Agosto

Umi rreuniónpe pyʼỹinte ojeʼe la Ñandejára ha Itaʼýra ojapo vaʼekue ñanderehehápe. Jaagradesetereígui ko mbaʼe, káda día ñañehaʼã jaguata Jesús pyporére (2 Cor. 5:14, 15). Ñande pyʼaite guive ñamombaʼeguasuse Jehovápe omeʼẽ haguére Itaʼýra ñanderehehápe. Ñakomentávo ñande pyʼaite guive rreunionhápe jahechauka hína ñamombaʼeha la Jehová ojapo vaʼekue. Ikatu jahechauka mbaʼeichaitépa jahayhu Jehová ha Itaʼýrape ñaime haguére dispuésto jajapóvo sakrifísio hesehapekuéra. Sapyʼánte tekotevẽ ñambohovái heta mbaʼe jaha hag̃ua rreunionhápe. Por ehémplo, pyʼỹinte umi kongregasión oreko rreunión peteĩ óra umi ermáno ouha itravahohágui, upévare heta oĩ ikaneʼõva pe rreunión orarã. Ojereko avei pe ótro rreunión fin de semanakue, upéicha rupi ñande ñañembyaty jepi umi ótro hénte opytuʼu jave. ¿Ohechakuaápa Jehová jahaha rreuniónpe oimérõ jepe ñanekaneʼõ? Katuete haʼe ohechakuaa upéva. Amáske ñambohovái hetave provléma jaservi hag̃ua chupe, Jehová omombaʼeve la jajapóva jahayhúgui chupe (Mar. 12:41-44). w19.01 páh. 29 párr. 12, 13

Jesús ohasa vaʼekue avei umi situasión ijetuʼúva ohasáva umi hénte. Por ehémplo, amalisia haʼe okakuaa vaʼekue peteĩ família imboriahúvape. Haʼe ombaʼapo kuri ituanga Joséndi, péicha oaprende mbaʼépa heʼise ñambaʼapo pohýi (Mat. 13:55; Mar. 6:3). Posívlemente José omano kuri Jesús omoñepyrũ mboyvemi ipredikasión. Upévare Jesús oikuaáne raʼe avei mbaʼépa heʼise japerde peteĩ jahayhúvape. Avei hogapýpe oĩ kuri ndoroviáiva la haʼe ogueroviáva (Juan 7:5). Koʼã mbaʼe oipytyvõne raʼe Jesúspe ontende hag̃ua umi mbaʼe ijetuʼúva ohasáva umi hénte. Jesús ojapo vaʼekue avei milágro, ha péva koʼýte ohechauka porã kuri oñeinteresaha umi héntere. Péro haʼe ndahaʼéi ojapóva umi milágro ojapo vaʼerãgui reínte, síno “oiporiahuvereko” umi ohasa asývape (Mat. 20:29-34; Mar. 1:40-42). Jesús oñemoĩ vaʼekue umi persóna lugárpe ha upévare oipytyvõse chupekuéra (Mar. 7:32-35; Luc. 7:12-15). w19.03 páh. 16 párr. 10, 11

Epensamíntena mbaʼeichaitépa oiméne Jesús ojepyʼapy raʼe pe pyhare haʼe omano mboyve. ¿Osegítapa kuri ifiél ipahaite peve? Ndojapóiramo upéva, hetaiterei hénte ndorekomoʼãi la esperánsa oiko hag̃ua pára siémpre (Rom. 5:18, 19). Hiʼarive, umi mbaʼe ojapóva rupive ikatúta omopotĩ térã omongyʼa Itúa réra (Job 2:4). Upe pyhare, Jesús ha iñamigokuéra osena hína kuri oñondivepa, péro upeichahágui umi apóstol oñepyrũ “ojodiskuti vaipa” oikuaaségui “mávapa hína pe tuichavéva ijapytepekuéra”. Upéicharõ jepe, jahecharamoiterei mbaʼéichapa Jesús ndaipochýi ijapostolkuérandi. Upéva rangue, haʼe oñemoñeʼẽ chupekuéra trankílo porãnte ha oexplika jey mbaʼéicha vaʼerãpa hikuái. Upéi ofelisita iñamigokuérape ifiél haguére ha osegi rupi ijykére sapyʼánte ijetuʼúramo jepe (Luc. 22:24-28; Juan 13:1-5, 12-15). Jasegi vaʼerã Jesús ehémplo ha nañandepochyreíri oĩramo jepe heta mbaʼe ñanekevrantáva, ha jajapóta upéva ñanemanduʼáramo entéronte ikatuha jaʼe térã jajapo peteĩ mbaʼe ombopochýva ótrope (Prov. 12:18; Sant. 3:2, 5). Iporãta avei siémpre jafelisitáramo ótrope umi mbaʼe porã ojapóvare (Efes. 4:29). w19.02 páh. 11, 12 párr. 16, 17

Oñemboja reietéramo peteĩ persónare ojapo hague álgo ivaíva, pe Léi Mosáika ikatu vaʼekue oipytyvõ chupe ojekuaa hag̃ua japuha la ojeʼéva hese. ¿Mbaʼéichapa ojejapo vaʼerã upéva? Pe persóna ojeakusáva oreko derécho oikuaávo mávapa la oakusáva chupe (Deut. 19:16-19; 25:1). Upéi, ojeʼe mboyve hese haʼeha kulpávle, oĩ raẽ vaʼerã por lo méno mokõi testígo oñeʼẽva ikóntrape (Deut. 17:6; 19:15). Péro, ¿mbaʼépa oikóta añetehápe oĩramo ojapóva álgo ivaíva ha peteĩ testígonte oĩ? Pe persóna nopensái vaʼerã osẽmaha igústope, pórke Jehová ohechapaite kuri la ojapo vaʼekue. Jehová ningo siémpre ihústo, péicha omoĩ pe ehémplo iporãvéva. Avei opremia umi ifiélvape, péro okastiga umi oipuru vaívape ijautorida (2 Sam. 22:21-23; Ezeq. 9:9, 10). Ikatu oĩ umi hembiapo vaíva ha haʼetévaicha la ndojekastigáiva voi chupekuéra, péro Jehová ohusgáta umívape itiempoitépe (Prov. 28:13). Ha noñarrepentíriramo katu, hoʼa vaietereíta chupekuéra orresivi vove “Ñandejára oikovéva kastígo” (Heb. 10:30, 31). w19.02 páh. 23, 24 párr. 20, 21

