Marzo

Ñande ndahaʼéi jaipotáva umi hénte ndaijaʼéi ñanderehe. Ndahaʼéi ningo igústova ñandéve oĩ jave ñandepersegíva jaservi haguére Jehovápe. ¿Mbaʼérepa upéicharõ ikatu javyʼa oĩ jave ndaijaʼéiva ñanderehe? Primero, jaikuaágui Ñandejára ñandeguerohoryha hína ñaaguantáramo (1 Ped. 4:13, 14). Segundo, ñande jerovia imbarete ha ovalevéta rupi (1 Ped. 1:7). Ha tercero, oñemeʼẽta rupi ñandéve pe vída etérna, haʼéva peteĩ prémio ijojahaʼỹva (Rom. 2:6, 7). Jesús orresusita riremínte, umi apóstol oñandúma pe vyʼa haʼe oñeʼẽ hague. Haʼekuéra ovyʼaiterei vaʼekue oñembyepoti ha oñemanda rire chupekuéra anivéma hag̃ua opredika. ¿Mbaʼérepa? “Pórke Ñandejára opermiti oñembohasa asy chupekuéra Jesús réra rehehápe” (Hech. 5:40-42). Haʼekuéra ningo okyhyje vaʼekue iñenemigokuéragui, péro ohayhuetereive Jesúspe. Ha ohechauka hikuái upe mborayhu okontinuávo opredika umi notísia porã. Koʼág̃arupi avei heta ñane ermanokuéra osegi oservi fiélmente Jehovápe ombohováiramo jepe heta mbaʼe ijetuʼúva. Haʼekuéra oikuaa Jehová ndahesaraimoʼãiha umi mbaʼe ojapo vaʼekuégui, ha mbaʼéichapa ohayhu héra. w21.03 25 párr. 18, 19

Umi unhído ningo ndahaʼéi onasére orekómava pe esperánsa ohóvo yvágape, síno Ñandejára omoĩ upéva ikorasõmekuéra. Haʼekuéra opensa upe iñesperánsare, oñemboʼe upévare ha hiʼãitereíma chupekuéra orresivi pe iprémio yvágape. Umi unhído ningo ni ndoikuaái mbaʼéichatapa hete térã ipínta ág̃a oho vove yvágape (Filip. 3:20, 21; 1 Juan 3:2). Péro haʼekuéra oĩsetereíma pe lugár otokávape chupekuéra pe Rréinope yvágape. Umi ótro ovechakuéra katu oreko pe esperánsa oikóvo pára siémpre ko yvy ape ári, ha upéva hína peteĩ deséo enterove yvypóra orekóva onasérema voi. Chupekuéra ekapadetereíma og̃uahẽ pe día ikatutahápe ojapo ko yvýgui peteĩ paraíso. Hiʼãitereíma chupekuéra og̃uahẽ pe tiémpo ikatutahápe omopuʼã hogarã, ojapo peteĩ hardín ha oiko chuguikuéra perfékto. Haʼekuéra voi hesãita ha avei umi ifamiliakuéra (Is. 65:21-23). Haʼekuéra ningo oviahaseterei ko múndo tuichakuére ohecha hag̃ua umi montáña, kaʼaguy, umi mar, ha ostudia entéro mbaʼe Jehová okrea vaʼekue. Péro ovyʼaitereive hikuái oikuaávo oñemoag̃uivetaha Jehováre, ha pe amista orekóva hendive amás día imbaretevetaha ohóvo. w21.01 18 párr. 17, 18

Umi babilonio ojagarra ha ohundi rire pe siuda, umi hénte ohecháva Jerusalén heʼi: “Ko lugár ningo nandi vera, ndaipóri yvypóra ni animál, ha oñemeʼẽma umi caldéope” (Jer. 32:43). Oiméne 200 áñorupi Joel oprofetisa rire, Jehová ojevale Jeremías rehe oprofetisa hag̃ua hetave mbaʼe ko atáke oikótavare. Haʼe heʼi umi ojagarráva pe siuda oheka porãtaha ha ojagarrapaitetaha entéro umi israelita hembiapo vaívape. “Jehová heʼi: ‘Ahenoikáta ha ambyatýta heta peskadórpe, ha umíva pendejagarráta. Upe rire ahenoikáta ha ambyatýta heta ohóvape omariska, ha umíva penderekáta ha pendejagarráta umi montañaháre ha kompletoite umi lugár ijyvatehápe, ha avei umi ita guasu kuápe. [...] Akastiga raẽta chupekuéra entéro mbaʼe vai ojapo vaʼekuére ha ipekadokuérare’”. Umi israelita noñarrepentíriva ndaikatumoʼãi kuri okañy ni umi oséanope ni umi kaʼaguýre umi babilonio oúvagui (Jer. 16:16, 18). w20.04 5 párr. 12, 13

Peteĩ moménto iñimportantetereívape, Lot imbegue kuri ojapo hag̃ua Jehová heʼíva. Upévare ñande ikatu ñapensa Lótpe noimportái hague la Jehová heʼíva, térã jaʼe voi hese naiñeʼẽrendúi hague. Upéicharõ jepe, Jehová ndoperdéi la esperánsa hese, síno lomímonte oñehaʼã oipytyvõ chupe ojesalva hag̃ua. “Jehová imbaʼeporã rupi Lot ndive”, umi ánhel ojagarra chupe ha ifamíliape ipógui ha oguenohẽ chupekuéra pe siudágui (Gén. 19:15, 16). Jehová oiméne oiporiahuvereko rakaʼe Lótpe heta mbaʼére. Oiméne Lot okyhyje raʼe umi hénte oikóvagui pe siuda jerére ha upévare ndohejaséi kuri pyaʼe la hóga. Péro oĩ vaʼekue avei heta mbaʼe ikatúva oapeligra chupekuéra. Por ehémplo namombyrýi Sodómagui oĩ vaʼekue umi póso oĩháme vléke, ha Lot oiméne oikuaa rakaʼe mokõi rréi oho hague hoʼa upépe (Gén. 14:8-12). Lot ningo oreko vaʼekue hembireko ha itajyrakuéra, upévare katuete ojepyʼapýne hesekuéra. Avei haʼe irríko vaʼekue ha oiméne hóga porã rakaʼe Sodómape (Gén. 13:5, 6). Péro ni peteĩva umi mbaʼe ndahaʼéi vaʼekue la iñimportantetereíva ojoko hag̃ua Lótpe pono pyaʼe iñeʼẽrendu Jehovápe. Upéicharõ jepe, Jehová ndojesarekói Lot fállare síno ohecha chupe ‘peteĩ kuimbaʼe ihústovaramo’ (2 Ped. 2:7, 8). w20.04 18 párr. 13, 14

