Septiembre

Jesús oñemoĩ vaʼekue avei Marta ha María lugárpe. Por ehémplo, ohechárõ guare mbaʼeichaitépa oñembyasy hikuái iñermáno Lázaro omano haguére, “Jesús hasẽ” avei (Juan 11:32-35). Péro haʼe nahasẽi ndaikatumoʼãvéima rupi ohasa tiémpo peteĩ iñamigoiténdi, amo ipahápe ningo oikuaa porã omoingove jeytaha Lázarope. Jesús hasẽ pórke oñemoĩ iñamigakuéra lugárpe ha ontende mbaʼéichapa oñeñandu hikuái. Ñande ndahaʼéi perfékto Jesús haʼe haguéicha, upéicharõ jepe heta mbaʼe ikatu ñaaprende chugui pórke haʼe ohechauka vaʼekue ontendeha umi hénte ohasáva. Jahayhu ningo Jesúspe jaikuaa rupi mbaʼéichapa oporotrata vaʼekue. Javyʼa jaikuaa haguére ogovernaha hína Ñandejára Rréino ha koʼẽrõitéma oipeʼataha opa mbaʼe ñanembosufríva. Hiʼarive haʼe yvypóra vaʼekue, upévare ndaipóri ótro ikatu vaʼerã oipytyvõ porãve yvyporakuérape ojerrekupera jey hag̃ua umi mbaʼe vai Satanás goviérno ojapo vaʼekuégui. Ajépa javyʼaite jareko haguére peteĩ Rréi ikatúva “ñandeporiahuvereko ñanekangy jave” (Heb. 2:17, 18; 4:15, 16). w19.03 páh. 17 párr. 12, 13

Ñande ningo ñaipytyvõ umi héntepe oikuaa hag̃ua Ñandejárape, péro ndahaʼéi ñande jajapóva la iñimportantevéva (1 Cor. 3:6, 7). Jehová hína la oguerúva umi héntepe iñorganisasiónpe. Ha amo ipahápe káda persóna odesidi oaseptátapa pe marandu porã térãpa nahániri, asegún la orekóva ipyʼapýpe (Mat. 13:4-8). Ani ñanderesarái heta hénte ndoaseptái hague pe mensáhe Jesús opredikáva, hiʼarive ndaipóri mboʼehára haʼéicha ikatupyrýva. Upévare, ani ñañedesanima oĩramo heta hénte nañanerenduséiva. Ñañemoĩramo ñande rapichakuéra lugárpe jahupytýta heta mbaʼe porã predikasiónpe. Por ehémplo, ñañeñandu porãvéta jajapóvo ko tembiapo, javyʼáta pórke ñaporopytyvõ hína, ha avei umi “oñehaʼãva ohupyty jeikove opaveʼỹva” orekovéta oportunida oasepta hag̃ua pe mensáhe (Hech. 13:48). Upévare, “jareko aja oportunida, jajapo memékena iporãva opavave rehehápe” (Gál. 6:10). Péicha javyʼáta ñambotuicha haguére ñande Ru yvagapeguápe (Mat. 5:16). w19.03 páh. 25 párr. 18, 19

Rréi David oskrivi vaʼekue: “Jehová ningo ndaijojahái, haʼe omerese ojeadora chupe” (Sal. 145:3). David ohayhu kuri Jehovápe ha upéva omomýi chupe ombotuicha hag̃ua Ñandejárape pe “kongregasión apytépe” (1 Crón. 29:10-13; Sal. 40:5). Koʼág̃arupi avei ñande ñambotuicha Jehovápe ñakomenta jave rreunionhápe. Ajépa igustoite ñahendu rreunionhápe diferénte komentário. Koʼýte jaguerohory umi mitã okomenta jave sensillomi ha ipyʼaite guive. Ñanembopyʼarory ñahendu jave peteĩ ermáno vyʼápe omombeʼuha peteĩ mbaʼe pyahu oaprende vaʼekue. Avei jaguerohory umi oñehaʼãvape ipyʼaguasu okomenta hag̃ua, hiʼotĩramo jepe térã oimérõ oaprende ramo hína ñane idióma (1 Tes. 2:2). ¿Mbaʼépa ikatu jajapo jahechauka hag̃ua ñamombaʼeha la ojapóva hikuái? Rreunión rire ikatu jaagradese chupekuéra ñanemokyreʼỹ haguére la ikomentário. Péro ndahaʼéi upévante la ikatúva jajapo. Ñande voi ikatu ñakomenta rreunionhápe. Péicha ndahaʼemoʼãi ñandénte la ñanekyreʼỹtava ótro okomenta jave, síno ñande avei ikatúta ñaporomokyreʼỹ (Rom. 1:11, 12). w19.01 páh. 8 párr. 1, 2; páh. 9 párr. 6

