Marzo

Jalee jave Génesis kapítulo 1 ha 2 jahechakuaa Adán ha Eva oreko hague pe liverta ijojahaʼỹva, koʼág̃a ñande ni nañapensáiva jarekóvo. Chupekuéra ndofaltái vaʼekue mbaʼevete, ndokyhyjéi mbaʼevégui ni ndaipóri otrata vaíva chupekuéra. Adán ha Eva ndojepyʼapýi vaʼekue tembiʼúre, traváhore, ni peichahágui oúrõ g̃uarã hasy térã omano (Gén. 1:27-29; 2:8, 9, 15). Iporã siémpre ñanemanduʼa Jehová añoite orekoha pe liverta ojapo hag̃ua opa mbaʼe ojaposéva. Haʼe ningo okrea vaʼekue entéro mbaʼe, ha avei haʼe hína pe Todopoderóso ha Rréi del univérso (1 Tim. 1:17; Apoc. 4:11). Péro pe liverta oñemeʼẽva entéro umi ótro oikóvape yvágape ha ko yvy ape ári oreko límite. Jehová oipota ñantende porã haʼe añoite ikatuha heʼi ñandéve mbaʼeichagua límitepa ihústo, ñaikotevẽ ha ikatu ñakumpli. Iñepyrũmby guive haʼe omoĩ vaʼekue límite entéro mbaʼe okrea vaʼekuépe. w18.04 páh. 4 párr. 4, 6

Ko múndo añáme ningo ijetuʼueterei heta mbaʼe, ha Jehová ñanepytyvõ rupínte ikatu ñaaguanta (2 Cor. 4:7, 8). Péro ñapensamína mbaʼeichaitépa oiméne ijetuʼu hína umi hénte oĩvape mombyry Ñandejáragui. Jesús ojapoháicha, ñande avei ñambyasy koʼãichagua persónape, ha upéva ñanemomýi ñamombeʼu hag̃ua chupekuéra umi “notísia iporãva omombeʼúva oĩha álgo iporãvéva”. Upévare, ñanepasiénsia vaʼerã ñane estudiantekuérare. Ikatu oime haʼekuéra primera ves ohendu peteĩ enseñánsa oĩva la Bíbliape ha ñande jaikuaa porãmava. Oĩ avei heta ohayhúva voi umi mbaʼe ogueroviáva, ha opensa irrelihión ouniha chupekuéra ihéntendi, ivesinokuérandi ha ikostúmbrere. Jajerure mboyve peteĩ estudiántepe oheja hag̃ua umi kreénsia yma guare, sapyʼánte tekotevẽta ñaipytyvõ raẽ chupe omombaʼe hag̃ua umi enseñánsa ipyahúva chupe g̃uarã. Ikatu hína upépe ae ojedesidi oheja umi mbaʼe oguerovia vaʼekue. Sapyʼánte ningo koʼã mbaʼe oraha tiémpo (Rom. 12:2). w19.03 páh. 23 párr. 10, 12; páh. 24 párr. 13

Jesús ohechakuaa vaʼekue Jehová ohayhuha chupe ha oguerohoryha umi mbaʼe haʼe ojapóva. Ñandejára ehémplo ohechauka ñandéve ñañehaʼã vaʼerãha jahecha mbaʼéichapa ikatu ñamokyreʼỹ ñande rapichápe (Juan 5:20). Ajépa javyʼa peteĩ persóna jahayhúva ohechauka jave ñanderayhuha ha ñandefelisita umi mbaʼe porã jajapóvare. Upéicha avei, ñane ermáno ha ermanakuéra kongregasiónpe ha ñande rogayguakuéra ohechakuaa vaʼerã jahayhuha chupekuéra, ha avei tekotevẽ ñamokyreʼỹ chupekuéra. Jafelisita jave ótrope umi mbaʼe porã ojapóvare ñaipytyvõ hína ojeroviave hag̃ua hikuái ha osegi hag̃ua oservi fiélmente Jehovápe. Umi sy ha túa koʼýte tekotevẽ omokyreʼỹ ifamíliape. Tuakuéra ohechaukárõ umi mitãme añetehápe omombaʼeha la ojapóva hikuái ha ohayhuha chupekuéra, umi mitã osegíta oñehaʼãmbaite ojapo hag̃ua la iporãva. Heʼívo: “Che Raʼy [...] aguerohorýva”, Jehová ohechauka ojeroviaha Jesús ikatutaha kuri ojapo hembipota. Jehová peichaite peve ojeroviárõ Itaʼýrare, koʼýte ñande avei ikatu ñakonfia Jesús okumplipaitetaha la Jehová oprometéva ñandéve (2 Cor. 1:20). Amáske jajepyʼamongeta Jesús rembiasakuére, jaikuaasevéta chupe ha ñanekyreʼỹvéta jasegi hag̃ua iñehémplo (1 Ped. 2:21). w19.03 páh. 8 párr. 3; páh. 9 párr. 5, 6

Jarresivi jave peteĩ rregálo ivaliósova, katuete jaagradeseterei pe persóna omeʼẽ vaʼekuépe ñandéve. Umi israelita katu ndoagradeséi vaʼekue pe liverta Jehová omeʼẽva chupekuéra. Unos kuánto mésente Jehová oguenohẽ rire chupekuéra Egíptogui, haʼekuéra ohechagaʼueterei jeýma umi tembiʼu ha vevída hoʼu vaʼekue upépe. Ojekeha pe manágui, pe aliménto Jehová omeʼẽva chupekuéra. La ivaiveha katu ohose jey hikuái Egíptope. Jehová omeʼẽ kuri umi israelítape liverta oadora hag̃ua chupe, péro chupekuéra g̃uarã umi pira, pepíno, sandía, puérro, sevói ha áho ovaleve vaʼekue pe livertágui. Ndareíri Jehová ipochyeterei hendivekuéra (Núm. 11:5, 6, 10; 14:3, 4). ¿Mbaʼépa ñaaprende upe oiko vaʼekuégui? Pablo heʼi porã vaʼekue entéro kristiánope siémpre oagradese vaʼerãha pe liverta Jehová omeʼẽva Itaʼýra Jesucristo rupive (2 Cor. 6:1). w18.04 páh. 9, 10 párr. 6, 7

