Abril

¿Mbaʼéichapa ikatu ñanepytyvõ porãve umi ansiáno? Jajerovia vaʼerã Ñandejárare haʼekuéraicha ha jasegi pe ehémplo porã omoĩva ñandéve. Avei jasegi vaʼerã umi konsého omeʼẽva ñandéve hikuái la Biblia rupive (Heb. 13:7, 17). Umi ansiáno ningo ñanderayhu ha oipota ñaĩ porã Jehová renondépe. Ohechakuaáramo jafaltaha rreunionhápe térã nañanekyreʼỹveiha, pyaʼe porã ñanepytyvõta. Mborayhúpe ñanerendúta, ñanemombaretéta ha omeʼẽta ñandéve umi konsého iporãva oĩva la Bíbliape. ¿Ndépa rehechakuaa haʼekuéra nepytyvõ jave Jehová ohechaukaha nderayhuha? Ani reimoʼã ifasilha ansianokuérape oñemoñeʼẽ hag̃ua ndéve. ¿Mbaʼépa ikatu rejapo ani hag̃ua ijetuʼueterei umi ansiánope omeʼẽ hag̃ua ndéve konsého? Eñehaʼã neumílde, ehendu ha eagradese chupekuéra. Avei entende vaʼerã Ñandejára ohechaukaha nderayhuha umi ansiáno rupive. Rejapóramo koʼã mbaʼe, katuete reñevenefisiáta ha umi ansiáno vyʼápe ojapóta hembiapo. w18.03 páh. 31 párr. 15, 16

Káda mitã ningo idiferénte. Ndaikatúi jaʼe peteĩ edápe iñakãguapytamaha katuete hikuái. Oĩ umi mitã pyaʼe voi ontende porãva pe añetegua, iñakãguapýmava ha odesidi porãva heta mbaʼe, upévare ojevautisaséma voi. Oĩ katu otardamiéva oĩ hag̃ua preparádo ikatu hag̃uáicha ojevautisa. Umi sy ha túa iñarandúva ontende koʼã mbaʼe ha ndojopýi ifamíliape ojevautisa hag̃ua, upéva rangue oipytyvõ chupekuéra oprogresa hag̃ua ohóvo ojedesidi peve hikuái. Sy ha túa ovyʼa ifamília ojapo jave la heʼíva pe téxto koestediagua. Péro haʼekuéra siémpre oreko vaʼerã enkuénta oipytyvõ vaʼerãha ifamíliape oiko hag̃ua chuguikuéra Jesús disípulo. Upévare tuakuéra iporã oñeporandu: “¿Oikuaámapa che família la tekotevẽva ikatu hag̃uáicha oñemeʼẽ Ñandejárape ha ojevautisa?”. w18.03 páh. 9 párr. 6

Jaaseptáramo peteĩ invitasión ñañehaʼãmbaite vaʼerã jaha. Ani vyroreírente upéi jaʼe jey ñande rapichápe ndaikatumoʼãiha jaha. Umi ermáno ñaneinvitáva ningo katuetei ojeprepara porã ñanderresivi hag̃ua, ha ndajaháiramo ojeprepara reietéta hikuái (Mat. 5:37). Sapyʼánte ningo oĩ umi oaseptáva peteĩ invitasión, péro upéi orresivíramo ótra invitasión ogustavéva chupe, okanselántema pe primérogui. ¿Péichapa jahechaukáta hína jahayhu ha jarrespetaha ñande rapichápe? Nahániri. Ñande ningo jaasepta vaʼerã umi invitasión ha jaagradese ñande pyʼaite guive oimeraẽ mbaʼe umi ermáno ojapóva ñanderehehápe (Luc. 10:7). Oimérõ ñakanselámante vaʼerã peteĩ invitasión, ñanembaʼerechakuaa vaʼerã ha pyaʼemi jaavisa pe persóna ñaneinvita vaʼekuépe. Iñimportánte ningo jarrespeta umi kostúmbre ojeguerekóva pe lugár jaikohápe. Oĩ lugár umi hénte ojepokuaaha orresivi porã umi visítape nohaʼarõiramo jepe, ha ótro lugár rupi katu ojeavisa raẽ vaʼerã ojeho mboyve. Oĩ umi tetã ojepokuaahápe umi persóna oñeinvitáva orrechasa una o dos vése pe invitasión ha upéi ae oasepta. Péro heta hendápe ndopytaporãi ndojeaseptáiramo ensegída pe invitasión. Tahaʼe haʼéva la kostúmbre pe lugár jaikohápe, siémpre ñañehaʼã vaʼerã ovyʼa hag̃ua umi ermáno ñaneinvita haguére. w18.03 páh. 18 párr. 20, 21

Ndahaʼéi ningo jaikuaa haguérente umi mbaʼe oĩva la Bíbliape oikótamava ñandehegui peteĩ persóna ijespirituálva (1 Rey. 4:29, 30; 11:4-6). Upévare, ndahaʼéi vaʼerã jastudiánteva la Biblia, síno jasegi vaʼerã ñamombarete ñande jerovia (Col. 2:6, 7). Ikatu jastudia pe lívro ‘Jaikókena Ñandejára mborayhúpe’. Ko lívro ñanepytyvõ jaikuaa hag̃ua mbaʼéichapa ikatu jasegi umi konsého bíblico. Oimérõ jastudiapáma ko lívro, ñahesaʼỹijokuaa avei heta ótra puvlikasión ñanepytyvõtava ñamombareteve hag̃ua ñande jerovia (Col. 1:23). Iporã jajepyʼamongeta umi mbaʼe ñaaprendévare, ha jajerure Jehovápe tañanepytyvõ jajapo hag̃ua umíva. Ñande ningo jastudia ha jajepyʼamongeta jajaposégui umi mbaʼe Jehová oguerohorýva ha ñaneñeʼẽrendu hag̃ua chupe (Sal. 40:8; 119:97). Tekotevẽ avei ñaaprende mbaʼéichapa ikatu ñamboyke umi mbaʼe ikatúva ñanemokangy (Tito 2:11, 12). w18.02 páh. 24, 25 párr. 7-9

