼérepa neremboykéi umi situasión ha lugár ikatúva nemoakãraku reʼu rasa hag̃ua vevída? Oúramo ne akãme umi pensamiénto tieʼỹ ha deséo vai, ¿mbaʼérepa neremboykéi umi pelíkula, sítio de Internet térã ótra kósa ikatúva nemopensa umi mbaʼe kyʼáre? Ijetuʼúramo jepe rejapo hag̃ua koʼã sakrifísio, ani nderesarái ne amista Jehovándi ovaleveha oimeraẽ sakrifísio ikatúvagui rejapo. Añetehápe ningo ñañeñandu vaieterei Jehová ñanderejáramo. Péro ndaipóri ótra kósa iporãvéva ñañandúramo Jehová oĩha ñande ykére, pórke haʼe siémpre oporohayhu ha ndofallái avavéndi (Is. 54:7, 8). w17.11 páh. 11 párr. 12

Zacarías 5:4-pe heʼi pe maldisión “oiketaha pe mondaha rógape” ha opytataha upépe ohundi peve chupe. ¿Mbaʼépa heʼise upéva? Jehová ikatuha oikuaauka umi mbaʼe oñeñomíva, ha ohusgataha oimehaichagua mbaʼe vai ojapóva isiervokuéra. Ikatu ningo peteĩ persóna omondáva oñomi upéva polisiágui, ipatróngui, ansianokuéragui térã itúa umíagui. Péro ndaikatumoʼãi omokañy Ñandejáragui, haʼe oasegura oimehaichagua ñemonda ojekuaataha katuete (Heb. 4:13). Entéro Ñandejára siérvo ovyʼa ikatu haguére ojeheʼa iñermanokuérare, oñehaʼãva hína iñonrrádo “opa mbaʼépe” (Heb. 13:18). Tahaʼe haʼéva ñemonda ningo ombojeguaru Jehovápe. Umi oservíva chupe omombaʼeterei oikuaa ha ikatu haguére osegi umi konsého oĩva Iñeʼẽme. Umíva ñanepytyvõ jaikuaa hag̃ua mbaʼépa oĩ porã ha mbaʼépa oĩ vai, ha ani hag̃ua jajapo umi mbaʼe omotĩtava Jehovápe. Jajapóramo upéicha, haʼe ndoguerumoʼãi ñande ári pe kastígo ohaʼarõva umi hénte oikuaávape imandamiénto péro lomímonte naiñeʼẽrendúiva chupe. w17.10 páh. 22 párr. 6, 7

Sapyʼánte ningo ikatu jajoavyʼimi térã oĩ nañandetrataporãmbáiva, upéicharõ jepe jajapo vaʼerã ikatúva guive jaiko porã hag̃ua ermanokuérandi (Rom. 12:17, 18). Peichahágui ñambopochýramo ñande rapichápe, jajerure vaʼerã perdón. Péro jajerure vaʼerã ñande pyʼaite guive. Iñimportanteterei ningo jaiko pyʼaguapýpe enterovéndi, koʼýte ñane matrimóniope. Ivaietereíta hína ména ha tembireko ótro rovakénte ohechaukáramo ojoayhuha ha hogapýpe katu ni noñeʼẽi ojupe térã iñeʼẽ pohýi ha oñomaltrata. Ikatu ningo peteĩ ñande rapicha ñanembopochy, ha sapyʼánte ni noñemeʼẽi enkuénta la ojapóvare. Upéicha jave, ñaperdonánte vaʼerã ha ñañehaʼã ñañembyesarái la oiko vaʼekuégui. Ñaporoperdonáramo ñande pyʼaite guive, ndajaikomoʼãi siémpre ñanemanduʼa pe oiko vaʼekuére ha nañandepyʼaromoʼãi (1 Cor. 13:4, 5). Japytáramo ñandepyʼaro ñane ermánondi, ñambyaíta hína ñane amista hendive ha Jehovándi (Mat. 6:14, 15). w17.10 páh. 10 párr. 14, 15

