Mayo

Pe disiplína ningo ijetuʼu hína, péro ijetuʼuve jey ndajaaseptáiramo pe disiplína oúva Ñandejáragui (Heb. 12:11). Epensamína Caín ehémplore. Ñandejára ohechárõ guare Caín ndochaʼeiha iñermánore ha ojukaseha chupe, heʼi kuri Caínpe: “¿Mbaʼéreiko la ndepochyete ha nderovapuku reikóvo? ¿Che piko ndoroguerohorymoʼãi mbaʼe reñehaʼãrõ rejapo pe iporãva? Péro rejaposéramo ivaíva, pe pekádo neraʼarõma hína nde raperãme peteĩ animál ñarõicha, ¿ha ikatúta piko ndepuʼaka hese?” (Gén. 4:6, 7). Caín nopenái pe konsého Jehová omeʼẽvare chupe, ojuka iñermánope ha upéva káusare osufri omano meve (Gén. 4:11, 12). Caín oaseptárire Jehová disiplína ndohasaʼasýi vaʼerãmoʼã. Jahechaháicha, Jehová ndoipotái reiete jahasa asy (Is. 48:17, 18). Upévare ñahendúkena jajekorrehi jave ñanearandu hag̃ua (Prov. 8:33). w18.03 páh. 32 párr. 18-20

¿Mbaʼéichapa Daniel oñepyrũne rakaʼe oikuaa Jehovápe? Ituakuéra katuete omboʼéne raʼe chupe ohayhu hag̃ua Jehovápe ha avei Iñeʼẽ, ha haʼe siémpre ojapo upéva. Upéicha rupi itujámarõ guare osegi ohesaʼỹijo porã Ñandejára Ñeʼẽ. Daniel oikuaa porã vaʼekue Jehovápe. Haʼe oikuaa avei entéro mbaʼe Jehová ojapo vaʼekue umi israelita rehehápe. Ñande jahechakuaa upéva jaleéramo pe ñemboʼe oĩva Daniel 9:3-19-pe. Upépe haʼe ohechauka iñumílde ha isinseroha. Iporãta jalee porãramo ko ñemboʼe ha jajepyʼamongeta hese. Umi judío ifiélvape ijetuʼu vaʼekue osegi hag̃ua iñeʼẽrendu Ñandejárape, pórke Babilóniape ojeadora umi dios fálsope. Avei Jehová omanda umi judíope: “Peñehaʼã oĩ hag̃ua pyʼaguapy pe siuda pomondo haguépe prisionéroramo” (Jer. 29:7). Péro omanda avei chupekuéra oadora hag̃ua chupe añoite ipyʼaite guive (Éx. 34:14). ¿Mbaʼépa Daniel ojapo kuri okumpli hag̃ua koʼã mokõi mandáto oúva Jehovágui? Ñandejára omoarandu Daniélpe oikuaa hag̃ua siémpre omotenonde vaʼerãha chupe umi governántepe rangue. Heta tiémpo rire, Jesús omboʼe vaʼekue avei upéva idisipulokuérape (Luc. 20:25). w18.02 páh. 10 párr. 11, 12

¿Ndépa nderasykatu hína, ofalta ndéve pláta, térãpa rehasa persekusión? ¿Ijetuʼúpa ndéve sapyʼánte resegi hag̃ua revyʼa Ñandejára servísiope? Oimérõ upéicha, katuete nemokyreʼỹta Noé, Daniel ha Job ehémplo. Koʼã kuimbaʼe ningo iñimperfékto ha ombohovái vaʼekue heta provléma ñande avei ñambohováiva koʼág̃arupi. Ndahaʼéi voi upévante, sapyʼánte hekove jepe oapeligra vaʼekue hikuái. Péro haʼekuéra lomímonte osegi ifiél Jehovápe. Upévare haʼe omoĩ chupekuéra ehémploramo ikatu hag̃uáicha ñaneñeʼẽrendu ha jajerovia haʼekuéraicha (Ezeq. 14:12-14). Áño 612-pe a.C., Ezequiel oĩrõ guare Babilóniape oskrivi vaʼekue pe téxto koestediagua (Ezeq. 1:1; 8:1). Upéva oskrivi kuri 5 áñonte oñehundi mboyve Jerusalén 607-pe. Upérõ Jerusalénpe mbovymínte oĩ la ifiél ha iñeʼẽrendúva Noé, Daniel ha Job ojapo haguéicha, ha umíva la ojesalváva (Ezeq. 9:1-5). Ko múndo aña oñehundi vove, Jehová osalváta sólamente umi persóna hekojojávape Noé, Daniel ha Job hekojoja haguéicha (Apoc. 7:9, 14). w18.02 páh. 3, 4 párr. 1-3

Oiméramo nemitã, eñeporandumína: “¿Ahápa rreunionhápe ha asẽ apredika che túa umía oipotáguinte? ¿Térãpa che voi areko peteĩ amista Jehovándi?”. Tahaʼe imitãva térã ijedáva, enterovéva ñambaʼapo vaʼerã jahupyty hag̃ua hetave mbaʼe Ñandejára servísiope, péicha ñandeespiritualvéta (Ecl. 12:1, 13). Jahechakuaáramo mbaʼépepa ikatu ñamehorave, ñakambia vaʼerã tekotevẽhápe. Iñimportanteterei ningo oiko ñandehegui peteĩ persóna ijespirituálva, pórke upévagui odepende jajesalvátapa térãpa nahániri (Rom. 8:6-8). Péro jaikuaaháicha, upéva ndeʼiséi ñandeperfékto vaʼerãha. Jehová ñanepytyvõ ijespíritu sánto rupive japrogresave hag̃ua jahávo. Upéicharõ jepe, tekotevẽ avei ñambaʼapo meme ñandejehe. Igústo ningo jastudia la Biblia, péro ndajaleéi vaʼerã ñañentretene hag̃uánte. Tekotevẽ jastudia porã ikatu hag̃uáicha jatopa umi tesóro ñanepytyvõtava japrogresave hag̃ua. w18.02 páh. 25 párr. 10, 11

