Abril

¿Ndépa rehasa asy hína peteĩ provléma káusare? Ikatu oime kongregasiónpe peteĩ ermáno ojapo raʼe nderehe peteĩ mbaʼe nemoñeñandu vaíva (Sant. 3:2). Ikatu ne kompañéro de traváho, de eskuéla térã kolehiopegua oñembohory nderehe reservi haguére Jehovápe (1 Ped. 4:3, 4). Térã nde rogaygua oñehaʼãmbaite hína ndejoko anivéma hag̃ua reho rreunionhápe, térã reñeʼẽ ótrope umi regueroviávare (Mat. 10:35, 36). Oiméramo upe rehasáva ijetuʼueterei, ikatu repensa iporãvetaha ndereservivéi Jehovápe. Péro ikatu reime segúro tahaʼe haʼéva umi provléma rehasáva, Jehová nemoarandutaha redesidi porã hag̃ua, ha nemombaretetaha reaguanta hag̃ua. Jehová ojasegura ojeskrivi hag̃ua la Bíbliape umi ehémplo ohechaukáva mbaʼéichapa umi yvypóra imperfékto ikatu vaʼekue oaguanta umi provléma. ¿Mbaʼérepa ojapo upéva? Ikatu hag̃uáicha ñaaprende chuguikuéra. Upévare Jehová ojevale vaʼekue apóstol Páblore oskrivi hag̃ua. Jalee jave umi rreláto, umíva ñanemokyreʼỹ ha omeʼẽta ñandéve esperánsa. Péro ndahaʼéi jaleénte vaʼerã la Biblia, síno jaheja vaʼerã Ñandejára Ñeʼẽ okambia umi mbaʼe ñapensáva ha ñañandúva. w21.03 14 párr. 1, 2

¿Mbaʼéichapa jahecha umi hénte japredikávape? ¿Jahechápa chupekuéra pe seváda morotĩmbávaicha oĩmava ojekosecha hag̃ua? Oimérõ upéicha, jajapóta mbohapy mbaʼe. Primero, koʼýte jajapuráta japredika hag̃ua. Pe kosécha tiémpo ningo mbyky, upévare ndajaperdéi vaʼerã tiémpo. Segundo, javyʼáta jahechávo umi hénte ohendu porãha umi notísia porã. La Biblia heʼi voi: “Ovyʼa hikuái ovyʼaháicha umi hénte kosécha tiémpope” (Is. 9:3). Ha tercero, jahechátama umi héntepe Jesús disípuloramo ha jajadaptáta hesekuéra ñañemongeta hag̃ua umi mbaʼe ointeresávare chupekuéra. Jesús disipulokuéra apytépe oĩne raʼe opensáva umi samaritánogui núnka ndoikomoʼãiha Jesús disípulo, péro Jesús nopensái vaʼekue umi samaritano naipohãveimaha. Upéva rangue haʼe opensa ikatuha oiko chuguikuéra idisípulo. Ñande avei ñapensa vaʼerã péicha umi oĩvare ñande territóriope. Ha apóstol Pablo omoĩ vaʼekue ñandéve peteĩ ehémplo iporãva jasegi hag̃ua. Haʼe oikuaa mbaʼépa oguerovia umi hénte opredikávape, ohechakuaa mbaʼépa ointeresa umi héntepe, ha ohecháma chupekuéra Jesús disípuloramo. w20.04 8, 9 párr. 3, 4

Jaiko rangue jahusga umi mbaʼe ojapóva peteĩ persóna, iporãvéta ñañehaʼãmbaitéramo ñantende mbaʼéichapa haʼe oñeñandu. Jehová añoite hína upe ikatúva ñanentende porã. Upévare jajerurékena Jehovápe tañanepytyvõ jahecha hag̃ua ñande rapichakuérape haʼe ohechaháicha chupekuéra, ha jaikuaa hag̃ua mbaʼéichapa ikatu jahechauka jaiporiahuverekoha chupekuéra. Ñande ningo ndaikatúi jaiporavo ñane ermanokuérape ha jaʼe algúnonte omereseha jaiporiahuvereko chupe. Enterove ombohovái vaʼerã provléma, ha heta umi provléma ojogua umi ombohovái vaʼekuépe Jonás, Elías, Agar ha Lot. Heta oĩ ijapytepekuéra haʼekueraite omoñepyrũ vaʼekue umi provléma ohasáva. Péro añetehápe enterovénte sapyʼánte jakausa provléma ñandejupe. Upévare iporã jajerure Jehovápe tañanepytyvõ ñañemoĩkuaa hag̃ua ñande rapicha lugárpe (1 Ped. 3:8). Ñande ñaneñeʼẽrendúramo Jehovápe ñamombarete hína pe unida oĩva ñane ermanokuéra apytépe ko yvy ape ári. Upévare jajedesidíkena ñahendukuaa, jaikuaa porãve ñane ermanokuérape ha jaiporiahuvereko chupekuéra. w20.04 18, 19 párr. 15-17

Jesús iñeʼẽrendu vaʼekue Jehovápe, ha oheja ñandéve pe ehémplo iporãvéva. Upévare ñaneñeʼẽrendu hag̃ua Jehovápe iñimportanteterei jajapo opa ikatúva jasegi hag̃ua Jesús ehémplo (Juan 8:29). Jasegi hag̃ua jaiko pe añetegua rapére ñaĩ vaʼerã segúro Jehová siémpre heʼiha pe añetegua, ha entéro mbaʼe heʼíva Iñeʼẽ la Biblia haʼeha pe añetegua. Avei ñaĩ vaʼerã segúro Jesús haʼeha pe Mesías oñepromete vaʼekue. Koʼág̃arupi, heta hénte ndogueroviapái Jesúspe ojeporavo hague haʼe hag̃ua pe Rréi Ñandejára Rréinope. Juan oavisa vaʼekue oĩ hague “heta oporombotavýva” ikatúva ogueraha vai umi noĩrivape preparádo odefende hag̃ua la Biblia heʼíva Jehová ha Jesús rehe (2 Juan 7-11). Juan oskrivi vaʼekue: “¿Máva piko pe ijapúva? ¿Ndahaʼéi piko upe onegáva Jesús haʼeha pe Cristo?” (1 Juan 2:22). Ani hag̃ua ñanembotavy hikuái, jastudiámante vaʼerã la Biblia. Upéicharõ añoite ikatúta jaikuaa Jehová ha Jesúspe (Juan 17:3). Ha upéichamante ñaiméta segúro pe jagueroviáva haʼeha pe añetegua. w20.07 21 párr. 4, 5

