Junio

Ana, haʼéva proféta Samuel sy, ombohovái vaʼekue heta situasión ijetuʼúva. Heta áñore haʼe ndaikatúi vaʼekue imemby (1 Sam. 1:2). Umi israelita opensa vaʼekue peteĩ kuña naimembyiha oñemaldesi rupi. Upéicha rupi Ana oñeñandu vai ha otĩeterei vaʼekue (Gén. 30:1, 2). Péro oĩ peteĩ mbaʼe oempeoravéva la isituasión: Iména oreko vaʼekue ótro hembireko hérava Peniná, ha haʼe si imemby vaʼekue Elcanágui unos kuánto mitã. Peniná ningo oñembohory hese upévare. Ñepyrũrã ko situasión oguapyeterei kuri Ánare, ha oĩ vaietereígui haʼe “hasẽ ha ni ndokarusevéi”. Tiémpo rire haʼe ou “oñamargaite” (1 Sam. 1:7, 10). ¿Mbaʼe konsuélopa orresivi vaʼekue Ana? Haʼe oñemboʼe Jehovápe ha omombeʼupaite chupe mbaʼéichapa oñembyasy ha ojapo vai hese upe situasión. Oñemboʼe rire, Ana omombeʼu avei pe súmo saserdóte Elípe mbaʼéichapa oñeñandu, ha Elí heʼi chupe: “Tereho katu pyʼaguapýpe, ha Israel Jára tomeʼẽ ndéve upe rejerure vaʼekue chupe”. ¿Mbaʼépa oiko upe rire? “Ana trankiloite oho, okaru ha noñekevrantavéima” (1 Sam. 1:17, 18). Pe ñemboʼe oipytyvõ Ánape ipyʼaguapy jey hag̃ua. w20.02 21 párr. 4, 5

Koʼẽrõitéma Jehová ohundíta hína ko múndo aña, ha “umi ipyʼaporãva ohupyty hag̃ua jeikove opaveʼỹva” añoite ojesalváta (Hech. 13:48). Upévare katuete japredikáta avei ñane parientekuérape ikatu hag̃uáicha oservi Jehovápe ñanendive. Ñande Ru Jehová ñanderayhuetéva ningo “ndoipotái avave oñehundi, síno oipota enterove oñarrepenti” (2 Ped. 3:9). Ñanemanduʼa vaʼerã ñamombeʼu jave umi notísia porã ikatuha jajapo porã upéva térã nahániri. Ñande ningo ñañatende jepi mbaʼéichapa ñañeʼẽta japredika jave peteĩ extráñope, péro sapyʼánte japredika jave ñane pariéntepe ñañeʼẽ jepi chupekuéra derechoite voi. Ñanemanduʼa jave mbaʼéichapa japredika vaʼekue primera ves ñane parientekuérape, ikatu hína ñañeñandu vai upévare ha ekapadete ñandéve jajapo porãve kuri. Iporã vaʼerã ñanemanduʼami apóstol Pablo konséhore, oĩva pe téxto koestediaguápe, japredika jave ñane parientekuérape, pórke ndajajapóiramo upéicha ikatu hína ñambodipara ñaipytyvõ rangue chupekuéra ñanerenduse hag̃ua. w19.08 14, 15 párr. 3-5

¿Mbaʼéichapa nde reñeñandu rakaʼe reikuaa ypýrõ guare koʼã mbaʼe pe Taʼýragui? Jesús haʼe hína pe segunda persóna iñimportantevéva ko univérsope. Haʼe ningo ijeheguiete omeʼẽ vaʼekue hekove ñanderehehápe rreskáteramo. Jahechaukáramo jajeroviaha pe rreskátere umi mbaʼe jajapóva rupive, ikatúta oñeperdona ñandéve ñande pekadokuéra, jaguerekóta peteĩ amista Jehovándi ha jahupytýta vída etérna (Juan 3:16). Jesús haʼe hína ñane Súmo Saserdóte. Haʼe ningo ñanepytyvõse ñañevenefisia hag̃ua pe rreskátegui ha jareko hag̃ua Jehovápe ñane amigoitéramo (Heb. 4:15; 7:24, 25). Haʼe rupi pe Rréi Ñandejára Rréinope, Jehová ojevaléta hese osantifika hag̃ua héra, ohundi hag̃ua entéro mbaʼe vai, ha ogueru hag̃ua umi vendisión ndopamoʼãiva arakaʼeve pe paraíso oútavape (Mat. 6:9, 10; Apoc. 11:15). Jesús haʼe hína pe ehémplo jasegi vaʼerã. Haʼe ningo oipuru vaʼekue hekove ojapo hag̃ua Ñandejára oipotáva, ha péicha ohechauka ñandéve mbaʼéichapa jaiko vaʼerã (Juan 4:34). Nde regueroviávo umi mbaʼe la Biblia omboʼéva Jesúsgui, rehayhúta Ñandejára Raʼýpe. Upéva nemomýita reipuru hag̃ua nde rekove rejapo hag̃ua Ñandejára volunta Jesús ojapo haguéicha. w20.03 10 párr. 12, 13

Jesús heta vése oñemboʼe vaʼekue pe día omano haguépe. Por ehémplo, omoñepyrũrõ guare pe Konmemorasión oñemboʼe kuri pe pan ha pe vínore (1 Cor. 11:23-25). Upéi, osẽ mboyve pe lugár ogueromanduʼa haguépe pe Páskua, oñemboʼe jey idisipulokuérandi (Juan 17:1-26). Ha og̃uahẽ rire hikuái pe lugár héravape Getsemaní, Jesús oñemboʼe jey heta vése upe pyhare (Mat. 26:36-39, 42, 44). Hiʼarive umi última palávra heʼi vaʼekue omano mboyvemi, heʼi kuri peteĩ ñemboʼe rupive (Luc. 23:46). Jahechaháicha, Jesús imanduʼa Jehováre entéro umi mbaʼe iñimportánteva ohasa vaʼekuépe omano mboyve upe díape. Jesús oaguanta kuri umi mbaʼe ohasáva oñemboʼe meme rupi Itúape. Umi apóstol katu ndojapói upéva upe pyhare, ha upévare ndaipyʼaguasúi hikuái tekotevẽramo guare ohasa peteĩ pruéva (Mat. 26:40, 41, 43, 45, 56). ¿Mbaʼépa ñaaprende la oiko vaʼekuégui? Tekotevẽha ñañemboʼe meme Jesús ojapo haguéicha ikatu hag̃uáicha jasegi ñandefiél Jehovápe. w19.04 9 párr. 4, 5

