Mayo

¿Mbaʼépa ikatu ojapo tuakuéra oipytyvõ hag̃ua ifamíliape ohayhu hag̃ua Jehovápe? Peñemboʼe Jehovápe ha pejerure chupe tapenepytyvõ, Manóah ojapo haguéicha. Pemboʼe avei chupekuéra pene ehémplo rupive. Iñimportánteramo jepe umi mbaʼe pejéva pene famíliape, umi mbaʼe pejapóva katuete opokovéta hesekuéra. Katuete oiméne José ha María omoĩ raʼe ehémplo porã ifamiliakuérape, umíva apytépe Jesús. José ningo ombaʼapo jejopy vaʼekue omantene hag̃ua ifamíliape, péro avei omokyreʼỹ chupekuéra ohayhu ha oservi hag̃ua Jehovápe (Deut. 4:9, 10). Haʼe “oho káda áño Jerusalénpe Paskuarã” ifamília reheve (Luc. 2:41, 42). Upe tiémpope oiméne oĩ raʼe umi túa opensáva ogueraháramo ifamíliape ijetuʼuvetaha la viáhe, hepyvetaha térã operdetereitaha tiémpo. Péro Josépe g̃uarã iñimportánte vaʼekue oadora Jehovápe, ha omboʼe itaʼýra ha itajyrakuérape ojapo hag̃ua avei upéva. María ningo avei oikuaa porã vaʼekue Ñandejára Ñeʼẽ heʼíva, ha katuete umi mbaʼe heʼi ha ojapóvare omboʼéne raʼe imembykuérape ohayhu hag̃ua Ñandejára Ñeʼẽ. w19.12 24, 25 párr. 9-12

Ñande ikatu jahechakuaa Jehová ñanderayhuetereiha, ñapensávo mbaʼépa haʼe ojapo raʼe Adán naiñeʼẽrendúirõ guare chupe. Ojapo rupi upéva, Adán ha ifamiliare noĩvéima Jehová família apytépe (Rom. 5:12). Péro Jehová ojapo álgo oipytyvõ hag̃ua Adán familiarépe. Jehová okastiga vaʼekue Adánpe, péro opromete oipytyvõtaha ifamiliarépe. Haʼe ensegidaiténte voi opromete umi yvypóra iñeʼẽrendúva chupe ikatutaha oike jey ifamília apytépe (Gén. 3:15; Rom. 8:20, 21). Ikatu hag̃uáicha ojapo upéva, Jehová ojevale vaʼekue Itaʼýra ohayhuetéva sakrifísiore. Ontregávo Jesúspe ñanderehehápe, Jehová ohechauka porãiterei vaʼekue mbaʼeichaite pevépa ñanderayhu (Juan 3:16). Ndaipóri voi ótro túa haʼeichagua. Haʼe ohendu ñane ñemboʼe ha omeʼẽ ñandéve umi mbaʼe ñaikotevẽva, tahaʼe jaikove hag̃ua térã jareko hag̃ua peteĩ amista iporãva hendive. Haʼe avei ñanerekomboʼe ha ñanepytyvõ. Ha ojapóta hetaiterei mbaʼe porã ñanderehehápe amo gotyove. ¡Ajépa opokoite ñanderehe jaikuaávo ñande Ru ñanderayhuetereiha ha okuidaha ñanderehe! w20.02 6 párr. 16, 17; 7 párr. 20

¿Oĩpa álgo nekevrantaitereíva ha upévare reñandu neremeʼẽveimaha? Ikatu oime álgien heʼi térã ojapo raʼe álgo nemoñeñandu vaíva. Térã nde voi ere térã rejapo raʼe álgo ivaíva. Por ehémplo, ikatu oime repeka raʼe ha repensa Jehová núnka naneperdonamoʼãiha. Ha ivaiveha, ikatu hína ere ndejupe: “Oiméne che chejerovia kangy hína, ajeve la añekevrantaiterei. Chéngo nachepohãvéima voi”. Péro jahechamína unos kuánto ehémplo oĩva la Bíbliape. Ana, haʼéva proféta Samuel sy, ijerovia mbarete vaʼekue. Upéicharõ jepe, oñeñandu vai ha ndaipyʼaguapyvéi oĩgui hogapýpe peteĩ otrata vaietereíva chupe (1 Sam. 1:7). Apóstol Pablo ningo ijerovia mbarete vaʼekue avei. Péro sapyʼánte pe kevránto oahoʼi chupe, pórke ‘ojepyʼapy entéro umi kongregasiónre’ (2 Cor. 11:28). Jehová ningo ohayhueterei vaʼekue rréi Davídpe, pórke haʼe ojerovia vaʼekue hese ipyʼaite guive (Hech. 13:22). Upéicharõ jepe, David ojapo vaʼekue heta mbaʼe vai, ha umíva odesanimaiterei chupe (Sal. 38:4). Jehová ningo okonsola ha ombopyʼaguapy vaʼekue entéro koʼã isiérvope. w20.02 20 párr. 1, 2

Nde reñemeʼẽ jave Jehovápe, reñemboʼe nde pyʼaite guive ha ere chupe reipurutaha nde rekove reservi hag̃ua chupe pára siémpre. Reñemeʼẽvo Jehovápe, nde reñembyesarái hína ndejehegui. Upe guive Jehová mbaʼéma hína nde, ha upéva tuichaiterei priviléhio (Rom. 14:8). Nde ere hína chupe upe día guive la iñimportantevéva nde rekovépe haʼetaha rejapo umi mbaʼe chupe ogustáva, ndahaʼéi ndéve ndegustáva. Reñemeʼẽvo Jehovápe, rejapo hína chupe peteĩ promésa isériova. Jehová ningo nañandeovligái jajapo hag̃ua upeichagua promésa. Péro jajapo jave upe promésa, haʼe ohaʼarõ ñandehegui ñakumpli (Sal. 116:12, 14). Reñemeʼẽvo Jehovápe ningo nde rejapo upéva neañoháme, ha Jehová ha ndénte peikuaa upéva. Péro rejevautisa jave, rejapo upéva heta hénte renondépe, ha ojejapo jepi peteĩ asambleahápe. Rejevautisávo, nde rehechauka enterovépe reñemeʼẽma hague Jehovápe. Upéicharõ nde rejevautisávo reikuaauka hína rehayhuha Jehová nde Járape nde pyʼaite guive, nde rekove kompletoite reheve, entéro ne pensamiénto reheve, ne mbaretekue omeʼẽmíva reheve, ha avei rejedesidíma hague reservi Jehovápe pára siémpre (Mar. 12:30). w20.03 9 párr. 4, 5