La Biblia oñeʼẽ 10 kuimbaʼe oñeñandu vaietereívare ilépra haguére, haʼekuéra ningo operdetéma voi la esperánsa ikatúne hag̃ua algúna ves okuera. Péro peteĩ díape, umi lepróso ohecha mombyry guive Jesúspe. Haʼekuéra ohendúmava voi Jesús ikatuha omonguera opaichagua mbaʼasy. Upéicha rupi ojerure asy chupe hikuái: “¡Jesús, Mboʼehára, oreporiahuverekomína!”. Upe rire, los 10 okueraite pe mbaʼasýgui. Katuete ningo koʼã kuimbaʼe oagradese Jesús omonguera haguére chupekuéra. Péro peteĩva añoite ohechauka ijagradesidoha, upévare oho ha heʼi Jesúspe mbaʼéichapa oñeñandu. Pe persóna haʼe kuri peteĩ samaritano, ha omombaʼetereígui pe milágro “sapukaihápe ombotuicha Ñandejárape” (Luc. 17:12-19). Pe samaritano ojapo haguéicha, ñande avei jahechaukase ñandeagradesidoha umi imbaʼeporãvandi ñanendive. Jehová omoĩ ñandéve la ehémplo pórke haʼe voi ohechauka ijagradesidoha. Haʼe ojapo upéva ovendesi jave umi persóna oñehaʼãvape ojapo hembipota (2 Sam. 22:21; Sal. 13:6; Mat. 10:40, 41). La Biblia ñanemokyreʼỹ jasegi hag̃ua Jehová ehémplo heʼívo: “Pehaʼangáke Ñandejárape, peẽ itaʼýra haʼe ohayhuetéva” (Efes. 5:1). ¿Mbaʼérepa upéicharõ iñimportánte jahechauka ñandeagradesidoha? Pórke jasegise Jehová ehémplo. w19.02 páh. 14 párr. 1, 2; páh. 15 párr. 4

Peteĩ mitãkuña oĩ hína ikoléhiope, ha heʼi porãnte iprofesórpe haʼe ndopartisipamoʼãiha peteĩ ákto patriótikope. Peteĩ mitãrusu hiʼotĩva oĩ hína predikasiónpe ha og̃uahẽ peteĩ ikompañéro de koléhio rógape, jepe ko ikompañéro heta vésema oñembohory umi Testígore. Peteĩ ermáno oñehaʼãmbaite omantene hag̃ua ifamíliape, péro ipatrón heʼi chupe ijapu hag̃ua térã ojapo hag̃ua peteĩ mbaʼe pe léi heʼíva oĩ vaiha. Ko ermáno oikuaa ikatuha oñemosẽ itravahohágui, péro lomímonte oho ipatrón rendápe ha heʼi chupe ndojapomoʼãiha upéva pórke Ñandejára oipota isiervokuéra iñonrrádo ha okumpli umi léi (Rom. 13:1-4; Heb. 13:18). ¿Mbaʼépa ikatu jaʼe koʼã mbohapy ermánore? Jaʼekuaa por ehémplo ipyʼaguasu ha iñonrradoha hikuái. Péro oĩ avei ótra kósa ojekuaa porãitereíva. ¿Mbaʼépa hína upéva? Ohechauka ifielha Jehovápe. Upéva omomýi chupekuéra osegi hag̃ua iñeʼẽrendu chupe, ha Jehová katuete ovyʼaitereíta hesevekuéra. Ñande ningo jaipota avei ñande Ru yvagapegua ovyʼa ñandereheve. w19.02 páh. 2 párr. 1, 2

Pe léi oprotehe vaʼekue prinsipálmente umi ndaikatúivape oñedefende haʼeño, por ehémplo umi ityreʼỹva, umi viúda ha umi extranhéro. Entéro umi hués Israelgua okumpli vaʼerã ko léi heʼíva: “Ndovaléi peneinhústo pehusga jave umi extranhéro ha umi ityreʼỹvape, ha peipurukáramo peteĩ viúdape peteĩ mbaʼe, ndapejagarrái vaʼerã chugui ijao de garantía” (Deut. 24:17). Jehová ojepyʼapyeterei vaʼekue umi ndaikatúivare oñedefende, upévare umi omaltratáva chupekuéra ojecha vaʼerã hendive (Éx. 22:22-24). Jehová oipota isiervokuéra orekóva autorida ohayhu ha oñangareko porã umi oĩvare ikárgope. Haʼe ndaijaʼéi umi oporoviolávare, orekóva rrelasión sexuál ihéntendi térã oviolávare umi mitãme. Jehová oipota ojeprotehe ha ojetrata kon hustísia isiervokuérape, koʼýte umi ndaikatúivape oñedefende (Lev. 18:6-30). Jahechakuaávo Jehová ihustoha ñanendive, jaju jahayhuve chupe. Ha jahayhúvo chupe ha umi léi omeʼẽva ñandéve, jahayhu avei ñande rapichakuérape ha ñandehústo hendivekuéra. w19.02 páh. 24, 25 párr. 22-26

Jahechamína peteĩ ehémplo ohechaukáva mbaʼéichapa ikatu jajeprotehe pono Satanás orova ñanderehe la opensa lája. Jehová heʼi ani hag̃ua ‘ni mbaʼevéicharõ ñañeʼẽ tekovaíre, ni mbaʼeveichagua tekokyʼa, ni taryrýire’ (Efes. 5:3). Péro, ¿mbaʼépa jajapóta ñane kompañéro de traváho térã de estúdio oñepyrũramo oñeʼẽ umi mbaʼe kyʼáre? Ñane konsiénsia, ojoguáva peteĩ guárdiape, ikatu hína ñandeavisa oĩha pelígro (Rom. 2:15). ¿Ñapenátapa hese? Ikatu ñandestira la ojapóva ñane kompañerokuéra ha ñahenduse la heʼíva hikuái, térã jahechase umi taʼanga haʼekuéra ohecháva. Péro jaʼe porãsérõ g̃uarã, upe moméntope ñamboty vaʼerã umi siuda rokẽ. Upéva heʼise ñañehaʼãtaha ñakambia pe konversasión térã jahataha upégui. Sapyʼánte ñane kompañerokuéra ñandejopy ñapensa térã jajapo hag̃ua umi mbaʼe ivaíva, péicha jave tekotevẽ ñandepyʼaguasu ñambohovái hag̃ua upe situasión. Jehová ningo ohecha ñañehaʼãha ñamboyke umi mbaʼe vai, upévare ñanemombaretéta ha ñanemoarandúta ñamboyke hag̃ua Satanás opensa lája (2 Crón. 16:9; Is. 40:29; Sant. 1:5). w19.01 páh. 17, 18 párr. 12, 13

