Febrero

Jesús ombyasyeterei vaʼekue umi héntepe. Ha heta oĩ ohechakuaáva upéva ha ohendu pe notísia porã oñeʼẽva Ñandejára Rréinore. Amáske ñañehaʼã jasegi Jesús ehémplo, jahupytýta hetave mbaʼe porã predikasiónpe. ¿Mbaʼépa ikatu ñanepytyvõ ñantendeve hag̃ua umi persóna japredikávape? Iporãta ñañemoĩramo ilugarpekuéra ha jatrata umi persónape ñande jaipotaháicha ñandetrata hikuái (Mat. 7:12). Ñapensa mbaʼépa oikotevẽ káda persóna. Japredika jave ndajaipurúi vaʼerã peteĩ presentasión añónte diferénte persónandi. Upéva rangue jareko vaʼerã enkuénta mbaʼe situasiónpa ohasa káda uno ha mbaʼépa opensa. Ñañatende porã vaʼerã ñambaʼeporandu jave chupekuéra (Prov. 20:5). Ñambaʼeporandúramo hendaitépe japilláta mbaʼérepa upe persóna oikotevẽ pe marandu porã. Ha jaikuaa rire upéva, ifasilvéta ñañemoĩ hag̃ua ilugarpekuéra ha jajapóta ikatúva guive ñaipytyvõ hag̃ua chupekuéra Jesús ojapo haguéicha (ekompara 1 Corintios 9:19-23 heʼívare). w19.03 páh. 20 párr. 2; páh. 22 párr. 8, 9

Adán ha Eva ohechauka kuri ndovaloraiha umi mbaʼe porã Jehová ojapo vaʼekue hesehapekuéra. Péro ñande ikatu jahechauka ndajajoguaiha chupekuéra, pórke jaagradese la Jehová ojapóva ñanderehehápe. Jajevautisávo jahechauka ñaimeha segúro Jehová añoite ikatuha heʼi ñandéve mbaʼépa oĩ porã ha mbaʼépa oĩ vai. Upéicha jahechauka jahayhu ha jajeroviaha ñande Túare. Jajevautisa rire, ñañehaʼãmbaite vaʼerã káda día jaiko Jehová oipotaháicha, ndahaʼéi ñandévente ñandegustaháicha. Hetaiterei Jehová siérvo ojapóma hína upéva, ha nde ikatu avei reĩ ijapytepekuéra. Upearã resegi vaʼerã reaprende mbaʼépa omboʼe la Biblia, ejeheʼa meme ermanokuérare ha kyreʼỹme emombeʼu ótrope umi mbaʼe reaprendéva Ñandejára nderayhuetévagui (Heb. 10:24, 25). Redesidíta jave peteĩ mbaʼe katu, ehecha vaʼerã mbaʼe konséhopa Ñandejára omeʼẽ la Biblia ha iñorganisasión rupive (Is. 30:21). Upéicha entéro mbaʼe rejapóva katuete osẽ porãta (Prov. 16:20). w19.03 páh. 7 párr. 17, 18

Jehová omeʼẽ ñandéve hetaiterei aliménto espirituál. Por ehémplo, ojapo upéva umi rreunión, rrevistakuéra ha ñande sítio de Internet rupive. Oiméne oikómava ñanderehe ñahendu rire peteĩ diskúrso, jalee rire peteĩ artíkulo térã jahecha rire peteĩ prográma JW Broadcástingpe, ñapensa ojejapo hague ñanembaʼerãite. ¿Mbaʼéichapa ikatu jaagradese Jehovápe koʼã rregálore? (Col. 3:15). Upéva ikatu jajapo ñañemboʼe jave chupe. ¿Mbaʼéichapa ikatu avei jahechauka jaagradeseha Jehovápe? Por ehémplo, ñamantenévo potĩ asy ha vién ordenádo pe lugár ñañembyatyhápe ñamombaʼeguasu hag̃ua Jehovápe. Upévare pyʼỹinte japartisipa ojejapo jave limpiésa ha mantenimiénto ñane Salón del Réinope. Avei umi ermáno omaneháva pe ekípo de sonído ha vidéo, oñatende oipuru porã hag̃ua umíva. Ñamantene porãramo ñane Salón, oduravéta ha natekotevẽmoʼãi manterei oñemyatyrõ álgo tuicháva. Péicha jaaorravéta ha hembyvéta pláta oñemopuʼã hag̃ua hetave Salón ko yvy tuichakuére ha oñemyatyrõ umi oĩmava. w19.02 páh. 18 párr. 17, 18

Job ohasa vaʼekue heta tiémpo omañávo umi mbaʼe Jehová okrea vaʼekuére (Job 26:7, 8). Haʼe ohechakuaa saʼieterei oikuaaha Jehová kreasióngui, péro lomímonte oñemaravilla ojepyʼamongeta jave ko yvýre, pe yvágare, umi araíre ha pe arasunúre. Job ovaloraiterei vaʼekue avei umi mbaʼe Jehová omboʼéva, upévare heʼi: “Amombaʼe la haʼe heʼíva” (Job 23:12). Job ohecharamoiterei kuri opa mbaʼe Jehová ojapóva ha upévare orrespetaiterei chupe. Haʼe ohayhu Ñandejárape ha ombovyʼase chupe, upévare oĩve desidído ifieltaha Jehovápe. Ñande jajapo vaʼerã avei Job ojapo haguéicha. Koʼág̃arupi ñande jaikuaa hetaiteve mbaʼe pe kreasióngui, ha jareko voi la Biblia kompletoite ikatu hag̃uáicha jaikuaa porãve Ñandejárape. Opa mbaʼe ñaaprendéva ñanepytyvõta ñande avei ñamombaʼe ha jarrespeta hag̃ua Jehovápe. Koʼã mbaʼe ñanemomýita jahayhu ha ñaneñeʼẽrendu hag̃ua Ñandejárape, ha ñaimevéta desidído ñandefiél chupe ñande pyʼaite guive (Job 28:28). w19.02 páh. 5 párr. 12