Satanás okonfundi la héntepe ani hag̃ua oikuaa mávapa Jehová. Omano rire Jesús apostolkuéra, umi heʼíva ijehe kristianoha oñepyrũ omboʼe heta japu (Hech. 20:29, 30). Koʼã apóstata oñepyrũ okonfundi umi héntepe ani hag̃ua oikuaa mávapa Ñandejára tee. Por ehémplo, haʼekuéra okopiárõ guare la Biblia ndoipuruvéi Ñandejára réra, ha omoĩ hekovia “Señór”, “ñande Ruvicha”, “Ñandejára”, térã ótro título. Upéicha rupi ijetuʼu vaʼekue umi oleévape g̃uarã la Biblia oikuaa hag̃ua Ñandejára Jehová réra, ha opilla hag̃ua haʼe idiferenteha umi ótro diósgui (1 Cor. 8:5). Haʼekuéra oipuru peteĩ títulonte oñeʼẽ hag̃ua Jehová ha Jesús rehe, upévare umi hénte ndaikatúi ohechakuaa Ñandejára ha Itaʼýra ndahaʼeiha la mísma persóna (Juan 17:3). Upéva káusare oñepyrũ vaʼekue ojeguerovia pe Trinida, la Biblia nomboʼéiramo jepe upéva. Upéicha rupi heta hénte oimoʼã ndaikatuiha voi jaikuaa Ñandejárape. ¡Ajépa ivaiete ko japu oñemboʼéva! (Hech. 17:27). w19.06 4 párr. 11

Iñimportanteterei ñandekatupyryve jahávo predikasiónpe, péicha ikatúta jajapove ko tembiapópe (Prov. 1:5; 1 Tim. 4:13, 15). Ñamombaʼeterei ningo Jehová oheja haguére ñambaʼapo iñajudánteramo (1 Cor. 3:9). Jahechakuaáramo “umi mbaʼe iñimportantevéva” ha jajesareko Ñandejára servísiore, ‘vyʼápe jaservíta Jehovápe’ (Filip. 1:10; Sal. 100:2). Entéro jaservíva chupe jajerovia haʼe ñanemombaretetaha ñakumpli porã hag̃ua ko tembiapo, ñambohováiramo jepe umi situasión ijetuʼúva térã ndaikatúiramo jepe jajapo opa mbaʼe jajaposéva Ñandejárape g̃uarã (2 Cor. 4:1, 7; 6:4). Ñane situasión opermitíramo ñandéve japredika michĩmi jepe térã heta, ‘ikatúta javyʼa ñane rembiapóre’ pórke jaservi ñande pyʼaite guive (Gál. 6:4). Ñañemeʼẽmbaitéramo Jehová servísiope jahechauka jahayhuha chupe ha avei ñande rapichakuérape. ‘Jajapóramo péicha jajesalváta ñande ha avei umi ñanerendúva’ (1 Tim. 4:16). w19.04 6 párr. 15; 7 párr. 17

¿Mbaʼépa la oipuruvéva Satanás ha umi demónio ombotavy hag̃ua umi héntepe? Haʼekuéra ojevale pe espiritísmore. Umi espiritísta heʼi ikatuha oikuaa térã okontrola heta mbaʼe yvyporakuéra normálmente ndaikatúiva oikuaa ni okontrola. Por ehémplo, oĩ heʼíva ikatuha oikuaa la oikótava pe adivinasión térã astrolohía rupive. Ótro katu heʼi ikatuha oñeʼẽ umi omano vaʼekuéndi. Ha avei oĩ ojapóva vruhería térã máhia ikatu hag̃uáicha oechisa ótra persónape. Peteĩ enkuésta ojejapóva 18 tetãme oĩva Latinoamérica ha el Caríbepe, ohechauka 1 de káda 3 persóna ojeroviaha pe máhia, vruhería ha echisería rehe. Avei haimete la mísma kantida de hénte orovia ikatuha ñañekomunika umi espíritundi. Ojejapo avei ótra enkuésta 18 tetãme oĩva Áfricape ha alamita rasa ojerovia pe vruheríare. Añetehápe ningo tahaʼe haʼéva lugár jaikoha, ñañemoĩ vaʼerã pe espiritísmore. w19.04 20, 21 párr. 3, 4

Ñandejára Jehová ningo ndochaʼeiete voi umi mbaʼe vaíre (Sal. 5:4-6). Prinsipálmente ombojeguaru chupe oĩ jave oavusa térã ovioláva peteĩ mitãme, upéva añetehápe peteĩ pekádo ivaietereíva. Ñande testígo de Jehová jasegi iñehémplo, ha upévare ñanembojeguaru voi oĩ jave oavusáva peteĩ mitãre. Ñande nañapermitíri upéva oiko kongregasiónpe ha nañamoʼãi avei umi ojapóvape koʼã mbaʼe (Rom. 12:9). Tahaʼe haʼéva pe avúso ojejapóva peteĩ mitãre, oñemoĩ hína “Cristo Léi” kóntrape (Gál. 6:2). Entéro mbaʼe Jesús omboʼe vaʼekue, tahaʼe heʼíva térã iñehémplo rupive, oñemopyenda mborayhúpe ha ñanemokyreʼỹ ñandehústo hag̃ua. Ñakumpli rupi ko léi, ñande kristiáno tee jatrata porã umi mitãme, ikatu hag̃uáicha oñeñandu hikuái segúro ha añetehápe ojehayhuha chupekuéra. Péro pe oavusáva térã ovioláva peteĩ mitãme ojapo peteĩ mbaʼe ivaietereíva ohechaukáva opensaha ijehénte. Pe mitã katu opyta oñandu avave ndohayhúi ni ndoproteheiha chupe. Ñambyasýramo jepe, kristiáno tee apytépe jepe oikóma ko mbaʼe vai. ¿Mbaʼérepa? Pórke “umi kuimbaʼe aña ha hovamokõiva” ojagarrapaite opárupi, ha ikatu voi oĩ umi oñehaʼãva oike kongregasiónpe (2 Tim. 3:13). Avei oĩ umi heʼi vaʼekue ijehe Testigoha ha ohejáva ogueraha vai chupe umi mbaʼe tieʼỹ ojaposéva, ha oavusa umi mitãre. w19.05 8 párr. 1-3

