Junio

Jehová ningo ñanderayhueterei, upévare ñandekorrehi ha ñanerekomboʼe. Haʼe oipota ñaime porã hendive ha jaiko opa árare. Sapyʼánte pe disiplína ndeʼiséi oñemeʼẽnteha ñandéve peteĩ konsého. Peteĩ ermáno oúramo opeka vai, ikatu operde algún priviléhio orekóva kongregasiónpe. Péro upe korreksión ohechauka hína Ñandejára ohayhuha chupe. Por ehémplo, ikatu hína oipytyvõ chupe ohechakuaa hag̃ua iñimportantetereiha ostudiave la Biblia, ojepyʼamongeta ha oñemboʼe. Ojapóramo koʼã mbaʼe oñemoag̃uivéta Jehováre (Sal. 19:7). Kon el tiémpo ikatu jey orrekupera umi priviléhio operde vaʼekue. Jehová ohechauka avei ñanderayhuha oĩ jave oñemosẽva kongregasióngui. ¿Mbaʼérepa jaʼe upéva? Pórke péicha oñangareko hína kongregasiónre ani hag̃ua pe mal ehémplo ombyai avavépe (1 Cor. 5:6, 7, 11). Avei pe disiplína ikatu oipytyvõ pe oñemosẽ vaʼekuépe oñemeʼẽ hag̃ua enkuénta ivaietereiha la ojapo vaʼekue, ha upéva ikatu avei omomýi chupe oñarrepenti hag̃ua. Añetehápe Ñandejára siémpre oporokorrehi hendaitépe (Hech. 3:19). w18.03 páh. 24 párr. 5, 6

Pe guárdia kársel ndoikuaái mbaʼevete la Bíbliagui. Upévare, ojevautisa hag̃ua tekotevẽ vaʼekue oaprende raẽ unas kuánta kósa iñimportánteva omboʼéva Ñandejára Ñeʼẽ. Upéi oikuaa vaʼerã avei mbaʼépa Jehová ohaʼarõ isiervokuéragui ha oĩ vaʼerã dispuésto ojapóvo umi mbaʼe Jesús omboʼe vaʼekue. Umi mbaʼe haʼe sapyʼaitépe oaprendéva omomýi chupe ojevautisa hag̃ua (Hech. 16:25-33). Katuete ningo upe rire osegi raʼe oaprende hetave mbaʼe. ¿Mbaʼépa upéicharõ ikatu ojapo tuakuéra ifamília heʼíramo chupekuéra ojevautisasemaha pórke ohayhu Jehovápe ha ojapose hembipota? Ikatu heʼi chupe oñeʼẽ hag̃ua umi ansiánondi, ikatu hag̃uáicha haʼekuéra ohecha okumplímapa umi rrekisíto ojevautisa hag̃ua. Umi ótro kristiánoicha avei, pe mitã ojevautisa rire osegíta opa árare oaprende hetave mbaʼe Jehovágui (Rom. 11:33, 34). w18.03 páh. 10 párr. 8, 9

Ñañehaʼãramo japrogresave espirituálmente, pe espíritu sánto ñanepytyvõta ñakambia hag̃ua ñapensa lája. Mbeguekatúpe ñapensáta jahávo Cristo opensaháicha. Ñandejára espíritu ñanepytyvõta avei ñamboyke hag̃ua umi deséo vai ha jaiko hag̃ua haʼe oipotaháicha. Ñapensáramo Cristo opensaháicha ojekuaáta ñanderehe ñañekomporta lájare ñande travahohápe térã koléhiope, ñañeʼẽ lájare ha la jadesidívare káda día. Opa mbaʼépe ojekuaáta ñanderehe ñañehaʼãha jasegi Cristo ehémplo. Ñaĩ porãramo espirituálmente ndajahejamoʼãi mbaʼeve ñanemomombyry Jehovágui. Ha ñambohovái jave umi tentasión ikatúta ñamboyke umíva. Jadesidíta jave álgo ñañeporandúta: “¿Mbaʼe téxtopa ikatu chepytyvõ adesidi porã hag̃ua? ¿Mbaʼépa ojapóne Cristo ko situasiónpe? ¿Mbaʼépa oipotáta Jehová ajapo?”. w18.02 páh. 25 párr. 12; páh. 26 párr. 14

Enoc tiémpope, haʼéva Noé visavuélo, umi hénte iñañaiterei vaʼekue ha Jehováre jepe “okopi” vaʼekue hikuái (Jud. 14, 15). Umi hénte amás día iviolentove vaʼekue. Noé tiémpope katu ko yvy henyhẽma hénte añágui. Umi ánhel naiñeʼẽrendúiva ou ko yvy ape ári, oñembohete yvypóraicha ha omenda umi kuñáre. Upéi ou ifamília hikuái, ha umíva iñaña ha iviolénto (Gén. 6:2-4, 11, 12). Péro Noé idiferenteterei chuguikuéra. La Biblia heʼi: “Siémpre ojapo iporãva ha idiferénte vaʼekue, pórke ndojapói ivaíva umi hénte itiempopegua ojapoháicha. Noé oiko Ñandejára oipotaháicha” (Gén. 6:9). ¿Mbaʼépa ñanemboʼe Noégui koʼã mbaʼe jatopáva la Bíbliape? Primero, ñapensamína mboy tiémporepa Noé ifiél vaʼekue Jehovápe upe múndo añáme. Ndahaʼéi kuri 70 ni 80 áñonte, haimete 600 áñore Noé osegi iñeʼẽrendu ou peve pe dilúvio (Gén. 7:11). Segundo, ñanemanduʼa vaʼerã upe tiémpope ndaipóri hague peteĩ kongregasión oipytyvõ ha omokyreʼỹ vaʼerã chupe koʼág̃a ñande jarekoháicha. Amalisia umi iñermáno ha iñermána karnál jepe ndoapojái vaʼekue chupe. w18.02 páh. 4 párr. 4, 5

