Julio

Katuete ningo ñañeñandu vaíta oĩramo iñeʼẽ arhélva ñandéve térã ñandetrata vaíva, koʼýte upe persóna haʼéramo ñane amígo térã peteĩ ñane hénte. Ñañeñandúramo péicha, ikatu ñaaprende heta mbaʼe Ana ehémplogui. Hese ningo oñembohory vai vaʼekue Peniná, haʼéva avei Elcaná rembireko (1 Sam. 1:12). Ánaicha avei ñande ikatu ñañemongeta are Jehovándi ha ñamombeʼu chupe umi mbaʼe ñandepyʼapýva ha ñanemongyhyjéva. Natekotevẽi ningo ñane ñemboʼe ojogua peteĩ poémape ni ñamohendapa a la perfeksión entéro mbaʼe jaʼétava. Sapyʼánte ikatu ñaime vaieterei, ha ñañemboʼe jave ndaikatúi ñatermina upe jaʼese vaʼekue ñañepyrũgui ñanerasẽ. Upéicharõ jepe, Jehová núnka naikaneʼõi ñandehegui ha siémpre ñanerendúta. Péro ndahaʼéi ñamombeʼúnte vaʼerã chupe ñane provléma. Jajapo vaʼerã avei upe heʼíva Filipenses 4:6, 7. Upépe apóstol Pablo heʼi jaagradese vaʼerãha Jehovápe ñañemboʼévo chupe. Oĩ ningo hetaiterei mbaʼe jaagradese hag̃ua Jehovápe. Por ehémplo, jaikove haguére, umi ikreasión, pe mborayhu ifiélva ohechaukáva ñandéve, ha pe esperánsa porãite jarekóvare. w20.02 21 párr. 3, 6

Ñande ningo ikatu ñañeʼẽ pórke Jehová omeʼẽ ñandéve upéva peteĩ rregáloramo (Éx. 4:10, 11; Apoc. 4:11). La Biblia rupive haʼe ñanepytyvõ jaikuaa hag̃ua mbaʼéichapa ikatu jaipuru hendaitépe upe rregálo. Ñande ningo siémpre ñaime vaʼerã preparádo oimeha óra ñañeʼẽ hag̃uáicha Jehováre ha pe Rréinore (Mat. 24:14; Rom. 10:14). Jajapo jave upéicha, jasegi hína Jesús ehémplo. Haʼe oikuaauka vaʼekue ótrope la verda Itúagui, upéva hína peteĩva umi mbaʼe iñimportantevéva haʼe ou vaʼekue ojapo ko yvy ape ári (Juan 18:37). Péro ñanemanduʼa vaʼerã iñimportanteha avei mbaʼéichapa ñañeʼẽ ótrope. Upéicharõ, ñañeʼẽ jave ótrope Jehováre, ‘jajapo vaʼerã upéva pyʼaguapýpe porãnte ha jarrespeta ñande rapichakuérape ñande pyʼaite guive’. Avei jahechauka vaʼerã ñaneinteresaha mbaʼéichapa oñeñandu hikuái ha jarrespeta umi mbaʼe ogueroviáva (1 Ped. 3:15). Péicha ndahaʼemoʼãi ñañeʼẽtanteva pe persónandi, síno ñamboʼéta chupe ha ikatu voi ñag̃uahẽ hína ikorasõme. Ansianokuéra ohechakuaáramo tekotevẽha omeʼẽ konsého peteĩ ermáno térã ermánape, ndopytái vaʼerã kirirĩháme. Oiporavo porãnte vaʼerã mbaʼe moméntopepa oñeʼẽta hendive, ohaʼarõnte vaʼerã ha omohaʼeño chupe ani hag̃ua omotĩ reiete chupe. w20.03 18, 19 párr. 2-4

¿Mbaʼépa ikatu jajerure ñañemboʼe jave? Ikatu jajerure Jehovápe tañanepytyvõ imbareteve hag̃ua ñande jerovia (Luc. 17:5; Juan 14:1). Upéva tekotevẽterei pórke Satanás oñehaʼãmbaitéta ñandereity hag̃ua (Luc. 22:31). ¿Mbaʼéichapa ñande jerovia ikatu ñanepytyvõ? Jajapopa rire la ikatumíva ñasolusiona hag̃ua umi provléma, jahejátama Jehová pópe upe situasión pórke jajerovia hese. Ñande ñaime segúro haʼe oikuaa porãveha mbaʼéichapa ikatu ñanepytyvõ, ha upéva katuete ñanetrankilisa ha ñanembopyʼaguapy (1 Ped. 5:6, 7). Tahaʼe haʼéva pe situasión jahasáva, katuete ñandepyʼaguapýta ñañemboʼéramo Jehovápe. Jahechamína mbaʼépa heʼi Robert, peteĩ ansiáno koʼág̃a orekómava 80 áño rasa. Haʼe omombeʼu: “Pe konsého oĩva Filipenses 4:6, 7-pe hetáma chepytyvõ ikatu hag̃uáicha ambohovái porã heta mbaʼe ahasa vaʼekue. Por ehémplo, peteĩ tiémpore ijetuʼu kuri chendive pórke chesogue, ha avei aperde kuri che priviléhio de ansiáno”. ¿Mbaʼépa oipytyvõ raʼe Róbertpe osegi hag̃ua ipyʼaguapy ha ani hag̃ua ojedesespera umi situasiónpe? Haʼe heʼive: “Añandu jave añepyrũha ajepyʼapy peteĩ mbaʼére, añepyrũma avei añemboʼe Jehovápe. Ahechakuaa amáske añemboʼe, chetrankiloveha”. w19.04 9, 10 párr. 5-7

