Febrero

Jaikuaa porãvékena ñane ermáno ha ermanakuérape. Ñañemongeta hendivekuéra oñepyrũ mboyve ha opa rire umi rreunión, ñasẽ hendivekuéra predikasiónpe, ha ikatúma guive ñainvita chupekuéra okaru hag̃ua ñanendive. Jajapóramo upéicha, ikatu hína ñañesorprende, por ehémplo jahechakuaáta peteĩ ermána ñaimoʼã vaʼekue ijayha añetehápe hiʼotĩnteha, peteĩ ermáno ipláta hetáva naimaterialistaiha síno ipojeraitereiha, ha peteĩ túa térã sy pyʼỹinte og̃uahẽva jepi ifamiliakuéra reheve tárde rreunionhápe orekoha hógape peteĩ oñemoĩva hese (Job 6:29). Péro ñañatende vaʼerã avei ani hag̃ua ‘ñañentremete ótro ojapóvare’ (1 Tim. 5:13). Upéicharõ jepe, iporã jaikuaave ñane ermáno ha ermanakuérape ha mbaʼépa ohasa hikuái. Upéva ñanepytyvõta ñantende porãve hag̃ua chupekuéra. Sapyʼánte oĩ ermáno térã ermána ñanemorrenegaʼíva jepi, péro jaikuaáramo mbaʼépa ohasa vaʼekue ifasilvéta ñandéve ñañemoĩ hag̃ua ilugárpe. Sapyʼánte ningo ndahaʼéi la ifasilpáva jaikuaa porãve hag̃ua ñane ermáno ha ermanakuérape. Péro jajapóramo la Biblia heʼíva ha ñañehaʼã japorohayhu ñane korasõ mbytete guive, jasegíta hína Jehová ehémplo, pórke haʼe ohayhu ‘opaichagua persónape’ (1 Tim. 2:3, 4; 2 Cor. 6:11-13). w20.04 16, 17 párr. 10-12

Pe pyhare Jesús omano mboyve, haʼe omomanduʼa vaʼekue idisipulokuérape ojoayhu vaʼerãha. Haʼe ningo oikuaa vaʼekue péicha jajoayhúramo, ñaimetaha unído ha ñaaguantataha ko múndo ndaijaʼéi jave ñanderehe. Jahechamína kongregasión de Tesalónica ehémplo. Umi ermáno upepeguápe ojepersegi vaʼekue oñepyrũ guive pe kongregasión. Upéicharõ jepe, koʼã kristiáno omoĩ ehémplo porã, pórke osegi vaʼekue ifiél ha ojoayhu (1 Tes. 1:3, 6, 7). Pablo omokyreʼỹ vaʼekue chupekuéra ‘osegi hag̃ua ojoayhuve’ (1 Tes. 4:9, 10). Upéicha ojoayhúramo, haʼekuéra okonsoláta kuri umi oñedeprimívape ha oipytyvõta umi ikangývape (1 Tes. 5:14). Ha jaikuaa osegi hague hikuái Pablo konsého, pórke pe segunda kárta omondo vaʼekuépe chupekuéra un áño haguépe, Pablo heʼíma hesekuéra ojoayhuetereiveha hikuái (2 Tes. 1:3-5). Péicha ojoayhu rupi, haʼekuéra ikatu vaʼekue oaguanta pe persekusión ha hetave mbaʼe ijetuʼúva. w21.03 22 párr. 11

Ñande ñaganaséramo pe prémio, térã pe vída etérna, jasegi vaʼerã pe tape Jesús oheja vaʼekue ñandéve (Hech. 20:24; 1 Ped. 2:21). Péro Satanás ha umi osegíva iñehémplo ndoipotái jaiko kristiánoicha, haʼekuéra oipota jajapo hendivekuéra umi mbaʼe vaiete (1 Ped. 4:4). Haʼekuéra oñembohory ñanderehe jasegi haguére pe tape Jesús oheja vaʼekue, ha heʼi guaʼu haʼekuéra oiko lája iporãveha, pórke ojapo hikuái ojaposéva. Péro upéva japu (2 Ped. 2:19). ¡Ajépa iñimportantete jaiporavo porã mbaʼe tapérupipa jaháta! Satanás ningo ndoipotái jasegi pe tape ipoʼívarupi, upe “oporogueraháva jeikove opaveʼỹvape”, upéva rangue haʼe oipota jaha pe tape tuichávarupi, upe ohohápe la majória la hénte oĩva ko múndope. Upe tape ningo ifasilve voi ojesegi hag̃ua, péro ‘oporogueraha hína ñehundípe’ (Mat. 7:13, 14). Upévare jasegi hag̃ua pe tape iporãvarupi ha ani hag̃ua japia chugui, jajerovia vaʼerã Jehováre ha ñaneñeʼẽrendu chupe. w20.04 26 párr. 1; 27 párr. 5, 7

Ramoiténte umi áño ohasa vaʼekuépe, Rusia ha umi iñirũnguéra avei oike “pe Yvy iporãitévape” (Dan. 11:41). ¿Mbaʼéichapa? Áño 2017-pe, ko rréi del nórte oproivi Jehová puévlo rembiapo ha ogueraha kárselpe unos kuánto ñane ermáno ha ermanakuérape. Haʼe oproivi avei ñane puvlikasionkuéra, umíva apytépe pe Traducción del Nuevo Mundo, avei oipeʼa ñandehegui pe Betel oĩva Rúsiape, heta Salón del Reino ha Salón de Asamblea. Oiko rire koʼã mbaʼe, áño 2018-pe pe Kuérpo Governánte heʼi Rusia ha iñirũnguéra rehe haʼeha pe rréi del nórte. Péro Jehová puévlo noñehaʼãmoʼãi okambia umi goviérno ni nopuʼãmoʼãi hesekuéra, opersegíramo jepe chupekuéra. Upéva rangue, haʼekuéra osegi pe konsého oĩva la Bíbliape ha oñemboʼe “enterove umi governántere”, koʼýte oĩramo umi goviérno odesidítava ikatúpa jaadora Jehovápe lívremente térã nahániri. w20.05 14 párr. 9