Pe persóna oĩ vaietereíva ikatu opensa nomereseiha oñemoag̃ui Jehováre ha oñemboʼe chupe. Ñande ñakonsolaséramo chupe, ikatu ñañemboʼe hendive ha jaipuru héra ñane ñemboʼépe. Ikatu jaʼe Jehovápe mbaʼeichaitépa ñande ha umi ermáno kongregasionpegua jahayhu upe persóna ohasa asývape. Ikatu avei jajerure Jehovápe tombopyʼaguapy ha tokonsola pe isiérvo ohayhuetévape. Peichagua ñemboʼe ningo tuichaiterei ikatu oporokonsola. Ñapensa porãkena la jaʼe vaʼerãre. Japoi rei reíramo ñande jurúgui ikatu ñaporolastima hína. Péro umi mbaʼe jaʼéva mborayhúpe haʼete pohã oporomongueráva (Prov. 12:18). Upévare jajerurékena Jehovápe tañanepytyvõ jaipuru hag̃ua umi palávra ikatúva omokyreʼỹ ha okonsola upe osufrívape. Ñanemanduʼa vaʼerã umi mbaʼe heʼíva Jehová la Biblia rupive ipoderosoitereiveha oimeraẽ mbaʼe ikatúvagui jaʼe (Heb. 4:12). Ñameʼẽ jave konsuélo, ñande ñamomanduʼa hína koʼã ermánope Jehová ohayhuha chupekuéra. Ñanemanduʼa vaʼerã avei Jehová haʼeha peteĩ Dios ihústova. Jehová ningo oikuaapaite máva mávarepa ojeavusa vaʼekue, ótro ndoikuaáiramo jepe. Haʼe ohechapaite la oikóva ha nopermitimoʼãi opyta kastigoʼỹre ni peteĩ mbaʼe vai apoha noñarrepentíriva (Núm. 14:18). w19.05 18 párr. 18; 19 párr. 19, 21

Satanás oipota jaheja Jehovápe. Upearã haʼe oñehaʼã okambia ñandehegui ñapensa lája, añetehápe haʼe orekose voi ipoguýpe umi ñane pensamiénto ñapensa hag̃ua haʼe oipotaháicha. Haʼe oipuru umi mbaʼe ñandegustáva ikatu hag̃uáicha ñanembotavy térã ñanekonvense jasegi hag̃ua chupe (Col. 2:4). ¿Ikatu piko añete Satanás ñanembotavy? ¡Si, ikatu! Ñanemanduʼa vaʼerã Pablo ndoskrivíri hague pe konsého oĩva Colosenses 2:8-pe umi ndahaʼéivape g̃uarã kristiáno, síno umi unhídope voi (Col. 1:2, 5). Satanás ikatu kuri ombotavy koʼã kristiánope upe tiémpope, ha ñandéve koʼytevéntema ikatu ñanembotavy koʼág̃arupi (1 Cor. 10:12). ¿Mbaʼérepa? Pórke Satanáspe oñemombo ko yvy ape ári, ha oñehaʼãmbaite hína ombotavy Ñandejára siervokuéra ifiélvape (Apoc. 12:9, 12, 17). Hiʼarive jaiko peteĩ tiémpo ijetuʼuetereívape, pórke umi kuimbaʼe aña ha hovamokõiva “oho vai vaive” hína (2 Tim. 3:1, 13). w19.06 2 párr. 1, 2

Elías okyhyjeterei vaʼekue rréina Jezabel oamenasárõ guare ojukataha chupe, ha upévare haʼe okañy ha osẽ oho Beer-Sébape. Upérõ haʼe oñedesanimaiterei kuri “ha ojerure omano hag̃ua”. ¿Mbaʼérepa oñeñandu kuri upéicha? Elías ningo iñimperfékto ha “haʼe vaʼekue peteĩ yvypóra ñandeichaguánte avei” (Sant. 5:17). Ikatu oime Elías oñekevrantaiterei raʼe ha ikaneʼõitereíma. Oiméne opensa raʼe ndaideprovéchoi hague mbaʼeverã entéro mbaʼe ojapo vaʼekue oipytyvõ hag̃ua umi héntepe oadora jey hag̃ua Jehovápe, ha mbaʼevete nokambiái hague Israélpe. Avei oimoʼãne raʼe haʼe añoiténtema oserviha Jehovápe (1 Rey. 18:3, 4, 13; 19:10, 14). Jehová ontende porãiterei vaʼekue chupe ha omombeʼúrõ guare mbaʼéichapa oñeñandu, haʼe ndojaʼói chupe. Upéva rangue, oipytyvõ chupe imbarete jey hag̃ua (1 Rey. 19:5-7). Upéi mborayhúpe okorrehi Elías opensa lája ohechaukávo chupe mbaʼeichaitépa haʼe ipoderóso. Avei omombeʼu chupe oĩha gueteri Israélpe 7.000 persóna ndoadoráiva Baálpe (1 Rey. 19:11-18). Jehová ojapo opa koʼã mbaʼe ohechauka hag̃ua Elíaspe mbaʼeichaitépa ohayhu chupe. w19.06 15, 16 párr. 5, 6

Siémprekena jasegi umi instruksión oñemeʼẽva ñandéve. Umi ermáno de konfiánsa orekóva rresponsavilida omeʼẽta ñandéve umi instruksión, ha jasegíramo umíva jajeíta provlémagui. Por ehémplo, peteĩ país ojeproivihápe ojepredika, umi ermáno orekóva rresponsavilida oporogia hag̃ua oorganisa umi puvlikadorkuérape opredika hag̃ua oikohárupi, péro ohejaʼỹre puvlikasión umi héntepe. Péro peteĩ prekursór oikóva upe lugárpe oimoʼã oikuaaveha chuguikuéra, ha lomímonte oheja puvlikasión umi héntepe. ¿Mbaʼépa oiko upe haguére? Pe prekursór ha unos kuánto ermáno oĩva hendive opredikapa riremínte, ou la polisía ha ointerroga chupekuéra. Amalisia umi polisía osegi hína raʼe chupekuéra ha ombyatypaite jey umi puvlikasión oheja vaʼekue hikuái umi héntepe. ¿Mbaʼépa ñaaprende ko mbaʼe oiko vaʼekuégui? Tekotevẽha jasegi umi instruksión oñemeʼẽva ñandéve, ñaimoʼãramo jepe ñandevaleveha térã nañaiméi de akuérdo umívandi. Jehová ningo siémpre ñanevendesíta ñaneñeʼẽrendúramo umi ermáno haʼe onombra vaʼekuépe ñandegia hag̃ua (Heb. 13:7, 17). w19.07 12 párr. 17