Pe oavusáva mitãre, opeka Ñandejára kóntrape. Peteĩ persóna opekáramo hapicha kóntrape, haʼe opeka avei Jehová kóntrape. Jahechamína por ehémplo peteĩ léi Jehová omeʼẽ vaʼekue Israélpe. Pe léi heʼi peteĩ persóna omonda térã ombotavýramo hapichápe, ‘opeka hína ha naiñeʼẽrendúi Jehovápe’ (Lev. 6:2-4). Upéicha avei kongregasiónpe oĩramo peteĩ oavusa térã ovioláva peteĩ mitãme opeka Jehová kóntrape, pórke haʼe ombotavy pe mitãme. Pe mitã okonfia kuri hese ha haʼe ojaprovecha upe mbaʼére, upévare pe mitã noñeñanduvéima segúro. Pe oavusáva peteĩ mitãre tuichaiterei omotĩ Jehová réra. Upéicha rupi ñandéve g̃uarã pe avúso haʼe peteĩ pekádo ivaietereíva Ñandejára kóntrape, ha ñakondenaite voi upéva. Umi rrevísta ¡Despertad! ha Ñemañaháme osẽ umi artíkulo omombeʼúva mbaʼéichapa umi ojeavusa vaʼekue ogueropuʼakakuaa pe sufrimiénto ohasáva, mbaʼéichapa ótro ikatu oipytyvõ ha omokyreʼỹ chupekuéra ha mbaʼéichapa tuakuéra ikatu oprotehe ifamíliape. Jehová organisasión avei ombokatupyry ha omeʼẽ umi ansiánope hetaiterei instruksión oñeguenohẽva la Bíbliagui, oikuaa hag̃ua hikuái mbaʼépa ojejapo vaʼerã oĩ jave oavusáva peteĩ mitãre. Ha Jehová organisasión osegi orrevisa ha ombopyahu koʼã instruksión heʼíva mbaʼéichapa oñeñatende vaʼerã koʼãichagua káso kongregasiónpe. w19.05 9 párr. 8, 9

Ñandejára Ñeʼẽ haʼete peteĩ espáda haimbéva ikatúva ohundi umi japu Satanás omosarambíva (Efes. 6:17). Por ehémplo, Ñandejára Ñeʼẽ ohechauka porã umi omanóva ndaikatuiha oñekomunika umi oikovévandi (Sal. 146:4). Avei ñanemomanduʼa Jehová añoite ikatuha oikuaa porã mbaʼépa oikóta tenonderãme (Is. 45:21; 46:10). Jaleéramo la Biblia ha jajepyʼamongeta meme hese, ñaiméta preparádo ñamboyke ha ndajachaʼéi hag̃ua umi japu oipotáva jaguerovia umi espíritu aña. Upévare ñamboyke vaʼerã opaite mbaʼe ikatúva ñanemoag̃ui pe espiritísmore. Ñande ningo kristiáno teete ha ndajajapói mbaʼeve ñanemoag̃uítava pe espiritísmore. Por ehémplo, ndajahái umi médium espiritístape ñañekomunika hag̃ua umi omanóvandi, ni ndajahekái ótra fórma ñañekomunikaségui hendivekuéra. Ñande ndajasegíri avei umi kostúmbre ojerekóva omano jave peteĩ persóna, ojejapóva jepi oñeimoʼã rupi pe omanóva osegiha oikove peteĩ espírituicha. Ha avei ndajaipurúi pe astrolohía térã adivinasión jaikuaaségui mbaʼépa oikóta amo gotyove. Ñande jaikuaa porã koʼã mbaʼe ipeligrosoitereiha, ha umíva rupive ikatuha voi ñañekomunika Satanás ha idemoniokuérandi. w19.04 21, 22 párr. 8, 9

Umi hénte osegíva ko mundopegua arandu oñembohory la Biblia heʼívare umi rrelasión sexuál rehe, ha heʼi voi naisentidoiha. Umichagua hénte ikatu oñeporandu: “¿Mbaʼére piko Ñandejára ñandeapo jarekose hag̃uáicha rrelasión sexuál, ha upéi heʼi jey ñandéve jajejoko hag̃ua?”. Haʼekuéra oñeporandu upéva pórke tuichaiterei ojekivoka oimoʼãvo ñande jajapo vaʼerãha jajaposévante. Péro la Biblia ndeʼiriete upéva. Ñandejára Ñeʼẽ ohechauka Jehová omombaʼeha yvypórape omeʼẽvo ñandéve la kapasida ñamboyke hag̃ua umi deséo vai jarekóva (Col. 3:5). Hiʼarive Jehová orregala yvyporakuérape pe matrimónio ikatu hag̃uáicha pe ména ha tembireko oreko rrelasión sexuál hekópe porã ha hendaitépe (1 Cor. 7:8, 9). La Biblia ñanemboʼe jahecha hag̃ua hendápe porã umi rrelasión sexuál, ha upe heʼíva iporãiteve ko mundopegua arandúgui. Ñandejára Ñeʼẽ heʼi umi rrelasión sexuál ikatuha ñanembovyʼa (Prov. 5:18, 19). Péro heʼi avei: “Káda uno ojejokokuaa vaʼerã oiko hag̃ua tekopotĩme ha tekomarangatúpe. Ani peiko tarovaite penembaʼepota vai rapykuéri” (1 Tes. 4:4, 5). w19.05 22, 23 párr. 7-9

Ñandejára ndohejamoʼãi umi tetã ohundi ipuévlope. Haʼekuéra ningo vyʼápe ogueraha héra ha osẽ Babilonia Guasúgui haʼe omanda haguéicha (Hech. 15:16, 17; Apoc. 18:4). Ñandejára puévlo oipytyvõma avei hetaiterei héntepe osẽ hag̃ua Babilonia Guasúgui. Upévare Jehová siervokuérape ndohupytymoʼãi umi kastígo oútava Babilóniape. Upéicharõ jepe, haʼekuéra tekotevẽ ijerovia mbarete oaguanta hag̃ua umi mbaʼe oútava (Ezeq. 38:2, 8). Oñehundi rire entéro umi rrelihión japu, sólamente opytáta peteĩ rrelihión ko yvy ape ári. Jehová puévlo ojoguáta peteĩ yvyramáta haʼeñomíme opytáva peteĩ torménta rire. Satanás katu ipochyetereíta, upévare oipurúta umi “profesía kyʼa”, térã umi japu oúva umi demóniogui ikatu hag̃uáicha umi tetã oñembyaty oataka hag̃ua Jehová siervokuérape (Apoc. 16:13, 14). Koʼã tetã oñembyatýtavape oñehenói “Gog haʼéva Magog territoriopegua”. Umi tetã oataka vove Ñandejára puévlope, oñepyrũtama pe gérra de Armagedón (Apoc. 16:16). w19.09 11 párr. 12, 13