Jehová ndaijaʼeieterei pe espiritísmore. Haʼe heʼi vaʼekue umi israelítape: “Ndaipóri vaʼerã pende apytépe ohapýva itaʼýra térã itajýrape sakrifísioramo, ni avave ojapóva adivinasión, máhia, opredesíva mbaʼépa oikóta, ni pajeséro, ni peteĩ ojapóva malefísio, ni ohóva oporandu espiritístape térã peteĩ adivínope, ni ombaʼeporandúva umi omano vaʼekuépe. Pórke oimeraẽ ojapóva koʼã mbaʼe ombojeguaru hína Jehovápe” (Deut. 18:10-12). Ñande kristianokuéra nañaimevéima pe Léi Mosáika poguýpe, péro upéicharõ jepe, jaikuaa porã nokambiái hague la Jehová opensáva pe espiritísmore. Jehová heʼi ñandéve ñamboyke hag̃ua pe espiritísmo pórke oikuaa Satanás oipuruha upéva operhudika hag̃ua yvyporakuérape. Por ehémplo, oipuru omosarambi hag̃ua heta japu, umíva apytépe ogueroviaka umi omanóva osegiha oikove umi espíritu oĩháme (Ecl. 9:5). Satanás oipuru avei pe espiritísmo ikatu hag̃uáicha omongyhyje umi héntepe ha omomombyry chupekuéra Jehovágui. Péicha haʼe oipota umi persóna ojerovia umi espíritu añáre ojerovia rangue Jehováre. w19.04 21 párr. 5, 6

Pe oavusa térã ovioláva peteĩ mitãme opeka vaieterei hína. Haʼe olastima ha operhudika vaieterei chupe. Pe mitã ningo okonfia kuri hese, péro upe persóna otraisiona chupe ha ojapo hese umi mbaʼe vai ndojejapói vaʼerã peteĩ mitãre, ha upévare pe mitã noñeñanduvéima segúro. Ñande japrotehe vaʼerã umi mitãme ani hag̃ua oiko hesekuéra umichagua mbaʼe vai, ha oĩramo algúno ohasáma vaʼekue koʼã mbaʼe, tekotevẽ ñakonsola ha ñaipytyvõ chupe (1 Tes. 5:14). Kongregasiónpe oĩramo oavusa térã ovioláva peteĩ mitãme omotĩ ha omoherakuã vai pe kongregasiónpe (Mat. 5:16; 1 Ped. 2:12). Ñande ndajaipotái mbaʼeve omongyʼa ni oheja vai pe kongregasiónpe, upévare umi ojapóva koʼãichagua mbaʼe vai ha noñarrepentírivape, ndajarekovéima chupe ñane ermánoramo. Peteĩ kristiáno nokumplíriramo umi léi omoĩva pe goviérno ha ojapo peteĩ mbaʼe vai, por ehémplo oavusáramo peteĩ mitãre, upéicharõ haʼe opeka hína umi autorida kóntrape (ekompara Hechos 25:8 heʼívare). Umi ansiáno ndorekóiramo jepe derécho okastiga hag̃ua umi nokumplírivape pe léi, haʼekuéra nomoʼãi upe oavusa vaʼekuépe peteĩ mitãre ani hag̃ua umi autorida okondena ha okastiga chupe. w19.05 9 párr. 4-7

Ñande ikatu ñambohovái porã oimehaichagua situasión, Jehová haʼe rupi ñane “Mboʼehára Ijojahaʼỹva” (Is. 30:20, 21). La Bíbliape jatopa entéro mbaʼe ñaikotevẽva ikatu hag̃uáicha ‘ñandekatupyry opa mbaʼerã, ha jarekopaite hag̃ua ñaikotevẽva guive jajapo hag̃ua iporãva’ (2 Tim. 3:17). Jaikóramo Ñandejára Ñeʼẽme heʼiháicha katuete ñanearanduve umi odefendévagui “ko mundopegua arandu” (Sal. 119:97-100). Ko mundopegua arandu ningo ñanemomýi jareko hag̃ua umi pensamiénto ha deséo vai. Upévare sapyʼánte ikatu ijetuʼu ñandéve ñanediferénte hag̃ua umi hénte oikóvagui ko múndope. Ndareíri la Biblia heʼi ñandéve: “Peñatendéke ani avave oipuru yvypóra arandu, ni heʼi peẽme vyrorei penembotavy hag̃ua ha pendereity iñuhãme. Haʼekuéra ojevale umi kostúmbre kuimbaʼekuéra omboʼévare” (Col. 2:8). La Biblia ningo heʼíma vaʼekue voi umi ára pahápe umi hénte ‘oikotaha vyʼarã rapykuérinte’ (2 Tim. 3:4). Koʼág̃arupi avei oĩ hetaiterei mbaʼasy ojeguerováva umi rrelasión sexuál káusare, por ehémplo pe sída. Entéro koʼã mbaʼe ohechauka porã vyroreiha ko mundopegua arandu (2 Ped. 2:19). w19.05 21 párr. 1, 2; 22 párr. 4, 5

Satanás ombotavy umi israelítape ogueroviakávo chupekuéra osegi vaʼerãha umi kostúmbre orekóva umi ivesinokuéra ndoservíriva Ñandejárape, ha péichamante ikatutaha osẽ porã ikogakuéra ha osegi oikove hikuái. Koʼã puévlo oĩva ijererekuéra oguerovia vaʼekue umi idioskuéra omboutaha ama ojapóramo añoite chupekuéra umi rríto rrelihióso. Umi israelita ndojeroviáiva Jehováre opensa vaʼekue osegi vaʼerãha koʼã kostúmbre, ani hag̃ua ou ipukueterei pe séka tiémpo, upévare oñepyrũ ojapo umi rríto rrelihióso pe dios fálso Baálpe g̃uarã. Satanás oipuru avei umi deséo vai orekóva umi israelita omoñuhã hag̃ua chupekuéra. Umi nasión oĩva ijererekuéra ojapo vaʼekue umi mbaʼe tieʼỹ oporombojeguarúva oadora hag̃ua idioskuérape. Por ehémplo, umi témplope oĩ vaʼekue umi prostitúta ha prostitúto. Koʼã nasiónpe oñepermiti vaʼekue pe omosexualida ha opaichagua tekovai, ha koʼã mbaʼe normál vaʼekue chupekuéra g̃uarã (Deut. 23:17, 18; 1 Rey. 14:24). Koʼã nasión ndoadoráiva Ñandejárape oguerovia vaʼekue koʼãichagua rrituál omokyreʼỹha idioskuérape omboprodusi porã hag̃ua pe yvy. Heta israelítape ogusta vaʼekue umi rrituál itieʼỹva ojapóva umi nasión, ha oheja upéva omoñuhã chupekuéra ha oñepyrũ oservi umi dioskuérape. w19.06 2 párr. 3; 4 párr. 7, 8