Jajerovia hag̃ua Noé ojerovia haguéicha tekotevẽ jastudia porã Ñandejára Ñeʼẽ, ñamombaʼe umi mbaʼe ñaaprendéva chugui, ha jareko enkuénta umíva ñakambia ha jadesidi porã hag̃ua (1 Ped. 1:13-15). Jajeroviárõ Jehováre ha ñañehaʼãrõ jahupyty pe arandu haʼe omeʼẽva, ñanepytyvõta ani hag̃ua Satanás ñanemoñuhã ha ani hag̃ua ova ñanderehe umi hénte opensa lája (2 Cor. 2:11). Heta persóna ko múndope iviolénto ha hekovai, ha oho pe hete rembipota vai rapykuéri (1 Juan 2:15, 16). Haʼekuéra ndorekói enkuénta pe fin og̃uahẽmbotaitemaha ha oñehunditaha ko múndo aña. Ñande jerovia ikangýramo, ikatu avei ñañepyrũ ñapensa umi hénte opensaháicha. Ani ñanderesarái Jesús okomparárõ guare ñane tiémpo Noé tiémpore, noñeʼẽi hague violénsia ha tekovaíre, síno umi mbaʼe ikatúvare ñandedistrae Ñandejára servísiogui (Mat. 24:36-39). Eñeporandumína: “¿Ahechaukápa aiko lájare aikuaa porãha Jehovápe? ¿Ajeroviápa hína Jehováre ha ajapo la haʼe heʼíva? ¿Amboʼépa che rapichakuérape ojapo hag̃ua avei upéva?”. Asegún rembohovái koʼã porandu, reikuaáta reikópa hína Ñandejára oipotaháicha Noé ojapo haguéicha (Gén. 6:9). w18.02 páh. 9, 10 párr. 8-10

Ñande jaservíva Jehovápe jajekuida vaʼerã ani hag̃ua umi hénte lája ova ñanderehe. Péro jaikuaa ndaikatuiha ñamboykete umichaguápe. Heta oĩ ñande apytépe ombaʼapóva, ohóva koléhiope térã oikóva umi persóna ndoservírivandi Jehovápe. Péro ñande nañapensái ni ndajaikói vaʼerã haʼekuéraicha. ¿Mbaʼépa ñanepytyvõta upearã? Ñañemoag̃uive vaʼerã Jehováre. Upearã jastudia meme vaʼerã Iñeʼẽ ha jaiporavo ñane amigorã umi persóna ohayhúva chupe. Ñande ningo ñaipytyvõseterei ñande rapichápe oikuaa hag̃ua Jehovápe. Jahekákena oportunida japredika hag̃ua chupekuéra, ha jajerure avei Jehovápe tañanepytyvõ jaʼe hag̃ua entéro mbaʼe hendaitépe ha itiempoitépe. Ñamombeʼu vaʼerã enterovépe ñande haʼeha testígo de Jehová. Upéicharõmante umi ohecháva ñane kondúkta porãha, omombaʼeguasúta Ñandejárape ha ndahaʼéi ñandéve. Jehová “ñanerekomboʼe ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:11-14). Jasegíramo Jehová ehémplo ha jajapóramo la chupe ogustáva, umi hénte ohechakuaáta upéva ha ikatu voi heʼi: “Ore rohose penendive, pórke rohendu Ñandejára oĩha penendive” (Zac. 8:23). w18.01 páh. 31 párr. 17, 18

¿Oĩ vai piko jajehayhu ñandejupe? Nahániri, ndaivaíri ningo jajapo upéva ha tekotevẽ voi jajehayhu. Upéicha Jehová ñandeapo vaʼekue. Jesús heʼi vaʼekue avei: “Rehayhu vaʼerã nde rapichápe nde voi rejehayhuháicha” (Mar. 12:31). Hasy ningo jahayhu hag̃ua ótrope ni ñande voi ndajajehayhúiramo. La Biblia heʼi avei: “Menakuéra ohayhu vaʼerã hembirekópe, haʼekuéra ojehayhuháicha. Pe ohayhúva hembirekópe ojehayhu ijupe voi. Ndaipóri ningo kuimbaʼe ndaijaʼéiva hetére, upéva rangue oñangareko ha omokunuʼũ hete” (Efes. 5:28, 29). Jahechaháicha, iporã jajehayhu ñandejupe jahasaʼỹre la rrája. Segunda a Timoteo 3:2-pe oñeʼẽ pe persóna ijupénte ojehayhúvare, ha upéva la noĩporãiva. Upeichagua persóna ijegoísta. Umi opensáva ijehénte ojehayhu rasáma hína (Rom. 12:3). Ojepyʼapyve voi ijehe, ojepyʼapy rangue hapichakuérare. Peichagua persónape osẽ vaíramo álgo, pyʼỹinte okulpa ótrope oasepta rangue haʼe avei ojavy hague. Umi persóna opensáva ijehénte añetehápe ndovyʼái. w18.01 páh. 23 párr. 4, 5

