Mayo

Jesús imitãrõ guare odesidi vaʼekue iñeʼẽrendutaha ituakuérape. Haʼe núnka noñemoĩri ituakuéra omboʼévare chupe, openságui haʼe oikuaaveha chuguikuéra. Jesús ojagarra vaʼekue ensério pe rresponsavilida orekóva haʼe rupi pe taʼýra ypykue. Haʼe oiméne ombaʼapo jejopy rakaʼe oaprende hag̃ua karpintería Joségui, péicha ikatúta oganaʼimi pláta oipytyvõ hag̃ua ifamíliape. Jesús tuakuéra oiméne omombeʼu rakaʼe chupe haʼe onase hague peteĩ milágro rupive, ha avei mbaʼépa heʼi vaʼekue hese Ñandejára mensaherokuéra (Luc. 2:8-19, 25-38). Péro Jesús noñekontentái vaʼekue oikuaa haguérente upéva, haʼe ostudia porã vaʼekue avei Ñandejára Ñeʼẽ. ¿Mbaʼéichapa jaikuaa upéva? Pórke imitãme gueteri umi mboʼeharakuéra oĩva Jerusalénpe “tuicha oñesorprende ohechávo mbaʼeichaitépa ontende heta mbaʼe ha okontesta la oñeporandúva chupe” (Luc. 2:46, 47). Orekórõ guare 12 áñonte, Jesús oĩma vaʼekue segúro Jehová haʼeha Itúa ostudia porã rupi Ñandejára Ñeʼẽ (Luc. 2:42, 43, 49). w20.10 29, 30 párr. 13, 14

Jesucrístope oñemoingove jey rupi, ñande jaguerovia oĩtaha pe rresurreksión. Apóstol Pablo oñepyrũrõ guare oñeʼẽ pe rresurreksiónre, omyesakã porã vaʼekue mbohapy mbaʼe: 1) “Cristo omano hague ñandepeʼa hag̃ua pekádo poguýgui”, 2) ‘Crístope oñeñotỹ hague’, ha 3) ‘oñemopuʼã jey hague chupe 3 día haguépe, heʼiháicha Ñandejára Ñeʼẽme’ (1 Cor. 15:3, 4). ¿Mbaʼe signifikádopa oreko ñandéve g̃uarã Jesús omano, oñeñotỹ ha oñemoingove jey hague? Isaías oprofetisa vaʼekue pe Mesíaspe ‘ojepeʼataha ko yvy ape árigui’, ha ‘oñemoĩtaha chupe peteĩ sepultúrape umi iñañáva ndive’. Péro oiko vaʼerã kuri hetave mbaʼe. Isaías heʼi vaʼekue avei pe Mesías ‘oguerahataha ijapére umi hénte pekádo’. Jesús ojapo vaʼekue upéva omeʼẽrõ guare hekove ñanderehehápe (Is. 53:8, 9, 12; Mat. 20:28; Rom. 5:8). Jesús omano, oñeñotỹ ha oñemoingove jey haguére, ikatu jareko peteĩ esperánsa isegúrova jajeitaha pe pekádo ha ñemano poguýgui, ha jahecha jeytaha umi jahayhúva omano vaʼekuépe. w20.12 2, 3 párr. 4-6; 5 párr. 11

Apóstol Pablo pyʼỹinte opredika vaʼekue umi sinagóga judíape. Por ehémplo, pe sinagóga oĩvape Tesalónicape haʼe “3 sábadore omboʼe ha oipytyvõ [umi judíope] ontende hag̃ua Ñandejára Ñeʼẽ” (Hech. 17:1, 2). Oiméne Pablo oñeñandu porã rakaʼe pe sinagógape, pórke haʼe judío vaʼekue voi (Hech. 26:4, 5). Pablo ontende vaʼekue umi judíope, ha upévare naiprovlemaiete opredika hag̃ua chupekuéra (Filip. 3:5). Péro upéi umi hénte opuʼã Páblore ha omosẽ chupe Tesalónicagui ha avei Beréagui, upémarõ haʼe oho Aténaspe. Upépe haʼe oñepyrũ jey “omboʼe umi judío ha umi ótro hénte oadorávape Ñandejárape, ha oipytyvõ chupekuéra ontende hag̃ua Ñandejára Ñeʼẽ” (Hech. 17:17). Péro Pablo opredikárõ guare pe merkádope, umi hénte ohendúva chupe idiferénte vaʼekue. Umi ohendúva chupe apytépe oĩ umi filósofo ha umi ndahaʼéiva judío, ha chupekuéra g̃uarã ‘ipyahu’ vaʼekue umi mbaʼe Pablo omboʼéva. Upévare heʼi chupe hikuái: “Rohendu reñeʼẽha heta mbaʼe iñextráñovare oréve g̃uarã” (Hech. 17:18-20). w20.04 9 párr. 5, 6

Jafalla jave aníkena ñapensa ndajavaleiha mbaʼeverã. Ñanemanduʼa vaʼerã enterove jajavyha jepi ha ñaikotevẽha Ñandejára imbaʼeporã ñanendive, ha haʼe ohechauka ñandéve upéva Jesús sakrifísio rupive (Efes. 1:7; 1 Juan 4:10). Ha ñane ermáno ha ermanakuéra kongregasionpegua ikatu ñanemokyreʼỹ. Haʼekuéra ikatu ñanerendu ñaikotevẽ jave ñañeʼẽ, ha heʼi ñandéve umi mbaʼe ñanemokyreʼỹ vaʼerã (Prov. 12:25; 1 Tes. 5:14). Joy, peteĩ ermána Nigeriagua heta ohasa asy vaʼekue oñedesanima rupi. Haʼe heʼi: “¿Mbaʼéiko oiko vaʼerãmoʼã chehegui umi ermanokuéra reheʼỹ? Umi ermáno ha ermanakuéra chemokyreʼỹ jave, ohechauka hikuái Jehová ohenduha umi che ñemboʼe. Ha aaprende avei chuguikuéra mbaʼéichapa ikatu amokyreʼỹ ótro oñedesanimávape”. Péro ñanemanduʼa vaʼerã avei ñane ermanokuéra ndahaʼemoʼãiha siémpre opillátava ñande ñañeñandu vaiha. Upévare ñande ñañemoag̃ui vaʼerã peteĩ ermáno térã ermána ijerovia mbaretévare ha jajerure chupe ñanepytyvõ hag̃ua. w20.12 23, 24 párr 7, 8