Tuakuéra, peipotáramo pene família oĩ segúro la Biblia omboʼéva haʼeha pe añetegua, tekotevẽta haʼekueraite voi oreko peteĩ amista iporãva Ñandejárandi, ha oĩ segúro umi mbaʼe omboʼéva la Biblia haʼeha pe añetegua. Peẽ pemboʼeséramo pene famíliape pe añetegua Ñandejáragui, peẽ voi pemoĩ vaʼerã ehémplo pestudia porãvo la Biblia. Peñemotiémpo vaʼerã pejepyʼamongeta hag̃ua umi mbaʼe peaprendévare, upéi ikatútama pemboʼe chupekuéra ojapo hag̃ua avei upéicha. Tekotevẽta avei pemboʼe pene famíliape oipurukuaa hag̃ua umi erramiénta jarekóva jastudia hag̃ua la Biblia, pemboʼeháicha avei pene estudiánte de la Bíbliape. Péicha pejapóramo peipytyvõta chupekuéra ohayhu hag̃ua Jehovápe, ha ojeroviáta hikuái haʼe ñanepytyvõha ñantende hag̃ua la Biblia “pe esklávo de konfiánsa ha iñarandúva” rupive (Mat. 24:45-47). Peẽ ningo napemboʼéi vaʼerã chupekuéra umi mbaʼe ifásilvante la Bíbliagui. Upéva rangue, peipytyvõ vaʼerã pene famíliape omombarete hag̃ua ijerovia pemboʼévo chupekuéra “Ñandejára pensamiénto avave ndoikuaáiva”, ha pejapo vaʼerã upéva asegún mboy áñopa oreko ha mbaʼe kapasidápa oreko hikuái (1 Cor. 2:10). w20.07 11 párr. 10, 12, 13

Koʼág̃arupi hetaiterei yvypóra imperfékto oreko Jehovápe iñamigoitéramo. Haʼekuéra ikatu oreko chupe iñamígoramo ojerovia rupi pe sakrifísio Jesús ojapo vaʼekuére. Ko sakrifísio rupive Jehová mborayhúpe opermiti ñandéve ñañemeʼẽ chupe ha jajevautisa. Jajapóvo koʼã mbaʼe iñimportantetéva ñamoirũma umi millones oñemeʼẽ vaʼekuépe Jehovápe, ojevautisa ha orekómava iñamígoramo pe persóna iñimportantevévape ko univérsope. ¿Mbaʼéichapa ikatu jahechauka ñamombaʼetereiha pe amista jarekóva Ñandejárandi? Abrahán ha Job ningo ifiél vaʼekue Ñandejárape mas de 100 áño, ha haʼekuéraicha avei ñande ñandefiél vaʼerã chupe, tahaʼe haʼéva pe tiémpo jaservímava Jehovápe ko múndo añáme. Daniel ojapo haguéicha, ñamombaʼeve vaʼerã ñande rekovégui pe amista jarekóva Ñandejárandi (Dan. 6:7, 10, 16, 22). Jehová ñanepytyvõ rupi, ikatu ñaaguanta oimeraẽ situasión ijetuʼúva ha jasegi jareko peteĩ amista imbaretéva hendive (Filip. 4:13). w20.05 27 párr. 5, 6

Rréi David ohecha vaʼekue peteĩ tembireko ahénope ojahu jave. Haʼe oikuaa vaʼekue Jehová mandamiénto heʼíva: ‘Ani reipota nembaʼerã nde rapicha rembireko’ (Éx. 20:17). Péro haʼe oiméne osegi raʼe omaña hese ha péicha ipyʼamokõi, pórke oipota pe tembireko ahéno Bat-Sébape, ha avei oipota Ñandejára oguerohory chupe. Jepe David are guivéma ohayhu ha orrespeta Jehovápe, haʼe opensa umi mbaʼe ojaposévarente. Upéicha rupi haʼe ojapo heta mbaʼe ivaíva. Péicha David omotĩ Jehovápe ha avei operhudika vai heta hénte ndorekóivape la kúlpa upe oiko vaʼekuére, umíva apytépe ifamíliape voi (2 Sam. 11:1-5, 14-17; 12:7-12). Jehová okorrehi rire Davídpe, haʼe oĩ porã jey hendive (2 Sam. 12:13; Sal. 51:2-4, 17). David ningo ndahesaráiri vaʼekue umi provléma ha sufrimiénto ogueru vaʼekue ipyʼamokõi haguére. ¿Jehová piko oipytyvõ raʼe Davídpe anive hag̃ua ipyʼamokõi? Si, pórke upéi Ñandejára Ñeʼẽ heʼi David rehe haʼe oservi hague “Ijára Jehovápe ipyʼaite guive” (1 Rey. 11:4; 15:3). w20.06 11 párr. 12, 13