Oĩ hetaiterei betelita orresivi vaʼekue peteĩ asignasión pyahu. Ikatu hína ijetuʼueterei koʼã ermáno ifiélvape oheja hag̃ua pe asignasión ohayhuetéva. Oiméramo ñande ñaime koʼãva apytépe, ¿mbaʼépa ikatu ñanepytyvõ ñambohovái hag̃ua umi kámbio? Ñamombarete vaʼerã ñane amista Jehovándi, jaleévo la Biblia káda día ha jajepyʼamongetávo hese. Iporãta avei jasegíramo jajapo opa ikatúva predikasiónpe ñane kongregasión pyahu ndive. Jehová ningo imanduʼa hína umi osegívare oservi chupe fiélmente, ndaikatúiramo jepe ojapo hikuái entéro mbaʼe anteve ojapo vaʼekue. Jasegi vaʼerã avei jaiko sensillomínte. Ani jaheja umi mbaʼe oĩva Satanás múndope ñandepyʼapyeterei ha ñandejoko jaservi hag̃ua Jehovápe (Mat. 13:22). Umi persóna ndoservíriva Jehovápe, umi ñane amígo térã parientekuéra oñehaʼãva ñanepytyvõ ikatu heʼi ñandéve tekotevẽha ñagana heta pláta jaiko porãve hag̃ua, péro aníkena ñahendu chupekuéra (1 Juan 2:15-17). Jajerovia vaʼerã Jehováre, haʼe ningo opromete omeʼẽtaha ñandéve entéro mbaʼe “ñaikotevẽ jave”. Haʼe ñanepytyvõta jasegi hag̃ua ñande jerovia mbarete, ñaime hag̃ua trankílo ha omeʼẽta avei ñandéve umi mbaʼe ñaikotevẽva ñañemantene hag̃ua (Heb. 4:16; 13:5, 6). w19.08 20 párr. 4; 21 párr. 7, 8

¿Ndépa rehasa hína peteĩ situasión nekevrantaitereíva? Oiméramo upéicha, katuete nemokyreʼỹetereíta reikuaávo Jehová katuete ontendeha umi mbaʼe ñandéve ñandepyʼapýva. Jehová oikuaa mbaʼépa ikatu térã ndaikatúi jajapo, ha oikuaa avei umi mbaʼe ñapensáva ha ñañandúva (Sal. 103:14; 139:3, 4). Ñande ñakonfiárõ Jehováre, haʼe katuete ñanepytyvõta ñambohovái hag̃ua oimeraẽ situasión ikatúva ñandepyʼapy. Oiméramo peteĩ situasión nekevrantaiterei, upéva ikatu nedesanima ha repensa voi arakaʼeve nokambiamoʼãiha ne situasión. Upéva oikóramo nderehe, nemanduʼákena Jehová katuete nepytyvõtaha ani hag̃ua reñekevrantaiterei. ¿Mbaʼéichapa ojapóta upéva? Jehová oipota emombeʼu chupe umi mbaʼe reñandúva ha ndepyʼapýva, ha haʼe ombohováita ndéve ne ñemboʼe (Sal. 5:3; 1 Ped. 5:7). Upévare eñemboʼe meme vaʼerã Jehovápe ha emombeʼu chupe umi provléma erekóva. Haʼe noñeʼẽmoʼãi nendive, péro oñeʼẽta ndéve la Biblia ha iñorganisasión rupive. La Bíbliape retopáta heta párte nekonsolátava ha omeʼẽtava ndéve esperánsa. Avei kongregasiónpe umi ermáno ha ermána ikatu tuicha nemokyreʼỹ (Rom. 15:4; Heb. 10:24, 25). w19.06 16 párr. 7, 8

Jajepersegi jave, ñañemboʼe ñande Túa ñanderayhuetévape. ‘Ñanerasẽ ha ñamombeʼu chupe entéro mbaʼe oĩva ñane korasõme’, ha ikatu voi ñamombeʼu Jehovápe entéro mbaʼe ñanemongyhyjéva ha ñanekevrantaitereíva (Lam. 2:19). Péicha ñañemboʼe meméramo Jehovápe, ñañandúta ñañemoag̃uiveha hese (Rom. 8:38, 39). Ñaime vaʼerã segúro oñekumplitaha katuete Ñandejára promesakuéra oñeʼẽva pe Rréinore (Núm. 23:19). Ndajajeroviapáirõ oñekumplitaha Jehová promesakuéra, ifasilvéta hína Satanáspe ha umi oĩvape ipoguýpe ñanemongyhyje hag̃ua (Prov. 24:10; Heb. 2:15). Ñañemotiémpo vaʼerã jastudia hag̃ua Ñandejára promesakuéra oñeʼẽva pe Rréinore, ha mbaʼérepa ikatu ñaime segúro umíva oñekumplitaha katuete. ¿Mbaʼéichapa ñanepytyvõta upéva? Jahechamína Stanley Jones ehémplo, ojerovia rupi haʼe oĩ vaʼekue kárselpe 7 áño. Haʼe omombeʼu mbaʼépa oipytyvõ chupe oaguanta hag̃ua: “Che jerovia ningo imbarete vaʼekue pórke aikuaa porã mbaʼépa Ñandejára Rréino ha mbaʼe mbaʼépa ojapóta. Che ni michĩmi ndadudáiva upévagui. Upéicha rupi avave ndaikatúi vaʼekue chemomombyry Jehovágui”. Jajerovia mbaretéramo Ñandejára promesakuérare, nañapermitimoʼãi mbaʼeve ñanemongyhyje jasegi hag̃ua jaservi chupe (Prov. 3:25, 26). w19.07 2 párr. 1; 3 párr. 6, 7