Jareko hag̃ua peteĩ persónape ñane amigoitéramo, tekotevẽ ñañemotiémpo jaikuaa hag̃ua chupe. Ñañemongetáramo oñondive umi mbaʼe ñapensa ha jahasávare oikóta ñandehegui oñoamígo. Péro sapyʼánte ndahaʼéi la ifasilpáva jareko hag̃ua Jesúspe ñane amigoitéramo, pórke ñande ndajajotopáiva Jesús ndive personálmente. Péro heta kristiáno síglo primérope guare ndojotopáinte vaʼekue avei Jesúsndi. Upéicharõ jepe, apóstol Pedro heʼi chupekuéra: “Peẽ ndapehecháiramo jepe arakaʼeve Crístope, pehayhu chupe. Ndapehecháiramo jepe chupe koʼág̃a, pejerovia hese” (1 Ped. 1:8). Jahechakuaa upéicharõ ikatuha oiko ñandehegui Jesús amigoite ndajajotopáiramo jepe hendive. Avei ñande ndaikatúi ñañeʼẽ Jesús ndive. Ñañemboʼe jave, ñande ñañeʼẽ hína Jehovaitépe voi. Ha ñañemboʼéramo jepe Jesús rérape, ñande nañañeʼẽi chupe. Añetehápe Jesús ndoipotái voi ñañemboʼe chupe. ¿Mbaʼérepa? Pórke ñañemboʼe jave ñameʼẽ hína adorasión, ha Jehovápe añoite jaadora vaʼerã (Mat. 4:10). Péro lomímonte ikatu jahechauka jahayhuha Jesúspe. w20.04 20 párr. 1-3

Umi yma ohaʼã vaʼekue karréra Gréciape ombohovái vaʼerã heta mbaʼe ijetuʼúva, por ehémplo ikaneʼõ térã hasy chupekuéra álgo. Péro haʼekuéra ojerovia vaʼerã pe entrenamiénto ha fuérsa orekóvare. Ñande ningo jajogua umi ohaʼãvape karréra, pórke jareko avei entrenamiénto jadipara hag̃ua ko karrérape. Péro ñande jareko peteĩ mbaʼe iporãvéva haʼekuéra ndorekóiva. Jehová ikatu omeʼẽ ñandéve podér, ha upe ipodér núnka ndopamoʼãi, osegíta ñanepytyvõ ñande ñaimoʼãʼỹháicha. Ha ñande jajeroviáramo Jehováre, haʼe ndahaʼéi omeʼẽtanteva ñandéve entrenamiénto, síno omeʼẽta avei ñandéve pe fuérsa ñaikotevẽva. Apóstol Pablo ombohovái vaʼekue heta mbaʼe ijetuʼúva. Chupe oñemaltrata ha ojepersegi vaʼekue, ha hiʼarive haʼe sapyʼánte ikangy ha tekotevẽ vaʼekue oaguanta peteĩ mbaʼe oikutúva chupe ñuatĩcha (2 Cor. 12:7). Péro haʼe noñentregái ombohovái haguére umi mbaʼe vai, upéva rangue oaprovecha umíva ohechauka hag̃ua Jehovápe ojeroviaha hese (2 Cor. 12:9, 10). Pablo opensa haguére upéicha, Jehová siémpre oipytyvõ chupe ohasárõ guare umi mbaʼe ijetuʼúva. w20.04 29 párr. 13, 14

Ñande jareko avei ótro tesóro ndajahecháiva ha upéva hína ñambaʼapo Jehovándi, Jesús ha umi ánhel ndive (2 Cor. 6:1). Ñande ñambaʼapo hendivekuéra ñasẽ jave japredika ha ñamboʼe la héntepe. Pablo heʼi vaʼekue ijehe ha umi ojapóvare ko tembiapo: “Ore ningo Ñandejára ajudánte” (1 Cor. 3:9). Ñande ñasẽ jave japredika ha ñamboʼe la héntepe oiko avei ñandehegui Jesús ajudánte. Ñanemanduʼa vaʼerã avei Jesús omanda rire isegidorkuérape: “Tapeho pemboʼe umi hénte entéro paisguápe oiko hag̃ua chuguikuéra che disípulo”, upéi heʼi hague: “Che aĩta penendive” (Mat. 28:19, 20). ¿Ha mbaʼéichapa ñambaʼapo umi ánhel ndive? Jaagradeseterei ningo umi ánhel ñandedirihi haguére jaikuaauka jave umi “notísia porã umi oikóvape ko yvy ári” (Apoc. 14:6). Ñande ñamombeʼu pe mensáhe oñeʼẽva Ñandejára Rréinore, ha upe semílla ikatu hoʼa ha okakuaa umi hénte ipyʼaporãva korasõme (Mat. 13:18, 23). ¿Mávapa hína upe omongakuaáva pe añetegua semílla ha omboprodusi porãva? Jesús omyesakã upéva pe téxto koestediaguápe. w20.05 30 párr. 14, 15

Hetaiterei família isarambipa pe divórsio káusare. Umi tuakuéra opyta ipochy ojuehe, ha umi mitãnguéra katu oñandu ndojehayhuiha chupekuéra. Umi família oikóva el mísmo ógape jepe oñeñandu extrañoite ojuehegui. Por ehémplo, peteĩ konsehéro familiár heʼi: “Umi túa, sy ha mitãnguéra noñemongetavéi oñondive. Káda uno órare ohasa umi komputadóra, távlet, selulár, térã videohuégo renondépe. Koʼã família oikóramo jepe el mísmo ógape ndoikuaaguasúi mbaʼeve ojuehegui”. Ko múndope hetaiterei hénte ndohayhúi avavépe, ha ñande ndajajoguaséi chupekuéra. Upéva rangue, ñaaprende vaʼerã jahayhuve hag̃ua ñane hentekuérape ha avei ñane ermáno ha ermanakuéra kongregasionpeguápe (Rom. 12:10). ¿Mbaʼépa heʼise jajoayhu ñande pyʼaite guive oñoermáno teéicha? Koʼápe oñeñeʼẽ pe mborayhu ñañandúvare ñane famíliare ha ñanemomýiva jareko hag̃ua peteĩ amista iporãva oñondive. Péicha avei jahayhu vaʼerã ñane ermanokuéra kongregasionpeguápe, haʼéva avei ñane família. Jajoayhúramo oñoermáno teéicha ñaipytyvõ oĩ hag̃ua unida, ha vyʼápe jaservi hag̃ua Jehovápe oñondivepa (Miq. 2:12). w21.01 20 párr. 1, 2