Umi iplatarayhúva ningo oipota potave ha tódo el tiémpo oñehaʼãta okonsegi hag̃ua upéva. Péro umíva káusare oike “heta akãrasýpe” (1 Tim. 6:9, 10; Ecl. 5:10). Añetehápe ningo entéronte ñaikotevẽ plátare pórke ideprovécho ñandéve (Ecl. 7:12). Péro, ¿ikatúta piko lomímonte javyʼa jarekóramo ñaikotevẽmívante? Si ikatu (Ecl. 5:12). Peteĩ eskritór bíblico heʼi: “Ani reheja chemboriahu ni chepláta heta, pe tembiʼu aikotevẽvante emeʼẽ chéve”. Ndahasýi ñantende hag̃ua mbaʼérepa ojerure ani hag̃ua imboriahueterei, haʼe ningo ndoipotái upéva káusare ou omonda mbaʼe ha upéicha omotĩ Ñandejárape. Péro, ¿mbaʼérepa pe eskritór bíblico heʼi avei ani hag̃ua ou irrikoiterei? Haʼe heʼi: “Ani ág̃a cheryguatãmarõ aiko haʼe upérupi: ‘¿Máva piko aipo Jehová?’” (Prov. 30:8, 9). Jesús heʼi vaʼekue: “Avave ndaikatúi ombaʼapo tembiguáiramo mokõi patrónpe g̃uarã. Peteĩme ohayhúta ha pe ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei, peẽ ndaikatúi peiko Ñandejára rembiguáirõ ha avei peiko pláta rapykuéri” (Mat. 6:24). w18.01 páh. 24 párr. 9-11

Ñaperdonáramo ñande pyʼaite guive ñande rapichakuérape ñaipytyvõ oĩ hag̃ua unida. Ñaperdonáramo umi ñaneofendévape, jahechauka hína jaagradeseha Jehovápe operdona haguére ñande pekádo Jesús sakrifísio rupive. Ñapensamína pe ehémplo Jesús omombeʼu vaʼekuére Mateo 18:23-34-pe, ha ñañeporandumi: “¿Chemomýipa ko ehémplo ajapo hag̃ua Jesús omboʼe vaʼekue? ¿Chepasiénsia ha chembaʼeporãpa ermanokuérandi? ¿Aimépa dispuésto aperdonávo umi cheofendévape?”. Jaikuaa ningo oĩha umi pekádo igravevéva ótrogui, ha oĩ voi umi ijetuʼuetereíva ñandéve ñaperdona hag̃ua ñaneimperfékto rupi. Péro ko ehémplo ohechauka porã ñandéve mbaʼépa Jehová oipota jajapo. Jesús ohechauka porã Jehová nañaneperdonamoʼãiha ñande voi nañaperdonáiramo ñane ermanokuérape, koʼýte oñarrepenti jave hikuái ipyʼaite guive. Upéicharõ, iñimportánte ñapensa porã ko mbaʼére. Jajapóramo Jesús omanda vaʼekue ha ñaperdonáramo ñande rapichakuérape, ñaipytyvõta hína siémpre ñaime hag̃ua unído. w18.01 páh. 15 párr. 12

Daniel osegi oñemboʼe ipeligrósoramo jepe, haʼe ndoipotái oñepensa ndoadoraveiha Jehovápe. Jehová ovendesi Daniélpe ipyʼaguasu ha ifiél haguére. Upévare Ñandejára milagrósamente osalva chupe umi león pochýgui. Upéicha rupi umi hénte oikóva pe Império medopersa tuichakuére oikuaa kuri Jehovápe (Dan. 6:25-27). ¿Mbaʼépa ikatu jajapo jajerovia hag̃ua Daniel ojerovia haguéicha? Ndahaʼéi vaʼerã jaleénteva la Biblia, tekotevẽ ñantende la oĩva pype (Mat. 13:23). Iñimportanteterei jaikuaa mbaʼépa Jehová opensa, upéva heʼise ñañehaʼã vaʼerãha ñantende la haʼe ñanemboʼeséva. Upearã iporã jajepyʼamongeta umi mbaʼe jaleévare. Ñañemboʼe meme vaʼerã avei, koʼýte ñane provléma jave. Jajeruréramo Jehovápe ñanemoarandu ha ñanemombarete hag̃ua, haʼe katuete ojapóta upéva (Sant. 1:5). w18.02 páh. 10, 11 párr. 13-15

Oimérõ jepe rejevautisa ramónte ha nemitã reheve reservíma hína Ñandejárape, katuete rehechakuaáma Jehová ivuenoha nepytyvõ jave ndepyʼaguasu hag̃ua. Por ehémplo, haʼe nembopyʼaguasu reñeʼẽ hag̃ua umi mbaʼe regueroviávare, tahaʼe predikasiónpe, eskuéla térã koléhiope. Oiméne ijetuʼu ndéve repredika hag̃ua ne kompañerokuérape. Ikatu ndepyʼapy ndereikuaáigui mbaʼéichapa ojagarráta hikuái la eréva. Ha ikatu voi rekyhyjeterei reexplikáta jave ne kreénsia heta persóna renondépe. ¿Mbaʼépa ikatu nepytyvõ umícha jave? Iñimportánte rejepyʼamongeta ne kreénsiare, por ehémplo mbaʼérepa reguerovia umíva. Ñande sítio jw.org-pe retopáta heta gía de estúdio ojetradusíva diferénte idiómape. Ko párte nepytyvõta repensa hag̃ua ne kreénsiare, mbaʼérepa reguerovia upéva ha mbaʼéichapa ikatu reexplika ótrope. Reĩramo konvensído ha rejeprepara porãramo, reñeʼẽséta Jehováre (Jer. 20:8, 9). w17.12 páh. 26 párr. 12, 14, 15