¿Mbaʼéichapa oñeñandu umi judío ohendu rire Zacarías mensáhe? Jehová opromete vaʼekue oipytyvõtaha chupekuéra ha oñangarekotaha hesekuéra ikatu hag̃uáicha otermina pe témplo. Ko promésa omeʼẽ esperánsa umi judíope. Upéicharõ jepe, oiméne oñeporandu gueteri mbaʼéichapa ojapopáta pe traváho tuichaitéva imbovýramo jepe hikuái. Péro Zacarías heʼi peteĩ mbaʼe ikatútava oipytyvõ chupekuéra ani hag̃ua okyhyje ni ojepyʼapy mbaʼevére. Haʼe omombeʼu oĩtaha heta persóna oútava oipytyvõ chupekuéra “omopuʼã hag̃ua Jehová témplo”, ojapoháicha Heldai, Tobiya ha Jedayá. Entéro umi judío oĩ segúro Jehová oipytyvõtaha chupekuéra. Upévare pyʼaguasúpe oñepyrũ jey ombaʼapo, pe rréi de Persia oproivíramo jepe chuguikuéra ojapo upéva. Ko provléma haʼete peteĩ montáña tuichaitereíva oĩva haperãme, péro Jehová oipeʼa kuri upéva osegi hag̃ua ojejapo hembipota. Upéi, áño 515-pe a.C. oñetermina pe témplo (Esd. 6:22; Zac. 4:6, 7). Péro upérõ guare Jehová oñeʼẽ avei kuri umi mbaʼe tuichaitereívare oñekumplíva ñane tiémpope. w17.10 páh. 29 párr. 17

Jehová oiporavo Salomónpe omopuʼã hag̃ua Jerusalén témplo. Upéva ningo peteĩ tembiapo ndetuichapa jepéva ha iñimportantetereíva. Pe óga “ojajaipáta porãgui, ha upéicha rupi entéro tetãrupi ojekuaáta mbaʼeichaitépa iporã”. Péro iñimportanteveha, pe óga oñemopuʼãta “Jehovápe g̃uarã” (1 Crón. 22:1, 5, 9-11). Rréi David oĩ vaʼekue segúro Ñandejára oipytyvõtaha Salomónpe. Péro Salomón “imitã ha ndoikuaái gueteri heta mbaʼe”. ¿Ipyʼaguasútapa oasepta hag̃ua pe rresponsavilida tuichaitéva? ¿Térãpa orrechasáta imitã ha ndoikuaái rupi heta mbaʼe? Ikatu hag̃uáicha Salomón okumpli porã ko asignasión, tekotevẽ kuri ipyʼaguasu ha oñepyrũ ombaʼapo. Haʼe okyhyjérire noñanimamoʼãi kuri ni omoñepyrũ pe traváho, ha upéva ivaivéta kuri. Salomón oikotevẽ haguéicha, ñande avei ñaikotevẽ Jehová ñanepytyvõ. w17.09 páh. 28 párr. 1, 2; páh. 29 párr. 4, 5

¿Mbaʼéichapa jaiko vaʼerãmoʼã ndajaguerekóirire la Biblia? Ndajarekomoʼãi kuri umi konsého ideprovechoitéva ñandéve heta mbaʼépe. Ndajaikuaamoʼãi kuri mávapa añetehápe Ñandejára, maʼerãpa ñandeapo vaʼekue ha mbaʼépa ñaneraʼarõ. Ndaikatumoʼãi kuri avei jaikuaa heta mbaʼe Jehová ojapo vaʼekue yvyporakuéra rehehápe. Javyʼaiterei ningo nañaiméi haguére upe situasiónpe. Jehová omeʼẽ ñandéve Iñeʼẽ la Biblia. Haʼe opromete pe mensáhe oĩva pype odurataha opa árare. Apóstol Pedro ositárõ guare Isaías 40:8-pe heʼíva, oñeʼẽ kuri umi mensáhe oĩvare la Bíbliape, péro ikatu avei jaaplika la Biblia kompletoitére (1 Ped. 1:24, 25). Upéicha rupi, oĩramo jepe oñemoĩva hesekuéra, oñehaʼã vaʼekue otradusi la Biblia ikatu hag̃uáicha opaichagua hénte olee iñeʼẽtépe. Jehová oguerohory la ojapóva hikuái pórke haʼe “oipota opaichagua tapicha ojesalva ha oikuaa porã pe añetegua” (1 Tim. 2:3, 4). w17.09 páh. 18 párr. 1, 2