Oĩramo peteĩ ekípo iñunídova ha ótro katu ndojoguerahaporãi, pe ekípo iñunídovape ifasilvéta hína ogana hag̃ua. Ñane korasõ ikatu hína ojogua upe ekípo iñunídovape umi mbaʼe ñapensáva, jaipotáva ha ñañandúva oĩramo peteĩ ñeʼẽme jaservi hag̃ua Jehovápe. Ñanemanduʼa vaʼerã Satanás oipotaitereiha ñandepyʼamokõi. Haʼe oipota umi mbaʼe ñapensáva, jajaposéva ha ñañandúva oĩ vai ha ojoavy Jehová mandamientokuérandi. Péro ñande ñandepyʼapeteĩse jaservi hag̃ua Jehovápe (Mat. 22:36-38). ¡Aníkena arakaʼeve jaheja Satanáspe ñanembopyʼamokõi! Ñañemboʼe vaʼerã Jehovápe David ojapo haguéicha: “Chepytyvõna ani hag̃ua chepyʼamokõi, ikatu hag̃uáicha arrespeta nde réra”. Ñañehaʼãmbaitékena jaiko heʼiháicha ko ñemboʼépe. Jajerresolvékena káda día jahechaukataha umi mbaʼe jadesidívare, tahaʼe michĩva térã tuicháva, jarrespetaha Jehová réra ñande pyʼaite guive. Jajapóramo upéicha, ñarrepresenta porãta upe téra ñande haʼégui testígo de Jehová (Prov. 27:11). Ha enterove ikatúta jaʼe avei proféta Miqueas heʼi haguéicha: “Ñande ñaneñeʼẽrendúta Ñandejára Jehovápe opa ára g̃uarã” (Miq. 4:5). w20.06 13 párr. 17, 18

Pe rréi del nórte ha umi ótro goviérno oataka vove Ñandejára puévlope, upéva ombopochyetereíta Ñandejára Todopoderósope, ha upépe oñepyrũta pe gérra de Armagedón (Apoc. 16:14, 16). Upe tiémpope pe rréi del nórte ha umi nasión oformáva avei Gog de Magog oñehundietéta, “ha ndaiporimoʼãi avave ikatútava oipytyvõ chupe” (Dan. 11:45). Pe sigiénte versíkulo omombeʼu ñandéve hetave mbaʼe ohechaukáva mbaʼéichapa oñehundíta pe rréi del nórte ha umi ótro goviérno, ha mbaʼéichapa ñande jajesalváta (Dan. 12:1). ¿Mbaʼe rehepa oñeʼẽ hína ko téxto? Miguel haʼe hína ótro téra orekóva Jesucristo, ñande rréi ogovernámava hína. Haʼe ‘oipytyvõ oikóvo Ñandejára puévlope’ 1914 guive, oiko rire chugui rréi yvágape Ñandejára Rréinope. Ha koʼẽrõitéma haʼe “opuʼãta oñemboʼy”, upéva heʼise ohunditaha iñenemigokuérape pe gérra de Armagedónpe. Daniel omombeʼu vaʼekue oĩtaha “peteĩ tiémpo ojeiko asytahápe” ha peichaite peve núnka ndoikóiva gueteri, péro ko tiémpo opáta hína upe gérrape (Apoc. 6:2; 7:14). w20.05 15 párr. 15-17

Josépe ojeguereko aja esklávoramo ha upéi oĩ aja préso, ndaikatúi vaʼekue ojapo mbaʼeve okambia hag̃ua isituasión. ¿Mbaʼépa oipytyvõ vaʼekue chupe siémpre ipositívo hag̃ua? Haʼe oiko rangue opensa umi mbaʼe ndaikatúivare ojapo, oñehaʼãmbaite ojapo porã umi traváho oñemeʼẽ vaʼekue chupe ojapo hag̃ua. José siémpre oñehaʼã vaʼekue ojapo Jehovápe ogustáva. Upéicha rupi Jehová ovendesi entéro mbaʼe José ojapo vaʼekue (Gén. 39:21-23). José rembiasakue ningo ñanemomanduʼa ko múndo iñañaitereiha ha umi hénte iñinhustoha ñanendive. Ikatu voi peteĩ ermáno térã ermána jepe ñandetrata vai. Péro Jehová haʼéramo ñandéve g̃uarã peteĩ ita guasu imbaretéva ha peteĩ lugár isegúro porãva, nañañedesanimaitereimoʼãi ha ndajahejamoʼãi chupe (Sal. 62:6, 7; 1 Ped. 5:10). Ñanemanduʼa vaʼerã avei José orekóne hague 17 áñorupi Jehová omeʼẽrõ guare chupe umi suéño. Jahechakuaa upéicharõ Jehová ojeroviaha umi isiervokuéra imitãvare. Koʼág̃arupi avei haʼekuéra ojogua hína Josépe. Koʼã imitãva ojerovia avei Jehováre, ha ijapytepekuéra oĩ umi ojegueraha reiete vaʼekue kárselpe odesidíma rupi iñeʼẽrendutaha Jehovápe (Sal. 110:3). w20.12 16 párr. 3; 17 párr. 5, 7