Satanás oipuru umi deséo vai orekóva umi hénte. Umi israelita tiémpope, Satanás ojevale vaʼekue umi rrelihión japúre omboliga hag̃ua la héntepe hekovai hag̃ua. Ñane tiémpope upeichaite avei ojapo. Umi rrelihión fálsape oñepermiti oĩ umi hekovaíva ha oipota voi la hénte ohecha koʼã mbaʼe ku ndaivairirõguáicha. Upéicha rupi, heta heʼíva ijehe oserviha Ñandejárape, omboyke umi mandamiénto oĩva la Bíbliape heʼi porãva ñandéve ñanderekopotĩ vaʼerãha. ¿Mbaʼépa oiko umi rrelihión japu omboliga rupi la héntepe hekovai hag̃ua? Apóstol Pablo ombohovái upéva oskrivírõ guare ikárta umi rrománope (Rom. 1:28-31). Umi mbaʼe “ojejapoʼỹ vaʼerã” apytépe oĩ opaichagua tekovai, ha umívape oike avei pe omosexualida (Rom. 1:24-27, 32; Apoc. 2:20). ¡Ajépa iñimportantete ñakumpli umi mbaʼe omboʼéva la Biblia! Yvypóra arandu ndorekói enkuénta umi mbaʼe Jehová omboʼéva, ha oñemoĩ voi katu umívare. Upéva nomokyreʼỹi avavépe osegi hag̃ua umi mbaʼe oúva Ñandejára espíritugui, síno pe “yvypóra rembipota vai” (Gál. 5:19-23). Umi oaprendéva yvypóra arandu oñepyrũ jepi ijorgullóso ha ijejapo, ha upéicha rupi ‘ijehénte ojepyʼapy’ (2 Tim. 3:2-4). Koʼã mbaʼe ningo idiferentete hína Ñandejára ojerurévagui isiervokuérape, pórke haʼe oipota ñanevuéno ha ñaneumílde (2 Sam. 22:28). w19.06 5, 6 párr. 12-14

Elías oservi vaʼekue Jehovápe peteĩ tiémpo ijetuʼuetereívape ha tekotevẽ kuri ombohovái heta situasión ivaíva. Jehová heʼi vaʼekue Elíaspe omeʼẽ hag̃ua Eliséope algúna rresponsavilida haʼe orekóva. Upéicha Jehová omeʼẽ Elíaspe peteĩ iñamigorã ikatútava oipytyvõ chupe haʼe oñedesanima jave. Upéicha avei, ñande ñamombeʼúramo peteĩ ñane amígo de konfiánsape mbaʼéichapa ñañeñandu, haʼe ikatu ñanepytyvõ ñañekevranta térã ñañedesanima jave (2 Rey. 2:2). ¿Péro mbaʼépa ikatu jajapo ndajaguerekóiramo peteĩ amígo ñamombeʼu hag̃ua umi mbaʼe ñañandúva? Ñañemboʼe vaʼerã Jehovápe ha jajerure chupe tañanepytyvõ jatopa hag̃ua peteĩ ermáno térã ermána ijerovia mbaretéva, ikatútava ñanemokyreʼỹ ha ñanemombarete. Jehová oipytyvõ vaʼekue Elíaspe ani hag̃ua oñekevrantaiterei ha osegi hag̃ua oservi chupe ipyʼaite guive heta áñore. Elías rembiasakue omeʼẽ ñandéve esperánsa. Ñande ningo sapyʼánte jajepyʼapyeterei ha upévare jaju ñanekaneʼõ ha ñañedesanima. Péro jajeroviáramo Jehováre, haʼe ñanemombaretéta ikatu hag̃uáicha jasegi jaservi chupe (Is. 40:28, 29). w19.06 15 párr. 4; 16 párr. 9, 10

Ñande ikatu ñandepyʼaguasuve koʼág̃a, ñamombeʼúramo umi héntepe umi notísia porã oñeʼẽva Ñandejára Rréinore. ¿Mbaʼérepa jaʼe upéva? Pórke japredika jave ñaaprende jajerovia hag̃ua Jehováre ha ani hag̃ua jakyhyje la héntegui. Umi ñane múskulo ningo imbareteve jajapóramo ehersísio, upéicha avei ñande ñandepyʼaguasuve japredikáramo ogahárupi, oĩháme heta hénte, umi negosioháre, kállere térã jaikohárupi. Ñañehaʼãramo koʼág̃ama voi ñandepyʼaguasuve japredika hag̃ua, ñaimétama preparádo jasegi hag̃ua japredika umi goviérno oproivíramo jepe ñandehegui amo gotyove (1 Tes. 2:1, 2). Ikatu ñaaprende heta mbaʼe peteĩ ermána ifiélvagui ohechauka vaʼekue ipyʼaguasuetereiha. Pe ermána héra Nancy Yuen. Orekóramo jepe 1 métro imédiorupinte, ndaiporiguasúi vaʼekue mbaʼeve omongyhyjéva chupe. Ojeovligasérõ guare chupe anivéma hag̃ua opredika Ñandejára Rréino, haʼe lomímonte osegi ojapo upéva. Upéicha rupi ojegueraha chupe kárselpe 21 áñore Chínape. Umi ofisiál ointerroga vaʼekue chupe heʼi hese haʼeha “pe persóna ikaprichosavéva” oĩva upe paíspe. w19.07 5 párr. 13, 14

Oĩ umi hénte oaprendeséva voi la Biblia omboʼéva, péro oĩ avei umi haʼetévaicha nointeresaguasúiva chupe. Upévare sapyʼánte tekotevẽ raẽta ñamokyreʼỹ chupekuéra oikuaaseve hag̃ua la Bíbliagui. Avei jajeprepara porã vaʼerã ikatu hag̃uáicha osẽ porã ñandéve ñane predikasión. Jaiporavo vaʼerã umi téma ikatúva ointeresa umi héntepe, ha upéi jahecha mbaʼéichapa ñamoñepyrũta káda téma. Por ehémplo, ikatu jaʼe pe ogajárape: “Koʼág̃arupi ningo oĩ heta provléma oafektáva enterovépe. Péro ndépa mbaʼe repensa, ¿oĩne piko peteĩ goviérno ikatúva osolusiona entéro umi provléma oĩva ko múndope?”. Upéi ikatu ñaanalisa hendive Daniel 2:44. Térã ikatu avei jaʼe peteĩ ogajárape: “Aporandusemi ningo ndéve mbaʼépa repensa. ¿Mbaʼéichapa ikatúne ñamboʼe ñane famíliape osẽ porã hag̃ua hikuái?”. Upéi jahecha hendive Deuteronomio 6:6, 7 heʼíva. Añetehápe ningo javyʼaiterei ñaipytyvõ jave umi héntepe oiko hag̃ua chuguikuéra Jesús disípulo. w19.07 15 párr. 4, 6, 7