Jastudia jave la Biblia ñahendu hína Jehovápe, ha ñañemboʼe jave katu ñañeʼẽ hína chupe. Ñande kristianokuéra ñañatende vaʼerã jajapo lájare ñane orasión. Ani siémpre jarrepeti la mísma kósa, ni ñañemboʼe chupe jaipota javénte osẽ porã ñandéve álgo. Ñañemboʼe jave ningo ñañekomunika hína ñande Apohare Jehovándi, ha haʼe ohenduseterei la jaʼétava chupe (Filip. 4:6). Rejepyʼapy jave peteĩ mbaʼére, la Biblia nemokyreʼỹ remoĩ hag̃ua “ Jehová pópe umi mbaʼe ndepyʼapýva” (Sal. 55:22). Hetaiterei ermánoma heʼi ko konsého oipytyvõiterei hague chupekuéra. ¡Ha ndéve avei katuete ideprovéchota! Siémpre ñañemboʼe vaʼerã Jehovápe, ndahaʼéi jaipota javénte ñanepytyvõ. Sapyʼánte jajepyʼapyeterei ñane provlemakuérare ha ndajahechakuaái umi mbaʼe porã jarekóva. Eñehaʼãmína ejapo lo sigiénte: Káda día epensa mbohapy mbaʼe porã Jehová omeʼẽvare ndéve, ha eagradese chupe umívare. w17.12 páh. 25, 26 párr. 10, 11

Hetaiterei estudiánte de la Biblia ningo káda áño oñemeʼẽ Jehovápe ha ojevautisa. Umíva apytépe oĩ heta mitãrusu ha mitãkuña michĩ guive oikuaámava pe añetegua. Péicha oelehi hikuái pe tape iporãvéva (Sal. 1:1-3). Oiméramo nde peteĩ túa térã sy oservíva Jehovápe, katuete hiʼãiterei ndéve ne família ojevautisa (embojoja 3 Juan 4 heʼívare). Katuete reipotaiterei ne família oikuaa porã “Ñandejára Ñeʼẽ”. Ñane tiémpope jarekóma pe Escrituras Hebreas ha Escrituras Griegas Cristianas. Umi mitã ningo michĩ guive ikatúma oaprende umi istória ha rreláto oĩva la Bíbliape. Jehová organisasión onohẽ heta lívro, folléto ha vidéo ikatúva tuakuéra oipuru omboʼe hag̃ua ifamíliape. ¿Máva mávapa umívagui oĩ ne idiómape? Umi mitã ningo oikuaa porã vaʼerã la Biblia omboʼéva ikatu hag̃uáicha oñemoag̃ui avei Jehováre. w17.12 páh. 18 párr. 1; páh. 19 párr. 4

Tembireko, oiméramo ereko ne ména ndahaʼéiva Testígo, ¿mbaʼépa rejapóta haʼe nandetrataporãiramo? Ikatu ningo ndepochy ha peñemoĩ pejodiskuti. ¿Omehorátapa upéicha pene situasión? Amo ipahápe rekonsegíramo haʼe ojapo la reipotáva, ¿omokyreʼỹtapa chupe upéva oservi hag̃ua Jehovápe? Hasy nunga la oiko hag̃ua upéva. Péro erekóramo enkuénta haʼe omoakãha nde rogapy ha errespeta chupe, oĩta pyʼaguapy nde rogapýpe ha remombaʼeguasúta Jehovápe. Ne ehémplo porã ikatu hína omomýi ne ménape oservi hag̃ua Jehovápe, ha péicha mokõivéva ikatúta pehupyty pe prémio (1 Ped. 3:1, 2). Ména, oiméramo ne rembireko ndoservíri Jehovápe, ¿mbaʼépa rejapóta haʼe nanderrespetáiramo? Reikóramo reguerosapukái chupe oikuaa hag̃ua mávapa la omandáva, ¿nderrespetavéta piko upe haguére? ¡Ni mbaʼevéicharõ! Ñandejára oipota rehayhu ne rembirekópe, ha péicha resegi Jesús ehémplo. Jesús ningo pe omoakãva kongregasión, ha haʼe siémpre ipasiénsia ha oporohayhu (Luc. 9:46-48). Resegíramo Jesús ehémplo, ikatu avei ne rembireko oservi Jehovápe. w17.11 páh. 28, 29 párr. 13, 14