Ndahaʼéi vaʼerã ñamboʼénteva ñane famíliape umi istória ha rreláto oĩva la Bíbliape. Ñanemanduʼa vaʼerã Timoteo oĩ hague konvensído umi mbaʼe oaprendévagui. Por ehémplo, Pablo heʼi vaʼekue chupe: “Reguerovia hag̃ua nde pyʼaite guive”. Griégope ko fráse heʼise avei “reime hag̃ua segúro” térã “reguerovia siertoha peteĩ mbaʼe”. Timoteo imitãite guive oaprende vaʼekue pe Escrituras Hebréasgui. Upéi oaprende kuri hetave mbaʼe okonvenséva chupe Jesús añetehápe haʼeha pe Mesías. Timoteo oguerovia vaʼekue ipyʼaite guive umi mbaʼe oaprendéva. ¿Mbaʼéichapa ikatu reipytyvõ ne famíliape ojapo hag̃ua avei upéva? Tekotevẽterei ne pasiénsia hese. Kon el tiémpomante haʼe ojeroviavéta ohóvo Jehováre. Nemanduʼa vaʼerã avei ndahaʼeiha nde reguerovia haguérente peteĩ mbaʼe, haʼe ogueroviatamaha avei upéva. Umi mitã tekotevẽ “oipuru meme iñakã” ikatu hag̃uáicha okonvense chupekuéra umi mbaʼe oaprendéva la Bíbliagui (Heb. 5:14). Tuakuéra tuicha ikatu oipytyvõ ifamíliape omombarete hag̃ua ijerovia, koʼýte umi mitã oporandu jave chupekuéra peteĩ mbaʼe oikuaaséva. w17.12 páh. 19 párr. 3, 5, 6

Marta ningo Jesús amigaite ha idisípula avei. Haʼe oñembyasyeterei kuri iñermáno Lázaro omano rupi. ¿Oĩ piko algúna kósa ikatúva okonsola chupe? Si oĩ. Jesús opromete Mártape: “Ne ermáno opuʼã jeýta” (Juan 11:20-23). Marta oikuaa porã og̃uahẽtaha pe tiémpo oñemoingove jeytahápe umi omanóvape. Péro Jesús ojapo peteĩ milágro, ha upe díape omoingove jey Lázarope. Jaikuaaháicha, ñande nañahaʼarõi Jesús térã Itúa omoingove jey koʼág̃ama voi peteĩ jahayhúva omano vaʼekuépe. Péro, ¿ndépa reguerovia ikatutaha oñemoingove jey umi rehayhúva omano vaʼekuépe, Marta oguerovia haguéicha? Ikatu oime omano raʼe ne ména, ne rembireko, nde sy, nde túa, nde avuélo térã nde avuéla, ha ikatu voi omano raʼe peteĩ ne família rehayhuetéva. Katuete ningo hiʼãitereíma ndéve reñeʼẽ, repuka ha reañuã jey pe persóna rehayhuetévape. Ajépa javyʼaite ikatu haguére jaʼe avei Marta heʼi haguéicha: “Che aikuaa oñemoingove jeytaha chupe”. Upévare, iporãitereíta reñeporandúramo mbaʼérepa reguerovia oñemopuʼã jeytaha umi omanóvape. w17.12 páh. 3 párr. 1, 2

Jesús omombaʼeterei vaʼekue pe Léi Mosáika. Péro upéva ndajahecharamói pórke pe Léi ou Itúa Jehovágui, pe persóna iñimportantevéva chupe g̃uarã. Jahechaháicha pe téxto koestediaguápe, la Biblia omombeʼúma voi kuri Jesús ohayhuetereitaha Ñandejára Ñeʼẽ. Añetehápe, umi mbaʼe Jesús heʼíva ha ojapóva rupive ohechauka porã Ñandejára Léi ndojavyiha mbaʼevetépe, ou porãha enterovévape ha opa mbaʼe oĩva pype oñekumpliha katuete (Mat. 5:17-19). Jesús oñeñandu vaíne raʼe ohechávo umi eskríva ha fariséo nomboʼeporãiha Itúa Léi. Haʼekuéra ombyai guei pe Léi, ha péicha ijetuʼuetereíma umi héntepe okumpli hag̃ua la heʼíva pype. Jesús heʼi vaʼekue chupekuéra: “Peẽ ningo pemeʼẽ pe diésmo, jervavuéna, enéldo ha komínogui”. Upéva heʼise haʼekuéra ojepyʼapyetereiha okumpli hag̃ua umi detálle michĩvéva oĩva pe Léipe. ¿Mbaʼépa upéicharõ la ojapo vaíva hikuái? Haʼekuéra omboyke “umi mbaʼe iñimportantevéva oĩva pe Léipe, umíva hína: tekojoja, poriahuvereko ha jerovia” (Mat. 23:23). Umi fariséo nontendeporãi la añetehápe omboʼeséva pe Léi, ha opensa voi iñimportanteveha hikuái hapichakuéragui. Péro Jesús ontende porã maʼerãpa oñemoĩ pe Léi, ha mbaʼépa ñanemboʼe Jehovágui entéro umi mandamiénto. w17.11 páh. 13 párr. 1, 2