Umi mitã ningo natekotevẽi oikuaapaite entéro mbaʼe omboʼéva la Biblia ikatu hag̃uáicha oñemeʼẽ Jehovápe ha ojevautisa. Umi persóna ojevautisáva ningo osegi vaʼerã oaprende heta mbaʼe la Bíbliagui (Col. 1:9, 10). ¿Mbaʼépa upéicharõ ñane família tekotevẽ oikuaa ikatu hag̃uáicha ojevautisa? Tuichaiterei ñanepytyvõta ñaanalisáramo peteĩ família yma guare ehémplo (Hech. 16:25-33). Áño 50-rupi Pablo ovisita kuri Silas ndive Filipos, ojapórõ guare pe isegúndo viáhe kómo misionéro. Upérõ ojejagarra Pablo ha Sílaspe ha ojegueraha reiete chupekuéra préso. Péro upe pyharépe oiko peteĩ yvyryrýi, okuʼepaite pe kársel simiénto ha ojavripa umi kalavóso rokẽ. Pe guárdia kársel oimoʼã okañymbaha umi préso ha haimete ojesuisida. Péro Pablo ojoko chupe ani hag̃ua ojapo upéva. Upéi haʼe ha Silas opredika upe guárdia kársel ha ifamiliakuérape, ha omboʼe chupekuéra heta mbaʼe Jesúsgui. Koʼã persóna omombaʼeterei la oaprendéva, iñeʼẽrendu ha ensegída ojevautisa. w18.03 páh. 10 párr. 7, 8

Jehová ningo haʼe Ñandejára ovyʼáva ha umi oservíva chupe ovyʼa avei haʼéicha. Haʼekuéra ovyʼa oñemeʼẽmbaitévo oipytyvõ hag̃ua hapichakuérape, ndojoguái umi persóna opensávape ijehénte ha umi mbaʼe okonvenívarente chupekuéra (Hech. 20:35; 2 Tim. 3:2). ¿Mbaʼéichapa jaikuaáta noiméipa ñañepyrũma hína jajehayhuve ñandejupe Ñandejárape rangue? Ñapensamína ko konséhore: “Ani pejapo mbaʼeve peiko vaiségui ni peñembovaleségui, peñemomirĩ guei ha pepensa umi ótro tuichaveha pendehegui. Aníkena pejapo peẽmente ou porãva, síno pejepyʼapy vaʼerã avei pende rapicháre” (Filip. 2:3, 4). Ikatu ñañeporandu: “¿Asegípa hína ko konsého? ¿Añehaʼãpa ahecha mbaʼéichapa ikatu aipytyvõve ótrope kongregasiónpe ha predikasiónpe?”. Añetehápe ningo sapyʼánte ijetuʼu jajesakrifika hag̃ua ótro rehehápe, upévare ñañehaʼãmante vaʼerã ha ñambotapykue mimi umi mbaʼe ñandéve ñandegustáva. Katuete ningo javyʼáta jajapóramo upéicha, pórke jaikuaa pe Rréi del univérso oguerohorytaha upéva. w18.01 páh. 23 párr. 6, 7

¿Mbaʼéichapa ikatu jajapo ko téxtope heʼíva? Eñeporandumína: “¿Añetehápe piko aguerovia ko organisasión añoite Jehová oiporavo hague ojapo hag̃ua hembipota? ¿Ajapo piko la ikatúva guive apredika ha amboʼe hag̃ua umi marandu porã la héntepe? ¿Ahechaukápa umi mbaʼe ajapóvare añetehápe agueroviaha jaikoha umi ára pahápe, ha opapotaitemaha Satanás goviérno? ¿Asegípa ajerovia Jehová ha Jesúsre ajapo haguéicha añepyrũrõ guare aservi Jehovápe?” (Mat. 24:14; 2 Tim. 3:1; Heb. 3:14). Jajepyʼamongetárõ koʼã porandúre, ñanepytyvõta jahechakuaa hag̃ua oimépa ñañakarama hatãiti hína ñande jeroviáre. ¿Mbaʼépa ikatu jajapo jajeprepara hag̃ua pe Konmemorasionrã? Iporãitereíta jaleéramo umi artíkulo oexplikáva mbaʼérepa iñimportánte upe rreunión, ha jajepyʼamongeta umívare (Juan 3:16; 17:3). Ñande ikatúta jaikove pára siémpre sólamente jaikuaa porãramo Jehovápe ha jajeroviárõ Itaʼýra Jesúsre. Jajeprepara porã hag̃ua pe Konmemorasionrã, ikatu jastudia umi téma ñanemoag̃uivétava Jehová ha Jesúsre. w18.01 páh. 13 párr. 5, 6

Relee jave la Biblia ha umi puvlikasión, ha reho jave rreunionhápe, reaprende mbaʼéichapa Ñandejára oipytyvõ ótrope ifiél hag̃ua. Péro imbaretevévo ohóvo ne amista hendive, tekotevẽ avei rehechakuaa mbaʼéichapa Jehová nepytyvõ ndéve voi. ¿Rehechakuaápa Jehová ivuenoha nendive? Entéro kristiáno ningo katuete jahechakuaáma Jehová ivuenoha. Haʼe ñaneinvita ñañemoag̃ui hag̃ua hese ha Itaʼýrare. Peteĩ mitãrusu térã mitãkuña ikatu opensa: “ Jehová ningo oiporavo kuri che tuakuérape ha che amoirũntema chupekuéra”. Ani nderesarái reñemeʼẽ guive Jehovápe ha rejevautisa, emoñepyrũ hague peteĩ amista espesiál hendive. La Biblia heʼi: “Oĩramo ohayhúva Ñandejárape, haʼe oikuaa porã chupe” (1 Cor. 8:3). Siémpre revalora vaʼerã umi mbaʼe nde ikatúva rejapo Jehová organisasiónpe. w17.12 páh. 26 párr. 12, 13

