Octubre

Pe arandu ningo ou Jehovágui ha haʼe nahakateʼỹi hese. Jaaseptáramo Jehová ñandekorrehi jave, ñanearandu hína. Upéva ñandeprotehéta ani hag̃ua jajapo ivaíva ha ñanepytyvõta pono ñañemomombyry Jehovágui (Prov. 2:10-12). Avei ñanepytyvõta jahupyty hag̃ua pe jeikove opaveʼỹva (Jud. 21). Sapyʼánte ijetuʼu jaasepta hag̃ua pe disiplína, térã jahechakuaa hag̃ua ideprovechoha. ¿Mbaʼérepa oiko jepi upéva? Pórke ñaneimperfékto térã ñandeafekta jakakuaa lája. Péro jahecháramo mbaʼéichapa ou porã ñandéve Ñandejára ñandekorrehi jave, ñantendéta haʼe ojapoha upéva ñanderayhúgui. Proverbios 3:11, 12 heʼi: “Che raʼy, easeptáke pe disiplína oúva Jehovágui”. Upéi heʼi avei: “ Jehová okorrehi umi ohayhúvape”. Aníkena jaduda, Jehová oipota iporãvante ñandéve g̃uarã (Heb. 12:5-11). Ñandejára ningo ñandekuaa porã, upéicha rupi ñandekorrehi hendaitépe ha ñaikotevẽhaichaite. w18.03 páh. 28 párr. 1, 2

Apóstol Pedro oskrivi vaʼekue péicha umi ermáno ha ermána oúvape diferénte lugárgui Asia Menórpe. Haʼekuéra ningo ohasa heta mbaʼe ijetuʼuetereíva “ojoguáva tatápe”. ¿Mbaʼépa oipytyvõ umi kristiáno oparupiguápe umi tiémpo ijetuʼuetévape? (1 Ped. 1:1; 4:4, 7, 12). Pedro ojerure umi ermánope haʼekuéra voi ojorresivi porã hag̃ua ndahaʼéi umi extráñopente. ¿Mbaʼéichapa oipytyvõta chupekuéra osegíramo upe konsého? Ko konsého oipytyvõta kuri chupekuéra iñunidove hag̃ua. ¿Mbaʼépa jaʼekuaa ñande kásope? ¿Mbaʼéichapa ñañeñandu peteĩ ermáno ñaneinvitáramo hógape? Katuete ningo jahasa porã upe moméntope. Ñainvita jave ótrope, jajokuaa porãve ha ñañemoag̃uive ojuehe. Umi kristiáno Pedro tiémpope guare tekotevẽterei kuri oñemoag̃uive ojuehe, pórke ijetuʼuvéta kuri ohóvo umi provléma ohasáva hikuái. Ñande jaikóva “umi ára pahápe” tekotevẽ avei ñañemoag̃uive ojuehe (2 Tim. 3:1). w18.03 páh. 14, 15 párr. 1-3

Jesús heʼi vaʼekue ovyʼaha umi persóna ijespirituálva. Romanos 8:6 ohechauka mbaʼérepa iñimportánte ñandeespirituál térã ñapensa Jehová opensaháicha. Upépe heʼi: “Ñapensa meméramo ñande rete rembipotáre, ñamanóta. Péro ñapensa meméramo espíritu sánto oguerohorývare, jaikovéta ha ñaiméta pyʼaguapýpe Ñandejára ndive”. Ñañehaʼãramo jajapo opaite mbaʼe Jehová oipotaháicha, ñaime porãta hendive, ñandepyʼaguapýta koʼág̃ama voi ha ikatúta jaikove opa árare. Ko múndope ningo heta hénte nopensái Ñandejára opensaháicha, ha umíva ikatu hína ñandegueraha vai. Upévare jajapo vaʼerã tekotevẽva guive jajeprotehe hag̃ua. Nañapensavéirõ Jehová opensaháicha, ko múndo katuete omyenyhẽta ñane akã umi mbaʼe vai ñande retépe ostirávagui, ha ñapensáta umi hénte opensaháicha. Judas heʼi oĩha umi oñemeʼẽtereíva hete rembipotápe ha upéva káusare ndorekói “Ñandejára espíritu” (Jud. 18, 19). w18.02 páh. 19, 20 párr. 5, 7, 8

Heta doktór ha enferméra ningo oñatende umi pasiénte orekóvare enfermeda ikontahiósova. Haʼekuéra ojapo upéva oipytyvõségui umi héntepe. Péro ojekuida vaʼerã hikuái ani hag̃ua ova hesekuéra umi mbaʼasy. Upéicha avei ñande jaservíva Jehovápe jatrata opaichagua persónandi. Heta oĩ ñande apytépe ombaʼapo térã oikóva umi persóna ndoservírivandi Jehovápe. Upévare jajekuidámante vaʼerã ani hag̃ua ova ñanderehe ilajakuéra, pórke haʼekuéra ndoikói Jehová oipotaháicha. Koʼã ára pahápe ningo la hénte ndoikuaasevéima mbaʼépa iporã ha mbaʼépa ivai, oikóntema haʼekuéra oikoseháicha. Apóstol Pablo oskrivírõ guare Timotéope omombeʼu mbaʼéichapa oñekomportáta umi hénte ndoservíriva Ñandejárape (2 Tim. 3:1-5). Nañandegustáiramo jepe mbaʼéichapa oñekomporta umi hénte, jaiko rupi ijapytepekuéra ikatu hína mbeguekatúpe ñapensa, ñañeʼẽ térã jajeportáma avei haʼekuéraicha (Prov. 13:20). Upévare, ñañehaʼã vaʼerã ani hag̃ua ova ñanderehe umi hénte lája, ha avei ñaipytyvõ vaʼerã umi héntepe oikuaa hag̃ua Ñandejárape. w18.01 páh. 27 párr. 1, 2

