Abril

Aristarco haʼe vaʼekue peteĩ amígo ifiélva apóstol Páblope g̃uarã. Iválle kuri Tesalónica, peteĩ siuda oĩva Macedóniape. La Bíbliape oñeñeʼẽ Aristarco rehe primera ves oĩrõ guare Páblondi Éfesope, iprimér viáhe de predikasión aja. Upérõ umi hénte ojapo tuicha guyryry ha ojagarra hikuái Aristárcope (Hech. 19:29). Upéi ojepoi rire chugui, haʼe ndodiparái, síno ifiél ha opyta Páblondi. Upéi un tiémpo rire, Gréciape umi ikontrariokuéra osegínte oñehaʼã ojuka hag̃ua Páblope, péro Aristarco osegi omoirũ Páblope (Hech. 20:2-4). Áño 58 rupi ojegueraha Páblope préso Rómape, ha Aristarco omoirũ chupe upe viáhe pukuetépe, hiʼarive upe viáhepe oñehundi kuri la ivarkokuéra pe márpe (Hech. 27:1, 2, 41). Og̃uahẽ rire hikuái Rómape, posívlemente Aristarco opyta avei préso un tiémpo apóstol Páblondi (Col. 4:10). Péicha jahecha Pablo añetehápe oreko hague peteĩ amígo ifiélva, ha upéva tuichaiterei omokyreʼỹ chupe. Ñande avei jahechaukáta haʼeha peteĩ amígo ifiélva ñaiméramo ñane ermanokuéra ykére iporã jave, ha avei ohasa asy jave hikuái. w20.01 9 párr. 4, 5

Peteĩ kristiáno ojeporavóva oho hag̃ua yvágape ikatu opensa nomereseiha upe priviléhio iporãitéva. Upéicharõ jepe, ni michĩmi ndodudái Jehová oiporavo hague chupe, ha ovyʼaiterei ha oagradese voi ipyʼaite guive opensávo oikotaha yvágape (1 Ped. 1:3, 4). ¿Péro heʼisépa upéva umi unhído omanosentemaha? Apóstol Pablo okontesta upe porandu. Haʼe okompara umi unhído rete peteĩ óga kárpare, ha heʼi: “Jaiko aja ko óga oĩvape yvy ape ári, ñañelamenta jaikóvo ha ñañekevranta, péro ndahaʼéi jahejaségui ko óga kárpa jaipeʼaramoguáicha peteĩ ao. Ñande ñañeñandu péicha pórke jarresivise pe óga yvagapegua. Péicha ñande rete ikatúva omano rekovia, jarresivíta jeikove opaveʼỹva” (2 Cor. 5:4, nóta). Upéicharõ, ndahaʼéi ku ikueráimava ko yvýgui ha omanoséntemava. Upéva rangue, haʼekuéra ovyʼa ha oipuruse káda día oservi hag̃ua Jehovápe ifamília ha iñamigokuérandi. Péro tahaʼe haʼéva la ojapóva hikuái, siémpre imanduʼa pe esperánsa porãite orekóvare (1 Cor. 15:53; 2 Ped. 1:4; 1 Juan 3:2, 3). w20.01 23 párr. 12, 13

Sapyʼánte tekotevẽ Jehová ñandekorrehi ikatu hag̃uáicha ñanerekomboʼe. Haʼe ningo ojapo upéva heta hendáicha. Por ehémplo, ikatu oime ñahendu raʼe peteĩ mbaʼe ojeʼéva rreunionhápe térã jalee la Biblia, ha jahechakuaa tekotevẽha ñakambia ñapensa lája térã peteĩ mbaʼe jajapóva. Térã ikatu avei umi ansianokuéra ñanepytyvõ pe ñaikotevẽhápe. Tahaʼe haʼéva pe oipurúva ñandekorrehi hag̃ua, Jehová siémpre ojapo upéva ñanderayhu rupi (Jer. 30:11). Jehová ñanepytyvõ ñaaguanta hag̃ua umi situasión ijetuʼúva. Peteĩ túa ohayhúva ifamíliape oipytyvõ itaʼýra o itajýrape ohasa asy jave hikuái. Ñande Ru yvagapegua ningo upeichaite avei ojapo, haʼe ñanepytyvõ ojere vaipa jave ñandéve. Upearã haʼe oipuru ijespíritu sánto, ñandeprotehéva oimeraẽ mbaʼe ikatúvagui ombyai pe amista jarekóva hendive (Luc. 11:13). Jehová ningo oñangareko avei ñanderehe ñañekevrantaiterei térã ñañedesanima jave. Por ehémplo, omeʼẽ ñandéve peteĩ esperánsa iporãitereíva, ha upe esperánsa ñanepytyvõ jasegi hag̃ua ñaaguanta umi provléma. Epensamína ko mbaʼére: Tahaʼe haʼéva pe oikóva ñanderehe, ñande Ru ñanderayhuetéva katuete omyatyrõ jeýta upéva. Umi mbaʼe vai jahasáva ningo sapyʼami g̃uarãnte, péro umi vendisión Jehová omeʼẽtava ñandéve opa ára g̃uarã (2 Cor. 4:16-18). w20.02 5 párr. 14, 15

¡Ñande ningo ikatu jaipeʼaite ñandejehegui pe envídia! Jahechami José ermanokuéra ehémplo. Ohasa rire heta áño omaltrata hague hikuái Josépe, haʼekuéra ojotopa hendive Egíptope. Péro omombeʼu mboyve chupekuéra mávapa haʼe, José omoĩ a pruéva iñermanokuérape oikuaa hag̃ua okambiámapa raʼe hikuái. Upearã oinvita chupekuéra okaru hag̃ua hendive, ha upépe José oservika iñermáno pahague Benjamínpe, hetave tembiʼu umi ótrogui (Gén. 43:33, 34). Péro ndajatopái mbaʼeve ohechaukáva haʼekuéra oenvidia hague Benjamínpe upe haguére. Upéva rangue, ojekuaa hesekuéra añetehápe ojepyʼapyha iñermánore ha avei itúa Jacob rehe (Gén. 44:30-34). José ermanokuéra ohupyty kuri peteĩ mbaʼe iporãitereíva: Haʼekuéra oipytyvõ oĩ jey hag̃ua pyʼaguapy hogapýpe. ¿Mbaʼéicha rupípa oiko upéva? Pórke naiñenvidiosovéima hikuái (Gén. 45:4, 15). Upéicha avei ñande jaipeʼaitéramo ñandejehegui pe envídia, ñaipytyvõta siémpre oĩ hag̃ua pyʼaguapy ñande rogapýpe ha avei kongregasiónpe. Jehová ningo oipota ñañehaʼã ani hag̃ua ñaneenvidióso, ha oipota avei ñaipytyvõ oĩ hag̃ua pyʼaguapy. Ñande ñaneumílderamo, ñañekontenta umi mbaʼe jarekóvare ha ñamombaʼe ha jaguerohorýramo ñande rapicha ojapóva, ndajahejamoʼãi pe envídia heñói ñande apytépe. w20.02 19 párr. 17, 18

