Junio

Umi instruktór ohechauka vaʼerã oñeinteresaha iñestudiántere, ohecháma vaʼerã chupekuéra ermáno térã ermánaicha. Ijetuʼu ningo pe estudiántepe oheja hag̃ua umi iñamigokuéra mundopeguápe ha okambia umi mbaʼe tekotevẽvape oservi hag̃ua Jehovápe. Umi instruktór ikatupyrýva oipytyvõ iñestudiántepe oikuaa hag̃ua ótrope kongregasiónpe. Koʼã ermáno ha ermanakuéra ikatu avei oipytyvõ chupe oñemoag̃uive hag̃ua Jehováre. Pe estudiánte ningo ikatu ovyʼa ojeheʼávo Ñandejára puévlore, ha umi ermáno ikatu oipytyvõ chupe oiko hag̃ua Jehová amigoitéramo, ha omokyreʼỹ chupe ombohovái jave umi provléma. Ñande jaipota káda estudiánte oñandu orekoha peteĩ lugár kongregasiónpe ha haʼeha ñane família. Ñande jaipota káda estudiánte oĩse pe família tuichaitévape, oĩháme ermáno ha ermanakuéra oporohayhuetéva. Péicha ifasilvéta chupe ohejaite hag̃ua umi iñamista noipytyvõmoʼãiva chupe oñemoag̃ui hag̃ua Jehováre (Prov. 13:20). Umi iñamigokuéra yma guare omboykéramo chupe, haʼe oikuaáta ikatuha otopa iñamigorã Jehová organisasiónpe (Mar. 10:29, 30; 1 Ped. 4:4). w20.10 17 párr. 10, 11

Oikómante vaʼerã ñandehegui Jesús amígo jarekoséramo peteĩ amista iporãva Jehovándi. ¿Mbaʼérepa jaʼe upéva? Primero, Jesús heʼi vaʼekue idisipulokuérape: “Pe Túa voi penderayhu, peẽ cherayhúgui” (Juan 16:27). Haʼe heʼi vaʼekue avei: “Che rupive añoite ikatu oñeg̃uahẽ pe Túa rendápe” (Juan 14:6). Ñañehaʼãramo oiko hag̃ua ñandehegui Jehová amígo jarekoʼỹre Jesúspe ñane amígoramo, haʼete ku ñañehaʼãva jaike peteĩ edifísiope jahasaʼỹre pe okẽrupi. Jesús oipuru vaʼekue peichagua komparasión oñeʼẽrõ guare ijehe, ha heʼi: “Che hína pe okẽ umi ovecha ohasaha” (Juan 10:7). Segundo, ndaipóri ótro ohechauka porãvéva umi kualida Jehová orekóva Jesús ojapo haguéicha. Haʼe heʼi vaʼekue idisipulokuérape: “Upe chéve cherecháva ohecháma avei pe Túape” (Juan 14:9). Upévare, jaikuaa hag̃ua Jehovápe iñimportanteterei jastudia umi mbaʼe Jesús ojapo vaʼekue. Péicha jaikuaavévo Jesúspe, jahayhuvéta chupe, ha amáske jahayhuve Jesúspe, jahayhuvéta avei Itúape. w20.04 21, 22 párr. 5, 6

¿Ndépa repytáma tupápe térã reime sílla de rruédape? ¿Nderrodíllapa ikangýma ndehegui térãpa nderehechaporãvéima? Oiméramo upéicha, nde lomímonte ikatu gueteri redipara ko karrérape umi imitãva ha hesãivandi. Heta ijedáva ha hasykatúva odipara hína ko karréra oporogueraháva jeikove opaveʼỹvape. Haʼekuéra ningo ndaikatúi ojapo upéva ijehegui reínte, síno Jehová omeʼẽ chupekuéra pe fuérsa oikotevẽva. Upéva orresivi hikuái ohendúvo umi rreunionkuéra por teléfono térã ohecha umi rreunión oñemboguejy vaʼekue oĩva JW Stréamingpe. Avei haʼekuéra opredika umi doktór, enferméra ha ihentekuérape. Oiméramo nde ndaikatuvéima rejapo entéro mbaʼe rejaposéva Jehová servísiope, aníkena reñedesanima, ha repensa ndaikatumoʼãiha reaguanta oñehundi peve ko múndo aña. Jehová ningo nderayhu rejerovia haguére hese, ha omombaʼe entéro mbaʼe rejapo vaʼekue hesehápe umi áño ohasa vaʼekuépe. Koʼág̃a ningo nde koʼýte reikotevẽ hese, ha haʼe núnka nanderejamoʼãi (Sal. 9:10). Upéva rangue, Jehová koʼýte oñemoag̃uivéta nderehe. w20.04 29 párr. 16, 17

¿Mbaʼe témarepa ikatu ñañeʼẽ peteĩ persóna irrelihiósovandi? Jatopa vaʼerã peteĩ mbaʼe mokõive ñaimeha de akuérdo, ha jaipuru upéva japredika hag̃ua chupe. Por ehémplo, haʼe ikatu oadora peteĩ Dióspente, oguerovia Jesús ou hague omano ñanderehehápe ñandesalva hag̃ua, térã ohechakuaa koʼẽrõitéma opataha umi mbaʼe vaiete oikóva koʼág̃arupi. Jaipurúkena umi mbaʼe mokõive ñaimeha de akuérdo japredika jave umi héntepe. Upéicha jajapóramo pe persóna ikatu hína oikuaaseve la Biblia heʼívagui. Ñanemanduʼa vaʼerã avei umi hénte sapyʼánte ndogueroviaiha entéro mbaʼe irrelihionkuéra omboʼéva. Upévare, japilláramo jepe mbaʼe rrelihionguápa pe persóna, ñañehaʼã vaʼerã jaikuaa mbaʼépa añetehápe oguerovia. Peteĩ misionéro ohechakuaa umi hénte heʼíva ogueroviaha pe Trinida, añetehápe ikatu hína ndogueroviái pe Túa, pe Taʼýra ha pe espíritu sánto peteĩnteha. Haʼe heʼi: “Chemanduʼáramo pe persóna ikatuha ndogueroviái opa mbaʼe irrelihión omboʼéva, ifasilve chéve atopa hag̃ua mbaʼépepa roĩ de akuérdo”. Upéicharõ ñañehaʼã vaʼerã jaikuaa mbaʼépa añetehápe oguerovia la hénte. Péicha jasegíta apóstol Pablo ehémplo ha jaʼéta avei: “Ajapo entéro mbaʼe aipytyvõ hag̃ua opaichagua persónape” (1 Cor. 9:19-22). w20.04 10 párr. 9, 10