Salomón ningo haʼe vaʼekue peteĩva umi kuimbaʼe irrikovéva ha omanda guasuvéva oiko vaʼekue ko yvy ape ári. Haʼe okomprovase kuri peteĩ mbaʼe. Salomón heʼi: “Koʼág̃a aiko porã ha ajedivertíta, péicha aikuaáta mbaʼépepa ideprovécho upéva” (Ecl. 2:1-10). Salomón ojapo umi óga iporãitereíva ha odiseña umi hardín ha párke neporãmba jepéva. Añetehápe ojapo la oñantoháva chupe. ¿Oñekontentápa la ojapóvare? ¿Ombovyʼápa chupe? Haʼe ohecha entéro mbaʼe ojapóva ha heʼi umi mbaʼe jatopáva pe téxto koestediaguápe. ¿Rehechakuaápa siertoha la oaprendéva Salomón? Oĩ persóna oaprendéva heta mbaʼe oñakãmbota rire ae, térã ohasa asy rire odesidi vai haguére. Péro Jehová ndoipotái oiko nderehe upéva. Haʼe oipota rehendu chupe ha rejapo la heʼíva ndéve. Upearã tekotevẽ rejerovia, péicha arakaʼeve nerembyasymoʼãi la redesidíva. Ñandejára núnka ‘ndahesaraimoʼãi umi mbaʼe rejapo vaʼekuégui ha mbaʼéichapa rehayhu héra’ (Heb. 6:10). Upévare eñehaʼã meme vaʼerã emombarete hag̃ua nde jerovia. Péicha edesidi porãta ha ndete ehecháta Ñande Ru yvagapegua oipotaha la iporãvéva ndéve g̃uarã (Sal. 32:8). w18.12 páh. 22 párr. 14, 15

Pe persóna ijespirituálva ojerovia Ñandejárare ha oñehaʼã opensa Jehová opensaháicha. Avei oreko enkuénta Jehovápe opa mbaʼe ojapóvape ha odesidi iñeʼẽrendu chupe (1 Cor. 2:12, 13). David haʼe vaʼekue peteĩ persóna ojeroviaitereíva Ñandejárare. Haʼe heʼi peteĩ purahéipe: “Jehová, nde hína che erénsia, pe párte oñemeʼẽva chéve” (Sal. 16:5). David ovyʼa vaʼekue pe “erénsia” orekóvare, haʼéva hína iñamista Ñandejárandi. Upévare oñemoag̃ui hese ikatu hag̃uáicha oprotehe chupe (Sal. 16:1). ¿Mbaʼépa ohupyty upe haguére? David heʼi: “Chepyʼarory ha avyʼaiterei”. Haʼe oñeñandu porãiterei vaʼekue oĩ haguére ag̃uiete Jehovágui, ndaipóri voi ótra kósa ombovyʼavéva chupe (Sal. 16:9, 11). Umi oipuruetereíva itiémpo iplatave hag̃ua térã ojapo hag̃ua la chupekuéra ogustávante, núnka ndovyʼamoʼãi David ovyʼa haguéicha (1 Tim. 6:9, 10). Rejeroviavéramo rehóvo Jehováre ha reservi chupe, revyʼáta ha oho porãvéta ndéve. ¿Péro mbaʼéichapa ikatu emombareteve nde jerovia? Tekotevẽ rehasa tiémpo Jehovándi. Upearã elee vaʼerã Iñeʼẽ, ejepyʼamongeta ikreasiónre ha avei epensa meme mbaʼeichagua persónapa haʼe, por ehémplo oporohayhuetereiha (Rom. 1:20). w18.12 páh. 25 párr. 7, 8

Pablo ndahaʼéi heʼínteva mbaʼépa opensa pe ñemendáre. Síno ohechauka kristianokuéra tekotevẽha omombaʼe ha orrespeta pe matrimónio. Ha ñande, ¿ñamombaʼépa pe ñemenda? Ha oiméramo ñamenda, ¿javalorápa ñane matrimónio? Ñamombaʼéramo ha jarrespetáramo pe matrimónio, jahechauka hína jasegiha Jesús ehémplo. Umi fariséo oporandúrõ guare chupe pe divórsiore, haʼe omensiona mbaʼépa Jehová heʼi vaʼekue pe primer matrimóniope: “Pe kuimbaʼe ohejáta isy ha itúape, ha mokõivégui oiko vaʼerã peteĩntema”. Upéi heʼive: “Avave ndoipeʼái vaʼerã ojuehegui Ñandejára omoĩ vaʼekue oñondive” (Mar. 10:2-12; Gén. 2:24). Jesús oikuaa porã Ñandejára omoñepyrũ hague pe matrimónio ha ohechauka umi omendáva ndojopoíri vaʼerãha. Ñandejára oformárõ guare pe primer matrimónio ndeʼíri Adán ha Évape ikatuha ojedivorsia. Upéva rangue, haʼe oipota kuri umi ‘mokõi’ yvypóra osegi oñondive opa árare. w18.12 páh. 10, 11 párr. 2-4