Ikatu oĩ heʼíva: “¿Mbaʼére piko la ndeestriktoiterei? Nde ningo revyʼánte vaʼerã”. Péro Ñandejára Ñeʼẽ heʼi naiporãiha ñanderekovai (1 Tes. 4:4-8). Jehová ningo ñande Apohare, upévare oreko derécho heʼívo ñandéve mbaʼépa ikatu jajapo ha mbaʼépa ndaikatúi. Haʼe heʼi peteĩ kuña ha peteĩ kuimbaʼe omendáva ojuehe añoite ikatuha oreko rrelasión sexuál. Ñandejára omeʼẽ ñandéve Iléi ñanderayhúgui ha oikuaa rupi péicha jaiko porãvetaha. Umi família ojapóramo Ñandejára heʼíva ojoayhuvéta, ojogueraha porãvéta ha oikóta trankilove. Jehová okastigáta umi nopenáivape hese oikuaáramo jepe la ojapo vaʼerã (Heb. 13:4). La Biblia ñanemboʼe mbaʼéichapa ikatu ñamboyke pe tekovai. Upearã tekotevẽ ñañatende mbaʼépa jahecha (Mat. 5:28, 29). Upéicha rupi, ñamboyke vaʼerã pe pornografía ha músika tieʼỹ (Efes. 5:3-5). w17.11 páh. 22 párr. 9, 10

Ymaite guive, Jehová siervokuéra opurahéi omombaʼeguasu hag̃ua chupe. Umi israelita iñeʼẽrendu tiémpope Jehovápe, pe purahéi iñimportanteterei vaʼekue chupekuéra g̃uarã. Por ehémplo, David oorganisárõ guare umi ombaʼapótavape témplope, omoĩ 4.000 levítape oñenkarga hag̃ua pe músikare ojeadora jave Jehovápe. Umíva apytégui, oĩ vaʼekue 288 kuimbaʼe “oñembokatupyry vaʼekue opurahéi hag̃ua Jehovápe, enterovete ivaleterei” (1 Crón. 23:5; 25:7). Umi melodía ha purahéi iñimportánte vaʼekue oñeinagurárõ guare pe témplo. La Biblia heʼi: “Umi ombopúva trompéta ha umi opurahéiva oñepyrũ omombaʼeguasu ha oagradese oñondivepa Jehovápe, ha oñehendu pe trompéta pu, umi platíllo ha umi instruménto musikál ryapu oñemombaʼeguasu hag̃ua Jehovápe”. Upe javete, “ Jehová podér omimbipáva omyenyhẽ Ñandejára tee róga”. Koʼã mbaʼe ningo katuete oipytyvõne raʼe umi israelítape ojeroviave hag̃ua Jehováre (2 Crón. 5:13, 14; 7:6). w17.11 páh. 4 párr. 4, 5

Jesús oikuaa porã vaʼekue oĩtaha ndoaseptamoʼãiva umi mbaʼe haʼe omboʼéva. Oikuaa avei oĩtaha oñemoĩva idisipulokuérare ha tekotevẽtaha ipyʼaguasu hikuái. Jesús ou vaʼekue oikuaauka hag̃ua pe añetegua, ndahaʼéi omoingo vai hag̃ua umi famíliape (Juan 18:37). Péro idisipulokuéra oikuaa vaʼerã heta vése ndaifasilmoʼãiha osegi chupe, koʼýte peteĩ iñamigoite térã ihénte orrechasáramo pe añetegua. Algúnope orrechasa ihentekuéra térã oñembohory hese omoirũ haguére Jesúspe. Péro Jesús disipulokuéra operdéramo jepe pe amista orekóva ihéntendi, ohupyty hína hetave mbaʼe porã (Mar. 10:29, 30). Ñane hentekuéra oñemoĩramo jepe ñanderehe jaservi haguére Jehovápe, ñande jahayhu chupekuéra. Péro iporã ñanemanduʼa jahayhuve vaʼerãha Ñandejárape ha Jesucrístope (Mat. 10:37). Iñimportánte avei ñanemanduʼa Satanás ikatuha oipuru pe mborayhu ñañandúva ñane héntere ñanemomombyry hag̃ua Jehovágui. w17.10 páh. 13 párr. 3-6

Ko visión ohechauka porã Jehová nopermitimoʼãiha mbaʼeveichagua mbaʼe vai ipuévlope, ha ohecháramo oĩha katu, pyaʼe oipeʼataha (1 Cor. 5:13). Pe ánhel ohechauka kuri upéva otapárõ guare pyaʼe porã pe mbaʼyru pe itápa pohýipe. Ko visión oiméne omokyreʼỹ umi israelita Zacarías tiémpope guarépe, pórke oasegura Jehová ndohejamoʼãiha mbaʼeve omongyʼa pe adorasión oñemeʼẽva chupe. Omomanduʼa avei umi judíope ojapo vaʼerãha ikatúva guive ani hag̃ua mbaʼeve omongyʼa pe adorasión oñemeʼẽva Ñandejárape. Jehová puévlope noñepermitíri mbaʼeve ivaíva ha arakaʼeve noñepermitimoʼãi. Koʼág̃a avei haʼe ñandegueru iñorganisasión ipotĩvape, ha ohechauka ñandéve ñanderayhu ha oñangarekoha ñanderehe. Enterovéva ñañehaʼãmbaite vaʼerã ñamoĩ ñande párte ikatu hag̃uáicha ipotĩ iñorganisasión. Jehová puévlope ndaikatúi oĩ mbaʼeve ivaíva. w17.10 páh. 24 párr. 14, 15; páh. 25 párr. 17, 18