Daniel ha Juan heʼi Jehová ha Jesús osalvataha isiervokuérape pe jehasa asy guasu aja. Upévare ijetuʼútaramo jepe upe tiémpope, ñande koʼág̃ama voi ikatu ñaime trankílo. Daniel heʼi umi ohasátava pe jehasa asy guasu haʼetaha umi hénte orekóva “héra Ñandejára lívrope”. ¿Mbaʼépa ñande jajapo vaʼerã oñemoĩ hag̃ua avei ñande réra upe lívrope? Jahechauka vaʼerã jajeroviaha Jesús rehe, haʼéva Ñandejára Ovecha Raʼy (Juan 1:29). Tekotevẽ ningo ñañemeʼẽ Jehovápe ha jajevautisa (1 Ped. 3:21). Avei jahechauka vaʼerã jaapojaha Ñandejára Rréino ñaipytyvõvo opa ikatúvape oikuaa hag̃ua Jehovápe. Koʼág̃ama voi ñamombareteve vaʼerã ñande jerovia Jehová ha iñorganisasión rehe, oĩháme isiervokuéra ifiélva. Koʼág̃ama voi jaapoja vaʼerã Ñandejára Rréino. Jajapóramo upéicha, jajesalváta ág̃a Ñandejára Rréino ohundi vove pe rréi del nórte ha pe rréi del súrpe. w20.05 16 párr. 18, 19

Adán ha Eva ningo oikuaa vaʼekue Jehová réra ha avei heta mbaʼe iñimportánteva chugui. Por ehémplo, oikuaa vaʼekue hikuái Jehová haʼe hague entéro mbaʼe Apohare, haʼe omeʼẽ hague chupekuéra la vída, peteĩ paraíso oiko hag̃ua ha avei peteĩ iñirũrã perféktova (Gén. 1:26-28; 2:18). Péro, ¿osegínepa hikuái ojepyʼamongeta entéro mbaʼe porã Jehová ojapo vaʼekuére hesehapekuéra? ¿Osegínepa hikuái ohechauka ohayhu ha oagradeseha Jehovápe? Koʼã mbaʼe hesakã porãiterei vaʼekue Ñandejára enemígo omoñuhãrõ guare chupekuéra. Ojevalévo peteĩ mbóire, Satanás heʼi Évape: “¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?” (Gén. 2:16, 17; 3:1). Oporandúrõ guare upéva, Satanás ñemihaitépe heʼi peteĩ japu Jehováre, ha upévare Eva oñepyrũma opensa vai hese. Añetehápe ningo Ñandejára heʼi kuri chupekuéra ikatuha hoʼu entéro yvyramáta hiʼávagui, péro peteĩvagui añoiténte ndaikatumoʼãi (Gén. 2:9). Upe Satanás oporandu vaʼekue omopensa chupekuéra Ñandejára ndaipojeraiha. Upéicha rupi, oiméne Eva oñeporandu raʼe: “¿Hakateʼỹpa Ñandejára peteĩ mbaʼe iporãvare ha nomeʼẽséi chéve?”. w20.06 3, 4 párr. 8, 9

Oĩ umi ombopochýva chupe peteĩ ermáno térã ermána ojapo vaʼekue. Apóstol Pablo ohechakuaa vaʼekue sapyʼánte ñandepochytanteha voi peteĩ ermáno térã ermánandi. Ha sapyʼánte ikatu voi nañamereséi kuri ñandetrata hikuái upéicha, ha nañañatendéiramo ikatu japyta ñandepyʼaro. Peteĩ persóna ipochýramo, ikatu hína mbeguekatúpe oñemomombyry Jehová puévlogui. Peteĩ ermáno héravare Pablo oikóva Sudaméricape, reiete oñemboja kuri ojapo hague álgo ivaíva ha upéicha rupi operde ipriviléhio kongregasiónpe. ¿Mbaʼépa haʼe ojapo upe haguére? Pablo heʼi: “Chepochyeterei kuri ha mbeguekatúpe añemomombyry kongregasióngui”. Oiméramo peteĩ persóna opeka vai raʼe yma, ikonsiénsia ikatu voi osegi omolesta chupe heta tiémpore, ha oñandu Ñandejára ndohayhumoʼãveimaha chupe. Ha oiméramo jepe haʼe oñarrepentíma ha ojeporiahuvereko chupe, haʼe lomímonte ikatu oñandu nomereseiha oĩ Ñandejára puévlope. ¿Mbaʼépa ñande ñapensa umi ermáno ha ermána ombohováivare umi situasión ñañeʼẽma hague? w20.06 19 párr. 6, 7

Ñande tekotevẽ ñaaprende jahechakuaa hag̃ua umi situasión ikatúva ipeligróso ñandéve g̃uarã ha jajei chugui (Heb. 5:14). Upévare tekotevẽ ñanearandu ha jaiporavo porã mbaʼépa jajapóta jajediverti hag̃ua. Télepe ha umi pelíkulape pyʼỹinte ojehechauka umi hekovaíva, upeichagua kondúkta ningo ombopochy Ñandejárape ha katuete oporoperhudikáta. Upéicha rupi ñande ñamboykete umichagua diversión, ikatu rupi mbeguekatúpe ñanemomombyry Ñandejáragui ha ndajahayhuvéi chupe (Efes. 5:5, 6). Ñande tekotevẽ jahechakuaa ipeligrosoha umi informasión japu omosarambíva umi apóstata, oñehaʼãvo ñanemboduda ñane ermanokuéragui ha Jehová organisasióngui (1 Tim. 4:1, 7; 2 Tim. 2:16). Umichagua informasión vai ningo ikatu omokangy ñande jerovia. Ñande ndajahejái vaʼerã ñanembotavy koʼã mbaʼe. ¿Mbaʼérepa? Pórke koʼãichagua informasión omosarambi hína ‘umi iménte kyʼáva ha nontendéiva pe añetegua’. Haʼekuéra ojapo upéicha “oñorairõségui ha ojodiskutiségui” (1 Tim. 6:4, 5). Haʼekuéra oipota jaguerovia umi japu heʼíva hikuái ha ñañepyrũ ñadeskonfia ñane ermanokuéragui. w20.09 29 párr. 13, 15