La Biblia ningo ombojoja Jehová mborayhu peteĩ piólare. ¿Mbaʼérepa ojapo upéva? Ñapensami ko ehémplore: Ñañeimahinamína jaʼa hague ýpe pe márpe, umi oláda tuichaicha ha pe y hoʼysãiterei, ha jajahoga potaitéma. Upéi umi oĩva peteĩ kanóape ag̃ui ñandehegui omombo ñandéve peteĩ salvavída. Katuete ningo jaagradesetereíta ojapo haguére upéicha, péro ndahaʼéi upévante la ñaikotevẽtava jajesalva hag̃ua. Tekotevẽta voi ñasẽ pe ýgui. Upévare ñaikotevẽ umi oĩva pe kanóape omombo ñandéve peteĩ pióla ha ñanepytyvõ jajupi hag̃ua pe kanóape. Heʼiháicha pe téxto koestediagua, Jehová mborayhúpe ‘ogueru hendápe’ umi israelita oñemomombyry vaʼekuépe chugui. Koʼág̃arupi Ñandejára ojapose avei upéicha umi opytávare inaktívo, ha umi ojahoʼipávare chupe provléma ha kevránto. Haʼe oipota oikuaa hikuái ohayhuha chupekuéra ha oipytyvõseha chupekuéra oñemoag̃ui jey hag̃ua hese. Jehová ningo ikatu hína ojevale ñanderehe ohechauka hag̃ua pe mborayhu haʼe oñandúva hesekuéra. Iñimportánte ningo siémpre ñamomanduʼa umi inaktívope Jehová ohayhuha chupekuéra, ha ñande avei jahechauka jahayhuha chupekuéra. w20.06 27, 28 párr. 12, 13

Pe disípulo Esteban ojejuka rire, heta kristiáno oho Jerusaléngui ha “oñemosarambipa umi disípulope Judea ha Samaria rehe”, ha tiémpo rire og̃uahẽ voi hikuái Chipre ha Antioquíape (Hech. 7:58–8:1; 11:19). Umi disipulokuéra ningo hetaiterei ohasa asy vaʼekue. Upéicharõ jepe, haʼekuéra kyreʼỹme osegi vaʼekue omombeʼu umi notísia porã umi lugár ohohápe, ha oipytyvõ oñeforma hag̃ua umi kongregasión heta lugár oĩvape Roma poguýpe (1 Ped. 1:1). Péro upéi haʼekuéra ombohováita kuri hetave situasión ijetuʼúva. Por ehémplo, pe áño 50 rupi, pe emperadór rrománo Claudio omanda enterove judío osẽ vaʼerãha Rómagui. Upévare umi judío oiko vaʼekuégui kristiáno ohejámante vaʼerã hóga ha ova ótro hendápe (Hech. 18:1-3). Áño 61 rupi, apóstol Pablo oskrivi mbaʼépa oiko vaʼekue umi kristianokuérare. Omombeʼu chupekuéra ojejaʼo ha ojetrata vai hague enterove renondépe, ojegueraha hague préso ha ojepeʼapa hague chuguikuéra ikosakuéra (Heb. 10:32-34). Ha entérore oikoháicha, oĩ vaʼekue avei umi kristiáno imboriahúva ha hasykatúva (Rom. 15:26; Filip. 2:25-27). w21.02 26, 27 párr. 2-4

Ñañehaʼãmbaitéramo ñamombarete ñande jerovia, Satanás ha umi oapojáva chupe, ni mbaʼevéicharõ ndaikatumoʼãi ñandejoko anive hag̃ua jaiko pe añetegua rapére (2 Juan 8, 9). Ñande ñahaʼarõnte vaʼerã voi ko múndo ndaijaʼéi ñanderehe (1 Juan 3:13). Juan ñanemomanduʼa ‘ko múndo kompletoite oĩha pe aña poguýpe’ (1 Juan 5:19). Amás día hiʼag̃uive ko múndo oñehundi hag̃ua, upévare Satanás orrenegaitereive oikóvo. Haʼe ningo ndahaʼéi ojevalénteva pe tekovaíre, térã umi apóstatare ñanemoñuhã hag̃ua. Haʼe oipuru avei umi persekusión imbaretetereíva ñandeataka hag̃ua derechoite. Satanás oikuaa saʼipaitemaha pe tiémpo hembýva chupe, ha ojapo hína opa ikatúva ojoko hag̃ua pe predikasión ha ohundi hag̃ua ñande jerovia. Upévare nañanesorprendéi ojeproivi haguére ñane rembiapo unos kuánto paíspe, tahaʼe en párte térã kompletoite voi. Upéicharõ jepe, ñane ermanokuéra oĩva umi paíspe oaguanta hína upe situasión. Haʼekuéra ohechauka porã tahaʼe haʼéva umi atáke Satanás opoíva ñane kóntrape, ñande ikatuha jasegi ñandefiél Jehovápe. w20.07 24 párr. 12, 13

Jehová oipota vaʼekue yvyporakuéra oiko pára siémpre ko yvy ape ári, pe lugár porãite haʼe okrea vaʼekuépe. Péro Adán ha Eva opekárõ guare Jehová renondépe, ndaikatuvéima vaʼekue oiko pára siémpre. Tiémpo rire, haʼekuéra ha enterove ifamiliare omanóta kuri (Rom. 5:12). ¿Mbaʼépa Jehová ojapo rakaʼe? Upepete haʼe heʼíma mbaʼéichapa orreskatáta yvyporakuérape (Gén. 3:15). Jehová odesidi omeʼẽtaha Itaʼýra Jesúspe sakrifísioramo, oguenohẽ hag̃ua pekádo ha ñemano poguýgui Adán ha Eva familiarépe. Péicha káda persóna ikatúma odesidi oservítapa chupe ha orresivi vída etérna (Juan 3:16; 1 Cor. 15:21, 22). Jehová omoingove jey vove hetaiterei héntepe Itaʼýra rupive, ikatu jaʼe ndahaʼemoʼãiha ojojapa oñemoingove jeýtava chupekuéra. ¿Mbaʼérepa? Pórke derrepentete oĩramo hetaitereive hénte ko yvy ape ári, ikatu oiko sarambi. Ha Jehová ningo ndojapói mbaʼeve sarambikuépe. Haʼe oikuaa oñeorganisa porã vaʼerãha entéro mbaʼe ikatu hag̃uáicha ojeiko pyʼaguapýpe (1 Cor. 14:33). w20.08 14 párr. 3; 15 párr. 5