Pe pyhare omano mboyve, Jesús heʼi vaʼekue ko múndo ndochaʼemoʼãiha enterove umi odesidívare oiko chugui idisípulo (Juan 17:14). Upe tiémpo guive koʼag̃aite peve, umi oñemoĩva pe adorasión verdadérare opersegi umi testígo de Jehová ifiélvape. Ha jaikuaa voi hetave jajepersegitaha hiʼag̃uivévo ohóvo pe fin (Mat. 24:9). ¿Mbaʼéichapa ikatu jajeprepara koʼág̃ama voi ñaaguanta hag̃ua ág̃a oĩ vove ñandepersegíva? Natekotevẽi ningo ñañeimahina entéro mbaʼe vai ikatúva oiko ñanderehe amo gotyove. Jajapóramo upéicha, ikatu hína japyta jakyhyjeterei ha jajepyʼapyeterei. Amo ipahápe, ñapensaitereíramo umi mbaʼe vai neʼĩravare oiko, ikatu jakyhyjeterei ha jaju ndajaservivéi Jehovápe oiko mboyve jepe umi mbaʼe vai (Prov. 12:25; 17:22). Jakyhyjetereíramo, upéva ideprovechoitereíta ñane ‘enemígope, pe Añáme’, ha haʼe katuete oipurúta upéva ñane kóntrape (1 Ped. 5:8, 9). Upévare iñimportanteterei ñamombareteve ñane amista Jehovándi koʼág̃ama voi. w19.07 2 párr. 1-3

Umi apóstol oiméne ovyʼaiterei raʼe oñembyatýrõ guare peteĩ montáña oĩvape Galiléape. Jesús orresusita rire, heʼi kuri chupekuéra ojotopa hag̃ua hendive upe lugárpe (Mat. 28:16). Upérõ oiméne Jesús ojechauka vaʼekue mas de 500 disípulope (1 Cor. 15:6). ¿Mbaʼérepa Jesús ojerure rakaʼe idisipulokuérape ojotopa hag̃ua hendive? Omeʼẽ hag̃ua chupekuéra ko mandamiénto iñimportantetéva: “Tapeho pemboʼe umi hénte opa tetãyguápe oiko hag̃ua chuguikuéra che disípulo” (Mat. 28:18-20). Umi disípulo ohendúva Jesús omanda vaʼekue oĩ kuri pe kongregasión oñeforma vaʼekuépe primer síglope. ¿Mbaʼépa raʼe pe traváho iñimportantevéva ojapo vaʼerã ko kongregasión? Haʼekuéra oipytyvõ vaʼerã kuri umi héntepe oiko hag̃ua chuguikuéra Jesús disípulo. Koʼág̃arupi oĩ mas de 120 mil kongregasión ko yvy tuichakuére, ha enterovéva osegi ojapo ko traváho iñimportantetéva. w19.07 14 párr. 1, 2

Peteĩ superintendénte de sirkuíto oĩva Noruégape heʼi umi hénte noñeʼẽséiva Ñandejárare, pyʼỹinte oñeʼẽseve jepi umi situasión oĩvare ko múndope. Upévare osaluda rire umi héntepe, haʼe heʼi: “¿Ndéverõ g̃uarã, mávapa ikatu omeʼẽ ñandéve peteĩ futúro iporãvéva? ¿Ndépa ere umi polítiko, sientífiko, térãpa ótro?”. Ohendu porã rire chupekuéra, pe ermáno olee térã heʼi de memória peteĩ téxto bíblico omombeʼúva koʼẽrõite jaiko porãvetaha. Oĩ umi ohecharamoitereíva la Biblia oprometeha ko yvy noñehundimoʼãiha ha umi hénte ivuénova oikotaha pype pára siémpre (Sal. 37:29). Iporãta ningo ñakambia mimi jepi mbaʼéichapa japredika asegún umi hénte ñañeʼẽvandi. ¿Mbaʼérepa? Pórke upe ointeresáva peteĩ persónape ikatu hína ndogustaiete ótrope. Oĩ voi umi naiprovlémaiva oñeʼẽ hag̃ua Ñandejárare térã la Bíbliare, péro oĩ avei umi oñemongetáva ñanendive ñañeʼẽ raẽramo chupekuéra ótra kósare. Tahaʼe haʼéva pe situasión, ñande jaaprovecha vaʼerã entéro oportunida ñañeʼẽ hag̃ua opaichagua persónandi (Rom. 1:14-16). Jehová haʼe upe omongakuaáva umi hénte ipyʼaporãva korasõme umi mbaʼe oaprendéva la Bíbliagui (1 Cor. 3:6, 7). w19.07 22, 23 párr. 10, 11

Pe mborayhu tuichaite Jehová ohechaukáva ñandéve ningo ñanemomýi jahayhu hag̃ua ñane ermanokuérape (1 Juan 4:20, 21). Péro ikatu ñapensa osẽ reitanteha ñandéve jahayhu ñane ermanokuérape. Amo ipahápe, enterove jaadora hína Jehovápe ha ñañehaʼã jasegi iñehémplo. Avei jasegi Jesús ehémplo, haʼe ningo ñanderayhueterei rupi omeʼẽ vaʼekue hekove ñanderehehápe. Péro añetehápe sapyʼánte ijetuʼu hína ñakumpli hag̃ua pe mandamiénto heʼíva jahayhu vaʼerãha ñane ermanokuérape. Evodia ha Síntique ningo oservi vaʼekue apóstol Pablo ndive ha ikyreʼỹeterei vaʼekue hikuái. Péro amalisia koʼã mokõi ermána oiko vai raʼe ha upéicha rupi ndahaʼevéi oñoamíga. Pe kárta Pablo oskrivi vaʼekuépe, haʼe derechoite heʼi Evodia ha Síntiquepe ‘opensa vaʼerãha peteĩcha’ (Filip. 4:2, 3). Apóstol Pablo ohechakuaa avei omeʼẽ vaʼerãha ko konsého pe kongregasión kompletoitépe: “Pesegíkena pejapo opa mbaʼe pejeplageaʼỹre ha pediskutiʼỹre” (Filip. 2:14). w19.08 9 párr. 6, 7