Heta persóna opensa ko múndope oñepensaháicha, ha nopenái umi mbaʼe Jehová heʼívare. Upévare, nañañatendéiramo koʼã idéa ikatu ñandeafekta ha mbeguekatúpe omokangy ñande jerovia. Añetehápe oimeraẽvare ikatu oiko upéva, pórke ko múndope oñepensa lája jatopakuaa télepe, Internétpe, ñande travahohápe, eskuéla térã koléhiope. Heta hendárupi umi hénte opensa péicha. Sapyʼánte koʼãichagua persóna nopensái voi oimépa Ñandejára añetehápe oexisti, upéva rangue haʼekuéra oikosénte iñakãre ha péicha ojapo la ojaposéva avave heʼiʼỹre chupe mbaʼeve (Sal. 10:4). Ótro katu opensa iñakãporãveha heʼíramo: “Che ikatúnte avei chevuéno ndaroviáiramo jepe Ñandejára oexistiha”. ¿Añetehápe piko ñaneakãporãve hína ñapensáramo Ñandejára ndoexistiriha? Oĩ persóna oikuaaséva Ñandejárapa oexisti ha orahaiterei enkuénta umi sientífiko heʼíva. Péro amo ipahápe okonfundive guei chupekuéra. Natekotevẽi ningo ñañekomplikaiterei jaikuaa hag̃ua la siertoguáva. Ñapensamína ko ehémplore: ¿Ikatúpa peteĩ óga ijehegui reínte oñemyatyrõ oñembyaíramo? ¡Nahániri! Jaikuaaháicha, oĩmante vaʼerã peteĩ omyatyrõva. Péro Ñandejára ojapo vaʼekue ndaupéichai. w17.11 páh. 20, 21 párr. 2-4

¿Mbaʼérepa iñimportantete ñaime pe Konmemorasionhápe? Jahávo upe rreuniónpe ñamombaʼeguasu hína Jehovápe. Katuete Jehová ha Jesús orekóta enkuénta ñañehaʼãramo ñaime hag̃ua pe rreunión iñimportantetévape ojejapóva káda áño. Sapyʼánte ikatu ñanderasy térã oñepresenta peteĩ situasión nañahaʼarõietéva. Upéicharõ jepe, ñande jaipota haʼekuéra ohecha ñañehaʼãmbaiteha jaasisti hag̃ua, ha ndaikatuietérõnte nañaĩmoʼãiha upépe. Jahechaukáramo umi mbaʼe jajapóva rupive umi rreunión iñimportanteha ñandéve g̃uarã, Jehová siémpre orekóta ñande réra ilívrope, oĩhápe “umi hénte réra, umi haʼe imanduʼátavare”. Ko lívrope oñehenói avei “lívro jeikove rehegua”. Pype Jehová oanota máva mávapepa omeʼẽta vída etérna (Apoc. 20:15). Umi semána og̃uahẽmbotaitépe pe Konmemorasión, ikatu remboykeve tiémpo reñemboʼe hag̃ua Jehovápe ha rejepyʼamongeta hag̃ua mbaʼéichapa oĩ ne amista hendive (2 Cor. 13:5). w18.01 páh. 13 párr. 4, 5

Pe oporojukáva por aksidénte oike jepéramo peteĩ siuda de rrefúhiope, haʼe oĩma protehído. Jehová heʼi vaʼekue: “Koʼã siudápe ikatúta okañy” (Jos. 20:2, 3). Jehová ndojerurevéima ojehusga jey hag̃ua pe oporojuka vaʼekuépe. Avei, “pe omano vaʼekue pariénte” ndaikatumoʼãi oike pe siudápe ojuka hag̃ua upe persónape. Jehová oprotehe pe oporojuka vaʼekuépe aksidentálmente oiko aja pe siuda de rrefúhiope. Haʼe ningo noĩri peteĩ kárselpe, upévare ikatu ombaʼapo, oipytyvõ ótrope, ha oservi pyʼaguapýpe Jehovápe. Añetehápe, upe persóna ikatúnte avei ovyʼa ha orekopa la oikotevẽva guive. Sapyʼánte oĩ ermáno opeka vai vaʼekue, ha oñarrepentíramo jepe osegi gueteri oñeñandu vai. Ikatu voi oĩ opensáva Jehová núnka ndahesaraimoʼãiha la ojapo vaʼekuégui. Oimérõ nde reñeñandu péicha, nemanduʼákena Jehová neperdona jave ndorahaveimaha enkuénta la rejapo vai vaʼekue. Upévare, ani reñekevrantave. w17.11 páh. 9 párr. 6; páh. 11 párr. 13, 14

Jajepyʼamongeta vaʼerã mbaʼépa orrepresenta pe pan ha pe víno oñembohasáva Konmemorasionhápe, péicha ñaipytyvõta avei oĩ hag̃ua unida Ñandejára puévlope. Og̃uahẽ mboyve pe Konmemorasión, ha koʼýte pe Konmemorasión díape, jajapo vaʼerã upéva (1 Cor. 11:23-25). Pe pan ilevaduraʼỹva ningo orrepresenta Jesús rete ndorekóiva pekádo, haʼe omeʼẽ vaʼekue ñanderehehápe. Ha pe víno katu orrepresenta pe huguy. Jesús sakrifísio ningo ohechauka ñandéve mbaʼeichaitépa Jehová ha Jesús ñanderayhu. Jehová ohechauka ñanderayhuetereiha omboúvo itaʼýra omano hag̃ua ñanderehehápe ikatu hag̃uáicha ñandesalva. Jesús avei ohechauka ñanderayhuetereiha oĩvo dispuésto omanóvo ñanderehehápe. Jajepyʼamongetáramo mbaʼeichaitépa ñanderayhu hikuái, katuete jahayhuvéta avei chupekuéra. Péicha, ñande ha entéro ermáno jahayhúramo Jehovápe, katuete ñaneunidovéta. w18.01 páh. 15 párr. 11