Umi 39 lívro oĩva Escrituras Hebréaspe, oskrivi vaʼekue umi israelita térã judío. Haʼekuéra raẽvete orresivi vaʼekue “Ñandejára marandukuéra” (Rom. 3:1, 2). Umi lívro ningo ojeskrivi vaʼekue hebreo térã araméope. Péro hetaiterei áño Jesús ou mboyve jepe, oĩma vaʼekue heta judío nontendevéimava pe idióma hebreo. ¿Mbaʼéicha rupípa oiko upéva? Pórke Alejandro Magno, rréi de Grecia, ojagarrave kuri ohóvo heta nasión ha umi oikóva ipoguýpe oñepyrũ oñeʼẽve pe idióma griego (Dan. 8:5-7, 20, 21). Heta judío jepe oipuruve pe idióma griego, ha upéva káusa ijetuʼuvéma chupekuéra ontende porã hag̃ua pe Escrituras Hebreas. ¿Mbaʼépa ojapo Jehová ikatu hag̃uáicha ojesegi oñentende la Biblia? Pe segundo síglope Jesús ou mboyve ko yvy ape ári ojetradusipa kuri umi lívro oĩva Escrituras Hebréaspe. Pe traduksiónpe oñembohéra Septuaginta, ha ojeʼe upe mboyve ndaipóri hague ótra traduksión ojejapo vaʼekue pe Escrituras Hebreas kompletoitégui. w17.09 páh. 20 párr. 7-9

Tuakuéra ningo tekotevẽ ipyʼaguasu. Por ehémplo, ipatrón ikatu pyʼỹinte ojerure chupekuéra ojapo hag̃ua óra éxtra pe día haʼe omboykévape ojapo hag̃ua ijestúdio de família, osẽ hag̃ua opredika térã oho hag̃ua rreunionhápe. Añetehápe ningo ipyʼaguasu vaʼerã oñenega jey jey hag̃ua. Péro péicha omoĩ hína ehémplo porã ifamíliape. Umi sy ha túa ipyʼaguasúva omokyreʼỹ ifamíliape omoĩ hag̃ua méta Jehová servísiope, ha oipytyvõ chupekuéra ohupyty hag̃ua. Ikatu ningo tuakuéra okyhyje omokyreʼỹ hag̃ua ifamíliape oiko hag̃ua chugui prekursór, ova hag̃ua peteĩ lugár oñekotevẽvehápe opredika vaʼerã, ombaʼapo hag̃ua Betélpe térã konstruksión de Salón del Reino ha Salón de Asambléape. ¿Mbaʼérepa? Ikatu opensa ifamiliakuéra oservíramo péicha ndaikatumoʼãiha oñangareko hesekuéra ijedave vove. Péro tuakuéra iñarandúva, ipyʼaguasu ha ojerovia Jehová okumplitaha ipromesakuéra (Sal. 37:25). Péicha haʼekuéra omoĩ ehémplo porã ifamíliape ha oipytyvõ chupekuéra ikatu hag̃uáicha ipyʼaguasu ha ojerovia Jehováre (1 Sam. 1:27, 28; 2 Tim. 3:14, 15). w17.09 páh. 30 párr. 14, 15

Tuakuéra, ¿mbaʼéichapa ikatu peipytyvõ pene famíliape ojejokokuaave hag̃ua? Jaikuaaháicha, haʼekuéra ndogueronaséi upe kualida, peẽ voi pemoĩ vaʼerã chupekuéra la ehémplo (Efes. 6:4). Pehechakuaáramo ijetuʼuha hína pene famíliape ojejokokuaa hag̃ua, peñeporandu vaʼerã mbaʼeichagua ehémplopa peẽ pemoĩ. Pesẽ memérõ predikasiónpe, peho meme rreunionhápe ha káda semána pejapórõ pende estúdio de família, pemoĩ hína ehémplo porã chupekuéra. Ani pekyhyje peje hag̃ua no pene famíliape tekotevẽ jave. Jehová omoĩ vaʼekue límite Adán ha Évape omboʼe hag̃ua chupekuéra orrespeta vaʼerãha ijautorida. Upéicha avei, tuakuéra omoĩvo ehémplo porã ifamíliape ha okorrehívo chupekuéra hendaitépe, omboʼéta chupekuéra ojejokokuaa hag̃ua. Peipytyvõ jave pene famíliape omombaʼe hag̃ua Jehová autorida ha orrespeta hag̃ua iléi, pejapo hína peteĩ mbaʼe iñimportantetereíva (Prov. 1:5, 7, 8). w17.09 páh. 7 párr. 17