Ymaite guive oĩnteva voi heta goviérno oñemoĩva Jehová puévlore. Haʼekuéra heʼi jepi ñanderehe jajapoha heta mbaʼe vai, péro añetehápe ndochaʼéinte ñanderehe pórke ñande jadesidi ‘ñaneñeʼẽrendu Ñandejárape ñande ruvicháramo, yvyporakuérape rangue’ (Hech. 5:29). Upévare sapyʼánte ikatu oñembohory ñanderehe hikuái, ñandegueraha kárselpe, térã ikatu voi ñanembyepoti o ñandetortura hikuái. Péro Jehová ñanepytyvõ rupi ñande nañañevengái, síno jasegínte ñandepyʼaguapy jahasa asýramo jepe. Jahechamína pe ehémplo porãite oheja vaʼekue ñandéve umi mbohapy hebreo ojeraha vaʼekue Babilóniape, umíva hína Hananías, Misael ha Azarías. Haʼekuéra pyʼaguapýpe porãnte heʼi vaʼekue pe rréipe ndoadoramoʼãiha pe taʼanga haʼe ojapo vaʼekue, ha oaseptáta kuri hikuái oimeraẽ mbaʼe Jehová opermitíva oiko (Dan. 3:1, 8-28). Sapyʼánte tekotevẽ jahechauka ñandefielha Jehovápe. ¿Mbaʼéichapa ikatu jasegi umi mbohapy hebreo ehémplo upéicha jave? Upearã ñaneumílde vaʼerã ha ñakonfia Jehová okuidataha ñanderehe (Sal. 118:7). Oĩ jave heʼíva ñanderehe jajapo hague álgo ivaíva, ñarresponde vaʼerã pyʼaguapýpe porãnte ha jahechauka jarrespetaha chupekuéra (1 Ped. 3:15). Avei ñamboyke vaʼerã entéro mbaʼe ikatúva ombyai pe amista jarekóva ñande Ru Jehovándi. w19.02 páh. 10, 11 párr. 11-13

¿Mbaʼépa ñanepytyvõta ñandepyʼaguasu hag̃ua? Ñapensa vaʼerã pe esperánsa jarekóvare Jesús sakrifísio rupive (Juan 3:16; Efes. 1:7). Umi semána og̃uahẽ mboyve pe Konmemorasión, jareko oportunida ñamombaʼeve hag̃ua pe sakrifísio Jesús ojapo vaʼekue ñanderehehápe. Por ehémplo ikatu jalee umi téxto ojepreparáva upe féchape g̃uarã, ha jajepyʼamongeta porã umi mbaʼe oiko vaʼekuére Jesús omano mboyvemi. Péicha, ág̃a ñañembyaty vove pe Konmemorasión díape, ñantende porãvéta mbaʼépa orrepresenta pe pan ha pe víno, ha mbaʼe sakrifísio ijojahaʼỹvarepa ñanemomanduʼa. Ñantende porãramo mbaʼépa Jesús ha Jehová ojapo ñanderehehápe, ha mbaʼépa jahupyty ñande ha umi jahayhúva, jajeroviavéta ñane esperánsare. Avei ñanekyreʼỹvéta ñaaguanta hag̃ua ipahaite peve (Heb. 12:3). Ajépa javyʼaite ñande Saserdóte Prinsipál oĩva yvágape ojerure meméva ñanderehehápe osegiha ohechauka iñumílde ha ipyʼaguasuha (Heb. 7:24, 25). Jahechauka hag̃ua jaagradeseha upéva, jasegi vaʼerã jagueromanduʼa la Jesús omanda vaʼekue (Luc. 22:19, 20). w19.01 páh. 22 párr. 8; páh. 23, 24 párr. 10, 11

Jehová omeʼẽ entérope pe oportunida omombaʼeguasu hag̃ua chupe. Ñakomenta jave rreunionhápe haʼete ñameʼẽva “peteĩ sakrifísio Ñandejárape”, ha jaikuaaháicha, upéva ndaikatúi ótro ojapo ñande rehehápe (Heb. 13:15). ¿Mbaʼépa nde repensa? ¿Ojerurénepa Jehová káda únope el mísmo sakrifísio, térã komentário? Nahániri, haʼe ningo ndojapomoʼãi upéva. Ñaime jave rreunionhápe, haʼete ñañembyatýva ñane amigokuérandi jakarupa hag̃ua oñondive. Epensamína reñeinvitaha peteĩ karuhápe ha entéro orahaha peteĩ mbaʼe ojeʼu hag̃ua. Ndéve ojeʼe eraha hag̃ua avei algúna kósa ekomparti hag̃ua hendivekuéra. Péicha jave ikatu rejepyʼapy, péro reñehaʼãmbaitéta eraha peteĩ mbaʼe entérope ogustátava. Ñaime jave rreunionhápe, Jehová ñaneinvita hógape ha omeʼẽ ñandéve tembiʼu peteĩ mesa renyhẽte (Sal. 23:5; Mat. 24:45). Upévare Jehová katuete ovyʼáta jaguerúramo álgo isensíllova péro pe iporãvéva ikatúva ñameʼẽ. Upévare iporãta rejeprepara porãramo rreunionrã ha eñehaʼã ekomenta meme. Upéicha ikatúta eju eguapy Jehová mesápe rekaru hag̃ua, ha avei haʼetéta ku eguerúva peteĩ mbaʼe ikatúva ekomparti ermanokuérandi. w19.01 páh. 8 párr. 3; páh. 13 párr. 20