Pe palávra “disiplína” térã korreksión hetápe omopensa pe kastígore, péro pe palávra heʼise hetave mbaʼe. La Biblia heʼi pe disiplína iporãha, ha sapyʼánte omensiona ko palávra oñeʼẽ jave konosimiénto, arandu, mborayhu ha ñande rekovére avei (Prov. 1:2-7; 4:11-13). Ñandejára ñandekorrehi jave ohechauka ñanderayhuha ha oipotaha jaiko opa árare (Heb. 12:6). Sapyʼánte Ñandejára ñandekorrehi jave omoĩ avei peteĩ kastígo, péro ndojapói upéva oipotágui jasufri téra ñandeperhudikaségui. Pe palávra “disiplína” ningo primeroite voi heʼise peteĩ persóna oporomboʼeha, ojapoháicha tuakuéra omboʼe jave ifamília ohayhuetévape. Enterove kristiáno ningo ñaime Ñandejára família apytépe (1 Tim. 3:15). Upévare jarrespeta ñande Ru Jehovápe jahechakuaágui orekoha autorida heʼi hag̃ua ñandéve mbaʼépa oĩ porã ha mbaʼépa oĩ vai, ha avei ñandekorrehi hag̃ua jajavy jave. Jajapóramo algúna kósa upéi hoʼa vaíva ñandéve, Jehová mborayhúpe ñandekorrehi ha upéva ñanepytyvõ ani hag̃ua ñanderesarái iñimportanteha ñaneñeʼẽrendu (Gál. 6:7). w18.03 páh. 23 párr. 1; páh. 24 párr. 3

Oiméramo nde peteĩ mitãrusu térã mitãkuña, ikatu epensa nde tuakuéra nanentendeiha térã ijestriktoitereiha nendive. Upévare ikatu ndekuerái ha epensáma voi oimépa reservise gueteri Jehovápe. Péro rehejáramo Ñandejárape, moõve nderetopamoʼãi ótro nderayhuvéva nde tuakuéragui, ni umi ne amígogui oĩva kongregasiónpe. Epensamína, nde tuakuéra núnka nandekorrehírirõ, ¿mbaʼéichapa reikuaáta oñeinteresaha nderehe? (Heb. 12:8). Haʼekuéra ningo ndahaʼéi perfékto, upévare ikatu nembopochy la ndekorrehi lája. Péro ani ejesareko upévarente, eñehaʼã guei entende mbaʼérepa heʼi térã ojapo umi mbaʼe nandegustáiva. Eñetrankilisánte vaʼerã ha eñehaʼãmbaite ani erreaksiona vai. Ejapo ikatúva guive neakãguapy hag̃ua, ha easepta umi konsého oñemeʼẽva ndéve. Nandegustáiramo jepe mbaʼéichapa oñemeʼẽ kuri ndéve peteĩ konsého, eñehaʼã eaprende chugui (Prov. 1:8). w17.11 páh. 29 párr. 16, 17

Oĩ ningo mitãrusu térã mitãkuña ojevautisa rire odudáva añetehápepa ideprovécho jajapo la Biblia heʼíva. Oĩ voi umi ohejaitéva Jehovápe. Upéicha rupi ikatu rekyhyje ne família ojevautisa rire oúrõ g̃uarã avei ndohayhuvéi Jehovápe ha nomombaʼevéi la Biblia omboʼéva. ¿Mbaʼéichapa ikatu reipytyvõ ne famíliape amás día ohayhuve hag̃ua Jehovápe ikatu hag̃uáicha ojesalva? (1 Ped. 2:2). Jahechamína mbaʼépa ikatu ñaaprende Apóstol Pablo oskrivi vaʼekuégui Timotéope, haʼe heʼi chupe: “Nde reñehekomboʼe vaʼekue hekoitépe reguerovia hag̃ua nde pyʼaite guive, upévare akóinte resegi vaʼerã umi mbaʼe reaprende vaʼekue, reikuaa porãgui mávapa nemboʼe umíva. Nde reikuaa nemitã guive Ñandejára Ñeʼẽ [umi Escrituras Hebreas], ikatúva nemoarandu rejesalva hag̃ua rejerovia rupi Cristo Jesús rehe” (2 Tim. 3:14, 15). Jahechaháicha, Pablo omensiona mbohapy mbaʼe: 1) “reikuaa nemitã guive Ñandejára Ñeʼẽ”, 2) “reguerovia hag̃ua nde pyʼaite guive”, ha 3) “ikatúva nemoarandu rejesalva hag̃ua rejerovia rupi Cristo Jesús rehe”. w17.12 páh. 18, 19 párr. 2, 3

Heta rrelihión omboʼe oexistiha pe infiérno, avei oĩ ojopýva umi héntepe omeʼẽ hag̃ua pláta, térã oñentremetéva polítikape. Ndareíri ningo heta hetave oĩ heʼíva oĩ porãveha rrelihionʼỹre. Añetehápe ningo ikatu jaiko porãve nañaiméirõ umi rrelihión japúpe. Péro arakaʼeve ndajavyʼamoʼãi ndajaikóiramo Jehová amígoramo, haʼe ningo “Ñandejára ovyʼáva” (1 Tim. 1:11). Opa mbaʼe Jehová ojapóva oipytyvõ ótrope. Ñande haʼéva isiervokuéra javyʼaiterei pórke ikatu avei ñaporopytyvõ (Hech. 20:35). Por ehémplo, pe rrelihión verdadéra oipytyvõ umi famíliape ovyʼa hag̃ua. ¿Mbaʼérepa jaʼekuaa upéva? Pórke ñanemboʼe jarrespeta ha ñandefiél hag̃ua ñane ména térã ñane rembirekópe, ñamongakuaa porã hag̃ua ñande famíliape ha jahayhu hag̃ua ñande pyʼaite guive káda uno ñande rogayguápe. Pe rrelihión verdadéra oipytyvõ Jehová siervokuérape ombaʼapo hag̃ua pyʼaguapýpe kongregasiónpe ha ojoayhu hag̃ua hikuái. w17.11 páh. 21 párr. 6, 7