¿Mbaʼépa ikatu jajapo ani hag̃ua jastorva umi ótro ohaʼãvape ko karréra? Ikatúma guive, jaheja vaʼerã ñane ermanokuérape ojapo hag̃ua chupekuéra ogustáva, jaovliga rangue chupekuéra siémpre ojapo hag̃ua ñande jaipotáva ha ñandegustaháichante (Rom. 14:19-21; 1 Cor. 8:9, 13). Umi mbaʼe oikóva pe karréra ñande ñahaʼãvape idiferentete umi ótro karréragui. Umi karreraitépe káda uno okompeti ogana hag̃ua imbaʼerãnte pe prémio. Umi ohaʼãva pe karréra opensa ijehénte ohecha hag̃ua mbaʼépa oipytyvõta chupekuéra ogana hag̃ua. Haʼekuéra ikatu voi omyaña hapichápe ojei hag̃ua henonderãgui, ikatu hag̃uáicha haʼekuéra opuntea. Péro ñande nañakompetíri oñondive (Gál. 5:26; 6:4). Ñande ñaipytyvõse opa ikatúvape omohuʼã hag̃ua ñanendive pe karréra, ha oikove hag̃ua pára siémpre Ñandejára múndo pyahúpe. Upévare ñañehaʼã ñamoĩ en práktika pe konsého oñemeʼẽ vaʼekue espíritu sánto rupive: “Ani pejepyʼapy umi mbaʼe peẽme okonvenívarente, síno pejepyʼapy vaʼerã avei umi ótrore” (Filip. 2:4). Pe karréra ñande ñahaʼãvape, Jehová imbaʼeporã rupi ogarantisa omeʼẽtaha pe prémio umi okompletávape pe karréra, upéva hína vída etérna tahaʼe yvágape térã ko yvy ape ári peteĩ paraísope. w20.04 28 párr. 10; 29 párr. 12

Hetaiterei oservíva Ñandejárape ojesalváta ha oikéta pe múndo pyahúpe. Koʼã hénte ohecháta mbaʼéichapa avei oñegana pe ñemanóme, ág̃a oñemoingove jey vove hetaiterei omano vaʼekuépe yma. ¡Ñapensamíntena mbaʼeichaitépa javyʼáta oiko vove ko mbaʼe ijojahaʼỹva! (Hech. 24:15). Ha enterove ohechaukáva ifielha Jehovápe ipyʼaite guive, oganáta avei pe ñemano ombohasa vaʼekuépe chupekuéra Adán. Upéicha rupi ikatúta oiko hikuái pára siémpre. Enterove kristiáno koʼag̃agua jaagradeseterei Pablo oskrivi vaʼekue umi Corintoguápe pe rresurreksiónre. Koʼã mbaʼe añetehápe ñanemokyreʼỹeterei ha ñanekonsola. Upévare koʼýte jasegise pe konsého Pablo omeʼẽ vaʼekue, ha ‘ñanerembiapo heta ñande Ruvicha servísiope’ (1 Cor. 15:58). Ñande siémpre jajapóramo opa ikatúva Ñandejára servísiope, jarekóta la esperánsa jaikovévo vyʼápe amo gotyove. Ha oiko vove upéva entéro mbaʼe iporãitereivéta umi mbaʼe ikatúvagui ñañeimahina. Ha upépe jahechakuaáta nañañehaʼãreíri hague ñambaʼapo jejopy ñande Ruvicha servísiope. w20.12 13 párr. 16, 17

Amalisia umi profesía oĩva Ezequiel 38:10-23; Daniel 2:43-45; 11:44–12:1 ha Apocalipsis 16:13-16, 21-pe oñeñeʼẽ hína la mísma kósare. Oiméramo upéicha, ikatu ñahaʼarõ oiko koʼã mbaʼe: Oñepyrũ rire pe jehasa asy guasu, “entéro umi rréi ko yvy arigua” oñembyatýta ha oformáta peteĩ grúpo (Apoc. 16:13, 14). La Biblia ohenói ko grúpope “Gog haʼéva Magog territoriopegua” (Ezeq. 38:2). Umi nasionkuéra grúpo oatakáta entéro Jehová siervokuérape ha oñehaʼãta ohundiete chupekuéra. Apóstol Juan oprofetisa vaʼekue ko tiémpore, ha heʼi amandáu guasu hoʼataha Ñandejára enemigokuéra ári. Umi amandáu guasu ikatu orrepresenta umi mensáhe ipohýiva Jehová puévlo omombeʼútava, ha ombopochýva Gog de Magógpe oataka hag̃ua Ñandejára puévlope ha oñehaʼã ohundipaite chupekuéra (Apoc. 16:21). w20.05 14, 15 párr. 13, 14