Jaguerohoryeterei ningo heta kongregasión ha ermanokuéra ojapoha opa ikatúva oipytyvõ hag̃ua umi oservívape de tiémpo kompléto osegi hag̃ua iñasignasiónpe. Haʼekuéra ojapo upéva omokyreʼỹvo chupekuéra osegi hag̃ua iñasignasiónpe, oipytyvõvo chupekuéra ekonómikamente térã omeʼẽvo chupekuéra álgo oikotevẽtava, térã oipytyvõvo chupekuéra oñangareko hag̃ua ifamíliare hógape. Umi oservíva de tiémpo kompléto orresivíramo peteĩ asignasión pyahu ha ova ñane kongregasiónpe, ani ñapensa oñekambiaha chupekuéra de asignasión ndojapoporãi haguére itraváho térã ojekorrehi haguére chupekuéra. Upéva rangue ñaipytyvõ vaʼerã koʼã ermánope ifasilve hag̃ua chupekuéra la kámbio. Jarresivi porã ha jaguerohorýkena chupekuéra pe traváho ojapo vaʼekuére, ndaikatuvéiramo jepe ojapo hikuái heta mbaʼe hasykatúma rupi. Ñañehaʼã jaikuaa porãve chupekuéra. Ikatu hína ñaaprende heta mbaʼe chuguikuéra, umi mbaʼe ohasa vaʼekuégui, umi mbaʼe oikuaávagui ha umi entrenamiénto orresivi vaʼekuégui. Ñepyrũrã, umi orresivi vaʼekue asignasión pyahu ikatu oikotevẽ ñaipytyvõ chupekuéra otopa hag̃ua hogarã, itravahorã, transpórte ha ótra kósa ikatúva ifálta chupekuéra. w19.08 23, 24 párr. 12, 13

Gog, térã umi tetã oñembyatýtava oataka hag̃ua Ñandejára puévlope, ojeroviáta pe podér militár orekóvare (2 Crón. 32:8). Péro ñande jajeroviáta Ñandejára Jehováre, ha umi hénte opensáta ñandevyroitereiha. ¿Mbaʼérepa? Pórke upe tiémpope ohechakuaáta hikuái Babilonia Guasu ipoderósoramo jepe, umi idioskuéra ndosalvái hague chupe ‘pe animál salváhegui’ ni umi ‘10 hatĩgui’ (Apoc. 17:16). Gog opensáta ifasiltaha ohundi hag̃ua Ñandejára puévlope, upévare “umi arai ojahoʼiháicha peteĩ país” oatakáta chupekuéra. Péro ensegidamínte Gog ohechakuaáta hoʼa hague peteĩ trámpape. Oiko haguéicha faraón rehe pe Mar Rójope, ontendéta oñorairõha hína Jehová kóntrape (Éx. 14:1-4; Ezeq. 38:3, 4, 18, 21-23). Cristo ha ijehérsito yvagapegua ñanedefendéta ha ohundipaitéta Gog ha ijehersitokuérape (Apoc. 19:11, 14, 15). Jaikuaaháicha, Satanás, pe enemígo tuichavéva orekóva Jehová, omomýita umi tetãme oataka hag̃ua Ñandejára puévlope. Péro, ¿mbaʼépa oikóta hese? Jesús omombóta chupe ha umi demóniope peteĩ yvykua pypukúpe, ha oĩta upépe 1.000 áñore (Apoc. 20:1-3). w19.09 11, 12 párr. 14, 15

Ñande katuete jaipotaitereíma oñekumpli umi mbaʼe Jehová opromete vaʼekue, ha upéva ningo ndaivaíri. Péro sapyʼánte ikatu ñañandu otardaitereimaha oñekumpli hag̃ua umi mbaʼe ñahaʼarõva, ha upéva ikatu ñanemokangy. Añetehápe ikatu voi ñanemokorasõ rasy (Prov. 13:12). Upéva oiko vaʼekue unos kuánto ermánore áño 1914 rupi. Heta unhído ningo oipotaitereíma vaʼekue oñekumpli upe ohaʼarõva ha oho yvágape áño 1914-pe. ¿Mbaʼépa ojapo raʼe umi ermáno ifiélva ndoikóirõ guare upe ohaʼarõva? Haʼekuéra osegi odipara pe karréra. Chupekuéra g̃uarã iñimportanteve vaʼekue oservi Jehovápe ipyʼaite guive, ha ndahaʼéi ogana pe prémio. Haʼekuéra oĩ vaʼekue desidído osegitaha oaguanta ha odipara pe karréra, ha upeichaite ojapo hikuái. Ñande ningo katuete jaipotaitereíma avei Jehová omopotĩ héra, ohechauka haʼe añoite ikatuha ñanegoverna porã ha okumpli kompletoite umi ipromesakuéra. Ha ikatu voi jajerovia umi mbaʼe oikotaha pe tiémpo Jehová oiporavo vaʼekuépe. Og̃uahẽ mboyve upe tiémpo, jasegi vaʼerã jajapo heta mbaʼe Jehová servísiope, ha ani ñanekangy ndoikói jave umi mbaʼe ñahaʼarõva. w19.08 4, 5 párr. 9, 10