Áño 33-pe, Jesús orresusita riremi, haʼe oñeʼẽ kuri mas de 500 persónape. Umíva apytépe oĩ vaʼekue kuña, kuimbaʼe ha ikatu voi mitã jepe. Amalisia upérõ omanda kuri chupekuéra la heʼíva pe téxto koestediagua (1 Cor. 15:6). Jesús omanda umi omoirũvape chupe ojapo hag̃ua disípulo. Haʼe heʼi enterovéva umi oikoséva idisípuloramo, térã oñemoĩséva ijúgo guýpe, ojevautisa vaʼerãha (Mat. 11:29, 30). Ñandejára ñandeguerohory hag̃ua jahechakuaa vaʼerã haʼe oipuruha Jesúspe okumpli hag̃ua hembipota. Upépe ae ikatu jajevautisa. Péva hína pe úniko vautísmo Ñandejára oaseptáva. La Biblia ohechauka porã umi kristiáno ypykue ontende hague mbaʼeichaite pevépa iñimportánte pe vautísmo. Haʼekuéra nopensaiete vaʼekue ikatuha ohaʼarõnte, ha upéinte ág̃a ojevautisa (Hech. 2:41; 9:18; 16:14, 15, 32, 33). w18.03 páh. 5 párr. 8

Ko múndo henyhẽ tekovaígui ha adorasión fálsagui. Babilonia Guasu ningo ombotavy umi héntepe, upéva hína entéro umi rrelihión fálsa. La Biblia heʼi upépe oikoha umi demónio (Apoc. 18:2). Ñande jaiko extranhéroicha ko múndope. Upéicha rupi ñanediferénte umi héntegui ha haʼekuéra oñembohory ñanderehe upe haguére (Mar. 13:13). Upévare tekotevẽterei avei ñande ñañemoag̃ui Jehováre Daniel ojapo haguéicha. Ñaneumílderamo, jajeroviárõ hese ha ñaneñeʼẽrendúrõ chupe, haʼe ñanderayhuetereíta avei (Ageo 2:7). Sy ha túa ikatu oaprende heta mbaʼe Daniel tuakuéragui. Daniel imitãʼírõ guare, la majoría umi hénte oikóva Judápe iñañaiterei vaʼekue. Péro Daniel okakuaávo ohóvo, ohayhuve avei Jehovápe. ¿Mbaʼéicha rupípa oiko upéva? Katuete oiméne ituakuéra omboʼe raʼe chupe Jehovágui (Prov. 22:6). Daniel réra ningo heʼise “Ñandejára hína che hués”. Upéva ohechauka ituakuéra ohayhu hague Jehovápe. Upéicharõ, peẽ tuakuéra, penepasiénsiakena pemboʼe hag̃ua pene famíliape Jehovágui. Aníke penekangy (Efes. 6:4). Peñemboʼe meme hesekuéra ha hendivekuéra avei. Pejapóramo opa ikatúva pemboʼe hag̃ua pene famíliape ohayhu hag̃ua umi mbaʼe ogustáva Jehovápe, haʼe tuichaiterei penevendesíta (Sal. 37:5). w18.02 páh. 5 párr. 12; páh. 6 párr. 14, 15

¿Mbaʼérepa ñameʼẽ Jehovápe umi mbaʼe jarekóvagui? Pórke péicha ñamombaʼeguasu hína chupe. Peteĩ visiónpe apóstol Juan ohendu umi Ñandejára siérvo yvagapegua heʼiha: “Ñandejára Jehová, nde ningo remerese opavave nemombaʼe ha omeʼẽ ndéve tekomimbipa ha podér, nde rejapo rupi opa mbaʼe, ha nde reipotágui oĩ ha ojejapo vaʼekue opaite mbaʼe” (Apoc. 4:11). Añetehápe ningo Jehová omerese ñambotuicha ha jaadora chupe. Upévare ñameʼẽ vaʼerã chupe umi mbaʼe iporãvéva jarekóva. Moisés rupive Jehová heʼi vaʼekue umi israelítape ojapo hag̃ua tres fiésta káda áño. Umi fiésta omeʼẽ chupekuéra oportunida omombaʼeguasu hag̃ua Jehovápe iñofrénda rupive. Pe Léi heʼi vaʼekue voi: “Avave noñepresentái vaʼerã henondépe po nandi” (Deut. 16:16). Ñande avei koʼág̃a ñameʼẽramo Jehovápe ñande pyʼaite guive umi mbaʼe jarekóvagui, ñamombaʼeguasu hína chupe. Péicha jahechauka javalora ha jaapojaha umi mbaʼe ojapóva Jehová organisasión ko yvy ape ári. w18.01 páh. 18 párr. 4, 5

Jesús heʼi vaʼekue avei: “Pehupi pende ári che júgo [...]. Che júgo napendeforsamoʼãi ha che kárga ivevýi” (Mat. 11:29, 30). Upéva ningo siertoite. Sapyʼánte kaneʼõre jaha rreunionhápe térã predikasiónpe, ¿péro mbaʼéichapa ñañeñandu ñag̃uahẽ rire ñande rógape? Haʼete voi ñandepiroʼýva ha ñanembaretevéva jagueropuʼaka hag̃ua ñane provlemakuéra. Ndareíri Jesús heʼi kuri: “Che júgo napendeforsamoʼãi”. Jahechamína peteĩ ñane ermána ehémplo. Haʼe ningo oreko fatíga krónika, depresión ha pyʼỹinte iñakãrasy vai. Sapyʼánte ijetuʼu chupe oho hag̃ua rreunionhápe. Péro peteĩ díape, oñehaʼãmbaite ha oho. Haʼe omombeʼu mbaʼéichapa oñeñandu upe rire: “Pe diskúrso púvliko oñeʼẽ kuri pe desánimore. Pe diskursánte haʼete voi oñemoĩva ñande lugárpe ha oiporavo porã umi mbaʼe heʼítava. Opokoiterei kuri cherehe ha chemyasẽ la heʼíva. Añemeʼẽ enkuénta rreunionhápe la che aĩ vaʼerãha”. Ko ermána ovyʼaiterei oñehaʼãmbaite haguére oĩ hag̃ua pe rreuniónpe. w18.01 páh. 8, 9 párr. 6, 7