Moisés siémpre oheka vaʼekue Jehová gía. Añetehápe haʼe oiko “ohecharamoguáicha Upe ikatuʼỹvape jahecha” (Heb. 11:24-27). Umi israelita og̃uahẽ mboyve mónte Sinaípe, oñepresenta peteĩ provléma. Hiʼarive upérõ ndohasáiti ni 2 mése osẽ hague hikuái Egíptogui. Umi israelita oñepyrũ ojeplagea ndaipóri haguére y, ha ipochyetereígui ojekeha hikuái Moisésgui. Upévare haʼe heʼi Jehovápe: “¿Mbaʼéiko la ajapomítava chuguikuéra? ¡Ag̃aiténtema koʼã hénte chejapíta itápe ha chejukáta!” (Éx. 17:4). Jehová heʼi porã Moiséspe mbaʼépa ojapo vaʼerã. Omanda chupe oinupã hag̃ua ivastónpe peteĩ ita guasu oĩva Horébpe ikatu hag̃uáicha osẽ chugui y. “Moisés ojapo upeichaite umi kuimbaʼe omoakãva Israel renondépe”. Péicha umi israelita orekóma heta y hoyʼu hag̃ua, ha oñesolusiona la provléma (Éx. 17:5, 6). w18.07 páh. 13 párr. 4, 5

Jehová ñanderayhúgui ojevale avei pe kongregasiónre ñanepytyvõ hag̃ua. Jahayhúramo ñane ermáno ha ermanakuérape jahechauka hína jahayhuha Jehovápe. Upéicharõ, jajapo vaʼerã ikatúva guive ñaipytyvõ hag̃ua ñane ermanokuérape, péicha ohechakuaáta hikuái ñamombaʼeha chupekuéra ha Jehová ohayhuha enterovépe (1 Juan 4:19-21). Apóstol Pablo oskrivi vaʼekue: “Pesegíkena peñomokyreʼỹ ha peñomombarete, pejapoháicha voi peikóvo” (1 Tes. 5:11). Péro ndahaʼéi umi ansiáno añónte la oporopytyvõ vaʼerã. Káda ermáno ikatu ohaʼanga Jehová ha Jesúspe okonsoláramo iñermáno ha iñermanakuérape (Rom. 15:1, 2). Umi ñane ermáno oñedeprimíva térã oñeñandu vaietereíva ikatu hína oikotevẽ okonsulta doktórpe ha hoʼu medikaménto (Luc. 5:31). Umi ansiáno ha umi ótro ermáno oĩva kongregasiónpe ohechakuaa vaʼerã haʼekuéra ndahaʼeiha doktór. Upéicharõ jepe iñimportanteterei oñehaʼã oipytyvõ ha okonsola umi ohasa asývape. Enterovéva kongregasiónpe ñamokyreʼỹ vaʼerã ñane ñeʼẽ rupive umi oñeñandu vaietereívape, ñaipytyvõ vaʼerã umi ikangývape ha ñanepasiénsia hesekuéra (1 Tes. 5:14). w18.09 páh. 14 párr. 10, 11

Amáske jaikuaa porãve Jehovápe, jajeroviavéta hese. ¿Mbaʼéichapa ikatu jajapo upéva? Jaleéramo la Biblia ha jajepyʼamongeta umi mbaʼe jaleévare. Ñandejára Ñeʼẽme jatopáta hetaiterei istória ohechaukáva mbaʼéichapa yma Jehová oprotehe vaʼekue ipuévlope. Umi istória ñanepytyvõta koʼýte jajerovia hag̃ua haʼe katuete oñangarekotaha ñanderehe. Jahechamína pe ehémplo porãite Isaías oipurúva ohechauka hag̃ua mbaʼéichapa Jehová ñandeprotehe. Haʼe heʼi Jehová ojoguaha peteĩ pastórpe, ha isiervokuéra katu haʼeha ijovecha mimi. Isaías heʼi Jehováre: “Ombyatýta umi ovecha raʼýpe ha ogueraháta chupekuéra ijyva ári” (Is. 40:11). Ñañeimahina jave ñaimeha Jehová jyva ári ha ñañandu haʼe ñaneañuaha, katuete ndajakyhyjemoʼãi mbaʼevégui ha ñañeñandúta trankílo porã. Ani hag̃ua rejedesespera neprovléma jave, iporãta rejepyʼamongetáramo pe téxto koestediaguáre. Umi mbaʼe heʼíva upépe katuete ñanemombaretéta ikatu hag̃uáicha ñaaguanta umi situasión ijetuʼúva oñepresentátava gueteri. w19.01 páh. 7 párr. 17, 18