Apóstol Pedro ha Juánpe g̃uarã haʼe vaʼekue peteĩ priviléhio ojepersegi chupekuéra haʼe haguére Jesús disípulo, ha omboʼe haguére ótrope umi mbaʼe Jesús omboʼe vaʼekue (Hech. 4:18-21; 5:27-29, 41, 42). ¡Ha ajépa ndaipóri voi mbaʼeve otĩ hag̃ua umi disípulo! Upe tiémpope, umi hénte ndorrespetáiramo jepe umi kristianokuérape, haʼekuéra hetaiterei mbaʼe ojapo oipytyvõ hag̃ua ótrope. Por ehémplo, koʼã kristianokuéra apytépe oĩ vaʼekue umi oskrivíva umi lívro oĩva la Bíbliape, ha umíva koʼag̃aite peve osegi oipytyvõ ha omeʼẽ esperánsa hetaiterei héntepe. Ha pe Rréino haʼekuéra opredika vaʼekue, koʼág̃a ogovernáma yvágape ha koʼẽrõitéma avei ogovernáta enterove yvyporakuérape (Mat. 24:14). Péro hetaiterei áñoma ojapo opa hague pe goviérno rrománo ipoderosoitéva opersegi vaʼekue umi kristiánope. Avei umi kristiáno ifiél vaʼekue koʼág̃a haʼéma rréi yvágape. Péro umi oñemoĩ vaʼekue hesekuéra omanombáma, ha oñemoingove jey mbaʼéramo jepe chupekuéra, oikóta hikuái pe Rréino poguýpe, upe opredika vaʼekue umi kristiáno ndaijaʼeiete hague (Apoc. 5:10). w20.07 15 párr. 4

Abrahán ojerovia mbarete vaʼekue Ñandejára promesakuérare, haʼete vaʼekue voi ohechapáva upe ojeporavo vaʼekuépe, térã pe Mesíaspe, upe oikótavagui rréi Ñandejára Rréinope. Upévare Jesús heʼi vaʼekue umi judío itiempopeguápe: “Pende ru Abrahán ovyʼaiterei pórke ohaʼarõ kuri ohecha pe día che ajutaha, ha oñeimahina upe día ha ovyʼa” (Juan 8:56). Jahechaháicha, Abrahán oikuaa vaʼekue ifamiliare ogovernataha pe Rréino Jehová omoĩtavape, ha haʼe vyʼápe ohaʼarõ vaʼekue Jehová okumpli upe promésa. ¿Mbaʼéichapa Abrahán ohechauka vaʼekue ohaʼarõha pe Rréino, térã pe siuda Ñandejára omopuʼã vaʼekue? Primero, ndoikói vaʼekue chugui ni peteĩ goviérno umáno siudadáno. Haʼe ova ha ova vaʼekue oikóvo ha ndopytái ojogapo peteĩ lugárpe, ha ndoapojái vaʼekue ni peteĩ rréi umánope. Avei Abrahán noñehaʼãi vaʼekue omoĩ peteĩ goviérno imbaʼerãva. Upéva rangue osegi iñeʼẽrendu Jehovápe, ha ohaʼarõ haʼe okumpli ipromésa. Ojapóvo upéicha, Abrahán ohechauka ojeroviaha ipyʼaite guive Jehováre. w20.08 3 párr. 4, 5

Jehová opromete Jesucristo goviérno poguýpe avave ndeʼimoʼãiha: “Cherasy hína” (Is. 33:24). Upéicharõ, umi oñemoingove jeývape ojejapo jeýta heterã hesãiva. Péro haʼekuéra ndahaʼemoʼãi gueteri perfékto, pórke upeichaʼỹrõ umi ihénte ha iñamigokuéra ikatu hína ndoikuaái chupekuéra. Amalisia entéro persónagui oikóta perfékto mbeguekatúpe, ág̃a Jesucristo ogoverna vove 1.000 áño aja, ha Jesús omeʼẽ jeýta Itúape pe Rréino opa rire ae umi 1.000 áño. Upe tiémpope, pe Rréino okumplítama entéro mbaʼe Jehová oipota vaʼekue ojapo, umíva apytépe oipytyvõtama yvyporakuérape oiko hag̃ua chuguikuéra perfékto (1 Cor. 15:24-28; Apoc. 20:1-3). Ñañeimahinamína mbaʼéichatapa ág̃a jarresivi vove umi ñane hénte ha amigokuéra oikove jeývape. ¿Japuka térã ñanerasẽtapa ág̃a vyʼágui? ¿Japurahéitapa Jehovápe javyʼaitereígui? Peteĩ mbaʼe la isegúrova: Jahayhuetereíta ñande Ru Jehovápe oñeinteresáva ñanderehe, ha Itaʼýra ñanderayhuetévape omeʼẽ haguére pe esperánsa oĩtaha rresurreksión. w20.08 16, 17 párr. 9, 10

Apóstol Pablo omboʼe vaʼekue umi kristianokuérape ohecha hag̃ua ikatúpa opyta soltéro oservi hag̃ua Jehovápe (1 Cor. 7:8, 9). Pablo nopensái vaʼekue umi kristiáno opytáva soltéro menove iñimportanteha. Haʼe oiporavo vaʼekue voi Timotéope, peteĩ kariaʼy soltérova ojapo hag̃ua heta mbaʼe iñimportánteva Jehová servísiope (Filip. 2:19-22). Upévare, noĩporãmoʼãi ñapensáramo peteĩ ermáno ikatuha térã ndaikatumoʼãiha oreko peteĩ priviléhio, omenda térã soltéro haguérente (1 Cor. 7:32-35, 38). Jesús ni Pablo nomboʼéi vaʼekue kristianokuéra omenda térã opyta vaʼerãha soltéro. Upéicharõ, ¿mbaʼépa ikatu jaʼe ko mbaʼére? Ñemañaha 1 de octubre de 2012 ombohovái porã ko porandu. Upépe heʼi: “Añetehápe ikatu jaʼe pe matrimónio ha pe soltería haʼeha peteĩ rregálo oúva Ñandejáragui. Jehová nopensái pe nomendáiva otĩ térã ndovyʼái vaʼerãha nomendái haguére”. Jarekóvo upéva enkuénta tekotevẽ jarrespeta pe lugár orekóva kongregasiónpe umi ermáno ha ermanakuéra nomendáiva. w20.08 28 párr. 8, 9