¿Mbaʼépa tuakuéra ikatu ojapo ifamília ojevautisámava oúramo oduda ikreénsiagui? Por ehémplo, Ikatu oime ogusta chupe ko múndo oikuaveʼẽva, térã oduda okonvenípa chupe añete ojapo la Biblia heʼíva (Sal. 73:1-3, 12, 13). Tuakuéra, odepende hína mbaʼéichapa pemaneha ko situasión ikatu hag̃uáicha pene família osegi oservi Jehovápe térã oñemomombyry chugui. Peñehaʼã vaʼerã ani peikovai hendivekuéra, tahaʼe imitãramo gueteri hikuái térã oiméramo ikariaʼy ha ikuñataĩma ohóvo. Pene família ohechakuaa vaʼerã pehayhu ha peipytyvõsenteha chupekuéra. Peteĩ mitãrusu térã mitãkuña ojevautisáva ningo opromete Jehovápe oñemeʼẽha chupe ojapo hag̃ua ivolunta. Opromete ohayhu ha omotenondetaha chupe opa mbaʼépe (Mar. 12:30). Jehovápe g̃uarã upe promésa iñimportanteterei, ha entéro ojevautisáva ohecha vaʼerã avei upéicha (Ecl. 5:4, 5). w17.12 páh. 22 párr. 16, 17

Mártaicha avei Ñandejára siervokuéra oguerovia oñemoingove jeytaha umi omano vaʼekuépe. Ñapensamína Jehová ojerure vaʼekuére Abrahánpe ojapo hag̃ua Isaac rehe, pe itaʼýra hetaite tiémpore ohaʼarõ vaʼekue. Jehová heʼi chupe: “Ejagarra nde raʼy peteĩete rehayhuetéva ha tapeho oñondive pe lugár héravape Moria. Ha eg̃uahẽ vove upépe, [...] reofreséta chéve nde raʼy peteĩ ofrénda ojehapývaicha” (Gén. 22:2). ¿Mbaʼéichapa oiméne Abrahán oñeñandu raʼe ohendúrõ guare la Jehová ojeruréva chupe? Haʼe ningo opromete vaʼekue Abrahán familiare rupive ovendesitaha entéro nasión (Gén. 13:14-16; 18:18; Rom. 4:17, 18). Hiʼarive, heʼi vaʼekue pe vendisión outaha “Isaac rupive” (Gén. 21:12). Péro, ¿mbaʼéicha piko oñekumplíta pe promésa Abrahán osakrifikárõ itaʼýrape? Jehová espíritu omomýi vaʼekue Páblope oexplika hag̃ua mbaʼépa oiko kuri. Pablo heʼi Abrahán ojerovia hague Ñandejára ikatutaha omopuʼã jey Isaácpe omanóramo jepe (Heb. 11:17-19). Abrahán añetehápe ndoikuaái kuri arakaʼépa oñemoingove jeýne itaʼýrape. Péro haʼe ndodudái Jehová omoingove jeytaha chupe. w17.12 páh. 5, 6 párr. 12-14

Pablo ovalora vaʼekue pe vída Jehová ojapoháicha, ha ñande ñamombaʼe vaʼerã avei upéva. Haʼe oipota “enterove oñarrepenti” ikatu hag̃uáicha oikove (2 Ped. 3:9). Jahayhúkena umi héntepe, péicha ikatúta jasegi Jehová ehémplo. Jaiporiahuverekóramo ñande rapichakuérape ñanekyreʼỹvéta japredika hag̃ua ha javyʼavéta. Jahechauka hag̃ua javaloraha pe vída Jehová ojapoháicha, tekotevẽ ñambaʼapo ha ñamaneha umi veíkulo de fórma segúra. Por ehémplo, jarrespeta vaʼerã umi nórma de segurida ñambaʼapóramo konstruksiónpe, jajapóramo algún mantenimiénto térã javiaha jave jaha hag̃ua rreunionhápe ha asambleahápe. Iñimportánteramo jepe ñagana tiémpo ha pláta, iñimportanteve hína umi persóna, ñande salu ha pe segurida. Jehová siémpre ojapo entéro mbaʼe iporãveháicha, ha ñande upéicha vaʼerã avei. Prinsipálmente ansianokuéra ojepyʼapy vaʼerã pe seguridáre, upéva heʼise ojepyʼapy vaʼerãha ijehe voi ha avei umi ótrore (Prov. 22:3). Peteĩ ansiáno ñanemomanduʼáramo algúna nórma de seguridáre, ñapenákena hese (Gál. 6:1). Ñamombaʼe vaʼerã pe vída Jehová ojapoháicha, péicha jahechaukáta jarekoha enkuénta la Biblia heʼíva: “Ndapejekulpamoʼãi peñohẽ rei haguére tuguy” (Deut. 19:10). w17.11 páh. 16 párr. 11, 12