Ñandejára espíritu sánto haʼe hína peteĩ rregálo ñamombaʼetereíva. Ñande ikatu ñamombaʼeve pe espíritu sánto jajepyʼamongetáramo umi mbaʼe ojehupytývare ko tiémpope pe espíritu sánto rupive. Jesús oho mboyve yvágape, heʼi vaʼekue idisipulokuérape: “Oñemeʼẽta peẽme podér pe espíritu sánto ou vove pende ári, ha oikóta pendehegui che testígo [...] umi lugár mombyryvehápe jepe ko yvy ape ári” (Hech. 1:8). Pe espíritu sánto ñanepytyvõgui oĩma mas de 8 millón imédio umi oadoráva Jehovápe ko yvy tuichakuére. Avei, ñande ñaiméva Jehová puévlope ñaime en unida ha pyʼaguapýpe ñane ermanokuérandi, pórke Ñandejára espíritu ñanepytyvõ jareko hag̃ua umi kualida iporãva, por ehémplo mborayhu, vyʼa, pyʼaguapy, pasiénsia, pyʼaporã, mbaʼeporã, jerovia, akãguapy ha jejokokuaa. Koʼãva hína “umi mbaʼe porã oúva Ñandejára espíritugui” (Gál. 5:22, 23). Añetehápe pe espíritu sánto haʼe peteĩ rregálo iporãitereíva. w20.05 28 párr. 10; 29 párr. 13

Ikatu jaʼe umi orresivítava umi ihénte térã iñamigokuéra oñemoingove jeývape oikuaataha chupekuéra. ¿Mbaʼérepa ikatu jaʼe upéva? Por ehémplo, ñapensávo mbaʼéichapa Jehová oporomoingove jey vaʼekue yma, ñahaʼarõkuaa Jehová ojapo jeytaha chupekuéra ikatu hag̃uáicha ipínta, oñeʼẽ ha opensa omano mboyvemi guareichaite jey. Ñanemanduʼa vaʼerã Jesús heʼi hague peteĩ omanóva haʼeteha okénteva hína, ha pe rresurreksión katu haʼeteha oñemombáyva pe persónape (Mat. 9:18, 24; Juan 11:11-13). Peteĩ persóna opáy jave nokambiái síno osegi elmimoite, tahaʼe ipínta, oñeʼẽ lája ha umi mbaʼe orekóva imemóriape. Ñapensami Lázaro ehémplore. Ojapóma kuri 4 día omano hague, ha hetekue oñepyrũma kuri oñembyai. Péro Jesús omoingove jeýrõ guare chupe, upepete iñermanakuéra oikuaa vaʼekue chupe, ha Lázaro avei imanduʼa hesekuéra (Juan 11:38-44; 12:1, 2). w20.08 14 párr. 3; 16 párr. 8

Ikatu jaʼe umi unhído ha umi ótro ovechakuéra ojojoguaha, pórke Jehová peteĩchaite ohayhu mokõive grúpope. Enterovete iñimportánte chupe g̃uarã. Ñande jaikuaa upéva haʼe opaga haguére el mísmo présio umi unhídore ha umi ótro ovechakuérare: Itaʼýra ohayhuetéva rekove. La diferénsia orekóva koʼã mokõi grúpo haʼe hína pe esperánsa orekóva hikuái. Péro mokõive grúpo osegi vaʼerã ifiél Ñandejárape ha Crístope (Sal. 31:23). Ha ñanemanduʼa vaʼerã Ñandejára espíritu ikatuha ombaʼapo peteĩchaite oipytyvõ hag̃ua enterove Ñandejára siervokuérape. Upéva heʼise Jehová omeʼẽha ijespíritu sánto asegún mbaʼépa káda persóna oikotevẽ, tahaʼe umi unhídope térã umi ótro ovechakuérape. Jehová ningo omeʼẽ káda uno isiervokuérape peteĩ esperánsa iporãitereíva (Jer. 29:11). Pe Konmemorasión aja, káda uno jareko peteĩ oportunida espesiál. Upépe ikatu ñambotuicha Ñandejárape ha Crístope upe ojapo vaʼekuére ñanderehehápe ikatu hag̃uáicha jaiko pára siémpre. Pe Konmemorasión ningo haʼe pe rreunión iñimportantevéva ojapóva káda áño umi kristiáno tee. w21.01 18 párr. 16; 19 párr. 19

La majoría umi ohóva Konmemorasiónpe oreko la esperánsa oikóvo pára siémpre ko yvy ape ári. ¿Mbaʼérepa upéicharõ haʼekuéra oho upépe? Ñande jaha jepi peteĩ ñane amígo kasamientohápe jahechaukase rupi jahayhu ha jaapojaha umi nóviope. Upévare avei umi ótro ovechakuéra oho Konmemorasionhápe, ohechaukase rupi ohayhu ha oapojaha Crístope ha umi unhídope. Haʼekuéra oho avei oagradeseterei rupi pe sakrifísio Jesús ojapo vaʼekuére, pórke upéva rupive añoite haʼekuéra oreko la oportunida oikovévo pára siémpre ko yvy ape ári. ¿Mbaʼérepa avei umi ótro ovechakuérape iñimportanteterei oho pe Konmemorasiónpe? Okumplise rupi hikuái pe mandamiénto Jesús oheja vaʼekue. Jesús omoñepyrũrõ guare pe Konmemorasión, heʼi vaʼekue umi ijapóstol ifiélvape: “Pesegíkena pejapo kóva penemanduʼa hag̃ua cherehe” (1 Cor. 11:23-26). Upéicharõ, umi ótro ovechakuéra osegíta oho Konmemorasionhápe oĩ aja unhído ko yvy ape ári. w21.01 17 párr. 13, 14

