Agosto

Jesúspe ojepersegíramo jepe lomímonte ipyʼaguapy vaʼekue, pórke oikuaa ombovyʼaha Itúape. Haʼe osegi kuri iñeʼẽrendu ijetuʼúramo jepe la situasión. Ohayhu Itúape ha umi mbaʼe ojapóva hesehápe haʼe vaʼekue la iñimportantevéva chupe g̃uarã. Ou mboyve ko yvy ape ári, ombaʼapo vaʼekue Ñandejárandi “peteĩ konstruktór ivaletereívaicha” (Prov. 8:30). Ha oĩ aja ko yvy ape ári katu, kyreʼỹme omboʼe heta mbaʼe Itúagui (Mat. 6:9; Juan 5:17). Upéva ombovyʼaiterei kuri Jesúspe (Juan 4:34-36). Ñande ningo jasegi Jesús ehémplo ñaneñeʼẽrendu jave Jehovápe ha siémpre ñanerembiapo heta jave “ñande Ruvicha servísiope” (1 Cor. 15:58). ‘Ñañemeʼẽmbaitérõ japredika hag̃ua’, umi provléma jahasáva nañandedesesperái (Hech. 18:5). Por ehémplo, umi persóna jaikuaáva predikasiónpe pyʼỹinte ijetuʼuve la isituasión. Péro oñepyrũvo ohayhu Jehovápe ha osegi ikonsého, oho porãve chupekuéra ha ovyʼave. Káda ke jahecha oikoha upéva, jajeroviave Jehová oñangarekotaha ñanderehe. w19.04 10, 11 párr. 8, 9

Haʼekuéra oñehaʼãmbaite vaʼekue ikatu hag̃uáicha ipuʼaka umi espíritu añáre. Umi lívro de máhia ningo hepyeterei vaʼekue, upéicharõ jepe ohapy hikuái oikónte rangue orregala térã ovende. Chupekuéra ndahaʼéi la oipyʼapyetereíva mboýpa ovale umi lívro, síno mbaʼépa ojapo vaʼerã hikuái ikatu hag̃uáicha Jehová ovyʼa. ¿Mbaʼéichapa ikatu jasegi umi kristiáno síglo primero guare ehémplo? Iporãta ñamombo térã ñahundietéramo umi mbaʼe ikatúva ñanemoag̃ui pe espiritísmore. Umívape oike umi amuléto térã kurundu, ha avei oimeraẽ mbaʼe umi hénte oipurúva ojeprotehe hag̃ua umi espíritu añágui (1 Cor. 10:21). ¿Mbaʼetekópa hína umi entretenimiénto jaiporavóva? Eñeporandumína: “¿Oĩpa espiritísmo umi entretenimiénto aiporavóvape?”. Jajasegurákena ani hag̃ua jadesidi umi mbaʼe Jehovápe ndogustáiva. Entéronte ningo jajapo ikatúva guive ñanekonsiénsia potĩ hag̃ua (Hech. 24:16). w19.04 22, 23 párr. 10-12

Umi ansiánope oñemombeʼu jave algúno opeka vaieterei hague, haʼekuéra oreko vaʼerã enkuénta heta mbaʼe. Umi ansiáno oipota oñesantifika Jehová réra ha ndoipotái mbaʼeve omongyʼa chupe, upéva hína la iñimportantevéva chupekuéra g̃uarã (Lev. 22:31, 32; Mat. 6:9). Iñimportanteterei avei chupekuéra oipytyvõ umi ermánope siémpre oreko hag̃ua peteĩ amista iporãva Jehovándi, ha avei okonsola ha omokyreʼỹse umi ojeperhudika vaʼekuépe pe pekádo vai káusare. Avei oiméramo peteĩ kristiáno hína upe opeka vai vaʼekue, umi ansiáno oñehaʼãta ohecha upe persónapa oñarrepenti, ha oiméramo upéicha oipytyvõta chupe oreko jey hag̃ua peteĩ amista iporãva Jehovándi (Sant. 5:14, 15). Peteĩ kristiáno ohejáramo ipuʼaka hese umi deséo vai orekóva ha opeka vai, haʼete hasykatúva hína. Haʼe ndorekovéima peteĩ amista iporãva Jehovándi. Upévare ikatu ñambojoja umi ansiánope umi doktór rehe. Haʼekuéra oñehaʼã omonguera “pe hasývape”, térã pe pekadórpe. Umi ansiáno ikatu oipuru umi konsého oĩva la Bíbliape oipytyvõ hag̃ua chupe, ikatu hag̃uáicha oĩ porã jey Jehovándi. Péro upéva ikatu oiko sólamente oñarrepentíramo ipyʼaite guive (Hech. 3:19; 2 Cor. 2:5-10). w19.05 10 párr. 10, 11

Jehová ikatu omeʼẽ ñandéve pe deséo jajapo hag̃ua álgo. Por ehémplo ikatu jaikuaa ñane kongregasiónpe térã ótro lugárpe tekotevẽha ojejapo peteĩ mbaʼe. Umícha jave ñañeporandu jepi mbaʼépa ñande ikatu jajapo ñaipytyvõ hag̃ua. Térã ikatu oime jarresivi peteĩ asignasión ijetuʼu léntova ha ñañeporandu ikatútapa ñakumpli porã upéva. Ikatu avei jalee rire peteĩ párte la Bíbliagui ñañeporandu mbaʼéichapa ikatu jajapo upe jaleéva ñaipytyvõ hag̃ua ótrope. Jehová ohechávo ñande jajepyʼamongetaha koʼã mbaʼére, haʼe ikatu omeʼẽ ñandéve pe deséo jajapo hag̃ua. Jehová ikatu avei omeʼẽ ñandéve pe podér jajapo hag̃ua álgo (Is. 40:29). Ijespíritu sánto rupive haʼe ikatu ñanembokatupyry jajapo porãve hag̃ua umi mbaʼe jajapokuaámava voi (Éx. 35:30-35). Avei Jehová ikatu oipuru iñorganisasión ñanemboʼe hag̃ua jajapo hag̃ua peteĩ traváho. Oiméramo ndajaikuaái mbaʼéichapa ñakumplíta ñane asignasión, jajerurékena ajúda. Ani ñanderesarái jajerure hag̃ua ñande Ru yvagapeguápe “pe podér umi ótra hénte ndorekóiva” (2 Cor. 4:7; Luc. 11:13). w19.10 21 párr. 3, 4