Umi kristiáno unhído oreko peteĩ esperánsa iporãitereíva. Haʼekuéra ohaʼarõitereíma og̃uahẽ pe tiémpo oho hag̃ua oiko yvágape. Apóstol Pablo ohenói vaʼekue ko esperánsape “pe prémio Ñandejára omeʼẽva” (Filip. 3:14). Umi unhído ogovernáta yvágape Jesús ndive Irréinope, péicha oipytyvõta yvyporakuérape iperfékto hag̃ua (Apoc. 20:6). ¡Ajépa iporãite pe esperánsa orekóva umi unhído! Umi ambue ovechakuéra katu ohaʼarõitereíma peteĩ prémio idiferénteva. Haʼekuéra oikóta opa ára g̃uarã peteĩ paraísope ko yvy ape ári. Ko esperánsa ombovyʼaiterei chupekuéra (2 Ped. 3:13). Pablo oipytyvõse kuri umi kristiáno unhídope ikatu hag̃uáicha ifiél ha ohupyty pe prémio. Haʼe heʼi chupekuéra: “Pepensa memékena umi mbaʼe yvagapeguáre ha ani umi mbaʼe ko yvy arigua rehe” (Col. 3:2). Umi unhído tekotevẽ vaʼekue ojesareko meme pe esperánsa selestiál ijojahaʼỹvare (Col. 1:4, 5). Jajepyʼamongetáramo umi vendisión Jehová oprometévare, katuete ñapensa meméta pe prémiore (1 Cor. 9:24). w17.11 páh. 25 párr. 1, 2

Haʼete ningo ku ñañemboʼéva Jehovápe japurahéi jave heta kántiko oĩva ñane purahéi ryru pyahúpe. Koʼã purahéi ñanepytyvõ ñamombeʼu hag̃ua chupe mbaʼéichapa ñañeñandu. Oĩ katu umi ñanepytyvõva ikatu hag̃uáicha ñamokyreʼỹ ermanokuérape “japorohayhu ha jajapo hag̃ua iporãva” (Heb. 10:24). Iporãta jaikuaáramo umi kántiko melodía ha la heʼíva. Upéva ikatúta jajapo ñahendu memérõ umi kóro jatopáva ñande sítio jw.org-pe. Ñañensajáramo umi kántiko ñande rógape, japurahéita ñande pyʼaite guive ha nañatĩmoʼãi. Ani ñanderesarái pe músika rupive ñamombaʼeguasuha avei Jehovápe. Péicha jahechauka jaagradese ha jahayhuha chupe (Is. 12:5). Kyreʼỹme japurahéi jave, ñaanima avei umi ótrope ojapo hag̃ua upéva. Añetehápe, enterove ñaiméva kongregasiónpe, tahaʼe ipyahúva, ijedáva térã imitãva, ikatu ñambotuicha Jehovápe japurahéivo chupe. Upévare, aníkena ñatĩ, síno ñande pyʼaite guive japurahéi vyʼápe. w17.11 páh. 7 párr. 18, 19

Heta rrefuhiádo ou umi país ojeproivihágui pe predikasión. Upéicha rupi, primera ves ohendu hikuái “pe marandu Rréino rehegua” (Mat. 13:19, 23). Heta oĩ ijapytepekuéra oiko vaʼekue ojepyʼapyháre, péro ou ipyʼaguapy oho rire rreunionhápe, ha ohechakuaa siertoha la Biblia heʼíva: “Añetehápe Ñandejára oĩ pende apytépe” (Mat. 11:28-30; 1 Cor. 14:25). Ñañatende vaʼerã japredika jave umi rrefuhiádope (Prov. 22:3). Tekotevẽ ñanepasiénsia ha jajapysaka hesekuéra oñeʼẽ jave, ha ani ñañeʼẽ hendivekuéra polítikare. Jasegi vaʼerã umi instruksión omeʼẽva Betel ha umi autorida, ani hag̃ua avave oñaprovlema térã ojapeligra. Umi rrefuhiádo ningo oreko diferénte kostúmbre ha rrelihión, upévare iporã ñantende umi mbaʼe, ha jarrespeta la opensáva ha oñandúva hikuái. Por ehémplo, oĩ país omoĩva heta rrégla umi kuñáme oñemonde hag̃ua. Upévare ñane ermanakuéra oreko vaʼerã enkuénta koʼã mbaʼe opredika jave ani hag̃ua omoñeñandu vai chupekuéra. w17.05 páh. 7 párr. 17, 18

Jajerure vaʼerã Jehovápe ijespíritu sánto ikatu hag̃uáicha ñañeʼẽ pyʼaguapýpe porãnte ñane hentekuérandi. Ndovaléi ningo ñañemoĩ jajodiskuti hendivekuéra opaichagua japu ogueroviávare. Heʼírõ térã ojapórõ álgo ñanembopochýva, jasegi vaʼerã umi apóstol ehémplo. Pablo heʼi vaʼekue: “Umi hénte oñeʼẽ vai jave orerehe, rojerure Ñandejárape tohovasa chupekuéra; oĩ jave orepersegíva, orepasiénsia ha roaguanta. Ojetaky jave orerehe, rombohovái pyʼaguapýpe porãnte” (1 Cor. 4:12, 13). ¿Mbaʼérepa iñimportánte upéva? Añetehápe ningo ñañeʼẽramo pyʼaguapýpe ikatúta jaiko trankilove ñane hentekuérandi, péro ñanekondúkta porãrõ katu iporãitevétantema (1 Ped. 3:1, 2, 16). Eheja ne hentekuéra tohecha ne ehémplo rupive mbaʼéichapa Testigokuéra osẽ porã imatrimóniope, oñangareko porã ifamíliare, oiko la Biblia heʼiháicha ha ovyʼave. Ñane hénte noñepyrũiramo jepe oservi Jehovápe, javyʼáta pórke jaikuaa haʼe ñandeguerohorytaha ñanekondúkta porãrõ. w17.10 páh. 15 párr. 13, 14