Ñande japorohayhu añetéramo jahechauka vaʼerã upéva umi mbaʼe porã jajapóva rupive (ekompara Santiago 2:17, 26 heʼívare). Por ehémplo, Jehová ñanderayhu (1 Juan 4:19). Ha haʼe heʼi ñandéve ñanderayhuha umi mbaʼe porãite oĩva rupive la Bíbliape (Sal. 25:10; Rom. 8:38, 39). Péro ñande ñaime segúro Jehová ñanderayhuha, ndahaʼéi umi mbaʼe heʼívarente, síno umi mbaʼe ojapóvare avei. Jehová ningo opermiti vaʼekue Itaʼýra ohayhuetéva ohasa asy ha omano ñanderehehápe (Juan 3:16). Upévare ñaime segúro Jehová ñanderayhuha. Ñande katu jahechauka hína jahayhuha Jehová ha Jesúspe ñaneñeʼẽrendúvo chupekuéra (Juan 14:15; 1 Juan 5:3). Ha Jesús omanda vaʼekue ñandéve jajoayhu hag̃ua (Juan 13:34, 35). Jaʼe vaʼerã ñane ermanokuérape jahayhuha chupekuéra, péro jahechauka vaʼerã avei upéva umi mbaʼe jajapóva rupive (1 Juan 3:18). w21.01 9 párr. 6; 10 párr. 8

Umi ojeporavo vaʼekue espíritu sánto rupive, oreko la esperánsa oikotaha Jesús ndive pára siémpre ha ogovernataha hendive Ñandejára Rréinope. Haʼekuéra ohecháta chupe, oñeʼẽta ha ohasáta hendive tiémpo (Juan 14:2, 3). Péro Jesús ohechaukáta avei ohayhuha umi orekóvape esperánsa oiko hag̃ua ko yvy ape ári, ha oñangarekóta avei hesekuéra. Jepe haʼekuéra ndohechamoʼãi Jesúspe, pe amista orekóva hendive amás día imbaretevéta oiko aja hikuái vyʼápe Jehová ha Jesús oipotaháicha (Is. 9:6, 7). Jaaseptávo Jesús invitasión oiko hag̃ua ñandehegui iñamígo, jahupyty hetaiterei vendisión. Por ehémplo, jahechakuaa haʼe ñanderayhu ha ñandeapojaha koʼág̃ama voi. Oñemeʼẽ avei ñandéve la oportunida jaiko hag̃ua pára siémpre. Ha iñimportanteveha, ñande haʼe rupi Jesús amígo ikatu jareko Itúa Jehovápe ñane amigoitéramo, ha upéva haʼe pe amista iporãvéva ikatúva jareko. Añetehápe ningo peteĩ priviléhio tuichaitereíva jaiko Jesús amígoramo. w20.04 25 párr. 15, 16

Apóstol Pablo oskrivi vaʼekue ikárta umi kristiáno unhído oĩvape Coríntope, oñemoingove jeýtava oikove hag̃ua yvágape. Umi kristiáno ‘omoirũ Cristo Jesúspe ha péicha ojeelehi chupekuéra Ñandejárape g̃uarã. Ñandejára oiporavo chupekuéra ipotĩ hag̃ua henondépe’. Pablo oñeʼẽ vaʼekue avei ‘umi Cristo disípulo omanóma vaʼekuére’ (1 Cor. 1:2; 15:18; 2 Cor. 5:17). Ha ótra kárta Pablo oskrivi vaʼekuépe, haʼe heʼi: ‘Umi omano vaʼekue Cristo omano haguéicha, oikove jey vaʼerã haʼe oikove jey haguéicha’ (Rom. 6:3-5). Jesúspe oñemoingove jey vaʼekue peteĩ espírituicha ha oho jey yvágape. Upéicha avei oikove jeýta ‘umi omoirũva Crístope’, térã enterove umi unhído. Pablo heʼi vaʼekue Crístope ‘raẽve oñemoingove jey hague’, térã haʼe hague pe “primera kosécha” (1 Cor. 15:20). Jesús haʼe vaʼekue pe primeroite oñemoingove jeýva peteĩ espírituicha ha orresivíva pe vída etérna. w20.12 5, 6 párr. 15, 16

Umi unhído oikóva ñane tiémpope omanóramo, peteĩ tesapirĩme oñemoingove jeýma chupekuéra yvágape. Apóstol Pablo ohechauka vaʼekue upéva siertoha oskrivírõ guare umi mbaʼe jatopáva 1 Corintios 15:51, 52-pe. Koʼã mbaʼe Pablo heʼi vaʼekue oñekumpli hína ñane tiémpope. Koʼã Cristo ermanokuéra ovyʼaitereíta orresusita rire. La Biblia omombeʼu ñandéve mbaʼe traváhopa ojapóta umi unhído oikove jeýva yvágape. Jesús heʼi chupekuéra: “Pe oganávape pe ñorairõ ha ojapóva pe che haʼéva pe fin peve, ameʼẽta chupe autorida ogoverna hag̃ua umi tetãnguérare. Peichagua autorida che arresivi avei che Túagui. Ha pe persóna oipurúta peteĩ vastón de iérro okastiga hag̃ua umi hénte añáme. Haʼe ohundíta chupekuéra ha ojoguáta hikuái umi kambuchi ojekapaitévape” (Apoc. 2:26, 27). w20.12 12 párr. 14, 15

Apóstol Pablo heʼívo Jesús haʼeha pe “primera kosécha”, ontendeka oĩtaha avei hetave yvypóra oñemoingove jeýtava oiko hag̃ua yvágape. Umi apóstol ha umi ótro “omoirũva Crístope”, tiémpo rire oñemoingove jeýta avei oiko hag̃ua yvágape, Jesúspe oñemoingove jey haguéicha (1 Cor. 15:18). Pablo oskrivírõ guare umi Corintoguápe, “umi omoirũva Crístope” noñepyrũi gueteri oñemoingove jey yvágape. Upéva rangue, Pablo ohechauka upéva oikotaha tenonde gotyove. Haʼe heʼi: ‘Káda uno oikove jeýta otoka vove chupe: Cristo raẽve orresusita, upéi umi omoirũva Crístope oñemoingove jeýta ipresénsia aja’ (1 Cor. 15:23, nóta; 1 Tes. 4:15, 16). Koʼág̃a ñande jaiko hína Cristo presénsia aja, pe tiémpo Pablo oprofetisa vaʼekue. Umi apóstol ha umi ótro unhído omanóma vaʼekue ohaʼarõ vaʼerã kuri Cristo presénsia orresivi hag̃ua iprémio yvágape, ha ‘oikove jey hag̃ua Jesús oikove jey haguéicha’ (Rom. 6:5). w20.12 5 párr. 12; 6 párr. 16, 17