Upévare ndajahecharamói ko múndope oñemokyreʼỹha umi héntepe opensa hag̃ua ijehéntema. Peteĩ ensiklopédia heʼi áño 1970 riremi “oñepyrũ hague osẽ heta hetave lívro heʼíva mbaʼépa jajapo vaʼerã jaiko hag̃ua vyʼápe”. Oĩ voi lívro heʼíva “peteĩ persóna nokambiái vaʼerãha ilája térã nopensái vaʼerãha oĩ vaiha la ojapóva”. Por ehémplo, peteĩva umi lívrope heʼi: “Nde rejehayhu vaʼerã, pórke nde hína pe persóna iporãvéva, ikalidavéva ha iñimportantevéva oĩva ko múndope”. Upe lívro heʼi avei “peteĩ persóna odesidi vaʼerãha mbaʼéichapa oñekomportáta, ha ojapo vaʼerãha oimeraẽ mbaʼe opensáva oĩ porãha térã okonvenivéva chupe”. ¿Mávarepa ñanemomanduʼa upe idéa? Satanás rehe. Haʼe omboliga vaʼekue Évape ojapo hag̃ua avei upéicha. Haʼe heʼi chupe ‘ojoguataha Ñandejárape ha oikuaataha mbaʼépa iporã ha mbaʼépa ivai’ (Gén. 3:5). Koʼág̃arupi hetaiterei persóna oñemombaʼeterei ijupe ha heʼi voi ni Ñandejára ni avavete asy ndaikatuiha heʼi chupekuéra mbaʼépa oĩ porã ha mbaʼépa oĩ vai. Por ehémplo, upéva koʼýte ojehechakuaa umi hénte opensávare pe matrimóniore. w19.05 23 párr. 10, 11

Rréi David sapyʼánte oñeñandu vaieterei vaʼekue. Epensamíntena umi mbaʼe ijetuʼúva haʼe ohasa vaʼekuére. Por ehémplo, haʼe pyʼỹinte oñeñandu vaʼekue kulpávle umi mbaʼe vai ojapo vaʼekuére (Sal. 40:12). Itaʼýra ohayhuetéva Absalón opuʼã vaʼekue hese, ha upevakuére ojejuka Absalónpe (2 Sam. 15:13, 14; 18:33). Avei peteĩ iñamigoite ou otraisiona vai chupe (2 Sam. 16:23–17:2; Sal. 55:12-14). Heta umi salmo David oskrivi vaʼekue ohechauka mbaʼeichaitépa haʼe oñedesanima, péro ohechauka avei haʼe ojeroviaiterei hague Jehováre (Sal. 38:5-10; 94:17-19). Tiémpo rire, peteĩ salmísta oñepyrũ oenvidia mbaʼéichapa oiko umi iñañáva. Ko salmísta amalisia haʼe vaʼekue pe levita Asaf familiare ha oservi vaʼekue “Ñandejára rógape, pe lugár sagrádope”. Ko salmísta oñeñandu vaietereígui, ou vaʼekue oñedesanimaiterei ha ndovyʼavéi. Haʼe oñepyrũ jepe opensa ndovaleiha mbaʼeverã umi vendisión jarresivíva jaservi haguére Jehovápe (Sal. 73:2-5, 7, 12-14, 16, 17, 21). w19.06 17 párr. 12, 13

Satanás oipuru umi deséo ndaivaíriva. Ñande ningo ñaaprendese umi mbaʼe ñanepytyvõtava ñamantene hag̃ua ñane famíliape ha ñandejupe voi (1 Tim. 5:8). Koʼã mbaʼe ñaaprende jepi jahávo eskuélape, koléhiope ha jastudia porãvo. Péro ñañatende porã vaʼerã. Heta tetãme oñemboʼéramo jepe umi mbaʼe ideprovéchotava, oñemboʼe avei heta filosofía térã yvypóra arandu. Por ehémplo, oñemboʼe umi estudiántepe oduda hag̃ua Ñandejára oexistiha ha ani hag̃ua orrespeta la Biblia. Ojeʼe chupekuéra umi iñintelihénteva guive ogueroviaha pe evolusión rupive oñepyrũ hague la vída (Rom. 1:21-23). Koʼã mbaʼe ningo oñemoĩ Ñandejára arandu rehe (1 Cor. 1:19-21; 3:18-20). Aníkena jaheja arakaʼeve Satanás múndo ñandereity iñuhãme “yvypóra arandu” rupive ni umi “vyrorei” omboʼéva rupive (Col. 2:8). Jasegi vaʼerã ñañatende ani hag̃ua núnka Satanás ñanembotavy (1 Cor. 3:18). Aníkena arakaʼeve jaheja Satanás ñanekonfundi ha ñanderesarái mávapa Jehová ha mbaʼéichapa haʼe oipota jaservi chupe. Ñanderekopotĩkena Jehová oipotaháicha, ha ani ñapermiti Satanás ñandereity iñuhãme ha nañapenavéi Jehová konséhore. w19.06 5 párr. 13; 7 párr. 17

Tahaʼe haʼéva pe téma jaiporavóva, siémpre ñapensa raẽ vaʼerã umi hénte ñanerendútavare. Ñapensa vaʼerã mbaʼéichapa ideprovéchota chupekuéra oaprendéramo mbaʼépa añetehápe omboʼe la Biblia. Ha ñañemongeta jave hendivekuéra, iñimportánte jajapysaka hesekuéra, ha jahechauka jarrespetaha la opensáva hikuái. Upéicha jajapóramo, ñantende porãvéta chupekuéra ha ñanerendusevéta hikuái. Ikatu hag̃uáicha peteĩ persóna ostudiase la Biblia, sapyʼánte tekotevẽta jaipuru heta tiémpo ha ñañehaʼãmbaite jajapo chupe rrevisíta heta vése. ¿Mbaʼérepa? Pórke ikatu hína ndajatopái jepi hesekuéra jaha jey jave ñañemongeta hag̃ua hendivekuéra. Sapyʼánte tekotevẽta avei javisita jey heta vése peteĩ persónape, ojepokuaa peve ñanderehe oasepta hag̃ua peteĩ estúdio bíblico. Ñanemanduʼa vaʼerã peteĩ plánta pyʼỹi jarregáramo, okakuaa porãvetaha. Upéicha avei, ikatu hag̃uáicha peteĩ persóna ohayhu Jehová ha Jesucrístope, tekotevẽ pyʼỹi ñañemongeta hendive Ñandejára Ñeʼẽre. w19.07 14 párr. 1; 15, 16 párr. 7, 8