Ñañepyrũrõ guare jaikuaa pe añetegua ñaaprende iñimportantetereiha ñaneñeʼẽrendu Jehovápe. Ñañemoag̃uivévo hese, ñaaprendeve mbaʼéichapa opensa. Upéva heʼise jaikuaaha la ogustáva ha ndogustáiva chupe, ha mbaʼépa haʼe opensa heta mbaʼére. Ha jajegia koʼã mbaʼére jajapo ha jadesidi hag̃ua opa mbaʼe. Ñapensa jave Jehová opensa lája ñañeñandu porãve, péro sapyʼánte ijetuʼu jajapo hag̃ua upéva ñaneimperfékto rupi. Ñande jaikuaa mbaʼépa Jehová opensa pe tekopotĩre, pe taryrýire, pe predikasiónre, pe ojepuru lájare tuguy ha hetave mbaʼére. Péro hasymiéma hína ñantende hag̃ua mbaʼérepa haʼe opensa péicha. ¿Mbaʼéichapa ikatu ñapensave jahávo Jehová opensa lája? Upearã tekotevẽ jastudia Ñandejára Ñeʼẽ, ñantende mbaʼéichapa haʼe opensa, jajepyʼamongeta umívare ha ñambaʼapo jejopy ñapensa hag̃ua Jehová opensaháicha. w18.11 páh. 23, 24 párr. 2-4

Habacuc oiko vaʼekue peteĩ tiémpo ijetuʼuetereívape. Umi hénte itiémpope guare iñaña ha iviolénto, ha upévare Habacuc ndovyʼaieterei kuri. Opárupinte haʼe ohecha umi israelita iñinhustoha ha ojotrata vaietereiha. Upévare pe proféta oporandu arakaʼépa opáta umi mbaʼe vai, ha mbaʼérepa Jehová ohaʼarõiterei osolusiona hag̃ua la situasión. Habacuc oñandu ndogueropuʼakaveimaha la oikóva, péro ojerure asy Jehovápe ojapo hag̃ua álgo. Haʼe opensáne raʼe Jehová ndojepyʼapyveiha ipuévlore, térã otardaitereiha ojapo hag̃ua la tekotevẽva. ¿Oikómapa ñanderehe upéva? ¿Oporandu piko Habacuc koʼã mbaʼe pórke ndojeroviavéi Jehováre ha ipromesakuérare? Nahániri. Haʼe omombeʼu Jehovápe iprovlemakuéra ha umi mbaʼe okevrantáva chupe, ndahaʼéi yvyporakuérape la omombeʼúva. Péicha ohechauka ndojedesesperaiha ha ojeroviaha Ñandejárare. Habacuc ningo ojepyʼapyeterei ha ndoikuaái mbaʼépa ohaʼarõta. Ndaikatúi ontende mbaʼérepa Jehová ndojapóima álgo, ha mbaʼérepa opermiti osufri. w18.11 páh. 14 párr. 4, 5

Pedro ha Andrés haʼe vaʼekue peskadór, ha Jesús oinvitárõ guare chupekuéra omoirũ hag̃ua chupe “oheja hikuái irréd ha oho hendive” (Mat. 4:18-20). Péro upéva ndeʼiséi ñaaprendéramo pe añetegua tekotevẽtaha jaheja ñande traváho. Peteĩ persóna ningo ombaʼapo ha oñangareko vaʼerã ifamíliare (1 Tim. 5:8). Upéicharõ jepe, jaikuaávo pe añetegua ñakambiáma ñapensa lája umi mbaʼerepýre. Jahechamína peteĩ mitãkuña hérava María ehémplo. Haʼe oipota vaʼekue oiko chugui peteĩ golfísta profesionál ogana hag̃ua heta pláta, upéva la iñimportantevéva kuri chupe g̃uarã. Upéi María oñepyrũ ostudia la Biblia, ha heʼi: “Amáske la Biblia chepytyvõ akambia hag̃ua che kondúkta ha aiko lája, avyʼave ahávo”. María ohechakuaa ndaikatumoʼãiha omotenonde Jehovápe ha avei pe depórte opraktikáva (Mat. 6:24). Upémarõ odesidi omboykénte umi mbaʼe ojapóva oiko hag̃ua chugui peteĩ golfísta profesionál. Koʼág̃a María ojapo iprekursorádo ha heʼi: “¡Ndaipóri ótra kósa chembovyʼave vaʼerã!”. w18.11 páh. 5 párr. 9, 10

Jesús orekórõ guare 30 áño nombaʼapovéi karpinteríape, ha oñepyrũ opredika pórke oikuaa upe tembiapo haʼeha la iñimportantevéva. Haʼe heʼi vaʼekue voi oñembou hague chupe ko yvy ape ári opredika hag̃ua pe marandu porã, péva haʼe peteĩva umi tembiapo Ñandejára omanda vaʼekue chupe (Mat. 20:28; Luc. 3:23; 4:43). Jesús omotenonde vaʼekue pe predikasión, ha oipota kuri avei umi ótro ojapo upéva (Mat. 9:35-38). La majoría umi kristiáno ndahaʼéi karpintéro, péro enterovéva oñehaʼã omboʼe hapichápe umi marandu porã. Ñandejára voi ningo ñanepytyvõ ñaporomboʼe hag̃ua ha upéva ohechauka mbaʼeichaite pevépa iñimportánte ko tembiapo. La Biblia heʼi voi ñande haʼeha “Ñandejára ajudánte” (1 Cor. 3:9; 2 Cor. 6:4). Ñande jahechakuaa siertoha la heʼíva peteĩ salmísta: “Opa mbaʼe nde eréva ningo siertogua memete” (Sal. 119:159, 160). Jehová Ñeʼẽ ningo pe añetegua. Upéicha rupi, ñañehaʼã ikatu hag̃uáicha jaipuru “Ñandejára Ñeʼẽ hekoitépe” (2 Tim. 2:15). Jahechaháicha, iporãiterei ñandekatupyryve jahávo jaipuru hag̃ua la Biblia. Ñandejára Ñeʼẽ haʼe hína pe erramiénta iñimportantevéva jarekóva ñamboʼe hag̃ua umi héntepe mávapa Jehová, mávapa Jesús, ha avei mbaʼépa hína pe Rréino. w18.10 páh. 11 párr. 1, 2