Yma umi hénte hekovai vaʼekue oadora hag̃ua umi dios fálsope (Os. 4:13, 14). Heta héntepe ostira vaʼekue pe adorasión fálsa hekovaise rupi hikuái. ¿Péro ombovyʼápa chupekuéra upéva? Ni mbaʼevéicharõ. David heʼi vaʼekue umi oadoráva umi dios fálsope ‘káda día oñamargaveha’. Umi persóna ningo ifamíliape jepe osakrifika vaʼekue umi dios fálsope (Is. 57:5). Péro Jehovápe ombojeguaru vaʼekue la ojapóva hikuái (Jer. 7:31). Koʼág̃a avei heta rrelihión fálsape ndojehechavaíri pe tekovai, por ehémplo umi kuimbaʼe oikóva kuimbaʼéndi térã kuña kuñándi. Umichagua hénte ikatu opensa ilivreha, péro añetehápe “káda día oñamargave” hikuái (1 Cor. 6:18, 19). Nde oiméne katuete rehechakuaa upéva, upéicha rupi ehendúkena nde Ru yvagapeguápe ha katuete oho porãta ndéve. Epensa avei mbaʼépepa opa umi hénte hekovaírõ. Ikatu pe tekovai nembovyʼa sapyʼami, péro eikuaáke tuichaiterei ndeperhudikataha (Gál. 6:8). w18.12 páh. 27, 28 párr. 16-18

Peteĩ kristiáno térã kristiána omendáva oúramo hekovai, hembireko térã iména odesidi vaʼerã mbaʼépa ojapóta. Jesús heʼi vaʼekue pe persóna hekopotĩva orekoha derécho ojedivorsiávo ha ilivreha omendase jeýrõ (Mat. 19:9). Upéicharõ jepe, ndojapovaimoʼãi operdonáramo hembiayhúpe. Oseas oraha jey vaʼekue Gómerpe hógape. Upe rire Gómer nomoakãratĩvéima vaʼerã iménape. Upéicha avei, Oseas ‘ndorekovéi rrelasión sexuál hendive’ peteĩ tiémpore (Os. 3:1-3). Péro upe rire, pe proféta oñepyrũ jey oreko rrelasión sexuál hembirekóndi. Upéva orrepresenta Ñandejára oĩha dispuésto oasepta jeývo ipuévlope ha oñemoag̃ui jeývo hesekuéra (Os. 1:11; 3:4, 5). ¿Mbaʼépa ñanemboʼe Oseas rehe oiko vaʼekue? Pe kristiáno ifiélva oñepyrũrõ oñeno jey iména térã hembireko hekovai vaʼekuéndi, ohechauka hína operdonamaha chupe (1 Cor. 7:3, 5). Oikóramo upéva ndaiporivéima váse bíblica ojedivorsia hag̃ua. Upéva rangue pe paréha oñehaʼã vaʼerã oiko porã jey oñondive ha ohecha pe matrimónio Ñandejára ohechaháicha. w18.12 páh. 13 párr. 13

Jastudia jave, ñapensa vaʼerã mbaʼéichapa Jehová ohecha peteĩ mbaʼe ikatu hag̃uáicha upéva ñanepytyvõ jadesidi porã hag̃ua. Jajapórõ péicha, jaikuaátama mbaʼépa ikatu jajapo oñepresenta jave peteĩ situasión tekotevẽhápe pyaʼe jadesidi. Por ehémplo, Potifar rembireko oñenosérõ guare Joséndi, haʼe pyaʼe voi orrechasa chupe. José oiméne ojepyʼamongetáma raʼe mbaʼéichapa Jehová ohecha vaʼekue umi matrimónio (Gén. 39:8, 9). José heʼi Potifar rembirekópe: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?”. Umi mbaʼe heʼíva ohechauka haʼe opensa hague Jehová opensaháicha. ¿Ha ñande? ¿Mbaʼépa jajapóta ñane kompañéro térã ñane kompañéra de traváho oñepyrũramo onovillea ñanderehe? ¿Térã mbaʼépa jajapóta oĩramo la omboúva ñandéve mensáhe térã fóto ohechaukáva oñenoseha ñanendive? Ifasilvéta ñandefiél hag̃ua Jehovápe ñaaprende ha jaaseptárõ haʼe opensa lája, ha jadesidíramo la jajapótava oñepresenta mboyve koʼãichagua situasión. w18.11 páh. 25 párr. 13, 14