¿Mbaʼépa heʼise vaʼekue Jesús? Haʼe ndeʼiséi vaʼekue ñande kristianokuéra javyʼataha umi hénte ndaijaʼéiramo ñanderehe. Upéva rangue Jesús ñandeavisa mbaʼépa oikóta ñanderehe. Ñande ningo ndajajeheʼái ko múndore, jaiko Jesús omboʼe haguéicha ha japredika pe mensáhe haʼe opredika vaʼekue. Upéicha rupi ko múndo ndaijaʼéi ñanderehe (Juan 15:18-21). Ñande ningo jaipota Jehová ñandeguerohory. Umi hénte ndochaʼéiramo ñanderehe jahayhu rupi ñande Ru Jehovápe, upéva ndahaʼevéima ñane provléma. Ndovaléi ñapensa ndajavaleiha mbaʼeverã umi hénte nañandeguerohorýiramo. Ñande ningo ndajaikuaái arakaʼépa umi hénte oñepyrũta ñandepersegi, térã arakaʼépa umi goviérno oproivíta ñandehegui japredika térã ñañerreuni. Péro jaikuaa ikatuha jajeprepara koʼág̃ama voi ñamombaretévo ñane amista Jehovándi, ñañehaʼãvo ñandepyʼaguasuve ha jaikuaávo mbaʼépa jajapo vaʼerã umi hénte ndaijaʼéi jave ñanderehe. Umi mbaʼe jajapóva koʼág̃a jajeprepara hag̃ua, ñanepytyvõta jasegi hag̃ua jaservi Jehovápe toiko la oikóva amo gotyove. w19.07 6 párr. 17, 18; 7 párr. 21

Jastudia jave la Biblia umi persóna ndairrelihiósoivandi, tekotevẽ ñaipytyvõ meme chupekuéra ojerovia hag̃ua Ñandejára oexistiha. Avei ñaipytyvõ vaʼerã chupekuéra ojerovia hag̃ua la Biblia heʼívare. Upearã sapyʼánte tekotevẽta jarrepeti heta vése umi mbaʼe ñamboʼéva. Káda estúdiope ikatu voi ñaanalisa umi pruéva ohechaukáva la Biblia añetehápe haʼeha Ñandejára Ñeʼẽ, ikatu jahecha umi profesía oñekumplíma vaʼekue, mbaʼéichapa la Biblia ndojoavýi pe siénsia ha pe istória ndive, térã umi konsého ideprovechoitereíva oĩva pype. Ñande jahayhu rupi umi héntepe ñaipytyvõ hína chupekuéra oiko hag̃ua Cristo disípuloramo, tahaʼe umi irrelihiósovape térã umi ndahaʼéivape (1 Cor. 13:1). Ñamboʼe jave chupekuéra, ñande jaipota haʼekuéra oikuaa Ñandejára ñanderayhuha ha oipotaha avei jahayhu chupe. Káda áño, hetaiterei hénte anteve noñeinteresaguasúi vaʼekue térã ndoikuaaséi vaʼekue mbaʼeve pe rrelihióngui, ou ohayhu Jehovápe ha ojevautisa. Upévare ñandepositívo vaʼerã ha jahechauka jahayhu ha ñañeinteresaha opaichagua persónare. Ñahendúkena umi héntepe ha ñañehaʼã ñantende mbaʼépa opensa hikuái ha mbaʼérepa. Jahechaukákena chupekuéra ñane ehémplo rupive mbaʼéichapa ikatu oiko chuguikuéra Cristo disípulo. w19.07 24 párr. 16, 17

Salum rajykuéra oĩ vaʼekue umi Jehová oipurúva apytépe oñemyatyrõ hag̃ua Jerusalén murálla (Neh. 2:20; 3:12). Itúa ningo peteĩ prínsipe vaʼekue, péro haʼekuéra oĩ dispuésta ojapóvo umi traváho ipeligróso ha ijetuʼúva (Neh. 4:15-18). Koʼág̃a avei oĩ ermána vyʼápe ojeofreséva omopuʼã ha omantene hag̃ua umi lugár ojepurúva ojeadora hag̃ua Jehovápe, ha koʼã traváho sagrádo hína. Koʼã ermána ikatupyry, ikyreʼỹ ha ifiél, ha añetehápe ñaikotevẽ hesekuéra osẽ porã hag̃ua koʼãichagua traváho. Jehová omomýi vaʼekue Tabítape ‘ojapo hag̃ua heta mbaʼe porã ha omeʼẽ hag̃ua heta rregálo umi imboriahúvape’, koʼýte umi viúdape (Hech. 9:36). Tabita ipojera ha ivuenaiterei, upévare umi ermáno ombyasyeterei haʼe omanórõ guare. Péro apóstol Pedro omoingove jeýrõ guare chupe, umi ermáno ovyʼaiterei jey (Hech. 9:39-41). ¿Mbaʼépa ñaaprende Tabítagui? Oiméramo ñande kuña térã kuimbaʼe, ñanemitã térã ñandeeda, enterovete ikatu jajapo heta mbaʼe ñaipytyvõ hag̃ua ñane ermanokuérape. w19.10 23 párr. 11, 12