Mitãrusukuéra, ikatu ningo heta tiémpo rire ae umi pendekuaáva penemitãite guive orrekonose pekakuaáma hague. Péro ikatu peime segúro Jehová ndojesarekoiha pene píntare, síno ohecha umi kualida porã perekóva. Haʼe pendekuaa porã ha oikuaa avei mbaʼépa ikatu pejapo (1 Sam. 16:7). ¿Mbaʼépa avei ikatu peaprende Davídgui? Pemombarete vaʼerãha pene amista Jehovándi. David ojapo vaʼekue upéva ojesarekóvo umi mbaʼe Jehová okrea vaʼekuére. Haʼe ojepyʼamongeta vaʼekue umívare ohechakuaa hag̃ua mbaʼépa umíva omboʼe chupe Ijapoharégui (Sal. 8:3, 4; 139:14; Rom. 1:20). David ehémplogui ikatu avei peaprende pejerure vaʼerãha Jehovápe pe fuérsa peikotevẽva. Por ehémplo, ¿oĩpa umi pene kompañerokuéra de koléhio oñembohorýva penderehe peẽ haʼe haguére testígo de Jehová? Oiméramo upéicha, peñemboʼe vaʼerã Jehovápe ha pejerure chupe tapenepytyvõ pembohovái hag̃ua ko provléma. Avei, pesegi vaʼerã umi konsého porã petopáva la Bíbliape, ñane puvlikasionkuérape ha umi vidéope. Pehecha jave mbaʼéichapa Jehová penepytyvõ pembohovái hag̃ua peteĩ provléma, pejeroviavéta hese. Ha umi ótro hénte ohechávo pejeroviaha Jehováre, haʼekuéra okonfiáta penderehe. w21.03 4 párr. 7

Umi oñoamigoitéva ningo ovyʼa ikatu jave omombeʼu ojupe umi mbaʼe opensáva ha oñandúva, ha péicha avei jarekóramo Jehovápe ñane amígoramo. Jehová oñeʼẽ ñandéve la Biblia rupive ha oikuaauka ñandéve mbaʼépa haʼe opensa ha oñandu. Ñande ñañeʼẽ chupe ñañemboʼe jave ha ñamombeʼu chupe umi mbaʼe ñapensáva ha ñañandúva ñande pyʼapýpe. Jehová haʼégui ñane amígo ñanderayhuetéva, ndahaʼéi ohendúnteva umi ñane ñemboʼe síno ombohovái voi umíva. Sapyʼánte haʼe pyaʼe ombohovái ñandéve umi ñane ñemboʼe, péro avése ñañemboʼe jey jey vaʼerã peteĩ mbaʼére. Upéicharõ jepe, jaikuaa porã haʼe ombohovaitaha ñandéve itiempoitépe ha iporãveháicha. Jaikuaa avei Ñandejára ombohováiva ñandéve ikatuha idiferénte upe ñahaʼarõvagui, por ehémplo oipeʼaite rangue ñandehegui pe jehasa asy, haʼe ikatu ñanemoarandu ha ñanemombarete ñaaguanta hag̃ua (1 Cor. 10:13). ¿Mbaʼéichapa jaagradesekuaa ikatu haguére ñañemboʼe? Upearã ikatu jasegi ko konsého Ñandejára omeʼẽ vaʼekue ñandéve: “Peñemboʼékena kontinuadoite” (1 Tes. 5:17). w20.05 27, 28 párr. 7, 8

Umi ohaʼãva karréra puku oñatende porã vaʼerã moõitérupipa ohóta ani hag̃ua oñepysanga. Ha hoʼáramo hikuái, pyaʼe opuʼã jey ha osegi odipara. Chupekuéra g̃uarã naiñimportántei mbaʼe rehepa oñepysanga, síno oñekonsentra hikuái omohuʼã hag̃ua pe karréra ha pe prémio oganasévare. Pe karréra ñahaʼãvape ningo ikatu ñañepysanga heta vése, por ehémplo jajavýta umi mbaʼe jaʼe térã jajapóvape. Térã umi ermáno odiparáva ñanendive ikatu avei ojavy ha ñanelastima. Upéva ningo oikótante voi, pórke enterove ñaneimperfékto ha jaha hína el mísmo tape poʼírupi, upe oporogueraháva jeikove opaveʼỹvape. Upévare sapyʼánte ikatu ñañolastimaʼi mimi jepi ha ‘ñañombopochy’ (Col. 3:13). Péro jajesareko rangue upe mbaʼe ñanemoñepysanga vaʼekuére, ñañekonsentra vaʼerã pe prémio oĩvare ñane renonderãme, ha jasegi jadipara. Ha oiméramo ndajaservisevéi Jehovápe ñandepyʼaro térã ñandepochy rupi, upéicharõ ñande nañamohuʼãmoʼãi pe karréra ha nañaganamoʼãi pe prémio. Hiʼarive ñande ikatu jastorva umi ótro oñehaʼãvape odipara pe tape poʼírupi ha ohupytyséva avei pe vída etérna. w20.04 26 párr. 1; 27, 28 párr. 8, 9

Proféta Daniel oñeʼẽ peteĩ estátua tuichaitereívare ojejapóva de diferénte metál. Káda párte orrepresenta peteĩ goviérno tuicha omanda vaʼekue peteĩ lugár oĩháme heta Ñandejára siervokuéra. Koʼã goviérno omanda vaʼekue diferénte tiémpope. Pe estátua py ojejapo vaʼekue iérro ha ñaiʼũgui orrepresenta hína pe último goviérno oĩtavape, haʼéva Gran Bretaña ha Estados Unidos. Upe profesía ohechauka haʼekuéra osegitaha gueteri ogoverna Ñandejára Rréino ohundi vove entéro yvyporakuéra goviérno. Apóstol Juan oñeʼẽ avei umi goviérno omandátavare umi lugár oĩháme Ñandejára puévlo. Juan profesíape oñeñeʼẽ peteĩ animál salváhe 7 iñakãva rehe oñerrepresenta hag̃ua koʼã goviérnope. Ha pe iñakã sieteha orrepresenta Gran Bretaña ha Estados Unídospe. Upe mbaʼe ningo iñimportanteterei, pórke kóva rire ndojeʼéi pe animál salváhere orekovetaha ótro iñakã. Pe iñakã sieteha osegíta gueteri ogoverna ág̃a Jesús ha ijehérsito yvagapegua ohundi vove chupe, ha avei kompletoite pe animál salváhepe (Apoc. 13:1, 2; 17:13, 14). w20.05 14 párr. 11, 12