Pe estudiánte ontende vaʼerã ñande ñaipytyvõseha chupe oiko hag̃ua chugui testígo de Jehová. Peteĩ estudiánte ojevautisaséva ojapo vaʼerã heta mbaʼe ikatu hag̃uáicha ojevautisa. Primeroite voi, haʼe oikuaa ha ohayhu vaʼerã Jehovápe ha ojerovia hese (Juan 3:16; 17:3). Oiko vaʼerã chugui Jehová amígo ha avei umi ermanokuéra kongregasionpegua amígo (Heb. 10:24, 25; Sant. 4:8). Mbeguekatúpe pe estudiánte ombyasy vaʼerã umi mbaʼe vai ojapo vaʼekue ha ndojapovéima (Hech. 3:19). Avei omombeʼu vaʼerã ótrope umi mbaʼe koʼág̃a ogueroviáva (2 Cor. 4:13). Upéi haʼe oñemeʼẽ vaʼerã Jehovápe ha ohechauka ojapóma hague upéva ojevautisávo (1 Ped. 3:21; 4:2). ¡Ajépa enterove javyʼaiterei upe díape! Pe estudiánte ojapo vove umi mbaʼe tekotevẽva ojevautisa hag̃ua, jasegi vaʼerã jafelisita chupe, ha kontinuadoite ñamokyreʼỹ chupe osegi hag̃ua ojapo koʼã mbaʼe. w20.10 18 párr. 12, 13

Nde reñekomparáramo ótrore ikatu hína eñepyrũ epensa nde nandedeprovechoiha voi kongregasiónpe. Oĩ jepi umi ermáno ivaléva oporomboʼe hag̃ua, oorganisakuaáva heta mbaʼe, térã ivaléva okonsola ha omokyreʼỹ hag̃ua ótrope. Ha ikatu voi repensa nde nandevaleiha haʼekuéraicha, ha ndaikatumoʼãiha rejapo umi mbaʼe haʼekuéra ojapóva. Upéva ningo ohechauka nde neumildeha ha errekonoseha umi mbaʼe ndaikatúiva rejapo (Filip. 2:3). Péro eñatendékena, nde reikóramo reñekompara umi ivaletereívare, katuete reñedesanimáta, ha ikatu hína reñandu ndereguerekoieteha voi peteĩ lugár kongregasiónpe, apóstol Pablo heʼi haguéicha. Síglo primérope espíritu sánto rupive Jehová omeʼẽ vaʼekue unos kuánto kristiánope peteĩ avilida ojapo hag̃ua peteĩ mbaʼe, péro naentéroipe oñemeʼẽ vaʼekue la mísma avilida (1 Cor. 12:4-11). Upéicharõ jepe káda kristiáno ivaliosoiterei vaʼekue. Koʼág̃arupi ñande ndajarekovéima umi avilida haʼekuéra orresivi vaʼekue espíritu sánto rupive. Péro koʼag̃aite peve enterove ñandevaliosoiterei Jehovápe g̃uarã ndajarekóiramo jepe enterove la mísma avilida. w20.08 23 párr. 13-15

Rejerure jave Jehovápe tanembopyʼaguasu, haʼe okontestáta ndéve umi ne ñemboʼe ha núnka nanderejareimoʼãi (Hech. 4:29, 31). Haʼe siémpre oĩ nde ykére nepytyvõ hag̃ua. Epensa mbaʼéichapa haʼe nepytyvõma rehasárõ guare umi situasión ijetuʼúva, ha nemombarete ikatu hag̃uáicha rekambia reiko lája. Haʼe ningo odirihíma vaʼekue ipuévlope ohasa hag̃ua pe Mar Rojo, upéicharõ haʼe ikatúta avei nepytyvõ oiko hag̃ua ndehegui Cristo disípulo (Éx. 14:13). Nde ikatu rejerovia Jehováre pe salmísta heʼiháicha pe téxto koestediaguápe. Jehová ningo ikatu avei oipytyvõ umi puvlikadór pyahúpe ‘ipyʼaguasu hag̃ua’. Jahechamína avei peteĩ ermána hérava Tomoyo rembiasakue. Haʼe oñepyrũrõ guare opredika ogahárupi, pe primer ogajára oñatende vaʼekue hese, osapukái chupe: “¡Ndaikuaaséi mbaʼeve testígo de Jehovágui!”, ha omboty hováre pe okẽ. Tomoyo opyta rangue okyhyje, pyʼaguasúpe heʼi pe iñirũme: “¿Nde piko ehendu la heʼíva?, haʼeʼỹre mbaʼeve haʼe oikuaáma che haʼeha testígo de Jehová. ¡Avyʼaiterei ningo!”. Tomóyogui koʼág̃a oiko prekursóra rregulár. w20.09 6 párr. 13, 14