Ñandéve nañanesorprendéi jahechávo mbaʼéichapa umi hénte tuicha okambia ostudiávo la Biblia. Síglo primérope heta ermáno unhído oikuaa mboyve Jehovápe ojapo kuri umi mbaʼe noĩporãiva, péro upéi ou okambia (1 Cor. 6:9-11). Apóstol Pablo omensiona rire mbaʼeichagua persónapa ndoikemoʼãi Ñandejára Rréinope, heʼi umi kristiánope: “Pende apytépe oĩ umi yma upéicha vaʼekue”. Péro la Biblia ha pe espíritu sánto oipytyvõ chupekuéra okambia hag̃ua. Upéi oĩ kuri ijapytepekuéra ou vaʼekue opeka vaieterei ha ombyai iñamista Jehovándi. Por ehémplo, la Biblia omombeʼu peteĩ kristiáno unhído ou hague opeka ha oñemosẽ kongregasióngui. Péro upéi okambia tekotevẽhápe ha ovolve jey (1 Cor. 5:1-5; 2 Cor. 2:5-8). ¡Ajépa ñanemokyreʼỹete jahechávo mbaʼéichapa la Biblia oipytyvõ heta persónape okambia hag̃ua! Katuete ñande avei jaipuru porãse la Biblia ikatu hag̃uáicha ideprovécho ñandéve. w17.09 páh. 23, 24 párr. 2, 3

Pe mborayhu ningo ou Ñandejáragui (1 Juan 4:7). La Biblia oñeʼẽ jave pe mborayhu tuichavévare oipuru pe palávra griega agápe. Peichagua mborayhu kristianokuéra ohechauka vaʼerã opavavépe. Péro upéva ndahaʼéi peteĩ mbaʼe ñañandúnteva, síno jahechauka vaʼerã umi mbaʼe jajapóva rupive ñahaʼarõʼỹre mbaʼeve. Péicha japorohayhúramo, jajapóta iporãva ñande rapichakuéra rehehápe, ha katuete javyʼáta ha isentidovéta ñandéve ñande rekove. Jehová ojapo mboyve Adán ha Évape ohechaukáma vaʼekue ohayhuha yvyporakuérape. Haʼe okrea ko yvy jaiko hag̃ua pype ha orekopaite umi mbaʼe ñaikotevẽva. Ndahaʼéi upéva añónte, ojapo avei entéro mbaʼe ikatu hag̃uáicha jadisfruta. Jehová ojapo koʼã mbaʼe ñandéve g̃uarã, ndahaʼéi ijupe g̃uarã. Avei omeʼẽ yvyporakuérape pe oportunida oiko hag̃ua opa árare peteĩ paraísope. w17.10 páh. 7 párr. 1, 2

Santiago heʼi vaʼekue avei: “Pesegíramo pemombaʼeve peteĩme ha ótrope pemboyke, upéicharõ pepeka hína” (Sant. 2:9). Jahayhúrõ ñande rapichápe, nañamboykemoʼãi chupe ijestudioʼi haguére, haʼégui de ótra rrása térã imboriahu rupi. Ndovaléi ningo jaʼénte nañamboykeiha avavépe, upéva rangue jatrata vaʼerã enterovépe peteĩchapa. Pe oporohayhúva “ipasiénsia ha imbaʼeporã, [...] ha noñembotuichái” (1 Cor. 13:4). Tekotevẽ ningo ñanepasiénsia, ñanembaʼeporã ha ñaneumílde jasegi hag̃ua ñamombeʼu pe marandu porã umi héntepe (Mat. 28:19). Koʼã mbaʼe ñanepytyvõ avei jajogueraha porãve hag̃ua entéro ñane ermanokuérandi. Péicha jajoayhúramo ñamombaʼeguasúta Ñandejárape ha ñaneunidovéta. Avei umi hénte ohecháta upéva ha heta oĩta oñemoag̃uiséva Jehováre. La Biblia oñeʼẽvo pe teko pyahúre, omohuʼã kóicha: “Pejapóramo jepe koʼã mbaʼe, pehechauka vaʼerã avei peporohayhuha; pe mborayhu ningo oipytyvõ enterovépe ojogueraha porã hag̃ua” (Col. 3:14). w17.08 páh. 26 párr. 18, 19

Ñande jaiporiahuvereko vaʼerã avei umi hénte ndoikuaáivape Jehovápe. Haʼekuéra ikatu gueteri oñarrepenti ha oiko iñamígoramo. Jehová ningo ndoipotái avave oñehundi (2 Ped. 3:9). Upévare, oĩ reheve tiémpo, jasegi vaʼerã jaavisa umi héntepe Jehová koʼẽrõitéma ohunditaha ko múndo aña. Péicha haʼekuéra avei ikatu ojesalva Jehová imbaʼeporãiterei rupi. Jesús avei ohechauka vaʼekue ombyasyha umi héntepe. Haʼe ohechárõ guare umi hénte osegíva chupe oikoha “umi ovecha herekuaʼỹvaicha”, oiporiahuverekoiterei chupekuéra. ¿Ha mbaʼépa ojapo? “Oñepyrũ omboʼe chupekuéra heta mbaʼe” (Mat. 9:36; Mar. 6:34). Haʼe ndojoguaiete umi fariséope, haʼekuéra ningo ndoiporiahuverekói vaʼekue umi héntepe ni noipytyvõséi chupekuéra (Mat. 12:9-14; 23:4; Juan 7:49). ¿Ñandépa jajogua hína Jesúspe? ¿Jajepyʼapýpa umi héntere ha ñaipytyvõse chupekuéra oikuaa hag̃ua Jehovápe? w17.09 páh. 9 párr. 6; páh. 10 párr. 9