Heta expérto heʼi ko téxto heʼiseha voi: “Apo vyʼágui ajerovia rupi che Járare; hiʼãite voi chéve ajeroky amombaʼe rupi Ñandejárape”. ¡Ajépa tuichaite mbaʼe la ñaaprendéva Habacuc ehémplogui! Jehová ndahaʼéi oprometénteva umi mbaʼe porãite amo gotyove g̃uarã, haʼe oasegura voi ñandéve pyaʼe okumplitaha la heʼíva. ¿Mbaʼépa la iñimportantevéva ñaaprendéva lívro de Habacúcgui? Ñakonfia vaʼerãha Jehováre (Hab. 2:4). Jasegi hag̃ua jajerovia Jehováre tekotevẽ ñañemoag̃uive jahávo hese. Upearã jajapo vaʼerã mbohapy mbaʼe: 1) Ñañemboʼe meme vaʼerã ha ñamombeʼu Ñandejárape umi provléma ha entéro umi mbaʼe ñandepyʼapýva. 2) Ñahendu mbaʼépa heʼi ñandéve Jehová Iñeʼẽ rupive, ha jasegi umi instruksión omeʼẽva iñorganisasión. Ha 3) jajerovia Ñandejárare ha ñanepasiénsia ñahaʼarõ aja Jehová okumplipaite ipromesakuéra. Péicha ojapo kuri Habacuc. Upévare haʼe ndovyʼáiramo jepe oñepyrũrõ guare oñeʼẽ Jehovándi, ikyreʼỹ ha ovyʼaiterei oñemongetapa rire hendive. Jasegíramo Habacuc ehémplo, ñande Ru yvagapegua Jehová ñanekonsoláta ñaneañuaramoguáicha mborayhúpe. ¿Oĩnepa ko múndo añáme konsuélo iporãvéva ikatúva jarresivi? w18.11 páh. 17 párr. 18, 19

Entéro kristiáno ikatu avei jaguerovia Jehová ñanderayhuha, pórke Iñeʼẽme heʼi voi: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16). Jahechaháicha, Jesús avei ohechauka ñanderayhuha ha upéva ñanemombarete. La Biblia heʼi ke mbaʼeveichagua “jehasa asy [térã] jepyʼapy” nañandepeʼamoʼãi “Cristo mborayhúgui” (Rom. 8:35, 38, 39). Sapyʼánte jahasa umi situasión ñanemokangýva físikamente térã ñanemoñeñandu vaietereíva, ỹrõ upéva káusare ndajavyʼavéi Jehová servísiope. Péicha jave ñanemanduʼa vaʼerã mbaʼeichaitépa Cristo ñanderayhu ha upéva ñanemombaretéta jasegi hag̃ua ñaaguanta (2 Cor. 5:14). Avei omeʼẽta ñandéve pe deséo jaikove hag̃ua ikatu hag̃uáicha jasegi jaservi Jehovápe. Jesús mborayhu ikatu ñanepytyvõ ani hag̃ua ñañentrega, ñandeafektáramo jepe umi desástre naturál, jajepersegírõ, nosẽiramo algúna kósa ñapensa haguéicha kuri térã jajepyʼapyetereíramo jepe. w18.09 páh. 14 párr. 8, 9

Jasegi hag̃ua jaiko pe añetegua rapére tekotevẽ jaasepta ha jajapo opa mbaʼe Jehová heʼíva. Pe añetegua haʼe vaʼerã la iñimportantevéva ñandéve g̃uarã ha jajegia vaʼerã la Biblia heʼívare entéro mbaʼépe. David oĩ vaʼekue desidído oikotaha pe añetegua rapére ha ñande jasegi vaʼerã iñehémplo. Ndajajapóiramo péicha, ikatu ñanemanduʼa jey umi mbaʼe jaheja vaʼekuére pe añetegua rehehápe, ha ñañepyrũ jaipota jey umi mbaʼe. Péro ndovaléi jaelehi mbaʼe pártepa jaaseptáta la Biblia heʼívagui ha mbaʼépa ñamboykéta. Tekotevẽ jajapo opa mbaʼe ñaaprendéva chugui (Juan 16:13). Ani hag̃ua núnka jaheja pe añetegua, tekotevẽ jaipuru porã ñane tiémpo. Nañañatendéiramo ikatu japerde heta tiémpo vyʼarã rapykuéri, umi mbaʼe ñandegustávape, jaipuruhápe Internet térã jahechahápe téle. Ndaivaíriramo jepe koʼã mbaʼe ikatu hoʼupa ñandehegui ñane tiémpo, ha saʼivéma hemby ñandéve jajapo hag̃ua ñande estúdio personál ha ñambaʼapo hag̃ua Jehová servísiope. w18.11 páh. 10 párr. 7, 8

Sapyʼánte ningo ñahaʼarõʼỹre ou okambia ñane situasión. Péicha jave jajepyʼapyeterei ha ikatu voi jajestresa (Prov. 12:25). Heta vése ningo ijetuʼu jaasepta térã jajeadapta hag̃ua umi kámbiore. Péro, ¿mbaʼépa ikatu jajapo jasegi hag̃ua ñandepyʼaguapy? (Sal. 131:1-3). Tahaʼe haʼéva umi situasión jahasáva, “Ñandejára pyʼaguapy” ikatu ñanepytyvõ ñapensa porã ha ñandepyʼaguapy hag̃ua (Filip. 4:6, 7). Upévare jajepyʼapyeterei térã jajestresa jave, “Ñandejára pyʼaguapy” ikatu ñanemombarete jasegi hag̃ua jaservi Jehovápe ha ani hag̃ua ñañentrega. Ñandejára espíritu ningo omeʼẽ ñandéve pyʼaguapy, ha ikatu voi ñandegia jatopa hag̃ua umi téxto bíblico ñanepytyvõtava ñantende hag̃ua mbaʼépa hína la iñimportantevéva (Juan 14:26, 27). w18.10 páh. 27 párr. 2; páh. 28 párr. 5, 8