Pe ména ha tembireko ojoayhu ha ojorrespeta vaʼerã (Efes. 5:33). La Biblia ñanemokyreʼỹ ñameʼẽ hag̃ua, ñandéve oñemeʼẽ rangue (Hech. 20:35). ¿Mbaʼe kualidápa oipytyvõta umi omendávape ojoayhu ha ojorrespeta hag̃ua? Iñumílde vaʼerã hikuái. Iñumílde rupi, heta matrimónio oservíva Jehovápe ovyʼave oñondive. Por ehémplo, peteĩ ména hérava Steven heʼi: “Ñambaʼapo vaʼerã oñondive peteĩ ekípoicha, koʼýte jareko jave provléma. Ñapensa rangue: ‘¿Mbaʼépa okonvenive chéve?’, iporãve ñapensa: ‘¿Mbaʼépa iporãve oréve g̃uarã?’”. Ha hembireko Stephanie opensa avei upéicha. Haʼe heʼi: “Avave ningo ndoikoséi peteĩ persóna manterei oiko vaívandi”. Ha heʼive: “Ore rojoavy jave roñehaʼã rohecha mbaʼépa omoñepyrũ raʼe upe provléma. Upéi roñemboʼe, roinvestiga ha roñeʼẽ mbaʼéichapa ikatu rosolusiona pe provléma. Roñehaʼã roataka pe provléma, ha ndahaʼéi ojupe”. Ména ha tembireko ningo ovyʼavéta nopensáiramo haʼe iñimportanteveha hembiayhúgui. w20.07 3, 4 párr. 5, 6

Ndovaléi jajerovia ñandejehe ni umi mbaʼe jajapokuaávare jaservívo Jehovápe. Apóstol Pablo ijestúdio porã vaʼekue, omboʼe chupe peteĩva umi judiokuéra líder ojerrespetavéva upe tiémpope, hérava Gamaliel (Hech. 5:34; 22:3). Ha peteĩ tiémpore, Pablo haʼe vaʼekue peteĩ persóna iñimportánteva umi judiokuéra apytépe (Hech. 26:4). Péro Pablo ndojeroviái vaʼekue ijehe upe haguére. Haʼe vyʼápe oheja vaʼekue umi mbaʼe haʼetévaicha omoimportánteva chupe ko múndope (Filip. 3:8). Pablo ohasa vaʼekue heta mbaʼe ijetuʼúva oiko haguére chugui Jesús segidór. Hese ndaijaʼéi vaʼekue umi hetãygua (Hech. 23:12-14). Umi hapichakuéra rrománo ombyepoti ha omoinge vaʼekue chupe kárselpe (Hech. 16:19-24, 37). Avei haʼe ohechakuaa vaʼekue iñimperfektoha ha hasyetereiha chupe ojapo hag̃ua iporãva (Rom. 7:21-25). Péro oĩramo jepe oñemoĩva hese térã oñeñandúramo jepe kulpávle, haʼe ndohejái koʼã mbaʼe ojoko chupe, upéva rangue ‘ovyʼa ikangy jave’. ¿Mbaʼérepa? Pórke haʼe ikangy jave ohecha porãvéntema mbaʼéichapa Ñandejára podér oipytyvõ chupe (2 Cor. 4:7; 12:10). w20.07 16 párr. 7, 8

Koʼág̃arupi koʼýte tekotevẽ ñamotenonde ñande rekovépe pe predikasión. Jesús heʼi vaʼekue idisipulokuéra osegitaha opredika haʼe omano rire, ha tuichavetaha pe traváho haʼekuéra ojapóva. Ha Jesús orresusita rire, peteĩ milágro rupive oipytyvõ unos kuánto idisípulope oity hag̃ua hetaiterei pira. Ojapo rire upe milágro, Jesús ohechauka idisipulokuérape iñimportanteveha opa mbaʼégui opredika, ha omboʼe umi héntepe oiko hag̃ua chuguikuéra idisípulo (Juan 21:15-17). Jesús oho mboyvemi yvágape heʼi idisipulokuérape pe predikasión haʼe omoñepyrũ vaʼekue og̃uahẽtaha umi lugár mombyryvehápe jepe, ndahaʼéi Israélpe añónte (Hch. 1:6-8). Heta áño rire, Jesús ohechauka apóstol Juánpe peteĩ visión rupive umi mbaʼe oikótava “ñande Ruvicha díape”. Upe visiónpe, Juan ohecha peteĩ mbaʼe ijojahaʼỹva: Peteĩ ánhel orekóva umi “notísia porã opytátava pára siémpre”, ha oikuaauka ko notísia “entéro tetã, trívu, puévlo ha umi oñeʼẽvape diferénte idióma” (Apoc. 1:10; 14:6). Jahechakuaa upéicharõ koʼág̃arupi Jehová oipotaha ñambaʼapo pe predikasión ojejapóvape ko múndo tuichakuére oñemohuʼã meve ko tembiapo. w20.09 9 párr. 5