Ñane tiémpope avei heta Ñandejára siérvo oñedesanima ha oñekevranta, oiko haguéicha Páblore. ¿Mbaʼérepa? Pórke sapyʼánte ñañehaʼãmbaitéramo jepe ñaneñeʼẽrendu Jehovápe, lomímo jeýnte jajavy ñaneimperfékto rupi. Upéva ikatu ñanemoñeñandu vai. Ikatu voi peteĩ kristiáno opeka vaieterei vaʼekue opensa Jehová núnka noperdonamoʼãiha chupe. Péro la Biblia ohechauka nañañedesanimamoʼãiha jahejáramo Jehová oñangareko ñanderehe (Sal. 34:22). Pablo omombeʼu rire ombyasyetereiha ndaikatúi haguére ojapo entéro mbaʼe Jehová oipotahaichaite, heʼi avei: “¡Aagradese Ñandejárape, ñande Ruvicha Jesucristo rupive!” (Rom. 7:25). ¿Mbaʼépa heʼise upéva? Pablo oñehaʼãmbaite vaʼekue ani hag̃ua ogueraha vai chupe umi deséo naiporãiva, ha opeka vaíramo jepe ymave, oñarrepenti kuri. Haʼe oikuaa porã Jehová operdona hague chupe Jesús sakrifísio rupive. Upéicha avei, Jesús opaga rupi pe rreskáte ñande ikatu ñanekonsiénsia potĩ ha jaiko pyʼaguapýpe (Heb. 9:13, 14). Jesús haʼe hína ñande saserdóte prinsipál ha “añetehápe ikatu osalva entéro umi oñemoag̃uívape Ñandejárare haʼe rupive. Haʼe ningo akóinte oikove ojerure hag̃ua” ñanderehehápe (Heb. 7:24, 25). w17.11 páh. 8 párr. 1, 2; páh. 12 párr. 15

Ñañemeʼẽrõ guare Jehovápe ñañekompromete kuri ñaneñeʼẽrendutaha chupe opa mbaʼépe. “Káda día” jareko oportunida jahechauka hag̃ua ñakumpliha ñane promésa ñambohovái lájare umi provléma, tahaʼe michĩva térã tuicháva (Sal. 61:8). Por ehémplo, ¿ñaneñeʼẽrendútapa Jehovápe oĩramo ojegustáva ñanderehe koléhiope térã ñande travahohápe? (Prov. 23:26). Oiméramo ñaneañoite jaservi Jehovápe ñane hentekuéra apytépe, ¿jajerurétapa Jehovápe tañanepytyvõ ikatu hag̃uáicha siémpre jaiko kristiáno teéicha? ¿Ñañemboʼépa káda día tahaʼe haʼéva ñane situasión jaagradese hag̃ua Jehovápe ñanderayhu ha ñandegia haguére? ¿Ñañemotiémpopa jalee hag̃ua la Biblia káda día? Ñañemeʼẽrõ guare Jehovápe ñañekomprometéma kuri jajapopaitetaha koʼã mbaʼe. Upévare, ñaneñeʼẽrendu jave ha ñañehaʼãmbaitévo jaservi porã Jehovápe, jahechauka hína jahayhuha chupe ha ñande haʼeha imbaʼe. Ñande jaservi Jehovápe ñandepyʼaite guive, ndahaʼéi ñakumpli hag̃uánte hendive. w17.10 páh. 23, 24 párr. 11, 12

Peteĩ eskritór de músika ifamósova heʼi vaʼekue: “Rehendu jave umi palávra, nemopensa. Rehendu jave umi melodía, nembopyʼarory. Péro repurahéi jave katu, umi palávra og̃uahẽ ne korasõite peve”. Umi kántiko rupive ñambotuicha ñande Ru yvagapeguápe ha jahechauka jahayhuha chupe. Avei péicha ñañemoag̃uive hese. Jahechakuaa upéicharõ mbaʼérepa umi purahéi iñimportanteterei jaadora hag̃ua Jehovápe, tahaʼe japurahéirõ ñaneaño térã ñane ermanokuérandi. ¿Mbaʼéichapa reñeñandu repurahéi jave kongregasiónpe? ¿Retĩpa repurahéi hatã hag̃ua? Heta lugárpe, kuimbaʼekuéra ndojepokuaái opurahéi ótro rovake. Upéva ningo ndouporãi kongregasiónpe, koʼýte umi ansiáno ikoyguáramo opurahéi hag̃ua, térã ojapóramo ótra kósa pe kántiko aja (Sal. 30:12). Umi purahéi rupive ñamombaʼeguasu Jehovápe. Péicha rupi ñañehaʼãmbaite ani hag̃ua jajeperde umi kántiko. w17.11 páh. 3 párr. 1-3

Entéronte ningo jaikose pyʼaguapýpe. Upévare jaagradeseterei jareko haguére “Ñandejára pyʼaguapy”. Upéva ñanetrankilisa ha ñanepytyvõ ani hag̃ua ñapensaiterei umi mbaʼe ñandepyʼapývare ni ñamboguapy ñandejehe umíva (Filip. 4:6, 7). Ñañemeʼẽma rupi Jehovápe jaiko avei pyʼaguapýpe hendive, térã ñaime porã henondépe (Rom. 5:1). Upéicharõ jepe, ñandepyʼapy gueteri heta mbaʼe jaiko rupi umi ára pahápe. Koʼág̃arupi oĩ opaichagua provléma ha heta hénte oiko vaisénte voi (2 Tim. 3:1-4). Avei jagerreapaite vaʼerã ikatu hag̃uáicha ñambohovái Satanás ñuhã ha umi enseñánsa japu oúva chugui (2 Cor. 10:4, 5). Péro sapyʼánte ñambohovái avei ótro provléma ikatúva ñandepyʼapyeterei, por ehémplo oñemoĩ jave ñanderehe ñane hénte ndoservíriva Jehovápe. Haʼekuéra ikatu oñembohory umi mbaʼe jagueroviávare, térã heʼi la família noñontendeveiha ñande káusare. Ikatu voi heʼi ñande ndahaʼeveimaha ihénte ndajahejáiramo ñane rrelihión. w17.10 páh. 12 párr. 1, 2