¿Mbaʼépa hína la operhudika vaive vaʼekue yvyporakuérape? Pe japu. Ñandejapu heʼise jaʼeha álgo jaikuaa porãva ndasiertoiha térã ñambotavyha ótrope. ¿Mávapa omoñepyrũ vaʼekue pe japu? Pe Aña. Jesús heʼi vaʼekue voi hese haʼeha “pe japu ruvicha” (Juan 8:44). ¿Arakaʼépa Satanás oñepyrũ vaʼekue ijapu? Jehová ojapo vaʼekue pe paraíso ikatu hag̃uáicha Adán ha Eva oiko vyʼápe. Péro heʼi avei chupekuéra ndoʼúi vaʼerãha “pe yva orekóva pe yvyramáta opermitíva ojekuaa mbaʼépa iporã ha mbaʼépa ivai”, pórke hoʼúramo katuete omanotaha hikuái. Péro Satanás oikuaáramo jepe mbaʼépa Jehová heʼi chupekuéra, ojevale peteĩ mbóire heʼi hag̃ua Évape: “Peẽ ningo ni mbaʼevéicharõ napemanomoʼãi”. Péicha Satanás oñepyrũ vaʼekue ijapu. Haʼe heʼi avei Évape: “Ñandejára oikuaa porã peʼuha árape pe yva pejesapeʼataha, ha pejoguáta Ñandejárape ha peikuaáta mbaʼépa iporã ha mbaʼépa ivai” (Gén. 2:15-17; 3:1-5). w18.10 páh. 6 párr. 1, 2

Ikatu hag̃uáicha ñandepyʼapy potĩ tekotevẽ iporã ha ipotĩ umi pensamiénto ha deséo jarekóva. Upéva ningo iñimportanteterei jaipotáramo Jehová oguerohory ñane adorasión (2 Cor. 4:2; 1 Tim. 1:5). Jehová heʼi: “Avave ndaikatúi cherecha ha osegi oikove” (Éx. 33:20). ¿Mbaʼéichapa upéicharõ “ohecháta Ñandejárape” umi ipyʼapy potĩva? Pe palávra griega ojetradusíva “ohecháta” heʼise avei oñeimahináta, ontendéta térã oikuaáta. Upévare umi ohechaséva Ñandejárape oikuaa vaʼerã mbaʼeichagua persónapa haʼe ha omombaʼe vaʼerã umi kualida porãite orekóva (Efes. 1:18). Upéicha avei, ikatu jahecha Ñandejárape ñañemeʼẽ jave enkuénta mbaʼéichapa ñanepytyvõ ñande rekovépe (Job 42:5). Avei jahecháta chupe jajesareko meméramo umi mbaʼe ijojahaʼỹva Jehová oprometévare umi osegívape ipotĩ ha ifiél chupe. w18.09 páh. 20 párr. 13, 15, 16

Jajapo jave umi mbaʼe jaikuaáva oĩ porãha, jahechauka hína ñanearanduha ha Jehová katuete ñanevendesíta. Jaikuaaháicha, ñanearandu hag̃ua tekotevẽ jareko konosimiénto. Péro ndahaʼéi ñantendénte vaʼerã peteĩ mbaʼe, síno ñañehaʼã vaʼerã jadesidi porã. Ñapensamína umi tahýire. La Biblia heʼi haʼekuéra iñaranduha, pórke ombyatýma hembiʼurã ou mboyve pe ára roʼy (Prov. 30:24, 25). Crístope oñehenói “Ñandejára arandu”, pórke siémpre ojapo umi mbaʼe Itúa oguerohorýva (1 Cor. 1:24; Juan 8:29). Jehová avei ñanevendesíta ñanearandúramo jadesidi jave peteĩ mbaʼe jaikuaáva oĩ porãha ha jasegíramo ñaneumílde (Mat. 7:21-23). Upéicharõ, entéro ñaĩva kongregasiónpe iporã ñañehaʼã jaservi hag̃ua Jehovápe tekomirĩ reheve. Añetehápe, sapyʼánte ñaikotevẽ tiémpo ha pasiénsia jajapo hag̃ua umi mbaʼe jaikuaáva oĩ porãha. Péro jajapóramo umíva, jahechaukáta ñaneumildeha ha javyʼáta koʼág̃ama voi ha pára siémpre. w18.09 páh. 7 párr. 18

Jehová ñandeapórõ guare, oipota vaʼekue ñambaʼapo hendive. Entéro yvypóra ningo ñaneimperfékto, upéicharõ jepe jaservíva guive Jehovápe ikatu ñambaʼapo hendive káda día. Por ehémplo, ñande haʼe hína “Ñandejára ajudánte” japredika jave pe marandu porã oñeʼẽva Ñandejára Rréinore, ha ñaipytyvõ jave umi héntepe oiko hag̃ua chuguikuéra Jesús disípulo (1 Cor. 3:5-9). Tuichaiterei priviléhio ningo ñande Apohare ipoderosoitéva ñandeporavo haguére jajapo hag̃ua ko traváho iñimportantetéva. Péro ndahaʼéi japredika javénte la ñambaʼapóva Jehovándi. Jajapo avei upéva: 1) ñaipytyvõ jave ñane hénte ha ñane ermanokuérape, 2) japororresivi porã jave, 3) ñañekuaveʼẽ jave kómo voluntário ñaipytyvõ hag̃ua Jehová organisasiónpe, ha 4) ñañehaʼã jave jajapove Jehová servísiope (Col. 3:23). Péro iporã ñanemanduʼa káda uno ñanediferenteha. Por ehémplo, oĩ imitãva térã ijedáva, hesãiva térã hasykatúva, oĩ avei umi ohasáva situasión ijetuʼúva, ha káda uno ñandekatupyry diferénte mbaʼépe. w18.08 páh. 23 párr. 1, 2