Jaiko aja Satanás múndo añáme jasegíta jahasa asy. Por ehémplo, saʼíta la traváho, ikatu ñanderasyete, jajepersegi, ñanderupyty umi desástre naturál, ñañemonda térã jahasa ambue mbaʼe ijetuʼúva. Añetehápe tekotevẽ jajoporiahuvereko ikatu hag̃uáicha ñañopytyvõ. Upéva ñanemomýita ñanembaʼeporã hag̃ua (Efes. 4:32). Jajapóramo koʼã mbaʼe jahechaukáta ñañemondeha pe teko pyahúgui. Avei ñanepytyvõta ikatu hag̃uáicha ñahaʼanga Ñandejárape ha ñakonsola ñande rapichápe (2 Cor. 1:3, 4). Ikatu ningo oĩ ñane kongregasiónpe ermáno térã ermána oúva ótro paísgui, térã imboriahúva. ¿Mbaʼéichapa ikatu ñanembaʼeporã hendivekuéra? Iporãta ñañemoag̃ui hesekuéra ha jahechauka chupekuéra iñimportanteha hikuái pe kongregasiónpe g̃uarã (1 Cor. 12:22). Heta ermáno oiporiahuvereko umi extranhérope ha oñehaʼã oaprende iñidiomakuéra (1 Cor. 9:23). Upéicha rupi ohupyty hikuái heta mbaʼe porã. w17.08 páh. 23, 24 párr. 7-9

Jehová oipota ñanepasiénsia ha ñaĩ dispuésto ñahaʼarõvo. ¿Mbaʼépa ñanepytyvõta upearã? Tekotevẽ jajerure chupe ijespíritu sánto. Ani ñanderesarái pe pasiénsia ouha Ñandejára espíritugui (Efes. 3:16; 6:18; 1 Tes. 5:17-19). Upévare jajerure meme vaʼerã Jehovápe tañanepytyvõ ñaaguanta ha ñahaʼarõkuaa hag̃ua. Ñanemanduʼákena mbaʼépa oipytyvõ vaʼekue Abrahán, José ha Davídpe ipasiénsia hag̃ua ohaʼarõ aja Jehová okumpli ipromesakuéra. Haʼekuéra oreko vaʼekue fe ha ojerovia Jehováre, nopensái ijehénte ni umi mbaʼe chupekuéra okonvenívarente. Ñapensáramo umi vendisión ohupyty vaʼekuére hikuái, ñanekyreʼỹta avei ñanepasiénsia hag̃ua. Jahasáramo jepe umi situasión ijetuʼúva, ñaime vaʼerã desidído jasegitaha ñahaʼarõ trankílo porãnte. Sapyʼánte ikatu avei ñañeporandu: “¿Arakaʼe peve piko Jehová?” (Is. 6:11). Upéicharõ jepe, iporã jasegi proféta Jeremías ehémplo ha jajapo la jaleéva pe téxto koestediaguápe. w17.08 páh. 7 párr. 18-20

Jesús imitãrõ guare katuete oime vaʼerã ohuga ha ojediverti. La Biblia heʼi voi oĩha “tiémpo japuka hag̃ua” ha “tiémpo jajeroky hag̃ua” (Ecl. 3:4). Péro Jesús ostudia vaʼekue avei Ñandejára Ñeʼẽ, ha upéva oipytyvõ chupe oñemoag̃uive hag̃ua Itúare. Haʼe orekórõ guare 12 áño, umi omboʼéva pe Léi pe témplope, “ohecharamo mbaʼeichaitépa ombohovaikuaa ha ontende heta mbaʼe” (Luc. 2:42, 46, 47). Jesús okakuaapa riréma jepe osegi ojapo Ñandejára rembipota, ha upéva ombovyʼa chupe. Por ehémplo, Itúa oipota vaʼekue haʼe omombeʼu umi “marandu porã imboriahúvape” ha opredika umi “ohechaʼỹva ohecha jeytaha” (Luc. 4:18). Jesús ovyʼaiterei vaʼekue omboʼévo umi héntepe mbaʼeichagua persónapa Itúa (Luc. 10:21). Peteĩ jey, omboʼe rire peteĩ kuñáme mbaʼéichapa oadora vaʼerã Ñandejárape, heʼi idisipulokuérape: “Che rembiʼu hína kóva: Ajapo upe chembou vaʼekue rembipota, ha amog̃uahẽ huʼãme pe tembiapo omeʼẽ vaʼekue chéve ajapo hag̃ua” (Juan 4:31-34). Jesús ovyʼa pórke ohechauka ohayhuha Ñandejárape ha yvyporakuérape. Nde avei rejapóramo upéva katuete revyʼáta. w17.07 páh. 23 párr. 4, 5

Jesús oĩrõ guare ko yvy ape ári osegi porãiterei Itúa ehémplo. Upévare haʼe ohayhu umi héntepe, oñemoĩ ilugarpekuéra ha oiporiahuvereko chupekuéra (Juan 5:19). Jehová ombou Jesúspe okonsola hag̃ua “umi oñekevrantávape” ha “umi oñembyasývape” (Is. 61:1, 2; Luc. 4:17-21). Umi hénte ohechakuaa Jesús ontende porãha la osufríva hikuái, ha ipyʼaite guive oipytyvõseha chupekuéra (Heb. 2:17). La Biblia ohechauka porã haʼe nokambiaiha. Heʼi voi: “Haʼe ningo peteĩchante ymave, koʼág̃a ha opa ára g̃uarã” (Heb. 13:8). Jesús haʼe pe Mburuvicha Oporomoingovéva, pórke haʼe rupive ñande ikatúta jaiko opa ára g̃uarã. Haʼe avei “ontende mbaʼéichapa oñeñandu umi ohasa asýva ha ikatu oipytyvõ chupekuéra” (Hech. 3:15; Heb. 2:10, 18). Jahechakuaa upéicharõ Jesús ontende porãha koʼag̃aite peve umi mbaʼe jahásava ha ñanekonsola “ñaikotevẽ jave” (Heb. 4:15, 16). w17.07 páh. 13 párr. 6, 7; páh. 14 párr. 10