Asá heʼi vaʼekue umi héntepe Jehová ‘omombytuʼu hague chupekuéra umi iñenemigokuéra oĩvagui ijerére’ (2 Crón. 14:6, 7). Péro Asá nopensái vaʼekue pe tiémpo oikohápe hikuái pyʼaguapýpe opytánte vaʼerãha hikuái ojekuʼako. Upéva rangue, heʼi oñemopuʼã hag̃ua umi siuda, umi murálla, umi tórre ha umi okẽ guasu. Haʼe heʼi umi Judaguápe: “Ñane retã oĩ gueteri ñande poguýpe”. ¿Mbaʼépa heʼise rakaʼe Asá? Haʼekuéra ikatuha oviaha lívremente pe yvy Ñandejára omeʼẽ vaʼekuépe chupekuéra, ha ojapo umi konstruksión, ndaipóri rupi umi enemígo oñemoĩ vaʼerã hesekuéra. Haʼe omokyreʼỹ umi héntepe oaprovecha hag̃ua pe tiémpo oikohápe hikuái pyʼaguapýpe. Asá oaprovecha vaʼekue avei pe tiémpo oikohápe hikuái pyʼaguapýpe omombarete hag̃ua ijehérsito (2 Crón. 14:8). ¿Heʼisépa upéva haʼe ndojeroviái hague Jehováre? Nahániri. Upéva rangue, Asá oikuaa vaʼekue haʼe rupi rréi orekoha pe rresponsavilida opreparávo umi héntepe ikatu hag̃uáicha ombohovái umi provléma ikatúva ohasa hikuái amo gotyove. Asá oikuaa vaʼekue pe pyʼaguapy Judá orekóva ikatuha opa, ha upeichaite oiko vaʼekue. w20.09 15 párr. 4, 5

Peteĩ ansiáno ojepyʼapy rupi ikatu omoĩ umi rrégla haʼe oimoʼãva oprotehetaha ermanokuérape. Péro pe autorida orekóva umi ansiáno tuicha idiferénte pe autorida orekóvagui umi omoakãva hogapy. Por ehémplo, Jehová oasigna ansianokuérape oporohusga hag̃ua, ha omeʼẽ chupekuéra pe autorida omosẽ hag̃ua kongregasióngui umi pekadór noñarrepentírivape (1 Cor. 5:11-13). Péro Jehová omeʼẽ umi omoakãvape hogapy siérta autorida nomeʼẽiva umi ansianokuérape. Por ehémplo, omeʼẽ chupekuéra autorida omoĩ hag̃ua umi rrégla ifamíliape g̃uarã, ha ojasegura hag̃ua oñekumpliha umíva (Rom. 7:2). Por ehémplo, peteĩ omoakãva hogapy oreko derécho odesidívo mbaʼe órapa pyharekue og̃uahẽ vaʼerã ifamiliakuéra hógape. Ha oreko avei pe autorida okorrehi hag̃ua ifamiliakuérape nokumplíri jave upe rrégla (Efes. 6:1). Jaikuaaháicha, peteĩ túa oporohayhúva oñemongeta raẽta hembirekóndi omoĩ mboyve umi rrégla hogapýpe, pórke haʼekuéra “peteĩntema” hína (Mat. 19:6). w21.02 16-18 párr. 10-13

¿Mbaʼérepa avei ikatu jaʼe umi enseñánsa oĩva la Bíbliape ivaliosoitereiha? Pórke Jehová oikuaauka umíva umi iñumíldeva ha ‘ipyʼaporãvape’ añoite (Hech. 13:48). Umi iñumíldeva oguerovia Jehová ojevaleha ‘pe esklávo de konfiánsa ha iñarandúvare’, ñanemboʼe hag̃ua ko tiémpope umi enseñánsa oĩva la Bíbliape (Mat. 11:25; 24:45). Ñande ningo ndaikatúi ñantende la Biblia ñandejehegui reínte, ha ndaipóri hína ótra kósa iporãvéva koʼã enseñánsagui (Prov. 3:13, 15). Jehová omeʼẽ avei ñandéve pe priviléhio ñamboʼévo ótrope mávapa añetehápe haʼe ha mbaʼépa ivolunta (Mat. 24:14). Umi notísia porã jaikuaaukáva ningo ivaliosoiterei, pórke oipytyvõ umi héntepe oĩ hag̃ua Jehová famíliape, ha omeʼẽ chupekuéra oportunida oikove hag̃ua pára siémpre (1 Tim. 4:16). Oiméramo japredika heta térã saʼi, lomímonte ñaipytyvõ hína pe traváho iñimportantevéva ojejapóvape hína ko tiémpope (1 Tim. 2:3, 4). ¡Ajépa tuichaite priviléhio jaiko Ñandejára ajudánteramo! (1 Cor. 3:9). w20.09 27 párr. 4, 5

Apóstol Pablo oviahárõ guare Rómape, Jehová pyʼỹinte ojevale vaʼekue umi ermáno ha ermanakuérare oipytyvõ hag̃ua chupe. Por ehémplo, Aristarco ha Lucas haʼe vaʼekue mokõi Pablo amígo ifiélva, ha haʼekuéra odesidi vaʼekue oviaha hendive Rómape. La Biblia ndeʼíri Jesús opromete hague Aristarco ha Lúcaspe og̃uahẽ porãtaha hikuái Rómape. Upéicharõ jepe, haʼekuéra naiprovlémai vaʼekue oapeligra hag̃ua hekove oipytyvõ hag̃ua Páblope. Upéi ohokuévontema, pe torménta aja oikuaa hikuái nomanomoʼãiha. Haʼekuéra og̃uahẽrõ guare pe siuda de Sidónpe, Julio oheja vaʼekue Páblope “oho iñamigokuéra rendápe ha péicha oñangareko hag̃ua hese hikuái” (Hech. 27:1-3). Upe rire, pe siuda de Puteólipe, Pablo ha iñirũnguéra otopa ermanokuérare, ha koʼã ermáno ‘ojerure asy chupekuéra opyta hag̃ua hendivekuéra 7 día’. Umi ermáno koʼã lugarpegua oñangareko aja Pablo ha iñirũnguérare, Pablo oiméne omombeʼu koʼã ermánope umi mbaʼe ohasa vaʼekue hikuái, ha péicha omokyreʼỹ chupekuéra (ekompara Hechos 15:2, 3 heʼívare). w20.11 15, 16 párr. 15-17