Oĩ umi país la hénte ohendu jave umi notísia porã oñeʼẽva pe Rréinore, oaprendeseve voi chugui. Hiʼãitereíma kuri chupekuéra ohendu umi notísia porã. Péro oĩ avei umi país umi hénte noñeinteresaguasuihápe Ñandejárare ni la Bíbliare. ¿Mbaʼépa la hénte ojapo ohendu jave umi notísia porã nde reikohápe? Tahaʼe haʼéva pe ojapóva hikuái, Jehová oipota jasegi japredika haʼe heʼi peve ovalemaha. Jehová odesidíma arakaʼetépa opáta pe predikasión, ha upéi “og̃uahẽta pe fin” (Mat. 24:14). Jesús heʼi vaʼekue idisipulokuérape mbaʼéichatapa umi hénte ha mbaʼépa oikóta umi ára pahápe. Haʼe oikuaa vaʼekue koʼã mbaʼe ikatuha ojoko isegidorkuérape anive hag̃ua omotenonde pe predikasión. Upévare heʼi vaʼekue idisipulokuérape ‘oñatende porã hag̃ua siémpre’ (Mat. 24:42). Noé tiémpope oĩ vaʼekue heta mbaʼe ikatúva ojoko umi héntepe ani hag̃ua ohendu pe avíso haʼe omeʼẽva, ha koʼág̃arupi umi mbaʼe ikatu avei ñandéve ñandejoko anivéma hag̃ua ñamotenonde pe predikasión (Mat. 24:37-39; 2 Ped. 2:5). Upévare ñande jasegise ñamotenonde ñande rekovépe pe traváho Jehová omeʼẽ vaʼekue ñandéve. w20.09 8 párr. 1, 2, 4

Satanás “ipochyeterei hína”, upévare aníkena ñañembotavy ñandejupe voi ñaimoʼãvo jajesalvataha chugui (Apoc. 12:12). Koʼẽrõitéma ñambohováita heta mbaʼe ijetuʼúva tekotevẽtahápe jahechauka jajeroviaha Jehováre. Saʼipaitéma ofalta oiko hag̃ua “peteĩ jehasa asy guasu”, ha la Biblia heʼi voi: “Ko múndo oñepyrũ guive koʼág̃a peve núnka ndoikóiva péicha” (Mat. 24:21). Upe tiémpope, ñane hentekuéra ikatu hína oñemoĩ ñane kóntrape, ha ojeproivi ñandehegui umi rreunión ha predikasión (Mat. 10:35, 36). ¿Ñandépa káda uno jasegíta rréi Asá ehémplo, ha jajeroviáta Jehová ñanepytyvõ ha ñandeprotehetaha? (2 Crón. 14:11). Jehová ningo koʼág̃a ñandepreparáma hína ñandejerovia mbarete hag̃ua, ikatu hag̃uáicha ñambohovái umi mbaʼe ñaneraʼarõva. Haʼe ojevale hína “pe esklávo de konfiánsa ha iñarandúva” rehe omeʼẽ hag̃ua ñandéve “aliménto hiʼoraitépe”, ikatu hag̃uáicha jareko entéro mbaʼe ñaikotevẽva jasegi hag̃ua ñandejerovia mbarete (Mat. 24:45). Péro káda uno ñande jajapo vaʼerã ñande párte, ha ñambaʼapo jejopy jasegi hag̃ua jajerovia mbarete Jehováre (Heb. 10:38, 39). w20.09 18 párr. 16-18

Jehovápe g̃uarã oĩ porãramo ivoluntándi, ikatu oipuru ijespíritu sánto ojapoka hag̃ua haʼe oipotáva umi orekóvape autorida. Yvyporakuéra ningo ikatu ojoʼo peteĩ kanál odesvia hag̃ua pe ysyry oho hag̃ua haʼekuéra oipotaha gotyo. Péicha avei Jehová ikatu oipuru ijespíritu odirihi hag̃ua umi governánte opensáva, ojapo hag̃ua hikuái haʼe oipotáva oñekumpli hag̃ua ivolunta. Oiko jave upéva, umi orekóva autorida odesidi ojapo umi mbaʼe ou porãva Ñandejára puévlope (ekompara Esdras 7:21, 25, 26 heʼívare). ¿Mbaʼépa ikatu jajapo? Ñande ikatu ñañemboʼe “umi rréi ha enterove umi governántere” haʼekuéra odesidíta jave umi mbaʼe ikatúva oafekta pe predikasión térã umi rreunión (1 Tim. 2:1, 2; Neh. 1:11). Umi kristiáno ypykue ojapo haguéicha, ñande avei ñañemboʼe meme ñande pyʼaite guive umi ñane ermáno ha ermanakuéra oĩvare préso (Hech. 12:5; Heb. 13:3). w20.11 15 párr. 13, 14

Oiméramo nde rembostudia raʼe la Biblia peteĩ persónape, katuete revyʼáta rehechávo chupe ojevautisaha (1 Tes. 2:19, 20). Pe disípulo ojevautisa ramóva haʼe hína peteĩ “kárta” oñeʼẽ porãva pe ombostudia vaʼekuére chupe la Biblia, ha avei pe kongregasión kompletoitére (2 Cor. 3:1-3). Javyʼaiterei ningo jahechávo 4 áñope ko múndo tuichakuére káda mes oñeinforma hague amo 10 millón de estúdio bíblicorupi. Ha umi 4 áñope avei, mas de 280.000 persóna ojevautisa káda áño, ha oiko chuguikuéra testígo de Jehová ha Cristo disípulo pyahu. Péro jahechaháicha, oĩ gueteri hetaiterei estudiánte ikatúva ojevautisa. ¿Mbaʼéichapa ikatu ñaipytyvõ chupekuéra? Jehová ningo ipasiénsia ha omeʼẽ gueteri oportunida la héntepe oiko hag̃ua chuguikuéra Cristo disípulo. Upévare jajapose opa ikatúva ñaipytyvõ hag̃ua chupekuéra ensegidaiténtema voi ojevautisa hag̃ua. ¡Saʼipaitéma ningo la tiémpo hembýva! (1 Cor. 7:29a; 1 Ped. 4:7). w20.10 6 párr. 1, 2