¿Mbaʼéichapa ikatu ñamoñepysanga ñane ermánope? Epensamína ko situasiónre. Peteĩ estudiánte de la Biblia hasypeve ojejokokuaa anivéma hag̃ua hoʼu rasa umi vevída alkoólika. Haʼe ohechakuaa ndoʼuvéima vaʼerãha vevída arakaʼeve, okambia heta mbaʼe hekovépe ha upéi ojevautisa. Upe rire peteĩ ermáno oinvita chupe hógape okomparti hag̃ua ótro ermanokuérandi, péro oofrese chupe vevída, ha heʼi chupe: “Oiméramo nde rejejokokuaa, katuete reʼukuaáta rehasaʼỹre la rrája”. ¡Ajépa ñambyasyete vaʼerã pe ermáno pyahu ohendúramo pe konsého vaiete ha oñepyrũ jey hoʼu rasa vevída! Umi rreunión ñanepytyvõ ñamoĩ hag̃ua en práktika heta hendáicha umi konsého jatopáva pe téxto koestediaguápe. Ñanemomanduʼa mbaʼe mbaʼépa iñimportanteve Jehovápe g̃uarã, ha ñaaprende mbaʼéichapa jajapóta umi mbaʼe ñaaprende vaʼekue ani hag̃ua jajapo mbaʼeve ivaíva. Ñanemokyreʼỹ avei jahayhu hag̃ua Ñandejárape ha ñane ermanokuérape. Ha jahayhu rupi chupekuéra ha Jehovápe ñane korasõite guive, ñañehaʼãmbaitéta ani hag̃ua ñamoñepysanga ñane ermanokuérape. w19.08 10 párr. 9; 11 párr. 13, 14

Oĩ persóna idesidídova ha ndokyhyjéiva heʼi hag̃ua la opensáva, péro upéva ndeʼiséi oñembotuichaha katuete (Juan 1:46, 47). Péro oiméramo jepe ñanekirirĩ térã ñandedesidído, entéronte tekotevẽ ñañehaʼãmbaite ñaneumílde hag̃ua. Ñapensamína apóstol Pablo ehémplore. Jehová ningo heta oipuru vaʼekue chupe omoñepyrũ hag̃ua umi kongregasión heta siudárupi. Ikatu voi jaʼe haʼe ojapo hague hetave mbaʼe umi ótro apóstolgui. Upéicharõ jepe Pablo núnka nopensái tuichave hague iñermanokuéragui. Haʼe ningo oĩ porã vaʼekue Ñandejára renondépe, péro haʼe orrekonose ohupyty hague upéva Ñandejára imbaʼeporãiterei rupínte hendive, ndahaʼéi ikatupyry haguére ni ojapo haguére peteĩ traváho iñimportánteva (1 Cor. 15:10). Péicha apóstol Pablo oheja peteĩ ehémplo iporãitereíva oskrivírõ guare umi ermáno Corintoguápe, upépe oĩ vaʼekue opensáva iñimportanteveha chugui (2 Cor. 10:10). w19.09 3 párr. 5, 6

Sapyʼánte ikatu ijetuʼu ñandéve ñaneñeʼẽrendu hag̃ua pórke enterovéva japeka ha ñaneimperfékto. Upévare sapyʼánte ndajajapói Ñandejára ojeruréva. Adán ha Eva ojerrevelárõ guare Ñandejárare ha hoʼu pe frúta ojeproivi vaʼekue, haʼekuéra voi odesidi ijehegui mbaʼépa iporã ha mbaʼépa ivai (Gén. 3:22). Koʼág̃a avei oĩ hetaiterei hénte omboykéva Jehovápe ha odesidi ijehegui mbaʼépa iporã ha mbaʼépa ivai. Ñande ningo jaikuaa ha jahayhu Jehovápe, upéicharõ jepe ikatu ijetuʼu ñañemoĩ hag̃ua ipoguýpe opa mbaʼépe. Apóstol Páblore oiko vaʼekue upéva (Rom. 7:21-23). Ñande avei haʼéicha jajapose iporãva, péro siémpre jaiko jalucha ani hag̃ua ñandestira pe ivaíva. Sapyʼánte avei umi kostúmbre ojerekóva pe lugár jakakuaa haguépe nañanepytyvõguasúi ñañemoĩse hag̃ua Jehová poguýpe. Umi hénte opensa lája ningo idiferénte jepi la Jehová opensa lájagui, ha sapyʼánte ijetuʼu jajehekýi hag̃ua umichagua pensamiéntogui. w19.09 15 párr. 4-6

Ñande ñarrekonose vaʼerã ikatuha ñanekaneʼõ, upévare jaipuru porã vaʼerã pe fuérsa jarekóva. Por ehémplo, nañañatendéiramo ikatu hína jaipuru vai ñande fuérsa ñambyaty hag̃ua umi kósa materiál. Jahechamína mbaʼépa Jesús heʼi vaʼekue pe mitãkariaʼy ipláta hetávape. Haʼe oporandu vaʼekue Jesúspe: “¿Mbaʼépa ajapo vaʼerã ahupyty hag̃ua jeikove opaveʼỹva?”. Haʼe katuete ivuéno rakaʼe pórke Marcos heʼi Jesús ohayhu hague chupe. Upévare Jesús oinvita upe mitãkariaʼýpe omoirũ hag̃ua chupe. Ko kariaʼýpe ijetuʼu kuri odesidi hag̃ua, pórke omoirũséramo jepe Jesúspe, ohayhuve umi mbaʼerepy orekóva ha ndohejaséi umíva (Mar. 10:17-22). Upéva káusa noñemoĩséi Jesús júgo guýpe, oho pe “pláta rapykuéri” ha osegi oiko ijesklávoramo (Mat. 6:24). ¿Mbaʼépa ñande jajapo vaʼerãmoʼã ñaimérire upe situasiónpe? Iporãitereíta jajepyʼamongetáramo sapyʼapyʼa ha jahecha mbaʼépa hína pe iñimportantevéva ñandéve g̃uarã. ¿Mbaʼérepa? Pórke péicha ikatúta jahecha jaipuru porãpa hína pe fuérsa jarekóva. w19.09 24 párr. 17, 18

Ñande jasegíta japredika Jehová heʼi peve pe tembiapo opamaha. ¿Mboy tiémpopa hemby umi hénte oikuaa hag̃ua Jehová ha Jesúspe? (Juan 17:3). Upéva ndajaikuaái. Péro si jaikuaa nog̃uahẽi aja pe jehasa asy guasu, entéro “umi ipyʼaporãva ohupyty hag̃ua jeikove opaveʼỹva” ikatuha gueteri oasepta umi notísia porã ha oñepyrũ oservi Jehovápe (Hech. 13:48). Upévare koʼág̃ama ñaipytyvõ vaʼerã umichagua héntepe, ani tárde jepe. ¿Mbaʼéichapa ikatu jajapo upéva? Iñorganisasión rupive, Jehová omeʼẽ ñandéve entéro mbaʼe ñaikotevẽva ñamboʼe hag̃ua umi héntepe pe añetegua. Por ehémplo káda semána ñanerekomboʼe pe rreunión éntre semanaguápe. Ko rreunión ñanepytyvõ jaikuaa hag̃ua mbaʼépa ikatu jaʼe pe primera konversasiónpe, ha avei pe rrevisítape. Ha ñañemongeta kyreʼỹ rire peteĩ persónandi ikatu jaheja chupe peteĩ tratádo térã peteĩ rrevísta, péicha haʼe ikatúta oleeve jaha jey peve javisita hag̃ua chupe. Enterovetéva ñañehaʼã vaʼerã ñanerembiapo heta predikasiónpe káda mes. w19.10 9 párr. 7; 10 párr. 9, 10