Jesucristo ningo la omoakãva peteĩ ménape, upévare haʼe osegi vaʼerã iñehémplo. Ojapóramo péicha, ndahasymoʼãi hembirekópe orrespeta hag̃ua chupe ipyʼaite guive (Efes. 5:22-25, 33). Peteĩ tembireko orrespetáramo iménape, oñehaʼãta ontende ha otrata porã chupe. Tuakuéra otrata porã ha orrespeta jave hapichápe, omoĩ peteĩ ehémplo porã ifamiliakuérape. Haʼekuéra omboʼe vaʼerã umi mitãme oreko hag̃ua enkuénta umi ótrope ha otrata porã hag̃ua chupekuéra. Por ehémplo, omboʼe vaʼerã ifamiliakuérape ani hag̃ua odipara Salónpe. Avei, oho jave hikuái peteĩ fiestítape omboʼe vaʼerã umi mitãme oheja hag̃ua umi ijedáva raẽ tojeservi umi hiʼupy. Ñande avei jaguerohory vaʼerã umi mitãme opensa jave umi ótrore, por ehémplo oavri jave ñandéve okẽ jahasa hag̃ua. Ñamombaʼéramo la ojapóva hikuái, ovyʼáta ha ohechakuaáta siertoha la Biblia heʼi jave javyʼaiteveha “ñameʼẽvo, ñandéve oñemeʼẽ rangue”. w18.09 páh. 29 párr. 5, 6

Jesucristo ogoverna hína kómo rréi ha ñandegia ikatu hag̃uáicha ñaĩ porã koʼág̃ama voi ha amo gotyove. Iporãta ñapensáramo mbaʼéichapa ideprovécho ñandéve jajeadapta rupi umi kámbio oiko ramoitévape. Por ehémplo, ñande estúdio de famíliape ikatu jahecha mbaʼéichapa ñanepytyvõ umi kámbio ojejapo vaʼekue ñane rreunionkuérape ha japredika lájape. Ñapensa meméramo mbaʼeichaitépa ideprovécho umi instruksión omeʼẽva Jehová organisasión, ifasilvéta ñaneñeʼẽrendu hag̃ua ha javyʼavéta. Por ehémplo, koʼág̃a saʼive oñeimprimi umi puvlikasión, upéicha rupi tuichaiterei ojeaorra. Avei ojepuruve selulár ha távlet, upévare pe marandu porã ikatu og̃uahẽ hetave persónape. ¿Ikatúpa jaipuruve umi puvlikasión elektrónika ha umi archívo multimédia? Jajapóramo upéva, ñapensa hína Jesús opensaháicha. Haʼe ningo oipota ojepuru hekoitépe umi mbaʼe orekóva Ñandejára organisasión. Jahejáramo Cristo ñanemoakã, ñaipytyvõ umi ermánope ojerovia ha iñunidove hag̃ua. w18.10 páh. 25, 26 párr. 17-19

Jahechaukáramo japorohayhuha ha ñañatende porãramo japorotrata lája, ikatúta ñaipytyvõ umi ermáno oñemboʼe asývape ojerurévo konsuélo (2 Cor. 1:3-6). Péro ani ñahaʼarõ perfeksión ermanokuéragui. Ñapensáramo ñane ermanokuéra iperfektoha ñañedesepsionáta (Ecl. 7:21, 22). Jasegi vaʼerã Jehová ehémplo, haʼe ningo oikuaa porã mbaʼépa ikatu ohaʼarõ ñandehegui. Upéicha avei, tekotevẽ ñanepasiénsia ñane ermanokuérare (Efes. 4:2, 32). Arakaʼeve ndajaipotái ñane ermanokuéra opensa noñehaʼãiha voi ni nañakomparái vaʼerã chupekuéra la ótro ojapóvare. Upéva rangue, ñamokyreʼỹ vaʼerã chupekuéra ha ñamombaʼe umi mbaʼe porã ojapóva. Péicha ñaipytyvõta umi ermánope ovyʼa hag̃ua Jehová servísiope (Gál. 6:4). w18.09 páh. 16 párr. 16, 17

Jesúspe g̃uarã ojapo itúa volunta lomímo ke hembiʼu. Jaikuaaháicha, jaʼúramo umi tembiʼu iñaliméntova ñaneresãi ha ñanembaretéta. Péicha avei, jajapóramo Ñandejára volunta katuete jajerovia mbaretevéta. Jajapóramo Jehová omandáva ñandéve, jahechauka hína ñanearanduha (Sal. 107:43). Heta mbaʼe porã jahupytýta ñanearandúramo. La Biblia heʼi: “Mbaʼeve voi ndaikatúi ñakompara pe arandúre [...]. Pe persóna oñakarama hatãva pe arandúre ovyʼáta, pe arandu haʼetéta chupe g̃uarã peteĩ yvyramáta omeʼẽva vída” (Prov. 3:13-18). Jesús heʼi vaʼekue: “Peẽ peikuaáma koʼã mbaʼe, ha pejapóramo katu pevyʼáta” (Juan 13:17). Jesús disipulokuéra katuete ovyʼáta kuri osegíramo ojapo Jesús omanda vaʼekue chupekuéra. Haʼekuéra iñeʼẽrendu meme vaʼekue Jesúspe ha osegi iñehémplo. w18.09 páh. 4 párr. 4, 5