Apóstol Pablo oñeʼẽ vaʼekue peteĩ persóna oñemoingovévare yvágape peteĩ espírituicha (1 Cor. 15:43-44). Jesús oĩrõ guare ko yvy ape ári oreko vaʼekue peteĩ kuérpo umáno. Péro oñemoingove jeýrõ guare chupe, oiko chugui “peteĩ espíritu oporomoingovéva”, ha oho jey yvágape. Upéicha avei, umi unhído orresusita vove orekóta peteĩ kuérpo ikatu hag̃uáicha oiko yvágape. Pablo omyesakã upéva heʼívo: “Jajoguaháicha pe kuimbaʼe Ñandejára ojapo vaʼekuépe yvýgui, upéicha avei jajoguáta upe kuimbaʼe ou vaʼekuépe yvágagui” (1 Cor. 15:45-49). Jahechakuaa upéicharõ Jesúspe noñemoingovejeýi hague peteĩ kuérpo umáno reheve. Pablo omyesakã vaʼekue mbaʼérepa, heʼívo: “Peteĩ kuérpo umáno ndaikatúi oĩ Ñandejára Rréinope” yvágape (1 Cor. 15:50). Umi apóstol ha umi ótro unhído ndorresusitamoʼãi yvágape peteĩ kuérpo umáno reheve, ikatúva oñembyai. w20.12 10, 11 párr. 10-12

Ñandejára ogia vaʼekue unos kuánto Jesús disipulokuéra ypykuépe, oskrivi hag̃ua pe rresurreksión oikótavare yvágape. Apóstol Juan heʼi vaʼekue: “Koʼág̃a ningo ñande Ñandejára raʼy hína, péro ndojekuaaukái gueteri ñandéve mbaʼéichatapa ñande rekove amo gotyove. Péro jaikuaa ningo jajoguataha chupe” (1 Juan 3:2). Upéicharõ, umi unhidokuéra ndoikuaái hína mbaʼéichatapa ipínta, ág̃a oñemoingove jey vove chupekuéra yvágape. Péro si oikuaa hikuái ohechataha Jehovápe ág̃a orresivi vove hikuái iprémio. La Biblia ningo omombeʼu ñandéve michĩmi upévagui. Por ehémplo, heʼi ñandéve umi unhído oĩtaha Crístondi haʼe ohundi vove “entéro goviérno, autorida ha podér”. Umíva apytépe oĩ pe ñemano, haʼéva “ñane enemígo ultimoite oñehundítava”. Ha ipahaite, ág̃a entéro mbaʼe oñemoĩ vove Jesús poguýpe, haʼe ha umi ogovernáva hendive ijeheguiete voi oñemoĩta Jehová poguýpe (1 Cor. 15:24-28). ¡Ajépa iporãitéta ág̃a oiko vove upéva! w20.12 8 párr. 2

Entéro umi kristiáno ifiélva, ndorekóiva pe esperánsa ohóvo oiko yvágape Cristo ndive oreko avei la esperánsa oikove jeývo. La Biblia heʼi apóstol Pablo ha umi ótro orresusitáva yvágape, oĩha “umi primeroite oñemoingove jeýtava apytépe” (Filip. 3:11). Upéva ohechauka upéi oĩtaha hetave oñemoingove jeýva. Upéva oho porãiterei upe Job heʼi vaʼekuére oikotaha hese amo gotyove (Job 14:15). ‘Umi omoirũva Crístope oñemoingove jeýva ipresénsia aja’, oĩtama yvágape Jesús ndive haʼe ohundi vove enterove umi goviérno, autorida ha podér. Ha Jesús ohundíta pe ñemano jepe, haʼéva “ñane enemígo ultimoite”. Enterove umi oñemoingove jeýva yvágape nomanomoʼãvéima arakaʼeve (1 Cor. 15:23-26). Umi ohaʼarõva oiko ko yvy ape ári ikatu oreko esperánsa Pablo heʼi vaʼekue rupive pe téxto koestediaguápe. Jaikuaaháicha umi iñinhústova ndaikatumoʼãi oike yvágape, upéicharõ umi mbaʼe Pablo heʼi vaʼekue ohechauka oĩtaha umi oñemoingove jeýva ko yvy ape ári. w20.12 6, 7 párr. 18, 19

Upéicharõ jepe, ikatu hína ñañeporandu: “¿Mbaʼéicha piko ikatu aikuaa Jehová nopensaiha cherehe nachepohãveimaha?”. Oiméramo ñañeporandu upéicha, upéva voi ohechauka Jehová ikatuha ñaneperdona. Ojapóma heta áño, pe rrevísta Ñemañaha heʼi hague: “Ikatu oime jajavy rakaʼe heta vése yma, ha ikatu voi koʼág̃a peve jasegi hína ñandepuʼakaʼỹre upe mbaʼe vai jajapo vaʼekuére ñañepyrũ mboyve jaservi Ñandejárape. Ani ñapensa jajapo hague peteĩ mbaʼe Jehová ndaikatumoʼãiva operdona. Upéva hína la oipotáva Satanás ñapensa. Ñande ñañembyasy ha ñañeñandu vaíramo peteĩ mbaʼe jajapo vaʼekuére, upéva ohechauka ñande nañaneñañaiha ha Jehová ikatuha ñaneperdona. Jasegíkena ñaneumílde ha jajerure asy Ñandejárape ñaneperdona hag̃ua, tañanepytyvõmi ñanekonsiénsia potĩ jey hag̃ua, ha ani jaʼa jey pe mbaʼe vai jajapo vaʼekuépe. Por ehémplo, oiko mboyve apóstol Páblogui kristiáno haʼe ojapo vaʼekue heta mbaʼe ivaietereíva. Pablo imanduʼa umi mbaʼe ojapo vaʼekuére (1 Tim. 1:12-15). Péro haʼe oguerovia vaʼekue ikatuha oñeperdona chupe Jesús sakrifísio rupive, chupe g̃uarã pe rreskáte haʼe vaʼekue peteĩ rregálo Jehová omeʼẽ vaʼekue chupe. Pablo ndosegíri vaʼekue oñeñandu vaieterei umi mbaʼe ojapo vaʼekuére, síno oñehaʼãmbaite ojapo pe iporãvéva Jehovápe g̃uarã. w20.11 27 párr. 14; 29 párr. 17