Umi idióma okambia ohóvo ha upéva oafekta avei la Bíbliape. Ikatu ningo osẽrõ guare la Biblia peteĩ idiómape oñentende porã kuri, péro ohasávo la tiémpo hasyvéma oñentende hag̃ua. Por ehémplo upéva oiko kuri pe Versión del Rey Jacobo rehe, haʼéva peteĩ traduksión ojejapóva ingléspe. Ko Biblia oñeimprimi kuri primera ves 1611-pe. Upe traduksión haʼe vaʼekue la ojepuruvéva upe tiémpope. Kon el tiémpo, heta palávra ojepurúva Versión del Rey Jacóbope, umi hénte oñeʼẽva ingléspe ndoipuruguasuvéima koʼág̃arupi. Upéicha avei oiko umi primera traduksión osẽ vaʼekuére ótro idiómape. Por ehémplo, pe ojapo vaʼekue Casiodoro de Reina idióma españólpe áño 1569-pe. Upéicha rupi jaagradeseterei koʼág̃a jareko haguére pe Traducción del Nuevo Mundo de las Santas Escrituras oipurúva umi palávra oñentendéva ñane tiémpope. Ko traduksión oĩ mas de 150 idiómape, tahaʼe kompléto térã en párte. Upéva heʼise la majoría ko yvy tuichakuére ikatuha olee la Biblia iñeʼẽtépe upe traduksión rupive. Avei oipuru umi palávra ndahasýiva oñentende hag̃ua, upéicha rupi ifasilve og̃uahẽ hag̃ua umi hénte korasõme. w17.09 páh. 19 párr. 5, 6

Mitãrusukuéra odesidi vaʼerã heta mbaʼe iñimportánteva. Iñarandu ha ipyʼaguasu vaʼerã odesidi porã hag̃ua mávarepa ojeheʼáta, mbaʼéichapa ojedivertíta, mbaʼépa ojapóta ani hag̃ua hekokyʼa ha arakaʼépa ojevautisáta. Mitãrusukuéra tekotevẽ ipyʼaguasu pórke oñemoĩ Satanás kóntrape, ha haʼe oheja vaise hína Jehovápe. Mitãrusukuéra opensa vaʼerã mbaʼépa ojapose henonderãme. Péva haʼe peteĩ desisión iñimportánteva. Heta paíspe oñepresiona chupekuéra ikatu hag̃uáicha ijestúdio porã ha oreko peteĩ traváho ogana porãtahápe. Ambue lugárpe katu ivai la pórte, ha mitãrusukuéra opensa oñemeʼẽmbaite vaʼerãha pe traváhope oipytyvõ hag̃ua hogayguakuérape. Jehová katuete ovendesíta umi mitãrusu ha mitãkuña oñehaʼãvape ombaʼapove iservísiope ha omotenonde Irréino. Añetehápe nombofaltamoʼãi chupekuéra mbaʼeve koʼág̃a ni amo gotyove. Síglo primérope peteĩ mitãrusu hérava Timoteo omotenonde vaʼekue Ñandejára oipotáva, ha nde ikatu avei ejapo upéva (Filip. 2:19-22). w17.09 páh. 29, 30 párr. 10-12

¿Mbaʼépa ñanepytyvõta jajejokokuaa hag̃ua? Tekotevẽ ñahesaʼỹijo meme Ñandejára Ñeʼẽ. La Bíbliape oĩ umi rreláto ohechaukáva mbaʼépa ohupyty umi ojejokokuaáva, ha mbaʼépa oiko umi ndojejokokuaáivare. Jehová nomoĩreíri la Bíbliape koʼã mbaʼe, síno omoĩ ñanerekomboʼe hag̃ua (Rom. 15:4). Upévare iporãta jalee, jastudia ha jajepyʼamongeta porã umi rrelátore. Ñañehaʼã vaʼerã jahecha mbaʼéichapa ikatu ideprovécho ñandéve ha ñane famíliape. Jajerure Jehovápe tañanepytyvõ jajapo hag̃ua umi mbaʼe ñaaprendéva Iñeʼẽme. Jahechakuaáramo tekotevẽha jajejokokuaave, ñañemboʼe vaʼerã Jehovápe ha ñañehaʼã jahechakuaa mbaʼépepa tekotevẽ ñamehora (Sant. 1:5). Avei tuicha ñanepytyvõta ñainvestigáramo ñane puvlikasionkuérape umi téma oñeʼẽva upévare. w17.09 páh. 6 párr. 15, 16