Jehová opromete vaʼekue isiérvo Simeónpe nomanomoʼãiha ohecha mboyve pe Mesíaspe. Simeón ningo oiko vaʼekue Jerusalénpe, haʼe ijedáma ha iñeʼẽrendu Ñandejárape. Oime vaʼerã upe promésa omokyreʼỹete raʼe chupe, pórke heta áñorema ohaʼarõ og̃uahẽ pe Mesías. Jehová ovendesi Simeónpe ojerovia ha oaguanta haguére. Peteĩ vuéltape, “pe espíritu sánto ogia Simeónpe oho hag̃ua pe témplo ryepýpe”, upépe ohecha pe mitãraʼy Jesúspe. Jehová oipuru Simeónpe heʼi hag̃ua peteĩ profesía ohechaukáva upe mitãgui oikotaha pe Cristo (Luc. 2:25-35). Posívlemente Simeón omano Jesús oñepyrũ mboyve hembiapo, upéicharõ jepe oagradese pe priviléhio Jehová omeʼẽ vaʼekue chupe. Ha iporãveha, ko kuimbaʼe ifiélva ohecháta hína mbaʼéichapa Jesús goviérno ovendesíta entéro família oikóvape ko yvy ape ári (Gén. 22:18). Ñande avei jaagradese vaʼerã oimeraẽ priviléhio Jehová omeʼẽvare ñandéve. w19.10 22 párr. 7; 23 párr. 12

Oiméramo ñandepláta térã ñanemboriahu, enterovénte tekotevẽ ñañangareko ñane korasõre. ¿Mbaʼéichapa jajapokuaa upéva? Aníkena ñañepyrũ jahayhu umi rrikésa. Aníkena ñapermiti ñande traváho iñimportanteve Jehová servísiogui. Jahecha hag̃ua noiméipa oikóma upéva ñanderehe, ikatu ñañeporandu: “Aime jave rreunionhápe ha predikasiónpe, ¿apensápa siémpre che traváhore? ¿Aikópa ajepyʼapy ofaltárõ g̃uarã chéve pláta amo gotyove? ¿Cheprovlémapa che matrimóniope pláta káusare? ¿Aĩpa dispuésto ajapo hag̃ua umi traváho la hénte odespresiáva chetiempove hag̃ua Jehovápe g̃uarã?” (1 Tim. 6:9-12). Jajepyʼamongetávo koʼã porandúre ñanemanduʼa vaʼerã Jehová ñanderayhuha ha ojapoha ko promésa entéro umi oservívape chupe ipyʼaite guive: “Núnka ndorohejamoʼãi ha núnka nderepytamoʼãi neaño”. Upévare apóstol Pablo oskrivi: “Aníkena peiko pendeplatarayhu” (Heb. 13:5, 6). w19.10 29 párr. 10

Ñambaʼapóramo ñane ermanokuérandi ha jahecha umi kualida porãite orekóva hikuái, ñande ñaaprende chuguikuéra ha ñamombarete ñane amista hendivekuéra. Por ehémplo, ¿mbaʼéichapa ñañeñandu japredika jave peteĩ ermánondi ha ñahendu mbaʼéichapa odefende pyʼaguasúpe umi mbaʼe ogueroviáva, térã oñeʼẽ Jehováre ha umi ipromesakuérare ipyʼaite guive? Katuete oiméne jahayhuve upe ñane ermánope. Adelina, peteĩ ermána orekóva 23 áño, heʼi iñamíga Camílape oho hag̃ua oñondive opredika peteĩ lugár ndojepredikaguasúivape. Adelina heʼi: “Ore ningo orekyreʼỹseve kuri ha rovyʼaseve predikasiónpe. Rojapo vaʼerã kuri álgo orepytyvõva rosegi hag̃ua romeʼẽ Jehovápe pe iporãvéva”. ¿Mbaʼéichapa oipytyvõ chupekuéra opredika haguére oñondive? Adelina omombeʼu: “Káda día ropredikapa rire roñemongeta mbaʼéichapa roñeñandu, mbaʼe mbaʼépa oremokyreʼỹ roñemongeta rire peteĩ persónandi, ha mbaʼéichapa rohecha Jehová gía rojapokuévo ko tembiapo. Tuichaiterei ningo oremokyreʼỹ roñemongeta koʼã mbaʼére ha orepytyvõ rojokuaa porãve hag̃ua”. w19.11 5 párr. 10, 11

Ymave ningo ñemotĩ vaʼekue peteĩ soldádope g̃uarã oúramo gerrahágui ijeskudoʼỹre. Pe istoriadór rrománo hérava Tácito heʼi: “Peteĩ soldádope g̃uarã, pe ñemotĩ tuichavéva hína ohejáramo ijeskúdo gerrahápe”. Upéicha rupi, oñorairõ jave umi soldádo siémpre oñakarama hatã vaʼekue ijeskúdore. Ñande ñañakarama hatã ñande eskúdore ndajafaltáiramo umi rreuniónpe ha ñañeʼẽramo ótrope Jehová rérare ha Irréinore (Heb. 10:23-25). Avei ñande jalee la Biblia káda día, ha ñañemboʼe Jehovápe ikatu hag̃uáicha ñanepytyvõ ñamoĩ hag̃ua en práktika umi mbaʼe ñaaprendéva (2 Tim. 3:16, 17). Péicha jajapóramo, tahaʼe haʼéva pe árma Satanás oipurúva ñane kóntrape ñanerundi hag̃ua, ni mbaʼevéicharõ ndaikatumoʼãi ñandejoko jahupyty hag̃ua pe vída etérna (Is. 54:17). Ñande eskúdo guasu, haʼéva ñande jerovia ñandeprotehéta. Avei ñambaʼapóta pyʼaguasúpe ñane ermanokuérandi. Ha ndahaʼéi ñaganátanteva umi ñorairõ káda diagua, síno jarekóta pe oportunida ñaimévo Jesús ykére ág̃a haʼe ogana vove Satanáspe ha iñirũnguérape (Apoc. 17:14; 20:10). w19.11 19 párr. 18, 19