Jehová ningo ñanderayhueterei, ha ñande javaleterei chupe g̃uarã. Upévare omeʼẽ Itaʼýra peteĩete jahupyty hag̃ua jeikove opaveʼỹva (Juan 3:16). Jehová nokumplíriramo ipromésa, amo ipahápe siértota la heʼíva Satanás ha umi oĩva hendive. Haʼe ningo heʼi Ñandejára ijapuha, nogovernaporãiha ha nomeʼẽiha yvyporakuérape umi mbaʼe ombovyʼa vaʼerã chupekuéra. Entéro oñemoĩva Jehová kóntrape, oñembohory hína ipromesakuérare, ha haʼete heʼíva: “Haʼe ningo opromete vaʼekue outaha, ¿moõ piko oĩ upéicharõ? Ñande rukuéra ypykue ningo oikove ha omanomba jeýma, péro upe tiémpo guive koʼág̃a peve mbaʼevete nokambiái” (2 Ped. 3:3, 4). Ñandejára ningo katuete okumplíta ipromésa. Ojehechauka vove enterovépe haʼe añoite ogoverna vaʼerãha, umi yvypóra iñeʼẽrendúva ojesalváta (Is. 55:10, 11). Jehová goviérno ningo oñemopyenda mborayhúpe. Upévare ikatu ñaĩ segúro haʼe siémpre ohayhutaha ha omombaʼetaha umi persóna ifiélvape chupe (Éx. 34:6). w17.06 páh. 23 párr. 7

Jehová opromete ypy guive omboutaha peteĩ ñandesalva vaʼerã, chupe g̃uarã lomímo ke oikómava voi upéva. Ohasa rire 4.000 áño, Ñandejára omeʼẽ Itaʼýra peteĩete yvyporakuéra rehehápe (Juan 3:16). ¡Ajépa jaagradesete Jehovápe ñanderayhueterei haguére! Jehová ñandeapo ijoguahárõ, upéicha rupi ñaneimperféktoramo jepe ikatu avei jahechauka japorohayhu añeteha. Por ehémplo, Abel ohechauka vaʼekue ohayhuetereiha Ñandejárape omeʼẽvo chupe umi mbaʼe iporãvéva orekóva (Gén. 4:3, 4). Noé avei ohechauka oporohayhu añeteha pórke osegi opredika hetaiterei áñore nohenduséirõ jepe chupe umi hénte (2 Ped. 2:5). Abrahán katu ohechauka ohayhuveha Ñandejárape opaite mbaʼe ári, pórke oĩ dispuésto omeʼẽvo itaʼýra ohayhuetéva rekove (Sant. 2:21). Ojapo haguéicha koʼã Ñandejára siérvo, ñande avei ikatu jahayhu chupe ñande pyʼaite guive jahasáramo jepe heta mbaʼe ijetuʼúva. w17.10 páh. 7, 8 párr. 3, 4

Ñande jareko rupi Jesúspe kómo saserdóte prinsipál, “Ñandejára ñandeporiahuverekóta ha imbaʼeporãta ñanepytyvõ hag̃ua ñaikotevẽ jave” (Heb. 4:16). Péro ikatu hag̃uáicha jajerrefuhia Jehováre, jajerovia vaʼerã Jesús sakrifísiore. Iñimportanteterei rehechakuaa pe rreskáte haʼeha ndéve g̃uarã (Gál. 2:20, 21). Rejeroviáramo pe rreskátere, Jehová operdonáta nde pekádo. Avei péicha ikatúta nde reiko opa ára g̃uarã. Jesús sakrifísio ningo peteĩ rregálo Jehová omeʼẽva ndéve. Upéicha avei, Jehová ñaneperdona rire, ndajakyhyjevéima vaʼerã haʼe imanduʼa jeýrõ g̃uarã upe pekádore, ni ñandekastigárõ g̃uarã upévare (Sal. 103:8-12). Ni michĩmi ndajadudái vaʼerã Jehová ñaneperdonamaha. w17.11 páh. 11, 12 párr. 14-17

Primera ves ojejapórõ guare pe Séna del Señór, Jesús oñemboʼe kuri Itúape. Upérõ ojerure chupe idisipulokuéra oĩ hag̃ua unído haʼekuéra oĩháicha unído. Jehová ombohovái ko orasión ojapo vaʼekue Itaʼýra ohayhuetéva. Por ehémplo, pe Konmemorasión jave ojehecha porãvéntema entéro ñande testígo de Jehová ñaneunidoha. Heta lugárpe la hénte ndojepokuaái ohecha umi rreunión oñembyatyhápe persóna de diferénte rrása, ha hetápe katu ndogustái voi umíva. Péro Jehová ha Jesús nopensái upéicha. Chupekuéra g̃uarã iporãiterei pe unida oĩva ñañembyaty jave pe Konmemorasionrã. Ñande jaservíva Jehovápe ningo ñaneunidoiterei, péro añetehápe nañanesorprendéi upéva. Jehová heʼíma vaʼekue voi ipuévlo iñunidotaha (Ezeq. 37:15-17; Zac. 8:23). w18.01 páh. 14 párr. 7-9