Rréi Saúl naiñeʼẽrendúi vaʼekue Jehovápe. Ha proféta Samuel heʼírõ guare chupe haʼe naiñeʼẽrenduiha, Saúl norrekonoséi ojavy hague. Upéva rangue omoĩ exkúsa ha heʼi ndahaʼeiha la ivaietereíva la oiko vaʼekue, ha omboja pe puévlore heʼívo haʼekuéra ojopy hague chupe ojapo hag̃ua upéicha (1 Sam. 15:13-24). Péro oiko mboyve upéva, haʼe ohechaukáma vaʼekue voi orekoha upe aktitu (1 Sam. 13:10-14). Ñambyasyete ningo haʼe opermiti haguére ikorasõ ijorgullóso. Haʼe nokambiái opensa lája, upévare Jehová okorrehi ha orrechasa chupe. Ñande ningo ndajasegiséi Saúl ehémplo ha ñandeorgullóso haʼéicha. Upévare iporãta ñañeporandu koʼã mbaʼe: “Alee jave peteĩ konsého Ñandejára Ñeʼẽme, ¿amoĩpa exkúsa ani hag̃ua ajapo upépe heʼíva? ¿Apensápa umi mbaʼe ajapóva ndahaʼeiha la ivaietereíva? ¿Ambojápa ótrore afalla jave?”. Ñambohováiramo “si” peteĩva koʼã pregúnta, ñakambia vaʼerã ñapensa lája. Pórke ndajajapóiramo upéva, ikatu hína ñane korasõ ou ijorgullóso ha Jehová ñanderrechasáta iñamígoramo. w20.11 20 párr. 4, 5

Mitãrusu, edesidi vaʼerã mávapepa reservíta. Nde reikuaa porã vaʼerã mávapa Jehová, mbaʼépa hína ivolunta ha mbaʼéichapa ikatu nde rekumpli upéva (Rom. 12:2). Upéi nde ikatútama redesidi pe mbaʼe iñimportantevéva nde rekovépe: Edesidi reservitaha Jehovápe (Jos. 24:15). Nde rejepokuaáramo relee ha restudia meme la Biblia, resegíta rehayhuve Jehovápe ha nde jerovia imbaretevéta. Edesidi vaʼerã remotenondetaha nde rekovépe Jehová volunta. Satanás múndo opromete javyʼataha jaipurúramo umi mbaʼe jajapokuaáva ñanevenefisiorãnte. Péro ñande jaikuaa porã umi oikóva pláta ha mbaʼerepy rapykuérinte, oikeha ‘opaichagua akã rasýpe ha heta ohasa asyha’ (1 Tim. 6:9, 10). Péro nde neñeʼẽrendúramo Jehovápe ha edesidi remotenondetaha nde rekovépe ivolunta, resẽ porãta umi mbaʼe rejapóvape ha “nearandúta” (Jos. 1:8). w20.10 30, 31 párr. 17, 18

Umi kristiáno ypykue tiémpope, pe notísia Jesús opredika vaʼekue omeʼẽ esperánsa enterove persónape. Haʼe omanda vaʼekue isegidorkuérape ojapo hag̃ua pe traváho haʼe omoñepyrũ vaʼekue: Opredika hag̃ua “umi lugár mombyryvehápe jepe ko yvy ape ári” (Hech. 1:8). Péro haʼekuéra ndaikatumoʼãi kuri ojapo upéva ijehegui reínte, oikotevẽta pe espíritu sánto, haʼéva “pe ajudánte” Jesús opromete vaʼekue (Juan 14:26; Zac. 4:6). Jesús segidorkuérape oñemeʼẽ vaʼekue pe espíritu sánto Pentekostés áño 33-pe. Ha pe espíritu sánto oipytyvõgui chupekuéra, ensegidaiténtema oñepyrũ opredika, ha sapyʼaitérõ g̃uarã hetaiterei persónama oguerovia umi notísia porã (Hech. 2:41; 4:4). Ha oĩrõ guare opersegíva chupekuéra, umi disípulo ndahaʼéi ku okyhyjéva ha ndopredikavéimava, síno ojerure Ñandejárape oipytyvõ hag̃ua chupekuéra. Haʼekuéra oñemboʼévo heʼi: “Eipytyvõmína nde esklavokuérape osegi hag̃ua omombeʼu ne ñeʼẽ pyʼaguasúpe”. Upéi henyhẽ hikuái espíritu sántogui ha osegi “opredika pyʼaguasúpe Ñandejára ñeʼẽ” (Hech. 4:18-20, 29, 31). w20.10 21 párr. 4, 5

¿Mbaʼérepa ikatu ñaime segúro Jehová omoingove jey hague Jesúspe? Heta persóna ohecha vaʼekue Jesúspe oñemoingove jey rire, ha omombeʼu ótrope upe ohecha vaʼekue (1 Cor. 15:5-7). Apóstol Pablo omombeʼu umi primeroite ohecha vaʼekue apytépe oĩ hague apóstol Pedro (Cefas). Unos kuánto disípulo okonfirma vaʼekue avei Pedro ohecha hague Jesúspe oñemoingove jey rire (Luc. 24:33, 34). Avei umi 12 apóstol ohecha Jesúspe orresusita rire. Upéi “peteĩ díape Cristo ojechauka mas de 500 ermánope”, upérõ oiméne pe rreunión igustoitéva ojejapo vaʼekue Galiléape, oñemombeʼúva Mateo 28:16-20-pe. Jesús ‘ojechauka vaʼekue avei Santiágope’, haʼe amalisia haʼe vaʼekue imédio ermáno, ha ñepyrũrã ndojeroviái hese haʼeha pe Mesías (Juan 7:5). Péro Santiago ojerovia hese ohecha rire Jesúspe oñemoingove jeýma hague. Pablo oskrivírõ guare ko kárta amo áño 55 rupi, oikove gueteri heta umi ohecha vaʼekue Jesúspe orresusita rire, ha umi odudáva ikatu vaʼekue oporandu chupekuéra. w20.12 3 párr. 5, 7, 8

Ñañeñandu vai jave, ha koʼýte are guivéma jaikóramo ñanderasykatu, ikatu ijetuʼu ñandéve ñandepositívo hag̃ua. Upévare, jajerurékena Jehovápe tañanepytyvõ. Koʼág̃a Jehová nañanemongueráiramo jepe peteĩ milágro rupive, haʼe ñanekonsola ha omeʼẽ ñandéve pe fuérsa ñaikotevẽva ñaaguanta hag̃ua (Sal. 94:19). Por ehémplo, haʼe ikatu omomýi peteĩ ermánope ou hag̃ua ñanepytyvõ umi traváho jarekóvape ogapýpe. Ikatu avei omomýi ñane ermanokuérape oñemboʼe hag̃ua ñanendive, térã ñanepytyvõ ñanemanduʼa hag̃ua peteĩ téxto bíblico ñanekonsolátavare. Por ehémplo umi téxto oñeʼẽva pe esperánsa porãite jarekóvare, ñandeperfektotamaha pe múndo pyahúpe ha ndaiporimoʼãveimaha hasykatúva ni osufríva (Rom. 15:4). Péro ikatu hína ndaikatuvéi japredika jajaposeháicha. Peteĩ ermána hérava Laurel, opyta vaʼekue oñenoháme 37 áñore peteĩ mákina ryepýpe oipytyvõva chupe orrespira hag̃ua. Haʼe oreko vaʼekue avei kánser, heta operasión, ha osẽ ipirére unos kuánto mbaʼasy. Péro koʼã mbaʼe ndojokói chupe opredika hag̃ua. Haʼe opredika umi enfermerokuérape ha umi ohóvape oñatende hese hógape. Ermána Laurel oipytyvõ vaʼekue 17 persónaperupi oikuaa hag̃ua Jehovápe. w20.12 24 párr. 9; 25 párr. 12