Peteĩ mbaʼe ikatúva rejapo rehechauka hag̃ua reagradeseha Jehovápe nderayhu haguére, haʼe hína reñemboʼe chupe. Reñemboʼe jave emombeʼu vaʼerã Ñandejárape umi mbaʼe ndepyʼapýva, ha eagradese chupe umi mbaʼe ojapóva nderehehápe. Ha eñatende porã vaʼerã mbaʼéichapa haʼe ombohovái umi ne ñemboʼe. Péicha amás día rehayhuvéta rehóvo Jehovápe ha imbaretevéta pe amista erekóva hendive. Avei reimevéta segúro haʼe nentendeha. Péro resegi hag̃ua reñemoag̃ui hese, tekotevẽ rentende mbaʼépa ogusta térã ndogustái chupe ha mbaʼérepa haʼe ojapo peteĩ mbaʼe. Avei iñimportánte reikuaa mbaʼépa ohaʼarõ ndehegui. Ha koʼã mbaʼe reikuaáta restudiáramo añoite Iñeʼẽ, la Biblia. Emombaʼékena la Biblia. Upépe añoite oñemombeʼu la verda Jehováre ha umi mbaʼe haʼe ojaposévare nderehehápe. ¿Mbaʼéichapa rehechaukáta remombaʼeha la Biblia? Relee vaʼerã káda día, ejeprepara porã restudia mboyve pe ermáno oúvandi nembostudia hag̃ua, ha emoĩ en práktika umi mbaʼe reaprendéva (Sal. 119:97, 99; Juan 17:17). ¿Ndépa rejapóma peteĩ prográma ikatu hag̃uáicha relee la Biblia káda día? ¿Reñehaʼãpa rekumpli upéva? w20.03 5 párr. 8, 9

Oiméramo nde ndaikatúi eguata heta, ejekolokakuaa peteĩ lugár ikatutahápe epredika umi ohasávape. Térã ikatu repredika por kárta, por teléfono térã tahaʼe haʼéva lugár eimehárupi. Heta ermáno ndaikatúiva oguata, ovyʼa ha oñeñandu porãiterei ikatu haguére opredika de diferénte fórma. Nderasýramo jepe, nde ikatúnte avei reñemeʼẽmbaite Jehová servísiope. Pablo heʼi kuri: “Opa mbaʼerã chembarete Ñandejára omeʼẽgui chéve podér” (Filip. 4:13). Pablo oikotevẽ kuri upe podér oúramo guare hasy peteĩva umi iviáhepe. Haʼe heʼi vaʼekue umi Galaciaguápe: “Peikuaa avei che cherasykatu rupi, aikuaauka ypy hague peẽme umi marandu porã” (Gál. 4:13). Upéicha avei, ñanderasykatu jave jareko oportunida japredika hag̃ua ótrope. Por ehémplo ikatu japredika umi doktórpe, enfermerokuérape ha umícha. Koʼã persóna ningo pyʼỹinte noĩri hógape umi ermáno oho jave opredika hag̃ua chupekuéra. w19.04 4, 5 párr. 10, 11

Pe áño de servísio 2018-peguare ohechauka mas de 223.000 puvlikadór oikoha umi lugár ojeproivihápe ñandehegui heta mbaʼe, ha ótro hendápe katu ojeproiviete voi jaservi Jehovápe. Ko mbaʼe oikóva ningo nañanesorprendéi. Ñande kristianokuéra jaikuaa voi jajepersegitaha. Jaiko jaikohápe, umi goviérno ikatu hína derrepentete ha ñahaʼarõʼỹve jave oproivi ñandehegui jaadora Ñandejára ñanderayhuetéva Jehovápe. Peteĩ goviérno oproivíramo ñandehegui jaadora Jehovápe, ikatu hína ñapensa ndajarekoiha Jehová vendisión. Péro ñanemanduʼa vaʼerã oĩramo ñandepersegíva ndeʼiseiha Jehová ndovyʼaiha ñandereheve. Ñapensamína apóstol Pablo ehémplore. Chupe ningo añetehápe Jehová oguerohory vaʼekue. Apóstol Pablo oreko vaʼekue pe priviléhio oskrivívo 14 kárta oĩva umi Escrituras Griégaspe, ha oñenombra vaʼekue chupe apóstol oñemondóva umi tetã ambueguápe. Upéicharõ jepe, heta ojepersegi vaʼekue chupe (2 Cor. 11:23-27). Ñande ñaaprende apóstol Pablo ehémplogui Jehová opermitiha umi isiérvo ifiélvape ojepersegi. w19.07 8 párr. 1, 3