Satanás oipuru heta mbaʼe ojapoka hag̃ua ñandéve ivaíva. ¿Mbaʼéichapa ñambohovái jepi koʼã situasión? Ndahasyiete ningo ñapensa hag̃ua koʼã mbaʼe ndahaʼeiha la ivaietereíva. Por ehémplo, ikatu ñapensa: “Nañemosẽmoʼãi ningo kongregasióngui ajapo haguére ko mbaʼe, upéicharõ ndahaʼeichéne hína la ivaietereíva”. Péro tuichaiterei jajavy ñapensáramo upéicha. Upéva rangue, iporãvéta ñañeporandúramo: “¿Noiméi piko Satanás ojevale hína ko mbaʼére chembopyʼamokõi hag̃ua? ¿Amongyʼátapa Jehová réra ahejáramo umi deséo vai ipuʼaka cherehe? ¿Añemoag̃uivétapa Ñandejárare, térãpa añemomombyryvéta chugui ajapóramo ko mbaʼe?”. Ñañeporandúkena koʼã mbaʼe ha jajepyʼamongeta hese. Ñañemboʼékena Ñandejárape tañanemoarandu ñanesinséro hag̃ua ñambohováivo koʼã porandu. Jajapóramo upéicha, tuichaiterei ikatu ñandeprotehe. Upéva ñanepytyvõta ñamboykete hag̃ua umi mbaʼe vai Jesús ojapo haguéicha heʼírõ guare: “¡Tereho koʼágui Satanás!” (Mat. 4:10). Ñanemanduʼákena ñandepyʼamokõiramo, upéva ndaideprovechoiha mbaʼeverã. w20.06 12, 13 párr. 16, 17

Ñande ningo ñaneumíldegui ñaneñeʼẽrendu Jehovápe, pórke jahechakuaa haʼe siémpre oikuaaha mbaʼépa iporãve ñandéve g̃uarã (Efes. 4:22-24). Ñaneumílderamo ñapensáta Jehová oipotáva iñimportanteveha ñande jaipotávagui, ha umi ótro ñande rapicha iñimportanteveha ñandehegui. Upéicha rupi jareko peteĩ amista iporãva Jehovándi, ha jajogueraha porã ñane ermanokuéra kongregasionpeguándi (Filip. 2:3). Ko múndope umi hénte ijorgullóso ha opensa ijehénte, ha nañañatendéiramo ikatu hína ova ñanderehe upéva. Amalisia umi kristiáno ypykuére ováma vaʼekue, upévare apóstol Pablo oskrivi vaʼekue umi rrománope: “Ajerure peẽme anive hag̃ua pepensa peneimportantetereiha. Iporãramo jepe ñapensa porã ñandejehe ndovaléi jahasa la rrája”. Pablo ohechakuaa vaʼekue tekotevẽha ñapensa porã ñandejehe, upéicharõ jepe ñaneumílderamo ndajahasamoʼãi la rrája, nañapensamoʼãi ñaneimportantetereiha ha ndajaikomoʼãi ñapensaiterei ñandejehe. w20.07 2 párr 1, 2

Rréi Asá tiémpope, opa vaʼekue pe pyʼaguapy orekóva hikuái. Peteĩ ehérsito tuichaitereíva orekóva mas de un millón soldádo, ou chupekuéra Etiopíagui. Zérah, umi etíope komandánte, oĩ vaʼekue segúro haʼe ha ijehérsito oganataha Judápe. Péro Asá ojerovia vaʼekue Jehováre, ha ndahaʼéi peteĩ ehérsito tuichávare. Asá oñemboʼérõ guare heʼi: “Jehová ore Jára, orepytyvõmína, ore ningo rojerovia nderehe, ha nde rérape rosẽ koʼã henteita kóntrape” (2 Crón. 14:11). Umi etíope ehérsito haimete voi el dóvle tuichave vaʼekue Asá ehérsitogui. Péro Asá oikuaa vaʼekue Jehová ipoderosoitereiha ha ikatuha oipytyvõ ipuévlope. ¡Ha Jehová upeichaite ojapo! Umi etíope ehérsito operde vaieterei (2 Crón. 14:8-13). Ñande ningo ndajaikuaái mbaʼépa oikóta káda únore amo gotyove, péro si jaikuaa opataha pe pyʼaguapy Jehová siervokuéra ikatúva oreko koʼág̃a. Ñanemanduʼa vaʼerã Jesús oprofetisa hague umi ára pahápe ‘umi hénte opa tetãygua ndaijaʼemoʼãiha’ idisipulokuérare (Mat. 24:9). w20.09 18 párr. 14-16