Ñaanota vaʼerã mbaʼépa jajapose, pórke upéva ñanepytyvõ ñakumpli hag̃ua upe jajaposéva (1 Cor. 14:40). Por ehémplo, umi kuérpo de ansiánope ojeʼe oiporavo hag̃ua peteĩ ansiánope oanota hag̃ua umi mbaʼe odesidíva, mávapa ojapóta ha arakaʼérupipa ojejapopa vaʼerã. Umi ansiáno osegívape koʼã instruksión ifasilve ojapo umi mbaʼe ojedesidi vaʼekue. Ñande ikatu avei jajapo upéicha. Por ehémplo, ikatu jajapo peteĩ lísta ha ñamoĩ pype umi mbaʼe jajapo vaʼerã káda día, ha ñamohenda asegún umi mbaʼe primeroite jajapo vaʼerã. Péicha ifasilvéta ñandéve ñakompleta hag̃ua pe ñañepyrũ vaʼekue, ha sapyʼaitépe jajapovéta hetave mbaʼe. Péro, ñañehaʼãmbaite vaʼerã. Jajaposéramo pe ñaplanea haguéicha ha ñamohuʼã pe ñañepyrũ vaʼekue ñañehaʼãmante vaʼerã (Rom. 12:11). Apóstol Pablo heʼi vaʼekue Timotéope ‘oñehaʼã meme’ hag̃ua oporomboʼe porãve, ha heʼi avei chupe ‘osegi hag̃ua ojapo’ upéva. Ko konsého ideprovécho entéro mbaʼe jahupytysévape g̃uarã (1 Tim. 4:13, 16). w19.11 29, 30 párr. 15, 16

Jehová ojerurérõ guare Moiséspe oguenohẽ hag̃ua Egíptogui umi israelítape, Moisés ndojeroviái ijehe ha heʼi jey jey Jehovápe haʼe noĩriha preparádo ojapo hag̃ua upéva. Jehová katu ombohovái chupe trankílo porãnte ha ohechauka oiporiahuverekoha chupe. Ñandejára ningo ontende Moiséspe ha oipytyvõ chupe (Éx. 4:10-16). Upéicha rupi, Moisés ikatu vaʼekue omeʼẽ faraónpe umi mensáhe ipohýiva heʼíva ojehusgataha chupe. Upe rire Moisés ohecha vaʼekue mbaʼéichapa Jehová oipuru ipodér osalva hag̃ua umi israelítape, péro ohundi faraón ha ijehérsitope Mar Rójope (Éx. 14:26-31; Sal. 136:15). Moisés oguenohẽ rire umi israelítape upe oĩhágui esklávoramo, haʼekuéra manterei ojeplagea oimeraẽ mbaʼére. Péro Moisés ohecha mbaʼeichaitépa Jehová ipasiénsia ipuévlo olivera vaʼekuére Egíptogui (Sal. 78:40-43). Avei ohecha Jehová iñumildetereiha, pórke okambia vaʼekue opensa lája Moisés ojerure rupi chupe (Éx. 32:9-14). Osẽ rire Egíptogui, Moisés ha Jehová oñoamigoite vaʼekue, ha upéicha rupi Moiséspe g̃uarã haʼete voi ku ohecháva Itúa yvagapeguápe (Heb. 11:27). w19.12 17 párr. 7-9

La majoría Jesús disipulokuéra galileo vaʼekue, ha upe rreuniónpe éntre heta oĩ vaʼekue hikuái. Upévare isentidove oñembyatýramo hikuái peteĩ montáñape Galiléape, oñembyaty rangue peteĩ ógape Jerusalénpe. Avei, Jesús orresusita rire oñembyatýma kuri umi 11 ijapostolkuérandi peteĩ ógape Jerusalénpe. Ha oimérire Jesús omeʼẽse raʼe ko mandáto umi apóstolpe añónte, heʼítama voi kuri chupekuéra upérõ, ojerure rangue chupekuéra, umi kuñáme ha umi ótro idisípulope ohopa hag̃ua Galiléape oñembyaty hag̃ua hendive upépe (Luc. 24:33, 36). Jesús ningo nomeʼẽi vaʼekue upe mandáto umi kristiáno oikóvape upe tiémpope añónte. ¿Mbaʼéichapa jaikuaa upéva? Pórke omeʼẽ rire isegidorkuérape pe mandáto, Jesús heʼi chupekuéra: “Che aĩta penendive káda día, og̃uahẽ meve pe fin” (Mat. 28:19, 20). Koʼág̃arupi oñekumpli hína upe Jesús heʼi vaʼekue, pórke oĩ hetaiterei oipytyvõva hapichápe oiko hag̃ua chuguikuéra Jesús disípulo. Epensamíntena: Káda áño ningo haimete 300.000 persónagui oiko Jesús disípulo, haʼekuéra ojevautisa ha oiko chuguikuéra testígo de Jehová. w20.01 2 párr. 1; 3 párr. 5, 6

Peteĩ ermáno imitãvape ojeʼe orekoha peteĩ mbaʼasy omokangypáva chupe. Peteĩ ermáno ijedámava ndotopavéi itravahorã. Umi ijedámava ohóvo oñandu amáske oho saʼive ikatuha ojapo Jehová servísiope. Jareko jave koʼãichagua provléma, ikatu voi ñapensa ndajavaleveimaha mbaʼeverã. Péicha oikóramo ikatu jaju ndajavyʼavéi, ñapensa nañamereseiha avave ñanderayhu, ha ndajajoguerahaporãi ñande rapichakuérandi. Umi hénte ko mundopegua nomombaʼéi hapicha rekove, pórke ojogua hikuái Satanáspe. Haʼéngo siémpre ñandeapoʼi ku ndajavaleiramoguáicha mbaʼevete asy. Haʼe ohechauka vaʼekue iñañaitereiha oofrese guaʼúrõ guare Évape liverta, oikuaa porãramo jepe Eva omanotaha odesovedeséramo Ñandejárape. Satanás siémpre oreko ipoguýpe ko múndo. Upévare nañanesorprendéi jahechávo heta umi orekóva autorida nomombaʼeiha hapichakuéra rekove ha ndorrespetaiha avavépe. ¡Ajépa idiferentete chuguikuéra Jehová! Haʼe siémpre oipota ñañeñandu porã, ha ñanepytyvõ oĩ jave umi situasión ijetuʼúva ikatúva ñanemopensa ndajavaleiha mbaʼeverã (Rom. 12:3). w20.01 14 párr. 1-4