Ñande tuakuéra jahechauka vaʼerã ñane familiakuérape jahayhuha Jehovápe ñande pyʼaite guive, umi mbaʼe jaʼe ha jajapóva rupive. Jahechakuaa vaʼerã ñaipytyvõramo ñane famíliape ohayhu hag̃ua Jehovápe, ñameʼẽha hína chupekuéra pe rregálo iporãvéva. Ha ñamboʼéramo chupekuéra ojepokuaa hag̃ua ostudia, oñemboʼe ha opredika, umíva haʼéta hína umi kostúmbre iporãvéva ikatúva oreko hikuái (1 Tim. 6:6). Jaikuaa ningo avei ñamantene vaʼerãha ñane famíliape ha ñameʼẽ chupekuéra umi mbaʼe oikotevẽva (1 Tim. 5:8). Péro ñanemanduʼa vaʼerã ndahaʼeiha pe pláta térã umi mbaʼerepy la oipytyvõtava chupekuéra ojesalva hag̃ua, ág̃a Satanás múndo oñehundi vove ha oike hag̃ua Ñandejára múndo pyahúpe, síno pe amista iporãitéva orekóva Jehovándi (Ezeq. 7:19). ¡Ajépa javyʼaite jahechávo oĩha hetaite tuakuéra kristiáno oñehaʼãva hína oipytyvõ ifamiliakuérape oñemoag̃ui hag̃ua Jehováre! Umi mitã okakuaáva peichagua famíliape, tuicha rire pyʼỹinte osegi ojapo umi mbaʼe porã oaprende vaʼekue, ha ni michĩmi nombyasýi ojapo haguére upéva (Prov. 10:22). w20.10 28, 29 párr. 10, 11

Apóstol Pedro peteĩ jey ojapura vaʼekue heʼi hag̃ua mbaʼépa la opensáva. Upéicha rupi, sapyʼánte haʼe ombyasy umi mbaʼe heʼi térã ojapo vaʼekue opensaʼỹre. Upévare Jesús heʼírõ guare ijapostolkuérape haʼe ohasa asy ha omanotaha, Pedro ojaʼo chupe heʼívo pe jatopáva pe téxto koestediaguápe (Mat. 16:21-23). Péro Jesús okorrehi Pédrope. Upéi peteĩ hénte aty oúrõ guare ojagarra Jesúspe, Pedro ojapuraiterei ha onambiʼo pe súmo saserdóte esklávope (Juan 18:10, 11). Ha Jesús okorrehi jey Pédrope. Avei Pedro oñemombaʼeguasu heʼívo umi ótro apóstol ikatuneha oheja Jesúspe, péro haʼe ni núnka ndojapomoʼãiha upéva (Mat. 26:33). Upéicharõ jepe, Pedro naimbaretéi kuri upe haʼe oimoʼã haguéicha. Upéi upe pyharépe haʼe okyhyjeterei ha onega Jesúspe 3 vése. Upévare Pedro oñedesanimaiterei ha “osẽ okápe hasẽ soro” (Mat. 26:69-75). Pedro oiméne oñeporandu raʼe: “¿Sera ke Jesús algún día cheperdonáne?”. Péro Pedro ndahaʼéi vaʼekue oñedesanimaitereíva, ha upévare ndoservivéiva Jehovápe. Haʼe ou jey rire osegi oservi Jehovápe umi ótro apóstol ndive (Juan 21:1-3; Hech. 1:15, 16). w20.12 20, 21 párr. 17, 18

Peteĩ omoakãva hogapy ikatu ohechauka iñumildeha heta hendáicha. Por ehémplo haʼe nohaʼarõi perfeksión hembireko ni ifamiliakuéragui. Haʼe ohendu la hembireko ha ifamiliakuéra heʼíva ha oreko enkuénta, jepe haʼe noĩri de akuérdo hendivekuéra. Peteĩ ména iñumíldeva naiprovlémai avei ojapo hag̃ua umi tembiapo ogapypegua, umi hénte oikóva ikomunidápe opensáramo jepe upéva haʼeha kuña rembiapo. Upéva sapyʼánte ikatu ijetuʼu hína. ¿Mbaʼérepa? Peteĩ ermána hérava Rachel heʼi: “Che ajuhágui ningo peteĩ ména oipytyvõramo hembirekópe ojohéi hag̃ua tembiporu térã omopotĩ hag̃ua pe óga, ivesíno ha iparientekuéra opensáta hese nomandaiha hógape. Haʼekuéra heʼíta haʼe ndaikatuiha odomina hembirekópe”. Oiméramo upéicha oñepensa pe lugár nde reikohápe, nemanduʼákena Jesús ombojepyhéi hague idisipulokuérape, jepe umi héntepe g̃uarã upéva haʼe vaʼekue peteĩ esklávo rembiapo. Peteĩ omoakã porãva hogapy ndoikói ojepyʼapy mbaʼépa opensáta hese umi ótro, upéva rangue chupe g̃uarã iñimportanteve omoñeñandu porã hembireko ha ifamíliape. w21.02 2 párr. 3; 4 párr. 11