Jehová ningo ñanepytyvõ ñandepuʼaka hag̃ua ñane enemigokuérare, ha ojapóvo upéva ohechauka ojepyʼapyetereiha ñanderehe. Ñane enemígo prinsipál haʼe hína Satanás ha umi demónio. Jehová ñandeavisa jajekuida hag̃ua koʼã enemígogui, ha omeʼẽ ñandéve umi mbaʼe ñaikotevẽva ñandepuʼaka hag̃ua hesekuéra (Efes. 6:10-13). Jahejáramo Jehová ñanepytyvõ ha jajeroviárõ hese ñande pyʼaite guive, ikatúta ñañemoĩ Satanás rehe. Ñande ningo ikatu jajerovia apóstol Pablo ojapo haguéicha. Haʼe oskrivi vaʼekue: “Ñandejára oĩramo ñanendive, ¿máva piko oñemoĩta ñanderehe?” (Rom. 8:31). Ñande ningo kristiáno tee ha ndajaikói ñañeinteresaiterei Satanás ha umi demónio ojapóvare. Upéva rangue, ñañehaʼã ñaaprendeve Jehovágui ha jaservi porã chupe (Sal. 25:5). Péro iporã jaikuaa mbaʼéichapa ombaʼapo Satanás, péicha nañanembotavymoʼãi (2 Cor. 2:11). w19.04 20 párr. 1, 2

¿Ñandépa ñahendukuaa hína ñande rapicha ohasa asývape? Ikatu ñapensa ñahendukuaaha ñamañánteramo pe ótra persónare jaʼeʼỹre chupe mbaʼeve. Péro ndahaʼéi upévante jajapo vaʼerã ñahendukuaa hag̃ua ótrope. ¿Mbaʼéichapa ikatu jahechauka ñambyasy ha jaiporiahuverekoha ñande rapichápe ñahendu aja chupe? Sapyʼánte, umi mbaʼe jaʼéva mborayhúpe ha ñapensa porã rire ikatu ohechauka mbaʼéichapa ñande ñañeñandu. Por ehémplo ikatu jaʼe: “¡Ambyasyete ningo la oiko vaʼekue nderehe!”. Ikatu voi ñaporandu jey chupe algúna kósa jaasegura hag̃ua ñantende porãpa hína la heʼíva upe ñane amígo térã ñane amíga osufríva. Ikatu avei jaʼe chupe: “Chepytyvõmína antende porã hag̃ua upe ere vaʼekue”. Térã ikatu jaʼe: “Erérõ guare péicha, antende kuri..., ¿antende porãiko hína?”. Péicha ñañeʼẽramo mborayhúpe ñande rapichápe, jaasegura hína chupe añetehápe jajapysakaha hese ha ñañehaʼãha ñantende umi mbaʼe oñandúva (1 Cor. 13:4, 7). Ñañatende vaʼerã ikatu hag̃uáicha ‘ñanembegue ñañeʼẽ hag̃ua’. Ani ñañeʼẽjoko pe persónape jakorrehi térã ñameʼẽ hag̃ua chupe konsého, ha ñanepasiénsiakena hese. Jaʼe rangue chupekuéra mbaʼéichapa osolusiona vaʼerã iprovléma, ikuentave jahechauka ñambyasy ha jahayhuha chupekuéra (1 Ped. 3:8). w19.05 17, 18 párr. 15-17

Ogapýpe ningo menakuéra ohayhu vaʼerã hembirekópe “Cristo ohayhu haguéicha pe kongregasión” (Efes. 5:28, 29). Osegi hag̃ua Jesús ehémplo, menakuéra omotenonde vaʼerã umi mbaʼe hembireko oikotevẽva térã ovenefisiátava chupe, haʼe oñemotenonde rangue. Algúnope g̃uarã ikatu ijetuʼu hína otrata péicha hembirekópe, pórke okakuaa vaʼekue peteĩ família ndojotrataporãihápe hikuái ha ndohechaukái ojupe ojoayhuha. Ha ijetuʼúramo jepe chupekuéra okambia hag̃ua, ohejámante vaʼerã upe kostúmbre vai ikatu hag̃uáicha okumpli Cristo Léi. Peteĩ ména ohayhúramo hembirekópe Cristo oporohayhu haguéicha, katuete ifásilta hembirekópe orrespeta chupe. Peteĩ túa ohayhúva ifamiliakuérape núnka nomaltratamoʼãi chupekuéra, tahaʼe heʼíva térã ojapóva rupive (Efes. 4:31). Upéva rangue, haʼe heʼi ha ohechauka omombaʼeha ha ohayhuha chupekuéra, péicha ifamiliakuéra oñandu ojeprotehe ha oñeñangarekoha hesekuéra. Upéicha ojapóramo, ifamiliakuéra katuete ohayhúta chupe ha ojeroviáta hese. w19.05 6 párr. 21

¿Mbaʼépa oiméne María opensa rakaʼe Gabriel heʼi vaʼekuére chupe? ¿Heʼisépa raʼe pe ánhel Jesús ojupitaha rréiramo Israélpe Herodes rekovia, térã umi ótro governánte oútava upe rire rekovia? Jesúsgui oikóramo rréi, Maríagui oikóta kuri pe rréi sy, ha ifamília ikatúta kuri oiko peteĩ palásiope. Péro la Bíbliape ndajatopamoʼãi voínte María ojerure hague oreko hag̃ua peteĩ puésto iñimportánteva pe Rréinope. Mbaʼeichaitépa María iñumílde vaʼekue. Siémpre ñanemanduʼa vaʼerã jastudiaha Ñandejára Ñeʼẽ ha ñane puvlikasionkuéra ñañemoag̃uiseve rupi Jehováre, ha péva hína pe mbaʼe iñimportantevéva jahupytyséva. Jaikuaa porãse avei mbaʼeichagua persónapa ñande ha mbaʼépepa tekotevẽ ñakambia ikatu hag̃uáicha Ñandejára ñandeguerohory (Sant. 1:22-25; 4:8). Upévare, ñañepyrũta jave jastudia, katuete jajerure vaʼerã Jehovápe ijespíritu sánto. Avei jajerure asy vaʼerã chupe tañanepytyvõ jaaprovechapaite hag̃ua ñande estúdio, ha hesakã porã hag̃ua ñandéve mbaʼépepa tekotevẽ ñakambia. w19.05 31 párr. 18, 19