Cuarenta áño ajárupi, Jeremías oiko vaʼekue umi hénte itraisionérova apytépe, umíva ningo haʼe vaʼekue ivesíno térã ikatu voi ihentekuéra oikóva Anatótpe, pe siuda haʼe onase hague (Jer. 12:6). Upéicharõ jepe, haʼe noñemohaʼeñói vaʼekue. Upéva rangue, Jeremías omombeʼu mbaʼéichapa oñeñandu Barúcpe, isekretário ifieletévape, ha ñande jaikuaa avei mbaʼéichapa haʼe oñeñandu vaʼekue pórke umi mbaʼe ojeskrivi la Bíbliape (Jer. 8:21; 9:1; 20:14-18; 45:1). Katuete oiméne pe tiémpo ohasa vaʼekue hikuái oñondive, Baruc oskrivi aja umi mbaʼe Jeremías ohasa vaʼekue, oipytyvõne raʼe chupekuéra ojorrespeta ha oñomombaʼeve hag̃ua (Jer. 20:1, 2; 26:7-11). Heta áñore, Jeremías pyʼaguasúpe oavisa vaʼekue umi israelítape mbaʼépa oikóta Jerusalén rehe (Jer. 25:3). Oñehaʼã jeývo umi israelita oñarrepenti hag̃ua, Jehová heʼi Jeremíaspe oskrivi hag̃ua peteĩ lívrope umi avíso omeʼẽ vaʼekue (Jer. 36:1-4). Jeremías ha Baruc ombaʼapóne raʼe heta mésere okumpli hag̃ua pe asignasión Ñandejára omeʼẽ vaʼekue chupekuéra, ha upe aja oiméne oñemongeta hikuái umi mbaʼe oipytyvõtavare chupekuéra omombarete hag̃ua ijerovia. w19.11 2, 3 párr. 3, 4

¿Mbaʼéichapa jatrata vaʼerã umi unhídope? Naiporãi ningo jaiko ñambotuicha peteĩ persónape, haʼéramo jepe Cristo ermáno (Mat. 23:8-11). Oñeʼẽvo umi ansiánore, la Biblia ñanemokyreʼỹ: “Pejerovia haʼekuéraicha”. Péro upéva ndeʼiséi ñapensa vaʼerãha peteĩ yvypóra haʼeha ñande líder (Heb. 13:7). Añetehápe ningo la Biblia heʼi algúnope “ojerrespetave” vaʼerãha. Péro ndahaʼéi hína unhído haguére, síno ‘oporogia porã’ rupi ha ‘ombaʼapo jejopýgui oñeʼẽ hag̃ua Ñandejára Ñeʼẽre ha oporomboʼe hag̃ua’ (1 Tim. 5:17). Ñambotuicha térã jaguerohoryetereíramo umi unhídope, ikatu hína otĩ térã ñamoñeñandu vai chupekuéra, térã ivaiveha, ñande káusare ikatu voi oñepyrũ oñemombaʼeguasu hikuái (Rom. 12:3). Péro ñande ni mbaʼevéicharõ ndajaipotái haʼekuéra ou ofalla mbaʼe Jehová renondépe ñande káusare (Luc. 17:2). w20.01 28 párr. 8

Oĩ ningo heta mbaʼe oipyʼapyeterei vaʼekue apóstol Páblope. Chupe oipyʼapyeterei vaʼekue umi provléma ombohováiva iñermáno ha iñermanakuéra (2 Cor. 2:4). Umi oñemoĩva hese ombyepoti vaipa chupe ha ogueraha chupe kárselpe. Avei Pablo heta vése ojejopy vai ha upéva okevrantaiterei chupe, por ehémplo oĩ vése ohasa hague nesesida ndorekói rupi entéro mbaʼe oikotevẽva (Filip. 4:12). Ha ikatu ñañeimahina mbaʼeichaitépa oiméne ojepyʼapy raʼe oviaha jave várkope, pórke por lo méno 3 vése oñehundi kuri umi várko oviahaha (2 Cor. 11:23-27). ¿Mbaʼépa oipytyvõ vaʼekue Páblope ojepyʼapyetereírõ guare? Pablo oñekevranta vaʼekue iñermáno ha iñermanakuéra ombohovái jave umi provléma, péro haʼe noñehaʼãi osolusiona haʼeño entéro umi provléma orekóva hikuái. Pablo oikuaa vaʼekue haʼeñónte ndaikatumoʼãiha ojapo entéro mbaʼe. Upévare ojerure unos kuánto ermánope oñangareko hag̃ua avei umi kongregasiónre, umíva apytépe Timoteo ha Tito, oikuaágui ikatuha ojerovia hesekuéra. Katuete ningo pe traváho ojapóva koʼã ermáno tuichaiterei oipytyvõ Páblope ipyʼaguapyve hag̃ua (Filip. 2:19, 20; Tito 1:1, 4, 5). w20.02 22, 23 párr. 11, 12