Ñande jaikuaa Jehová ojapo hague entéro mbaʼe oikovéva, péro koʼã mbaʼe heʼi vaʼekue Juan ñanemomanduʼa pe mborayhu ouha avei Jehovágui. ¡Añetehápe ningo Jehová ñanderayhueterei voi! Ha haʼe ñanderayhu rupi ñande rekove isentído, ñañeñandu segúro ha javyʼa. Ñande kristianokuéra ningo ndaikatúi jaelehínte japorohayhútapa térãpa nahániri. Upéva ningo peteĩ mandamiénto (Mat. 22:37-40). Jaikuaa porãvévo Jehovápe ifásilma ñandéve ñakumpli hag̃ua pe primer mandamiénto. Upéva ningo upéicha, pórke Jehová perfékto, haʼe ojepyʼapy ñanderehe ha ivuéno ñanendive. Péro ikatu hína hasyve ñandéve ñakumpli hag̃ua pe segundo mandamiénto, pórke ñande rapichakuéra apytépe oĩ ñane ermáno ha ermanakuéra, ha haʼekuéra iñimperfékto avei. Upévare sapyʼánte ikatu heʼi térã ojapo umi mbaʼe nañandegustáiva, térã ñanemoñeñandu vaíva. Jehová oikuaa ikatuha ijetuʼu ñandéve ñakumpli hag̃ua upe mandamiénto. Upévare haʼe ojevale vaʼekue unos kuánto isiervokuérare oskrivi hag̃ua la Bíbliape mbaʼérepa jajoayhu vaʼerã, ha mbaʼéichapa ikatu jahechauka upéva. Peteĩva umi oskrivi vaʼekue koʼã mbaʼe haʼe vaʼekue apóstol Juan (1 Juan 3:11, 12). w21.01 8 párr. 1, 2

Oiméramo ramoite guivénte jaservi Jehovápe térã heta tiémporema, lomímonte ñañeporandu vaʼerã: “¿Añehaʼãmbaitépa hína ani hag̃ua aheja Satanás chembopyʼamokõi?”. Por ehémplo, jahecháramo télepe térã Internétpe peteĩ taʼanga ikatúva ñanemoakãraku ñapensa hag̃ua umi mbaʼe tieʼỹre, ¿mbaʼépa jajapo upéicha jave? Ikatu ndahasýi hína jaʼe hag̃ua ñandejupe upe taʼanga térã pelíkula ndahaʼeiha katuete pornografía, ¿péro ikatúnepa Satanás oipuru hína upéva ñanembopyʼamokõi hag̃ua? Pe taʼanga ikatu ñambojoja peteĩ hácha oipurúvare peteĩ kuimbaʼe ombojaʼo hag̃ua peteĩ yvyra. Pe primer ohacheápe ndojapomoʼãi mbaʼeve guasu pe yvyráre, péro upéi osegi oity hese la hiʼácha haimbe asýva ha upépe ombojaʼóma pe yvyra. Upéicha avei umi taʼanga oporomoakãrakúva ojogua pe hácha haimbe asývape. Primerorã haʼetévaicha ndoperhudikamoʼãiva peteĩ persónape, péro umíva ikatu mbeguekatúpe ombopyʼamokõi chupe ha upéicha rupi ou opeka Jehová kóntrape ha naiñeʼẽrenduvéi chupe. Upévare, aníkena jaheja mbaʼeveichagua mbaʼe kyʼa oike ñane korasõme. Jasegíkena jarrespeta ñande pyʼaite guive Jehová réra ha ani ñandepyʼamokõi. w20.06 11, 12 párr. 14, 15

Umi inaktívo oikotevẽ jasegi ñaipytyvõ ha ñamokyreʼỹ chupekuéra. Peteĩ ehémplope Jesús omombeʼu vaʼekue mbaʼéichapa oñeñandu pe taʼýra oho vaʼekue hógagui, ha upéicha avei umi inaktívo ikatu oñeñandu vaieterei ha oikotevẽta heta tiémpo oñeñandu porã jey hag̃ua (Luc. 15:17-24). Umi inaktívo ningo oĩ kuri Satanás múndope, ha upévare oiméne ndorekói hikuái Jehovápe iñamigoitéramo ymave guaréicha. Upévare tekotevẽta ñaipytyvõ chupekuéra omombarete jey hag̃ua ijerovia Jehováre. Pe ehémplo oñeʼẽvape pe ovecha okañy vaʼekuére, Jesús omombeʼu mbaʼéichapa pe pastór ohupi pe ovechápe ijatiʼy ári, ha ogueraha jey chupe pe ovecha atýpe. Pe pastór ningo oñemotiémpoma kuri ha hetáma oiko otopa hag̃ua ijovecha okañy vaʼekuére. Péro haʼe ohechakuaa tekotevẽtaha ohupi ijovechápe ogueraha hag̃ua chupe pe ovecha atýpe, pórke ikangy rupi ijehegui reínte ndaikatumoʼãi ojapo upéva (Luc. 15:4, 5). Sapyʼánte tekotevẽta jaipuru heta tiémpo ha ñañehaʼãmbaite ñaipytyvõ hag̃ua umi inaktívope, ha péicha ikatúta ombohovái peteĩ provléma ojokóva hína chupekuéra oservi jey hag̃ua Jehovápe. Péro Jehová espíritu, Iñeʼẽ la Biblia ha umi puvlikasión omeʼẽva ñandéve iñorganisasión rupive ikatu ñaipytyvõ chupekuéra imbarete jey hag̃ua iñamista Jehovándi. Peteĩ ansiáno ojeruréramo ñandéve jastudia hag̃ua peteĩ inaktívondi, vyʼápe jaasepta vaʼerã upe asignasión. w20.06 28 párr. 14, 15