“Umi konstruktór” orrechasáva pe Mesíaspe haʼe vaʼekue umi líder rrelihióso judío. Haʼekuéra ndahaʼéi omboykénteva Jesúspe, térã ndoaseptáinteva haʼeha pe Cristo. Heta judío orrechasa voi Jesúspe ha ojerure Pilátope ojuka hag̃ua chupe (Luc. 23:18-23). Jahechaháicha, umi judío káusare ojejuka vaʼekue Jesúspe. ¿Mbaʼéichapa upéicharõ oikóta chugui “pe ita prinsipál”? Upearã haʼe tekotevẽ kuri orresusita. Apóstol Pedro oñeʼẽ vaʼekue “Jesucristo Nazaretgua” rehe umi governánte ha kuimbaʼekuéra omoakãvape judiokuérape. Haʼe heʼi haʼekuéra omosaingo hague chupe yvyráre, péro Ñandejára omopuʼã jey hague chupe omanóva apytégui (Hech. 3:15; 4:5-11; 1 Ped. 2:5-7). Jesús orresusita rupi ikatu jajesalva. La Biblia heʼi: “Peikuaáke ndaiporiha ótro ikatúva ñandesalva, ndaipórigui ko yvy ape ári ótro téra, Ñandejára oiporavo vaʼekue yvyporakuéra apytépe, ñandesalva hag̃ua” (Hech. 4:12; Efes. 1:20). w17.12 páh. 9, 10 párr. 6-9

Jesús omombeʼúrõ guare umi profesía oñeʼẽva pe ára paháre, oñeʼẽ kuri avei pe tiémpo haʼe outaháre. Pe jehasa asy guasu og̃uahẽmbotávare haʼe heʼi kuri: “Ohecháta hikuái pe Yvypóra Raʼy ouha umi arai ári tekomimbipa ha podér reheve. Haʼe omondóta hiʼanhelkuérape, ha trompéta pu reheve ombyatýta hikuái umi ojeporavo vaʼekuépe” (Mat. 24:29-31). Jesús ombyatypáta umi “ojeporavo vaʼekuépe” oguerahapa vove yvágape umi unhído opytávape gueteri ko yvy ape ári. Upéva oikóta hína oñepyrũ riréma pe jehasa asy guasu, péro oñepyrũ mboyve Armagedón. Ko gérra oiko vove, Jesús ha umi 144.000 ohundipaitéta umi goviérno oĩva ko yvy ape ári (Apoc. 17:12-14). Pe Konmemorasión ojejapóta Jesús ou peve ogueraha hag̃ua umi unhídope, ha upéva haʼéta pe última Konmemorasión. w18.01 páh. 16 párr. 15

Koʼág̃a Jesús oiko yvágape “opa ára g̃uarã” (Apoc. 1:5, 18; Rom. 6:9; Col. 1:18; 1 Ped. 3:18). Haʼe opromete vaʼekue ijapostolkuéra iñeʼẽrendúvape ogovernataha avei hendive upépe (Luc. 22:28-30). Pablo oñeʼẽrõ guare Jesús rresurreksión rehe, heʼi hese haʼeha pe “kosécha tenondegua”. ¿Mbaʼérepa? Pórke chupe raẽvete oñemopuʼã vaʼekue umi omanóva apytégui. Upéi heʼi avei oĩvetaha oñemoingove jeýva oho hag̃ua yvágape. Haʼe heʼi: “Káda uno oikove jeýta otoka vove chupe: Cristo raẽve oñemoingove jey, upéi umi haʼéva Cristo mbaʼe oñemoingove jeýta ipresénsia aja” (1 Cor. 15:20, 23, nóta). Heta áñorema testígo de Jehová ohechauka la Biblia rupive Cristo “presénsia” oñepyrũ hague 1914-pe. Koʼág̃a ñande jaiko gueteri Cristo presénsia tiémpope, ha ko múndo aña oñehundi potaitéma. w17.12 páh. 10 párr. 11; páh. 11 párr. 14-16

Ñande “Túa oporoporiahuverekóva” oikuaa porã mbaʼépa heʼise omanoha ñandehegui peteĩ jahayhúva. Chugui ningo omanóma heta isiérvo, por ehémplo Abrahán, Isaac, Jacob, Moisés ha rréi David (Núm. 12:6-8; Mat. 22:31, 32; Hech. 13:22). La Biblia heʼi hiʼãitereimaha Jehovápe omoingove jey chupekuéra (Job 14:14, 15). Og̃uahẽ vove upe tiémpo ovyʼaitereíta hikuái ha hesãita. Jehovágui ningo omano avei Itaʼýra peteĩete. La Biblia heʼi haʼe ohayhueterei hague chupe ha ojepokuaaiterei hague hese (Prov. 8:22, 30). Añetehápe ndaikatumoʼãi ñantende mbaʼeichaite pevépa Jehová oñeñandu vaíne rakaʼe ohechárõ guare Itaʼýra ohayhuetéva hetaite osufri hague omano hag̃ua (Juan 5:20; 10:17). Ani jaduda Jehová katuete ñanepytyvõtaha. Upévare, siémpre ikatu ñamombeʼupaite chupe umi mbaʼe ñañandúva. ¡Ajépa ñañeñandu porãmie jaikuaávo haʼe ontendeha la jahasáva ha katuete ñanekonsolataha ñaikotevẽ jave! (2 Cor. 1:3, 4). w17.07 páh. 13 párr. 3-5