¿Mbaʼérepa iñimportantete ñaipytyvõ umi héntepe oiko hag̃ua chuguikuéra Jesús disípulo? Pórke Jesús disipulokuéragui añoite ikatu oiko Jehová amígo. Hiʼarive Jesús segidorkuéra oiko porãve koʼág̃ama voi, ha avei oreko esperánsa oikove hag̃ua pára siémpre (Juan 14:6; 17:3). Añetehápe Jesús omeʼẽ ñandéve peteĩ rresponsavilida tuichaitereíva, péro ñande ndajajapói ñaneaño ko tembiapo. Apóstol Pablo heʼi vaʼekue haʼe ha iñirũnguéra haʼeha “Ñandejára ajudánte” (1 Cor. 3:9). ¡Ajépa tuichaite priviléhio omeʼẽ Jehová ha Jesucristo ñande yvypóra imperféktope! Avei, katuete javyʼaiterei ñaipytyvõ jave umi héntepe oiko hag̃ua chuguikuéra Jesús disípulo. ¿Mbaʼépa primeroite jajapo vaʼerã ikatu hag̃uáicha jajapo disípulo? Jaheka vaʼerã umi hénte oaprendesévape Jehovágui. Ñande ningo jahechauka añetehápe haʼeha testígo de Jehová japredika rupi entéro persóna jatopávape. Ñakumpli jave pe mandamiénto Jesús omeʼẽ vaʼekue ñandéve japredika hag̃ua, ñande jahechauka hína haʼeha kristiáno tee. w19.07 14, 15 párr. 3-5

Heta hénte oñepyrũ oñeinteresa la Bíbliare oreko rupi umi konsého ideprovechoitereíva ñande rekovépe g̃uarã. Nueva Yórkpe, peteĩ ermána ovisitáva umi oñeʼẽvape chino mandarín, omombeʼu: “Che añehaʼã ahechauka añeinteresaha umi héntere ha ahendu chupekuéra. Aikuaárõ algúno ova ramónte hague ótro paísgui, aporandu chupe: ‘¿Mbaʼeteko reho hese hína? ¿Retopáma piko nde travahorã? ¿Mbaʼéichapa ndetrata hína umi hénte koʼapegua?’”. Sapyʼánte upéva oipytyvõ pe ermánape oñepyrũ hag̃ua oñemongeta la Biblia omboʼévare. Opyta porã vove haʼe heʼive: “¿Mbaʼépa nde ere iñimportanteha jajapo jajogueraha porã hag̃ua umi héntendi? ¿Ikatúpa ahechauka ndéve peteĩ konsého iporãva oĩva la Bíbliape? Upépe heʼi: ‘Umi oikóva omoñepyrũ pléito haʼete oipeʼáva pe varréra ojokóva umi y. Repilláramo ojeiko vaitaha, upe mboyve rehóma vaʼerã upégui’. ¿Ndépa ere ko konsého ikatuha ñanepytyvõ jajogueraha porã hag̃ua ñande rapichándi?” (Prov. 17:14). Péicha ñañemongetárõ umi héntendi, ikatúta jahechakuaa mávapa oipotáta jasegi javisita chupe. w19.07 23 párr. 13

Umi orekóva peteĩ asignasión pyahu oikotevẽ hína ñantende isituasionkuéra, ndahaʼéi ñambyasy chupekuéra. Umi ermáno térã peteĩva ihentekuéra ikatu hína hasykatu, ha ijetuʼu chupekuéra ombohovái hag̃ua upéva. Ikatu oime oñembyasy hikuái omano haguére peteĩ ohayhúva. Ha ndeʼíriramo jepe mbaʼeve, ikatu avei ndovyʼái hikuái ohechagaʼúgui umi iñamigokuéra oheja vaʼekue iñasignasión anteve guarépe. Haʼekuéra ningo oikotevẽ tiémpo ogueropuʼaka hag̃ua umi mbaʼe oñandúva. Ñande ningo ikatu hína ñaipytyvõ chupekuéra japredikávo hendivekuéra ha ñamokyreʼỹ chupekuéra ñane ehémplo rupive. Peteĩ ermána oservi vaʼekue heta áñore ótro paíspe heʼi: “Pe asignasión areko vaʼekuépe che ajapo estúdio bíblico káda día, ha che asignasión pyahúpe katu ijetuʼueterei aavri hag̃ua la Biblia jepe predikasiónpe, térã ahechauka hag̃ua peteĩ vidéo jepe. Péro umi ermanokuéra oĩva che kongregasión pyahúpe cheinvita aha hag̃ua ajapo hendivekuéra rrevisíta ha estúdio bíblico. Upéva chemoñeñandu porãve ha apensa porãve pe territóriore. Che aaprende mbaʼéichapa añepyrũ vaʼerã añemongeta umi héntendi ore território pyahúpe. Entéro koʼã mbaʼe ningo chepytyvõ avyʼa jey hag̃ua”. w19.08 22 párr. 10; 24 párr. 13, 14

Sapyʼánte ningo ijetuʼueterei ñandéve jahayhu hag̃ua ñane ermanokuérape jajapo rupi Evodia ha Síntique ojapo vaʼekue: Jajesarekoiterei ñane ermanokuéra deféktore. Enterove ningo jajavy káda día. Ñande jasegíramo ñapensa umi mbaʼe vai ojapóvare ñane ermanokuéra, ijetuʼuvéta ñandéve jahayhu hag̃ua chupekuéra. Ñapensamína ko ehémplore. Ñamoĩ chupe peteĩ ermáno hesaraiha ha nañanepytyvõi ñamopotĩ hag̃ua pe Salón del Reino, upévare japyta ñandepochy hendive. Ha ñañepyrũramo ñapensa entéro umi mbaʼe vai ojapo vaʼekuére upe ermáno, koʼýte ñandepochyvétantema hendive ha saʼivéma jahayhúta chupe. Jarekóramo peichagua provléma peteĩ ñane ermánondi, iporãta ñapensáramo ko mbaʼére: Jehová ohecha umi defékto jarekóva ñande ha avei umi orekóva ñane ermáno. Upéicharõ jepe, haʼe lomímonte ohayhu ñane ermánope ha ñanderayhu avei ñandéve. Ajépa iporãve upéicharõ jasegi Jehová ehémplo japorohayhúvo, ha jajesareko umi kualida porã orekóvare ñane ermanokuéra. Ñañehaʼã jave jahayhu ñane ermanokuérape, ñaimeve en unida hendivekuéra (Filip. 2:1, 2). w19.08 9, 10 párr. 7, 8