Ñanemanduʼa umi mbaʼe porã jahasa vaʼekuére haʼe peteĩ rregálo oúva Jehovágui, péro iporãramo jepe umi mbaʼe jahasa vaʼekue, umi mbaʼe ñaneraʼarõva pe múndo pyahúpe iporãitevétantema hína. Sapyʼánte ikatu oĩ ñanembopochýva, péro jadesidi jave ñaporoperdona, ikatútama jajesareko pe servísio ñameʼẽvare Jehovápe koʼág̃a. Ñañeñandu vaietereíramo umi mbaʼe jajapo vaʼekuére yma ndajavyʼamoʼãi jaservívo Jehovápe. Péro ojapo haguéicha apóstol Pablo, ñande jaguerovia vaʼerã Jehová ñaneperdonáma hague (1 Tim. 1:12-15). Ñande ningo jareko la esperánsa jaikóvo pára siémpre, ha jaiko vove Ñandejára múndo pyahúpe nañanemanduʼamoʼãvéima mbaʼevete ñanemoñeñandu vai vaʼekuére. Oñeʼẽvo upe tiémpore la Biblia heʼi: “Avave naimanduʼamoʼãi umi mbaʼe oiko vaʼekuére yma” (Is. 65:17). Ñapensamíntena: Jaservi aja Jehovápe, heta oĩ ñande apytépe ijedámava ohóvo, péro pe múndo pyahúpe enterovete ñanemitã jeýta (Job 33:25). Upévare jajedesidíkena ndajaikomoʼãiha ñapensa meme yma guarére. Upéva rangue jajesarekóta pe múndo pyahúre, ha koʼág̃a jajapóta ikatumíva entéro ñaime hag̃ua upépe. w20.11 24 párr. 4; 29 párr. 18, 19

¿Mbaʼépa ñaneraʼarõ hína amo gotyove? Pe jehasa asy guasu aja, Jehová ojapóta mokõi mbaʼe ijojahaʼỹva ñandesalva hag̃ua. Primero, haʼe osalváta isiervokuéra ifiélvape ág̃a ohundika vove umi governantekuérape Babilonia Guasu, orrepresentáva kompletoite umi rrelihión fálsape (Apoc. 17:16-18; 18:2, 4). Segundo, haʼe osalváta ipuévlope ág̃a ohundi vove Armagedónpe pe párte hembýva Satanás múndogui (Apoc. 16:14, 16). Ñande jasegíramo ñañemoag̃ui Jehováre, Satanás ndaikatumoʼãi ojapo ñanderehe mbaʼeve ndorekomoʼãiva solusión. Jaʼe porãsérõ g̃uarã, Satanás hína pe oñehundietétava (Rom. 16:20). Upévare ñamoĩkena ñandejehe pe armadúra kompletoite, ha ani jaipeʼa ñandejehegui. Aníkena ñañehaʼã ñañorairõ ñaneaño Satanás ha imúndo kóntrape. Ñaipytyvõkena ñane ermáno ha ermanakuérape, ha jasegi pe gía omeʼẽva Jehová. Jajapóramo upéicha, ikatu ñaime segúro ñande Ru yvagapegua ñanderayhuetéva ñanemombarete ha ñandeprotehetaha (Is. 41:10). w21.03 30 párr. 16, 17

¿Mbaʼéichapa ikatu jahechauka jajeroviaha Jehováre? Jasegívo pe gía haʼe omeʼẽva. La Bíbliape jatopa heta rreláto ohechaukáva iñimportantetereiha jasegi ñaime pyʼaguapýpe ha jajerovia Jehováre. Jastudiakuévo umi rreláto, ñapensa mbaʼépa oipytyvõ vaʼekue Ñandejára siervokuérape osegi hag̃ua oĩ trankílo, oĩrõ guare oñemoĩ mbaretéva ikontrapekuéra. Por ehémplo, pe Trivunál Suprémo Judío omandárõ guare umi apóstolpe anivéma hag̃ua opredika, haʼekuéra ndokyhyjéi. Upéva rangue, pyʼaguasúpe heʼi hikuái: “Ore ningo oreñeʼẽrendu vaʼerã Ñandejárape ore governánteramo, yvypórape rangue” (Hech. 5:29). Umi apóstolpe oñembyepotíramo jepe, haʼekuéra ndopytái vaʼekue oryrýi osusũ okyhyjetereígui. ¿Mbaʼérepa? Pórke oikuaa vaʼekue hikuái Jehová oĩha hendivekuéra, ha haʼe oguerohoryha chupekuéra. Upévare haʼekuéra osegi opredika umi notísia porã (Hech. 5:40-42). Upéicha avei, pe disípulo Estébanpe ojejuka potaitérõ guare, haʼe oĩ vaʼekue pyʼaguapýpe ha trankiloite. Upéicha rupi “pe hova haʼete voi peteĩ ánhel rova” (Hech. 6:12-15). ¿Mbaʼérepa? Pórke haʼe oĩ vaʼekue segúro Jehová oguerohoryha chupe. w21.01 4 párr. 10, 11