Adán ha Eva oiko vaʼekue haʼeño hardín de Edénpe. Péro ¿mbaʼérepa ikatu jaʼe haʼekuéra ndojepyʼapýi hague ótrore? Jehová heʼi vaʼekue chupekuéra ifamília reta hag̃ua ikatu hag̃uáicha omyenyhẽ ko yvy ha ojapo chugui peteĩ paraíso (Gén. 1:28). Jehová oipota kuri entéro oikóva ko yvy ape ári ovyʼa. Adán ha Eva katu ndojepyʼapýi umi ifamília onasétavare. Jehová oipota kuri Adán ha Eva familiakuéra ombaʼapo oñondive ojapo hag̃ua ko yvýgui peteĩ paraíso. Upéva ningo haʼe vaʼekue peteĩ tembiapo tuichaitereíva. Adán ha Eva oipytyvõ vaʼerãmoʼã Jehovápe okumpli hag̃ua hembipota ojapóvo ko yvýgui peteĩ paraíso. Haʼekuéra ojapórire upéva ikatúta kuri oike pe lugár Ñandejára orekóvape opytuʼu hag̃ua (Heb. 4:11). Epensamíntena mbaʼeichaitépa ovyʼa vaʼerãmoʼã hikuái ojapórire upe tembiapo. Jehová katuete tuichaiterei ovendesi vaʼerãmoʼã chupekuéra opensárire hapicháre. w18.08 páh. 18 párr. 2; páh. 19, 20 párr. 8, 9

¿Mbaʼépa rejapóta ojeʼéramo nderehe peteĩ mbaʼe ndasiértoiva? Upéva oiko vaʼekue Jesús ha Juan el Bautístare (Mat. 11:18, 19). Péro, ¿mbaʼépa ojapo Jesús oikórõ guare hese upéva? Haʼe ndoikói kuri operde rei itiémpo okonvense hag̃ua umi héntepe japuha la ojeʼéva hese. Upéva rangue, omokyreʼỹ umi persónape ojesareko hag̃ua umi mbaʼe haʼe ojapóvare. Haʼe oipota kuri umi hénte ojegia umi mbaʼe haʼe ojapóvare ha omboʼévare. Jesús heʼi vaʼekue: “Jajapóvare ojekuaa ñanearandúpa” (Mat. 11:19). ¿Mbaʼépa ikatu ñaaprende Jesús ehémplogui? Sapyʼánte ikatu oĩ ñandekritikáva térã oñeʼẽ reíva ñane kóntrape, ha upéva káusare oñepensa vai ñanderehe. ¿Mbaʼépa ikatu jajapo péicha jave? Oĩramo omosarambíva japu ñane kóntrape, jahechauka vaʼerã jaiko lájare japuha umi mbaʼe ojeʼéva. Avei ñañehaʼãkena jasegi Jesús ehémplo ha ñanderekoporã. Péicha jahechaukáta umi héntepe japuha la ojeʼéva ñanderehe. w18.08 páh. 6 párr. 11-13

Caín, Salomón ha umi israelita oreko kuri oportunida oñarrepenti ha okambia hag̃ua (Hech. 3:19). Jehová ndahaʼéi omboykéva ensegída isiervokuérape ojavy haguérente. Katuete ñanemanduʼa mbaʼéichapa haʼe operdona kuri Aarónpe. Koʼág̃a avei, Jehová ñanderayhu rupi omeʼẽ ñandéve konsého ani hag̃ua jajapo ivaíva. Upearã oipuru la Biblia, ñane puvlikasionkuéra ha avei ñane ermanokuérape. Ñapenáramo Jehová konséhore, haʼe katuete ñandeporiahuverekóta. Jehová imbaʼeporã ñanendive nañamereséiramo jepe. ¿Mbaʼérepa ojapo upéva? (2 Cor. 6:1). Péicha omeʼẽ ñandéve oportunida “ñamboyke hag̃ua opa mbaʼe oñemoĩva Ñandejára rembipotáre ha ani hag̃ua jaipota umi mbaʼe ko mundopegua” (Tito 2:11-14). Ko múndo añáme katuete jahasáta umi situasión tekotevẽtahápe jahechauka ñandefielha Jehovápe. ¡Jajedesidi vaʼerã siémpre ñañemoĩtaha ijykére! w18.07 páh. 21 párr. 20, 21

Ñande ningo jaipota Ñandejára ñandeguerohory, ndahaʼéi jahekáva ko múndo ñandeguerohory. ¿Mbaʼépa ñanepytyvõta upearã? Ñanemanduʼa vaʼerã mokõi mbaʼére. Primero, Jehová siémpre ohechaukaha omombaʼeha umi ifiélvape chupe (Heb. 6:10; 11:6). Haʼe ovaloraiterei isiervokuéra iñeʼẽrendúvape, upévare haʼetéta chupe iñinhústova ndorekóiramo chupekuéra enkuénta. Haʼe “oikuaa mbaʼéichapa oiko umi ihústova” ha mbaʼéichapa osalváta chupekuéra (Sal. 1:6; 2 Ped. 2:9). Segundo, Jehová ohechauka omombaʼeha isiervokuérape ñaimoʼãʼỹháicha. Péro haʼe ndoguerohorymoʼãi umi ojapóvape mbaʼe porã oipotáguinte ótro oguerohory chupe. ¿Mbaʼérepa? Pórke Jesús heʼi haguéicha, upévante la orresivítava umichagua (Mat. 6:1-5). Heta vése ndojerahái enkuénta ni ndojehechái umi mbaʼe porã jajapóva ótro rehehápe. Péro Jehová ohechapaite ha ñanerrekompensáta. w18.07 páh. 9 párr. 8, 10