Abrahán oreko vaʼekue heta provléma hogapýpe. Sara, pe hembireko ohayhuetéva ningo ndaikatúi vaʼekue imemby, ha upe haguére haʼekuéra heta tiémpo oñembyasy ha ndovyʼavéi. Tiémpo rire, Sara omeʼẽ Abrahánpe isiérva Agar ikatu hag̃uáicha haʼe rupive ifamília hikuái. Péro Agar hyeguasúrõ guare oreko hag̃ua Ismaélpe, oñepyrũ oapoʼi Sárape. Upéi ivaietereíma pe situasión ha Sara ombohasa asy ha omotĩ Agárpe, upémarõ Agar osẽ oho hógagui (Gén. 16:1-6). Upéi Sara hyeguasu ha imemby Abrahángui peteĩ mitãkuimbaʼe, ha Abrahán ombohéra itaʼýrape Isaac. Abrahán ohayhu vaʼekue mokõive itaʼýrape, Ismael ha Isaácpe. Péro Ismael otrata vaieterei rupi Isaácpe, Jehová heʼi Abrahánpe omosẽ hag̃ua Ismael ha Agárpe (Gén. 21:9-14). Heta áño rire, Jehová ojerure Abrahánpe oofrese hag̃ua Isaácpe sakrifísioramo (Gén. 22:1, 2; Heb. 11:17-19). Umi mokõi situasiónpe, Abrahán ojerovia vaʼerã kuri Jehová okumplitaha pe promésa ojapo vaʼekue ifamiliarépe g̃uarã. w20.08 4 párr. 9, 10

Ñañeimahinamína mbaʼeichaitépa ovyʼáta umi orresusitáva oipeʼaite vove ijehegui peteĩ aóicha ikondúkta yma guare, ha oiko Ñandejára oipotaháicha. Umi ojapóva koʼã kámbio “orresusitáta oikove hag̃ua”, upéva heʼise ikatutaha oikove pára siémpre pe paraísope. Péro Jehová nopermitimoʼãi umi nokambiaséivape osegi oikove pe paraísope, ha ombyai pe pyʼaguapy oĩva upépe (Is. 65:20; Juan 5:28, 29). Pe Rréino poguýpe Ñandejára siervokuéra ohechakuaáta siertoha Proverbios 10:22-pe heʼíva: “Jehová vendisión ningo la añetehápe ñanemborríkova, ha haʼe ni michĩmi nañanembosufríri”. Pe espíritu sánto oipytyvõgui Ñandejára siervokuérape, ikatúta amás día ojoguave Jesucrístope ha osegi porãve iñehémplo, oiko peve chuguikuéra perfékto (Juan 13:15-17; Efes. 4:23). Koʼẽ koʼẽre hesãivéta hikuái ha oikóta chuguikuéra mehór persóna. ¡Ajépa javyʼaitéta upe tiémpope! (Job 33:25). w20.08 17 párr. 11, 12

¿Mbaʼéichapa ikatu jahechauka jarrespetaha umi ermanokuéra soltéro sentimiénto? Ñanemanduʼa vaʼerã oĩha umi kristiáno odesidi vaʼekue opytatanteha soltéro. Oĩ avei umi omendaséva péro ndotopáinte gueteri iñirũrã haʼe oipotavaichagua, ha oĩ avei umi omano vaʼekue chugui hembiayhu. Tahaʼe haʼeháicha, ¿oĩ porãtapa ermanokuéra kongregasionpegua oporandúramo chupekuéra mbaʼérepa nomendái, térã oofrese chupekuéra imenarã térã hembirekorã? Oiméramo ndojeruréi raʼe ñandéve ñaipytyvõ hag̃ua chupe, ¿mbaʼéichapa oñeñandúne peteĩ ermáno térã ermána ñaipytyvõséramo chupe ojejuhu hag̃ua? (1 Tim. 5:13). Umi soltéro ha soltéra oĩva kongregasiónpe, oagradeseterei ñamombaʼéramo chupekuéra umi kualida porã orekóvare, ha ndajaikóiramo ñambyasy chupekuéra nomendái haguére. Jajapo rangue upéva, iporãta ñamombaʼéramo chupekuéra ifiél haguére. Upéicharõ, ñane ermáno ha ermanakuéra nomendáiva núnka noñandumoʼãi jaʼeha chupekuéra: “Naikotevẽi nderehe” (1 Cor. 12:21). Upéva rangue, oñandúta hikuái jarrespetaha chupekuéra, ha javaloraha pe lugár orekóva hikuái kongregasiónpe. w20.08 29 párr. 10, 14

Upéi Jesús ojechauka vaʼekue avei apóstol Pabloitépe voi (1 Cor. 15:8). Pablo (Saulo) oviaha hína kuri Damáscope ohendúrõ guare Jesús orresusitáma vaʼekue oñeʼẽha chupe, ha ohecha chupe peteĩ visiónpe oĩha yvágape (Hech. 9:3-5). Upe oiko vaʼekue Páblore ohechauka porãvéntema Jesús oikove jey hague (Hech. 26:12-15). Heta hénte oiméne ohecharamo rakaʼe Pablo heʼi vaʼekue, pórke Jesús ojechauka mboyve chupe, Pablo opersegi vaʼekue umi kristianokuérape. Upéi haʼe oguerovia Jesúspe oñemoingove jey hague, ha heta oñehaʼã vaʼekue okonvense hag̃ua ótrope upéva añetehápe oiko hague. Pablo ningo oaguanta vaʼekue heta mbaʼe omombeʼu haguére Jesús omano ha oñemoingove jey hague. Por ehémplo chupe oñembyepoti, ojegueraha kárselpe ha avei oñehundi pe várko oviaha hague (1 Cor. 15:9-11; 2 Cor. 11:23-27). Pablo oĩ vaʼekue segúro Jesús orresusita hague umi omano vaʼekue apytégui, ha oĩ vaʼekue omano hag̃uáicha jepe opredika haguére upéva. Ajépa koʼã kristiáno ypykue heʼíva ñanepytyvõ jajerovia hag̃ua Jesúspe oñemoingove jey hague. Ha avei upéva tuichaiterei omombarete ñande jerovia oikotaha pe rresurreksión amo gotyove. w20.12 3 párr. 8-10