¿Oĩpa algúna méta rehupytyséva? Ikatu oime reñehaʼã relee la Biblia káda día, térã rejeprepara porã rekomenta hag̃ua rreunionhápe. ¿Eñehaʼãpa avei reipurukuaave hag̃ua la Biblia predikasiónpe? ¿Mbaʼéichapa reñeñandu rehupyty jave koʼã méta remoĩva, térã ótro heʼi jave ndéve rejapo porãha? Katuete revyʼaiterei, pórke Jesús ojapo haguéicha remotenonde hína Jehovápe (Prov. 27:11). Remotenondéramo Jehová servísio, rejapo hína peteĩ mbaʼe nembovyʼátava ha isentídota la nde rekove. Pablo heʼi vaʼekue: “Pejepytaso mbaretékena, ani peheja mbaʼeve penemomýi, ha akóinte penerembiapo heta ñande Ruvicha servísiope, peikuaágui umi mbaʼe pejapóva chupe g̃uarã ndopytareimoʼãiha” (1 Cor. 15:58). Upéicharõ jepe, heta hénte omotenonde umi mbaʼe ikatúva ohupyty ko múndope, por ehémplo oñehaʼã ipláta heta térã ifamóso. Péro koʼã mbaʼe nombovyʼái chupekuéra. Ohupytýramo jepe umíva, heta vése noñeñanduporãi la ojapóvare (Luc. 9:25). w18.12 páh. 22 párr. 12, 13

David oñeʼẽ hína kuri pe tiémpo entéro yvypóra ko yvy ape ári ojegiátavare Ñandejára konsého iporãitévare (2 Ped. 3:13). Pe profesía oĩva Isaías 65:22-pe heʼi: “Che puévlo oikove pukúta peteĩ yvyramáta oikove pukuháicha”. Koʼápe ojehechauka umi hénte oservítava Jehovápe pe múndo pyahúpe oikotaha miles de áño. Apocalipsis 21:1-4 heʼi Ñandejára ovendesitaha enterovévape, ha peteĩva umi vendisión haʼéta hína ndaiporiveitamaha omanóva. Adán ha Eva operde vaʼekue pe priviléhio orekóva oiko hag̃ua opa árare peteĩ paraísope, péro ko yvýgui oiko jeýta peteĩ hardín iporãitereíva. Ñandejára ojapóta la opromete vaʼekue, haʼe ovendesíta yvyporakuérape ko yvy ape ári. David heʼi vaʼekue umi hénte ivuénova ha hembiapo porãva oikotaha opa árare ko yvy ape ári (Sal. 37:11). Heta profesía oĩva lívro de Isaíaspe oñeʼẽ pe paraíso oĩtavare ko yvy ape ári, ha ñanepytyvõ jajesareko hag̃ua upe tiémpore (Is. 11:6-9; 35:5-10; 65:21-23). ¿Arakaʼe piko oikóta koʼã mbaʼe? Oikóta Jesús okumpli vove pe promésa ojapo vaʼekue pe kriminálpe (Luc. 23:43). Ñande ningo ikatu avei ñaĩ pe paraísope. w18.12 páh. 7 párr. 22, 23

Jaiko rupi ko múndope, hasy jajehekyiete hag̃ua umi hénte opensa lájagui (1 Cor. 5:9, 10). Japredika jave jepe ñahendu umi mbaʼe la hénte heʼíva ha noĩporãiva, ha avei umi mbaʼe ogueroviáva hikuái péro ndasiértoiva. Heta vése ndaikatúi jajapo mbaʼeve ponove ñahendu umi hénte opensa lája, péro upéva ndeʼiséi jasegitaha ñapensa térã jaasepta la haʼekuéra opensáva. Jesús ojapo haguéicha, tekotevẽ pyaʼe porã jarrechasa umi idéa Satanás oipotáva opyta ñane akãme. Avei, ñañehaʼãmbaite vaʼerã ñamboyke umi mbaʼe ko múndo omoingeséva ñane akãme. Por ehémplo, ñañehaʼã vaʼerã jaiporavokuaa ñane amigorã. La Biblia ohechauka porã ñañepyrũramo jajeheʼa meme umi persóna ndoadoráivare Jehovápe, ñapensataha avei haʼekuéraicha (Prov. 13:20; 1 Cor. 15:12, 32, 33). Ñamboykéramo avei umi entretenimiénto violénto, oguerohorýva pe tekovai térã oapojáva pe evolusión, japrotehéta ñane ménte ani hag̃ua ñamoinge pype umi mbaʼe “ojokóva umi héntepe oikuaa hag̃ua Ñandejárape” (2 Cor. 10:5). w18.11 páh. 21 párr. 16, 17

¿Mbaʼépa ñanepytyvõta ñaimeve hag̃ua desidído jasegitaha pe añetegua rapére? Peteĩ mbaʼe ikatúva ñanepytyvõ haʼe hína jajapo ikatúva guive ñamboʼe hag̃ua ñande rapichápe pe añetegua oĩva la Bíbliape. Ikatu jaʼe la Biblia ojoguaha peteĩ espádape. ¿Mbaʼérepa? Pórke peteĩ soldádo ojagarra porãháicha ijespáda, ñande tekotevẽ avei ñañakarama porã “Ñandejára Ñeʼẽ” rehe (Efes. 6:17). Iñimportánte ñandekatupyryve jahávo ñaporomboʼe hag̃ua ikatu hag̃uáicha jaipuru “Ñandejára Ñeʼẽ hekoitépe” (2 Tim. 2:15). Ñamboʼe jave la Biblia ñande rapichápe, jaikuaave ha jahayhuve pe añetegua. Avei ñaimeve desidído jasegitaha jaiko pe añetegua rapére. Pe añetegua ningo peteĩ rregálo iporãitereíva oúva Jehovágui. Upéicha ñande ikatu ñañemoag̃ui ñande Ru yvagapeguáre, ha ndaipóri ótra kósa iñimportantevéva upévagui. Jehová ningo heta mbaʼéma ñanemboʼe, péro amáske jaha hese, hetaiterei mbaʼe jasegíta gueteri ñaaprende chugui. Haʼe opromete voi osegitaha ñanemboʼe opa árare. Upévare ñamombaʼe vaʼerã pe añetegua haʼeramoguáicha peteĩ pérla ijojahaʼỹva. Jasegi vaʼerã ‘jajogua pe añetegua ha ani núnka ñavende upéva’ (Prov. 23:23). w18.11 páh. 8 párr. 2; páh. 12 párr. 15-17