Pedro nontendeporãi kuri mbaʼépa heʼise chupe Ñandejára. Péro kavalete upe moméntope Cornelio mensaherokuéra og̃uahẽ hendápe. Pe espíritu sánto ogia Pédrope oho hag̃ua Cornelio rógape, ha haʼe osẽ oho umi mensahérondi. Pedro ojegiárire opensa lájarente arakaʼeve ndohomoʼãi kuri Cornelio rógape. Umi judío núnka ndohóiva umi ndahaʼéiva judío rógape. Pedro ñepyrũrã opensa vai vaʼekue umi ndahaʼéivare hetãygua. Péro, ¿mbaʼérepa upéicharõ oho Cornelio rógape? Pe visión ohecha vaʼekue ha pe espíritu sánto oipytyvõ chupe okambia hag̃ua opensa lája. Upévare ohendu rire Cornéliope heʼi: “Koʼág̃a añetehápe antende Ñandejára otrataha enterovépe peteĩchante, haʼe oguerohory entéro umi hembiapo porãva ha okyhyjéva chugui, tahaʼe haʼéva tetãygua” (Hech. 10:34, 35). Ko entendimiénto pyahu oñemyesakãva Pédrope opokoiterei hese. w18.08 páh. 9 párr. 3, 4

Ñande ningo katuete ñamboyke umi mbaʼe ombojeguarúva Ñandejárape. Péro, ¿mbaʼépa jajapóta jajecháramo peteĩ situasión ndaiporihápe peteĩ Léi bíblica? ¿Mbaʼéichapa jaikuaáta mbaʼépa Ñandejára oipota jajapo? Oimérire jaheja la Biblia ohekomboʼe ñane konsiénsia, katuete jadesidi porãta. Jehová ñanderayhu rupi omeʼẽ ñandéve heta prinsípio bíblico ogia hag̃ua ñane konsiénsia. Haʼe heʼi: “Che hína nde Jára Jehová. Umi mbaʼe che romboʼéva ningo ndedeprovechorã, che rogia reho hag̃ua tape porãre” (Is. 48:17, 18). Jajepyʼamongeta jave umi prinsípio oĩvare la Bíbliape ha jaheja opoko ñane korasõre, ikatúta ñahekomboʼe ha jakorrehi ñane konsiénsia, péicha jadesidi porãta. Umi prinsípio ningo ñanepytyvõ ñapensa ha jadesidi porã hag̃ua. Ñantendéramo umi prinsípio bíblico jaikuaáta mbaʼéichapa Jehová opensa ha mbaʼérepa omeʼẽ ñandéve umi Léi. w18.06 páh. 17 párr. 5; páh. 18 párr. 8-10

‘Herodes segidorkuéra’, haʼéva umi oapojáva pe partído polítiko osegíva Herodes, omoñuhãse Jesúspe. Haʼekuéra oipota Jesús heʼi ndojepagái vaʼerãha pe impuésto, péicha ojeakusáta chupe opuʼãseha pe goviérno rrománore. Péro Jesús heʼíramo ojepaga vaʼerãha, umi hénte ikatu ohejapa rei chupe. ¿Mbaʼépa ojapo kuri Jesús? Haʼe oñatende ani hag̃ua ofavorese ni peteĩvape. Jesús oikuaa heta impuésto kovraha ikorruptoha, péro noñekonsentrái upévare. Síno opensa Ñandejára Rréino añoite la añetehápe osolusionátava yvyporakuéra provléma. Jahechaháicha, Jesús omoĩ peteĩ ehémplo iporãitereíva ñandéve g̃uarã. Ñande avei nañañentremetéi vaʼerã umi téma polítikore, haʼetéramo jepe umi mbaʼe ojejaposéva oĩ porã ha ihustoha. Kristianokuéra oñekonsentra vaʼerã Ñandejára heʼívare oĩ porãha ha Irréinore. Upévare ndajaikói vaʼerã jataky umi inhustísia oikóvare pe polítika káusare, ni ndajaikói vaʼerã ñañeʼẽ vai umívare (Mat. 6:33). Heta testígo de Jehová okambia umi mbaʼe opensáva pe polítikare. w18.06 páh. 6 párr. 9-11

Oiméne ndahaʼéi pe deséo sexuál año la Satanás oipurúva omoñuhã hag̃ua umi ánhelpe. Haʼe oprometéne avei chupekuéra odominataha yvyporakuérape. Oiméne péicha Satanás oñehaʼã raʼe ojoko Jehová propósito, ani hag̃ua oñekumpli pe profesía oñeʼẽva pe kuña familiare rehe (Gén. 3:15). Péro Ñandejára ndohejái Satanás osẽ la ijidéape. Upévare ogueru pe dilúvio, ha péicha ombyaipaite la Satanás ha umi demónio oplanea vaʼekue. Pe tekovai ha pe orgúllo ndahasyiete ñanemoñuhã hag̃ua. Ñapensamíntena, umi ánhel omoirũva Satanáspe oiko vaʼekue hetaiterei tiémpore Jehová ndive yvágape. Upéicharõ jepe opermiti hikuái umi deséo vai osegi okakuaa ha imbareteve ohóvo. Aníkena ñanderesarái, umi deséo vai ikatu hína oñembohapo ñande pyʼapýpe, tahaʼe jepe raʼe heta tiémpoma jaservi hague Jehovápe (1 Cor. 10:12). Upévare iñimportanteterei pyʼỹi jahecha mbaʼépa oĩ ñane korasõme. Péicha ikatúta ñamboykete umi deséo vai ha ñañehaʼãta ani hag̃ua ñandeorgullóso ha ñapensa ñandejehénte (Gál. 5:26; Col. 3:5). w18.05 páh. 25 párr. 11, 12