Pe teko pyahu “ojejapo [...] Ñandejára oipotaháicha” (Efes. 4:24). ¿Ikatúpa ñañemonde pe teko pyahúgui? Si ikatu. Jehová ñandeapo ijoguaháramo ha upévare ikatu jasegi iñehémplo porãite (Gén. 1:26, 27; Efes. 5:1). Apóstol Pablo heʼi vaʼekue pe persóna oñemondéva pe teko pyahúgui nomboykeiha avavépe. Haʼe heʼi: “Koʼápe ndaipóri griego, judío, oñesirkunsidáva, noñesirkunsidáiva, tetã ambuegua, escita, tembiguái, ni orekóva liverta”. Kongregasiónpe avave nopensái vaʼerã iñimportanteveha hapichágui haʼe haguére ótro paisgua, ótra rrása, iplatave térã ijestudiove rupi. ¿Mbaʼérepa? Umi kristiáno tee “haʼégui peteĩnte”, upéva heʼise entéro ñaimeha unído (Col. 3:11; Gál. 3:28). Ñañemondéramo pe teko pyahúgui japorotrata porãta ha jarrespetáta enterovépe, marãve ndoikói mbaʼe rrásapa, iplátapa, imboriahúpa, ijestúdio porãpa térã nahániri (Rom. 2:11). w17.08 páh. 22 párr. 1; páh. 23 párr. 3, 4

Jehová ndojeruremoʼãi ñandéve peteĩ mbaʼe haʼe voi noĩriva dispuésto ojapóvo. Añetehápe ndaipóri haʼéicha ipasiénsiava (2 Ped. 3:9). Por ehémplo, ymaitereíma hardín de Edénpe Satanás ijapu ha oñeʼẽrei hague Jehováre. Péro haʼe koʼag̃aite peve “ipasiénsia ha ohaʼarõ” gueteri omopotĩ hag̃ua héra. Upéva oiko vove “enterove umi osegíva oreko hese esperánsa” ohupytýta hetaiterei vendisión ijojahaʼỹva (Is. 30:18). Jesús ipasiénsia avei ha ohaʼarõkuaa. Oĩrõ guare ko yvy ape ári iñeʼẽrendu vaʼekue omano meve. Áño 33-pe, opresenta Jehovápe isakrifísio repykue yvágape, péro upéi tekotevẽ kuri ohaʼarõ jey áño 1914 peve oñepyrũ hag̃ua ogoverna (Hech. 2:33-35; Heb. 10:12, 13). Haʼe osegítaiti ohaʼarõ oñehundipaite peve iñenemigokuérape. Upéva oikóta omohuʼã vove irreinádo de Mil Áño (1 Cor. 15:25). Umi vendisión ojehupytýtava upe haguére ohechaukáta noñehaʼarõreíri hague. w17.08 páh. 7 párr. 16, 17

Peteĩ ermána hérava Susi heʼi: “Omano rire che memby, un áñorupi ropyta yvýre ha haʼetévaicha noroaguantamoʼãiva voi pe sufrimiénto”. Peteĩ ermáno omombeʼu derrepentete omano hague chugui hembireko, ha haʼe ou hasyete upe haguére. Ñambyasýramo jepe, heta persóna ohasa koʼã mbaʼe ijetuʼuetévare. Kongregasiónpe avei heta ermáno nohaʼarõiete kuri omano chuguikuéra peteĩ persóna ohayhúva Armagedón mboyve. Ikatu voi hína peteĩ jahayhúva omanóma raʼe ñandehegui, térã jaikuaa algúno ohasáva koʼã situasión. Oimérõ upéicha ñañeporandukuaa: ¿Mbaʼépa ikatu okonsola koʼãichagua persónape? Oĩ heʼíva kon el tiémpo ñanderesaraiha umi mbaʼe vai jahasa vaʼekuégui. Péro, ¿siértopa upéva? Peteĩ ermána viúda heʼi: “Chéverõ g̃uarã ndahaʼéi pe tiémpo la osolusionáva entéro mbaʼe, síno mbaʼéichapa jaipuru ñane tiémpo”. Jarekórõ peteĩ erída tekotevẽ ohasa tiémpo okuera hag̃ua, ha jakuida porã vaʼerã hese. Péicha avei, ñañembyasýrõ ñaikotevẽ tiémpo ha konsuélo ñañeñandu porã jey hag̃ua. w17.07 páh. 12, 13 párr. 1-3

¿Mbaʼépa Jehová oipota rejapo? Revyʼaséramo, tekotevẽ reikuaa Ñandejárape ha reservi chupe. Upearã voi haʼe ñandeapo vaʼekue (Sal. 128:1; Mat. 5:3). Umi animál ningo okaru ha ifamília, ha péicha haʼekuéra oĩ porãma. Péro Jehová ñandeapo ikatu hag̃uáicha javyʼa a medída jaikuaa ha jaservi chupe. Haʼe oipota nde repensa porã mbaʼépa rejapóta ikatu hag̃uáicha revyʼa ha isentído ndéve la nde rekove. La Biblia heʼi ñande Apohare haʼeha “Ñandejára oporohayhúva” ha “ovyʼáva”, ha avei ojapo hague yvyporakuérape “ijoguaháramo” (2 Cor. 13:11; 1 Tim. 1:11; Gén. 1:27). Nde katuete revyʼáta resegíramo ñande Ru ñanderayhuetéva ehémplo. Iñeʼẽme heʼi avei: “Javyʼaiteve ñameʼẽvo, ñandéve oñemeʼẽ rangue” (Hech. 20:35). ¿Revyʼámapa rejapo rupi ko téxto heʼíva? Oiméne katuete rehechakuaáma upeichaha, pórke péva siertoite hína. Upéicharõ, Jehová oipota rehechauka rehayhuha chupe ha nde rapichakuérape opa mbaʼe redesidívare (Mat. 22:36-39). w17.07 páh. 23 párr. 3