Pe dilúvio mboyve, Noé oavisa avei umi héntepe Ñandejára ohunditaha umi iñañávape. Jesús heʼi vaʼekue: “Upe tiémpope, pe ama guasu mboyve umi hénte okaru ha omboyʼu; kuimbaʼe ha kuñanguéra omendajoa, Noé oike peve pe árkape. Haʼekuéra nopenái mbaʼevére ha upéi ou pe ama guasu ha ohundipaite chupekuéra. Péichata avei ág̃a Yvypóra Raʼy oĩ vove” (Mat. 24:38, 39). Umi hénte nopenáiramo jepe Noére, haʼe osegi ifiél ha opredika pe mensáhe Jehová onkarga vaʼekue chupe. Koʼág̃arupi, ñande avei japredika ikatu hag̃uáicha umi persóna oaprende mbaʼépa Ñandejára ojapóta yvyporakuéra rehehápe. Jehová oipotaháicha, ñande avei jaipotaiterei umi hénte ohendu pe mensáhe oñeʼẽva Ñandejára Rréinore ha “osegi oikove” (Ezeq. 18:23). Japredika jave ogahárupi ha oimeraẽ lugárpe, jaavisa hína ikatúva guivépe Ñandejára Rréino outaha ohundi hag̃ua ko múndo aña (Ezeq. 3:18, 19; Dan. 2:44; Apoc. 14:6, 7). w18.05 páh. 19 párr. 8, 9

Ñañeimahinami pe goviérno oproiviha ñandehegui japredika ha jaha rreunionhápe. Upéi ñandejagarra ha oporandu ñandéve heta mbaʼe oikuaaséva ermanokuéragui. ¿Ñamombeʼu vaʼerãpa chupekuéra opa mbaʼe jaikuaáva? ¿Mbaʼépa ojapo vaʼekue Jesús pe governadór romano ombaʼeporandúrõ guare chupe? Haʼe heta vése okirirĩnte vaʼekue ha osegi pe prinsípio heʼíva oĩha “tiémpo ñakirirĩ hag̃ua ha tiémpo ñañeʼẽ hag̃ua” (Ecl. 3:1, 7; Mat. 27:11-14). Oñepresentáramo ko situasión, iporãvéta ñapensa porã jaʼe térã jajapo mboyve peteĩ mbaʼe ikatúva oapeligra ñane ermanokuérape (Prov. 10:19; 11:12). ¿Mbaʼépa jajapóta jaikuaáramo peteĩ ñane amigoite térã ñane hénte opeka vai hague? Ere vaʼerã la verda. Káda uno jareko pe rresponsavilida ñamombeʼúvo ansianokuérape la verda. Haʼekuéra oreko derécho oikuaávo mbaʼépa añetehápe la oiko vaʼekue, ikatu hag̃uáicha ohecha mbaʼéichapa oipytyvõ porãvéta pe pekadórpe oñemoĩ porã jey hag̃ua Jehovándi (Sant. 5:14, 15). w18.10 páh. 10 párr. 17, 18

¿Mbaʼéichapa ikatu ñamombarete ótrope? Peteĩ fórma hína ñaporohendukuaávo (Sant. 1:19). Jahayhúramo ñane ermánope ñañemoĩta ilugárpe ha ñahendu porãta chupe. Avei tekotevẽ jajapo hendápe porã umi pregúnta ñantende porãve hag̃ua la oñandúva. Pe ermánope ifasilvéta oñemongeta hag̃ua ñanendive jajapysaka porãramo la heʼívare. Iñimportánte ojekuaa voi ñande rováre ñañeinteresa añeteha hese. Haʼe oñeʼẽ aja, ñanepasiénsia vaʼerã ha jaheja teʼi la oñandúva ha ani ñañeʼẽjoko chupe. Ñaporohendukuaáramo ikatúta jaikuaa mbaʼépa añetehápe opensa ha okonfiáta ñanderehe. Avei ifasilvéta chupe ohendu hag̃ua la jaʼéva. Añetehápe ñañeinteresáramo umi ótrore, tuichaiterei ñakonsoláta chupekuéra. w18.09 páh. 14 párr. 10; páh. 15 párr. 13

Ñaikotevẽ tiémpo ikatu hag̃uáicha ñahendu pe marandu porã, jalee la Biblia ha umi puvlikasión bíblica, jastudia peteĩ testígo de Jehovándi, jajapo hag̃ua ñande estúdio personál, ñaanalisa hag̃ua umi mbaʼe oñehesaʼỹijótava rreunionhápe ha ñaime hag̃ua upépe. Ikatu hag̃uáicha jajapo koʼã mbaʼe tekotevẽ ñanohẽ tiémpo umi mbaʼe menove iñimportántevagui (Efes. 5:15, 16, nóta). ¿Mboy tiémpopa ñaikotevẽ ñaaprende hag̃ua umi enseñánsa bíblica iñimportantetéva? Upéva odependéma káda persónare ha isituasiónre. Péro ndaikatúi voi jaikuaapa Jehová arandu, ikonsehokuéra ha entéro mbaʼe ojapóva (Rom. 11:33). Pe primera rrevísta Ñemañaha okompara vaʼekue pe añetegua “peteĩ yvotyʼi kaʼaguýre”, ha heʼi: “Nañañekontentái vaʼerã peteĩ yvotyʼírente, pórke ndahaʼéi peteĩnte la oĩva síno heta. Péicha avei nañañekontentái vaʼerã jaikuaa haguére peteĩ mbaʼénte, síno jasegi vaʼerã jaheka pe añetegua”. Jaiko vove opa árare, siémpre oĩta hetave mbaʼe ikatútava ñaaprende chugui. Upéicharõ jepe, iñimportánte koʼág̃ama voi jaipuru pe tiémpo jarekóva ñaaprende hag̃ua ikatúva guive. w18.11 páh. 4 párr. 7