¿Mbaʼépa ikatu jaʼe umi heʼívape ndogueroviaiha Ñandejára oexistiha? Peteĩ ermáno oikóva peteĩ país asiáticope opredikáma heta tiémpore umi persóna ndairrelihiósoivape. Haʼe omombeʼu: “Koʼápe umi hénte heʼi jave Ñandejára ndoexistiriha, heʼise jepi opensaha natekotevẽiha ojeadora umi dios oadoráva la majoría umi hénte koʼapegua. Upévare haʼe jepi chupekuéra che avei apensaha la majoría umi dios ndoexistiriha, ha la héntente ojapo hague umíva umi dios. Che alee jepi chupekuéra Jeremías 16:20 ha upéi aporandu chupekuéra: ‘¿Mbaʼéicha piko ikatu jaikuaa mávapa hína pe dios añetehápe oexistíva ha mávapa hína umi kuimbaʼekuérante ojapo vaʼekue?’. Ahendu porã mbaʼépa opensa hikuái ha upéi alee chupekuéra Isaías 41:23, heʼihápe: ‘Pejéna mbaʼe mbaʼépa oikóta tenonderãme, péicha ojekuaáta peẽpa dios añetehápe’. Upéi ahechauka chupekuéra mbaʼéichapa oñekumplíma raʼe peteĩ mbaʼe Jehová oprofetisa vaʼekue”. Ótro ermáno heʼi: “Ahechauka umi héntepe mbaʼéichapa la Biblia omeʼẽ umi konsého porã, oñekumpli umi profesía oĩva pype, ha oĩha umi léi ogovernáva umi estrélla, planéta ha opa mbaʼe oĩva ko univérsope. Upéi ahechauka chupekuéra entéro koʼã mbaʼe ohechaukaha oĩha peteĩ Apohare iñaranduetereíva. Pe persóna oñepyrũ jave opensa ikatúne hag̃ua oexisti Ñandejára, upépe añepyrũ ahechauka chupe mbaʼépa heʼi la Biblia Jehováre”. w19.07 23, 24 párr. 14, 15

Umi mbaʼe iñimportantevéva apytépe oĩ toñembotuicha Jehová réra, toñekumpli umi ipromesakuéra ha toĩ pyʼaguapy ha unida kongregasiónpe (Mat. 6:9, 10; Juan 13:35). Koʼã mbaʼe haʼéramo pe iñimportantevéva ñandéve g̃uarã, jahechaukáta jahayhuha Jehovápe. Apóstol Pablo heʼi avei ‘ndajajapói vaʼerãha mbaʼeve ivaíva’. Upéva ndeʼiséi ñandeperfékto vaʼerãha. Ñañehaʼãmbaitéramo japorohayhuve ha jahechakuaáramo mbaʼépa pe iñimportantevéva, Jehová heʼíta ñanderehe ndajarekoiha defékto. Ñañehaʼãramo ani hag̃ua ñamoñepysanga ñane ermanokuérape, jahechaukáta jahayhuha chupekuéra. Pe konsého oñemeʼẽva ani hag̃ua ñamoñepysanga ótrope, añetehápe isério hína. ¿Mbaʼéichapa ikatu hína ñamoñepysanga ótrope? Umi mbaʼe jadesidívare jajapo térã jahecha jajediverti hag̃ua, ñañemonde lája, térã ñande traváho káusare. Ikatu oime ndajajapói mbaʼeve Jehová heʼíva naiporãiha. Péro ivaietereíta oiméramo upe jadesidíva káusare ñane ermánope omolesta ikonsiénsia ha upévare oñepysanga (Mat. 18:6). w19.08 10 párr. 9-11

Áño 1935 guive ñande testígo de Jehová ñantende porãma umi mbaʼe Juan ohecha vaʼekue pe visiónpe. Jaikuaáma pe aty guasúpe oĩtaha umi kristiáno iñeʼẽrendúva Ñandejárape ha orekóva esperánsa oikovetaha pára siémpre ko yvy ape ári (Apoc. 7:9, 10). Koʼã persóna ojesalva hag̃ua ou vove pe jehasa asy guasu ha ‘entéro mbaʼe oikótavagui’, oikuaa vaʼerã Jehovápe ha ohechauka vaʼerã ojerovia mbareteha hese, Jesús oñepyrũ mboyve ogoverna ko yvy umi mil áñore (Luc. 21:34-36). Pe esperánsa orekóva umi persóna oĩva pe aty guasúpe ombovyʼaiterei chupekuéra. Ontende porã hikuái Jehová odesidiha moõpa oservíta chupe isiervokuéra ifiélva, tahaʼe yvágape térã ko yvy ape ári. Umi unhído ha umi oĩva pe aty guasúpe ohechakuaa orresivitaha hikuái pe prémio Jehová imbaʼeporãiterei rupínte hendivekuéra ha omeʼẽ Itaʼýra Jesucristo sakrifísioramo (Rom. 3:24). w19.09 28 párr. 10, 12; 29 párr. 13

¿Jarresivípa raʼe peteĩ asignasión pyahu? Ñande ningo ikatu javyʼa hína upe asignasiónpe. Ani ñapensa ndajajapoporãi hague ñane rembiapo pe asignasión jareko vaʼekuépe térã ndajavaleveimaha. Jajepyʼamongeta umi mbaʼe Jehová ojapóvare ñanepytyvõ hag̃ua ha jasegi japredika. Jasegi umi kristiáno ifiélva síglo primérope guare ehémplo. Haʼekuéra tahaʼe haʼéva lugárpe “oikuaauka ohóvo ohohárupi umi notísia porã oĩva Ñandejára ñeʼẽme” (Hech. 8:1, 4). Ñañehaʼãramo jasegi japredika ikatu hína jahasa heta mbaʼe porã. Por ehémplo, oĩ umi prekursór oñemosẽ vaʼekue peteĩ paísgui ha ováva ótro país opytávape ag̃ui upégui, ha upépe oñekotevẽnte avei umi opredika vaʼerã iñidiomakuérape. Ohasa rire unos kuánto mésente, hetaiterei hénte oho umi grúpo oñeformávape upe idiómape. Ñane amista Jehovándi haʼe vaʼerã pe mbaʼe ñanembovyʼavéva. Upéicharõ, javyʼaséramo jasegi vaʼerã ñañemoag̃ui Jehováre ha jajerovia hese ikatu hag̃uáicha haʼe ñanemoarandu, ñandegia ha ñanepytyvõ. Ñanemanduʼa vaʼerã jahayhueterei hague pe asignasión jareko vaʼekue pórke ñañehaʼãmbaite kuri ñaipytyvõ la héntepe upépe. Upévare, ñañehaʼãmbaitékena avei ñane asignasión pyahúpe ha jahecháta mbaʼéichapa Jehová ñanepytyvõ jahayhu hag̃ua avei upéva (Ecl. 7:10). w19.08 24, 25 párr. 15, 16