Ñañeporandumína: “¿Ojekuaápa cherehe chepyʼaguapy ha cheumildeha? ¿Ajapópa umi traváho iñumíldeva aipytyvõ hag̃ua che rapichakuérape? ¿Cheamávle ha atrata porãpa umi ótrope?”. Jesús ningo vyʼápe ohekomboʼe vaʼekue idisipulokuérape, upéicha rupi oĩ pyʼaguapy ijapytepekuéra ha ovyʼa hikuái oñondivepa (Luc. 10:1, 19-21). Haʼe oporotrata porã vaʼekue, upévare idisipulokuéra oñeñandu porã hendive ha ndahasyiete chupekuéra oporandu hag̃ua Jesúspe heta mbaʼe. Ha Jesús voi ohenduse vaʼekue mbaʼépa haʼekuéra opensa (Mat. 16:13-16). Umi plánta oĩva peteĩ hardín ojerrega porãvape okakuaa porã ha ipotypa. Upéicha avei umi disípulo oĩ aja Jesús ndive, oaprende heta leksión ha umíva oipytyvõ chupekuéra omongakuaa hag̃ua ijerovia ha ojapo hag̃ua heta mbaʼe iporãva. Jarekóramo siérta autorida iporãta ñañeporandu: “¿Mbaʼéichapa oñeñandu che rogaygua ha umi ombaʼapóva chendive? ¿Aipytyvõpa oĩ hag̃ua pyʼaguapy? ¿Oñeñandu porãpa umi hénte chendive ombaʼeporandu hag̃uáicha chéve oimeraẽ mbaʼe? ¿Añeinteresápa hesekuéra ha aikuaase mbaʼépa opensa hikuái?”. Aníkena arakaʼeve jajogua umi fariséope. Haʼekuéra ipochy oĩrõ ombaʼeporandúva chupekuéra, ha opersegi voi umi opensávape diferénte chuguikuéra (Mar. 3:1-6; Juan 9:29-34). w19.09 20 párr. 1; 21 párr. 9; 23 párr. 10, 11

Umi goviérno sapyʼánte oipuru jepi koʼãichagua palávra omombeʼu hag̃ua mbaʼéichapa haʼekuéra oñehaʼã oiko porã umi ótro país ndive. Péro pe anúnsio oñeʼẽha la Biblia idiferénteta. ¿Mbaʼérepa? Pórke ojejapo vove upe anúnsio, heta hénte oroviáta ojeikomaha pyʼaguapýpe umi goviérno rupive. Péro ndoikuaaiete upe rire ‘oñeimoʼãʼỹve jave oñehunditaha hikuái’ (Mat. 24:21). Ñande ndajaikuaái mbaʼépa omomýita umi nasiónpe oanunsia hag̃ua ‘jaikomaha pyʼaguapýpe ha segúro porã’, ni mbaʼéichapa ojapóta upéva. Ndajaikuaái avei una véntepa ojeʼéta térãpa heta vése. Péro si jaikuaa porã ndajahejái vaʼerãha upe anúnsio ñanembotavy ha ñapensa umi goviérno añetehápe oguerumaha pe pyʼaguapy ko múndope. Upéva rangue, upe anúnsio haʼe hína pe señál ñahaʼarõitéva, ohechaukáva “Jehová ára” oñepyrũ mbotaitemaha (1 Tes. 5:2). w19.10 8, 9 párr. 3, 4

Pe gérra de Armagedón omohuʼãta umi ára paha. Upéicharõ jepe natekotevẽi jakyhyje, pórke péva haʼe hína Ñandejára gérra (Prov. 1:33; Ezeq. 38:18-20; Zac. 14:3). Jehová omeʼẽ vove la señál, Jesucristo oñepyrũta oataka. Ijykére oĩta umi unhído orresusita vaʼekue ha hetaiterei ánhel avei. Haʼekuéra oñondivepa oñorairõta Satanás kóntrape, ha avei umi idemónio ha ijehérsito ko yvy arigua kóntrape (Apoc. 6:2; 17:14). Jehová omeʼẽ ñandéve ko garantía: “Tahaʼe haʼéva pe árma ojepurúva ne kóntrape, núnka nosẽporãmoʼãi” (Is. 54:17). “Peteĩ aty guasu” iñeʼẽrendúva Jehovápe ojesalváta ha ohasáta pe jehasa asy guasu, haʼekuéra osegíta oservi Ñandejárape (Apoc. 7:9, 13-17). Umi mbaʼe heʼíva la Biblia tuicha ñanembopyʼaguapy pórke ñakonfia ikatutaha jajesalva. Ñandejára Ñeʼẽ heʼi voi: “Jehová oprotehe umi iñeʼẽrendúvape” (Sal. 31:23). Enterovete ñande jahayhúva ha ñambotuicháva Jehovápe javyʼaitereíta haʼe omopotĩ vove héra (Ezeq. 38:23). w19.10 18, 19 párr. 17, 18

Oñemohuʼãvo ohóvo ‘umi ára paha’ ikatu hína jahasa umi mbaʼe ijetuʼuetereíva (2 Tim. 3:1). Por ehémplo, oiko rire votasión peteĩ país oĩvape Áfricape, umi hénte oñepyrũ oiko vaipa ha oñorairõmba. Mas de 6 méserupi ñane ermanokuéra ojapeligra ha ndaikatúi oĩ trankílo pórke umi hénte oñorairõnte voi oikóvo. ¿Mbaʼépa oipytyvõ chupekuéra oaguanta hag̃ua upe situasión? Unos kuánto ermáno oho ojerrefuhia ótro ermáno rógape oikóva peteĩ lugár isegurovévape. Peteĩ ermáno heʼi: “Ko situasiónpe avyʼaiterei kuri aime haguére che amigokuérandi. Upéicha enterovéva ikatu kuri roñomokyreʼỹ”. Oñepyrũ vove pe ‘jehasa asy guasu’, javyʼaitereíta jaguereko haguére amígo ñanderayhúva (Apoc. 7:14). Upévare iñimportanteterei koʼág̃ama voi ñañehaʼã jareko amígo verdadéro (1 Ped. 4:7, 8). ¿Mbaʼérepa? Pórke ñane enemigokuéra omosarambíta heta japu ikatu hag̃uáicha ñandedividi, ñanemoĩséta oñokóntrape ha oñehaʼãta anivéma hag̃ua jajerovia ojuehe. Péro nosẽmoʼãi hikuái ijidéape. Ñande jasegíta jahayhu ñane ermanokuérape ha haʼekuéra ndaikatumoʼãi ojoko upéva. w19.11 2 párr. 1, 2; 7 párr. 19