Ñane tiémpope, hetaiterei persóna vyʼápe omeʼẽ “umi mbaʼe iporãvéva” orekóva, por ehémplo omeʼẽ itiémpo, imbaretekue ha imbaʼerepy. Péicha ombaʼapo hikuái pe témplo espirituál tuichaitéva rehe (Prov. 3:9). Jehová núnka ndahesaraimoʼãi opa mbaʼe jajapóvagui hesehápe ha mbaʼeichaitépa jahayhu chupe. Koʼã ára pahápe, Jehová puévlo ojapo peteĩ traváho tuichaitereíva. Ha upéva ojehupyty Jehová vendisión rupive ha Cristo ñanemoakã haguére. Javyʼaiterei ikatúgui ñaime Ñandejára organisasiónpe, pórke jaikuaa odurataha opa árare, ndaiporiha ótro lugár isegurovéva ha ikatuha jajerovia hese. Upévare, ñamombaʼe vaʼerã ikatu haguére jaiko Jehová puévlo apytépe, ha ñahendu meme vaʼerã Jehovápe (Zac. 6:15). Péicha, ñande rréi ha saserdóte prinsipál Jesús oñangarekóta ñanderehe. Jajapókena opa ikatúva jaapoja hag̃ua pe adorasión verdadéra. Jajapóramo upéva, Jehová ñandeprotehéta jaiko aja ko múndo añáme ha avei opa árare. w17.10 páh. 30 párr. 18, 19

Koʼẽrõite pe polítika, umi rrelihión japu ha umi komérsio ha negósio oĩva Satanás múndope oñehundietéta. Proféta Ezequiel ha Sofonías heʼi voi kuri pe óro ha pláta ivaliosoitéva koʼág̃a, ndoservimoʼãveimaha mbaʼeverã (Ezeq. 7:19; Sof. 1:18). Ñapensamína: ñamoĩ chupe ñamano potaitemaha, ha upépe ae ñañemeʼẽ enkuénta ñambotapykue hague “umi mbaʼerepy teetéva” ñakonsegi hag̃ua ko múndo oofreséva. ¿Mbaʼéichapa ñañeñandúne? Ikatu hína ñañeñandu peteĩ persóna ombaʼapo vaʼekuéicha tóda la vída ombyaty hag̃ua heta pláta, péro upéi ou opilla pe pláta ogana vaʼekue falsoha (Prov. 18:11). Umi mbaʼerepy ko mundopegua koʼẽrõite ndovalemoʼãvéima mbaʼeverã. Upévare jaipuru porãkena umi mbaʼerepy jarekóva ñañemoag̃uive hag̃ua Jehová ha Jesúsre. Entéro mbaʼe jajapóva ñamotenonde hag̃ua pe Rréino, añetehápe omombaretéta ñane amista Jehovándi. w17.07 páh. 11 párr. 16

Oĩ ermáno ha ermána omokañyséva umi mbaʼe vai ojapo vaʼekue pono oñemotĩ térã odesepsiona ótra persónape (Prov. 28:13). Péro umi ojapóva péicha ndohechaukái hína oporohayhuha. Haʼekuéra voi ojeperhudika ha avei umi oĩvape ijerére. Oĩramo oñomíva hembiapo vaikue, pe espíritu sánto ikatu hína ombaʼapo asy kongregasiónpe ha ndaiporivéi pyʼaguapy (Efes. 4:30). Pe opekáva oporohayhu añetéramo, omombeʼúta ansianokuérape la ojapo vaʼekue ha ohejáta oñepytyvõ chupe (Sant. 5:14, 15). Pe mborayhu ningo haʼe pe kualida iñimportantevéva ohechauka vaʼerã kristianokuéra (1 Cor. 13:13). Japorohayhúramo, ojekuaáta hína ñamoirũha Jesúspe ha jasegiha Jehová ehémplo, pórke chugui voi ou pe mborayhu. Pablo heʼi vaʼekue haʼe ndoporohayhúiramo ndahaʼeiha mbaʼevete (1 Cor. 13:2). Upéicharõ, aníkena jaʼénte japorohayhuha, síno “umi mbaʼe jajapóva rupive” jahechauka japorohayhu añeteha (1 Juan 3:18). w17.10 páh. 11 párr. 17, 18

José ipyʼaguasu vaʼekue Potifar rembireko oñekuaveʼẽrõ guare chupe. Haʼe katuete oikuaáne raʼe iprovlemataha orrechasárõ chupe, upéicharõ jepe ipyʼaguasu ha orrechasa pe kuñakaraípe (Gén. 39:10, 12). Jahechamína avei Rahab ehémplo. Mokõi israelita ohórõ guare ovichea Jericó, Rahab pyʼaguasúpe oipytyvõ umi mokõi kuimbaʼépe ikatu hag̃uáicha okañy ha ojesalva (Jos. 2:4, 5, 9, 12-16). Jesús apostolkuéra ohecha kuri mbaʼéichapa haʼe ipyʼaguasu. Umi saduséo heʼírõ guare chupekuéra anivéma hag̃ua oñeʼẽ avavépe Jesúsre, umi apóstol lomímonte osegi opredika (Hech. 5:17, 18, 27-29). José, Rahab, Jesús ha ijapostolkuéra oĩ vaʼekue desidído ojapotaha la iporãva. Haʼekuéra ipyʼaguasu vaʼekue ojerovia rupi Jehováre, ndahaʼéi ijehénte. Ñande avei sapyʼánte tekotevẽta ñandepyʼaguasu, ha upéicha jave ani jajerovia ñandejehénte, jajerovia guei Jehováre (2 Tim. 1:7). w17.09 páh. 29 párr. 6-9