Sapyʼánte ningo ojoʼapa ñandehegui la provléma. Jahechamína mokõi ehémplo. Peteĩ ermáno hérava Juan oreko peteĩ mbaʼasy hérava esclerosis múltiple. Hembireko katu oheja chupe 19 áño omenda haguépe hikuái, ha upéicha rupi haʼe opyta vaʼekue yvýre, ha ndahaʼéi upévante, umi mokõi itajýra ou oheja Jehovápe. Ha peteĩ ermáno hérava Roberto ha hembireko Linda ombohovái ótra situasión ijetuʼúva. Mokõivéva ou opyta travahoʼỹre ha upéi operde hogakuéra pórke ndaikatuvéima opaga hese. Ha ivaiveha, peteĩ doktór heʼi Líndape orekoha peteĩ provléma ikorasõme ikatúva ojuka chupe ha orekoha avei artrítis ivaietereíva. Jehová ningo ñande Apohare ha ñande Túa ñanderayhuetéva, upévare ikatu jaʼe haʼe katuete ontendeha mbaʼéichapa ñañeñandu ñañekevrantaiterei jave, ha ñanepytyvõse ñambohovái hag̃ua umi situasión ijetuʼúva (Filip. 4:6, 7). La Bíbliape jatopa hetaiterei ehémplo ohechaukáva mbaʼeichagua provlémapa ombohovái vaʼekue Jehová siervokuéra. Avei omombeʼu ñandéve mbaʼéichapa Jehová oipytyvõ chupekuéra ombohovái hag̃ua umi situasión oipyʼapyetéva chupekuéra. w19.06 14 párr. 2, 3

Ñanembaʼeporã jave umi ndorekovéimavandi hendive imborayhu jára, ñande jahechauka añetehápe jahayhuha chupekuéra. Koʼág̃a opytápe hikuái haʼeño, koʼýte oikotevẽ umi amígo verdadéro rehe. ¿Mbaʼéichapa ikatu jahechauka ñande haʼeha peichagua amígo? Ikatu ningo ñainvita chupekuéra okaru hag̃ua ñanendive álgo isensillomíva jepe. Jaʼekuaa avei chupekuéra osẽ hag̃ua ñanendive predikasiónpe térã oho hag̃ua ñanendive de paséo. Avei ikatu ñainvita jepi chupekuéra ñanemoirũ hag̃ua jajapo jave ñande estúdio de família. Jajapóramo koʼã mbaʼe, ñambovyʼaitereíta Jehovápe, pórke haʼe “ag̃ui oĩ umi osufrívagui” ha “odefende umi viúdape” (Sal. 34:18; 68:5). Koʼẽrõitéma Ñandejára Rréino ogovernáta ko yvy ha “umi mbaʼe vai oiko vaʼekue yma, opytáta tesaráipe”. Hiʼãitéma ñandéve og̃uahẽ pe tiémpo ‘avave naimanduʼamoʼãihápe umi mbaʼe oiko vaʼekuére yma, umíva ojeietétama ñane korasõgui’ (Is. 65:16, 17). Ñahaʼarõ aja og̃uahẽ upe tiémpo, jasegíkena ñañopytyvõ ha jahechauka jahayhuha entéro ñane ermanokuérape, umi mbaʼe jaʼéva ha jajapóva rupive (1 Ped. 3:8). w19.06 25 párr. 18, 19

Ojapóma heta áño pe rrevísta Ñemañaha heʼi hague: “Pe oikuaa porãvéva Ñandejárape, koʼytevéntema ojeroviáta hese oĩ vove opersegíva chupe”. ¡Ajépa siertoite upéva! Jagueropuʼaka hag̃ua oĩ vove ñandepersegíva, jahayhu vaʼerã Jehovápe ha jajerovia hese ñande pyʼaite guive (Mat. 22:36-38; Sant. 5:11). Jalee vaʼerã la Biblia káda día ñañemoag̃uiseve rupi Jehováre (Sant. 4:8). Jalee aja ñapensa vaʼerã umi kualida porã Jehová orekóvare. Avei ñañehaʼã vaʼerã ñantende mbaʼeichaitépa haʼe ñanderayhu jalee jave umi mbaʼe heʼi ha ojapo vaʼekue (Éx. 34:6). Algúnope g̃uarã ikatu ijetuʼu hína oguerovia hag̃ua Ñandejára ohayhuha chupe, pórke avave ndohechaukáiva ohayhuha chupe. Oiméramo ñande ñañeñandu upéicha, káda día ñañehaʼã vaʼerã jajapo peteĩ lísta ha ñamoĩ pype mbaʼéichapa Jehová ohechaukáma ñandeporiahuverekoha, ha avei imbaʼeporãha ñanendive (Sal. 78:38, 39; Rom. 8:32). Jajepyʼamongetáramo umi mbaʼe jahasa vaʼekuére ha umi mbaʼe jaleévare Ñandejára Ñeʼẽme, katuete oiméne ñaanotáta heta mbaʼe Jehová ojapóma vaʼekue ha osegíva ojapo ñanderehehápe. Amáske ñamombaʼeve umi mbaʼe Jehová ojapóva, koʼýte imbaretevéta ñane amista hendive (Sal. 116:1, 2). w19.07 2, 3 párr. 4, 5

Jehová ningo nomeʼẽi ñandéve derécho ñamoĩ hag̃ua rrégla ñane ermanokuérape. Umi omoĩva rrégla natekotevẽiva ndoprotehéi hína iñermanokuérape, síno omandase hína ijeroviakuérare. Satanás katuete osegíta opersegi Jehová siervokuéra ifiélvape (1 Ped. 5:8; Apoc. 2:10). Satanás ha umi iñirũnguéra oñehaʼãta oproivi ñandehegui jaadora Jehovápe. Péro jakyhyjéramo jepe, ñande arakaʼeve ndajahejamoʼãi Jehovápe ha jasegíta jaservi chupe toiko la oikóva (Deut. 7:21). Jehová ningo oĩ ñande ykére, ha haʼe osegíta ñanepytyvõ ojeproivíramo jepe ñandehegui jaadora chupe (2 Crón. 32:7, 8). Upéicharõ, hiʼãite ñandéve jajedesidi avei umi kristiáno ypykue ojapo haguéicha. Haʼekuéra ningo heʼi vaʼekue umi governánte itiempopeguápe: “Peẽ peimoʼãramo Ñandejárape g̃uarã oĩ porãha rojapo peẽ pejéva rojapo rangue haʼe heʼíva; upéva peẽma peikuaáta. Ore katu ndaikatúi roguerokirirĩ umi mbaʼe rohecha ha rohendu vaʼekue” (Hech. 4:19, 20). w19.07 13 párr. 18-20