Iñimportanteterei ñañangareko umi tesóro Ñandejára omeʼẽvare ñandéve. Upearã tekotevẽ ñañatende ani hag̃ua Satanás térã imúndo káusare jaju nañamombaʼevéi koʼã tesóro. Nañañatendéiramo, ikatu hína ñaganase hetaiterei pláta, jarekoseterei heta lúho térã jajechaukase. Apóstol Juan heʼi vaʼekue ko múndo ha umi mbaʼe oikuaveʼẽva koʼẽrõite opataha (1 Juan 2:15-17). Upévare, ñamombaʼékena siémpre umi tesóro oúva Jehovágui ha ñañangareko umívare. Ñamboykékena opa mbaʼe ikatúva ñanemokangy ani upéva káusare jaju nañamombaʼevéi Ñandejára Rréino. Jajedesidíkena ñamombaʼetaha pe predikasión ha kyreʼỹme ñañeʼẽtaha pe marandu porãre. Avei ñañehaʼãmbaite jaikuaa porãve mbaʼépa omboʼe la Biblia. Péicha jajapóramo ñambyatýta tesóro “yvágape”. “Upépe ningo ndaikatúi oike mondaha” ni ndoʼumoʼãi ñandehegui vícho (Luc. 12:33). w17.06 páh. 13 párr. 19, 20

Jehová ogoverna lája ningo ndaipohýiri. Upévare umi iñeʼẽrendúva chupe oñandu isãsoha ha ovyʼa (2 Cor. 3:17). David heʼi vaʼekue: “Ñandejára oĩ peteĩ lugár iporãiterei ha omimbipávape, upe lugár oĩháme ojehecha mbaʼeichaitépa haʼe ipoderóso ha ovyʼa” (1 Crón. 16:7, 27). Pe salmísta hérava Etán heʼi avei: “Jehová, ovyʼaite pe puévlo opurahéiva nemombaʼeguasu hag̃ua, haʼekuéra kontinuadoite oiko nde rapére ha nde reguerohory chupekuéra. Haʼekuéra ojerovia nde rérare ha upévare tódo el tiémpo ovyʼa. Ha ndehústo rupi, nde remombaʼe chupekuéra” (Sal. 89:15, 16). Jajepyʼamongeta meméramo mbaʼeichaitépa Jehová imbaʼeporã, katuete jahechakuaáta ndaiporiha ótro ogoverna porãvéva chugui. Jehová ñandeapo porãiterei vaʼekue, upévare oikuaa mbaʼépa añetehápe ñanembovyʼa. Haʼe ipojeraiterei rupi, omeʼẽ rasapa ñandéve umi mbaʼe ñaikotevẽva. Entéro mbaʼe Jehová ojeruréva ñandéve jajapo hag̃ua ningo ñanevenefisiorãnte. Ha tekotevẽramo jepe jajesakrifika hesehápe, katuete javyʼáta ñaneñeʼẽrendúramo chupe (Is. 48:17). w17.06 páh. 29 párr. 10, 11

Peteĩ ermána Inglaterragua imembyseterei vaʼekue péro ndaikatúi. Oñemeʼẽrõ guare enkuénta ndaikatumoʼãiha imemby, opyta oñembyasyeterei. Upéi, haʼe ha iména odesidi oadoptataha peteĩ mitã. Upéicharõ jepe pe ermána osegi oñembyasy peteĩ tiémpore. Haʼe heʼi: “Aikuaa porã vaʼekue peteĩ mitã aadoptáva, ndaikatumoʼãiha oñembojoja peteĩ onasévare che retepýgui”. La Bíbliape heʼi: “Pe kuña ojesalva vaʼerã imemby rupi” (1 Tim. 2:15). Péro upéva ndeʼiséi peteĩ kuña imemby haguére ohupytytaha pe jeikove opaveʼỹva. Upéicharõ, ¿mbaʼépa heʼise ko téxto? Peteĩ sy ningo heta oñehaʼã oñangareko porã hag̃ua imembýre ha hógare. Koʼã mbaʼe ogueraha tiémpo ha oipytyvõ chupe ani hag̃ua oiko ochismosea térã ojokupa hapicha ojapóvare (1 Tim. 5:13). w17.06 páh. 5, 6 párr. 6-8

¿Heʼisépa raʼe Elihú umi mbaʼe jajapóva Jehová rehehápe ndovaleiha mbaʼeverã? Nahániri. Elihú ontendeka Jehová noikotevẽiha ñamombaʼeguasu chupe. Yvyporakuéra ndaikatúi ojapo mbaʼeve oipytyvõ hag̃ua Jehovápe térã omombareteve hag̃ua chupe. Umi kualida jarekóva ha ñande kapasida ou chugui, ha haʼe ohecha mbaʼéichapa jaipuru. Jehová omombaʼeterei jahechauka jave jahayhuha isiervokuérape. Proverbios 19:17 heʼi: “Pe imboriahúvandi imbaʼeporãva, haʼete voi Jehová ndive imbaʼeporãva hína, ha haʼe katuete omyengoviáta chupe”. Jahechaháicha, Jehová oraha enkuénta jahechauka jave mborayhu. Ha haʼéramo jepe pe univérso apohare, oñandu ku opytáva odeve ñandéve. Hiʼarive omyengovia porãiterei pe mborayhu jahechaukáva ótrope. Itaʼýra Jesús ñanemboʼe vaʼekue voi Ñandejára upeichaha (Luc. 14:13, 14). w17.04 páh. 29 párr. 3, 4