Upéva heʼise haʼekuéra ikonsiénsia potĩha, ha Ñandejára oguerohoryha chupekuéra (Is. 1:18). Haʼekuéra ningo oñemeʼẽma Ñandejárape ha ojevautisáma. Avei ojerovia mbarete hikuái Jesús sakrifísiore, ha oreko peteĩ amista iporãva Jehovándi (Juan 3:36; 1 Ped. 3:21). Upévare haʼekuéra ikatu oñemboʼy Ñandejára tróno renondépe “ha oservi chupe ára ha pyhare” ko yvy ape ári (Apoc. 7:15). Koʼág̃arupi haʼekuéra ikyreʼỹeterei ha ojapo la majór párte pe traváho ojepredika ha ojejapo hag̃ua disípulo. Chupekuéra g̃uarã Ñandejára Rréino iñimportanteve voi opa mbaʼégui (Mat. 6:33; 24:14; 28:19, 20). Pe aty guasu ojesalvátava pe jehasa asy guasúpe oĩ segúro Jehová osegitaha oprotehe chupekuéra, pórke la Biblia heʼi: “Pe oguapýva pe trónope, oñangarekóta hesekuéra”. Umi ótro ovechakuérape hiʼãitereíma ohecha oñekumplívo ko promésa: “Ñandejára omokãmbaitéta umi hénte resay” (Apoc. 21:3, 4). w21.01 16 párr. 9, 10

Ñande javyʼaiterei ñaime haguére Jehová famíliape ha ñañehaʼãmbaite jarrespeta umi Jehová omeʼẽ vaʼekuépe siérta autorida. La Biblia ohechauka Jehová omombaʼeha peteĩchaite kuimbaʼekuéra ha kuñanguérape. Por ehémplo, yma umi apostolkuéra tiémpope Jehová omeʼẽ vaʼekue espíritu sánto umi kuñanguérape omeʼẽháicha avei umi kuimbaʼépe. Upéicha rupi haʼekuéra ikatu vaʼekue ojapo milágro rupive heta mbaʼe ijojahaʼỹva, por ehémplo oñeʼẽ diferénte idiómape (Hech. 2:1-4, 15-18). Kuimbaʼekuérape ha avei kuñanguérape ojeporavo espíritu sánto rupive ogoverna hag̃ua Cristo ndive (Gál. 3:26-29). Mokõivépe Jehová omeʼẽta vída etérna ko yvy ape ári (Apoc. 7:9, 10, 13-15). Ha tahaʼe kuña térã kuimbaʼe oreko pe asignasión opredika ha omboʼévo umi notísia porã (Mat. 28:19, 20). Por ehémplo, pe lívro de Héchospe oñeñeʼẽ peteĩ ermána héravare Priscila. Haʼe ha iména Áquila omyesakã porãve vaʼekue pe añetegua Apólospe, peteĩ kuimbaʼe ijestúdio porãva (Hech. 18:24-26). w21.02 14 párr. 1; 15 párr. 4

Peẽ ansianokuéra pemboʼe ha pemokyreʼỹ vaʼerã umi orekóvape estúdio. Peẽ ningo pereko peteĩ rresponsavilida iñimportantetereíva: Peipytyvõ umi puvlikadórpe opredika ha oporomboʼe porã hag̃ua la Biblia. Peteĩ ermáno otĩramo ojapo hag̃ua ijestúdio penendive, ikatu peẽ voi pejeofrese pedirihi hag̃ua pe estúdio. Ansianokuéra, peẽ tuichaiterei ikatu pemokyreʼỹ umi orekóvape estúdio bíblico ani hag̃ua oñentrega (1 Tes. 5:11). Ha koʼág̃a ñande ndajarekóiramo jepe peteĩ estúdio bíblico, lomímonte ikatu ñaipytyvõ ótrope oprogresa ha ojevautisa hag̃ua. Por ehémplo, ñaipytyvõ hag̃ua pe instruktórpe ijestúdio aja, japrepara porã vaʼerã umi mbaʼe jaʼétava ha ani ñañeʼẽterei. Ñande ikatu ñañamiga umi estudiántere ou vove Salónpe, ha ñamoĩ chupekuéra ehémplo porã. Umi ansianokuéra ikatu omokyreʼỹ umi estudiántepe oñemotiémpovo chupekuéra g̃uarã, ha avei umi orekóvape estúdio omboʼe ha oguerohorývo chupekuéra. Javyʼaiterei ningo ikatu haguére jajapo michĩmi jepe ñaipytyvõ hag̃ua peteĩ persónape ohayhu ha oservi hag̃ua Jehovápe. Ndaipóri voi ótra kósa ñanembovyʼavéva upévagui. w21.03 13 párr. 18, 19

David ningo káda día ohechauka vaʼekue irresponsavleha ha ikatuha oñekonfia hese. Por ehémplo, haʼe imitãrõ guare ombaʼapo jejopy vaʼekue oñangareko hag̃ua itúa ovechakuérare. Upéva upe traváho ipeligróso vaʼekue. Upe rire David omombeʼu vaʼekue rréi Saúlpe: “Che ruvicha, che ningo añangareko che túa ovechakuérare, ha peteĩ díape ou peteĩ león ha ogueraha peteĩ ovecha, ótra vuéltape katu ou peteĩ óso ha ogueraha avei peteĩ ovecha. Péro che amuña umi animálpe ha asalva umi ovechápe” (1 Sam. 17:34, 35). David oikuaa ojeheja hague ikárgope oñangareko hag̃ua umi ovecháre. Peẽ imitãva ningo ikatu pesegi David ehémplo pekumpli porãvo oimeraẽ asignasión oñemeʼẽva peẽme. David imitãramo jepe, oreko vaʼekue peteĩ amista iporãva ha imbaretéva Jehovándi. Upe amista iñimportanteve vaʼekue pe pyʼaguasu, térã pe avilida haʼe orekóvagui ombopu hag̃ua árpa. Davídpe g̃uarã Jehová ndahaʼéi vaʼekue Ijárante, síno haʼe vaʼekue avei iñamigoite. Mitãrusukuéra: Pe iñimportantevéva hína peiko Jehová amigoitéramo. w21.03 3 párr. 4, 5