Umi iñumíldeva ipyʼaite guive añoite ikatu hína oiko Ñandejára amigoitéramo. Jehová ohayhu umi persóna iñumíldevape, “péro mombyrýnte opyta pe oñemombaʼeguasúvagui”. Entéronte jaipota Jehová ñanderayhu ha ñandeguerohory, upévare iñimportanteterei ñañehaʼã ñaneumílde hag̃ua. Peteĩ persóna iñumíldeva noñembotuichái. Haʼe oikuaa porã Jehová tuichaveha chugui ha ndoikói opensa iñimportanteveha ótrogui, síno orrekonose umi ótro tuichaveha chugui (Filip. 2:3, 4). Oĩ persóna haʼetévaicha iñumildetereíva. Ikatu oime hiʼotĩ térã ikirirĩmi. Ikatu iñamávle ha otrata porã ótrope pórke ituakuéra omboʼe chupekuéra upéicha. Péro ipyʼapýpe ikatu hína oñemombaʼeguasueterei. Peichagua persóna en kualkiér moménto ohechauka mbaʼépa añetehápe oĩ ipyʼapýpe (Luc. 6:45). w19.09 2 párr. 1, 3, 4

‘Umi notísia porã, oñeʼẽva ñande Ruvicha Jesús rehe’ haʼe hína entéro mbaʼe Jesús omboʼe vaʼekue. Ñande ñaneñeʼẽrendu koʼã notísia porãme jajapóvo umi mbaʼe Jesús omboʼe vaʼekue. Por ehémplo ñamotenondéramo Ñandejára servísio, jajapóramo iléi heʼíva ha ñañeʼẽ meméramo Ñandejára Rréinore (Mat. 6:33; 24:14). Ñaneñeʼẽrendu avei umi notísia porãme jaapojávo umi unhídope, haʼekuéra ningo opredika vaʼerã umi notísia porã ha oipytyvõ vaʼerã la héntepe oiko hag̃ua chuguikuéra Jesús disípulo, ha upéva ningo peteĩ traváho iñimportantetereíva (Mat. 25:31-40). Umi unhído koʼẽrõitéma omyengoviáta entéro mbaʼe ojapo vaʼekue hesehapekuéra umi “ótro ovechakuéra” (Juan 10:16). ¿Mbaʼéichapa ojapóta upéva? Oñepyrũ mboyve Armagedón, enterovete umi 144.000 unhído oĩmbátama amo yvágape, haʼekuéra nomanomoʼãvéima ha oĩta pe ehérsito yvagapeguápe ohundítava Gógpe ha oprotehétava pe ‘aty guasúpe’, haʼéva Ñandejára siervokuéra (Apoc. 2:26, 27; 7:9, 10). Ajépa javyʼaitéta jaikuaágui ñaipytyvõ hague umi unhídope oĩrõ guare gueteri ko yvy ape ári. w19.09 12, 13 párr. 16-18

¿Mbaʼérepa ñandepiroʼy térã ñañeñandu porã jajapo jave pe traváho oheja vaʼekue ñandéve Jesús? Pórke jaguereko umi superintendénte ipyʼaporãvéva. Jehová haʼéramo jepe Ñandejára Ndaijojaháiva, ndojopýi ñanendive ni naimalagradesídoi, síno omombaʼe umi traváho jajapóva (Heb. 6:10). Ha omeʼẽ ñandéve pe fuérsa ñaikotevẽva ñakumpli hag̃ua umi rresponsavilida jarekóva (2 Cor. 4:7; Gál. 6:5, nóta). Avei ñande Rréi Jesucristo omeʼẽ ñandéve pe ehémplo perfékto jaikuaa hag̃ua mbaʼéichapa jatrata vaʼerã ótrope (Juan 13:15). Ha umi ansiáno oñangarekóva ñanderehe oñehaʼã osegi Jesús ehémplo, “haʼe ningo pe pastór iñimportantevéva” (Heb. 13:20; 1 Ped. 5:2). Haʼekuéra oñehaʼãmbaite oporomokyreʼỹ, iñamávle ha ipyʼaguasu ñanemboʼe ha ñandeprotehévo. Avei jaguereko umi kompañéro de traváho haʼéva hína ñane amigoite. Ndaipóri ñandéicha orekóva peteĩ traváho iñimportantetéva ha amígo oporohayhúva. Ñapensamíntena, jareko pe priviléhio ñambaʼapóvo umi persóna osegívandi umi konsého ha mandamiénto iñimportantevéva, péro nopensáiva ihustoveha ótrogui. Haʼekuéra orrekonose umi ótro iñimportanteveha chuguikuéra, nopensái ñande ikompañéro de travahonteha, síno ñanderecha iñamígo teéramo. Ha ñanderayhueterei rupi oĩ voi omeʼẽ hag̃uáicha hekove ñanderehehápe. w19.09 20 párr. 1; 23 párr. 12-14

Apóstol Pablo oñeʼẽ hína kuri “Jehová ára” rehe (1 Tes. 5:1-6). ¿Mbaʼépa hína upéva? “Jehová ára” haʼe hína pe tiémpo oñepyrũtava ojeataka vove ‘Babilonia Guasúpe’ haʼéva entéro umi rrelihión japu, ha opátava Armagedónpe (Apoc. 16:14, 16; 17:5). Pablo omombeʼu avei ñandéve mbaʼépa jajapo vaʼerã ñaime hag̃ua preparádo og̃uahẽ vove “Jehová ára”. Haʼe heʼi porã: “Aníkena jake umi ótro ojapoháicha, síno japyta japayhápe”, ha ñañatende ani hag̃ua ñañentremete polítikape ha upéva káusa nañaneneutralvéi. Ndajajekuidáiramo, ikatu hína jaiko “umi hénte ko mundopegua oikoháicha” (Juan 15:19). Ñande jaikuaa porã Ñandejára Rréino añoite oguerutaha pyʼaguapy ko múndope. Avei ñaipytyvõ vaʼerã umi héntepe opáy hag̃ua, ikatu hag̃uáicha oikuaa hikuái mbaʼépa la Biblia heʼi oikotaha ko múndore. Oñepyrũ vove pe jehasa asy guasu, umi hénte ndaikatumoʼãvéima oñepyrũ oservi Jehovápe. Upévare tekotevẽterei japredika koʼág̃a. w19.10 8 párr. 3; 9 párr. 5, 6