Jehová oasegura Habacúcpe oñembohovaitaha chupe umi porandu haʼe ojapóva. Saʼíma kuri ofalta oñesolusiona hag̃ua umi mbaʼe oipyʼapýva pe profétape. Haʼete voi Jehová heʼíva kuri Habacúcpe: “Nepasiénsiakena ha ekonfia cherehe. Che ambohováita ne ñemboʼe haʼetéramo jepe la ohasámava heta tiémpo”. Jehová oipota Habacuc imanduʼa haʼe odesidíma hague mbaʼéichapa oñekumplíta umi promesakuéra, ha omokyreʼỹ chupe osegi hag̃ua ohaʼarõ. Jaikuaaháicha, pe proféta nohaʼarõreíri kuri. Ñande avei tekotevẽ ñahaʼarõ oñekumpli Jehová promesakuéra ha ñañatende porã vaʼerã la heʼívare. Upéicha jajeroviáta hese ha ñandepyʼaguapýta jahasáramo jepe heta mbaʼe ijetuʼúva. Jesús ñanemokyreʼỹ ani hag̃ua ñañekonsentra “arakaʼépa oikóta umi mbaʼe térã mbaʼe tiémpopa ojeporavo upearã”, pórke umíva Ñandejára nomombeʼúi ñandéve (Hech. 1:7). Tekotevẽ guei jajerovia Jehová oikuaaha mbaʼe moméntopepa iporãve ojapo hembipota. Ñañehaʼãkena ani hag̃ua ñañentrega, avei ñaneumílde, ñanepasiénsia ha jajerovia Ñandejárare. Ñahaʼarõ aja, jaipuru porã pe tiémpo hembýva ha jajapo ikatúva guive jaservi porã hag̃ua Jehovápe (Mar. 13:35-37; Gál. 6:9). w18.11 páh. 16 párr. 13, 14

Pedro ningo imichĩete guive orovia vaʼekue umi ndahaʼéiva judío naipotĩriha Jehová renondépe. Péro haʼe ohasa vaʼekue heta mbaʼe ohechaukáva chupe tekotevẽha okambia opensa lája. Por ehémplo, oreko kuri peteĩ visión ndaijojaháiva (Hech. 10:9-16). Pédroicha avei, jajepyʼamongeta vaʼerã umi mbaʼe ñañandúvare ha jaheja umi ótrope ñanepytyvõ ikatu hag̃uáicha jahechakuaa noiméipa hína ñamboyke gueteri ñande rapichápe. ¿Oĩpa avei ótra kósa ikatúva jajapo? Jahayhúramo ñande rapichakuérape ñande pyʼaite guive nañamboykemoʼãi avavépe (2 Cor. 6:11-13). Upévare iporã ñañeporandu: “¿Ahasasevépa tiémpo umi che rrasaguándi, orekóvandi che nasionalida, haʼéva che trivugua térã oñeʼẽvandi che idióma?”. Oimérõ péicha, ñañehaʼã vaʼerã avei jahasa tiémpo umi ótrondi. Por ehémplo, ikatu ñainvita koʼã ermáno ha ermánape osẽ hag̃ua opredika ñanendive. Ñainvitakuaa avei chupekuéra ñande rógape peteĩ karurã térã peteĩ atyʼirã (Hech. 16:14, 15). Jajapóramo péicha, ñane korasõ henyhẽta mborayhúgui ha nañamboykemoʼãi avavépe. w18.08 páh. 9 párr. 3, 6; páh. 10 párr. 7

Oiko jave fiésta kristianokuéra apytépe, oĩ oñepyrũva ojeroky térã oñekomporta peteĩ persóna ko mundopeguáicha. Oĩ katu ohupíva ifóto térã algún komentário umi rred sosiálpe ohechaukáva opensaha umi hénte ko mundopegua opensaháicha. Koʼãichagua ermáno ikatu hína ogueraha vai umi kristiáno oñehaʼãvape idiferénte hag̃ua umi hénte ko mundopeguágui (1 Ped. 2:11, 12). Entéro mbaʼe oĩva ko múndope ojejapo ikatu hag̃uáicha jaheka “ñande rete rembipota vai, ñande resa oipotáva, ha jaiko jajechaukase umi mbaʼe jarekóvare” (1 Juan 2:16). Péro ñande Jehová mbaʼe, ha ñanediferénte. Upévare ñamboyke “opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua. Péicha ñaneakãguapýta, jaikóta hekópe ha ñamombaʼeguasúta Ñandejárape jaikóramo jepe ko múndope” (Tito 2:12). Opa mbaʼe jajapóvare ojekuaa vaʼerã ñande haʼeha Jehová mbaʼe, tahaʼe ñañeʼẽ, jakaru, ñañemonde térã ñambaʼapo lájare. w18.07 páh. 25 párr. 13, 14