Japredika jave, ñahendukuaákena ha ñantende umi héntepe. Ñañehaʼã vaʼerã ñantende mbaʼépa opensa umi hénte ha mbaʼérepa. Apóstol Pablo okakuaa vaʼekue judiokuéra apytépe, péro ojadaptámante opredika hag̃ua umi ndahaʼéivape judío, pórke haʼekuéra ndoikuaaguasúi heta mbaʼe Ñandejára Ñeʼẽgui ni Jehovágui, térã katu ndoikuaaiete voi. ¿Mbaʼépa ikatu jajapo ñantende hag̃ua mbaʼéichapa opensa ha oñeñandu umi hénte ñande territoriopegua, ha mbaʼéichapa ikatu ñañemoĩ ilugarpekuéra? Tekotevẽta ñainvestigaʼimi (1 Cor. 9:20-23). Ñande ningo jatopase umi ‘omeresévape ohendu’ pe mensáhe jagueraháva (Mat. 10:11). Upearã ñaporandu vaʼerã umi héntepe mbaʼépa opensa ha jajapysaka porã hesekuéra. Peteĩ ermáno oikóva Inglatérrape oporandu umi héntepe mbaʼépa ikatu oipytyvõ umi omendávape ovyʼa hag̃ua, mbaʼéichapa oñehekomboʼe vaʼerã umi mitãme osẽ porã hag̃ua hikuái, térã mbaʼéichapa ikatu ñambohovái umi inhustísia. Ohendu porã rire pe persóna heʼíva, pe ermáno oporandu chupekuéra: “¿Mbaʼépa repensa ko konsého ojeskrivi vaʼekuére haimete 2.000 áñoma?”. Upéi, oipuruʼỹre pe palávra “la Biblia”, haʼe ohechauka chupekuéra iselulárpe umi téxto oiporavo porã vaʼekue. w19.07 21 párr. 7, 8

¿Mbaʼeichaite pevépa jahayhu vaʼerã Jehovápe? Jesús heʼi vaʼekue peteĩ fariséope: “Rehayhu vaʼerã Jehová nde Járape nde pyʼaite guive, nde rekove kompletoite reheve, ha entéro ne pensamiénto reheve” (Mat. 22:36, 37). Ñande jahayhuse Jehovápe ñane korasõ mbytete guive, ndahaʼéi vai vaínte. Ha jaipota upe mborayhu okakuaave ohóvo káda día. Jahayhu hag̃ua Jehovápe tekotevẽ jaikuaa porã chupe. La Biblia heʼi: “Pe ndoporohayhúiva ndoikuaái Ñandejárape, pórke Ñandejára ningo mborayhu” (1 Juan 4:8). Apóstol Pablo heʼi vaʼekue jahayhuvetaha Jehovápe jaikuaa porãramo chupe ha ñantendéramo mbaʼéichapa ohecha entéro mbaʼe (Filip. 1:9). Ñañepyrũrõ guare jastudia la Biblia, ñande ñañepyrũ jahayhu Jehovápe ndajaikuaáiramo jepe entéro umi kualida haʼe orekóva. Péro amáske jaikuaave jahávo Jehovápe, jahayhuve avei chupe. Ndareíri ningo ñandéve g̃uarã jastudia meme la Biblia ha jajepyʼamongeta hese haʼe hína peteĩva umi mbaʼe iñimportantevéva ñande rekovépe (Filip. 2:16). w19.08 9 párr. 4, 5

Oiméramo ñaime peteĩ asignasión pyahúpe tekotevẽ jareko ñane amígo pyahurã. Ñanemanduʼa vaʼerã avei jaipotáramo ñane amigorã tekotevẽha ñande voi ñanderory ha ñanembaʼeporã. Ñamombeʼu ñande rapichápe umi mbaʼe porã jahasa vaʼekue Jehová servísiope ikatu hag̃uáicha haʼekuéra ohechakuaa javyʼa hague. Oiméramo jaheja vaʼerã ñane asignasión hasykatu rupi ñane rembireko térã ñane ména, aníkena jakulpa chupe upévare. Térã oiméramo ñande voi la ñanderasykatúva, ani jajekulpa ha ñapensa ñadesepsionaha ñane rembireko térã ñane ménape. Ñanemanduʼa vaʼerã ñande ‘peteĩntemaha’, ha ñamendárõ guare ñapromete hague Jehová renondépe ñañangarekotaha ojuehe tahaʼe haʼéva umi situasión jahasáva (Mat. 19:5, 6). Ha oiméramo jaheja vaʼerã ñane asignasión pórke koʼág̃a jarekóta peteĩ mitã nañapensái vaʼekue jareko, jaasegurákena ñane famíliape haʼe iñimportanteveha ñandéve g̃uarã pe asignasión jareko vaʼekuégui. Jaʼe jey jeýkena pe mitãme haʼe haʼeha ñandéve g̃uarã peteĩ vendisión oúva Jehovágui (Sal. 127:3-5). Avei ñamombeʼu vaʼerã chupe umi mbaʼe porã jahasa vaʼekue ñane asignasiónpe. Jajapóvo upéicha ikatu hína ñamokyreʼỹ ñane famíliape oipuru hag̃ua hekove oservi hag̃ua Jehovápe vyʼápe, upe ñande jajapo haguéicha. w19.08 22 párr. 10, 11