Avavépe ningo ndogustái oñeofende chupe. Péro umi ñane enemígo ñaneofendéramo ha ñandepyʼapyeterei umi mbaʼe heʼíva hikuái, ikatu ñañedesanima (Prov. 24:10). Upéicharõ, ¿mbaʼéichapa jahecha vaʼerã umi ñane enemígo ñaneofende jave? Pábloicha avei ñande ikatu ‘javyʼa oĩ jave ñaneofendéva’. ¿Mbaʼérepa? Pórke umi hénte ñaneofende ha oñemoĩ jave ñanderehe, ohechauka hína ñande haʼeha Jesús disípulo teete (1 Ped. 4:14). Jesús heʼi vaʼekue voi umi isegidorkuérape ojepersegitaha (Juan 15:18-20). Upéva oñekumpli vaʼekue umi kristiáno ypykuére. Upe tiémpope umi opensáva umi griego opensaháicha, oapoʼi umi kristianokuérape ha opensa hesekuéra ijeskuelaʼiha. Ha umi judiokuéra apytépe, umi kristiáno rehe ojeʼe vaʼekue “ilápi mbykyha ha avave nomombaʼeiha chupekuéra”, ojeʼe haguéicha apóstol Pedro ha Juan rehe (Hech. 4:13). Heta hénte opensa vaʼekue umi kristianokuérare ikangyha ha noñedefendekuaaiha, pórke haʼekuéra ndoikéi vaʼekue polítikape, ha upévare ndaikatúi ojapoka álgo umi goviérnope. Haʼekuéra ndoikéi avei pe ehérsitope ni ndaikatúi oñorairõ umi gerrahápe oñedefende hag̃ua, ha umi ivesinokuéra orrechasa chupekuéra. Umi kristiáno ypykue ndohejái vaʼekue umi mbaʼe opensáva hesekuéra umi iñenemígo ojoko chupekuéra anive hag̃ua opredika ha oiko Jesús disípuloramo. w20.07 14, 15 párr. 3, 4

Apóstol Juan ningo ohayhueterei vaʼekue iñermanokuérape ha oipota ijerovia mbarete hikuái. Umi konsého haʼe omeʼẽ vaʼekue umi mbohapy kárta oskrivi vaʼekuépe, ohechauka porã mbaʼeichaitépa haʼe ohayhu ha ojepyʼapy hesekuéra. Javyʼaiterei ningo jaikuaávo umi kuña ha kuimbaʼe ogovernátava Jesús ndive yvágape, oporohayhu ha ojepyʼapyha avei ótrore Juan ojapo haguéicha (1 Juan 2:27). Hiʼãite ningo siémpre ñanemanduʼa umi konsého haʼe omeʼẽ vaʼekuére. Jajedesidíkena jaikotaha pe añetegua rapére ñaneñeʼẽrendúvo Jehovápe opa mbaʼe jajapóvape. Jastudiákena la Biblia ha jajerovia upépe heʼívare. Ñamombaretékena ñande jerovia Jesús rehe, jarrechasákena umi filosofía ha idéa oñemboʼéva ko múndope, ha avei umi apóstata omboʼéva. Aníkena arakaʼeve jaservi guaʼu Jehovápe ha avei jajapo jaikóvo mbaʼe vai, ha aníkena ñahendu umi oñehaʼãvape ojapoka ñandéve ivaíva. Jaikókena siémpre Ñandejára mandamientokuéra iporãitéva heʼiháicha. Ñamombarete hína ñane ermanokuérape ñaperdonávo umi ñanembopochývape ha ñaipytyvõvo umi oikotevẽvape. Ha péicha ñambohováiramo jepe heta mbaʼe ijetuʼúva, jasegíta jaiko pe añetegua rapére. w20.07 24, 25 párr. 15-17

Jehová ningo mborayhúpe omeʼẽ káda uno isiérvo ifiélvape peteĩ lugár ikongregasiónpe. Ha jajapóramo jepe diferénte mbaʼe, enterovénte ñandevalióso ha ñaikotevẽmba ojuehe. Apóstol Pablo ohechauka porã vaʼekue avave ndaikatuiha omaña ótro Jehová siérvore, ha heʼi: “Naikotevẽi nderehe” (1 Cor. 12:21). Jaipotáramo oĩ pyʼaguapy kongregasiónpe, jajorrespeta vaʼerã ha ñambaʼapo oñondive (Efes. 4:16). Ñambaʼapo jave en unida, káda uno oñandúta ojehayhuha chupe ha pe kongregasión imbaretéta. Enterove ansiáno oĩva kongregasiónpe ningo oñenombra Jehová espíritu sánto rupive. Upéicharõ jepe, káda uno oreko diferénte avilida (1 Cor. 12:17). Ikatu oime algúno ramoiténte oñenombra raʼe ha ndorekoguasúi experiénsia umi ótro ansiánoicha. Ikatu oime oĩ umi ndaikatuvéimava ojapo heta mbaʼe ijedáma térã hasykatu rupi. Péro ni peteĩ ansiáno nomañái vaʼerã ótro ansiánore ha heʼi: “Naikotevẽi nderehe”. Upéva rangue, káda ansiáno osegi vaʼerã pe konsého Pablo omeʼẽ vaʼekue Romanos 12:10-pe. w20.08 26 párr. 1, 2, 4

Jehová ñandegia hína pe tape oporoguerahávare jeikovépe. Upearã ojevale pe iñorganisasión orekóvare ko yvy ape ári. Katuete ningo Ñandejára organisasión omyesakã porãve jave peteĩ enseñánsa bíblica, térã mbaʼéichapa jaiko vaʼerã ñanepotĩ hag̃ua Jehová renondépe, ñande pyaʼe porã voi jaasepta upéva. ¿Péro mbaʼépa jajapo Ñandejára organisasión okambia jave peteĩ mbaʼe, ha upéva ñandeafekta? Por ehémplo oñevendéramo ñane Salón del Rréino. Ñande jasegíta javyʼa ñanemanduʼáramo ñambaʼapoha hína Jehovápe g̃uarã, ha haʼe odirihiha hína iñorganisasión (Col. 3:23, 24). Rréi David oheja vaʼekue ñandéve peteĩ ehémplo porã omeʼẽrõ guare ikontrivusión oñemopuʼã hag̃ua pe témplo. Haʼe heʼi vaʼekue: “¿Máva piko che ha máva piko che puévlo rojapo hag̃ua ndéve ko ofrénda voluntária? Pórke ndehegui voíngo ou entéro mbaʼe, ha ore ningo romeʼẽ jeýnte ndéve umi mbaʼe osẽ vaʼekue nde pógui” (1 Crón. 29:14). Ñameʼẽ jave ñane kontrivusión, ñande avei ñameʼẽ jey hína Jehovápe umi mbaʼe osẽ vaʼekue ipógui. Péro Jehová ovyʼaiterei ñameʼẽ jave ñane tiémpo, ñane mbaretekue ha ñande pláta ojejapo hag̃ua pe traváho haʼe oipotáva (2 Cor. 9:7). w20.11 22, 23 párr. 14-16