Enterovéva ningo ñañemoĩ vaʼerã Jehová poguýpe pórke haʼe ñande Apohare, ha upévare oreko derécho heʼívo ñandéve mbaʼépa jajapo vaʼerã (Apoc. 4:11). Péro avei ñaneñeʼẽrendu chupe pórke haʼe ogoverna porãve enterovévagui. Heta tiémporema umi persóna orekóva podér ha autorida ogoverna umi ótro héntere, péro ndaipóri oñembojojáva Jehováre pórke haʼe iñarandu, oporohayhu, oiporiahuvereko la héntepe ha imbaʼerechakuaa. Ndaipóri ótro governánte haʼeichagua (Éx. 34:6; Rom. 16:27; 1 Juan 4:8). Ñande ningo ñañemoĩ Jehová poguýpe ñañehaʼãmbaitéramo ñaneñeʼẽrendu chupe opa mbaʼépe, ha ñañehaʼãmbaitérõ ani hag̃ua jajerovia umi mbaʼe ñande ñapensávarente (Prov. 3:5). Ifasilve ningo ñañemoĩ hag̃ua Jehová poguýpe jaikuaa porãvévo umi kualida haʼe orekóva. ¿Mbaʼérepa jaʼe upéva? Pórke umi ikualida ningo la omomýiva chupe ojapo hag̃ua opa mbaʼe (Sal. 145:9). Amáske jaikuaa Jehovápe jahayhuvéta chupe. Ha jahayhúramo Jehovápe nañaikotevẽmoʼãi peteĩ lísta heʼíva ñandéve mbaʼépa jajapo vaʼerã ha mbaʼépa ndajajapói vaʼerã. w19.09 14 párr. 1, 3

Satanás ojopy umi héntepe omoĩvo hiʼári umi kárga ndaikatumoʼãiva oraha hikuái. Por ehémplo, oipota jaguerovia Jehová noperdonaiha ñande pekádo, ha nañamereseiha voi ñanderayhu haʼe ni avave. Koʼã japu ivaieterei ha ikatu ñanemoñeñandu vai (Juan 8:44). Péro jaikuaaháicha, ñañemoag̃ui rupi Jesús rehe ikatu oñeperdona ñandéve ñande pekádo (Mat. 11:28). Ha ikatu ñaime segúro Jehová ñanderayhuetereiha (Rom. 8:32, 38, 39). Pe kárga Jesús ñaneinvitáva jagueraha hag̃ua idiferentete umi ótra kárga tekotevẽvagui jagueropuʼaka. Por ehémplo, ñamohuʼãvo peteĩ día de traváho ko múndope, ndahaʼéi voi ñanekaneʼõnteva, síno ndajavyʼái. Péro ñambaʼapóvo Jehová ha Cristo servísiope javyʼaiterei. Por ehémplo, ikatu hína ñanekaneʼõiterei ha upévare tekotevẽ ñañehaʼãmbaite jaha hag̃ua rreunionhápe, péro ¿mbaʼéichapa ñasẽ pe rreunióngui? ¿Ajépa ñasẽ jepi vyʼápe ha jareko jey pe fuérsa ñaikotevẽva? Upéicha avei oiko ñañehaʼã jave ñasẽ hag̃ua predikasiónpe, térã jareko hag̃ua ñande estúdio personál. Ñañehaʼãmbaitéramo jajapo koʼã mbaʼe, ñanembarete jey ha tuicha ñandepiroʼy. w19.09 20 párr. 1; 23, 24 párr. 15, 16

Saʼietereíma ningo ofalta og̃uahẽ hag̃ua “Jehová ára”, ha ñahaʼarõ aja upéva haʼe oipota japredika meme. ‘Siémpre ñanerembiapo heta vaʼerã ñande Ruvicha servísiope’ (1 Cor. 15:58). Jesús heʼi vaʼekue mbaʼépa oikóta kuri umi ára pahápe, ha heʼive: “Avei umi notísia porã ojepredika raẽ vaʼerã opa tetãrupi ou mboyve pe fin” (Mar. 13:4, 8, 10; Mat. 24:14). Epensamíntena: káda ke resẽ repredika, nde reipytyvõ hína oñekumpli hag̃ua ko profesía. Káda áño heta hetave umi hénte oaseptáva pe notísia porã oñeʼẽva Ñandejára Rréinore. Epensamína mbaʼéichapa heta hetave ohóvo umi opredikáva koʼã ára pahápe. Áño 1914-pe oĩ kuri 5.155 puvlikadór 43 paíspe. Koʼág̃a katu ñaime 8.500.000 rupi 240 país ha territóriope. Péro ñane rembiapo ndopái gueteri. Ñande jasegi vaʼerã ñamombeʼu umi héntepe Ñandejára Rréino añoite ikatuha osolusiona umi provléma jarekóva (Sal. 145:11-13). w19.10 8 párr. 3; 9, 10 párr. 7, 8

Jehová oipuru vaʼekue Barziláipe oipytyvõ hag̃ua rréi Davídpe. David ha iñirũnguéra okañy David raʼy Absalóngui, ha upévare “iñembyahýi, ijuhéi ha ikaneʼõ” hikuái. Barzilái upérõ ijedáma, upéicharõ jepe haʼe ha umi oĩva hendive oapeligra hekove oipytyvõ hag̃ua David ha iñirũnguérape. Barzilái nopensái ijedáma haguére ndaideprovechoveimaha Jehovápe. Upéva rangue haʼe ipojera ha oipuru umi mbaʼe orekóva oipytyvõ hag̃ua Ñandejára siérvo oikotevẽvape (2 Sam. 17:27-29). ¿Mbaʼépa ñaaprende ko ehémplogui? Oiméramo ñanemitã térã ñandeeda, Jehová ikatu ojevale ñanderehe ñameʼẽ hag̃ua ñane ermanokuérape umi mbaʼe oikotevẽva, tahaʼe ñande jaikohárupi térã ótro paíspe (Prov. 3:27, 28; 19:17). Ha oiméramo jepe ndaikatúi ñandete ñaipytyvõ chupekuéra, ikatu ñameʼẽ ñane kontrivusión pe óvra mundiálpe ikatu hag̃uáicha oñepytyvõ umi ermánope, por ehémplo peteĩ desástre naturál rire (2 Cor. 8:14, 15). w19.10 21 párr. 6