Jajesareko vaʼerã Jehováre, ha ani ñandepochy térã ñambyai ñane amista Jehovándi ótro káusare. Koʼýte jajapo vaʼerã upéva jarekóramo peteĩ rresponsavilida Jehová organisasiónpe. Añetehápe, enterovéva ñañehaʼãmbaite vaʼerã ñaneñeʼẽrendu hag̃ua Jehovápe ikatu hag̃uáicha jajesalva (Filip. 2:12). Péro aníkena ñanderesarái amáske jarekove rresponsavilida, Jehová avei ohaʼarõveha ñandehegui (Luc. 12:48). Jahayhúramo Jehovápe ñande pyʼaite guive, ndajahejamoʼãi mbaʼeve ñanemoñepysanga ni “ñandepeʼa Ñandejára mborayhúgui” (Sal. 119:165; Rom. 8:37-39). Ñande jaiko umi tiémpo ijetuʼúvape. Upévare iñimportanteterei jasegi jajesareko Jehováre, oguapýva hína itrónope (Sal. 123:1). Péicha jajapóramo, katuete jaikuaáta mbaʼépa hembipota. Avei ndajahejái vaʼerã umi ótro fálla ombyai ñane amista Jehovándi. w18.07 páh. 16 párr. 19, 20

Javyʼaite ningo ñahendu jave Ñandejára siervokuéra ohesapeha ko yvy tuichakuére. Áño 2017-pe, Jehová puévlo ojapo kuri mas de 10 millón estúdio bíblico. Avei hetaiterei persóna oñeinteresáva pe añeteguáre oho kuri pe Konmemorasionhápe. Upépe oaprende hikuái Jehová omeʼẽ hague entérope peteĩ rregálo iporãitereíva haʼéva Jesús sakrifísio (1 Juan 4:9). Umi testígo de Jehová ningo oiko ko yvy tuichakuére, ha asegún pe lugár oikoha oñeʼẽ diferénte idióma. Upéicharõ jepe omombaʼeguasu Jehovápe peteĩ ñeʼẽme (Apoc. 7:9). Marãve ndoikói mbaʼe idiómapa ñañeʼẽ térã moõpa jaiko, enterovéva ikatu jahesape “mbaʼerendýicha [...] ko múndope” (Filip. 2:15). Jasegi vaʼerã japredika, ñaneunído ha siémpre ñañatende porã vaʼerã, péicha katuete ñambotuicháta Jehovápe. w18.06 páh. 21 párr. 1-3

Jesús oñemongeta kyreʼỹ peteĩ kuñakarai Samariaguándi Ñandejárare, ha ni naimanduʼái la okaru vaʼerãha. Jehová oipota haʼe opredika, ha Jesús ojapose Itúa rembipota, jepe oñeʼẽ vaʼerã peteĩ kuña Samariagua ndive. Jesúspe g̃uarã ningo Itúa rembipota lomímo ke hembiʼu (Juan 4:32-34). Péro Santiago ha Juan noaprendéi pe leksión iñimportantetéva. Umi disípulo oviahárõ guare Jesús ndive Samáriarupi, haʼekuéra oñepyrũ oheka peteĩ lugár oke hag̃ua peteĩ puévlo samaritánope. Péro umi Samariagua nopermitíri chupekuéra opyta. Santiago ha Juan ipochyeterei upe haguére, ha ojerurese voi hikuái oguejy hag̃ua tata yvágagui ohundi hag̃ua pe puévlo kompletoite. Péro Jesús ensegída okorrehi chupekuéra (Luc. 9:51-56). Ñamoĩ chupe oiko hague upéva Galiléape mbaʼe, péicharire anichéne la Santiago ha Juan peichaite peve ipochy. Ikatu ningo haʼekuéra ipochyeterei pórke oporodespresia gueteri. Ótra vuéltape, umi Samariagua ohendu porãiterei Juan opredikárõ guare upépe. Katuete ningo haʼe otĩetereíne raʼe opytávo orreaksiona vai haguére anteve (Hech. 8:14, 25). w18.06 páh. 10, 11 párr. 12, 13

Pe añetegua oĩva la Bíbliape jareko vaʼerã ñandejehe haʼeramoguáicha peteĩ sínto. Péicha ifasilvéta jajapo hag̃ua la oĩva pype, ha siémpre jaʼéta la verda. ¿Mbaʼérepa naiporãi ñandejapu? Pórke pe japu haʼe hína peteĩ árma Satanás oipuru meméva ha oikoitéva chupe. Ñandejapúramo jajeperhudika ñande voi ha avei umi ñanderoviávape (Juan 8:44). Ñaneimperféktoramo jepe, ñañehaʼãmbaite ani hag̃ua núnka ñandejapu (Efes. 4:25). Péro upéva ikatu ijetuʼu hína. Abigail, orekóva 18 áño heʼi: “Sapyʼánte haʼete nokonveníriva jaʼe la verda, koʼýte ikatútarõ jajei peteĩ situasión ijetuʼúvagui ñandejapúrõ”. ¿Mbaʼérepa siémpre ñañehaʼã vaʼerã jaʼe la verda? Victoria, orekóva 23 áño heʼi: “Ikatu oĩ nemongyhyjeséva ere haguére la verda ha redefende rupi pe añetegua. Péro siémpre iporãve jey la rehupytýva, por ehémplo rejeroviave ndejehe, reñandu reĩ porãveha Jehovándi ha umi nderayhúva katu nderrespetave”. ¿Rehechakuaápa mbaʼérepa siémpre iñimportánte ere la verda? Péicha rejapóramo erekóta ndejehe “pe añetegua haʼeramoguáicha peteĩ sínto”. w18.05 páh. 28 párr. 3, 5