Ñande ikatu ñañeporandu: “¿Ahápa kontinuadoite rreunionhápe?”. Umi rreunión ñanemombarete jasegi hag̃ua jaservi Jehovápe, ha umi ñane ermáno ha ermanakuéra ñanemokyreʼỹ (Mat. 11:28). Ikatu avei ñañeporandu: “¿Ajepokuaápa astudia meme la Biblia?”. Ha oiméramo reiko ne famíliandi, ¿peñemotiémpopa káda semána pejapo hag̃ua pende estúdio de família? Térã reikóramo neaño, ¿reñemotiémpopa avei restudia hag̃ua ojapoháicha peteĩ família? Ha, ¿rejapópa hína opa ikatúva repredika ha remboʼe hag̃ua ótrope la Biblia? ¿Mbaʼérepa ñañeporandu vaʼerã koʼã mbaʼe? La Biblia heʼi ñandéve Jehová ohesaʼỹijoha entéro mbaʼe ñapensáva ha oĩva ñane korasõme, ha ñande jajapo vaʼerã avei upéicha (1 Crón. 28:9). Oiméramo jahechakuaa tekotevẽha ñakambia umi mbaʼe ñapensáva ha jajaposéva, jajerure vaʼerã Jehovápe tañanepytyvõ ñakambia hag̃ua. Koʼág̃a hína pe tiémpo jajeprepara hag̃ua, ikatu hag̃uáicha ñambohovái umi mbaʼe ñaneraʼarõva. w20.09 19 párr. 19, 20

Jesús oipuru vaʼekue umi ehémplo ohechaukáva mbaʼépa ojapo vaʼerã peteĩ persóna oikoséva idisípuloramo. Haʼe oñeʼẽ vaʼekue peteĩ persóna omopuʼãsévare peteĩ óga, ha peteĩ rréi ohótavare gerrahápe. Jesús heʼi vaʼekue pe ojogaposéva ‘oguapy raẽ vaʼerãha okalkula mboýpa ogastáta ohecha hag̃ua ikatútapa ojapopa’, ha pe rréi katu ‘oguapy raẽ vaʼerã oñemongeta umi ikonsehérondi’, ohecha hag̃ua ikatútapa ijehérsito ogana upe ñorairõ (Luc. 14:27-32). Upéicha avei, Jesús oikuaa vaʼekue peteĩ persóna oikoséva idisípuloramo, tekotevẽha okalkula porã mbaʼépa ojapo vaʼerã oiko hag̃ua chugui isegidór. Upéicha rupi, ñande ñamokyreʼỹ vaʼerã ñane estudiántepe káda semána ostudia hag̃ua ñanendive. Ñande haʼe rupi pe instruktór, tekotevẽ jajeprepara porã káda estudiorã. Upéi ñapensa vaʼerã ñane estudiántere, jajepyʼamongeta de antemáno pe informasiónre ha jahecha mbaʼéichapa ikatu jaexplika chupe upéva, isensíllo ha hesakã porã hag̃uáicha chupe. Péicha haʼe ikatúta ontende porã ha ojapo umi mbaʼe oaprendéva (Neh. 8:8; Prov. 15:28a). w20.10 7 párr. 5; 8 párr. 7

Jesús omyesakã porãiterei vaʼekue mbaʼépa oipota jajapo: Ñamboʼe umi héntepe umi mbaʼe haʼe omanda vaʼekue. Péro nañanderesaráiri vaʼerã peteĩ mbaʼe iñimportantetereívagui. Jesús ndeʼíri vaʼekue: ‘Pemboʼe chupekuéra entéro mbaʼe amanda vaʼekue peẽme’. Upéva rangue, haʼe heʼi: “Pemboʼe chupekuéra ojapo hag̃ua entéro mbaʼe amanda vaʼekue peẽme”. Ikatu hag̃uáicha ñakumpli ko mbaʼe, tekotevẽ ñamboʼe ñane estudiántepe mbaʼépa ojapo vaʼerã, ha avei jahechauka chupe mbaʼéichapa ojapo vaʼerã upéva. Ñamboʼe peteĩ persónape ojapo hag̃ua umi mbaʼe Jesús omanda vaʼekue heʼise ñaipytyvõha chupe iñeʼẽrendu hag̃ua. Jastudia jave la Biblia ótrondi, ñande ñamboʼe chupekuéra mbaʼépa Ñandejára ohaʼarõ jajapo. Péro ndahaʼéi upévante la jajapo vaʼerã. Ñamboʼe vaʼerã avei ñane estudiántepe omoĩ hag̃ua en práktika umi mbaʼe oaprendéva (Juan 14:15; 1 Juan 2:3). Ñane ehémplo rupive, ikatu jahechauka ñane estudiántepe mbaʼéichapa haʼekuéra ikatu ojapo umi mbaʼe oaprendéva la Bíbliagui tahaʼe ijeskuélape, itravahohápe térã ojediverti jave. Ñañemboʼe jave ñane estudiántendi ikatu jajerure Jehovápe ijespíritu sánto ogiami hag̃ua chupe (Juan 16:13). w20.11 2, 3 párr. 3-5

Jesús disipulokuéra ombohovái vaʼekue heta mbaʼe ijetuʼúva. Por ehémplo, upérõ ndojeguerekói heta kópia ojejapóva Ñandejára Ñeʼẽgui. Haʼekuéra ndorekói vaʼekue umi puvlikasión omyesakãva la Biblia heʼíva, ñande jarekoháicha koʼág̃arupi. Avei opredika vaʼerã hikuái umi hénte oñeʼẽvape diferénte idióma. Upéicharõ jepe, koʼã disípulo ikyreʼỹetéva ojapo peteĩ mbaʼe avave noimoʼãiva ikatutaha ojejapo: Amo 30 áño haguépente opredikáma hikuái umi notísia porã “ko múndo tuichakuére” (Col. 1:6, 23). Ñane tiémpope, Jehová osegi odirihi ha omombarete ipuévlope ojapo hag̃ua ivolunta. Haʼe prinsipálmente ojevale la Bíbliare ogia hag̃ua ipuévlope, upéva haʼe oskrivika vaʼekue ijespíritu rupive. Upépe ñande jalee Jesús rembiasakue predikasiónpe, ha haʼe omanda hague isegidorkuérape osegi hag̃ua ojapo pe traváho haʼe voi omoñepyrũ vaʼekue (Mat. 28:19, 20). Jehová otrata enterovépe peteĩchante, ha haʼe heʼi vaʼekue umi notísia porã oñemombeʼutaha “entéro tetã, trívu, puévlo ha umi oñeʼẽvape diferénte idióma” (Apoc. 14:6, 7). Haʼe oipota enterove ohendu umi notísia porã oñeʼẽva pe Rréinore. w20.10 21 párr. 6-8