Babilonia Guasu hína entéro umi rrelihión japu oĩva ko múndope, ha ikáusare hetáma oñeñeʼẽ vai Ñandejára rérare. Umi rrelihión omboʼe heta japu Ñandejárare ha oñekomporta ojapoháicha peteĩ kuña rekovai, pórke oapoja umi goviérno oĩvape ko yvýpe. Babilonia Guasu oipuru ipodér ojaprovecha hag̃ua ihentekuérare ha oipeʼa hag̃ua chuguikuéra ipláta. Avei hetaiterei héntepema ojuka, umíva apytépe Ñandejára siervokuérape (Apoc. 18:24; 19:2). Jehová ohundíta “pe kuña rekovaípe”, upearã oipurúta pe “animál salváhe pytãitéva” ha umi “10 hatĩ” orekóva. Ko animál salváhe orrepresenta hína pe Organización de las Naciones Unídaspe (ONU). Umi 10 hatĩ orrepresenta umi goviérno oapojáva upe organisasiónpe. Ñandejára oipota vove, koʼã goviérno ha pe Naciones Unidas oatakáta Babilonia Guasúpe. “Oipeʼapaitéta chugui ikosakuéra ha ohejáta chupe opío”, péicha enterove ohecháta ojapo hague hetaiterei mbaʼe vai (Apoc. 17:3, 16). Pyaʼeterei ningo oñehundíta, oikorõguáicha “un díapente”. Entéro umi oapojáva chupe oñesorprendéta, pórke haʼe heʼi vaʼekue: “Che [...] núnka ndaikomoʼãi añelamenta” (Apoc. 18:7, 8). w19.09 10 párr. 10, 11

Jesús oinvita enterovépe, haʼe arakaʼeve nomboykéi avavépe, síno oasepta umi oservisévape ipyʼaite guive Ñandejárape (Juan 6:37, 38). Jehová onkarga Itaʼýrape oikuaauka hag̃ua umi notísia porã umi héntepe, ha ñande ñamoirũ rupi Jesúspe, jajapo avei upe traváho. Upévare ikatu ñaime segúro Jesús siémpre ñanepytyvõtaha ko tembiapópe (Mat. 28:18-20). Umi hénte iñumíldeva oñemoag̃uise vaʼekue Jesús rehe (Mat. 19:13, 14; Luc. 7:37, 38). ¿Mbaʼérepa? Pórke Jesús idiferénte vaʼekue umi fariséogui. Haʼekuéra ningo ndohechaukái ohayhuha umi héntepe ha avei oñemombaʼeguasu (Mat. 12:9-14). Jesús katu oporohayhukuaa vaʼekue ha iñumílde. Umi fariséo itaryrýi ha ijorgullóso umi puésto importánte orekóvare. Jesús katu omboʼe idisipulokuérape ani hag̃ua itaryrýi, avei omboʼe chupekuéra iñumílde ha oipytyvõ hag̃ua hapichakuérape (Mat. 23:2, 6-11). Umi fariséo ojopyeterei hapichakuérandi ha upévare umi hénte okyhyje chuguikuéra (Juan 9:13, 22). Jesús katu ombopiroʼy umi héntepe pórke otrata porã chupekuéra ha iñamávle hendivekuéra. ¿Jasegípa hína Jesús ehémplo? w19.09 20 párr. 1; 21 párr. 7-9

Umi rreunión ningo ñanepytyvõ ñamombareteve hag̃ua ñane amista Jehovándi. Ha odepende hína mbaʼéichapa jahecha umi rreunión ikatu hag̃uáicha amo gotyove jagueropuʼaka oĩ vove ñandepersegíva (Heb. 10:24, 25). ¿Mbaʼérepa jaʼekuaa upéva? Jahejáramo ñandejoko umi mbaʼe michĩva jepe jaha hag̃ua rreunionhápe, ¿mbaʼépa jajapóta ág̃a umi goviérno oproivi vove ñandehegui ñañerreuni? Péro koʼág̃ama voi jajerresolvéramo ndajafaltamoʼãiha rreunionhápe, ñande ndajakyhyjemoʼãi ág̃a umi oñemoĩva ñanderehe ñandejokose vove ani hag̃ua ñañembyaty. Koʼág̃a hína pe tiémpo jajepokuaa hag̃ua ñamombaʼe ñane rreunionkuéra. Péicha jajapóramo, oĩrõ jepe oñemoĩva ñanderehe térã pe goviérno oproivíramo ñandehegui umi rreunión, mbaʼeve nañandejokomoʼãi ñaneñeʼẽrendu hag̃ua Jehovápe yvypórape rangue (Hech. 5:29). Jaikuaa vaʼerã de memória umi téxto bíblico ñandegustavéva (Mat. 13:52). Ikatu oime hasy ñandéve ñanemanduʼapaite hag̃ua umi téxtore, péro Jehová ikatu oipuru ijespíritu sánto ipoderosoitéva ñanemomanduʼa hag̃ua umi téxtore (Juan 14:26). Umi téxto bíblico ñanepytyvõta ñañemoag̃ui hag̃ua Jehováre, ha ñandefiél hag̃ua jagueropuʼakávo upe situasión. w19.07 3 párr. 5; 4 párr. 8, 9

Oimérõ nde renaséma áño 1914 rire, upéva heʼise tóda la vída reiko hague ko múndo “ára pahápe”. Enterovete jahecha térã ñahendu mbaʼéichapa oñekumpli umi mbaʼe Jesús heʼi vaʼekue oikotaha ko tiémpope, por ehémplo, oĩ gérra, ñembyahýi, terremóto ha mbaʼasy. Avei hetave umi iñañáva ha opersegíva Jehová puévlope (Mat. 24:3, 7-9, 12; Luc. 21:10-12). Jahecha avei mbaʼéichapa umi hénte oñekomporta apóstol Pablo heʼi haguéicha. Enterovete ñande jaadoráva Jehovápe ñaĩ konvensído jaikoha “umi ára pahápe”, ha upéva opa potaitemaha (Miq. 4:1). Ojapóma ningo mas de 100 áño jaikóma hague “umi ára pahápe”, ha jaʼekuaa og̃uahẽ mbotaitemaha huʼãme. Upévare iporãta ñakontesta koʼã porandu iñimportantetéva: “¿Mbaʼe mbaʼépa oikóta oñemohuʼãvo koʼã ‘ára paha’? ¿Ha mbaʼépa Jehová oipota jajapo ñahaʼarõ aja?”. w19.10 8 párr. 1, 2