Ndaikatumoʼãi ningo jaheja ñande “reko tuja” ñandejehegui reínte. ¿Mbaʼépa oipytyvõ umi persóna oñehaʼãmbaitévape oheja umi mbaʼe vai? Ñandejára Ñeʼẽ ha ijespíritu sánto (Luc. 11:13; Heb. 4:12). Ñande avei ikatu ñandepuʼaka umi mbaʼe vaíre. Péro upearã tekotevẽ jalee la Biblia káda día, jajepyʼamongeta hese ha jajerure meme Jehovápe tañanemoarandu ha tañanemombarete jajapo hag̃ua umi mbaʼe ñaaprendéva Iñeʼẽgui (Jos. 1:8; Sal. 119:97; 1 Tes. 5:17). Ñandejára ñanepytyvõta avei Iñeʼẽ ha ijespíritu rupive jajeprepara porãramo rreunionrã ha ñañehaʼã ndajafaltái (Heb. 10:24, 25). Iñimportanteterei ningo jaaprovechapaite entéro mbaʼe Jehová organisasión omeʼẽva, por ehémplo umi rrevísta, JW Broadcasting, JW Library ha pe sítio jw.org (Luc. 12:42). Kristianokuéra oipeʼaite vaʼerã heko tuja, péro ndahaʼéi upévante la ojapo vaʼerã Ñandejára oguerohory hag̃ua chupekuéra. Avei omonde vaʼerã peteĩ aóicha pe teko pyahu (Col. 3:10). w17.08 páh. 21 párr. 16, 17

Rréi David ohasa vaʼekue heta inhustísia. Imitã reheve, Jehová oiporavo kuri chupe oiko hag̃ua chugui rréi. Péro ohaʼarõ vaʼerã kuri 15 áñorupi ogoverna hag̃ua itrívupente (2 Sam. 2:3, 4). Upe aja, unos kuánto tiémpo David oiko okañyháre, rréi Saúl ojukase rupi chupe. Upéicha rupi David ndahógai, ha peteĩ tiémpore oiko ótro tetãre térã umi kuévape desiértore. Upéi Saúl ou kuri omano gerrahápe. Upéicharõ jepe, David ohaʼarõ jey 7 áñorupi ogoverna hag̃ua tetã Israel kompletoite (2 Sam. 5:4, 5). ¿Mbaʼérepa David oĩ vaʼekue dispuésto ohaʼarõvo? Haʼe oikuaa Jehová ohayhuha chupe ha arakaʼeve ndohejamoʼãiha chupe haʼeño. Haʼe imanduʼa mbaʼéichapa Jehová oipytyvõ vaʼekue chupe ymave, ha kyreʼỹme ohaʼarõ haʼe osolusionataha iprovlemakuéra (Sal. 13:6). Jahechaháicha, David oikuaa porã vaʼekue nohaʼarõreimoʼãiha. w17.08 páh. 6 párr. 14, 15

Kon el tiémpo umi idióma okambia ohóvo. Sapyʼánte umi palávra ymaite guive ojepurúva ñane idiómape koʼág̃a osignifikáma ótra kósa. Upeichaite avei oiko umi idióma yma guarére. Pe idióma hebreo ha griego oñeñeʼẽva koʼág̃arupi idiferénte avei pe hebreo ha griego ojepuru vaʼekuégui ojeskrivi hag̃ua la Biblia. La majoría ndaikatúi ontende la Biblia umi idiómape, upévare tekotevẽ ojetradusi. Oĩ opensáva ikatutaha ontende porãve la Biblia oaprendéramo idióma hebreo ha griego yma guare, péro ndahaʼéi ningo haʼekuéra opensaháicha hína. Upévare ndaikatumoʼãi jaagradesepa jareko haguére la Biblia kompletoite térã peteĩ párte jepe mas de 3.200 idiómape. Jehová oipota “entéro tetã, trívu, puévlo ha umi oñeʼẽvape opaichagua idiómape” ontende Iñeʼẽ (Apoc. 14:6). Jahechávo mbaʼéichapa Jehová ñanderayhu ha nomboykeiha avavépe oñeʼẽ haguére ótro idióma, ñañemoag̃uiseve hese. w17.09 páh. 19 párr. 4

Ikatu ereko peteĩ ne hénte oñemosẽ vaʼekue kongregasióngui. Péicha jave rejejokokuaa vaʼerã ani hag̃ua reñeʼẽ hendive oiméramo natekotevẽtereíri hína. Añetehápe upéva ijetuʼu, péro tuicha nepytyvõta rejejokokuaáramo Jehová ojapoháicha ha rejapórõ la haʼe heʼíva. Rréi David ehémplo ikatu avei ñanepytyvõ. Saúl opersegírõ guare chupe ha Simeí omaltratárõ guare chupe, haʼe ndaipochýi ni ndoipurúi ijautorida oñevenga hag̃ua hesekuéra (1 Sam. 26:9-11; 2 Sam. 16:5-10). Péro jaikuaaháicha, sapyʼánte David ndojejokói vaʼekue. Por ehémplo, ñepyrũrã orreaksiona vai kuri Nabal kóntrape, ha avei opeka Bat-seba ndive (1 Sam. 25:10-13; 2 Sam. 11:2-4). ¿Mbaʼépa ikatu ñaaprende David ehémplogui? Primero, ansianokuéra tekotevẽha ojejokokuaa ha oñatende ani hag̃ua oipuru vai ijautorida. Ha segundo, ani jajeroviaiterei ñandejehe ha ñapensa ñande ndajaʼaicheneha umi tentasiónpe (1 Cor. 10:12). w17.09 páh. 5, 6 párr. 12, 13