Rréi David ohayhu vaʼekue “Jehová léi” (Sal. 1:1-3). Haʼe oikuaa vaʼekue Jehová oipytyvõha umi iñumíldevape, péro oñemoĩha umi oñemombaʼeguasúvare. Upéicharõ, David oheja vaʼekue Ñandejára léi okambia chupe opensa lája. Haʼe oskrivi vaʼekue: “Jehová ningo omeʼẽ chéve heta konsého, ha amombaʼeguasúta chupe upévare. Pyharekue jepe apensa jave, ahechakuaa mbaʼépepa tekotevẽ amehora” (Sal. 16:7). Ñande ñaneumílderamo, jahejáta la Biblia okambia umi pensamiénto vai jarekóva, jajapo mboyve umi mbaʼe vai ñapensáva. Haʼetévaicha voi ñahendúva Ñandejára Ñeʼẽ heʼíva ñandéve: “Kóva hína pe tape iporãva, eho koʼárupi”. Ñandeavisáta ñasẽ sapyʼárõ pe tapégui ha jaha ñande derécha térã ñande iskiérda gotyo (Is. 30:21). Ñahendúramo Jehovápe, ideprovechoitereíta ñandéve heta mbaʼépe (Is. 48:17). Por ehémplo, nañañemotĩmoʼãi ótro ñandekorrehi haguére, ha ñañemoag̃uivéta Jehováre, pórke jahechakuaáta haʼe ñandetrataha mborayhúpe peteĩ itaʼýra térã itajýraicha (Heb. 12:7). w20.11 20 párr. 6, 7

Oiméne oĩ Coríntope umi kristiáno opensáva upéicha (1 Cor. 15:12). Ótro katu opensa avei pe rresurreksión ndoikói hague literálmente, síno haʼekuéra oĩ hague omanoramoguáicha haʼe haguére pekadór, ha upéi oñemoingove jey oikórõ guare chuguikuéra kristiáno oñeperdonávo chupekuéra ipekádo. Tahaʼe haʼeháicha, haʼekuéra heʼívo ndaiporiha pe rresurreksión, añetehápe ijerovia ndovaléi mbaʼeverã. Oiméramo Ñandejára nomopuʼãi raʼe Jesúspe umi omanóva apytégui, upéicharõ ndojepagái kuri pe rreskáte ha haʼekuéra pekadór gueteri. Upéva heʼise umi ndogueroviáiva pe rresurreksión ndorekoiha peteĩ esperánsa añetetéva (1 Cor. 15:13-19; Heb. 9:12, 14). Pablo oikuaa porã vaʼekue ‘Crístope oñemopuʼã hague omanóva apytégui’. Upe rresurreksión iñimportanteve umi oiko vaʼekuégui ymave, pórke umi oñemoingove jey vaʼekue ko yvy ape ári omano jey upéi. Pablo ningo heʼi Jesúspe ‘raẽve oñemoingove jey hague’, térã haʼe hague pe “primera kosécha”. Jesús haʼe vaʼekue pe primera persóna oñemoingove jeýva peteĩ espírituicha, ha pe primer yvypóra ohóva yvágape (1 Cor. 15:20, nóta; Hech. 26:23; 1 Ped. 3:18, 22). w20.12 5 párr. 11, 12

Umi kristiáno ypykue tiémpope, pe Kuérpo Governánte oĩva Jerusalénpe ombaʼapo vaʼekue en unida omoĩ hag̃ua pyʼaguapy, ha ani hag̃ua mbaʼeve ojejapo sarambikuépe Ñandejára puévlope (Hech. 2:42). Por ehémplo, áño 49 rupi oĩrõ guare pe provléma sirkunsisión rehegua, pe Kuérpo Governánte osegi pe gía omeʼẽva pe espíritu sánto oñeʼẽ hag̃ua ko témare. Noñesolusionáirire ko provléma, pe kongregasiónpe ndaiporimoʼãi unida ha ndaikatumoʼãi opredika porã hikuái. Umi apóstol ha ansianokuéra haʼéramo jepe judío, ndojesegíri hikuái umi kostúmbre judíare ni umi omboʼévare koʼã mbaʼe. Upéva rangue, ohecha hikuái mbaʼépa heʼi Ñandejára Ñeʼẽ ha ojerure espíritu sánto oipytyvõ hag̃ua chupekuéra odesidi porã hag̃ua (Hech. 15:1, 2, 5-20, 28). ¿Ha mbaʼépa oiko raʼe? Jehová ovendesi upe odesidi vaʼekue hikuái, pe kongregasiónpe osegi oĩ pyʼaguapy ha unida, ha ojesegi ojepredika umi notísia porã (Hech. 15:30, 31; 16:5). Ñane tiémpope, Jehová organisasión ñanepytyvõ jareko hag̃ua pyʼaguapy ha ani hag̃ua mbaʼeve ojejapo sarambikuépe Ñandejára puévlope. w20.10 22, 23 párr. 11, 12