Ñande ningo jajoayhu vaʼerã jahechauka hag̃ua ñande haʼeha kristiáno teete. Péro tekotevẽ avei ‘jaikuaa porã Ñandejára rembipota ha ñantende porã upéva’ (Filip. 1:9). Pórke ndahaʼéiramo upéicha, ikatu hína jaguerovia “umi japu omboʼéva umi kuimbaʼe oikóva oporombotavy”, umíva apytépe umi apóstata (Efes. 4:14). Pe síglo primérope, heta disípulo ohejárõ guare Jesúspe ha ndosegivéi chupe, apóstol Pedro ohechauka vaʼekue oĩha segúro Jesús ‘ñeʼẽ omeʼẽha jeikove opaveʼỹva’ (Juan 6:67, 68). Upe tiémpope, Pedro nontendepáirõ jepe entéro mbaʼe Jesús omboʼéva, haʼe osegi ifiél Ñandejárape pórke oĩ vaʼekue segúro Jehová ombou hague Jesúspe. Ñande avei ikatu ñamombarete ñande jerovia la Biblia omboʼévare. Jajapóramo upéicha, ñande jerovia osegíta imbarete toiko la oikóva ohasáramo jepe la tiémpo, ha ñaipytyvõta avei ótrope ojerovia mbarete hag̃ua (2 Juan 1, 2). w20.07 8 párr. 2; 13 párr. 18

Ñaipytyvõ hag̃ua ñane ermanokuérape osegi hag̃ua oiko pe añetegua rapére, tekotevẽta jaiporiahuvereko chupekuéra (1 Juan 3:10, 11, 16, 17). Tekotevẽta jajoayhu iporã jave la situasión ha avei oĩ jave provléma. Por ehémplo, ¿oĩpa peteĩ ermáno ihénte manóva ha oikotevẽva konsuélo, térã ñaipytyvõ chupe ótro hendáicha? ¿Jaikuaápa oĩ hague ermáno operdepaite vaʼekue ikosakuéra peteĩ torménta ivaietereívape, ha tekotevẽta ñaipytyvõ chupekuéra omopuʼã jey hag̃ua pe Salón del Reino, térã hogakuéra? Umi mbaʼe jaʼéva rupive ñande jahechauka mbaʼeichaite pevépa jahayhu ha jaiporiahuvereko ñane ermanokuérape, péro iñimportanteveha jahechauka upéva umi mbaʼe jajapóva rupive. Ñande jasegi ñande Ru yvagapegua ehémplo jahechauka jave ojupe jajoayhuha (1 Juan 4:7, 8). Ñañoperdona jave jajapo hína peteĩ mbaʼe iñimportantetereíva jahechauka hag̃ua jajoayhuha. Por ehémplo, oiméramo algúno ñanembopochy raʼe, jahechauka japorohayhuha ñaperdonávo chupe, ha ñañembyesaráivo upe ojapo vaʼekuégui (Col. 3:13). w20.07 24 párr. 14, 15

¿Orekóta piko káda persóna orresusitáva peteĩ omboʼéva chupe la Biblia koʼág̃arupi ojejapoháicha? ¿Oñeasignáta piko chupekuéra peteĩ kongregasiónpe, ha oñemeʼẽta chupekuéra entrenamiénto omboʼe hag̃ua umi ótro oñemoingove jeývape upe rire? Ñahaʼarõtamante jahecha hag̃ua mbaʼépa la oikótava. Péro si jaikuaa Jesucristo ogoverna vove 1.000 áñore, ‘ko yvy henyhẽtaha Jehová konosimiéntogui’ (Is. 11:9). Heta traváho ningo jarekóta umi 1.000 áño aja, péro umíva katuete ñanembovyʼáta. Jesucristo ogoverna vove umi 1.000 áño aja, enterove Jehová siervokuéra osegi vaʼerã okambia ikatu hag̃uáicha haʼe oguerohory chupekuéra. Upévare ñande ñantende porãitereíta umi oñemoingove jeývape, ág̃a ñaipytyvõ vove chupekuéra okambia hag̃ua umi mbaʼe vai ojaposéva ha opensáva, ha oiko hag̃ua Jehová oipotaháicha (1 Ped. 3:8). Umi oñemoingove jeýva ningo ohecháta Jehová puévlo iñumildeha ha ojapoha gueteri umi kámbio Jehová oguerohory hag̃ua chupekuéra, ha oñehaʼãha hína avei ‘ohupyty hag̃ua pe salvasión’, upévare umi orresusitáva oadoraséta avei Jehovápe hendivekuéra (Filip. 2:12). w20.08 16 párr. 6, 7

Jasegíramo apóstol Pablo konsého ha jajesareko umi mbaʼe ñande jajapóvare, ikatu hína ñañepyrũ jahechakuaa jarekoha peteĩ avilida ótro ndorekóiva. Por ehémplo, ikatu oime peteĩ ansiáno ndojapokuaaguasúi diskúrso, péro ivaleterei oipytyvõ hag̃ua la héntepe oiko hag̃ua chuguikuéra Jesús disípulo. Térã ikatu oime ndahaʼéi la iñorganisadoitereíva umi ótro ansiáno oĩvaicha ikongregasiónpe. Péro ikatu oime haʼe hory ha imbaʼeporãiterei, ha umi ermáno ndokyhyjéi oñemboja hag̃ua hendápe ojerure hag̃ua chupe konsého oĩva la Bíbliape. Térã ikatu oime ojekuaa chupe orresivi porã haguére hapichakuérape hógape (Heb. 13:2, 16). Ñande jahechakuaa jave umi avilida jarekóva, javyʼáta umi mbaʼe ikatúvare jajapo kongregasión rehehápe. Ha péicha hasyvéta ñaenvidia hag̃ua umi ermáno orekóvape peteĩ avilida ñande ndajarekóiva. Tahaʼe haʼéva pe lugár jarekóva kongregasiónpe, enterove jasegise vaʼerã ñandekatupyryve ha jajapo porãve ñande servísio. w20.08 24 párr. 16-18