Ñane tiémpope, heta kristiáno imitãva ohasa avei umi situasión ojoguáva José ohasa vaʼekuépe (Gén. 39:7). Por ehémplo Kimberly. Ikompañerokuéra pyʼỹinte ijuruvyrei omombeʼu oreko hague rrelasión sexuál pe fin de semána. Péro Kimberly idiferénte chuguikuéra, upévare noñeʼẽi hendivekuéra koʼã mbaʼére. Haʼe heʼi sapyʼánte oñeñanduha haʼeño ha umi ótro omboykeha chupe. Ikompañerokuéra heʼi chupe ivyraitereiha ndaichíkoi haguére. Kimberly ningo iñakãguapy, péro ohechakuaa avei upe edápe mitãrusu ha mitãkuñanguéra orekosetereiha rrelasión sexuál (2 Tim. 2:22). Ikompañéro ha ikompañerakuéra oporandúmi chupe haʼépa vírhen gueteri, ha haʼe oaprovecha umi oportunida oexplika hag̃ua chupekuéra mbaʼérepa odesidi ndorekomoʼãiha gueteri rrelasión sexuál. ¡Ajépa ñanembovyʼaite jaikuaávo oĩha mitãrusu ha mitãkuña oñehaʼãva hína omboyke koʼãichagua tentasión! Jehová avei ovyʼaiterei hesevekuéra. w17.09 páh. 4 párr. 8; páh. 5 párr. 10

Heta persóna pyaʼeterei ipochy ha heʼi hapichápe umi mbaʼe oporofendéva. Peichagua tapicha ombosufri hogayguakuérape. La Biblia heʼi ndovaleiha ñandepochy vai, japorojaʼo ni jasapukái avavépe (Efes. 4:31). Pyʼỹinte koʼã mbaʼe opa ñorairõme. Ikatu ningo heta persóna opensa oikónte vaʼerãha voi umíva, péro añetehápe omotĩ ñande Apoharépe. Upévare heta kristiáno omboykete koʼãichagua kondúkta ha oñemonde pe teko pyahúgui (Col. 3:8-10). Peteĩ persóna ijapúva ohechauka avei ndohejaitiha “heko tuja”. Por ehémplo, heta hénte ijapu ani hag̃ua opaga impuésto térã pono orrekonose ofalla hague. Péro Jehová ndaupeichaiete. La Biblia heʼi hese: “Nde siémpre ere la verda” (Sal. 31:5). Upévare omanda kristianokuérape siémpre heʼi hag̃ua la verda ha ani hag̃ua oñombotavy (Efes. 4:25; Col. 3:9). Jahechaháicha, ndovaléi ñandejapu, sapyʼánte ñañemotĩtaramo jepe jaʼe haguére la verda, térã nokonveníriramo jepe ñandéve (Prov. 6:16-19). w17.08 páh. 18 párr. 3, 5; páh. 20 párr. 12, 13, 15

Ñane tiémpope Jehová ñandegia Iñeʼẽ rupive. Pe salmísta ohechauka Jehová pyaʼe ñanepytyvõha heʼívo: “Sapyʼaitépe oikóma la haʼe heʼíva”. Ñandejára ñandegia hiʼoraitépe ha iporãveháicha. Epensamíntena mbaʼeichaitépa ñanepytyvõ la Biblia, umi puvlikasión oúva pe tembiguái jeroviaha ha iñarandúvagui, JW Broadcasting, pe sítio jw.org, umi ansiáno ha umi ótro ermáno (Mat. 24:45). Ha nde, ¿rehechakuaápa mbaʼéichapa Jehová pyaʼe ndegia? Pe salmísta oikuaa Jehová oiporavo hague tetã Israélpe ipuevlorã entéro umi ótro tetã apytégui. Haʼe omombeʼu ipuévlope añoite la ojapótava ha omeʼẽ chupekuéra “iléi” (Sal. 147:19, 20). Koʼág̃a avei ñande jareko pe priviléhio jarahávo Jehová réra. Jaagradeseterei jaikuaa haguére chupe, Iñeʼẽ ñandegia rupi ha ikatúgui jaiko iñamígoramo. Pe oskrivi vaʼekue Salmo 147 omombaʼeguasu vaʼekue Jehovápe. Ñande avei ikatu ñambotuicha Jehovápe hetaiterei mbaʼére, ha ñamokyreʼỹkuaa avei ñande rapichápe ojapo hag̃ua upéva. w17.07 páh. 20 párr. 15, 16; páh. 21 párr. 18