Áño 56-pe rupi, apóstol Pablo oikotevẽterei vaʼekue oñepytyvõ chupe. Upérõ peteĩ hénte aty tyryryhápe oguenohẽ Páblope pe témplogui Jerusalénpe, ha oñehaʼã ojuka chupe. Al día sigiénte, ojeguerahárõ guare Páblope pe Sanedrín renondépe, iñenemigokuéra haimete odeskuartisapa chupe (Hech. 21:30-32; 22:30; 23:6-10). Upépe oiméne Pablo oñeporandu rakaʼe: “¿Arakaʼe peve piko ikatúta aaguanta koʼã mbaʼe?”. ¿Mbaʼéichapa oñepytyvõ raʼe Páblope? Pe pyhare ojejagarra rire Páblope, “ñande Ruvicha” oñemboja hendápe ha heʼi chupe: “¡Aníke rekyhyje! Pórke repredika porã haguéicha cherehe Jerusalénpe, péicha avei repredika vaʼerã Rómape” (Hech. 23:11). ¡Ajépa omokyreʼỹeténe raʼe Páblope upe promésa! Jesús ofelisita vaʼekue Páblope opredika haguére Jerusalénpe, ha opromete chupe og̃uahẽ porãtaha Rómape, ikatu hag̃uáicha opredika avei upépe. Oñepromete rire chupe upéva, Pablo oñeñandúne raʼe trankílo ha segúro peteĩ mitã oĩvaicha itúa jyva ári. w20.11 12 párr. 1, 3; 13 párr. 4

Pe esperánsa jarekóva Ñandejára Rréinore haʼete “peteĩ ánkla ñande rekovépe g̃uarã”, ha upéva ñanepytyvõ hína ñaime hag̃ua pyʼaguapýpe jahasa jave umi situasión ijetuʼuetereíva térã ñanekevrantaitereíva. Jajepyʼamongetákena umi mbaʼe oprometévare ñandéve Jehová amo gotyove g̃uarã. Upe tiémpope ndaiporimoʼãvéima mbaʼeve ñandepyʼapýtava (Is. 65:17). Ñañeimahina ñaimemaha pe múndo pyahúpe oĩtahápe pyʼaguapy, upépe ningo ndoikomoʼãvéima mbaʼeve ivaíva (Miq. 4:4). Ñamombaretéta avei ñane esperánsa ñañeʼẽvo ótrope pe múndo pyahúre. Jajapókena opa ikatúva predikasiónpe ha jajapo hag̃ua disípulo. ‘Péicha ipahaite peve ndajadudamoʼãi oñekumplitaha umi mbaʼe ñahaʼarõva’ (Heb. 6:11). Hiʼag̃uivévo ohóvo pe fin, jarekóta hetave provléma ñandepyʼapyetereíva. Ñande ikatúta ñambohovái umíva ha ñaime pyʼaguapýpe, ndahaʼéi jajerovia rupi ñandejehe, síno jajerovia rupi Jehováre. Jahechaukákena umi mbaʼe jajapóva rupive jajeroviaha Jehová promésare: “Tuicha penembaretevéta pepytáramo pyʼaguapýpente ha pejerovia” (Is. 30:15). w21.01 7 párr. 17, 18

Jahechakuaa Éxodo 34:6 heʼiha Jehová ohechaukaha mborayhu ifiélva ha avei oporoporiahuverekoha. Upéva ningo ótra kualida iporãitereíva Jehová orekóva ha ñanemomýiva ñañemoag̃ui hag̃ua hese (Sant. 5:11). Jehová ningo ohechauka ñandeporiahuverekoha operdonávo umi mbaʼe vai jajapóva (Sal. 51:1). Péro la Bíbliape oñeñeʼẽ jave peteĩ persóna oporoporiahuverekóvare, ndeʼiséi operdonanteha ótrope hembiapo vaikue. Peteĩ oporoporiahuverekóva oñandu upéva ipyʼapýpe voi, ha omomýi chupe oipytyvõ hag̃ua peteĩ ohasa asývape hína. Jehová heʼi ñanepytyvõsetereiha ha upe sentimiénto haʼe orekóva imbareteveha peteĩ sy oñandúvagui imembyʼíre (Is. 49:15). Jahasa asy jave Jehová ñandeporiahuvereko, ha upéva omomýi chupe ñanepytyvõ hag̃ua (Sal. 37:39; 1 Cor. 10:13). Ñande ikatu jahechauka jaiporiahuverekoha ñane ermanokuérape ñaperdonávo chupekuéra, ha ndajapytái jave ñandepyʼaro ojapo haguére peteĩ mbaʼe nañandegustáiva (Efes. 4:32). Péro iñimportanteterei avei jahechauka upéva ñaipytyvõvo ñane ermanokuérape ombohovái jave umi situasión ijetuʼúva. Upéicha jasegi hína Jehová ehémplo pórke ndaipóri voi ótro haʼéicha ñanderayhúva (Efes. 5:1). w21.01 21 párr. 5