Jehová ningo oipota ñaneñeʼẽrendu chupe. Haʼe omerese voi ñaneñeʼẽrendu chupe pórke haʼe hína ñande Apohare, omeʼẽ ñandéve opa mbaʼe ñaikotevẽva jasegi hag̃ua jaikove, ha haʼe hína pe túa iñaranduvéva oĩva. Péro prinsipálmente ñaneñeʼẽrendu Jehovápe jahayhúgui chupe (1 Juan 5:3). Añetehápe Jehová omerese voi ñaneñeʼẽrendu chupe heta mbaʼére, péro haʼe nañandeovligái jajapo hag̃ua upéva. Jehová omeʼẽ ñandéve liverta jadesidi hag̃ua, upévare ovyʼaiterei ñandejeheguiete jadesidíramo ñaneñeʼẽrendutaha chupe jahayhúgui chupe. Tuakuéra ningo oipota ifamília osẽ porã. Upéicha rupi haʼekuéra heʼi ifamíliape mbaʼépa ovale térã ndovaléi ojapo. Umi mitã okumplíramo umi mbaʼe ojeruréva ituakuéra, ohechauka okonfiaha hesekuéra ha orrespetaha ituakuérape. Ha ñande kásope koʼýte iñimportanteve jaikuaa ha ñakumpli umi mandamiénto omeʼẽva ñande Ru yvagapegua. Péicha jahechauka jahayhu ha jarrespetaha Jehovápe, ha añetehápe ou porãiterei ñandéve ñakumplíramo umi mandamiénto (Is. 48:17, 18). Péro umi orrechasáva Jehovápe ha umi imandamientokuéra, tuichaiterei ojeperhudika (Gál. 6:7, 8). w20.02 9, 10 párr. 8, 9

Ojapo haguéicha Abigaíl, ñande avei tekotevẽ ñandepyʼaguasu ñañeʼẽ hag̃ua peteĩ ermánope jahecháramo ojapoha hína peteĩ mbaʼe ikatúva ogueraha vai chupe (Sal. 141:5). Ñande jahechauka vaʼerã japororrespetaha, péro avei ñandepyʼaguasuha. Mborayhúpe ñameʼẽramo peteĩ konsého pe persóna oikotevẽvape, jahechauka hína ñande haʼeha amígo tee (Prov. 27:17). Koʼýte ansianokuéra ipyʼaguasu vaʼerã oñeʼẽ hag̃ua kongregasiónpe umi oñepyrũvape oho tape vaíre (Gál. 6:1). Umi ansiáno iñumílde ha ohechakuaa haʼekuéra iñimperfektoha avei, upéicha rupi sapyʼánte ikatu oikotevẽ álgien oakonseha chupekuéra. Péro haʼekuéra ndohejái upéva ojoko chupekuéra oakonseha hag̃ua umi oikotevẽvape (2 Tim. 4:2; Tito 1:9). Omeʼẽ jave konsého, umi ansiáno oñehaʼã oñeʼẽkuaa ha ojapo upéva pyʼaguapýpe porãnte. Haʼekuéra ningo ohayhu umi iñermánope, ha ohayhu rupi oipytyvõ chupekuéra (Prov. 13:24). Umi ansiáno ningo omombaʼe Jehovápe, ha upéva hína pe iñimportantevéva chupekuéra g̃uarã, upévare odefende hikuái umi mandamiénto ha léi haʼe omeʼẽva, ha oprotehe pe kongregasión umi mbaʼe ikatúvagui operhudika chupe (Hech. 20:28). w20.03 20 párr. 8, 9

Jehová ombokatupyry Moiséspe oiko hag̃ua chugui peteĩ livertadór, ha péicha Israel osẽ Egíptogui. ¿Péro arakaʼépa Jehová oipuru chupe? Moisés ningo opensa kuri oĩmaha preparádo, pórke chupe “oñemeʼẽ vaʼekue pe edukasión iporãvéva oĩva Egíptope” (Hech. 7:22-25). ¿Oipurúpa Jehová upérõ Moiséspe? Nahániri. Ñandejára oipuru Moiséspe omoldea rire chupe, oipytyvõ rire chupe iñumílde ha imánso hag̃ua (Hech. 7:30, 34-36). Jehová ombopyʼaguasu Moiséspe oñeʼẽ hag̃ua pe governánte ipoderosoitéva oĩvandi Egíptope (Éx. 9:13-19). Jahechaháicha Jehová oipuru umi oñehaʼãvape okopia umi kualida haʼe orekóva ha umi ojeroviávape hese. Ymaiterei guivéma Jehová ojevale isiervokuérare heta hendáicha. ¿Mbaʼéichapa haʼe ojevaléta nderehe? Upéva odepende avei nderehe, ¿mbaʼépa reĩ dispuésto rejapóvo Jehovápe g̃uarã? (Col. 1:29). Rehejáramo haʼe ojevale nderehe, haʼe ikatu ndepuru repredika kyreʼỹ hag̃ua, reporomboʼe porã hag̃ua ha rekonsola hag̃ua ótrope. Haʼe ikatu avei nembokatupyry oiko hag̃ua ndehegui peteĩ travahadór ivaléva, peteĩ amígo ontendéva hapichápe térã oimeraẽ mbaʼe tekotevẽva okumpli hag̃ua ivolunta. w19.10 21 párr. 5; 25 párr. 14

Umi amígo teete ñanepytyvõ ñandefiél hag̃ua Jehovápe. ¿Mbaʼéichapa ñakonsegikuaa peichagua amígo? Ñande voi ñandekalida vaʼerã ñande rapichakuérandi (Mat. 7:12). Por ehémplo, la Biblia ñanemokyreʼỹ jajapo hag̃ua iporãva ótro rehehápe, prinsipálmente ‘umi oikotevẽva’ rehehápe (Efes. 4:28). Ñañehaʼãmbaitéramo ñaipytyvõ ótrope, jarekovéta oportunida javyʼa hag̃ua (Hech. 20:35). Ñane amigokuéra oĩta ñande ykére jahasa jave umi situasión ijetuʼúva, ha ñanepytyvõta jasegi hag̃ua ñandepyʼaguapy. Elihú ningo ohendu vaʼekue Jóbpe omombeʼúrõ guare chupe umi provlemaita ohasáva. Péicha avei ñane amigokuéra ojapysaka porã ñanderehe ñamombeʼu jave chupekuéra mbaʼéichapa ñañeñandu (Job 32:4). Ñande ningo nañahaʼarõi vaʼerã ñane amigokuéra odesidi ñanderehe, péro iporãta ñahendúramo umi konsého omeʼẽva ñandéve la Biblia rupive (Prov. 15:22). Rréi David iñumílde rupi oasepta vaʼekue iñamigokuéra oipytyvõséramo guare chupe. Ñande avei ndovaléi ñandeorgullóso ha jaasepta vaʼerã ñane amigokuéra ñanepytyvõséramo ñaikotevẽ jave (2 Sam. 17:27-29). Peichagua amígo ningo haʼe peteĩ rregálo oúva Jehovágui (Sant. 1:17). w19.04 11 párr. 12; 12 párr. 14, 15