Ñane tiémpope, umi omoirũva Jesúspe ojapo ikatúva guive osegi hag̃ua Pablo konsého. Por ehémplo, umíva apytépe oĩ mas de 1 millón ermáno oservíva de tiémpo kompléto. Haʼekuéra oñehaʼãmbaite omboyke umi mbaʼe ko múndo oikuaveʼẽva, ha imanduʼa la Biblia heʼívare: “Pe oipurúva pláta hapichágui opytáma ipoguýpe” (Prov. 22:7). Satanás oipota jaipurupaite ñane tiémpo ha ñane mbaretekue umi komérsio ha negósio oĩvape ko múndope. Oĩ ningo oikéva tuicha kuéntape ojogua hag̃ua hogarã, ikocherã, ostudia hag̃ua fakultápe térã ojapo hag̃ua peteĩ fiésta de lúho ikasamientorã. Nañañatendéiramo ikatu hína jaju tuicha jadeve ha ñane kuénta ñaneñapytĩ heta áñore. Jahechaukákena ñanearanduha jaikóvo sensillomínte, ndajaikéivo déudape ha ñañehaʼãmbaitévo saʼive jagasta. Jajapóramo upéva ñanetiempovéta jaservi hag̃ua Jehovápe, jaiko rangue ko múndo rembiguáirõ (1 Tim. 6:10). w17.07 páh. 10 párr. 13

¿Mbaʼérepa ikatu jaʼe Jehová omereseha ogoverna ko univérso? Pórke haʼe añoite ogoverna tekojojápe. Haʼe heʼi ijehe: “Che hína Jehová, Upe oporohayhu añetéva, hekojoja ha ihústova ko yvy ape ári. Pórke koʼã mbaʼe chembovyʼa” (Jer. 9:24). Ndaipóri Jehovaichagua ihústova, upévare haʼe noikotevẽi yvyporakuéra léire odesidi hag̃ua hekoitépe. Haʼe guei omeʼẽ ñandéve Iléi. Pe salmísta heʼi vaʼekue Jehováre: “Ndehústo ha rejapo iporãva, koʼã mbaʼe haʼete voi peteĩ simiénto oguapyhápe ne tróno”. Upéicharõ, entéro umi léi Jehová omeʼẽva ha opa mbaʼe odesidíva oĩ porã (Sal. 89:14). Satanás heʼi Jehová nogovernaporãiha, péro haʼe ndaikatúi ogueru hustísia ko múndope. w17.06 páh. 28 párr. 5

Añetehápe ningo Jehovágui voi ou pe añetegua (Sal. 31:5). Ha ojapoháicha peteĩ túa imbaʼeporãva, Jehová okomparti ñanendive pe añetegua. Ñande ñaaprende heta mbaʼe jalee rupi Iñeʼẽ, umi puvlikasión, ha jaha meme rupi rreunionhápe ha asambleahápe. Jaikuaavévo jahávo Ñandejára Ñeʼẽgui haʼete ñambyatýva tesóro, ha umíva apytépe jareko umi “mbaʼe ipyahúva ha itujáva” (Mat. 13:52). Jahekáramo pe añetegua haʼeramoguáicha pláta yvyguy, Jehová ñanepytyvõta jatopave hag̃ua umi tesóro oĩva Iñeʼẽme (Prov. 2:4-7). ¿Mbaʼéichapa ikatu jajapo upéva? Iñimportanteterei ningo ñahesaʼỹijo porã la Biblia ha ñane puvlikasionkuéra. Péichamante jatopáta umi tesóro “ipyahúva”, térã umi mbaʼe ndajaikuaáiva kuri (Jos. 1:8, 9; Sal. 1:2, 3). Péicha avei nañañekontentái vaʼerã jaikuaa haguére peteĩ mbaʼénte, síno jasegi vaʼerã jaheka pe añetegua. w17.06 páh. 12 párr. 13, 14

Peteĩ ermáno imitãva opensa 1 Corintios 7:28 heʼívare. Upépe oñeʼẽ umi omendávare ha heʼi heta iprovlemataha hikuái. Ko ermáno oñeʼẽ peteĩ ansiáno omendávandi ijedavéva chugui, ha oporandu chupe: “¿Mbaʼe piko heʼise heta iprovlemataha umi omendáva, ha mbaʼéicha piko ikatu ambohovái umíva peichahágui ajúramo amenda? Pe ansiáno orresponde mboyve chupe la ipregúnta, heʼi opensa hag̃ua avei ko téxtore: “Ñandejára omeʼẽva opaichagua konsuélo. Haʼe ñanekonsola opa umi ñande jehasa asýpe” (2 Cor. 1:3, 4). Ñande ningo jaikuaa Ñande Ru Jehová ñanderayhu ha ñanekonsolaha ñaneprovléma jave. Oime vaʼerã ñanemanduʼa mbaʼéichapa haʼe ñanepytyvõ ha ñandegia Iñeʼẽ rupive. Jehová oipota la iporãvéva ñandéve g̃uarã, oipota haguéicha avei isiervokuéra yma guarépe g̃uarã (Jer. 29:11). w17.06 páh. 4 párr. 1, 2