Ñandejára ñandetrata porãiterei ha ñanderrespeta. Ñande ningo ikatu ñañehaʼã ñañangareko ñandejehe, péro haʼe ojapo porãitevéta upéva. Jehová ohayhu entéro isiérvope, péro avei oñeinteresa peteĩteĩre. Ñapensamína mbaʼépa haʼe ojapo vaʼekue yma. Haʼe ningo 300 áñore ojevale umi hués rehe ikatu hag̃uáicha ogia ipuévlope, ha oipytyvõ chupekuéra ogana hag̃ua umi iñenemígope. Péro upe tiémpope avei haʼe ojesareko umi ndoservírivare chupe, por ehémplo Rut rehe. Rut ningo ndahaʼéi vaʼekue israelita, upéicharõ jepe heta ojesakrifika oadora hag̃ua Jehovápe. Upévare Jehová ovendesi Rútpe omeʼẽvo chupe imenarã peteĩ kuimbaʼe imbaʼeporãva, ha avei imembyrã. Péro ndahaʼéi upévante, Jehová avei orrekompensa Rútpe oiporavóvo imembýpe oiko hag̃ua chugui pe Mesías antepasádo. Avei Ñandejára oskrivika hembiasakue la Bíbliape, ha pe lívro bíblicope oñehenói hérarupi. Rut oikove jey vove, ovyʼaitereíta oikuaávo koʼã mbaʼe (Rut 4:13; Mat. 1:5, 16). w17.06 páh. 28, 29 párr. 8, 9

Áño 1970-pe, peteĩ ermáno hérava Peter oñepyrũ ombaʼapo Betel de Gran Bretáñape, upérõ haʼe oreko 19 áño. Peteĩ jey Peter osẽrõ guare opredika de kása en kása otopa peteĩ karaíre orekóva várva, ha oporandu chupe ontendesemiépa la Biblia omboʼéva. Ko karai ningo rravíno térã maéstro judío, upévare oñesorprendete voi peteĩ mitãrusu omboʼese haguére chupe Ñandejára Ñeʼẽ. Otantea hag̃ua Peter oikuaáva, pe karai oporandu chupe: “Eremína chéve, ¿mbaʼe idiómape piko ojeskrivi raʼe pe lívro de Daniel?”. Peter heʼi chupe: “Oĩ párte ojeskrivi vaʼekue araméope”. Peter omombeʼu: “Pe rravíno opyta ijurujái ohendúvo aikuaaha la oporandúva chéve, péro che la añesorprendevéva. ¿Moõgui piko che aguenohẽ upéva? Aha rire ógape arrevisa umi rrevísta Ñemañaha ha ¡Despertad! osẽ ramovéva, ha atopa peteĩ artíkulo omyesakãva Daniel ojeskrivi hague araméope” (Dan. 2:4, nóta). Jahechaháicha, pe espíritu sánto ikatu ñanemomanduʼa peteĩ informasión jaleéma vaʼekue (Luc. 12:11, 12; 21:13-15). w17.06 páh. 13 párr. 17

Ñapensamína mbaʼéichapa oñeñandúne peteĩ matrimónio oikuaávo ifamiliataha. Katuete ningo ombovyʼa chupekuéra upéva, péro ojepyʼapy avei opytávo. Por ehémplo, ndoikuaái hikuái oho porãtapa hese pe tembireko hyeguasu aja, térãpa hesãita pe mitã. Haʼekuéra oikuaa avei ogasta hetataha. Onase rire pe mitã tekotevẽta ojapo hikuái hetave kámbio. Pe sy oipuruve vaʼerã itiémpo oñangareko hag̃ua imembýre. Upévare, umi omendáva ndaikatumoʼãi ohasa tiémpo oñondive yma ojapo haguéicha. Pe túa katu orekóta hetave rresponsavilida. Haʼe oñehaʼãmbaite vaʼerã ani hag̃ua ombofalta mbaʼeve hembirekópe ni ifamíliape. Sapyʼánte umi omendáva ombohovái ambue situasión ijetuʼúva: ifamiliaseterei hikuái, péro ndaikatúi. Pyʼỹinte umi tembireko ndaikatúiva hyeguasu oñeñandu vaieterei. w17.06 páh. 4 párr. 1; páh. 5 párr. 5, 6

Entéro kristiáno ningo jahayhu pe añetegua, ha Ñandejára Ñeʼẽme jatopa upéva. Jesús heʼi vaʼekue Itúape: “Ne ñeʼẽ hína pe añetegua” (Juan 17:17). Jahayhu hag̃ua pe añetegua oĩva la Bíbliape jaikuaa raẽ vaʼerã la oĩva pype (Col. 1:10). Péro tekotevẽ jajapo hetave mbaʼe. Jahechamína mbaʼéichapa pe Salmo 119 heʼíva ikatu ñanepytyvõ jahayhu hag̃ua pe añetegua oĩva la Bíbliape (Sal. 119:97-100). Káda día jalee vaʼerã la Biblia, ha pe día pukukue jajepyʼamongeta vaʼerã hese. Ñapensárõ mbaʼéichapa ñanevenefisia umi konsého oĩva pype, jahayhuvéta Ñandejára Ñeʼẽ. Umi puvlikasión onohẽva Ñandejára organisasión ha oñemopyendáva Iñeʼẽme, haʼete voi umi tembiʼu hetereíva. Jaʼu jave peteĩ tembiʼu ñandegustáva ñañemotiémpo jadisfruta hag̃ua. Upéicha avei jastudia jave Ñandejára Ñeʼẽ ndajajapói vaʼerã pyaʼe pyaʼe. ¿Mbaʼérepa? Pórke péicha jadisfrutáta jaleévo “umi palávra porã porã”. Avei ifasilvéta ñandéve ñanemanduʼa hag̃ua umi mbaʼe jaleévare ha jaipurúta umíva ñaipytyvõ hag̃ua ótrope (Ecl. 12:10). w17.05 páh. 19 párr. 11, 12