Satanás ningo “pe japu ruvicha”, ha haʼe oipuru umi hénte oĩvape ipoguýpe omosarambi hag̃ua heta japu Jehová ha ñane ermanokuéra kóntrape (Juan 8:44). Por ehémplo, umi apóstata oipuru Internet, téle ha hetave mbaʼe ikatu hag̃uáicha ijapu ha oñeʼẽ vai Jehová organisasiónre. Koʼã japu heʼíva hikuái oĩ hína “umi flécha hendýva” apytépe oipurúva Satanás. ¿Mbaʼépa jajapo vaʼerã álgien heʼíramo ñandéve koʼãichagua japu? ¡Nañahendumoʼãi chupe! ¿Mbaʼérepa? Pórke ñande jajerovia Jehováre ha ñane ermanokuérare. Añetehápe, ñande ñamboykete voi opa mbaʼe oúva umi apóstatagui. Upévare ni mbaʼevéicharõ nañañepyrũmoʼãi ñañeʼẽ ni jajodiskuti hendivekuéra, ni ñandekuriósoramo jepe, ha nañapermitimoʼãi chupekuéra omokangy ñande jerovia. ¿Ñañehaʼãpa ani hag̃ua jajodiskuti umi apóstatandi ni ñahendu umi japu heʼíva hikuái? Iporãta jajapóramo upéicha. Péro jasegi vaʼerã ñañatende, pórke Satanás oreko heta árma ikatúva oipuru ñane kóntrape. w19.11 15 párr. 8; 16 párr. 11

Ñapensa vaʼerã mbaʼérepa jadesidi peteĩ mbaʼe. Jehová oipota ñaneonrrádo opa mbaʼépe. Upévare jadesidi jave peteĩ mbaʼe ñanesinséro vaʼerã ótrondi ha ñandejupe voi. Oiméramo nañandesinseropái ijetuʼuvéta ñandéve jajapo hag̃ua umi mbaʼe jaʼe vaʼekue jajapotaha. Por ehémplo, ñamoĩ chupe peteĩ mitãrusu odesidi ojapotaha iprekursorádo rregulár, péro ohasa rire peteĩ tiémpo ijetuʼúma chupe okompleta hag̃ua hiʼóra ha ndovyʼavéima iservísiope. Ikatu oime opensa raʼe ojapoha iprekursorádo ombovyʼa hag̃ua Jehovápe. Péro, ¿noiméipa añetehápe haʼe ojapo raʼe upéva ombovyʼa hag̃uánte ituakuérape térã ótra persónape? Jahechamína ótra situasión. Peteĩ persóna ostudiáva la Biblia odesidi ndopitamoʼãveimaha. Haʼe oñehaʼãmbaite ha 1 térã 2 semánare ndopitavéi, péro upéi opita jey. Upéicharõ jepe, haʼe osegi oñehaʼã ha amo ipahápe ndopitavéi. Haʼe ohayhu Jehovápe ha ombovyʼase chupe, ha upéva oipytyvõ chupe ipuʼaka hag̃ua ivísiore (Col. 1:10; 3:23). w19.11 27 párr. 9; 29 párr. 10

Apóstol Pablo ojerovia vaʼekue omohuʼãtaha pe karréra ha ohupytytaha pe prémio. Haʼe ningo unhído vaʼekue, upévare ohaʼarõ ohupyty “pe prémio Ñandejára omeʼẽva, upéva hína pe jeikove yvágape”. Péro ohupyty hag̃ua, haʼe ohechakuaa vaʼekue osegi vaʼerãha oñehaʼã (Filip. 3:14). Pablo oipuru kuri peteĩ ehémplo iñinteresánteva oipytyvõ hag̃ua umi filipénsespe osegi hag̃ua oñekonsentra pe prémiore. Pablo omomanduʼa vaʼekue umi filipénsespe haʼekuéra orekoha pe siudadanía yvagapegua (Filip. 3:20). ¿Mbaʼérepa omomanduʼa chupekuéra upéva? Upe tiémpope, umi hénte oipotaiterei vaʼekue pe siudadanía rromána, pórke omeʼẽ chupekuéra heta venefísio. Péro umi unhído oreko vaʼekue pe siudadanía peteĩ goviérno iporãitevévape, omeʼẽtava chupekuéra hetaitereive venefísio. Pe siudadanía rromána ningo ndahaʼéi vaʼekue mbaʼeve ñakomparátaramo ko siudadaníare. Umi kristiáno unhído oikóva ñane tiémpope ningo omoĩ peteĩ ehémplo iporãva, pórke haʼekuéra oñehaʼãmbaite hína ohupyty pe prémio oñemeʼẽtava chupekuéra, haʼéva hína oikove yvágape pára siémpre. w19.08 6, 7 párr. 14, 15

Ko liverta ningo añetehápe iporãve jey pe liverta ikatúvagui oreko umi israelita pe Áño de Liverasiónpe (Lev. 25:8-12). Por ehémplo, peteĩ kuimbaʼe opytáramo jepe lívre pe Jubiléope, upéi ikatu jey oiko chugui esklávo ha tiémpo rire omanótante voi. Péro pe liverta Jesús omeʼẽva katu opa ára g̃uarã. Pentekostés áño 33-pe, espíritu sánto rupive Jehová oiporavo umi apóstolpe ha hetave kuña ha kuimbaʼe ifiélvape. Haʼe oadopta chupekuéra itaʼýraramo, ikatu hag̃uáicha upéi orresusita hikuái yvágape ogoverna hag̃ua Jesús ndive (Rom. 8:2, 15-17). Haʼekuéra hína umi primeroite orresivi vaʼekue pe liverta Jesús oñeʼẽ hague pe sinagógape Nazarétpe (Luc. 4:16-19, 21). Koʼã kuña ha kuimbaʼe opytáma kuri lívre umi kostúmbre ha enseñánsa japúgui, umíva ningo omboʼe vaʼekue umi líder rrelihióso péro oñemoĩ Ñandejára Ñeʼẽ heʼívare. Jehovápe g̃uarã haʼekuéra oĩma kuri avei lívre pe pekádo ha ñemanógui. Upe arréglo Jehová ojapóva umi hénte oreko hag̃ua liverta, oñepyrũ vaʼekue haʼe ounhírõ guare Cristo segidorkuérape áño 33-pe, ha opáta ág̃a oñemohuʼã vove Jesús Goviérno de Mil áño. w19.12 11 párr. 11, 12