Ndahaʼéi ningo ao ha hiʼupýnte la oikotevẽva umi ermáno rrefuhiádo. Iñimportanteve hína ñaipytyvõ chupekuéra oñemoag̃uive hag̃ua Ñandejárare, ha ohechakuaa hag̃ua ñañeinteresaha isituasiónre (Mat. 4:4). Umi ansiáno ikatu okonsegi chupekuéra puvlikasión iñeʼẽtépe, ha ojapo arréglo ohasa hag̃ua hikuái tiémpo umi ermáno oñeʼẽvandi iñidióma. Koʼã mbaʼe ningo iñimportánte pórke oheja kuri hikuái ihentekuéra, ikongregasión ha pe lugár ojepokuaaha. Umi rrefuhiádo oñandu vaʼerã umi ermáno ohayhu ha oiporiahuverekoha chupekuéra, péicha ohechakuaáta Jehová hakateʼỹha hesekuéra. Ndajajapóiramo upéva, ikatu hína ojeheʼa hetãyguakuéra ndahaʼéivare Testígo (1 Cor. 15:33). Ñaipytyvõramo umi rrefuhiádope oñeñandu porã hag̃ua kongregasiónpe, añetehápe ñambaʼapo hína Jehovándi pórke haʼe “oprotehe umi extranhérope”. Heta vése umi rrefuhiádo ndaikatumoʼãvéima oho jey hetãme ogoverna aja umi ombohasa asy vaʼekue chupekuéra. Avei oĩ ohasa vaʼekue heta mbaʼe ivaietereíva. Upévare iporã ñañeporandu: “¿Mbaʼéichapa aipotáta chetrata umi ótro aĩramo ilugárpe?” (Mat. 7:12). w17.05 páh. 6, 7 párr. 15, 16

Oĩ heta mbaʼe ikatúva ñanemokangy jaiko aja Satanás múndo añáme (1 Juan 5:19). Jahejáramo umi vyʼaʼỹ ipuʼaka ñanderehe ikangýta ohóvo ñande jerovia ha ikatu jaju ndajahayhuvéi Ñandejárape. Por ehémplo, ikatu ijetuʼu ñanendive ñandeeda haguére, ñanderasykatúgui térã ñandesogue rupi. Sapyʼánte ñañeñandu vai avei ñapensa rupi ndaikatuiha jajapo peteĩ mbaʼe ñande jajaposeháicha, térã oĩgui algúna kósa nosẽiva ñahaʼãrõ haguéicha. Tahaʼe haʼéva umi mbaʼe jahasáva, arakaʼeve nañapensái vaʼerã Jehová ñanderejaha ñaneaño. Upéva rangue, ñapensa vaʼerã Salmo 136:23 heʼívare: “Ñaime vaietérõ guare Ñandejára ndahesaráiri ñandehegui. Peagradese chupe pórke haʼe siémpre oporohayhu ha ndofallái avavéndi”. Jajeroviákena Jehová katuete ñanerenduha jajerure jave chupe ñanepytyvõmi hag̃ua (Sal. 116:1; 136:24-26). w17.05 páh. 18 párr. 8

Ohechaukaháicha Gálatas 2:11-14, Pedro okyhyje vaʼekue hapicha yvypóragui (Prov. 29:25). Haʼe oikuaa porã mbaʼépa Jehová opensa umi ndahaʼéivare judío. Péro oipyʼapyeterei chupe la ikatúva opensa umi kristiáno Jerusalengua ohechávo chupe ojeheʼaha umi kristiáno ndahaʼéivare judío. Apóstol Pablo heʼi Pédrope hovamokõiha (Hech. 15:12; Gál. 2:13). Pedro iñumílde ha oasepta Pablo okorrehírõ guare chupe. La Biblia ndeʼíri Pedro operde hague algún priviléhio upe haguére. Upe rire, haʼe ohai kuri espíritu sánto rupive mokõi kárta opytáva Ñandejára Ñeʼẽme. Jesús, pe omoakãva kongregasión, osegi oipuru Pédrope (Efes. 1:22). Jesús ha Itúa operdona vaʼekue Pédrope. Heta ermáno ha ermána osegi kuri iñehemplokuéra oporoperdonávo, ha ndohejáivo umi ótro fálla ombotropesa chupekuéra. w17.04 páh. 27 párr. 16-18