Peteĩ diskúrso iñimportantetereíva hérava: “Pe aty guasu”, ojapo vaʼekue Joseph Rutherford 1935-pe peteĩ asambléa ojejapo vaʼekuépe Washington, Estados Unídospe. Upe diskúrsope ermáno Rutherford omyesakã mávapa umi oĩva pe ‘aty guasúpe’ oñeñeʼẽha Apocalipsis 7:9-pe. Upe tiémpo peve oñepensa vaʼekue ko grúpo ohotaha avei yvágape, péro nogovernamoʼãiha Jesús ndive ijerovia kangyve rupi umi unhídogui. Ermáno Rutherford oipuru la Biblia omyesakã hag̃ua pe aty guasúpe ndojeporavói hague oho hag̃ua yvágape, péro haʼekuéra haʼeha umi ótro ovechakuéra orekóva Cristo, ohasataha hikuái pe ‘jehasa asy guasu’ ha oikovetaha pára siémpre ko yvy ape ári (Apoc. 7:14). Jesús ningo opromete vaʼekue: “Areko ótro ovechakuéra, oĩva ótro korápe, umívape avei aguerúta ha haʼekuéra ohendúta che ñeʼẽ. Péicha oikóta chuguikuéra peteĩ ovecha atýnte, ha peteĩ pastór oñangarekóta hesekuéra” (Juan 10:16). Koʼã “ótro ovechakuéra” haʼe umi testígo de Jehová ifiélva, orekóva la esperánsa oikóvo pára siémpre peteĩ paraísope ko yvy ape ári (Mat. 25:31-33, 46). w21.01 14 párr. 1, 2

Ñande avei tekotevẽ ñandesakrifikádo ikatu hag̃uáicha ñaaguanta ha ñatermina ñande traváho de predikasión (Mat. 28:19, 20). Ñande ningo ndahaʼéi ñanasére ñandesakrifikádomava. Upéva rangue, jajapose jepi heta mbaʼe ifasilveháichante ñandéve. Péro umi mbaʼe iñimportánteva jajapo, sapyʼánte ndahaʼéi la ifasilpáva. Upévare tekotevẽ ñaaprende jajejokokuaa ñandesakrifikádo hag̃ua. Upéicha rupi ñaikotevẽ ajúda jajapo hag̃ua umi mbaʼe ijetuʼúva ñandéve, ha Jehová ñanepytyvõ ijespíritu sánto rupive upearã (Gál. 5:22, 23). Apóstol Pablo ningo isakrifikádo vaʼekue. Péro haʼe orrekonose tekotevẽ hague ‘odomina’ hete ikatu hag̃uáicha ojapo pe oĩ porãva (1 Cor. 9:25-27). Haʼe omokyreʼỹ vaʼekue ótrope ojekorrehi hag̃ua ijupe voi, ha ‘ojapo porã hag̃ua entéro mbaʼe ha ani sarambikuépe’ (1 Cor. 14:40). Tekotevẽ ningo ñande ñandesakrifikádo jasegi hag̃ua jaadora Jehovápe, por ehémplo jasegi hag̃ua japredika ha ñaporomboʼe umi notísia porã (Hech. 2:46). w20.09 6 párr. 15-17

Koʼág̃arupi, heta paíspe ikatu japredika lívremente. ¿Ndépa reiko hína peichagua paíspe? Oiméramo upéicha, ikatu reñeporandu: “¿Mbaʼéichapa aaprovecha hína ko liverta arekóva?”. Koʼã ára pahápe Jehová puévlo ovyʼaiterei opartisipa haguére peteĩ traváho tuichaitereívape, opredika ha omboʼe rupi hikuái la héntepe arakaʼeve ojejapoʼỹ haguéicha ko múndope. Hetaiterei oportunida oñepresenta ñandéve ñambaʼapove hag̃ua Jehová servísiope. ¿Mbaʼéichapa ikatu reaprovecha pe tiémpo jaikohápe pyʼaguapýpe? (2 Tim. 4:2). Ikatu ningo ekalkula ne situasiónre ha ehecha oimépa nde térã peteĩ ne hénte ndaikatumoʼãipa ombaʼapove predikasiónpe, térã oservi voi de prekursór. Koʼág̃a ndahaʼéi hína tiémpo jaiko hag̃ua ñañehaʼã ñandepláta heta, pórke umi mbaʼe jarekóva ndajaguerahamoʼãi ñande apére pe jehasa asy guasu aja (Prov. 11:4; Mat. 6:31-33; 1 Juan 2:15-17). Heta puvlikadór oaprendéma ótro idióma ikatu hag̃uáicha opredika ha omboʼe la héntepe Jehovágui. Ha oipytyvõ hag̃ua chupekuéra predikasiónpe, Jehová organisasión oguenohẽ umi informasión oñeʼẽva la Bíbliare mas de 1.000 idiómape! w20.09 16 párr. 9-11

Peteĩ soldádo ivaléva ningo ifiél. Haʼe oñorairõ mbaretéta oprotehe hag̃ua peteĩ ohayhúvape, térã peteĩ mbaʼe ivaliósova chupe g̃uarã. Pablo omokyreʼỹ vaʼekue Timotéope oadora hag̃ua Jehovápe ipyʼaite guive, upéva heʼise ifiél ha ohayhu vaʼerãha Ñandejárape ikorasõite guive (1 Tim. 4:7). Amáske jahayhu Ñandejárape ha jaadora chupe ñande pyʼaite guive, ñañakarama hatãsevétantema pe añeteguáre (1 Tim. 4:8-10; 6:6). Peteĩ soldádo oñentrena vaʼerã avei ikatu hag̃uáicha siémpre oĩ preparádo oñorairõ hag̃ua. Timoteo ikatu vaʼekue oñorairõ Satanás kóntrape, pórke osegi vaʼekue Pablo konsého ha oñorairõ mbarete umi deséo vai kóntrape, oñehaʼã oreko umi kualida porã ha ohasa tiémpo ermanokuéra kongregasionpeguándi (2 Tim. 2:22). Upearã haʼe oñehaʼãmbaite vaʼerã kuri. Ñande avei tekotevẽ ñañehaʼãmbaite ñagana hag̃ua pe gérra jarekóva umi ñande deséo vai kóntrape (Rom. 7:21-25). Avei tekotevẽ ñañehaʼãmbaite jasegi hag̃ua jaipeʼa ñandejehegui ñane kondúkta yma guare, ha ñamonde peteĩ aóicha pe kondúkta pyahu (Efes. 4:22, 24). Ha ñanekaneʼõitereíramo ñambaʼapo rire un día pytã, tekotevẽtamante jajeovliga jaha hag̃ua rreunionhápe (Heb. 10:24, 25). w20.09 28 párr. 9-11