Tuakuéra: Peipytyvõ pene famíliape oiporavo porã hag̃ua iñamigorã. Túa ha sy oikuaa vaʼerã mávarepa ojeheʼa oikóvo ifamília ha mbaʼépa ojapo hikuái. Avei oikuaa vaʼerã mávandipa oñekomunika umi rred sosiál ha teléfono rupive. Umi iñamigokuéra ningo katuete oafektáta pene família opensáva ha ojapóva. Heta túa ha sy oñehaʼãmbaite ifamiliakuéra ojeheʼa hag̃ua umi omoĩvare ehémplo porã oservívo Jehovápe. Por ehémplo Dani ha Bómen, peteĩ matrimónio oikóva Costa de Marfílpe, pyʼỹinte oinvita vaʼekue pe superintendénte de sirkuítope opyta hag̃ua hógape. Dani omombeʼu: “Upéva tuichaiterei oipytyvõ ore raʼýpe. Tiémpo rire haʼe oñepyrũ iprekursorádo rregulár ha koʼág̃a oiko chugui superintendénte de sirkuíto sustitúto”. Tuakuéra ningo nohaʼarõi vaʼerã pe mitã okakuaa raẽ oñepyrũ hag̃ua omboʼe chupe, iporãve hína oñepyrũramo michĩete guive (Prov. 22:6). Pepensamíntena Timoteo ehémplore. Isy Eunice, ha ijavuéla Loida omboʼe vaʼekue Timotéope ‘imitã guive’ (2 Tim. 1:5; 3:15). w19.12 25 párr. 14, 16; 26 párr. 17

¿Mbaʼéichapa ikatu oiko ñandehegui peteĩ amígo de konfiánsa? Por ehémplo, ñande ndahaʼéi ñañekomprometénteva ñaipytyvõtaha ñane ermanokuéra oikotevẽvape, síno jahecha mbaʼe mbaʼépa ikatu jajapo hesehapekuéra (Mat. 5:37; Luc. 16:10). Umi oikotevẽva ajúda oñeñandu porãiterei oikuaáramo ikatuha okonfia ñanderehe. Peteĩ ermána omombeʼu mbaʼérepa upéva: “Repyta ningo trankíla, pórke reikuaa upe persóna oñekompromete vaʼekue nepytyvõtaha, ojapotaha itiempoitépe upéva”. Umi ohasáva hína peteĩ situasión ijetuʼúva térã oñedesepsiona vaʼekue, tuicha ipyʼaguapy oñeʼẽramo peteĩ iñamígo de konfiánsa ndive. Péro tekotevẽ ñanepasiénsia oiko hag̃ua ñandehegui peteĩ amígo de konfiánsa. Juánape oheja rire iména, haʼe oñeñandu porãve vaʼekue omombeʼúrõ guare iñamigokuéra teépe mbaʼéichapa oñeñandu. Haʼe heʼi: “Oiménengo arrepeti raʼe heta vése la mísma kósa, péro haʼekuéra ipasiénsia cherehe ha cherendu”. Ñandehegui avei oikóta amígo tee ñahendukuaáramo ñane ermanokuérape. w20.01 10, 11 párr. 9-11

La Biblia oñeʼẽ hetaiterei kuimbaʼe ijerovia mbaretévare orresivi vaʼekue espíritu sánto, péro ndorekóiva pe esperánsa oiko hag̃ua yvágape. Por ehémplo, pe espíritu sánto omombarete vaʼekue Davídpe (1 Sam. 16:13). Avei oipytyvõ chupe ontende hag̃ua umi mbaʼe hypyʼũvéva jepe, ha ogia avei chupe oskrivi hag̃ua heta párte oĩva la Bíbliape (Mar. 12:36). Upéicharõ jepe, apóstol Pedro heʼi vaʼekue ‘David ndojupíri hague yvágape’ (Hech. 2:34). La Biblia heʼi Juan el Bautista rehe ‘Ñandejára omeʼẽ hague chupe ijespíritu sánto’ (Luc. 1:13-16). Ha Jesús heʼi vaʼekue ndaiporiha “ko yvy ape ári ni peteĩ persóna tuichavéva Juan el Bautístagui”, péro upéi heʼi avei haʼe nogovernamoʼãiha yvágape (Mat. 11:10, 11). Jehová oipuru ijespíritu sánto omombarete hag̃ua koʼã kuimbaʼépe ikatu hag̃uáicha ojapo heta mbaʼe iñimportantetereíva, péro ndoipurúi ijespíritu oiporavo hag̃ua chupekuéra oho hag̃ua yvágape. ¿Heʼisépa upéva menove ifielha hikuái? Nahániri, síno heʼise Jehová omoingove jeytaha chupekuéra oiko hag̃ua pe paraísope ko yvy ape ári (Juan 5:28, 29; Hech. 24:15). w20.01 23 párr. 15

Jehová ningo ñaneinvita ñaime hag̃ua ifamília apytépe, oĩháme isiervokuéra oadoráva chupe. Enterove ñaiméva ko famíliape ñañemeʼẽma Ñandejárape ha jajerovia Itaʼýra sakrifísiore. Ko famíliape ningo enterove javyʼaiterei. Koʼág̃ama voi ñande rekove isentído, ha javyʼa jarekógui esperánsa jaikovévo pára siémpre, tahaʼe yvágape térã peteĩ paraísope ko yvy ape ári. Ñanderayhu rupi, Jehová ojapo vaʼekue peteĩ sakrifísio tuichaitereíva ikatu hag̃uáicha ñaime ifamília apytépe (Juan 3:16). La Biblia heʼi voi: “Haʼe opaga hepy penderehe” (1 Cor. 6:20). Pe rreskáte rupive Ñandejára omeʼẽ ñandéve la oportunida jareko hag̃ua hendive peteĩ amista iporãitereíva. Ñande jareko pe priviléhio jaʼévo pe persóna iñimportantevéva oĩva ko univérsope haʼeha ñande Túa. Ha ndaipóri ótro túa ikatu vaʼerã oñembojoja Jehováre. Oiméne ñande ñapensa avei pe salmísta opensa haguéicha: “Jehová ivuenoiterei chendive, ¿mbaʼéicha piko che apagapáta chupe?” (Sal. 116:12). Péro añetehápe núnka ndaikatumoʼãi japagapa Jehovápe entéro mbaʼe ojapóva ñanderehehápe. Upéicharõ jepe, pe mborayhu haʼe ohechaukáva ñandéve ñanemomýi jahayhu hag̃ua avei chupe. w20.02 8 párr. 1-3