Amáske ivaive ohóvo la situasión, enterovéva ñañatende porã vaʼerã. Jehová ojapóta hembipota itiempoitépe (Mat. 24:42-44). Péro upe aja iporã ñanepasiénsia ha ñaĩ aténto umi mbaʼe oikótavare. Jaleékena Ñandejára Ñeʼẽ káda día ha ñañemboʼe meme (1 Ped. 4:7). Iporãta avei ñañehaʼãramo ñaaprende umi ermáno oservímavagui Jehovápe heta áñore. Upearã ikatu jalee umi ermáno rembiasakue osẽva ñane puvlikasiónpe. Eñehaʼãkena nerembiapo heta Jehová servísiope. Ejapo iporãva ótro rehehápe ha ekomparti ermanokuérandi. Péicha revyʼáta ha rehecháta mbaʼéichapa pyaʼe ohasa la tiémpo (Efes. 5:16). Ñaneimperféktoramo jepe, Jehová oheja jaservi chupe. Haʼe omeʼẽ ñandéve “kuimbaʼekuéra rregáloramo”. Umíva hína umi ansiáno oĩva kongregasiónpe (Efes. 4:8, 11, 12). Umi ansiáno ñandevisita jave, jaaprovecha vaʼerã pe tiémpo ohasáva ñanendive ñaaprende hag̃ua chuguikuéra. Haʼekuéra ningo iñarandu ha omeʼẽ konsého iporãva. w18.06 páh. 24, 25 párr. 15-18

Jesús heʼi vaʼekue idisipulokuérape: “Peikókena che mborayhúpe”. ¿Mbaʼérepa Jesús heʼi chupekuéra upéva? Pórke haʼe oikuaa isegidorkuéra tekotevẽha oaguanta heta mbaʼe ijetuʼúva ohechauka hag̃ua haʼeha kristiáno verdadéro. Jaleéramo Juan 15:4-10 jahecháta Jesús heta vése heʼi hague “pepyta chendive”, ohechauka hag̃ua tekotevẽha ñaaguanta. ¿Mbaʼéichapa ikatu jahechauka jaikoseha siémpre Cristo mborayhúpe ha jaipotaha ñandeguerohory? Jahechaukáta upéva ñaneñeʼẽrendu jave chupe. Jesús núnka ndojeruréi ñandéve jajapo hag̃ua peteĩ mbaʼe haʼe voi ndojapóiva. Haʼe heʼi: “Che ajapóvo pe Túa mandamiénto, aiko imborayhúpe”. Péicha jahecha Jesús siémpre omoĩha la ehémplo (Juan 13:15). Umi mbaʼe Jesús omandáva ou Itúagui. Upévare japredika jave Jesús omanda haguéicha, jahechauka avei jahayhuha Jehovápe (Mat. 17:5; Juan 8:28). Jahechaukáramo jahayhuha Jehovápe ha Jesúspe, haʼekuéra avei ñanderayhúta. w18.05 páh. 18 párr. 5-7

Mitãrusukuéra odesidi vaʼerã heta mbaʼe, por ehémplo mbaʼépa ostudiáta térã mbaʼépepa ombaʼapóta. Reikuaa porãramo mbaʼe mbaʼépa rehupytyse ifasilvéta ndéve redesidi porã hag̃ua. Amáske voive replanea mbaʼe métapa rehupytyse, pyaʼeve rehecháta la rresultádo. Ko yvy tuichakuére oĩ hetaiterei ermáno imitãva ojapóva umi mbaʼe iporãva, ha jaguerohory chupekuéra upe haguére. Haʼekuéra ningo omotenonde Jehovápe, upévare oñehaʼãmbaite ohupyty hetave mbaʼe iservísiope. Koʼã ermáno ovyʼaiterei ha ojapo ikatúva guive iñeʼẽrendu hag̃ua Jehovápe opa mbaʼépe. Por ehémplo, oikuaa hag̃ua mbaʼéichapa oñemaneháta hogapýpe. Salomón heʼi vaʼekue: “Rekonfia vaʼerã Jehováre nde pyʼaite guive”. Upéi heʼi avei: “Ereko vaʼerã enkuénta Ñandejárape opa mbaʼe rejapóvape, ha haʼe ndegiáta reho hag̃ua tape porãre” (Prov. 3:5, 6). Mitãrusukuéra, Jehová penderayhueterei ha omombaʼe la pejapóva. Upévare oñangarekóta penderehe, pendegiáta ha penevendesíta. w18.04 páh. 26 párr. 7; páh. 27 párr. 9

Apóstol Juan haʼe vaʼekue peteĩva umi omoakãva pe kongregasión kristiána ypykue. Haʼe oskrivi kuri Jesús rembiasakue. Pe lívro de Juan ymaite guivéma omokyreʼỹ kristianokuérape, ha koʼág̃a peve ñanemokyreʼỹ. Por ehémplo, upe lívrope añoite heʼi kristianokuéra ojoayhu vaʼerãha, ha upéva ohechauka porãtaha mávapa añetehápe kristiáno tee (Juan 13:35). Umi mbohapy kárta Juan oskrivi vaʼekuépe jatopa heta mbaʼe iporãitereíva. Ñañedesanima jave japeka haguére, jaleéramo “Jesús ruguy [ñanemopotĩha] opaichagua pekádogui” ñanekyreʼỹ jey japytávo (1 Juan 1:7). Ñañeñandu jave kulpávle katu ñanekonsola jaikuaávo “Ñandejára tuichaveha ñane korasõgui” (1 Juan 3:20). Entéro umi eskritór bíblico apytégui, Juan añoite heʼi Ñandejára haʼeha mborayhu (1 Juan 4:8, 16). Pe segunda ha tercera kártape ofelisita kristianokuérape osegi rupi “oiko pe añetegua rapére” (2 Juan 4; 3 Juan 3, 4). w18.04 páh. 18 párr. 14, 15