Ñanepasiénsia vaʼerã ñaipytyvõ jave ñane estudiántepe ikatu hag̃uáicha oñemeʼẽ Jehovápe ha ojevautisa. Péro avei tekotevẽ jahecha oimépa haʼe añetehápe oservise hína Jehovápe. ¿Ohechaukápa pe estudiánte oñehaʼãha hína okumpli umi mbaʼe Jesús omanda vaʼekue? ¿Térãpa ostudiánte oikuaase rupi hetave mbaʼe la Bíbliagui? Pyʼỹinte jahecha vaʼerã mbaʼe mbaʼépepa oprogresa ohóvo ñane estudiánte. Por ehémplo, ¿heʼípa ohayhuha Jehovápe? ¿Oñemboʼépa chupe? (Sal. 116:1, 2). ¿Oleesépa la Biblia? (Sal. 119:97). ¿Oho memépa rreunionhápe? (Sal. 22:22). ¿Ojapópa umi kámbio ohechaukáva ojapoha umi mbaʼe oaprendéva hína? ¿Omombeʼúpa umi mbaʼe oaprendéva ifamília ha iñamigokuérape? (Sal. 9:1). Ha iñimportanteveha, ¿ohechaukápa oipotaha oiko chugui testígo de Jehová? (Sal. 40:8). Péro pe estudiánte ndoprogresáiramo ni peteĩva koʼã mbaʼépe, ñañehaʼã vaʼerã jaikuaa mbaʼépa ojoko hína chupe. Ha jaikuaa rire upéva, ñañemongeta hendive mborayhúpe péro ñanesinséro hendive, péicha ikatúta ñaipytyvõ chupe oikotevẽhápe. w20.10 18 párr. 14, 15

Jesús Túa yvagapegua ningo siémpre odesidi porã, ha ituakuéra yvy arigua odesidi porã vaʼekue avei. Péro Jesús okakuaávo ohóvo, ijeheguietéma odesidi vaʼerã mbaʼépa ojapóta (Gál. 6:5). Ñandéicha avei, haʼe oreko vaʼekue pe liverta odesidi hag̃ua ijehegui umi mbaʼe ojapótava. Jesús ikatu vaʼekue odesidi ojapo umi mbaʼe chupe ogustávante, péro haʼe odesidi orekotaha peteĩ amista iporãva Jehovándi. Jesús oikuaárõ guare mbaʼépa Jehová oipota ojapo, odesidi oasepta pe asignasión haʼe omeʼẽva chupe (Juan 6:38). Jesús oikuaa vaʼekue oĩtaha heta ndaijaʼéiva hese, ha ijetuʼúramo jepe chupe upéva, lomímonte odesidi iñeʼẽrendutaha Jehovápe. Haʼe ojevautisárõ guare áño 29-pe, pe iñimportantevéva chupe g̃uarã haʼe vaʼekue ojapo Jehová ohaʼarõva chugui (Heb. 10:5-7). Ha omano mbotaitéramo jepe pe yvyráre, haʼe ndodudái vaʼekue ni michĩmi osegitaha ojapo Itúa oipotáva (Juan 19:30). w20.10 29 párr. 12; 30 párr. 15

Oiméne jaikuaa peteĩ ñane ermáno térã ermána ñane kongregasionpegua ohasa asýva hína hasykatu rupi, ohaságui peteĩ mbaʼe ijetuʼuetereíva, térã omanógui peteĩ ohayhúva. Jaikuaáramo oĩha peteĩ ohasáva nesesida, ikatu jajerure Jehovápe tañanepytyvõ jaʼe térã jajapo hag̃ua álgo jahechauka hag̃ua ñanembaʼeporãha hendive ha jahayhuha chupe. Ikatu hína hústo upéva la oikotevẽva ñane ermáno ha ermanakuéra ikyreʼỹ jey hag̃ua (1 Ped. 4:10). Avei ikatu ñandepyʼaguasu jaikuaágui Jehová oĩha ñanendive. Ñanepytyvõ hag̃ua haʼe ojevale Jesús ha umi anhelkuéra rehe. Ha oĩ porãramo ivoluntándi, Jehová ikatu avei ñanepytyvõ ojevalévo umi persóna orekóvare autorida. Ha oikóma haguéicha heta oĩvare ñande apytépe, Jehová ojevale ijespíritu sántore omomýi hag̃ua ñane ermáno ha ermanakuérape ñanepytyvõ hag̃ua. Upéicha rupi, ñande ikatu avei ñaime segúro ha jaʼe apóstol Pábloicha: “Jehová chepytyvõ hína, ndakyhyjemoʼãi asy, ¿mbaʼe piko ojapóta cherehe peteĩ persóna cheichagua?” (Heb. 13:6). w20.11 17 párr. 19, 20

Umi apóstol oikuaa porã vaʼekue Jehová oĩha hendivekuéra. Haʼe omeʼẽ vaʼekue chupekuéra podér ojapo hag̃ua umi milágro (Hech. 5:12-16; 6:8). Péro Jehová ningo nomeʼẽi ñandéve upe podér koʼág̃arupi. Upéicharõ jepe, Iñeʼẽ rupive haʼe mborayhúpe oasegura ñandéve jajepersegíramo jajerovia haguére hese, ikatuha javyʼa jaikuaágui haʼe ñandeguerohoryha ha ijespíritu oĩha ñanendive (1 Ped. 3:14; 4:14). Upévare ndovaléi jajepyʼapyeterei ñapensávo mbaʼépa jajapóta jajepersegírõ g̃uarã ág̃a amo gotyove. Upéva rangue, ñañehaʼãmbaite vaʼerã ñamombarete ñande jerovia Jehová ikatuha ñanepytyvõ ha ñandesalva. Ñande jajerovia vaʼerã Jesús opromete vaʼekuére: “Che ameʼẽta peẽme arandu ha poipytyvõta peikuaa hag̃ua mbaʼépa pejéta. Ha pene enemigokuéra ndaikatumoʼãi heʼi mbaʼeve penekontradesi hag̃ua”. Haʼe ogarantisa voi ñandéve: “Peẽ peaguantáramo pe fin peve, pesalváta pende rekove” (Luc. 21:12-19). Aníkena ñanderesarái peteĩ isiérvo ifiélva omanóramo, Jehová osegitaha imanduʼa umi detálle michĩ mimívare jepe, ha oipurúta umíva omoingove jey hag̃ua chupe. w21.01 4 párr. 12