Ojeskrivipa rire pe lívro, Jeremías oasigna vaʼerã kuri iñamígo Barúcpe ontrega hag̃ua umi héntepe pe mensáhe (Jer. 36:5, 6). Ko asignasión ipeligróso kuri, péro Baruc pyʼaguasúpe okumpli vaʼekue. ¡Eñeimahinamína mbaʼeichaitépa oiméne Jeremías ovyʼáne raʼe oikuaávo Baruc oho hague pe témplope ha olee pe lívro umi héntepe! (Jer. 36:8-10). Umi prínsipe oĩva Judápe oikuaárõ guare Baruc ojapo vaʼekue, heʼi chupe olee hag̃ua avei chupekuéra pe lívro (Jer. 36:14, 15). Upe rire, umi prínsipe odesidi omombeʼu rréi Jehoiaquímpe umi mbaʼe Jeremías heʼi vaʼekue. Pe rréi Jehoiaquim ipochyeterei ohendu rire la Jeremías oskrivi vaʼekue, upémarõ ohapy pe lívro ha omanda ojejagarra hag̃ua proféta Jeremíaspe ha isekretário Barúcpe. Péro Jeremías ojagarra jey ótro lívro, omeʼẽ Barúcpe ha heʼi chupe oskrivi hag̃ua pype Jehová mensáhe. Upémarõ Baruc oskrivi “opa mbaʼe heʼi vaʼekue pe lívro rréi Jehoiaquim de Judá ohapy vaʼekue tatápe” (Jer. 36:26-28, 32). w19.11 3, 4 párr. 4-6

Jehovágui ikatu oiko oimeraẽ mbaʼe tekotevẽva oñekumpli hag̃ua ivolunta. Por ehémplo, chugui ikatu oiko peteĩ oporomboʼéva, peteĩ oporokonsoláva, térã peteĩ omeʼẽva notísia porã. Koʼã mbaʼe ohechauka Jehovágui ikatuha oiko hetaiterei mbaʼe oñekumpli hag̃ua ivolunta (Is. 48:17; 2 Cor. 7:6; Gál. 3:8). Upéicharõ jepe, haʼe pyʼỹinte oipuru yvyporakuérape ojapo hag̃ua haʼe oipotáva (Mat. 24:14; 28:19, 20; 2 Cor. 1:3, 4). Jehová ikatu avei oimeraẽvape ñanemoarandu ha ñanemombarete ikatu hag̃uáicha oiko ñandehegui haʼe oipotáva. Entéro koʼã mbaʼe ohechauka porã mbaʼépa heʼise Jehová réra, upéicha avei opensa heta expérto. Enterovetéva ningo ñandedeprovechose Jehovápe, péro ikatu oĩ odudáva oimépa Ñandejára oipuru chupe. ¿Mbaʼérepa? Pórke opensa jepi ndaikatuiha ojapo hetave mbaʼe ndaikatupyrýi haguére, ijedámagui, térã isituasión nopermitíri rupi chupe. Péro oĩ avei opensáva ovalemaha umi mbaʼe ojapóva ha natekotevẽiha oñehaʼã oprogresave hag̃ua. w19.10 20 párr. 1, 2

Jahayhúramo umi mbaʼerepy ñande jerovia ikatu hína ikangy ha ndajajapomoʼãi heta mbaʼe Jehovápe g̃uarã. Apóstol Pablo heʼi vaʼekue: “Peteĩ soldádo opyta porãséva pe huvicha ogueraha vaʼekuéndi chupe soldádoramo, ndoikói oñentremete negósiope ogana hag̃ua pláta” (2 Tim. 2:4). Ha añetehápe, ymave umi soldádo rrománope noñepermitíri vaʼekue oñentremete mbaʼeveichagua negósiope ni ojapo ótro traváho. Ojapoháicha umi soldádo ikatupyrýva, pe iñimportantevéva ñandéve g̃uarã hína ñambovyʼa ñane komandantekuérape: Jehová ha Jesúspe. Upéva ningo ovaleve hína oimeraẽ mbaʼe ikatúvagui omeʼẽ ñandéve Satanás múndo. Upéicha rupi siémpre ñañemotiémpo ha ñañehaʼãmbaite jaservi hag̃ua Jehovápe ha oĩ porã hag̃ua ñande jerovia, térã ñande eskúdo, ha avei kompletoite ñane armadúra oúva Ñandejáragui. ¡Ñañatende porãkena siémpre! ¿Mbaʼérepa? Apóstol Pablo oavisa vaʼekue “umi ojedesidímava ipláta hetataha” ‘ohejataha ijerovia’ (1 Tim. 6:9, 10). w19.11 17 párr. 12, 14, 15

“Jehová ára” oñepyrũ mboyve ojeʼéta hína: “¡Jaikóma pyʼaguapýpe ha segúro porã!” (1 Tes. 5:1-6). Pe téxto de 1 Tesalonicenses 5:2 heʼívo “Jehová ára”, oñeʼẽ hína pe ‘jehasa asy guasúre’ (Apoc. 7:14). ¿Mbaʼéichapa jaikuaáta oñepyrũtamaha pe ‘jehasa asy guasu’? La Biblia omombeʼu oñeanunsiataha ‘jaikomaha pyʼaguapýpe ha segúro porã’. ¿Ojapótapa avei ko anúnsio umi omoakãva umi rrelihión? Posívlemente. Péro si jaikuaa porã ojeʼe vove ‘jaikomaha pyʼaguapýpe ha segúro porã’, upéva haʼetaha peteĩ japu oúva umi demóniogui. Ha upéva ipeligrósota pórke umi hénte añetehápe opensáta oĩmaha pyʼaguapy, péro ndoikuaaiete oñepyrũtamaha peteĩ jehasa asy arakaʼeve oikoʼỹ haguéicha. “Upepete oñeimoʼãʼỹve jave oñehundíta hikuái. Upéva oúta hiʼarikuéra derrepentete, peteĩ kuña hasyháicha derrepentete imemby hag̃ua”. Péro, ¿mbaʼépa oikóta Jehová siervokuéra ifiélvagui? Haʼekuéra ningo ndoikuaái arakaʼetépa oikóta upéva, upévare ikatu hína oñesorprende oñepyrũvo Jehová ára, péro haʼekuéra oĩtama preparádo. w19.09 9 párr. 7, 8