Entéronte jaipota umi ótro ñanderayhu ha ñandetrata porã. Péro pyʼỹinte ñapensárõ avave nañanderayhuiha térã jahasáramo algúna inhustísia, ikatu hína ñañandu ndajavaleiha mbaʼeverã ha ndajarekoiha esperánsa. Jehová oikuaa ñaikotevẽha ótro ñanderayhu ha jaipotaha oĩ hustísia. Ani jaduda, haʼe ñanderayhueterei ha oipota enterovéva ñandetrata porã. Upéva ojekuaa porã pe léi haʼe omeʼẽ vaʼekuére Israélpe Moisés rupive. Jastudia jave pe Léi Mosáika, jahechakuaa mbaʼeichaitépa Jehová ñanderayhu (Rom. 13:8-10). ¿Mbaʼérepa jaʼekuaa pe mborayhu omopyendaha pe Léi Mosáika? Pórke pe mborayhu omomýi Jehovápe ojapo hag̃ua opa mbaʼe (1 Juan 4:8). Oĩ ningo mokõi mandamiénto omopyendáva umi mas de 600 léi oĩva. Umíva hína: ehayhu Jehovápe, ha ehayhu nde rapichakuérape (Lev. 19:18; Deut. 6:5; Mat. 22:36-40). Káda uno umi léi ohechauka mbaʼéichapa Jehová ñanderayhu. w19.02 páh. 20, 21 párr. 1-4

Job oñatende vaʼekue mbaʼéichapa otratáta umi kuñanguérape (Job 31:1). Oikuaa kuri naiporãmoʼãiha oikóramo omañaiterei ótro kuñáre. Koʼág̃arupi, ko múndo ñandejopy opáicha rei ñanderekovai hag̃ua. ¿Ñañehaʼãtapa ani hag̃ua ñamañaiterei peteĩ persóna ndahaʼéivare ñane ména térã ñane rembireko? ¿Ñamboykétapa pe pornografía térã oimehaichagua taʼanga ikatúva ñanemoakãraku? (Mat. 5:28). Ñañehaʼãmbaitéramo káda día jajejokokuaa ikatúta jasegi ñandefiél Jehovápe. Job iñeʼẽrendu vaʼekue avei Jehovápe ohecha lájape umi mbaʼerepy. Haʼe oikuaa ojeroviáramo umi mbaʼerepýre ikatuha ofalla vaieterei, ha omeresetaha ojekastiga chupe (Job 31:24, 25, 28). Ñande ningo jaiko peteĩ múndo oñemombaʼetereihápe umi mbaʼerepy. Péro jajapóramo la Biblia heʼíva ha jahecha hekópe porã pe pláta ha umi mbaʼerepy, ñaĩvéta desidído ñandefiél hag̃ua Jehovápe (Prov. 30:8, 9; Mat. 6:19, 20). w19.02 páh. 6 párr. 13, 14

Opa mbaʼe Jesús ojapo vaʼekuére ojekuaa porã Jehová ñanderayhuetereiha (1 Juan 4:8-10). ¿Mbaʼépa omomýi Jesúspe omeʼẽ hag̃ua hekove ñanderehehápe? Haʼe ojapo upéva oporohayhúgui. Enterovéva ñañevenefisia pe sakrifísio Jehová ha Itaʼýra ojapo vaʼekuégui, tahaʼe umi unhído térã “ambue ovechakuéra” (Juan 10:16; 1 Juan 2:2). Pe Konmemorasión ojejapo lájare ojekuaa avei Jesús ohayhu ha imbaʼerechakuaaha idisipulokuérandi. ¿Mbaʼérepa jaʼe upéva? Jesús nomoñepyrũi vaʼekue peteĩ akontesimiénto hasýva ojesegi hag̃ua, síno álgo isensíllova. Péicha haʼe ohechauka ohayhuha umi kristiáno unhídope. Ohasávo pe tiémpo, enterovéva umi unhído tekotevẽ kuri ojapo pe Séna del Señór káda áño, tahaʼe haʼéva la isituasión, sapyʼánte kárselpe jepe (Apoc. 2:10). ¿Iñeʼẽrendúpa hikuái Jesúspe? Si iñeʼẽrendu. Koʼág̃a peve umi kristiáno tee oñehaʼã ogueromanduʼa Jesús omano hague ára. w19.01 páh. 24 párr. 13, 15

Jaagradeseterei Jehovápe ñandelivera haguére pe rrelihión fálsagui. Haʼe ñanepytyvõ rupi jaikuaa pe añetegua ha ndajaroviavéi umi japu ha aguería. Hiʼarive, koʼẽrõitéma ikatúta jahupyty pe “Ñandejára raʼykuéra liverta ijojahaʼỹva” (Rom. 8:21). Koʼag̃aite voi ikatúma hína ndelívre rejapóramo umi mbaʼe Cristo omboʼe vaʼekue (Juan 8:31). Péicha, ‘reikuaáta pe añetegua’ ndahaʼéi rehendu haguérente chugui, reikuaáta upéva reiko rupi la Biblia heʼiháicha. Ko múndope, umi hénte oimoʼãva oiko porãha jepe ndoikoʼaréi. Ndaipóri yvypóra oikuaáva mbaʼépa oikóta chugui amo gotyove (Sant. 4:13, 14). Ha nde, ¿mbaʼépa ikatu rejapo rehupyty hag̃ua ‘pe jeikove añeteguáva’? Redesidi porã vaʼerã, péicha reikovéta opa ára g̃uarã pe múndo pyahúpe (1 Tim. 6:19). Jehová ningo ndoovligái avavépe oservi hag̃ua chupe. Haʼe oheja káda uno odesidi mbaʼépa ojapóta. Upévare, Jehová haʼéramo ne “erénsia” rembaʼapóta káda día reñemoag̃uive hag̃ua hese, ha remombaʼéta entéro umi rregálo haʼe omeʼẽva ndéve (Sal. 16:5; 103:5). Aníkena reduda, Jehová katuete nepytyvõta revyʼa hag̃ua opa árare (Sal. 16:11). w18.12 páh. 28 párr. 19, 21