Oiméramo algúno ñanemoñeñandu vai raʼe yma, ikatu ijetuʼu ñandéve ñamombeʼu hag̃ua ótrope ñapensáva ha ñañandúva (Prov. 18:19). Ikatu avei sapyʼánte ñapensa ndajarekoiha tiémpo térã ñanekaneʼõitereimaha ñañehaʼã hag̃ua ñakonsegi amígo tee. Upéicharõ jepe, jasegi vaʼerã ñañehaʼã. Jaipotáramo ñane ermanokuéra oĩ ñande ykére jahasa vove umi situasión ijetuʼúvare, tekotevẽ koʼág̃ama voi jajerovia hesekuéra ha ñamombeʼu chupekuéra ñapensáva ha ñañandúva. Upéva ningo iñimportanteterei jareko hag̃ua amígo verdadéro (1 Ped. 1:22). Jesús ohechauka vaʼekue ojeroviaha iñamigokuérare oñemongetávo hendivekuéra lívremente ha oñomiʼỹre chuguikuéra mbaʼeve (Juan 15:15). Ñande ikatu avei jasegi iñehémplo ñamombeʼúramo ñane amigokuérape umi mbaʼe ñanembovyʼáva, ñandepyʼapýva ha ñanemoñeñandu vaíva. Oĩramo álgien oñemongetáva ñanendive, jajapysaka porã vaʼerã hese, pórke upéicha ikatu hína jahechakuaa jajoguaha upe persónape heta mbaʼépe, tahaʼe umi mbaʼe ñapensáva, ñañandúva térã umi méta jahupytysévape. Ñañehaʼãramo ñande voi ñañemongeta lívremente ótrondi, imbaretevéta ñane amista hendivekuéra (Prov. 27:9). w19.11 4 párr. 8, 9

Pe jehasa asy guasu aja, posívlemente okambiáta hína la ñane mensáhe. Koʼág̃a ñande japredika notísia porã oñeʼẽva Ñandejára Réinore ha ñañehaʼã jajapo disípulo. Péro pe jehasa asy guasu aja ikatu hína ñameʼẽ peteĩ mensáhe ipohýiva, upéva la Biblia okompara “amandáu guasu” rehe (Apoc. 16:21). Ikatu hína ñaanunsia Satanás múndo oñehundi potaitemaha. Kon el tiémpo jaikuaa porãta mbaʼépa pe mensáhe ha mbaʼéichapa ñameʼẽta. ¿Jasegítapa jaipuru umi método jaipurúmava voi koʼág̃a, térãpa ñakambiáta? Ñahaʼarõmante vaʼerã jaikuaa hag̃ua upéva. Péro tahaʼe haʼeháicha, posívlemente jarekóta pe priviléhio japredikávo kyhyjeʼỹme peteĩ mensáhe ohechaukáva Jehová okondenamaha ko múndope (Ezeq. 2:3-5). Pe mensáhe japredikáva ikatu hína omomýi umi nasiónpe oñehaʼã hag̃ua ñanemokirirĩete voi. Koʼág̃a ñande ñakonfia Jehováre japredika hag̃ua, ha upéicha avei jajapóta upe moméntope. Ikatu ñaime segúro Ñandejára Jehová omeʼẽtaha ñandéve pe fuérsa ñaikotevẽva jajapo hag̃ua ivolunta (Miq. 3:8). w19.10 16 párr. 8, 9

Pe fráse ‘ohejáta ijerovia’ heʼise hína ikatuha jajedistrae ñañehaʼãgui jareko heta hetave mbaʼe nañaikotevẽiva. Péicha jave ndahasyiete hína oike hag̃ua ñane korasõme umi “vyrorei ha deséo oporoperhudikáva” (1 Tim. 6:9). Aníkena ni mbaʼevéicharõ jaheja umi mbaʼe oike ñane korasõme, upéva rangue ñanemanduʼa vaʼerã Satanás oipuruha umi deséo jarekóva peteĩ ármaicha omokangy hag̃ua ñande jerovia. Péro ñamoĩ chupe ñande jarekoha la pláta jajogua hag̃ua heta mbaʼe. ¿Ivai piko jajogua umi mbaʼe ñandegustáva péro añetehápe nañaikotevẽguasúiva? Ndahaʼéingo la oĩ vaíva upéva. Péro ñapensamína koʼã pregúntare: Jarekóramo jepe la pláta jajogua hag̃ua peteĩ mbaʼe, ¿jareko piko pe tiémpo ha mbaretekue oñekotevẽva jaipuru ha ñamantene hag̃ua upe jajoguaséva? Avei ikatu hína jaju jahayhueterei umi mbaʼe jarekóva ha ndajapoisevéi umívagui, ¿ikatúpa upéva káusare amo ipahápe jajogua pe mitãkariaʼy orrechasa vaʼekuépe Jesús invitasión, ojapo hag̃ua hetave mbaʼe Jehová servísiope? (Mar. 10:17-22). Ajépa iporãve jaiko sensillomínte ha jaipuru ñane tiémpo ha mbaretekue jajapo hag̃ua Jehová oipotáva. w19.11 17, 18 párr. 15, 16

Jehová ningo ikatu omeʼẽ ñandéve ‘pe podér jajapo hag̃ua’ upe jadesidi vaʼekue (Filip. 2:13). Upévare ñañemboʼe ha jajerure Ñandejárape tañanemombarete. Jajerure vaʼerã Jehovápe ijespíritu sánto ikatu hag̃uáicha jareko pe fuérsa ñaikotevẽva. Jasegi vaʼerã ñañemboʼe haʼetéramo jepe noñembohováiva ñandéve ensegída ñane ñemboʼe. Jesús heʼi vaʼekue voi: “Pesegi pejerure [espíritu sánto] ha oñemeʼẽta peẽme” (Luc. 11:9, 13). Avei ñaplanea porã vaʼerã mbaʼépa jajapóta. Ñamohuʼã hag̃ua peteĩ mbaʼe jajaposéva, ñaplaneámante vaʼerã mbaʼéichapa jajapóta ha jasegi upéva oĩhaichaite. Upéicha avei, jadesidi jave peteĩ mbaʼe, ñaanota vaʼerã uno a uno umi mbaʼe jajapótava ikatu hag̃uáicha ñamohuʼã upéva. Jadividíramo umi mbaʼe tuichavéva ikatu hína ifasilve ñandéve jahecha mboýmapa jajapo. Apóstol Pablo omokyreʼỹ vaʼekue umi Corintoguápe oaparta hag̃ua pe pláta omeʼẽséva kontrivusiónramo “káda semána pe primer díape”, ohaʼarõ rangue hikuái ombyaty hag̃ua ág̃a haʼe ou vove (1 Cor. 16:2). Jadividíramo umi mbaʼe tuicháva jajaposéva ñanepytyvõ avei pono jajepyʼapyeterei ha ñañandu ndaikatumoʼãiha ñakompleta. w19.11 29 párr. 13, 14