José oĩ aja préso Egíptope ni noñeimahinái vaʼekue oikotaha chugui pe segunda persóna omandavéva upe paíspe, ni Jehová oipurutaha chupe oipytyvõ hag̃ua ihentekuérape pono omanomba ñembyahýigui (Gén. 40:15; 41:39-43; 50:20). Jahechaháicha, Jehová ojapo hetaiteve mbaʼe José ohaʼarõ vaʼekuégui. ¿Mbaʼépa ikatu jaʼe Sárare? Haʼe ijedáma kuri ha nohaʼarõi asy imembytaha. Péro onasérõ guare Isaac, Sara ohechakuaáne raʼe oiko hague peteĩ mbaʼe haʼe ni noimoʼãi vaʼekue oikotaha (Gén. 21:1-3, 6, 7). Ñande ningo nañahaʼarõi Jehová ojapo peteĩ milágro ha osolusionambaite ñane provlemakuéra og̃uahẽ mboyve pe múndo pyahu. Avei nañahaʼarõi ojapo ñanderehehápe umi mbaʼe oñeimoʼãʼỹva. Upéicharõ jepe, jaikuaa haʼe oipytyvõ hague isiervokuéra ymaguarépe oñeimoʼãʼỹháicha, ha haʼe nokambiái koʼag̃aite peve (Is. 43:10-12). Jaikuaa porã haʼe ñanemombaretetaha ikatu hag̃uáicha jajapo hembipota (2 Cor. 4:7-9). Ñaneñeʼẽrendúramo Jehovápe, haʼe katuete ñanepytyvõta jahasa jave umi situasión ijetuʼuvéva jepe. w17.08 páh. 11, 12 párr. 13, 14

Reservíramo de tiémpo kompléto rehasavéta tiémpo umi ótro ermáno ojapóvandi avei upéva, ha nepytyvõta neakãguapyve hag̃ua rehóvo. Péro ndahaʼéi voi upévante, reservírõ de tiémpo kompléto nemitã aja, nepytyvõta osẽ porã hag̃ua ne matrimónio remenda vove. Heta vése umi oservíva kómo prekursór omenda mboyve, osegi iprekursorádo hembireko térã iménandi (Rom. 16:3, 4). Salmo 20:4 heʼi: “Ñandejára tomeʼẽ ndéve umi mbaʼe reipotáva nde pyʼaite guive, ha haʼe rupive tosẽ porã ndéve opa mbaʼe rejaposéva”. Repensa jave umi mbaʼe rejaposévare tenondeve, rekalkula vaʼerã mbaʼépa hína añetehápe la rehupytyséva. Epensa avei mbaʼépa Jehová ojapo hína ñane tiémpope ha mbaʼépa ikatu rejapo reservi porã hag̃ua chupe. Upéi, eplanea porã mbaʼéichapa rejapóta Jehová oguerohorýva. Revyʼaitereíta reipurúramo nde rekove reservi hag̃ua Jehovápe, pórke péicha remombaʼeguasúta chupe. La Biblia heʼi voi: “Evyʼa nde pyʼaite guive rejapóvo Jehová heʼíva, ha haʼe katuete omeʼẽta ndéve umi mbaʼe reipotáva nde pyʼaite guive” (Sal. 37:4). w17.07 páh. 26 párr. 15-18

Pyʼỹinte ningo ñamombaʼe jahecháramo peteĩ persóna iñeʼẽkuaaha térã ojapo porãitereiha algúna kósa. Péro Jehová hína pe persóna ñamombaʼeve vaʼerã. ¿Mbaʼérepa? Pórke ipoderosoiterei ha upéva ojekuaa porã opa mbaʼe ojapo vaʼekuére. Avei ñambotuicha chupe ñanderayhueterei rupi, ha upéva ojekuaa omeʼẽvo Itaʼýra rekove ñanderehehápe. Jaleévo Salmo 147 jahechakuaa pe salmísta omombaʼeguasuseha Jehovápe. Péro ndahaʼéi upévante, haʼe omokyreʼỹ avei hapichakuérape ombotuicha hag̃ua hendive Ñandejárape (Sal. 147:7, 12). Ndajaikuaái mávapa oskrivi rakaʼe Salmo 147. Péro amalisia pe oskrivíva ko salmo oiko kuri umi israelita ou jey tiémpope Jerusalénpe, Jehová olivera rire chupekuéra Babilóniagui (Sal. 147:2). Jehová oipytyvõ ipuévlope oadora jey hag̃ua chupe hetãme, ha upéva omomýi pe salmístape omombaʼeguasu hag̃ua chupe. ¿Mbaʼe mbaʼépa ñanemomýi avei ñandéve ñambotuicha hag̃ua Jehovápe? (Sal. 147:1). w17.07 páh. 17 párr. 1-3

Jesús oikuaa vaʼekue heta idisipulokuérape ijetuʼutaha ohupyty hag̃ua hemikotevẽ. La Biblia ohechauka porã “umi mbaʼerepy oĩva ko múndope”, térã umi negósio ha komérsio, ndouiha Ñandejáragui. ¿Mbaʼérepa jaʼe upéva? Pórke hardín de Edénpe Jehová omeʼẽ rasapa vaʼekue Adán ha Évape la oikotevẽva (Gén. 2:15, 16). Avei síglo primérope, Ñandejára omeʼẽrõ guare espíritu sánto umi kristiáno unhídope, haʼekuéra “ndoikói oñemoakateʼỹ umi mbaʼe orekóvare, síno okomparti oñondivepa opa mbaʼe” (Hech. 4:32). Proféta Isaías katu heʼi og̃uahẽtaha pe día entéro umi persóna hoʼu ha oipurutahápe igustoitépe umi mbaʼe oprodusíva ko yvy (Is. 25:6-9; 65:21, 22). Péro og̃uahẽ mboyve upe tiémpo, entéro Jesús disipulokuéra tekotevẽta iñarandu ohupyty hag̃ua hemikotevẽ ko múndope, ha avei ombovyʼa hag̃ua Ñandejárape (Luc. 16:8). w17.07 páh. 8 párr. 4-6