Apóstol Pablo ndahaʼéi vaʼekue pe primeroite oñeʼẽva pe rresurreksión rehe. Job oñeʼẽ vaʼekue avei upévare. Haʼe oĩ vaʼekue segúro Ñandejára imanduʼataha hese ha omoingove jeytaha chupe (Job 14:7-10, 12-15). Peteĩva “umi enseñánsa primeroite ñaaprende vaʼekue” ha jagueroviáva haʼe hína ‘oñemoingove jeytaha umi omanóvape’ (Heb. 6:1, 2). Pablo oñeʼẽ pe rresurreksión rehe 1 Corintios kapítulo 15-pe. Umi mbaʼe oskrivi vaʼekue oiméne omokyreʼỹ rakaʼe umi kristianokuéra itiempopeguápe. Ha ñande jagueroviámaramo jepe heta tiémpore pe rresurreksión, upe kapítulo ñanemokyreʼỹ ha omombaretéta ñane esperánsa oikotaha katuete upéva. Jesúspe ningo oñemoingove jey vaʼekue, ha upéva oasegura ha omeʼẽ ñandéve esperánsa umi jahayhúva omano vaʼekue orresusitataha. Peteĩva “umi notísia porã” Pablo omombeʼu vaʼekue umi Corintoguápe haʼe hína Jesúspe oñemoingove jey hague (1 Cor. 15:1, 2). Haʼe heʼi vaʼekue peteĩ kristiáno ndogueroviáiramo pe rresurreksión, ijerovia ndovaleiha mbaʼeverã (1 Cor. 15:17). w20.12 2 párr. 2-4

¿Mbaʼépa oipytyvõ raʼe apóstol Pédrope oñeñandu ha opensa porã jey hag̃ua? Haʼe imanduʼa Jesús oñemboʼe hague hese ani hag̃ua ikangy la ijerovia, ha Jehová okontesta upe ñemboʼe. Upéi Jesús voi ojaparese Pédrope, oiméne omokyreʼỹ hag̃ua chupe (Luc. 22:32; 24:33, 34; 1 Cor. 15:5). Jesús ojaparese avei umi apóstolpe, haʼekuéra ohórõ guare opeska peteĩ pyhare pukukue ha nonohẽi mbaʼevete. Upérõ Jesús omeʼẽ vaʼekue oportunida Pédrope heʼi hag̃ua mbaʼeichaitépa ohayhu chupe. Jesús operdonáma kuri ko iñamígo ohayhuetévape ha onkarga chupe hetave traváho (Juan 21:15-17). Jesús otrata lája Pédrope ohechauka mbaʼeichaitépa haʼe oporoporiahuvereko, ha Jesús ojapo upéva Ituaichaite. Upévare jafalla jave, nañapensái vaʼerã Jehová núnka nañaneperdonamoʼãiha. Ñanemanduʼa vaʼerã Satanás oipotaha ñapensa upéicha. Upéva rangue, ñañehaʼãmbaite vaʼerã ñapensa mbaʼeichaitépa Jehová ñanderayhu, ontendeha umi mbaʼe ndaikatúiva jajapo, ha ñaneperdonaseha. Ñande ningo jasegi vaʼerã iñehémplo oĩ jave ofalláva ñanendive (Sal. 103:13, 14). w20.12 20, 21 párr. 17-19

Ñande ikatu ñaaprende umi ndoikói vaʼekuégui pyʼaguapýpe ha ndojeroviái Jehováre. Jastudiáramo umi ehémplo vai ñanepytyvõta ani hag̃ua jafalla avei haʼekuéraicha. Por ehémplo, rréi Asá ogovernárõ guare Judá, ojerure vaʼekue Jehovápe oipytyvõ hag̃ua chupe oreko jave provléma. Péro upéi haʼe ndojapovéima upéva, oñehaʼãntema ijehegui osolusiona umi provléma (2 Crón. 16:1-3, 12). Primerorã haʼetévaicha iporã vaʼekue Asá ojerure ajúda umi síriope, ikatu hag̃uáicha oñorairõ Israel kóntrape. Péro amo ipahápe, Judá ndoikói vaʼekue pyʼaguapýpe heta tiémpore. Jehová heʼi chupe iproféta rupive: “Rréi de Siria ehérsito jepe reguerekomoʼã kuri nde pópe, péro rejerovia rupi rréi de Síriare, ha nderejeroviái nde Jára Jehováre, koʼág̃a upéva jepe ohóma ndehegui” (2 Crón. 16:7). Ñande ñañatende vaʼerã avei ani hag̃ua ñapensa ñande ikatuha ñasolusiona umi provléma ñandejeheguínte, jahekaʼỹre Jehová gía la Bíbliape. Ñaiméramo jepe peteĩ emerhénsiape ha tekotevẽta pyaʼe jadesidi peteĩ mbaʼe, ñañetrankilisa vaʼerã, jajerure Jehovápe tañandegia ha jajerovia hese. Haʼe ningo katuete ñanepytyvõta ñasẽ porã hag̃ua. w21.01 6 párr. 13-15

Ko ñane tiémpope oĩ Ñandejára siervokuéra ohasáva ñembyahýi ndorekói rupi pláta ojogua hag̃ua hembiʼurã, térã osufríva umi gérra káusare. Oĩ avei umi ojegueraháva kárselpe oservi haguére Ñandejárape. Upéicharõ jepe, umi oĩva pe aty guasúpe ovyʼaiterei oikuaávo oñehundi rire ko múndo aña, siémpre orekotaha hetaiterei hiʼupy ha oaprendetaha hetaiterei mbaʼe Jehovágui. Ág̃a Jehová ohundi vove Satanás múndo, haʼe ojaseguráta oprotehe hag̃ua pe aty guasúpe ani hag̃ua ohapy chupekuéra ipochykue ojoguáva arahakúpe. Ha opa rire pe jehasa asy guasu, Jesús ogiáta umi ojesalvávape oĩháme “y oporomoingovéva” (Apoc. 7:17). Upéva heʼise oipytyvõtaha chupekuéra oikove hag̃ua pára siémpre. Ñapensamíntena, pe aty guasu oreko peteĩ esperánsa ijojahaʼỹva: Millones de persóna ningo oĩ ko yvy ape ári, ha umíva apytégui haʼekuéra oreko la posivilida núnka nomanóivo (Juan 11:26). Umi ótro ovechakuéra ningo oagradeseterei Jehová ha Jesúspe pe esperánsa porãite orekóvare hikuái. w21.01 16, 17 párr. 11, 12