Jadesidíta jave peteĩ mbaʼe, jaikuaa porã vaʼerã mbaʼépa jahupytyse. Upéva ñanepytyvõta ñakompleta hag̃ua pe ñañepyrũ vaʼekue. Por ehémplo, oiméramo jadesidi raʼe jaleetaha la Biblia káda día, péro ndajakalkulái mboýpa jaleéta, ikatu hína nosẽi ñandéve. Ótro ehémplo: Umi ansiáno peteĩ kongregasionpegua odesidi ovisitataha ermanokuérape pyʼỹive, péro ohasa la tiémpo ha ndojapói hikuái upéva. Peteĩ mbaʼe oipytyvõtava chupekuéra hína oñeporandúramo koʼã mbaʼe: “¿Roanotámapa máva mávapa hína umi ermáno tekotevẽva rovisita? ¿Rohechámapa mbaʼe día ha mbaʼe oraitépa rovisitáta chupekuéra?”. Avei, jahechakuaa vaʼerã mboýpa ikatu jajapo. Avave ningo ndorekói pe tiémpo, pláta ha fuérsa ojapo hag̃ua entéro mbaʼe ojaposéva. Upévare jahechakuaa vaʼerã mboýpa añetehápe ikatu jajapo ha ani ñañemohatã peteĩ idéape. Sapyʼánte tekotevẽta voi ñakambia peteĩ mbaʼe jadesidi vaʼekue jahechakuaágui ndaikatumoʼãiha ñakumpli. w19.11 29 párr. 11, 12

Isaías 65:21-23-pe oñemombeʼu mbaʼéichapa ojeikóta ko yvy ape ári. Oĩ opensáva pe paraísope avave nombaʼapomoʼãiha ha jaiko reitaha tódo el tiémpo. Péro la Biblia ohechauka upe tiémpope Ñandejára puévlo orekotaha heta mbaʼe ojapo vaʼerã, ha umi traváho ombovyʼáta chupekuéra. Opa vove pe Goviérno de Mil áño, Ñandejára kreasión ndoikomoʼãvéima pekádo ha ñemano poguýpe, “síno oikóta chuguikuéra Ñandejára raʼy ha oguerekóta hikuái pe liverta ijojahaʼỹva” (Rom. 8:21). Jehová oñenkarga vaʼekue ikatu hag̃uáicha umi israelita ombaʼapo ha opytuʼu, ha upéicha avei ojapóta isiervokuéra rehehápe Jesús Goviérno de Mil áño aja. Upérõ katuete jarekóta tiémpo jaadora hag̃ua Ñandejárape, pórke upéva añetehápe iñimportanteterei ikatu hag̃uáicha javyʼa, tahaʼe koʼág̃a térã pe múndo pyahúpe. Cristo Goviérno de Mil áño aja, entéro persóna ifiélva ovyʼaitereíta, pórke orekóta heta traváho ombovyʼáva chupekuéra ha oservíta hikuái Jehovápe. w19.12 12 párr. 15; 13 párr. 17, 18

Pe palávra hebrea “remboʼe”, heʼise oñemboʼeha peteĩ mbaʼe ojerrepeti rupi heta vése. Ojapo hag̃ua upéva, umi tuakuéra ohasa vaʼerã tiémpo ifamíliandi. Sapyʼánte ikatu ikaneʼõ hikuái oiko haguére orrepeti la mísma kósa heta vése. Péro opensa vaʼerã upéva haʼeha peteĩ oportunida oipytyvõ hag̃ua ifamiliakuérape ontende hag̃ua Ñandejára Ñeʼẽ, ha ojapo hag̃ua hikuái upépe heʼíva. Upévare, umi tuakuéra oikuaa porã vaʼerã ifamíliape. Salmo 127 okompara umi mitã umi fléchare (Sal. 127:4). Umi flécha ningo ikatu idiferénte ojuehegui heta mbaʼépe, tahaʼe mbaʼéguipa ojejapo, ipukukue térã ipoguasukuépe. Ha upéichante avei umi mitã, haʼekuéra idiferénte ojuehegui heta mbaʼépe. Upévare tuakuéra odesidi vaʼerã mbaʼéichapa omboʼéta káda únope. Peteĩ matrimónio ñane tiempopegua oikóva Israélpe, oipytyvõ vaʼekue umi mokõi ifamíliape oservi hag̃ua Jehovápe. Haʼekuéra omombeʼu mbaʼépa oipytyvõ chupekuéra: “Rojapórõ guare pe estúdio bíblico ore famíliandi, rostudia káda únondi por separádo”. Jaikuaaháicha, pe omoakãva pe família odesidíta ikatúpa térã tekotevẽpa ostudia péicha ifamíliandi. w19.12 26 párr. 18-20