La Biblia heʼi voi umi ména imbaʼerechakuaa ha otrata porã vaʼerãha hembirekópe (1 Ped. 3:7). Peteĩ ména imbaʼerechakuaáva nopensái kuimbaʼekuéra iñimportanteveha kuñanguéragui idiferénteramo jepe hikuái (Gén. 2:18). Upévare imbaʼerechakuaa hembirekóndi, omombaʼe ha orrespeta chupe. Peteĩ ména otrata porãva hembirekópe omombaʼe hembiayhu oñandúva. Upévare arakaʼeve nonovilleái ótro kuñáre ni ndoikói omeʼẽterei atensión peteĩ kuña ndahaʼéivape hembireko (Job 31:1). Upéicha avei haʼe ndoipurumoʼãi umi rred sosiál ni Internet ojapo hag̃ua koʼã mbaʼe. Upéva rangue, osegíta ifiél hembirekópe pórke ohayhu chupe, ohayhu Jehovápe ha ombojeguaru chupe umi mbaʼe vai (Sal. 19:14; 97:10). w18.09 páh. 29 párr. 3, 4

¿Mbaʼérepa sapyʼánte ijetuʼu jajapo hag̃ua la Biblia heʼíva? Primero pórke jajapo hag̃ua la oĩ porãva tekotevẽ ñaneumílde. Koʼã “ára pahápe” umi hénte ijehénte ojepyʼapy, iplatarayhu, oñembotuicha, ijejapo ha ndojejokokuaái. Upévare heta vése ijetuʼu jasegi hag̃ua ñaneumílde (2 Tim. 3:1-3). Ñande jaservíva Jehovápe jaikuaa porã ndovaleiha jajapo koʼã mbaʼe, péro ikatu ñapensa umi oikóva upéicha ohupytyha heta mbaʼe ha ovyʼaha (Sal. 37:1; 73:3). Ikatu voi jaju ñañeporandu: “¿Añetehápe piko amotenonde vaʼerã che rapichakuéra oikotevẽva? ¿Cherrespetáta piko umi hénte cheumílderamo?”. Ñapensáramo ñandejehénte ko múndope oñepensaháicha, ikatu hína ndajaikói pyʼaguapýpe ermanokuérandi ha hasýta ojeʼe hag̃ua ñanderehe haʼeha kristiáno tee. Péro ñahesaʼỹijóramo mbaʼéichapa Ñandejára siervokuéra ohechauka iñumílde hague ha jasegíramo iñehémplo, jahupytýta heta mbaʼe porã. w18.09 páh. 3 párr. 1

Jehová oiko vaʼekue haʼeñoite heta tiémpore, upéicharõ jepe nopensái ijehénte. Haʼe odesidi okrea umi ánhel ha yvyporakuérape oikove hag̃ua avei. La Biblia ohenói Jehovápe “Ñandejára ovyʼáva”. Haʼe añetehápe omeʼẽseterei heta mbaʼe porã enterovépe (1 Tim. 1:11; Sant. 1:17). Jehová oipota ñande avei javyʼa haʼe ovyʼaháicha. Upévare ñanemboʼe ñandepojera ha ñakomparti hag̃ua ótrondi umi mbaʼe jarekóva (Rom. 1:20). Jehová ñandeapo vaʼekue ijoguahárõ (Gén. 1:27). Upéva heʼise ñandekrea hague ikatu hag̃uáicha jahechauka umi kualida haʼe orekóva. Upévare, javyʼaséramo añete ha jaipotáramo Jehová ñanevendesi, tekotevẽ jasegi iñehémplo. Avei ñañeinteresa vaʼerã ñande pyʼaite guive ñande rapicháre ha ñakomparti hendivekuéra umi mbaʼe jarekóva (Filip. 2:3, 4; Sant. 1:5). ¿Mbaʼérepa? Pórke Jehová ñandeapo vaʼekue jajapo hag̃ua koʼã mbaʼe. Ñaneimperféktoramo jepe, ikatu jasegi iñehémplo ha ñandepojera avei. Jehová oipota entéro persóna osegi iñehémplo, upévare haʼe ovyʼaiterei ñandepojera jave. (Efes. 5:1). w18.08 páh. 18 párr. 1, 2; páh. 19 párr. 4

Ñande jahechauka ñaneñeʼẽrenduha Jesúspe ndahaʼéi ñahendúnte rupi la heʼíva, síno jajapógui umi mbaʼe haʼe omandáva. Avei ndajaikói ‘jajepyʼapyeterei ñane remikotevẽre’, péicha rupi ndajahejái umi mbaʼe ñandedistrae (Luc. 21:34). Upéva rangue ñamotenonde umi mbaʼe Jesús ojeruréva ñandéve, jahasáramo jepe umi situasión ijetuʼúva. Toiko la oikóva, ñane ermanokuéra osegi ifiél Jehovápe. ¿Mbaʼépa ikatu avei jajapo jahechauka hag̃ua ñaneñeʼẽrenduha Jesúspe? Ñaipytyvõ umi haʼe oasignávape ñanemoakã hag̃ua (Heb. 13:7, 17). Ñandejára organisasión ningo ojapo heta kámbio koʼág̃arupi. Por ehémplo, omeʼẽ ñandéve umi erramiénta ha método pyahu japredika hag̃ua. Avei koʼág̃a ojejapo ótro hendáicha umi rreunión éntre semanagua ha okambia mbaʼéichapa oñemopuʼã, oñemyatyrõ ha oñemantene umi Salón del Reino. Ajépa ñamombaʼete oñepensa porã haguére la ñaikotevẽvare, ha mborayhúpe oñemeʼẽ haguére ñandéve umi konsého ideprovechoitéva. Ani jaduda katuete Jehová ñanevendesitaha ñañehaʼã haguére jasegi pe gía haʼe omeʼẽva itiempoitépe iñorganisasión rupive. w19.03 páh. 10, 11 párr. 11, 12