Ñande ningo ñaipytyvõse entéro ohasa asývape, jepe ndahaʼéi testígo de Jehová (Luc. 10:33-37). Péro, ¿mbaʼépa ikatu jajapo ñaipytyvõ porã hag̃ua umi oikotevẽvape? Ñamombeʼu vaʼerã chupekuéra pe marandu porã. Peteĩ ansiáno oipytyvõmava heta rrefuhiádope heʼi: “Iñimportánte ningo ensegída jaʼe ñande haʼeha testígo de Jehová, ha javisitaha chupekuéra prinsipálmente oñemoag̃ui hag̃ua Ñandejárare, ndahaʼéi katuete ñaipytyvõ hag̃ua ekonómikamente. Ndajaʼéiramo koʼã mbaʼe, ikatu hína algúno oĩ ñanendive por interés”. Añetehápe heta mbaʼe porã ojehupyty ñaipytyvõ jave umi extranhérope (Sal. 146:9). Peteĩ ermána omombeʼu ifamília odipara hague Eritréagui pe persekusión káusare. Umi 4 imemby oviaha 8 día pukukue pe desiértore, ha heʼongue ijapére og̃uahẽ hikuái Sudánpe. Pe ermána omombeʼu: “Umi ermáno upepegua otrata chupekuéra haʼerõguáicha ihénte teete. Omeʼẽ che membykuérape hiʼupy, ao, peteĩ lugár opyta hag̃ua ha oipytyvõ chupekuéra oho hag̃ua umi lugár oikotevẽhápe. Añetehápe ningo testígo de Jehová añoite orresivi porã umi persóna ni ndoikuaáivape, oadora rupi Ñandejára añeteguápe. Ndaipóri ótro ojapo vaʼerã koʼã mbaʼe” (Juan 13:35). w17.05 páh. 7 párr. 17, 19, 20

Elifaz pe temanita heʼi vaʼekue Jóbpe: “¿Mbaʼépe piko ideprovéchota Ñandejárape peteĩ yvypóra rei? Térã, ¿reimoʼã piko haʼe oikotevẽtaha peteĩ persóna iñarandúvare? Nde ndehústoramo jepe upéva ndoúi ni ndohói Ñandejára Todopoderósope. Ha siémpre rejapóramo iporãva, ¿mbaʼépe piko upéva ideprovécho chupe?” (Job 22:1-3). Elifaz opensa Ñandejára nomombaʼeiha pe servísio yvyporakuéra ojapóva, ni noikotevẽiha voi ñanderehe. Pe ótro kuimbaʼe ohóva avei Job rendápe héra Bildad pe suhita. Haʼe katu heʼi peteĩ yvypóra rei ndaikatuiha ihústo Ñandejára renondépe (Job 25:4). Elifaz ha Bildad oipota Job opensa umi mbaʼe ojapóva Jehová rehehápe ndovaleiha mbaʼeverã. Haʼekuéra ontendeka Jóbpe ñande yvypóra haʼenteha vichoʼi ndahasyietéva ojejuka hag̃ua, térã peteĩ yso Ñandejára renondépe (Job 4:19; 25:6). Jehová heʼi vaʼekue Elifaz, Bildad ha pe ótro kuimbaʼépe hérava Zofar ijapuha hikuái. Upéi heʼi avei ovyʼaitereiha Job reheve ha ohenói chupe “che siérvo” (Job 42:7). Upéicharõ, jahechakuaa yvyporakuéra ideprovechoha Ñandejárape. w17.04 páh. 28 párr. 1, 2

Hetaiterei tiémporema ningo jahecha oikoha mbaʼe vai ko múndope, ha upévare sapyʼánte ndajahechakuaavéima ñandeafektaha umíva. Ñantende hag̃ua upéva, ikatu ñapensa umi persóna oikóvare rrúta kóstare. Haʼekuéra ningo ojepokuaáma ohendu umi rruído, upévare kon el tiémpo nomolestavéima chupekuéra. Ha umi oikóva peteĩ vasuréro ypýpe katu, tiémpo rire ndostorvavéima chupekuéra pe tyakuã vai. Péro pe rruído ha pe tyakuã vai opáramo, oñeñandu porãitereíta hikuái. Péicha avei, Jehová oipeʼapa vove umi mbaʼe vai, tuicha ñandepiroʼýta. ¿Mbaʼéichapa ojeikóta opa vove opaichagua provléma? Jaikóta pe téxto koestediagua heʼiháicha. Ajépa ñanembopyʼaguapy jaikuaávo Jehová oipotaha jaiko upéicha. Upévare, koʼág̃ama voi jajapo vaʼerã opa ikatúva ñaime hag̃ua Jehová ha iñorganisasión ykére. Jasegíkena jajepyʼamongeta umi mbaʼe porã jahupytýtavare amo gotyove. Iporãta avei ñañeimahináma voi oikoha umi mbaʼe, ha ñamombeʼu ñande rapichakuérape ñane esperánsa porãite (1 Tim. 4:15, 16; 1 Ped. 3:15). Jajapóramo koʼã mbaʼe, jajesalváta oñehundi vove ko múndo aña ha javyʼaitereíta opa árare. w17.04 páh. 13 párr. 16, 17

¿Mbaʼéichapa ñarreaksionáta ñane ermáno heʼi térã ojapóramo peteĩ mbaʼe ñanemoñeñandu vaíva? ¿Ikatútapa péicha jave jahecha pe hustísia Jehová ohechaháicha? Ñamoĩ chupe peteĩ ansiáno heʼiha opensa porãʼỹre peteĩ mbaʼe ñaneofendéva térã ñanemoñeñandu vaíva, ¿jatropesátapa upe haguére? ¿Ñapensátapa pe ermáno ndaikatuveimaha oservi kómo ansiáno? ¿Térãpa ñanepasiénsiata ha jahejáta Jesús, haʼéva pe omoakãva kongregasión, todesidi la oikótava? ¿Ñañekonsentrátapa pe ermáno fállare térãpa jarekóta enkuénta umi áño oservímava Jehovápe fiélmente? ¿Javyʼápa peteĩ ansiáno ofalláva ñanendive osegíramo oservi kómo ansiáno térã oñemeʼẽvérõ chupe priviléhio? Ñaĩramo dispuésto ñaperdonávo jahechaukáta jahechaha pe hustísia Jehová ohechaháicha (Mat. 6:14, 15). w17.04 páh. 27 párr. 18