Lívro de Job ojehai vaʼekue ymaitereíma, oĩ voi umi lívro bíblico ojehai ypy vaʼekue apytépe. Pype jatopa Satanás heʼi hague Job ohasa asýramo omboyketaha Ñandejárape. Upémarõ ojerure Jehovápe ombosufri hag̃ua Jóbpe. Jaikuaaháicha, haʼe ndojapói upéva, péro opermiti Satanás ombohasa asy ko kuimbaʼépe. Upe riremínte, Job operdepa ikosakuéra ha isiervokuérape. Avei omano chugui umi 10 ifamília. Satanás ojapo koʼã mbaʼe haʼeramoguáicha Ñandejára la kulpávle (Job 1:13-19). Upéi, Satanás ombou Jóbpe peteĩ mbaʼasy ombosufrietereíva chupe ha oporombojeguarúva (Job 2:7). Ha amo ipahápe Job rembireko ha mbohapy iñamígo guaʼu oñepyrũ heʼi heta mbaʼe omoñeñandu vaíva ha omokangýva Jóbpe (Job 2:9; 3:11; 16:2). ¿Siértopa la Satanás heʼi vaʼekue? Nahániri. Haʼe tuichaiterei ojavy, pórke Job nomboykéi Ñandejárape (Job 27:5). w17.06 páh. 24 párr. 9, 10

Ñane tiémpope, Jehová omeʼẽ umi omoakãvape hogapy pe rresponsavilida omantene hag̃ua ifamíliape. Upearã ombaʼapo jejopy vaʼerã hikuái. Péro jaikógui koʼã ára pahápe umi traváho ijetuʼueterei ha ñandepyʼapy. Pyʼỹinte ningo oĩ heta ombaʼaposéva, péro la traváho oĩva ndohupytýi enterovépe. Upéicha rupi umi hénte ojapo opa ikatúva okonsegi hag̃ua traváho. Avei oĩ ombaʼapóva óra éxtra, ojepagaʼíramo jepe chupekuéra. Umi emprésa oñehaʼã oprodusi hetave, saʼivéramo jepe koʼág̃a la ipersonalkuéra. Upévare umi ombaʼapóva ou ikaneʼõiterei, ojestresa ha hasypa. Heta avei oĩ okyhyjéva operdérõ g̃uarã itraváho, upévare ojapómante opa mbaʼe ojeruréva chupekuéra ipatrón. Ñande jaservíva Jehovápe jaikuaa siémpre ñamombaʼeve vaʼerãha chupe ótrope rangue, umíva apytépe ñane patrón (Luc. 10:27). Ñande traváho ñanepytyvõ jahupyty hag̃ua ñane remikotevẽ ha jaapoja hag̃ua pe predikasión. Péro nañañatendéiramo, ikatu hína ñande traváho káusare ndajaserviporãvéi Ñandejárape. w17.05 páh. 23 párr. 5-7

Sapyʼánte umi ermáno ipyahúva Jehová organisasiónpe ojerure ótro iñexperiensiavévape ikatu hag̃uáicha oipytyvõ chupe omboʼekuaa hag̃ua la Biblia ifamíliape. Peteĩ túa térã sy ojeruréramo ñandéve jastudia hag̃ua ifamíliandi, ñanemanduʼa vaʼerã ñande ndajarekoiha pe autorida orekóva ituakuéra hese (Efes. 6:1-4). Sapyʼánte ikatu voi ñambostudia peteĩ mitãme ituakuéra ndahaʼéiva Testígo. Tahaʼe haʼeháicha, jastudia jave umi mitãndi iñimportánte oĩ presénte ituakuéra térã ótro ermáno iñakãguapýva. Térã ikatu jajapo upéva peteĩ lugár nañaimemoʼãihápe ñaneaño pe mitãndi ani hag̃ua oñepensa vai ñanderehe. Tiémpo rire, tuakuéra voi ikatu omboʼe ifamíliape Jehová oipotaháicha. w17.06 páh. 8 párr. 15, 16

Umi mitã ndojepokuaáirõ ituakuéra kultúrare, ijetuʼúta avei ogusta hag̃ua chupekuéra iñidióma ha irrelihión. Tuakuéra ningo nomotenondéi haʼekuéra oikotevẽva, síno ifamiliakuéra oikotevẽva (1 Cor. 10:24). Peteĩ ermáno hérava Samuel omombeʼu: “Che ha che rembireko roñatende mbaʼe idiómapepa ore família oprogresave espirituálmente, ha rojerure Jehovápe taorepytyvõ rodesidi porã hag̃ua. Roñemeʼẽ enkuénta haʼekuéra mbegueterei oprogresaha ohóvo, upémarõ rodesidi rova peteĩ kongregasión oñeñeʼẽhápe pe idióma pe paispegua. Ndorofaltái ningo rreunionhápe ha rosẽ meme ropredika oñondivepa. Avei roinvita umi ermáno kongregasionguápe okaru hag̃ua orendive, térã roho hag̃ua rojepasea. Koʼã mbaʼe tuichaiterei oipytyvõ umi mitãme oñemoag̃uive hag̃ua umi ermánore, ha ohechakuaa hag̃ua Jehová haʼeha avei Itúa ha Iñamígo. Ore ningo roipota kuri haʼekuéra oñeʼẽ porã ore idióma, péro rohechakuaa umi mbaʼe ohupytýva hikuái iñimportanteveha upévagui”. w17.05 páh. 10 párr. 11-13