Ñande ñaaguanta vaʼerã ndahaʼéi oho porã ajánte ñandéve. Ikatu ñamombarete ñane aguánte ñakonfiáramo Jehováre (Rom. 12:12). Pe promésa ojapo vaʼekue Jesús pe téxto koestediaguápe, ohechauka tekotevẽha ñandefiél ñambohováivo opaichagua provléma. Ñaaguantáramo koʼág̃a, ñanembaretevéta ñaaguanta hag̃ua ág̃a og̃uahẽ vove pe jehasa asy guasu. Oikoháicha pe aguántere, ñandepyʼaguasu ñakonfia rupi Jehováre. ¿Mbaʼépa ikatu jajapo ñakonfiave hag̃ua hese? Jalee vaʼerã la Biblia káda día ha jajepyʼamongeta mbaʼéichapa Jehová osalva vaʼekue isiervokuérape ymave (Sal. 68:20; 2 Ped. 2:9). Umi nasión ñandeataka vove pe jehasa asy guasu aja, tekotevẽta ñandepyʼaguasu ha ñakonfia Jehováre mas ke núnka (Sal. 112:7, 8; Heb. 13:6). Ñakonfiárõ hese koʼág̃a, ñanepytyvõta ñandepyʼaguasu hag̃ua ág̃a Gog ñandeataka vove. Ñande ñaime segúro Jehová siémpre oñangarekotaha ñanderehe mborayhúpe (1 Cor. 13:8). w19.10 18 párr. 15, 16

Pe Diablo ningo okontrola ha oipuru ko múndo ikatu hag̃uáicha hasyve ñandéve ñadomina hag̃ua umi deséo vai ha umi mbaʼe yvyporakuéra normálmente ojaposéva (Efes. 2:1-3). Satanás ndoipotái ñande jaadora Jehovápe añoite, upévare haʼe ñanemomýi jahayhu hag̃ua avei ótra kósa. Apóstol Pedro heʼi rire Satanás múndo oñehunditaha ha oĩtaha peteĩ múndo pyahu, heʼi avei: “Che ermanokuéra pohayhuetéva, pehaʼarõ rupi koʼã mbaʼe, peñehaʼãmbaitékena penepotĩ Ñandejára renondépe, ani oĩ pende pype mbaʼeve ivaíva, ha peiko porã hendive” (2 Ped. 3:14). Ñande jasegíramo ko konsého ha ñañehaʼãmbaite ñanepotĩ opa mbaʼépe, jahechauka hína jaadoraha Jehovápe añoite. Satanás ha imúndo osegíta oñehaʼã ñamotenonde hag̃ua ñande rekovépe oimeraẽ mbaʼe Jehovápe rangue (Luc. 4:13). Péro tahaʼe haʼéva umi provléma jarekóva, nañapermitimoʼãi mbaʼeve ni avave oipeʼa Jehovápe ñane korasõgui. Ñande ñaime desidído jaadorataha Jehovápe añoite, haʼe ningo omerese upéva. w19.10 27 párr. 4; 31 párr. 18, 19

Ndaivaíri ningo jajepyʼapy algúna kósare, por ehémplo, ñande ñambovyʼase Jehová ha Jesúspe ha jajepyʼapy upévare (1 Cor. 7:32). Oiméramo japeka raʼe, ñande jajepyʼapy pórke ñaime porãse jey Jehovándi. Avei jajepyʼapy ñambovyʼase rupi ñane ména térã ñane rembirekópe, ha ndajaipotáigui ofalta mbaʼeve ñane famíliape ha ñane ermanokuérape (1 Cor. 7:33; 2 Cor. 11:28). Péro ikatu hína jajepyʼapyeterei avei ofaltárõ g̃uarã ñandéve ao ha tembiʼu (Mat. 6:31, 32). Upéicha rupi, ikatu jaju ñañekonsentraiterei ñakonsegi hag̃ua umi mbaʼerepy. Jahejáramo upéva oiko ñanderehe, ñande jerovia Jehováre ikatu hína ikangy ha saʼi saʼípe ñañemomombyry chugui (Mar. 4:19; 1 Tim. 6:10). Ikatu avei jajepyʼapyeterei jaipotágui ótro ñandeguerohory. Upéva káusare ikatu jaju jakyhyjeve umi hénte oñembohorýrõ g̃uarã ñanderehe térã ñandepersegi, jakyhyje rangue Ñandejáragui. ¿Mbaʼéichapa ikatu jajeprotehe koʼã mbaʼégui? Jajerurévo Jehovápe tañanepytyvõ jajeroviave hag̃ua ha tañanembopyʼaguasu ani hag̃ua jakyhyje umi hénte opensávagui (Prov. 29:25; Luc. 17:5). w19.11 15 párr. 6, 7

Oĩ umi mbaʼe iñimportantetereíva jadesidi vaʼekue nañakambiamoʼãiva núnka. Por ehémplo, ñande ndajahejaséi ñande servísio ñameʼẽva Jehovápe, ha avei ñaime desidído ñandefieltaha ñane ména térã ñane rembirekópe (Mat. 16:24; 19:6). Péro ikatu avei oĩ umi mbaʼe jadesidi vaʼekue tekotevẽva ñakambia. ¿Mbaʼérepa? Pórke pe situasión ikatu hína okambia. ¿Mbaʼépa ñanepytyvõta jadesidi porã hag̃ua? Jajerure Jehovápe tañanemoarandu. Oĩ situasión enterovéva ‘ñaikotevẽhápe arandu’. Upévare, jajeroviákena Jehováre jadesidi jave peteĩ mbaʼe térã tekotevẽ jave ñakambia peteĩ mbaʼe jadesidíma vaʼekue. Ha péicha Jehová ñanepytyvõta jadesidi porã hag̃ua. Ñainvestiga porã vaʼerã. Upearã jastudia vaʼerã Ñandejára Ñeʼẽ, jalee umi puvlikasión oúva Jehová organisasióngui ha ñañeʼẽ umi persóna ikatúvandi ñaneakonseha porã (Prov. 20:18). Iñimportánte jajapo koʼã mbaʼe jadesidi mboyve ñakambiátapa ñande traváho, javátapa ótro lugárpe, térã mbaʼépa jastudiáta ikatu hag̃uáicha ñañemantene ha jasegi jaservi Jehovápe. w19.11 27 párr. 6-8