Entéro kristiáno omombaʼe vaʼerã pe matrimónio Jehová ha Jesús omombaʼeháicha. Péro ñaneimperfékto rupi, sapyʼánte ikatu ojehasa ñandehegui upéva (Rom. 7:18-23). Umi kristiáno ypykue omendáva jepe iprovléma vaʼekue imatrimóniope. Pablo heʼi vaʼekue ‘tembireko ndohejái vaʼerãha iménape’, upéicharõ jepe oĩ vése oiko hague upéva (1 Cor. 7:10). Pablo ndeʼíri vaʼekue mbaʼe provlémapa oñepresenta kuri umi matrimónio ojesepara hag̃ua. Péro ikatu jaʼe ndahaʼéi hague pe ména omoakãratĩ haguére hembirekópe. ¿Mbaʼérepa jaʼe upéva? Pórke upéicharire pe tembireko orekóta kuri váse bíblica ojedivorsia ha omenda jey hag̃ua. Upéva rangue, Pablo heʼi pe tembireko ojeseparáva iménagui ‘opytánte vaʼerãha omendaʼỹre, térã toiko porã jey iménandi’. Jahechaháicha, Ñandejárape g̃uarã peteĩnte gueteri hikuái. Pablo heʼi vaʼekue avei tahaʼe haʼéva provléma oñepresentáva peteĩ matrimóniope, ndahaʼéirõ hekovai haguére peteĩva, ména ha tembireko oñehaʼã vaʼerã oiko porã jey ha osegi oñondive. Umi omendáva ikatu ojerure umi ansiánope oipytyvõ hag̃ua chupekuéra. w18.12 páh. 13 párr. 14, 15

Ñane tiémpope, Ñandejára oipota ñañeamiga hese ha jajapo ikatúva guive japredika hag̃ua pe marandu porã (Mat. 28:19, 20; Sant. 4:8). Oĩ algúno ojapo porãségui heʼíva ñandéve álgo ikatúva ñanemokangy. Por ehémplo, ne patrón ikatu oikuaveʼẽ ndéve reganave hag̃ua, péro reikuaa tekotevẽtaha rembaʼapove ha upéva káusare ndaikatumoʼãi reho meme rreunionhápe ni resẽ repredika. Rehóitirõ koléhiope, ikatu nde profesór oofrese ndéve peteĩ oportunida reho hag̃ua reiko ótro ládo resegi hag̃ua restudiave. Upe moméntope tekotevẽta reñemboʼe, reheka informasión ha reñeʼẽ ótrondi redesidi hag̃ua. ¿Naiporãvéi piko rejepyʼamongeta koʼág̃ama voi Jehová opensávare ikatu hag̃uáicha repensa avei haʼéicha? Péicha, ojeofreséramo ndéve koʼã mbaʼe, ndahaʼemoʼãvéima ndéve g̃uarã peteĩ tentasión. Reikuaáta mbaʼépa rejapo vaʼerã, pórke ja rejedesidíma remotenondetaha Jehová servísio. w18.11 páh. 27 párr. 18

Salomón oñepyrũ vaʼekue ogoverna Israel imitã reheve. Haʼe oñepyrũmíre ogoverna, Jehová ojechauka chupe isuéñope ha heʼi: “Ejerure chéve la reipotáva ha ameʼẽta ndéve”. Salomón ohechakuaa haʼe imitãitiha ha ndoikuaaiha gueteri heta mbaʼe, upévare ojerure Jehovápe: “Chepytyvõmína areko hag̃ua peteĩ korasõ iñeʼẽrendúva ahusga hag̃ua ko nde puévlo” (1 Rey. 3:5-10). Salomón ojerure Jehovápe “peteĩ korasõ iñeʼẽrendúva”. ¡Ajépa iñumildete ojerurévo upéva! Ndareíri ningo Jehová ohayhuete vaʼekue chupe (2 Sam. 12:24). Ñandejára oguerohoryetereígui ko rréi imitãitévape omeʼẽ chupe “peteĩ korasõ iñarandúva ha ontendéva heta mbaʼe” (1 Rey. 3:12). Salomón ifiél aja gueteri, orresivi kuri heta vendisión. Por ehémplo, oreko vaʼekue pe priviléhio omopuʼãvo peteĩ témplo “oñemombaʼeguasu hag̃ua Jehová Israel Jára réra” (1 Rey. 8:20). Hiʼarive, pe rréi ikonosído vaʼekue opárupi Ñandejára omoarandueterei rupi chupe. Avei, umi mbaʼe Salomón heʼi vaʼekue Ñandejára espíritu rupive oñemoĩ mbohapy lívro oĩvape la Bíbliape. Peteĩva umi lívro haʼe hína Proverbios. w19.01 páh. 14 párr. 1, 2