¿Mbaʼépa ikatu avei jajapo jahayhuve hag̃ua pe añetegua oĩva la Bíbliape? Tekotevẽ jaha meme rreunionhápe, upépe ningo Jehová ñanemboʼe. Por ehémplo, káda semána haʼe ñanerekomboʼe espesiálmente ñahesaʼỹijóvo la Biblia pe Ñemañaha rupive. Jaaprovecha porã hag̃ua pe estúdio iñimportanteterei jajeprepara porã. Upearã, iporãta jahekapaite umi téxto ojesitáva. Koʼág̃a ifasilve jalee térã jadeskarga ko rrevísta ñande sítiogui oĩva Internétpe. Ko rrevísta oĩ disponívle hetaiterei idiómape jw.org-pe, ha avei pe aplikasión JW Library-pe. Oĩ formáto elektróniko ñanepytyvõva jatopa pyaʼeve hag̃ua umi téxto ojesitáva. Péro tahaʼe haʼéva umi médio jaipurúva jastudia hag̃ua umi artíkulo, tekotevẽ jalee umi téxto ha jajepyʼamongeta hese. Péicha katuete jahayhuvéta pe añetegua oĩva la Bíbliape. w17.05 páh. 20 párr. 14

Jajevautisa rire, jasegi vaʼerã ñakumpli pe promésa jajapo vaʼekue Jehovápe ñañemeʼẽrõ guare chupe. Peteĩ persóna oúva ikaneʼõ oservi hague Jehovápe ha oiko hague peteĩ kristiánoicha, ndaikatúi heʼi noñemeʼẽi hague kuri Jehovápe ipyʼaite guive, ha ivautísmo ndoserviriha. Pe tapicha oúramo opeka vai, ojecha vaʼerã Jehovándi ha pe kongregasión ndive. Peteĩ jey, Jesús heʼi kuri oĩ hague unos kuánto kristiáno ndohayhuvéiva Jehovápe ymave guaréicha. Ñande ndajajoguaséi chupekuéra, jaipota guei Jesús heʼi ñanderehe: “Che aikuaa opa mbaʼe rejapóva, mbaʼéichapa reporohayhu, rejerovia, reservi Ñandejárape ha reaguanta heta mbaʼe. Aikuaa avei umi mbaʼe rejapóva koʼág̃a tuichaveha yma rejapo vaʼekuégui” (Apoc. 2:4, 19). Ñande ningo ñambovyʼase Jehovápe ñakumpli porãvo pe promésa jajapo vaʼekue ñañemeʼẽrõ guare chupe. w17.04 páh. 6, 7 párr. 12, 13

“Nde hína pe Hués hekojojavéva ko yvy ape ári ha katuete rejapóta pe iporãvéva enterovépe g̃uarã” (Gén. 18:25). Péicha heʼi vaʼekue Abrahán ohechauka hag̃ua Jehová ihustoha. Haʼe oĩ segúro Ñandejára ohusgataha hekoitépe Sodoma ha Gomórrape. Abrahán oikuaa porã Jehová nohundimoʼãiha “umi ihústova umi iñañávandi”. Haʼe nopensaiete voi Ñandejára ojapotaha peteĩ mbaʼe hekopeʼỹ. ¿Mbaʼéicha rupípa Abrahán ojeroviaiterei kuri Jehováre? Pórke ndaipóri ótra persóna ihustovéva chugui, ha Ñandejára voi omanda ojejapo hag̃ua hekoitépe entéro mbaʼe. Escrituras Hebréaspe pyʼỹinte oñemoĩ oñondive umi palávra “hústo” ha “hekojoja” pórke heʼise la mísma kósa lénto. Upéicharõ, ikatu ñahaʼarõ Ñandejára ohusgataha opa mbaʼe hendápe porã. La Biblia heʼi: “Ñandejára oipotaiterei ojehusga porã ha oĩ hustísia” (Sal. 33:5). w17.04 páh. 18 párr. 1, 2

Tuakuéra, peipotárõ pene família oñemoag̃ui Jehováre ha oiko opa ára g̃uarã, pemoĩ vaʼerã chupekuéra la ehémplo. Haʼekuéra ohecháta peẽ pemotenonde memérõ “Ñandejára Rréino”, ha ojeroviáta Jehová omeʼẽtaha chupekuéra umi mbaʼe oikotevẽva káda día (Mat. 6:33, 34). Peiko sensillomínte vaʼerã ha ani pedevepa ni peñehaʼã pekonsegi umi mbaʼerepy. Jehová servísio haʼe vaʼerã la iñimportantevéva peẽme g̃uarã. Peñehaʼã pembyaty “mbaʼerepy yvágape” ikatu hag̃uáicha Ñandejára pendeguerohory, peiko rangue pláta rapykuéri térã peipota rangue pende rapicha yvypóra penemombaʼe (Mar. 10:21, 22; Juan 12:43). Penerembiapoitereíramo jepe, iñimportánte peñemotiémpo pene familiakuérape g̃uarã. Peikuaaukákena chupekuéra pevyʼaha omotenonde jave hikuái Ñandejára rembipota, oiko rangue pláta rapykuéri térã oipota rangue ko múndo omombaʼe chupekuéra. Avei napepensái vaʼerã pene família omoĩmba vaʼerãha peẽme peipotáva guive peiko komodove hag̃ua. Ñandejára Ñeʼẽ heʼi: “Taʼyrakuéra nombyatýi vaʼerã tuvakuérape g̃uarã, síno tuakuéra la ombyaty vaʼerã taʼyrakuérape g̃uarã” (2 Cor. 12:14). w17.05 páh. 8, 9 párr. 3, 4