Ikatu oime jaipota asy oñemeʼẽ ñandéve peteĩ priviléhio. Péro noñemeʼẽi ñandéve ñandeedaitereíma rupi, ñanderasykatu, térã ñane situasión nopermitíri haguére ñandéve. Péicha jave ikatu ñanepytyvõ rréi David ehémplo. Haʼe omopuʼãseterei vaʼekue Ñandejára témplo, ha ohaʼarõiterei oñemeʼẽ chupe upe priviléhio, péro ndojeporavói chupe ojapo hag̃ua upéva. Upéicharõ jepe, David oapoja ipyʼaite guive upe Ñandejára oiporavo vaʼekuépe ojapo hag̃ua upe traváho. Upearã omeʼẽ voi hetaiterei óro ha pláta. ¡Ajépa iporãite la iñehémplo ñandéve g̃uarã! (2 Sam. 7:12, 13; 1 Crón. 29:3-5). Peteĩ ermáno Franciapegua hérava Hugues ndaikatuvéi vaʼekue oservi de ansiáno hasykatu rupi, ha ndaikatuvéi ojapo umi tembiapo isensillovéva jepe hógape. Haʼe omombeʼu: “Ñepyrũrã añandu ndavaleveimaha mbaʼeverã ha apyta yvýre. Péro un tiémpo haguépe ahechakuaa iñimportanteha aasepta ndaikatuveimaha ajapo heta mbaʼe. Upe rire ikatúma avyʼa jey umi mbaʼe si ikatúvare ajapo Jehová servísiope. Che ajogua voi Gedeón ha umi 300 isoldádope: Chekaneʼõramo jepe asegíta alucha” (Juec. 8:4). w20.12 25 párr. 14, 15

Pe lívro oskrivi vaʼekuépe, apóstol Juan heʼi jey jey kristianokuéra ohechauka vaʼerãha oporohayhuha. Juan oskrivírõ guare Jesús rekovekuére, oñeʼẽ pe mborayhúre hetaitereive vése Mateo, Marcos ha Lúcasgui. Pe ilívro bíblico ñanemboʼe pe mborayhu ñanemomýi vaʼerãha jajapo hag̃ua opa mbaʼe (1 Juan 4:10, 11). Péro Juan noaprendéi vaʼekue upéva ensegidaiténte, síno heta tiémpo haguépe. Juan imitãrõ guare, ndahaʼéi vaʼekue siémpre ohechaukáva oporohayhuha. Peteĩ jey Jesús ha idisipulokuéra oho kuri Jerusalénpe ha ohasa Samáriarupi. Péro umi hénte oikóva peteĩ puévlo oĩvape Samáriape ndorresiviséi chupekuéra. Upémarõ Juan ha iñermáno Santiago oporandu Jesúspe ikatúpa ojerure hoʼa hag̃ua tata yvágagui ohundipa hag̃ua umi oikóvape pe puévlope (Luc. 9:52-56). Ótra vuéltape Juan ha iñermáno heʼi isýpe ojerure hag̃ua Jesúspe omeʼẽ hag̃ua chupekuéra peteĩ puésto iñimportánteva pe Rréinope. Umi ótro apóstol oikuaárõ guare Santiago ha Juan ojapo vaʼekue, orrenegaiterei hesekuéra (Mat. 20:20, 21, 24). Péro Juan ofalláramo jepe koʼã mbaʼépe, Jesús lomímonte ohayhu vaʼekue chupe (Juan 21:7). w21.01 8, 9 párr. 3, 4

Jehová odesidi jave, siémpre opensa mbaʼépa iporãvéta ótrope. Por ehémplo, haʼe odesidírõ guare ojapo opa mbaʼe oikovéva, ndojapói vaʼekue umíva ivenefisiorãnte, síno oipotágui ñande javyʼa jaikovévo. Avave ndoovligái vaʼekue Jehovápe ombou hag̃ua Itaʼýrape omano hag̃ua ñanderehehápe. Haʼe ijeheguínte ojapo upéva ñanepytyvõségui. Jesús avei odesidi umi mbaʼe ou porãtava ótrope. Por ehémplo haʼe ikaneʼõramo jepe, omboʼe vaʼekue peteĩ hénte atýpe opytuʼu rangue (Mar. 6:31-34). Peteĩ omoakã porãva hogapy, oikuaa ijetuʼuha odesidi umi mbaʼe ou porãtava ifamíliape, ha haʼe ojagarra ensério upe rresponsavilida. Odesidíta jave peteĩ mbaʼe, ndojapói upéva apúrope ha ndojegiái umi mbaʼe oñandúvarente, síno opensa porã raẽ hese ha oheja Jehová omboʼe chupe odesidi porã hag̃ua (Prov. 2:6, 7). Péicha ohechaukáta opensaha umi mbaʼe okonvenívare ifamíliape ha ndahaʼéi opensáva ijehénte (Filip. 2:4). Peteĩ ména oñehaʼãmbaitéramo osegi Jehová ha Jesús ehémplo, omoakã porãta hogapy. w21.02 7 párr. 19-21

Rréi Asá imitãrõ guare iñumílde ha ipyʼaguasu vaʼekue. Por ehémplo, itúa Abías omano rire, Aságui oiko rréi ha oñepyrũ ohundipaite umi dios fálso raʼanga oĩva pe paíspe. “Avei heʼi entéro umi oikóvape Judápe oservi hag̃ua Jehovápe, ituakuéra ypykue Járape, ha okumpli hag̃ua umi iléi ha imandamientokuéra” (2 Crón. 14:1-7). Ha Zérah pe etíope oikérõ guare Judá territóriope un millón soldádo reheve, Asá ohechauka iñaranduha ojerurérõ guare ajúda Jehovápe, heʼívo: “Jehová, ndéve ningo ndahaʼéi mbaʼeve reipytyvõ hag̃ua umi ikangývape térã umi imbaretévape. Jehová ore Jára, orepytyvõmína, ore ningo rojerovia nderehe”. Koʼã mbaʼe porãite Asá heʼi vaʼekue, ohechauka haʼe ipyʼaite guive ojerovia hague Jehová ikatuha osalva chupe ha ipuévlope. Asá ojerovia Itúa yvagapeguáre, ha “Jehová ogana umi etíopepe” (2 Crón. 14:8-12). Katuete Asá okyhyjetereíne raʼe, oúrõ guare oñorairõ hag̃ua hendive peteĩ ehérsito tuichaitereíva orekóva un millón soldádo. Péro Asá ojerovia rupi Jehováre ikatu vaʼekue ogana chupekuéra. w21.03 5 párr. 12, 13