Ñande testígo de Jehová ndajaʼéi oho porãha ñandéve jagueru haguérente heta hénte Jehová organisasiónpe (Luc. 8:11-15). Jasegíramo japredika umi notísia porã, ha ñamboʼe ótrope, Jehová heʼíta ñanderehe jajapo porãha ñane rembiapo. ¿Mbaʼérepa? Pórke ñaneñeʼẽrendu hína chupe ha Itaʼýrape (Mar. 13:10; Hech. 5:28, 29). Ñande koʼýte jaikuaa tekotevẽha japredika pórke ko múndo aña oñehundi potaitéma. Saʼipaitéma ningo hemby pe tiémpo jarekóva japredika ha ñaipytyvõ hag̃ua umi héntepe ikatu hag̃uáicha ojesalva. Upévare aníkena ehaʼarõ ne situasión iporãmbaite raẽ eñepyrũ hag̃ua ko tembiapo iñimportantetéva. Koʼag̃aite voi reñehaʼãve vaʼerã epredikase, eaprende hetave mbaʼe la Biblia omboʼévagui, eñembopyʼaguasuve ha ndesakrifikadove. Embaʼapo umi mas de 8 millón opredikávandi umi notísia porã ko yvy tuichakuére, ha péicha reñandúta pe vyʼa Jehová omeʼẽva (Neh. 8:10; Luc. 5:10). Ejerresolvékena epredikataha ikatuháicha entéro, ha esegitaha rejapo Jehová heʼi peve ojejapopamaha ko traváho. w20.09 7 párr. 18-20

Ñande ndovaléi jajedesvia ha jaiko pláta rapykuéri. ‘Umi rrikésa tuicha oporombotavy’ ha ikatu voi jaju ndajahayhuvéi Jehovápe, nañamombaʼevéi Ñandejára Ñeʼẽ, ha nañamombeʼusevéi ótrope umi mbaʼe heʼíva upépe (Mat. 13:22). Ñande japroteheséramo umi mbaʼe Jehová onkarga vaʼekue ñandéve, pyaʼe jajapo vaʼerã álgo jahecháramo peteĩ pelígro. Ñande ikatúma hína jajeprepara, ha jahecháma mbaʼépa jajapóta jaipuru jave Internet, térã jahecha jave pelíkula térã téle, peichahágui osẽramo g̃uarã ñandéve derrepentete peteĩ mbaʼe itieʼỹ térã ivioléntova, térã peteĩ informasión omosarambíva umi apóstata. Ñande jajepreparáramo ñambohovái hag̃ua umi mbaʼe ikatúva oiko, pyaʼe voi japrotehéta ñane amista Jehovándi ha jasegíta ñaime porã henondépe (Sal. 101:3; 1 Tim. 4:12). Ñande ningo ñañangareko vaʼerã umi mbaʼe ivaliosoitéva Jehová omeʼẽ vaʼekuére ñandéve: Umíva hína umi enseñánsa porãite oĩva la Bíbliape, ha pe priviléhio jarekóva ñamboʼévo umíva ñande rapichakuérape. Jajapóramo upéicha ñanekonsiénsia potĩta, ñande rekove isentídota, ha javyʼáta ñaipytyvõ haguére ótrope oikuaa hag̃ua Jehovápe. w20.09 30 párr. 16-19

¿Ndépa rejevautisáma? Oiméramo upéicha, rejevautisárõ guare nde rehechauka opavave renondépe rejeroviaha Jehováre, ha reserviseha chupe iñorganisasión ndive. Koʼág̃arupi Jehová odirihi hína iñorganisasión ha pe odirihi lája ohechauka mbaʼeichagua persónapa haʼe, mbaʼépa ojapose ha mbaʼépa ohaʼarõ ñandehegui. Jahechakuaa mbohapy kualida Jehová ohechaukáva iñorganisasión rupive. Primero, ‘Ñandejára otrata enterovépe peteĩchante’ (Hech. 10:34). Jehová oporohayhu rupi omeʼẽ vaʼekue Itaʼýra “orreskata hag̃ua enterovépe” (1 Tim. 2:6; Juan 3:16). Jehová oipuru ipuévlope opredika hag̃ua umi notísia porã enterove ohendusévape, péicha haʼe oipytyvõ enterove ikatúvape oñevenefisia hag̃ua pe rreskátegui ha ojesalva. Segundo, Ñandejára Jehová ‘omoĩ pyʼaguapy ha ndojapói mbaʼevete sarambikuépe’ (1 Cor. 14:33, 40). Upévare ikatu ñahaʼarõ isiervokuéra oadorataha chupe pyʼaguapýpe ha ndojapomoʼãiha upéva sarambikuépe. Tercero, Jehová haʼe hína pe “Mboʼehára Ijojahaʼỹva” (Is. 30:21). Upévare iñorganisasión ombaʼapo jejopy omboʼe hag̃ua ótrope Ñandejára Ñeʼẽ heʼíva, tahaʼe kongregasiónpe térã predikasiónpe. w20.10 20 párr. 1-3