Koʼẽrõitéma, ko yvy tuichakuére opytáta sólamente umi persóna oñemoĩva Jehová poguýpe. Ñande ningo jaipotaitereíma og̃uahẽ upe tiémpo. Barac ha Débora ojapo haguéicha, ñande avei jaʼe: “Toñehundipa umi ne enemigokuéra Jehová. Péro umi nderayhúva tomimbi pe kuarahýicha” (Juec. 5:31). Koʼã mbaʼe oikóta Jehová ohundi vove Satanás múndo aña. Armagedón oñepyrũ vove, Jehová noikotevẽmoʼãi umi ojeofresévare oñorairõ hag̃ua. Upe moméntope jajapóta la Biblia heʼíva: “Pepytaite upépe, ha pehecháta mbaʼéichapa Jehová pendesalva” (2 Crón. 20:17). Ñahaʼarõ aja og̃uahẽ pe tiémpo, jareko pe oportunida porãite jaapoja hag̃ua Jehová goviérno kyreʼỹ ha pyʼaguasúpe. Débora ha Barac oñepyrũvo ipurahéi ombotuicha Jehovápe, ndahaʼéi yvyporakuérape. Haʼekuéra heʼi: “Umi hénte Israelpegua ojeofrese oho hag̃ua gerrahápe [...]. Upéicha rupi, pemombaʼeguasúkena Jehovápe” (Juec. 5:1, 2). Ñande avei jaservi jave Jehovápe oimehaichagua asignasiónpe, umi ótro katuete ikyreʼỹta omombaʼeguasu hag̃ua chupe. w17.04 páh. 32 párr. 17, 18

José ndahesarái ohasa hague 13 áñore umi inhustísia, upéicharõ jepe noñamargái upe haguére (Gén. 45:5-8). Avei ndohejái umi ótro fálla omomombyry chupe Jehovágui. José ifiél rupi, ohecha mbaʼéichapa Jehová okorrehi umi inhustísia ha ovendesi chupe ha ifamíliape. José ojapo haguéicha, javalora ha jakuida vaʼerã pe amista jarekóva Jehovándi. Ñande ningo jahayhu ha ñamombaʼeguasu chupe, upévare aníkena jaheja ñane ermanokuéra fálla ñanemomombyry chugui (Rom. 8:38, 39). Upéva rangue, jahasa jave algúna inhustísia kongregasiónpe, jasegi vaʼerã José ehémplo ha ñañemoag̃uive Jehováre. Avei tekotevẽ jahecha opa mbaʼe Ñandejára ohechaháicha. Jajapo rire opa ikatúva ñasolusiona hag̃ua umi provléma la Biblia heʼiháicha, jahejáma vaʼerã Jehová pópe pe situasión. Jajerovia vaʼerã haʼe osolusionataha katuete opa mbaʼe iporãveháicha ha itiempoitépe. w17.04 páh. 20 párr. 12; páh. 22 párr. 15, 16

Ana okumpli la opromete vaʼekue Jehovápe. Haʼe ogueraha Samuélpe pe tavernákulope oĩva Silópe, pe saserdóte prinsipál hérava Elí renondépe, ha heʼi chupe: “Che ajerure kuri Jehovápe omeʼẽ hag̃ua chéve peteĩ mitãkuimbaʼe. Ha haʼe okontesta la che ñemboʼe. Che katu koʼág̃a ameʼẽ Jehovápe ko che memby. Aipota oservi Jehovápe oikove aja entéro” (1 Sam. 1:24-28). Ana ojapo rire upéva, “Samuel osegi okakuaa Jehová rógape” (1 Sam. 2:21). Ana ningo ohayhueterei imembýpe, péro ndaikatumoʼãi ohasa tiémpo hendive káda día imichĩ aja. Ñapensamíntena mbaʼeichaitépa oiméne orekoséne raʼe ijyva ári omokunuʼũ hag̃ua chupe ha okuida hag̃ua hese. Jaikuaaháicha, koʼã mbaʼe ombovyʼa katuete umi sýpe imanduʼa jave mbaʼéichapa omongakuaa imembýpe. Péro Ana nopyrũi iñeʼẽre, ovyʼa katu ojapo haguére Jehovápe ogustáva (1 Sam. 2:1, 2; Sal. 61:1, 5, 8). w17.04 páh. 4, 5 párr. 7, 8

Apóstol Pablo heʼi vaʼekue: “Umi ára pahápe pe situasión ijetuʼúta ha hasýta jagueropuʼaka hag̃ua”. Upéi heʼi avei: “Umi kuimbaʼe aña ha hovamokõiva oho vai vaive vaʼerã” (2 Tim. 3:2-5, 13). ¿Mbaʼéichapa oñekumpli ko profesía? Ñande apytépe oĩ heta osufrímava oĩ rupi persóna ivioléntova, oporojukáva, oporomondáva térã omboykéva hapichápe. Koʼã hénte aña apytépe oĩ heta notĩriva voi hembiapo vai hag̃ua. Ótro katu oipytyvõse guaʼu umi héntepe, péro añetehápe ombotavy chupekuéra. Koʼã mbaʼe vai ndoikóiramo jepe ñanderehe, katuete ñandeafekta la ojapóva umi hénte aña. Heta vése oguapyeterei ñanderehe ñahendu jave ojetrata vaietereiha umi mitãme, umi ijedávape ha ambue persóna ndaikatúivape oñedefende. Umi ojapóva upéicha, haʼete voi umi animál térã demónio (Sant. 3:15). Péro tuicha ñanekonsola Ñandejára Ñeʼẽ omeʼẽ rupi ñandéve esperánsa. w17.04 páh. 10 párr. 4