Oĩ ndoipotáiva avave heʼi chupekuéra mbaʼéichapa opensa vaʼerã. Umichagua persóna heʼi jepi: “Che aikuaa la ajapóva”. Amalisia péicha jave heʼise haʼekueraiténte odesidi vaʼerãha la ojapótava, ha orekoha derécho ojapo hag̃ua upéva. Ndoipotái ótro omanda hesekuéra, térã ojopy chupekuéra ojapo hag̃ua entéro ojapoháicha. Ñapensa haguére Jehová opensaháicha, ndeʼiséi ndaikatuveimaha jaʼe la ñapensáva. Segunda a los Corintios 3:17 heʼi: “Oĩháme Jehová espíritu sánto, upépe oĩ liverta”. Jehová oheja jadesidi mbaʼeichagua persónapa oikóta ñandehegui. Enterovéva ningo jareko umi mbaʼe ñandegustáva ha jaiporavo la ñaneinteresáva. Jehová voi ñandeapo péicha. Péro upéva ndeʼiséi pe liverta oñemeʼẽva ñandéve ndorekoiha límite (1 Ped. 2:16). Jehová oipota jajegia Iñeʼẽre jadesidíta jave mbaʼépa oĩ porã ha mbaʼépa oĩ vai. w18.11 páh. 19 párr. 5, 6

Ñañepyrũrõ guare ñaaprende pe añetegua, jahechakuaa vaʼekue Jehová servísio iñimportanteveha umi mbaʼerepýgui, ha javyʼa jahejávo heta mbaʼe pe añetegua rehehápe. Péro amedída ohasa la tiémpo, ikatu jahecha oĩha ojoguáva umi aparáto elektróniko osẽ ramovéva, térã okonsegiha hetave mbaʼe. Péicha jave, ikatu ñañandu ofaltaha ñandéve umíva, ha nañañekontentavéi umi mbaʼe jarekóvarente. Ikatu voi ñañepyrũ ñañehaʼãve ñakonsegi hag̃ua umi mbaʼerepy ha ñambotapykue Jehová servísio. Demas rehe oiko vaʼekue upéva “ohayhu rupi ko múndo”. Upéicha rupi oheja rei pe asignasión orekóva apóstol Páblondi. ¿Noiméi piko haʼe omombaʼeve rakaʼe umi mbaʼerepy Ñandejára servísiogui? Ikatu kuri oiko hese upéva, ỹrõ katu noñehaʼãsevéi osegi hag̃ua oservi Páblondi. ¿Mbaʼépa ñaaprende ko ehémplogui? Ikatu oime anteve ñamombaʼeterei vaʼekue umi mbaʼerepy. Péro nañañatendéiramo, ikatu hína ñandegustaiterei jey umíva ha ipahápe jaju nañamombaʼevéi pe añetegua. w18.11 páh. 10 párr. 9

Satanás ningo oporoperhudikase vaʼekue, pórke oikuaa Eva ogueroviárõ la heʼíva ha hoʼúramo pe yva omanotaha. Amo ipahápe Eva naiñeʼẽrendúi Jehovápe ha Adán upéichante avei, upévare kon el tiémpo omano hikuái (Gén. 3:6; 5:5). Upe rire, Adán opeka rupi “pe ñemano ohupyty entéro kuimbaʼépe”. Añetehápe “pe ñemano ogoverna enterovépe ndopekáiramo jepe hikuái Adán ojapo haguéicha” (Rom. 5:12, 14). Upévare koʼág̃a nañandeperféktoi ha ndajaikói opa árare Ñandejára oipota haguéicha iñepyrũme. Upéva rangue “70 áñonte” jaikove térã “umi imbaretemiéva ohupyty jepi 80 áño”, hiʼarive jaikove aja heta ñaneprovléma ha jahasa asy (Sal. 90:10). Entéro koʼã mbaʼe oiko Satanás ijapu rupi. Jesús heʼi vaʼekue Satanás omboyke hague “pe añetegua, ndaijaʼéigui pe añeteguáre” (Juan 8:44). Satanás ningo nokambiái, upéva rangue ombotavy hína “ko múndo kompletoitépe” (Apoc. 12:9). Péro ñande ndajaipotái Satanás ñanembotavy. w18.10 páh. 6, 7 párr. 1-4

Ñañehaʼãramo jaiko hag̃ua pyʼaguapýpe enterovéndi ikatúta javyʼa. Disípulo Santiago oskrivi vaʼekue: “Umi hénte ojogueraha porãva ótrondi oñehaʼã hína oĩ hag̃ua pyʼaguapy, ha upéicha rupi haʼekuéra ojapo iporãva” (Sant. 3:18). Ijetuʼúramo jajogueraha porã hag̃ua ótrondi kongregasiónpe térã ñande rogapýpe, jarrogákena Jehovápe tañanepytyvõ jaiko hag̃ua pyʼaguapýpe. Péicha Jehová ikatúta omeʼẽ ñandéve ijespíritu sánto ñanepytyvõtava ñamehora hag̃ua ñande lája ha javyʼavéta. Jesús ohechauka vaʼekue mbaʼeichaitépa iñimportánte ñañehaʼã jaiko pyʼaguapýpe heʼírõ guare: “Regueraha jave nde jopói pe altárpe nemanduʼáramo ne ermáno ipochyha nderehe, eheja nde jopói pe altár renondépe, ha tereho eñemoĩ porã raẽ ne ermánondi, upéi ae eju emeʼẽ nde jopói” (Mat. 5:23, 24). w18.09 páh. 21 párr. 17