La Biblia omombeʼu ñandéve oĩ hague umi persóna iñimperféktova ojoayhu vaʼekue oñoermáno teéicha. Jahechami Jonatán ha David ehémplo. La Biblia heʼi: ‘Jonatán ohayhu Davídpe ha opyta oñoamigoite hikuái’ (1 Sam. 18:1). Jehová oiporavo vaʼekue Davídpe opyta hag̃ua rréiramo Saúl rekovia. Tiémpo rire, Saúl opyta ipyʼaro David rehe ha oñehaʼã ojuka chupe. Péro Jonatán, Saúl raʼy, ndoapojái itúape ojukasérõ guare oikóvo Davídpe. Jonatán ha David opromete vaʼekue siémpre oikotaha oñoamígoramo ha oñopytyvõtaha (1 Sam. 20:42). Jahecharamoiterei ningo pe amista oreko vaʼekue oñondive Jonatán ha David, pórke oĩ vaʼekue heta mbaʼe ikatúva ojoko chupekuéra ani hag̃ua oiko oñoamígoramo. Por ehémplo, Jonatán itujave vaʼekue Davídgui mas de 30 áño. Upévare Jonatán ikatu vaʼekue opensa ndaikatumoʼãiha oreko iñamígoramo peteĩ imitãitevévape chugui ha saʼive iñexperiénsavape. Péro Jonatán nopensái vaʼekue upéicha. Haʼe orrespetaiterei vaʼekue Davídpe. w21.01 21, 22 párr. 6, 7

Jesús opromete vaʼekue isegidorkuérape ovyʼa añetetaha. Péro haʼe oavisa vaʼekue avei chupekuéra ombohovaitaha heta mbaʼe ijetuʼúva (Mat. 10:22, 23; Luc. 6:20-23). Ñande ningo javyʼa haʼe haguére Cristo disípulo. ¿Péro mbaʼéichapa ñañeñandu ñane família oñemoĩramo ñanderehe ndoipotáigui jaservi Jehovápe, umi goviérno ñandepersegíramo, térã umi ñane kompañéro de traváho térã kolehiopegua ojapokaséramo ñandéve umi mbaʼe ivaíva? Ñañemoĩvo ñapensa koʼã mbaʼére ikatu hína ñañekevranta. La majoría umi hénte nopensái ovyʼataha ojepersegíramo. Péro Ñandejára Ñeʼẽ heʼi ñandéve javyʼa hag̃ua umícha jave. Por ehémplo, Santiago oskrivi vaʼekue ñande nañañeñandúi vaʼerãha ñaneaño ñambohovái jave heta provléma, síno javyʼa vaʼerãha (Sant. 1:2, 12). Jesús heʼi vaʼekue voi javyʼa vaʼerãha jajepersegíramo jepe (Mat. 5:11). Ha Jehová ogia vaʼekue Santiágope oskrivi hag̃ua koʼã kristiánope umi konsého oipytyvõtava chupekuéra osegi hag̃ua ovyʼa ohasáramo jepe heta provlémare. w21.02 26 párr. 1, 2; 27 párr. 5

Timoteo tiémpope oĩ vaʼekue umi kristiáno nomombaʼéiva pe priviléhio orekóva oikóvo Ñandejára ajudánteramo. Umíva apytépe, Demas, Figelo, Hermógenes, Himeneo, Alejandro ha Fileto (1 Tim. 1:19, 20; 2 Tim.1:15; 2:16-18; 4:10). Amalisia koʼã kuimbaʼe peteĩ tiémpore ijerovia mbarete vaʼekue, péro upéi haʼekuéra nomombaʼevéi umi mbaʼe Jehová oheja vaʼekue ikargopekuéra. ¿Mbaʼépa Satanás ojapo anivéma hag̃ua ñamombaʼe umi tesóro Jehová onkarga vaʼekue ñandéve? Jahechami mbaʼépa haʼe ojapo upearã. Por ehémplo, haʼe ojevale téle, pelíkula ha Internet umívare, ha péicha mbeguekatúpe ñapensa ha jajapo hag̃ua umi mbaʼe ñanemomombyrýtava Jehovágui, ha anivéma hag̃ua ñaneñeʼẽrendu chupe. Haʼe oipota jakyhyje umi hénte opensátavagui ñanderehe ha avei pe persekusióngui, ha péicha anivéma hag̃ua japredika. Haʼe oipota jaheja pe añetegua, ha upearã oñehaʼã ñanemoñuhã ñahendu hag̃ua ‘umi hénte oimoʼãvape iñaranduha’, térã umi apóstatape (1 Tim. 6:21). Nañañatendéiramo ikatu mbeguekatúpe jaheja pe añetegua. w20.09 27 párr. 6-8

¿Oĩpa peteĩ ñane amígo térã ñande rogaygua ñanetraisionáma vaʼekue? Oiméramo upéicha, ikatu ñanepytyvõ jastudiáramo pe rreláto oñeʼẽva rréi David ha itaʼýra Absalón rehe (2 Sam. 15:5-14, 31; 18:6-14). Jalee mboyve upe rreláto, jaʼe Jehovápe mbaʼéichapa ñañeñandu oĩ haguére ñanetraisionáva (Sal. 6:6-8). Ñañeimahinamína avei mbaʼeichaitépa oiméne David oñeñandu raʼe oikórõ guare hese entéro koʼã mbaʼe. Haʼe ohayhu vaʼekue Absalónpe ha okonfia Ahitofel rehe. Péro mokõivéva otraisiona vai chupe. Haʼekuéra ningo oheja Davídpe yvýre ha oñehaʼã voi ojuka chupe. Haʼe ikatu vaʼekue opyta nokonfiavéi iñamigokuérare ha osospecha omoirũ hague avei Absalónpe. Haʼe ikatu kuri opensa ijehénte ha haʼeñónte osẽ oho hetãgui. Térã ikatu kuri ou oñedesanimaiterei ha oñentrega. Upéva rangue, haʼe oñemboʼe Jehovápe oipytyvõmi hag̃ua chupe, ha ojerure avei ajúda iñamigokuérape. Avei pyaʼe ojapo umi mbaʼe odesidi vaʼekue. Haʼe osegi ojerovia Jehováre ha okonfia iñamigokuérare. w21.03 15 párr. 7, 8; 17 párr. 10, 11