Pe último pyhare Jesús ohasa vaʼekue yvypóraicha, haʼe opensa vaʼekue entéro umi provléma idisipulokuéra ombohováitavare. Haʼe ohayhu rupi iñamigokuérape, ojerure Itúape ‘oñangareko hag̃ua hesekuéra oĩgui Satanás’ (Juan 17:14, 15). Jesús oikuaa vaʼekue haʼe oho rire yvágape, Satanás pe Diablo osegitaha oataka umi oservisévape Jehovápe. Upéicha rupi Jehová puévlo oikotevẽta ojeprotehe chupekuéra. Koʼág̃a mas ke núnka ñaikotevẽ Jehová ñandeprotehe. Satanáspe ojeitýma yvágagui “ha haʼe ipochyeterei hína” (Apoc. 12:12). Haʼe okonvense umi ñandepersegívape opensa hag̃ua péicha ojapóvo “oserviha Ñandejárape” (Juan 16:2). Oĩ avei umi ndojeroviáiva Ñandejárare ha ñandepersegíva ñanediferénte rupi umi hénte oĩvagui ko múndope. Tahaʼe haʼéva pe omomýiva chupekuéra ñandepersegi hag̃ua, ñande ndajakyhyjéi. ¿Mbaʼérepa? La rrespuésta jatopa pe téxto koestediaguápe. w21.03 26 párr. 1, 3

Jehová ningo ojapo entéro mbaʼe oporohayhúgui. Por ehémplo, Haʼe mborayhúpe omeʼẽ ñandéve entéro mbaʼe ñaikotevẽva ñañemoag̃ui hag̃ua hese. Jehová ningo ñanderayhu rupi omeʼẽ vaʼekue Itaʼýrape ñanderreskata hag̃ua. Ha Jesús ñanderayhueterei avei, upévare omeʼẽ hekove ñanderehehápe (Juan 3:16; 15:13). Mbaʼevete ningo ndaikatúi ojoko Jehová ha Jesúspe ohayhu hag̃ua umi ifiélvape chupekuéra (Juan 13:1; Rom. 8:35). Péicha avei peteĩ omoakãva hogapy ojapo vaʼerã entéro mbaʼe oporohayhúgui. ¿Mbaʼérepa iñimportantete upéva? Apóstol Juan okontesta: “Pe ndohayhúiva iñermáno [térã ifamília] ohechávape, ndaikatúi ohayhu Ñandejára ndohecháivape” (1 Juan 4:11, 20). Peteĩ kuimbaʼe ohayhúva ifamíliape ha osegiséva Jehová ha Jesús ehémplo, oipytyvõta ifamíliape oñandu hag̃ua ojehayhuha chupekuéra, oreko hag̃ua peteĩ amista iporãva Jehovándi, ha omantenéta chupekuéra (1 Tim. 5:8). Haʼe omboʼe ha okorrehíta ifamiliakuérape, osegíta avei oaprende odesidi hag̃ua umi mbaʼe omombaʼeguasútava Jehovápe ha ou porãtava ifamíliape. w21.02 5 párr. 12, 13

Ñande Ru ñanderayhuetéva oikuaa mbaʼeichaitépa ñandeafekta ha ojapo vai ñanderehe umi mbaʼe vai jahasa vaʼekue, ha avei Ñandejára ohecha umi kualida porã ni ñande jepe ndajahechakuaáiva jarekoha (1 Juan 3:19, 20). Oiméramo peteĩ persóna oñehaʼãmbaite hína oheja peteĩ kostúmbre vai, térã peteĩ vísio oreko vaʼekue, péro hoʼa jey upévape ikatu oñedesanimaiterei. Katuete ningo ñañeñandu vaítante voi japeka jave (2 Cor. 7:10). Péro ndovaléi avei jahasa la rrája ha ñañekondena ñapensávo: “Che ningo desastrete voi. Chéverõ g̃uarã Jehová ni núnka nacheperdonamoʼãi”. Péro jajavy ñapensáramo upéicha, ha upevakuére ikatu hína jaheja Jehovápe. Upéva rangue, iporãvéta ñañemboʼéramo Jehovápe, ha jajerure chupe ñaneperdonamínte hag̃ua (Is. 1:18). Jehová ohecha jave ñande ñañembyasyetereiha ha ñañehaʼãha ñakambia, haʼe katuete ñaneperdonáta. Avei iporãta ñañeʼẽramo ansianokuérandi, haʼekuéra ningo ipasiénsia ñanderehe ha ñanepytyvõta ñaime porã jey hag̃ua Jehová renondépe (Sant. 5:14, 15). w20.12 23 párr. 5, 6

Jesús omombaʼe ha orrespeta vaʼekue kuñanguérape. Haʼe ndosegíri vaʼekue umi fariséo kostúmbre. Haʼekuéra oapoʼi vaʼekue kuñanguérape, noñeʼẽi voi chupekuéra umi hénte renondépe ha ni núnka noñeʼẽmoʼãi hendivekuéra Ñandejára Ñeʼẽre. Péro Jesús oñeʼẽ vaʼekue umi enseñánsa hypyʼũvare umi kuñanguérandi ojapoháicha umi ótro idisípulondi (Luc. 10:38, 39, 42). Haʼe opermiti vaʼekue avei umi kuñanguérape omoirũ chupe oviaha jave opredika hag̃ua (Luc. 8:1-3). Ha Jesús omeʼẽ chupekuéra pe priviléhio omombeʼúvo umi apóstolpe oñemoingove jeýma hague chupe (Juan 20:16-18). Avei apóstol Pablo omomanduʼa vaʼekue Timotéope omombaʼe hag̃ua kuñanguérape. Pablo orrekonose vaʼekue Timoteo sy ha ijavuéla oipytyvõ hague chupe oikuaa hag̃ua “Ñandejára Ñeʼẽ” (2 Tim. 1:5; 3:14, 15). Pablo oskrivírõ guare ikárta umi rrománope, osaluda vaʼekue umi ermanakuérape hérarupi. Haʼe ndahaʼéi ohechakuaánteva la ojapóva koʼã ermána, síno oagradese avei chupekuéra upévare (Rom. 16:1-4, 6, 12; Filip. 4:3). w21.02 15 párr. 5, 6