Jesús omensiona vaʼekue pe mborayhu 30 véserupi pe último pyhare ohasávape idisipulokuérandi. Haʼe heʼi idisipulokuérape tekotevẽha ojoayhu hikuái (Juan 15:12, 17). Enterovéva ohechakuaa vaʼerã Jesús segidorkuéra ojoayhuha. Péicha umi hénte oikuaáta añetehápe haʼeha hikuái Jesús disípulo (Juan 13:35). Pe mborayhu Jesús oñeʼẽ vaʼekuére ndahaʼéi peteĩ sentimiénto reínte. Pe mborayhu añeteguáva ipoderóso ha ojekuaa ñaime rupi dispuésto jajapóvo sakrifísio ótro rehehápe. Jesús heʼi vaʼekue: “Ndaipóri mborayhu tuichavéva kóvagui: ñameʼẽ ñande rekove ñane amigokuéra rehehápe. Peẽ hína che amígo, pejapóramo che haʼéva” (Juan 15:13, 14). Jehová siervokuéra jajekuaa opárupi jajoayhu añete haguére ha ñaĩ rupi dispuésto jajesakrifikávo ñane ermanokuérare. Avei imbareteterei pe unida oĩva ñande apytépe (1 Juan 3:10, 11). Entéro kristiáno ñañehaʼã jajoayhu tahaʼe haʼéva ñane nasionalida térã trívu ha pe idióma ñañeʼẽva. Avei noimportái moõguipa jaju térã mbaʼe kostúmbrepa ojeguereko pe lugár jakakuaa haguépe. Ko yvy tuichakuére Jehová siervokuéra ojoayhu añete. w18.09 páh. 12 párr. 1, 2

Jehová oipota isiervokuéra oñangareko hogayguakuérare. Por ehémplo, oĩ umi tekotevẽva ombaʼapo omantene hag̃ua ifamíliape. Heta sy opyta hógape oñatende hag̃ua imemby michĩvévare. Oĩ avei kristiáno tekotevẽva okuida ituakuéra ijedávare. Koʼã mbaʼe ningo iñimportanteterei jajapo. Jaguerekóramo heta rresponsavilida ñande rogapýpe, ikatu hína nahembyvéi ñandéve tiémpo jajapo hag̃ua entéro mbaʼe jajaposéva Jehová servísiope. Péro ani ñañedesanima. Jehová ovyʼa ñamoĩ jave ñane famíliape umi mbaʼe oikotevẽva (1 Cor. 10:31). Ndajarekóiramo pe rresponsavilida jakuida hag̃ua ñande rogayguakuérare, ikatu ñaipytyvõ umi ermáno hasývape térã ijedávape, ỹrõ umi oikotevẽvape ajúda ótro hendáicha. Ikatu avei ñaipytyvõ umi oñangarekóvape hesekuéra. ¿Oĩ piko ñane kongregasiónpe algúno oikotevẽva ñaipytyvõ chupe? Jajapóramo koʼã mbaʼe, ikatu hína ñaipytyvõ Jehovápe ombohovái hag̃ua peteĩ persónape iñemboʼe (1 Cor. 10:24). w18.08 páh. 24 párr. 3, 5

Ñapensamína José ohasa vaʼekuére. Itúa Jacob ningo ohayhuve vaʼekue chupe umi ótro itaʼýragui. Upévare iñermanokuéra oenvidia chupe ha ovende Josépe esklávoramo orekórõ guare 17 áño (Gén. 37:2-4, 23-28). Haʼe ohasa asyeterei vaʼekue 13 áñore Egíptope kómo esklávo ha pe kárselpe. Hiʼarive oĩ mombyry itúa ohayhuetévagui. ¿Mbaʼépa oipytyvõ Josépe ani hag̃ua ojedesespera ni oñamarga ko situasiónpe? José ohasa asýrõ guare kárselpe, katuete opensa meméne raʼe mbaʼéichapa Jehová heta vésema oipytyvõ chupe (Gén. 39:21; Sal. 105:17-19). Avei, oime vaʼerã haʼe imanduʼa umi visión Ñandejára ohechauka vaʼekuére chupe iképe imitãrusúrõ guare. Upéva oipytyvõne raʼe chupe ani hag̃ua oduda Jehová oĩha ijykére (Gén. 37:5-11). Oime vaʼerã José oñemboʼe meme avei Jehovápe ha omombeʼupaite chupe umi mbaʼe orekóva ipyʼapýpe (Sal. 145:18). Jehová ombohovái iñemboʼe, pórke oipytyvõ chupe ojerovia hag̃ua oĩtaha ijykére toiko la oikóva. w18.10 páh. 28 párr. 3, 4

Sapyʼánte ikatu jahusga ñande rapichápe imboriahu térã ipláta haguérente. ¿Mbaʼéichapa ikatu oiko upéva? Espíritu sánto rupive, Salomón oskrivi vaʼekue pe jatopáva pe téxto koestediaguápe, ha ñambyasýramo jepe, upéva pyʼỹinte oiko. ¿Mbaʼépa ñaaprende ko téxtogui? Nañañatendéiramo, ikatuha jaiporavo ñane amigorã umi ermáno iplátavapente péro ndajajeheʼaguasúi umi imboriahúvare. ¿Mbaʼérepa ipeligróso jahusga umi héntepe imboriahu térã ipláta haguére? Pórke ikatu hína ñambyai pe unida oĩva kongregasiónpe. Síglo primérope oiko mimi vaʼekue upéva umi kongregasiónpe. Upévare Santiago oakonseha kuri umi kristiánope upe situasiónre (Sant. 2:1-4). Ñane tiémpope avei, ñañehaʼãmbaite vaʼerã ani hag̃ua ñambyai pe unida oĩva ñande apytépe ha ani hag̃ua jahusga ótrope umi mbaʼe orekóvare térã ipíntarente. w18.08 páh. 10 párr. 8-10