Jajejopy vai jave, jaagradese ñande pyʼaite guive oĩramo ñanepytyvõva. Brian túa ningo omano vaʼekue degolpete peteĩ aksidénte ivaietereívape. Haʼe heʼi: “Oĩ umi kósa isensillovéva jepe ndaikatúiva rejapo pe mbaʼembyasy ndejopyeterei jave. Jaagradeseterei ningo oĩ jave ñanepytyvõva, haʼetéramo jepe ndatuicháiva pe ojapóva”. Aníkena ñanderesarái tuichaiterei okonsolaha umi ohasa asývape ñanembaʼeporãramo hendivekuéra, ha jajapo peteĩ mbaʼe michĩmíva jepe ñaipytyvõ hag̃ua chupekuéra. Ñanemanduʼami pe ehémplo oheja vaʼekuére ñandéve Marcos primer síglope. Haʼéngo oiméne heta hembiapo rakaʼe. Upéicharõ jepe, Marcos oñemotiémpo okonsola hag̃ua apóstol Páblope, ha upévare Pablo oikuaa vaʼekue ikatuha ojerure chupe ajúda. Ángela avuéla ningo ojejuka vaieterei vaʼekue, ha upe tiémpope haʼe oagradeseterei oĩ haguére imbaʼeporãva hendive. Haʼe heʼi: “Repilláramo umi ermáno añetehápe nepytyvõseha, ifásil reñeʼẽ hag̃ua hendivekuéra. Ndodudái voi nepytyvõ hag̃ua ha ndojapói upéva tovapukúpe”. Upévare iporã ñañeporandu: “¿Ohechakuaápa che ermanokuéra aipytyvõse ha akonsolaseha chupekuéra?”. w20.01 11, 12 párr. 14-16

¿Mbaʼéichapa peteĩ unhído ikatu ohechauka ‘ndorrespetaiha’ pe pan ha pe víno? Upéva ikatu oiko hoʼúramo umíva péro nokumplíriramo oikóvo Jehová mandamientokuéra (Heb. 6:4-6; 10:26-29). Umi unhído ohechakuaa osegi vaʼerãha ifiél Jehovápe ikatu hag̃uáicha ohupyty “pe prémio Ñandejára omeʼẽva, upéva hína pe jeikove yvágape, ha Ñandejára omeʼẽta upéva umi oiporavo vaʼekuépe Cristo Jesús rupive” (Filip. 3:13-16). Jehová espíritu sánto ñanepytyvõ ani hag̃ua ñañemombaʼeguasu, síno ñaneumílde hag̃ua (Efes. 4:1-3; Col. 3:10, 12). Upévare umi unhído nopensái iñimportanteveha ótrogui. Haʼekuéra oikuaa porã Jehová ndahaʼéi katuete omeʼẽva chupekuéra hetave espíritu sánto umi ótro kristiánogui. Avei nopensái ontende porãveha la Biblia umi ótro ermanokuéragui. Ha núnka ndeʼimoʼãi avavépe: “Nde ningo unhído avei, upévare reʼu vaʼerã avei pe pan ha pe víno Konmemorasiónpe”. Upéva rangue, haʼekuéra iñumílde ha orrekonose Jehová añoite ikatuha oinvita peteĩ persónape oho hag̃ua yvágape. w20.01 27 párr. 4, 5

Jehová ningo oipota ñañemoag̃ui hese ha ñañemongeta meme hendive. Haʼe ñanemokyreʼỹ ‘siémpre ñañemboʼe hag̃ua’ chupe, ha haʼe katuete oñemotiémpota ñanerendu hag̃ua (Rom. 12:12). Jehová ndahaʼéi ku hembiapoitereíva térã ikaneʼõitereíva ohendu hag̃ua ñane ñemboʼe. ¿Ha mbaʼéichapa ñande ikatu ñahendu chupe? Jaleévo la Biblia ha umi puvlikasión ñanepytyvõva ñantende porãve hag̃ua upéva. Avei ñahendu chupe ñañatende porãvo umi mbaʼe ojeʼéva rreunionhápe. Ñande ñañemongeta memérõ Jehovándi ha ñahendu chupe, ñañandúta ñaimeha ag̃uiete chugui. Haʼe ningo oipota ñamombeʼupaite chupe umi mbaʼe ñapensáva ha ñañandúva (Sal. 62:8). Upévare iporã ñañeporandu: “¿Mbaʼépepa ojogua umi ñemboʼe ajapóva Jehovápe? ¿Haʼetépa peteĩ kárta chete voi askrivi vaʼekue, amoĩháme entéro mbaʼe osẽva che korasõite guive ha añomiʼỹre mbaʼeve? ¿Térãpa ojoguánte peteĩ eskelaʼípe, siémpre afotokopiáva amondo hag̃ua?”. Katuete ningo jahayhu Jehovápe ñande pyʼaite guive, ha amás día ñañemoag̃uiseve hese. Upearã pyʼỹinte ñañemongeta vaʼerã hendive. Jehová haʼe vaʼerã ñane amígo de konfiánsa. Upévare ñamombeʼu vaʼerã chupe entéro mbaʼe, umi mbaʼe ñandepyʼapýva, ñanembovyʼáva ha umi mbaʼe ijetuʼúva jepe ñandéve ñamombeʼu hag̃ua ótrope. Ñaime vaʼerã segúro ñande siémpre ikatuha jajerure chupe ajúda ñaikotevẽ jave. w20.02 9 párr. 4, 5

Jehová onkarga umi ansiánope oñangareko hag̃ua ijovechakuérare. Umi ansiáno ikatu oaprende heta mbaʼe ohechávo mbaʼéichapa Nehemías otrata vaʼekue Ñandejára puévlope. Haʼe ningo governadór de Judá vaʼekue, upéicha rupi oreko tuicha autorida (Neh. 1:11; 2:7, 8; 5:14). Jahechamína mbaʼe situasión ijetuʼúvapa Nehemías ombohovái vaʼekue. Haʼe ohechakuaa umi judío oipuru hague pe témplo ojapo hag̃ua heta mbaʼe ndogustáiva Jehovápe ha nomeʼẽiha oikóvo umi kontrivusión okorrespondéva umi levítape pe léi omandaháicha. Avei haʼekuéra ndorrespetái pe léi sábado rehegua ha oĩ kuimbaʼe omendáva umi kuña ndoadoráivare Ñandejárape. ¿Mbaʼépa ojapo Nehemías ko situasiónpe? (Neh. 13:4-30). Nehemías ningo ndoipuruvaíri pe autorida orekóva, upévare ndojopýi pe puévlope ojapo hag̃ua haʼe oipotávante. Upéva rangue oñemboʼe ipyʼaite guive Jehovápe oheka hag̃ua igía ha avei omboʼe pe puévlope Ñandejára léi (Neh. 1:4-10; 13:1-3). Nehemías iñumílde ha oipytyvõ iñermanokuérape omyatyrõ hag̃ua Jerusalén murálla (Neh. 4:15). w19.09 15, 16 párr. 9, 10