Ikatu algúno opensa oikuaaha Ñandejárape oikuaa rupi héra ha unas kuánta kósa haʼe heʼi ha ojapo vaʼekue. Péro jaikuaa porã Jehovápe ndeʼiséi upéva añónte. Tekotevẽ ñañemotiémpo ñaaprende hag̃ua mbaʼeichagua persónapa Jehová, ha umi kualida porãite haʼe orekóva. Upéicharõ añoite ikatúta ñantende mbaʼérepa haʼe heʼi térã ojapo peteĩ mbaʼe. Upéva ñanepytyvõta jaikuaa hag̃ua ogustápa chupe umi mbaʼe ñapensáva ha jajapóva. Jahechakuaa rire mbaʼépa Jehová oipota jajapo, jajapo vaʼerã upéva. Ikatu oĩ algúno oñembohorýva ñanderehe jaservise rupi Jehovápe, ha ikatu hína koʼýte oñemoĩ ñanderehe ñañepyrũ jave jaha rreunionhápe. Péro jajeroviáramo Jehováre, haʼe núnka nañanderejamoʼãi. Péicha ñañepyrũta ñañemoag̃ui Jehováre, ha upe amista jarekóva hendive ikatu osegi opa árare. Péro, ¿añetehápe piko ikatu jaikuaa porã Jehovápe? ¡Si ikatu! w19.12 16, 17 párr. 3, 4

Tuakuéra sapyʼánte ikatu ojedesespera ijetuʼueterei rupi oñemongakuaa porã hag̃ua umi mitãme. Péro umi mitã ningo Jehová rregálo, ha haʼe oipytyvõse umi tuakuérape. Haʼe ohendu chupekuéra oñemboʼe jave, ha ombohovái la Biblia ha umi puvlikasión rupive. Avei ojapo upéva pe ehémplo ha umi konsého omeʼẽva rupive umi túa ha sy iñexperiénsiava oĩva kongregasiónpe. Ojeʼe ningo tuakuérape oguerahaha 20 áño omongakuaa hag̃ua ifamíliape. Péro añetehápe túa ha sy siémpre ojepyʼapy ifamiliakuérare. Tuakuéra ikatúramo jepe omeʼẽ ha ojapo heta mbaʼe ifamília rehehápe, umi mbaʼe iporãvéva ikatúva ojapo hína ohayhu ifamíliape, oñemotiémpo oĩ hag̃ua hendivekuéra, ha omboʼe chupekuéra la Biblia heʼíva. Ijapytepekuéra oĩta umi ohendu porãtava umi mbaʼe oñemboʼéva chupekuéra ha ikatu hína ótro nahániri. Péro oĩ hetaiterei ermáno ha ermána omongakuaa vaʼekue chupe ituakuéra ohayhúva Jehovápe, ha oñeñandúva Joana oñeñanduháicha. Ko ermána Asiagua omombeʼu: “Aagradeseterei che tuakuérape chekorrehi ha chemboʼe haguére ahayhu hag̃ua Jehovápe. Haʼekuéra ningo ndahaʼéi cheguerúnteva ko múndope, síno chemboʼe ha chepytyvõ avyʼa hag̃ua che rekovépe” (Prov. 23:24, 25). Hetaiterei ermáno ha ermána katuete heʼíne avei ko ermána heʼi vaʼekue. w19.12 27 párr. 21, 22

Hetaiterei ermáno ha ermána ningo oikotevẽ konsuélo. Upéicharõ, jahecha vaʼerã mbaʼépa ikatu jajapo ñaipytyvõ hag̃ua umi osufrívape hína, ha jajapo upéva jakyhyjéramo jepe. Por ehémplo, ikatu jakyhyje ndajaikuaáirõ g̃uarã mbaʼépa jaʼéta ni jajapóta ñaiméramo peteĩ osufrívandi hína. Péro jahechaukáramo ñañeinteresaha ñande rapicháre, tuichaiterei ikatu ñakonsola chupekuéra. Amedída ke hiʼag̃ui pe fin, ivaivéta la situasión ko múndope, ha ijetuʼuvéta jaiko hag̃ua pype (2 Tim. 3:13). Hiʼarive enterovénte ñaneimperfékto ha jasegíta jajavy heta vése. Upévare jasegíta ñaikotevẽ konsuélo. Apóstol Pablo ifiél ha oaguanta vaʼekue omano meve, ha peteĩ mbaʼe oipytyvõ vaʼekue chupe upearã haʼe pe konsuélo orresivi vaʼekue umi ermanokuéragui. Jajapóramo upéicha ñaipytyvõta ñane ermanokuérape ifiél hag̃ua Jehovápe (1 Tes. 3:2, 3). w20.01 12, 13 párr. 17-19

Umi unhído nohaʼarõi umi ermáno otrata porãve chupekuéra umi ótrogui (Filip. 2:2, 3). Avei oikuaa Jehová ounhírõ guare chupekuéra, haʼe ndoikuaaukái kuri upéva entéro persónape. Upévare, peteĩ kristiáno unhído noñesorprendéi oĩramo ñepyrũrã ndogueroviáiva Jehová oiporavo hague chupe. Amo ipahápe, la Biblia heʼi voi ani hag̃ua jaroviánte oĩramo heʼíva Ñandejára omeʼẽ hague chupe peteĩ rresponsavilida espesiál. Umi unhído ningo ndoipotái ojehecharamo chupekuéra, upévare haʼekuéra nomombeʼúi haʼeha unhído oikuaa jave ótra persónape. Avei ni mbaʼevéicharõ ndoikomoʼãi oñembotuicha ojeporavo haguére chupe oho hag̃ua yvágape (1 Cor. 4:7, 8). Umi kristiáno unhído ndoikói oheka umi ótro unhídope oñemongeta hag̃ua hikuái mbaʼéichapa ojeporavo raʼe chupekuéra, térã oforma hag̃ua hikuái peteĩ grúpo ostudia hag̃ua la Biblia (Gál. 1:15-17). Umi unhído ojapóramo koʼã mbaʼe, ndaiporimoʼãi unida kongregasiónpe. Upéva rangue oñemoĩta hikuái pe espíritu sántore, oipytyvõva hína oĩ hag̃ua pyʼaguapy ha unida Ñandejára puévlope (Rom. 16:17, 18). w20.01 28 párr. 6, 7