Heta vése ijetuʼu jaikuaa porã hag̃ua mbaʼépa añetehápe la oiko vaʼekue peteĩ situasiónpe. Ñande ndaikatúi ñakonfia peteĩ informasiónre oiméramo algúna pártente hína siérto. Jahechamína mbaʼépa oiko vaʼekue Josué tiémpope (Jos. 22:9-34). Umi israelita oikóva rrío Jordán oéste gotyo ohendu umi oikóva pe ótro ládo rrío Jordán éste gotyo omopuʼã hague peteĩ altár tuichaitereíva. Añetehápe upéva siérto, péro ndoikuaapái hikuái la oikóva. Upévare oimoʼã iñermanokuéra oikóva éste gotyo opuʼã hague Jehováre (Jos. 22:9-12). Péro oho mboyve oataka chupekuéra, omondo unos kuánto kuimbaʼépe oaverigua hag̃ua mbaʼépa añetehápe la oikóva. ¿Mbaʼépa oho otopa hikuái? Ndojejapói hague peteĩ altár ojeadora hag̃ua umi ñandejára guaʼúpe, síno entéro oikuaa hag̃ua oadora hague hikuái Jehovápe. Katuete oime vaʼerã umi israelita oĩva oéste gotyo ovyʼa ndohói haguére oñorairõ iñermanokuéra kóntrape. Upéva rangue, oñehaʼã oikuaa raẽ mbaʼépa añetehápe la oiko vaʼekue. w18.08 páh. 5 párr. 9, 10

Ohechaukaháicha Pablo, umi oadoráva Ñandejárape jepe ikatu ojapo ivaíva. Ha ikatu voi opensa hikuái Jehová oguerohoryitiha chupekuéra. Péro peteĩ persóna oikose haguére Jehová amígoramo térã heʼi rupi haʼeha iñamígo, ndeʼiséi katuete Jehová oguerohoryha chupe (1 Cor. 10:1-5). Umi israelita ningo opensa vaʼekue Moisés otardaitereimaha pe mónte Sinaípe, upévare nohaʼarõsevéima hikuái. Ñande avei ikatu nañanepasiensiavéi pórke pe fin nog̃uahẽi gueteri, ñahaʼarõ haguéicha kuri ñepyrũrã. Ikatu voi ñapensa umi mbaʼe porã Jehová oprometéva otardavetaitiha oñekumpli hag̃ua, térã iporãitereimaha la jaguerovia hag̃ua. Ñapensáramo péicha, ikatu voi jaju ñamotenonde umi mbaʼe ñandévente ñandegustáva ha ñamboyke jahávo Jehová rembipota. Ñañemeʼẽ mboyve enkuénta, koʼã mbaʼe ikatu ñanemomombyry Jehovágui ha jajapo umi mbaʼe ni ndojehasáiva kuri ñane akãre jajapotaha. w18.07 páh. 21 párr. 17, 18

Jehová ikatu avei ñandekuaa káda únope. ¿Péro mbaʼépa jajapo vaʼerã oiko hag̃ua ñandehegui iñamígo? Jahayhu ha jaservi vaʼerã chupe ñande pyʼaite guive (1 Cor. 8:3). Péro ñanerakateʼỹ vaʼerã pe amista jarekóvare ñande Ru yvagapeguándi. Umi kristiáno Galaciagua ojapo haguéicha, jajehekýi vaʼerã avei “umi vyrorei” oĩvagui ko múndope “ndovaléiva mbaʼeverã”. Péva heʼise ndajahekái vaʼerãha ko múndo ñanemombaʼe (Gál. 4:9). Umi ermáno Galaciagua oikuaáma vaʼekue Ñandejárape ha haʼe oikuaa avei chupekuéra. Péro Pablo heʼi hesekuéra ojevy jeyha umi vyroreípe. Haʼete heʼíva umi kristiánope: “¿Mbaʼére piko la peho porã kuri hese ha peju jey pejapo vyrorei?”. w18.07 páh. 8 párr. 5, 6

Ndajajapóiramo Ñandejára Léi heʼíva katuete oho vaíta ñandéve. Péro natekotevẽi ningo jahasa asy raẽ ñaaprende hag̃ua mbaʼépa iporã ha mbaʼépa ivai. Ikatu ñaaprende umi mbaʼe vai ojapo vaʼekuégui Ñandejára siervokuéra yma guare ha jatopáva la Bíbliape. Umi konsého oĩva pype ningo ou Ñandejáragui, upévare ndaipóri ótro konsého iporãvéva umívagui. Por ehémplo, epensamína mbaʼeichaitépa osufri kuri David naiñeʼẽrendúi haguére Jehovápe oñeno rupi Bat-sébandi (2 Sam. 12:7-14). Jalee jave ko experiénsia, iporã ñañeporandu: “¿Mbaʼéichapa David ikatúta kuri ojehekýi koʼã provlémagui? ¿Mbaʼépa che ajapóta ajecháramo koʼãichagua situasiónpe? ¿Ajerétapa cherekovai David ojapo haguéicha, térãpa adiparáta upe situasióngui José ojapo haguéicha?” (Gén. 39:11-15). Jajepyʼamongeta porã vaʼerã mbaʼe konsekuénsiapa ogueru pe pekádo, péicha ñaiméta desidído jajapo hag̃ua la Biblia heʼíva: “Ndapechaʼéi vaʼerã umi mbaʼe ivaívare” (Amós 5:15). w18.06 páh. 17 párr. 5, 7