Jatrata lájare ñane ermanokuérape ojekuaáta ñamombaʼépa añete ñane amista Jehovándi. Haʼekuéra ningo Jehová mbaʼe hína, ñandéicha avei. Ñanemanduʼa meméramo upévare, siémpre jatrata porãta ha jahayhúta chupekuéra (1 Tes. 5:15). ¿Iñimportánte piko añete upéva? Jesús heʼi vaʼekue isegidorkuérape: “Péicha pejoayhúramo, enterove ohechakuaáta peẽ haʼeha che disípulo” (Juan 13:35). Malaquías heʼi kuri Jehová osegiha “ohendu ha oñatende” mbaʼéichapa ojotrata isiervokuéra (Mal. 3:16). “Jehová oikuaa umi imbaʼévape” (2 Tim. 2:19). Haʼe oraha enkuénta entéro mbaʼe jaʼéva ha jajapóva (Heb. 4:13). Por ehémplo, Jehová ohecha ndajatrataporãi jave ñane ermanokuérape. Péro avei ohecha jarresivi porã jave chupekuéra, ñandepojera, ñaperdona ha ñanembaʼeporãrõ (Heb. 13:16). w18.07 páh. 26 párr. 15, 17

Ndaipóri ótro ipoderósova, iñarandúva, ha ñanderayhúva Jehováicha. Upévare jahechaukáta ñanearanduha ñañemoag̃uíramo hese. Añetehápe, enterovéva ñaneñeʼẽrenduse Ñandejárape ha ñaĩse ijykére (Sal. 96:4-6). Upéicharõ jepe, oĩ umi oservi vaʼekue Jehovápe péro upéi ou naiñeʼẽrenduvéi chupe. Ñapensamína Caín situasiónre. Haʼe ndoadoráiramo jepe umi ñandejára guaʼúpe, Jehová ndoaseptái pe adorasión omeʼẽva chupe. ¿Mbaʼérepa? Pórke Ñandejárape ndogustái la ohecháva Caín pyʼapýpe (1 Juan 3:12). Upévare Jehová heʼi chupe: “¿Che piko ndoroguerohorymoʼãi mbaʼe reñehaʼãrõ rejapo pe iporãva? Péro rejaposéramo ivaíva, pe pekádo neraʼarõma hína nde raperãme peteĩ animál ñarõicha, ¿ha ikatúta piko ndepuʼaka hese?” (Gén. 4:6, 7). Jehová ohechauka porã Caínpe oñarrepenti ha oñemoĩramo ijykére, haʼe avei opytataha ijykére. Péro Caín nohendúi Ñandejárape. w18.07 páh. 17 párr. 1, 3; páh. 18 párr. 4

Japredika ha jajapo jave disípulo, jaheja hína ohesape pe lus jarekóva (Mat. 28:19, 20). Péro, ndahaʼéi pe predikasiónte la ombotuicháva Jehovápe, síno avei mbaʼéichapa ñañekomporta japredika jave. Heta persóna ohechakuaa upéva ñanderehe. Ñanderory ha ñaneamávlerõ jasaluda jave chupekuéra, ikatu hína opensa porã hikuái ñanderehe ha avei Jehováre. Jesús heʼi vaʼekue idisipulokuérape: “Peg̃uahẽvo peteĩ ógape, pesaluda umi hénte oikóva pe ógape” (Mat. 10:12). Umi lugár Jesús opredika haguérupi, umi hénte ojepokuaámi omog̃uahẽ hógape umi extráñope. Péro koʼág̃arupi heta lugárpe umi hénte ndojepokuaavéi ojapo upéva. Pyʼỹinte oĩ inerviósova ha ipochýva voi algún extráño og̃uahẽ jave hógape. Péro ñande ñaneamávleramo, ikatu hína itrankilomie hikuái. Ñanderory ha jasaluda porãrõ umi héntepe japredika jave pe karríto reheve, ikatu upéva omomýi chupekuéra oñemongeta hag̃ua ñanendive. w18.06 páh. 22 párr. 4, 5

Apóstol Pedro ohasa vaʼekue tiémpo sólamente umi judíondi. Péro upéi Ñandejára ohechauka porã kristianokuéra nomboykéi vaʼerãha avavépe, ha Pedro oho opredika Cornéliope, haʼéva peteĩ soldádo rrománo (Hech. 10:28, 35). Upe rire Pedro ohasa avei tiémpo ha okaru umi kristiáno ndahaʼéivandi judío. Péro unos kuánto áño upe rire siuda de Antioquíape, haʼe ndokaruvéi kuri umi kristiáno ndahaʼéivandi judío (Gál. 2:11-14). Upévare Pablo okorrehi Pédrope, ha haʼe oasepta la ikonsého. ¿Mbaʼéichapa jaikuaa upéva? Pórke Pedro oskrivírõ guare pe primera kárta umi kristiáno judío ha ndahaʼéivape judío oĩva Asia Menórpe, heʼi mbaʼeichaitépa iñimportánte jahayhu entéro ermanokuérape (1 Ped. 1:1; 2:17). Jesús ehémplo oipytyvõ umi apóstolpe ohayhu hag̃ua “opaichagua héntepe” (Juan 12:32; 1 Tim. 4:10). Haʼekuéra mbeguekatúpe okambia opensa lája hapichakuérare. Umi kristiáno oñemonde pe ‘kondúkta pyahúgui’ ha nomboykéi avavépe, pórke Ñandejára avei ndojapói upéva (Col. 3:10, 11). w18.06 páh. 11 párr. 15, 16

Pe chaléko de metál oipurúva umi soldádo romano ikatu kuri ojejapo chápa de metálgui. Upearã ojeprepara unos kuánto chápa ipukúva ha ojekoloka ipekuévo. Pe soldádo okontrola meme vaʼerã ohecha hag̃ua oĩmbápa ilugárpe umi chápa pórke péicha oprotehe ikorasõ ha ótro órgano iñimportánteva. Jehová mandatokuéra oprotehe ñane korasõ térã umi mbaʼe ñapensáva ha ñañandúva. Imandamientokuéra ihústova ikatu ñakompara pe chaléko de metál rehe (Prov. 4:23). Peteĩ soldádo arakaʼeve nokambiáiva la ichaléko de metál ótro chaléko ojejapóvare metál ikangyvévagui. Péicha avei, ñande núnka nañakambiái vaʼerã la Jehová heʼíva umi mbaʼe ñande ñapensávare. ¿Mbaʼérepa? Pórke ñandejehegui rei ndaikatumoʼãi japrotehe ñane korasõ (Prov. 3:5, 6). Upévare pyʼỹinte ñakontrola vaʼerã ñande “chaléko de metál” jahecha hag̃ua oprotehépa hína ñane korasõ. Amáske ñamombaʼe la ñaaprendéva Ñandejáragui ifasilvéta avei ñandéve japrotehe hag̃ua ñande pytiʼa, upéva jajapóta jaikóramo Ñandejára omandaháicha (Sal. 111:7, 8; 1 Juan 5:3). w18.05 páh. 28 párr. 3, 4, 6, 7