Peteĩ omoakãva hogapy oñatende vaʼerã ani hag̃ua ohasa la rrája. Ndoikói vaʼerã traváho rapykuérinte, ha upéicha rupi ou noipytyvõporãvéi ifamíliape ijerovia mbarete hag̃ua ha oñandu hag̃ua ojehayhuha chupekuéra, ha avei oñemoñeʼẽ ha okorrehi vaʼerã mborayhúpe ifamíliape. Jehová ningo ñanemboʼe ha ñandekorrehi oipotágui oho porã ñandéve (Heb. 12:7-9). Osegívo Itúa ehémplo, Jesús mborayhúpe omboʼe ha okorrehi isegidorkuérape (Juan 15:14, 15). Haʼe omeʼẽ konsého imbaretéva, péro ojapo upéva mborayhúpe (Mat. 20:24-28). Haʼe ontende avei ñaneimperfektoha ha manterei jajavyha (Mat. 26:41). Peteĩ omoakãva hogapy ha osegiséva Jehová ha Jesús ehémplo imanduʼa hembireko ha ifamília iñimperfektoha. Haʼe ndoikói ‘orrenega vaipa hesekuéra’ ni ijarhél chupekuéra (Col. 3:19). Upéva rangue haʼe osegi pe konsého oĩva Gálatas 6:1-pe, ha oñehaʼã okorrehi chupekuéra “pyʼaguapýpe porãnte”, ha imanduʼa haʼe iñimperfektoha avei. Jesús ojapo haguéicha, haʼe ohechakuaa omboʼe porãvetaha ifamíliape iñehémplo rupive. w21.02 6, 7 párr. 16-18

Jesús sakrifísio rupive, Jehová opaga káda uno oĩvare kongregasiónpe, ha enterove umi ohechaukávare ojeroviaha Jesúsre (Mar. 10:45; Hech. 20:28; 1 Cor. 15:21, 22). Upévare oĩ porãiterei la onombra Jesúspe omoakã hag̃ua kongregasión, pórke haʼe omeʼẽ vaʼekue hekove ñanderehehápe. Upévare Jesús oreko pe autorida omoĩ hag̃ua umi rrégla heʼíva mbaʼépa ojapo vaʼerã umi persóna, umi família ha pe kongregasión kompletoite. Ha oreko avei derécho ojasegurávo oñekumpliha hína umi rrégla (Gál. 6:2). Péro Jesús ndahaʼéi omoĩnteva umi rrégla, haʼe ningo oñangareko porã ñanderehe ha ñanderayhu (Efes. 5:29). Ermanakuéra katu ohechauka hína orrespetaha Crístope osegívo pe gía omeʼẽva umi ermanokuéra oñenombra vaʼekue oñangareko hag̃ua hesekuéra. Ha umi ermáno orrespeta ha omombaʼe jave ermanakuérape, ohechauka ontendeha Jehová omeʼẽ hague autorida algúnope oporomoakã hag̃ua. Kongregasiónpe enterove ontende ha orrespetáramo Jehová omeʼẽ hague siérta autorida ótrope, oĩta pyʼaguapy kongregasiónpe. Ha iñimportanteveha, ótro ohechávo ñane kondúkta omombaʼeguasúta Jehovápe, ñande Ru yvagapegua ñanderayhuetévape. w21.02 18, 19 párr. 14-17

David okañýrõ guare oikóvo Saúlgui, haʼe ha iñirũnguéra oheja ifamiliakuérape hógape ha oho oñorairõ. Péro upe aja, iñenemigokuéra ou oataka hogakuéra ha oguerahapaite umi ifamíliape. David ikatu vaʼekue opensa: “Chéngo peteĩ gerréro vale ha chénte ikatu akalkula mbaʼéichapa agueru jeýta che familiakuérape”. Péro upéva rangue, ojerure Jehovápe oipytyvõ hag̃ua chupe. Davídpe oporandu Jehovápe: “¿Apersegi vaʼerã piko umi ou vaʼekuépe omondapa?”. Jehová heʼi Davídpe oho hag̃ua, ha haʼe oipytyvõtaha chupe orreskata hag̃ua ihentekuérape (1 Sam. 30:7-10). Peẽ imitãva, ¿mbaʼépa ikatu peaprende upe oiko vaʼekuégui? Pejerurékena ótrope konsého pedesidi mboyve peteĩ mbaʼe. Peñemongetákena pende tuakuérandi. Ha ikatu avei perresivi konsého iporãva umi ansiáno ikatupyrývagui. Jehová ningo okonfia koʼã kuimbaʼe onombra vaʼekuére, ha peẽ ikatu avei pejapo upéva. Jehová ohecha voi koʼã kuimbaʼépe “rregáloramo” kongregasiónpe g̃uarã (Efes. 4:8). Peẽ ningo ikatúta pedesidi porã heta mbaʼe pejeroviáramo haʼekuéraicha, ha pehendúramo umi konsého porã omeʼẽva hikuái. w21.03 4, 5 párr. 10, 11

Jesús heʼi vaʼekue ndajajapóiramo umi mbaʼe ñaaprendéva, jajoguataha peteĩ kuimbaʼe ojogapo vaʼekuépe yvykuʼi ári. Haʼe heta ombaʼapo upearã, péro reiete oñehaʼã hese. ¿Mbaʼérepa? Pórke upéi ou peteĩ torménta ivaietereíva, ha pe y ojupívo ojagarrapa la hóga. Upéicha rupi pe óga hoʼa ha oñehundiete (Mat. 7:24-27). Péicha avei ñande ndajajapói umi mbaʼe ñaaprendéva, amo ipahápe japerde reíta hína ñane tiémpo. Ág̃a ñambohovái vove umi provléma térã jajepersegi, ñande jerovia naimbaretemoʼãi ikatu hag̃uáicha ñaaguanta umíva. Péro jastudia ha ñamoĩ jave en práktika umi mbaʼe ñaaprendéva, jadesidi porãve, ñandepyʼaguapyve ha ñandejerovia mbareteve (Is. 48:17, 18). Upévare, jasegi hag̃ua ñandefiél Jehovápe ñane provléma jave, tekotevẽ ñañemboʼe kontinuadoite ha jajepokuaa jastudia la Biblia. Ha siémpre ñanemanduʼa vaʼerã iñimportanteveha opa mbaʼégui ñamombaʼeguasu Jehovápe. Ikatu ñaime segúro Jehová núnka nañanderejamoʼãiha, ha umi hénte ndaikatumoʼãiha ojapo mbaʼeve ikatu vaʼerã ojoko Jehovápe ñanderayhu hag̃ua (Heb. 13:5, 6). w21.03 15 párr. 6; 18 párr. 20