Og̃uahẽta peteĩ moménto umi hénte ipochyetereitaha pórke ohecháta irrelihión oñehundi hague péro ñanembaʼéva katu nahániri. Katuete péva haʼéta peteĩ notísia tuichaitereíva, ojagarrapátava umi rred sosiál jepe. Umi nasión, igovernantekuéra ha Satanás ndaijaʼemoʼãi ñanderehe, pórke umi testígo de Jehová añoite la noñehundíriva. Ohechakuaáta hikuái ndaikatúi hague ohundipa umi rrelihión ko yvy ape árigui. Upévare ko múndo kompletoite omañáta ñanderehe. Upe moméntope umi nasióngui oikóta Gog de Magog. Oñembyatýta hikuái oataka vaipaite hag̃ua Jehová puévlope (Ezeq. 38:2, 14-16). Ñande ningo ndajaikuaapái mbaʼépa oikóta pe jehasa asy guasu aja, upévare ikatu ñañepyrũ jajepyʼapy. Péro oĩ peteĩ mbaʼe isegúrova: ndajakyhyjéi vaʼerã pe jehasa asy guasúgui, pórke Jehová heʼíta ñandéve mbaʼépa jajapo vaʼerã jajesalva hag̃ua (Sal. 34:19). w19.10 16 párr. 10, 11

Ñande ndahaʼéi ñañandúnteva jaagradese vaʼerãha Jehovápe, síno jahechauka chupe upéva umi mbaʼe jaʼe ha jajapóvare. Upéicha rupi ñanediferénte umi ótro héntegui. Koʼág̃arupi umi hénte oikóva ko múndope ndoagradeséi Ñandejárape umi mbaʼe ojapóvare hesehapekuéra. Añetehápe ojekuaa porã jaikomaha “umi ára pahápe”, pórke umi hénte imalagradesidoiterei (2 Tim. 3:1, 2). ¡Aníkena núnka ova ñanderehe umi hénte lája! Tuakuéra ningo ndoipotái ifamília oiko vai, síno oipota ojogueraha porã. Ha Jehová oipota avei entéro umi oĩva ifamíliape ojogueraha porã. Pe mborayhu ñañandúva ojuehe ningo haʼe voi peteĩ márka ohechaukáva ñande haʼeha kristiáno tee (Juan 13:35). Peteĩ salmísta oskrivi vaʼekue: “Ajépa iporã ha igustoite umi ermáno oiko porãrõ oñondivepa peteĩ famíliaicha” (Sal. 133:1). ¡Ajépa ñande avei ñañeñandu upéicha! Jahayhu jave ñane ermáno ha ñane ermanakuérape jahechauka hína jahayhuha Jehovápe (1 Juan 4:20). Javyʼaite ningo ñaime haguére ko famíliape, pórke enterovénte ‘imbaʼeporã oñondive ha ojoporiahuvereko’ (Efes. 4:32). w20.02 9 párr. 6, 7

Ana provlemakuéra ningo ndopái kuri upepete. Haʼe oho jey vaʼekue hógape ha osegi oiko Peninándi. La Biblia ndeʼíri Peniná okambia hague ha nomaltratavéima hague Ánape. Upévare ikatu jaʼe Ana provávlemente osegíne hague oaguanta umi mbaʼe vaiete Peniná heʼíva oñembohory hag̃ua hese. Péro Ana nomboguapyvéima ijehe upe situasión, upéva rangue haʼe ipyʼaguapy ha opytáma trankíla. Ana ndojepyʼapyvéima oheja rire iprovléma Jehová pópe. Ana ojerovia Jehováre ha haʼe okonsola ha ombopyʼaguapy chupe. Tiémpo rire Jehová okontesta Ana ñemboʼe, ha haʼe ikatúma kuri imemby (1 Sam. 1:2, 6, 7, 17-20). Ñande avei ikatu ñandepyʼaguapy jey jepe pe provléma ndopái. Ikatu oĩ umi provléma ndopáiva ñañemboʼéramo jepe heta vése ha jaha meméramo jepe rreunionhápe. Péro Ana ehémplogui ñaaprende peteĩ mbaʼe iporãitereíva: Mbaʼeve ndaikatúi ojoko Jehovápe ñanekonsola ha ñanembopyʼaguapy hag̃ua ñañekevrantaiterei jave. Haʼe núnka ndahesaraimoʼãi ñandehegui ha katuete ñanepremiáta jasegíramo ñandefiél, ikatu koʼag̃aite voi térã amo gotyomie (Heb. 11:6). w20.02 22 párr. 9, 10

Umi ansianokuéra noñemokirirĩri, síno katuete ohechauka umi konsého bíblico oipytyvõtava ótrope. ¿Mbaʼérepa iñimportantete ñañeʼẽ ótrope tekotevẽ jave? Jahechamíta Elí ehémplo. Pe súmo saserdóte Elí ningo oreko vaʼekue mokõi itaʼýra ohayhuetereíva. Péro umi itaʼýra ndorrespetái vaʼekue Jehovápe. Haʼekuéra ningo oservi vaʼekue saserdóteramo pe tavernákulope, ha oreko peteĩ rresponsavilida iñimportantetereíva upépe. Péro haʼekuéra oipuru vai pe autorida oñemeʼẽva chupekuéra, ndorrespetaiete voi umi sakrifísio oñemeʼẽva Jehovápe, ha notĩriete hikuái hekovai hag̃ua (1 Sam. 2:12-17, 22). Moisés léipe ohechaukaháicha, Elí raʼykuérape ojejuka vaʼerã kuri umi mbaʼe vai ojapóvare, péro Elí ojaʼoʼimínte itaʼyrakuérape ha opermiti chupekuéra osegi oservi pe tavernákulope (Deut. 21:18-21). ¿Mbaʼépa Jehová opensa Elí ojapóvare ko situasiónpe? Haʼe heʼi Elípe: “¿Mbaʼére piko remombaʼeve nde raʼykuérape chéve chemombaʼe rangue?”. Upévare Jehová odesidi ojuka umi mokõi kuimbaʼe añáme (1 Sam. 2:29, 34). w20.03 19 párr. 4, 5