Javyʼaite ningo Jehová ojapo haguére pe oñekotevẽva ñandelivera hag̃ua pe pekádogui. Ñande ikatu jahupyty pe liverta Jesús rupive. Amo 700 áñorupi Jesús ou mboyve ko yvy ape ári, proféta Isaías heʼi vaʼekue oĩtaha peteĩ liverasión tuichavéva umi israelita oreko vaʼekuégui pe Áño de Liverasión aja. Upe liverasión rupive ojehupytýta kuri hetave mbaʼe. Isaías oskrivi: “Ñandejára Jehová ogovernáva opa mbaʼe, omeʼẽ chéve ijespíritu. Jehová cheporavo amombeʼu hag̃ua umi notísia porã umi hénte ivuénovape. Ñandejára chembou aipytyvõ hag̃ua umi oñekevrantávape, ha amombeʼu hag̃ua umi esklávope opytataha lívre” (Is. 61:1). ¿Máva rehepa oñeñeʼẽ ko profesíape? Ko profesía iñimportantetéva oñeʼẽva pe livertáre oñepyrũ vaʼekue oñekumpli Jesús oñepyrũ rire opredika. Haʼe ohórõ guare Nazarétpe, pe siuda haʼe okakuaa haguépe, Jesús olee umi judío oñembyatývape upépe ko profesía Isaías oskrivi vaʼekue, ha upéi heʼi pe profesía oñekumpliha hese (Luc. 4:16-19). w19.12 9, 10 párr. 6-8

Ikatu hag̃uáicha jagueropuʼaka oĩ vove ñandepersegíva, tekotevẽ ñandepyʼaguasu. ¿Mbaʼépa ikatu jajapo jahechakuaáramo nañandepyʼaguasuiha? Ñanemanduʼa vaʼerã ñandepyʼaguasu hag̃ua natekotevẽiha ñandepuku, ñanembarete térã ñandevale. Ñapensamíntena David ehémplore, haʼe ningo imitã vaʼekue oñorairõrõ guare Goliat kóntrape. David michĩve ha ikangyve vaʼekue pe higánte Goliátgui, ha ndorekói vaʼekue heta mbaʼe oñorairõ hag̃ua. Añetehápe David ni espáda ndorekói vaʼekue. Upéicharõ jepe, haʼe ipyʼaguasueterei ha ndokyhyjéi oho hag̃ua oñorairõ pe higánte oñemombaʼeguasuetéva kóntrape. ¿Mbaʼérepa David ipyʼaguasuete vaʼekue? Haʼe ningo oguerovia vaʼekue ipyʼaite guive Jehová oĩha hendive (1 Sam. 17:37, 45-47). David nopensái vaʼekue: “Goliat ningo tuichave chehegui”. Upéva rangue haʼe opensa: “Goliat ndahaʼeiete mbaʼeve Jehová rovake”. ¿Mbaʼépa ñaaprende upévagui? Ñande avei ñandepyʼaguasutaha jajeroviáramo Jehová oĩha ñanendive, ha ñane enemigokuéra ndahaʼeiha mbaʼeve Ñandejára Todopoderóso rovake (2 Crón. 20:15; Sal. 16:8). w19.07 5 párr. 11-13

Tíquico haʼe vaʼekue peteĩ amígo de konfiánsa apóstol Páblope g̃uarã (Hech. 20:4). Áño 55 rupi, Pablo oorganisa oñembyaty hag̃ua kontrivusión ikatu hag̃uáicha oñepytyvõ umi ermáno Judeaguápe. Upérõ oiméne haʼe ojerure raʼe Tíquicope oipytyvõ hag̃ua chupe upe asignasión iñimportantetévape (2 Cor. 8:18-20). Upéi, primera ves Pablo oĩrõ guare préso Rómape, Tíquico oservi chupe de mensahéro. Haʼe ontrega umi kárta ha mensáhe oskrivíva Pablo omokyreʼỹ hag̃ua umi kongregasión oĩvape Ásiape (Col. 4:7-9). Tíquico osegi vaʼekue ohechauka haʼeha peteĩ amígo de konfiánsa Páblope g̃uarã (Tito 3:12). Upe tiémpope naentéroi umi kristiáno haʼe vaʼekue de konfiánsa Tíquicoicha. Por ehémplo, pe segunda ves Pablo oĩrõ guare préso Rómape, áño 65 rupi, haʼe oskrivi oĩ hague heta ermáno distríto de Asiagua ndojeheʼáiva hese, posívlemente okyhyjégui umi ikontrariokuéragui (2 Tim. 1:15). Péro Pablo ikatu vaʼekue ojerovia Tíquico rehe, ha upévare omeʼẽve chupe ótra asignasión (2 Tim. 4:12). Katuete ningo Pablo ovyʼa raʼe oreko haguére peichagua amígo. w20.01 10 párr. 7, 8

Ikatu nde reñeporandu hína oimépa Jehová ndeporavo ijespíritu sánto rupive. Oiméramo upéicha, iporãta repensa koʼã porandúre: ¿Ndépa rejaposeterei voi Jehová volunta? ¿Nekyreʼỹetereípa predikasiónpe? ¿Restudiasetereípa Ñandejára Ñeʼẽ ha reikuaase “Ñandejára pensamiénto avave ndoikuaáiva jepe”? ¿Rehechakuaápa Jehová nepytyvõ hague rehupyty hag̃ua heta mbaʼe predikasiónpe? ¿Reñandúpa tekotevẽtereiha reipytyvõ umi héntepe oikuaa hag̃ua Jehovápe? ¿Eguerekópa pruéva Jehová nepytyvõma hague heta vése? Oiméramo rehechakuaa koʼã mbaʼe oikopaiteha nderehe, ¿heʼisépa upéva nde haʼeha peteĩ unhído? Nahániri, pórke entéro Ñandejára siervokuéra ikatu oñeñandu upéicha. Jaʼe porãsérõ g̃uarã, oiméramo nde reduda ha reñeporandu hína ndépa unhído, upéva ohechauka porãma voi ndahaʼeiha. ¿Mbaʼérepa jaʼe upéva? Umi kristiáno Jehová oiporavóva ijespíritu rupive, ni michĩmi ndodudái haʼeha unhído, haʼekuéra oikuaa porã upéva. w20.01 23 párr. 14