Jehová ohundi koʼã siuda opa hag̃ua umi mbaʼe vai ojejapóva upérupi. Péicha haʼe “oheja peteĩ modélo ohechaukáva mbaʼépa oikóta umi hénte añáre”. Jehová oipeʼaite umi mbaʼe vai ojejapo vaʼekue yma, ha koʼẽrõite katuete ojapóta avei upéva ko múndo añáme. ¿Mbaʼépa oñemoĩta umi mbaʼe vai rekovia? Enteroite mbaʼe jajapótava pe paraísope ñanembovyʼáta. Ñañeimahinamína mbaʼeichaitépa ñandepyʼarorýta ñambaʼapo vove ikatu hag̃uáicha oiko ko yvýgui peteĩ lugár neporãva. Upépe javyʼáta pórke jajogapóta ha ñaipytyvõta ñane amígo ha ñane hentekuérape ojapo hag̃ua avei hogarã. Avei ñañeñandu porãitereíta jarresivi vove umi oñemoingove jeývape. Upépe jarekóta pe oportunida ñamboʼévo chupekuéra Jehová rape ha umi mbaʼe ojapo vaʼekue yvyporakuéra rehehápe (Is. 65:21, 22; Hech. 24:15). Añetehápe, ñambaʼapo meméta umi mbaʼe ñanembovyʼávape ha omombaʼeguasúva Jehovápe. w17.04 páh. 12 párr. 11, 12

Jefté ojapórõ guare ko promésa oiméne oikuaa ikatuha voi itajýra raẽvete osẽ orresivi chupe. Upéicharõ jepe ijetuʼu kuri Jefté ha itajýrape okumpli hag̃ua pe promésa. Jefté ohechárõ guare itajýrape osẽha hendápe, ipyʼa hoʼa yvýre. Upémarõ itajýra ojerure chupe oho hag̃ua peteĩ tiémpore ikatu hag̃uáicha hasẽ nomendamoʼãi haguére. Jefté ningo ndaitaʼýrai, ha peteĩmínte ifamília. Pe mitãkuña arakaʼeve nomendamoʼãi ni naimembymoʼãi. Upéicharõ, Jefté réra opytáta tesaráipe. Péro haʼekuéra ohechakuaa oĩha peteĩ mbaʼe iñimportantevéva umi mbaʼe oñandúvagui. Jefté heʼi: “Che ningo ajapóma peteĩ promésa Jehovápe, ha ndaikatumoʼãi apyrũ che ñeʼẽre”. Ha itajýra heʼi: “Ejapo cherehe repromete haguéicha” (Juec. 11:35-39). Haʼekuéra ningo ifiél Ñandejárape ha núnka ndohasáiva iñakãre nokumplimoʼãiha pe promésa ojapóva, ijetuʼúramo jepe (Deut. 23:21, 23; Sal. 15:4). w17.04 páh. 4 párr. 5, 6

José ohasa kuri heta inhustísia ivaietereíva. Ñepyrũrã iñermanokuéra ovende chupe esklávoramo orekópe 17 áñorupi. Upéi oñemboja hese oviolase hague ipatrón rembirekópe. Ndasiértoiramo jepe upéva, ojegueraha chupe kárselpe (Gén. 39:11-20; Sal. 105:17, 18). José ifiélramo jepe haʼete la ndorekóiva Jehová vendisión, upéva rangue haʼete la ojekastiga meméva chupe. Péro ohasa rire 13 áño, derrepénte ou okambiaite la isituasión. Oñenohẽ chupe kárselgui ha oiko chugui pe segunda persóna omanda guasuvéva Egíptope (Gén. 41:14, 37-43; Hech. 7:9, 10). ¿Oñamargápa José ohasa haguére hetaite inhustísia? ¿Oúpa ndojeroviavéi Jehováre? Nahániri. Haʼe ipasiénsia ha ohaʼarõkuaa pórke ojerovia Jehováre. José oñemeʼẽ enkuénta Jehová omanehaha entéro mbaʼe. Upévare heʼi iñermanokuérape: “Peẽ pene mála idéa ha cheperhudikase vaʼekue, péro Ñandejára chepytyvõ osẽ porã hag̃ua chéve opa mbaʼe. Ha péicha osalva heta héntepe, ojapoháicha voi hína koʼág̃a peve” (Gén. 50:19, 20). Amo ipahápe José ohechakuaa nohaʼarõreíri hague. w17.08 páh. 4 párr. 6; páh. 6 párr. 12, 13