Moisés ningo siémpre omotenonde pe puévlope ha ogia porã chupekuéra umi áño ohasa vaʼekuépe, upéicharõ jepe umi israelita oñepyrũ ojeplagea. Péro ndahaʼéi ojeplageánteva hikuái ndahiʼýi haguére, síno oñemoĩ voi ojekeha Moisés kóntrape, haʼeramoguáicha ikúlpa ndaipóri haguére y (Núm. 20:1-5, 9-11). Moisés ipochyeterei kuri ha upe moméntope ou ndojejokovéi ha okapu umi israelítare. Haʼe oñepyrũ osapukái chupekuéra ha ontendeka haʼe voi ojapotaha peteĩ milágro. Jehová omanda kuri chupe oñeʼẽnte hag̃ua pe ita guasúpe, péro upéva rangue Moisés oinupã 2 vése pe ita ha oñepyrũ osẽ heta y chugui. Ipochy ha oñembotuicha rupi ou kuri tuichaiterei ojavy (Sal. 106:32, 33). Moisés ndojejokokuaái rupi upe moméntope, operde kuri pe oportunida oike hag̃ua pe Tiérra Prometídape (Núm. 20:12). ¿Mbaʼe mbaʼépa ikatu ñaaprende Moisés ehémplogui? Primero, ñañehaʼãmbaite vaʼerãha siémpre ñanevuéno ha ñaneumílde. Jajúramo sapyʼaitemi jepe japerde upéva, ikatu ñañembotuicha ha upe haguére jaʼe térã jajapo vyrorei. Segundo, oiméramo ñañekevranta ha ñanekaneʼõiterei ikatu hína ndajajejokokuaavéi, upévare ñañehaʼã vaʼerã siémpre ñandepyʼaporã, jahasáramo jepe heta mbaʼe ijetuʼúva. w19.02 páh. 12, 13 párr. 19-21

¿Haʼépa peteĩ kárga ñandéve g̃uarã pe predikasión? Ni mbaʼevéicharõ. Jesús omoĩ rire pe ehémplo oñeʼẽva pe parrál mátare, heʼi japredikáramo javyʼataha haʼe ovyʼaháicha (Juan 15:11). ¿Mbaʼérepa? Jesús heʼi ijehe haʼeha pe parrál máta ha idisipulokuéra katu pe parrál rakã (Juan 15:5). Umi parrál rakã oĩramo pe parrál mátare añoite ikatúta orresivi pe y ha ambue mbaʼe oikotevẽva. Ñande avei javyʼaséramo Jesús ovyʼaháicha, tekotevẽ jaiko peteĩ ñeʼẽme hendive ha jasegi iñehémplo. Jajapóramo koʼã mbaʼe, javyʼáta jajapo rupi Ñandejára rembipota (Juan 4:34; 17:13; 1 Ped. 2:21). Peteĩ ermána hérava Hanne oservíva de prekursóra mas de 40 áñoma heʼi: “Siémpre añeñandu porã asẽ rire apredika. Upéva chemokyreʼỹ asegi hag̃ua aservi Jehovápe”. Jahechaháicha, javyʼáramo jasegíta japredika la majoría umi hénte nañanerenduséiramo jepe (Mat. 5:10-12). w18.05 páh. 17 párr. 2; páh. 20 párr. 14

Posívlemente apóstol Pablo la hetave mbaʼe ojapo vaʼekue omokyreʼỹ hag̃ua umi ermánope. Pe espíritu sánto omondo chupe opredika hag̃ua umi griego, rrománo ha ambueichagua persónape oadoráva heta dióspe (Gál. 2:7-9). Pablo heta oviaha vaʼekue pe lugár koʼág̃a héravare Turquía, ha avei Grecia ha Itáliare. Haʼe opredika umi ndahaʼéivape judío oikóvape umi lugár rupi, ha omoñepyrũ heta kongregasión. Ijetuʼu vaʼekue umi kristiáno pyahu situasión, pórke umi hetãygua opersegi chupekuéra. Upéicha rupi haʼekuéra oikotevẽ kuri ánimo (1 Tes. 2:14). Amo áño 50-pe rupi, Pablo oskrivi peteĩ kárta omokyreʼỹva pe kongregasión pyahúpe oĩva Tesalónicape. Haʼe heʼi: “Akóinte roagradese Ñandejárape oremanduʼa jave penderehe ore ñemboʼépe, ha oremanduʼa meme ñande Ru Ñandejára renondépe pe tembiapo pejapóvare pende jerovia rupive; mbaʼeichaitépa peñehaʼã peporohayhu rupi, ha peaguanta heta mbaʼe” (1 Tes. 1:2, 3). Avei ojerure chupekuéra oñomokyreʼỹ hag̃ua heʼívo: “Pesegíkena peñomokyreʼỹ ha peñomombarete” (1 Tes. 5:11). w18.04 páh. 18, 19 párr. 16, 17