Pablo oñedesanima la majoría umi judío orrechasa haguére pe mensáhe oñeʼẽva Ñandejára Rréinore. Upéicharõ jepe, haʼe noñentregái, síno osegi opredika. Tiémpo rire, haʼe oexplika mbaʼépa oipota ohupyty entéro umi judío. Haʼe heʼi: “Añetehápe che pyʼaite guive aipota ha ajerure asy Ñandejárape hesekuéra, ojesalva hag̃ua hikuái. Che ikatu amombeʼu haʼekuéra añetehápe oĩ porãseha Ñandejára ndive, péro ndoikuaaporãi chupe” (Rom. 10:1, 2). Pablo heʼi kuri: “Che pyʼaite guive aipota”. Péicha haʼe ohechauka añetehápe oipotaha umi judío ojesalva (Rom. 11:13, 14). Pablo orroga Jehovápe oipytyvõ hag̃ua umi judíope ikatu hag̃uáicha oasepta pe mensáhe del Rréino. Haʼe heʼi avei “haʼekuéra añetehápe oĩ porãseha Ñandejára ndive”. Pablo ohecha umi mbaʼe porã orekóva umi persóna ha opensa amo gotyove ikatutaha oservi Jehovápe. Haʼe oikuaa umi judío oĩ porãseha Ñandejárandi, ha kon el tiémpo ikatuha oiko chuguikuéra kristiáno ikyreʼỹva, haʼéicha avei. w18.05 páh. 13 párr. 4; páh. 15, 16 párr. 13, 14

Káda uno ñapensa vaʼerã mbaʼépa ikatu jajapo ñaipytyvõ hag̃ua ñane ermanokuérape. Pablo heʼi vaʼekue umi kristiáno hebréope: “Pemombaretékena pende jyva ikaneʼõva ha pene renypyʼã ikangýva. Pesegíkena peguata derechoite pe tape porãre, pe ikarẽva okuera hag̃ua ha ani oĩ vaive” (Heb. 12:12, 13). Entéro ikatu jaʼe umi mbaʼe omombarete ha omokyreʼỹ vaʼerã ñande rapichápe, umi imitãva jepe ikatu ojapo upéva. Pablo heʼi vaʼekue: “Peẽ ningo peservi Crístope, ha oimérõ penekyreʼỹ ha pekonsola pende rapichápe pehayhúgui chupekuéra, oimérõ pejepyʼapy ojuehe ha peiporiahuvereko hína pende rapichápe, upéicharõ pechemyenyhẽna vyʼágui. Pejapo upéva pejoayhúvo, peikóvo peteĩ ñeʼẽme ha pepensávo enterove peteĩchapa. Ani pejapo mbaʼeve peiko vaiségui ni peñembovaleségui, peñemomirĩ guei ha pepensa umi ótro tuichaveha pendehegui. Aníkena pejapo peẽmente ou porãva, síno pejepyʼapy vaʼerã avei pende rapicháre” (Filip. 2:1-4). w18.04 páh. 22 párr. 10; páh. 23 párr. 12

Jehová ningo ñanemosãso Jesús rupive pekádo ha ñemano poguýgui, ikatu hag̃uáicha ñañemeʼẽmbaite iservísiope. ¿Mbaʼéichapa ikatu jaipuru porã pe liverta jarekóva? Upéva jajapóta jaipurúramo ñane tiémpo ha ñane mbaretekue Jehová servísiope. Péicha ndajaikomoʼãi ko múndo oikuaveʼẽva rapykuéri, ni nañañehaʼãmoʼãi tódo el tiémpo jahupyty hag̃ua umi mbaʼe ñandéve ñandegustávante (Gál. 5:16). Ñapensamína Noé ha hogayguakuérare. Upérõ guare umi hénte iviolentoiterei ha hekokyʼa vaʼekue. Péro haʼekuéra ndojeheʼái hesekuéra ni umi mbaʼe ojapóvare hikuái. Upéva rangue odesidi ombaʼapo jejopy pe traváho Jehová omeʼẽ vaʼekuépe chupekuéra. Ojapo hikuái pe árka, ombyaty hiʼupy ijupekuéra g̃uarã ha umi animálpe g̃uarã, ha avei oavisa umi héntepe outaha peteĩ ama guasu. “Noé ojapo opa mbaʼe omanda vaʼekue chupe Ñandejára. Heʼi hagueichaite chupe ojapo” (Gén. 6:22). Upéicha rupi Noé ha ifamília ojesalva kuri (Heb. 11:7). w18.04 páh. 10 párr. 8; páh. 11 párr. 11, 12

Satanás ha umi demónio oipuru avei umi rrelihión japu ha umi komérsio ha negósio oĩva ko múndope. Péicha ombotavy hikuái “ko múndo kompletoitépe” (Apoc. 12:9). Satanás ojevale umi rrelihión japúre omoherakuã vai hag̃ua Jehovápe, ha hiʼarive ojapo ikatúva guive pono ojekuaa Ñandejára réra (Jer. 23:26, 27). Upéicha rupi, oĩ persóna ipyʼaporãva oimoʼãva oadoraha Ñandejárape péro añetehápe oadora hína umi demóniope (1 Cor. 10:20; 2 Cor. 11:13-15). Satanás oipuru avei umi komérsio ha negósio oĩva ko múndope ñanembotavy hag̃ua. Oipota ñapensa pe pláta ha umi mbaʼerepy haʼeha la ñanembovyʼáva (Prov. 18:11). Umi oroviáva koʼã japu, oiko pe “pláta rapykuéri” oservi rangue Ñandejárape (Mat. 6:24). Oĩ voi umi persóna ohayhu vaʼekue Ñandejárape, péro upéi ou ohayhuve umi mbaʼerepy ha omboyke chupe (Mat. 13:22; 1 Juan 2:15, 16). w18.05 páh. 23 párr. 6, 7