Umi hénte iñakãrakuve pe polítikare ohecha jave oikoha heta inhustísia. Jesús tiémpope, umi impuésto okovráva umi autorida omomýi vaʼekue umi héntepe oñentremete hag̃ua polítikare. Pe puévlo opaga vaʼerã heta impuésto, por ehémplo ijyvýre, hógare ha ambue mbaʼe orekóvare. Hiʼarive umi impuésto kovraha ikorruptoiterei vaʼekue, ha upéva koʼýte oempeorave la situasión. Umi impuésto kovraha sapyʼánte opaga umi autoridápe omeʼẽ hag̃ua chupekuéra algún puésto. Upéi haʼekuéra oipuru ijautorida omyenyhẽ hag̃ua ivolsíllo. Por ehémplo, Zaqueo haʼe vaʼekue pe prinsipál impuésto kovraha oĩva Jericópe. Haʼe ou kuri irríko ojeaprovecha rupi umi héntere (Luc. 19:2, 8). Katuete ningo ndahaʼeichéne haʼénte la ojapóva koʼã mbaʼe. Jesús enemigokuéra oipota kuri haʼe oopina pe impuésto jepagáre. Haʼekuéra oporandu chupe mbaʼépa opensa “pe impuésto Césarpe” ojepagávare. Upéva hína 1 denário opagáva káda judío (Mat. 22:16-18). Umi judío ndopagaseieterei vaʼekue pe impuésto pórke omomanduʼa chupekuéra oĩha pe goviérno rrománo poguýpe. w18.06 páh. 5, 6 párr. 8-10

Umi oñemoĩva Satanás ládope ohupyty unos kuánto venefísionte (Job 21:7-17; Gál. 6:8). ¿Mbaʼérepa iporã jaikuaa Satanás odominaha ko múndo? Pórke upéva ñanepytyvõ jahecha hag̃ua hekoitépe umi goviérno, ha ñanemokyreʼỹ japredika hag̃ua pe marandu porã. Jehová oipota jarrespeta umi autoridápe (1 Ped. 2:17). Haʼe ohaʼarõ ñakumpli umi léi noĩrima guive Iléi kóntrape (Rom. 13:1-4). Upévare ndajaapojái vaʼerã umi partído polítiko ni umi líder umánope (Juan 17:15, 16; 18:36). Satanás oñehaʼã oñomi Jehová réra ndoipotáigui ojekuaa, ha avei ojapo ikatúva guive omongyʼa hag̃ua upe téra. Upévare ñande ñañehaʼãmbaite ñamboʼe umi héntepe mbaʼeichagua persónapa Ñandejára. Javyʼaiterei ñañehenói haguére hérarupi ha jaipuru rupi upéva. Añetehápe iporãiteve jahayhu Ñandejárape, jahayhu rangue pe pláta térã umi mbaʼerepy (Is. 43:10; 1 Tim. 6:6-10). w18.05 páh. 24 párr. 8, 9

¿Ikatu piko umi omendáva ojesepara oúramo iprovléma hikuái? La Biblia ndeʼíri mbaʼéicha javépa peteĩ matrimónio ikatu ojesepara ojedivorsiaʼỹre. Pablo heʼi vaʼekue: “Peteĩ ermána orekóramo iména ojeroviaʼỹva Ñandejárare, péro iména opytase hendive, ani oheja chupe” (1 Cor. 7:12, 13). Ko konsého ningo ñane tiémpope g̃uarã avei. Sapyʼánte pe ‘ména ojeroviaʼỹva Ñandejárare’ ohechauka ndopytaseiha hembirekóndi. Por ehémplo, omaltrataiterei chupe ha upévare pe tembireko opensa ojapeligraha hendive. Térã noĩri dispuésto omeʼẽvo hemikotevẽ hembireko ha ifamiliakuérape. Ỹrõ katu ojapo ikatúva guive pono hembireko oservi Ñandejárape. Péicha jave, peteĩ ermána ikatu opensa iména noĩriha dispuésto opytávo hendive ndeʼíriramo jepe upéva, ha tekotevẽtaha ojesepara chugui. Péro oĩ umi odesidíva osegi iménandi koʼãichagua situasiónpe. Haʼekuéra oaguanta ha oñehaʼã oiko porãve hag̃ua iménandi. w18.12 páh. 13 párr. 14, 16; páh. 14 párr. 17

Jesús omoĩ vaʼekue pe ehémplo oñeʼẽva pe chokokuére ha jatopáva Lucas 8:5-8 ha 11-15-pe. Upépe haʼe omyesakã pe semílla haʼeha “Ñandejára ñeʼẽ” térã pe mensáhe oñeʼẽva Ñandejára Rréinore. Pe yvy katu haʼe umi persóna korasõ. Pe semílla hoʼáva pe yvy porãme oñepyrũ kuri oñembohapo, ou heñói ha “hiʼa mas de 100 peteĩ semíllagui”. Pe semílla oñepyrũ kuri heñói ha okakuaa oĩ peve preparádo oprodusi hag̃ua. Pe trígo ningo ndahiʼái trígo jey, síno semílla. Péicha avei ñande ndajaprodusíri disípulo, síno semílla pyahu. ¿Mbaʼéichapa jajapo upéva? Káda ke ñañeʼẽ ñande rapichakuérape Ñandejára Rréinore, haʼete ñambohetavéva ha ñamosarambíva pe semílla oñeñotỹ vaʼekue ñane korasõme (Luc. 6:45; 8:1). Upévare, jasegívo japredika pe marandu porã oñeʼẽva Ñandejára Rréinore, jahechauka hína ñaaguanta ha jasegiha japrodusi. w18.05 páh. 14 párr. 10, 11