Umi mitãrusu ha mitãkuña oñehaʼãva omotenonde umi mbaʼe Jehová oguerohorýva, oñeʼẽséta hese umi héntepe oikuaa hag̃ua chupe. Pe predikasión oĩ vaʼerã umi mbaʼe iñimportantevéva apytépe. ¿Ikatúpa reñehaʼã repredikave? ¿Ndaijáipa ndéve rejapo nde prekursorádo? Oimérõ nanekyreʼỹguasúi repredika hag̃ua, ¿mbaʼépa ikatu rejapo? ¿Mbaʼéichapa ikatu reexplika porãve umi mbaʼe regueroviáva? Oĩ mokõi mbaʼe ikatúva nepytyvõ: ejeprepara porã ha ani eheja ohasa rei peteĩ oportunida reñeʼẽ hag̃ua Jehováre. Rejapóramo péicha, rehecháta mbaʼeichaitépa revyʼáta repredika jave. Iporãta rejepreparáramo rembohovái hag̃ua umi mbaʼe ikatúva oporandu ndéve ne kompañerokuéra, por ehémplo mbaʼérepa rejerovia Ñandejárare. Rembohovái hag̃ua ko porandu ikatu nepytyvõ umi artíkulo osẽva jw.org-pe. Upépe oĩ peteĩ párte hérava “Ponlo por escrito”. Ipype retopáta ko pregúnta: “¿Qué razones tengo para creer en Dios?”. Ikatu resegi umi konsého oĩva upépe reprepara hag̃ua umi mbaʼe erétava ótrope. w18.04 páh. 27 párr. 10, 11

Pe liverta oñemeʼẽva Adán ha Évape ningo oreko vaʼekue límite. Por ehémplo, haʼekuéra tekotevẽ kuri orrespira, okaru ha oke. Amo ipahápe koʼã mbaʼe haʼe vaʼekue límite oñemoĩva chupekuéra. ¿Péro heʼisépa upéva Adán ha Eva ndailívrei hague? Nahániri. Jehová ojeasegura ikatu hag̃uáicha ovyʼa ha oñeñandu porã hikuái ojapóvo koʼã mbaʼe oikotevẽva (Sal. 104:14, 15; Ecl. 3:12, 13). Jehová omanda vaʼekue Adán ha Évape ifamília hag̃ua hikuái, omyenyhẽ hag̃ua ko yvy ha oñangareko hag̃ua hese. ¿Ikatúpa jaʼe ko mandáto káusare ndailívrei hague hikuái? ¡Nahaniriete voi! Omeʼẽ guei chupekuéra oportunida omoporã hag̃ua ko yvy tuichakue oiko peve chugui peteĩ paraíso. Avei ikatúta kuri oiko pype vyʼápe ifamiliakuérandi haʼétava perfékto. Upéva ningo la Ñandejára oipota vaʼekue (Sal. 127:3, Is. 45:18). Adán ha Eva iñeʼẽrendúrire Jehovápe, oikóta kuri vyʼápe imatrimóniope ha ifamiliakuérandi. w18.04 páh. 4, 5 párr. 4, 7, 8

Ñanepasiénsiarõ umi héntere predikasiónpe, nañahaʼarõmoʼãi ontende térã oasepta hikuái pe añetegua primera ves ohendúpema voi. Por ehémplo, ñapensamína mbaʼéichapa ikatu ñamyesakã ótrope pe esperánsa jaikotaha opa árare peteĩ paraísope ko yvy ape ári. Heta oĩ oimoʼãva ñamano vove ndaiporiveimaha esperánsa, térã ikatu opensa umi hénte ivuénova ohotaha yvágape. Peteĩ ermáno omombeʼu mbaʼépa ojapo jepi upearã. Ñepyrũrã olee Génesis 1:28 ha oporandu pe ogajárape moõpa ha mbaʼéichapa Ñandejára oipota kuri oiko yvyporakuéra. Heta oĩ ombohováiva: “Vyʼápe ko yvy ape ári”. Upéi olee Isaías 55:11 ha oporandu oimépa Ñandejára volunta okambiáma. Hetave vése umi ogajára orresponde nokambiaiha la Ñandejára oipotáva. Upéi olee Salmo 37:10, 11 ha oporandu mbaʼéichapa yvyporakuéra oikóta amo gotyove. Péicha pe ermáno oipytyvõma heta persónape, ha umi hénte ontende Ñandejára oipotaitiha umi ivuénova oiko pára siémpre peteĩ paraísope ko yvy ape ári. w19.03 páh. 24 párr. 14, 15; páh. 25 párr. 19

Jehová ohechauka porã ñandéve oipotaha ñaneñeʼẽrendu Itaʼýrape. Jesús mborayhúpe omboʼe vaʼekue idisipulokuérape mbaʼéichapa opredika vaʼerã, ha heʼi jey jey vaʼekue chupekuéra oĩ hag̃ua alérta (Mat. 24:42; 28:19, 20). Jesús omokyreʼỹ avei umi hemimboʼekuérape oñehaʼãmbaite hag̃ua Jehová servísiope ha ani hag̃ua oñentrega (Luc. 13:24). Haʼe omboʼe kuri avei chupekuéra iñimportanteha ojoayhu, iñunído ha iñeʼẽrendu chupe (Juan 15:10, 12, 13). Koʼã konsého ningo koʼag̃aite peve osegi ñanepytyvõ. Jesús heʼi vaʼekue: “Opavave oĩva pe añetegua ykére ohendu che ñeʼẽ” (Juan 18:37). Jahechauka hína ñaneñeʼẽrenduha ‘jasegíramo ñañoaguanta ha ñañoperdona ñande pyʼaite guive’ (Col. 3:13; Luc. 17:3, 4). Jahechauka avei ñaneñeʼẽrenduha, kyreʼỹme japredikáramo umi notísia porã “tahaʼe iporã térã ivai jave” (2 Tim. 4:2). w19.03 páh. 10 párr. 9, 10