Pablo ningo oñemeʼẽmbaite vaʼekue iñermanokuéra rehehápe. Umi mbaʼe ojapóvare ohechauka oĩha ojapo hag̃uáicha oimeraẽ mbaʼe hesehapekuéra (2 Cor. 12:15). Upéicha avei, umi ansiáno omokyreʼỹ ha okonsola vaʼerã iñermanokuérape umi mbaʼe heʼíva ha ojapóva rupive. Péicha ohechaukáta añetehápe ojepyʼapyha hesekuéra (1 Cor. 14:3). Heta vése umi ansiáno tekotevẽ oakonseha umi ermánope oajuda hag̃ua chupekuéra. La Biblia tuicha ikatu oipytyvõ umi ansiánope omeʼẽ hag̃ua konsého oporomokyreʼỹva. Jesús ehémplo ningo iporãiterei. Oñemoingove jey rire chupe, omeʼẽ vaʼekue konsého umi kongregasión oĩvape Asia Menórpe. Haʼe ningo tekotevẽ kuri okorrehi umi kongregasión oĩvape Éfeso, Pérgamo ha Tiatírape. Péro upe mboyve oguerohory umi mbaʼe porã ojapóva hikuái (Apoc. 2:1-5, 12, 13, 18, 19). Umi ansiáno oñehaʼã osegi Jesús ehémplo omeʼẽ jave konsého. w18.04 páh. 22 párr. 8, 9

Tuakuéra, peẽ ningo katuete pejapo ikatúva guive pono pene famíliape ojagarra algún mbaʼasy. Upearã pemopotĩ pende róga ha peipeʼa upégui oimeraẽ mbaʼe ikatúva ombohasy umi mitãme térã penembohasy peẽme voi. Upéicha avei, tekotevẽ peñangareko hesekuéra ani hag̃ua umi pelíkula, prográma osẽva télepe, videohuégo ha umi sítio de Internet orova hesekuéra Satanás opensa lája. Jehová omeʼẽ peẽme pe autorida pekuida hag̃ua umi mitãre ijerovia mbarete hag̃ua (Prov. 1:8). Aníkena pekyhyje pemoĩ hag̃ua rrégla ogapýpe, péro upearã peipuru vaʼerã la Biblia omboʼéva. Peje umi mitãme mbaʼépa ikatu ha mbaʼépa ndaikatúi ohecha, ha peñehaʼã tontende hikuái mbaʼérepa pejapo umíva (Mat. 5:37). Amáske umi mitã okakuaa ohóvo, pehekomboʼe vaʼerã chupekuéra opilla hag̃ua ijeheguiete mbaʼépa iporã ha mbaʼépa ivai Jehová renondépe (Heb. 5:14). Aníkena penderesarái, umi mitã ningo hetaiteve mbaʼe oaprendéta pene ehémplogui (Deut. 6:6, 7; Rom. 2:21). w19.01 páh. 16 párr. 8

Oiméramo nemitãiti, iporãta reñeinteresáramo umi ijedávare. Haʼekuéra ikatu omombeʼu ndéve umi experiénsia porã orekóva oservi rupi heta áñorema Jehovápe. Koʼã mbaʼe añetehápe nemokyreʼỹta ndéve ha chupekuéra avei. Tahaʼe imitãva térã ijedáva oñehaʼã vaʼerã orresivi porã umi ou ramóvape Salónpe. Oiméramo remoakã hína pe aty ojejapóva oñesẽ mboyve predikasiónpe, ikatu hína reipytyvõ umi ijedávape ohesape mbarete hag̃ua pe lus orekóva hikuái. Iporã rejeasegura toreko hikuái peteĩ território opyta porãtava chupekuéra. Ejapo arréglo ikatu hag̃uáicha mitãrusukuéra ombaʼapo avei hendivekuéra. Umi ermáno ha ermána ijedáva ha hasykatumíva pyʼỹinte oñedesanima, pórke ndaikatuvéi opredika ymave guaréicha. Péro ohechakuaárõ hikuái reñangarekoha hesekuéra ha rentendeha la isituasión, oñeñandu porãvéta. Retrata porãramo enterovévape ikyreʼỹta hikuái predikasiónpe, oiméramo jepe ijedáma térã aréma oservi hague Jehovápe (Lev. 19:32). w18.06 páh. 23, 24 párr. 10-12

Núnka nañanderesaráiri vaʼerã Jehová ñanemosãsoha pekádo ha ñemano poguýgui. Jesús sakrifísio rupive ñande jaservi Ñandejárape konsiénsia potĩ reheve ha añetehápe javyʼa (Sal. 40:8). Ñande ningo ndahaʼéi jaagradesénte vaʼerã Jehovápe pe liverta jarekóvare, síno ñañatende vaʼerã ani hag̃ua jaipuru vai. Por ehémplo, Pedro heʼi porã vaʼekue ani hag̃ua jaipuru pe liverta jarekóva jajapo hag̃ua ivaíva. Ko konsého ningo ñanemomanduʼa la oiko vaʼekuére umi israelita oĩrõ guare desiértope. Ñane tiémpope katu koʼýte ou porã ñandéve ko konsého. Satanás ha imúndo pyʼỹinte ñandejopy opáicha rei jarekose hag̃ua heta mbaʼe, por ehémplo ao, tembiʼu, vevída térã umi entretenimiénto. Umi propagánda katu omoĩ umi persóna iporãvape ikatu hag̃uáicha ñanekonvense jajogua hag̃ua umi mbaʼe añetehápe nañaikotevẽiva. Jahechaháicha, ndahasyiete jaʼa hag̃ua koʼã ñuhãme ha jaipuru vai la ñande liverta. w18.04 páh. 10 párr. 7, 8