Julio

Ñande jarekómante vaʼerã avei Jesúspe ñane amígoramo ikatu hag̃uáicha oñekontesta ñandéve ñane ñemboʼe. Upéva ndeʼiséi ñañemboʼénte vaʼerãha Jesús rérape, síno ñantende porã vaʼerã mbaʼéichapa Jehová ojevale hese okontesta hag̃ua ñandéve ñane ñemboʼe. Jesús heʼi vaʼekue ijapostolkuérape: “Oimeraẽ mbaʼe pejeruréva che rérape, ameʼẽta peẽme” (Juan 14:13). Jehová haʼéramo jepe pe ohendúva ha okontestáva umi ñane ñemboʼe, haʼe omeʼẽ autorida Jesúspe ohecha hag̃ua mbaʼéichapa ojapóta upe Jehová odesidi vaʼekue. Péro okontesta mboyve ñandéve ñane ñemboʼe, Jehová ohecha raẽ jasegímapa hína pe konsého Jesús omeʼẽ vaʼekue. Por ehémplo, Jesús heʼi: “Peẽ peperdonáramo pende rapichápe hembiapo vai, pende Ru oĩva yvágape peneperdonáta avei. Péro napeperdonáiramo pende rapichápe hembiapo vai, pende Ru oĩva yvágape noperdonamoʼãi avei pene rembiapo vai” (Mat. 6:14, 15). ¡Ajépa iñimportantete upéicharõ jatrata porã ótrope Jehová ha Jesús ñandetrataháicha! w20.04 22 párr. 6

Apóstol Pablo ohechakuaa vaʼekue mbaʼépa ointeresa umi hénte ohendúvape chupe, ha upéi oadapta umi mbaʼe heʼíva chupekuéra. Por ehémplo, pe hénte aty Listrapegua ndoikuaaiete vaʼekue mbaʼeve Ñandejára Ñeʼẽgui térã saʼieterei oikuaa. Upévare Pablo oñeʼẽ umi mbaʼe ikatu vaʼerãre ontende hikuái. Oñeʼẽ chupekuéra umi koséchare ha umi mbaʼe ojejapóvare ojeiko hag̃ua vyʼápe. Haʼe oipuru umi palávra ha ehémplo ikatu vaʼerã pyaʼe ontende umi ohendúva chupe. Ñañehaʼã vaʼerã jaikuaa mbaʼépa ointeresa umi hénte ñande territoriopeguápe, ha jajadapta japredika hag̃ua chupekuéra. ¿Mbaʼéichapa ikatu japilla mbaʼépa ointeresa peteĩ persónape ñamañávo hese térã hógare? Jajesareko porã vaʼerã. Ikatu hína pe persóna ombaʼapo ihardínpe, olee peteĩ lívro, ombaʼapo hiʼáutore térã ojapo hína ótra kósa. Ñañemongeta hag̃ua hendive, ikatu voi ñañeʼẽ chupe upe ojapóvare (Juan 4:7). Pe persóna oñemonde lájare ikatu avei jaikuaa hetave mbaʼe chugui. Por ehémplo, mbaʼe paisguápa, mbaʼépepa ombaʼapo térã mbaʼe clubguápa haʼe. w20.04 11 párr. 11, 12

Oĩ ningo umi ermáno térã ermána oñekevrantaiterei rasáva térã orekóva ansieda, ha upévare inervióso ha noñeñanduporãi otrata térã oñeʼẽ jave ótro héntendi. Ikatu ijetuʼu chupekuéra oĩ hag̃ua heta hénte apytépe, upéicharõ jepe haʼekuéra osegi oho rreunionhápe ha asambleahápe. Chupekuéra g̃uarã ijetuʼueterei oñeʼẽ hag̃ua umi extráñope, péro lomímonte osẽ opredika. Oiméramo nde rehasa hína upeichagua situasión, ani repensa nderehénte oikoha upéva, heta hénte ningo ohasa avei umi mbaʼe. Nemanduʼákena Jehová oguerohoryha umi mbaʼe rejapóva iservísiope nde pyʼaite guive. Nde ningo koʼag̃aite peve nereñentregái, ha upéva ohechauka Jehová nevendesi ha omeʼẽha ndéve pe fuérsa reikotevẽva (Filip. 4:6, 7). Ha oiméramo reservi hína Jehovápe nderasykatu térã erekóramo jepe provléma emosionál, ikatu reime segúro Jehová ovyʼaitereiha ndereheve rejapo haguére upéva. Heta oĩ ñande apytépe hasykatúva, ha upéicharõ jepe osegíva oaguanta (2 Cor. 4:16). Jehová ñanepytyvõ rupi, enterove ikatúta ñamohuʼã ko karréra. w20.04 31 párr. 20, 21

Ñamañáramo mbaʼéichapa Ñandejára ojapo vaʼekue ko yvy, jahechakuaáta haʼe iñaranduha (Heb. 3:4). Ko yvy ndaijojahái pórke koʼápente oĩ entéro mbaʼe yvyporakuéra oikotevẽva oikove hag̃ua. Ikatu jaʼe ko ñande yvy ojoguaha peteĩ kolektívo henyhẽtévape héntegui, ha oviaháva ohóvo peteĩ ñu guasúre. Péro peteĩ kolektívo henyhẽtéva ningo tuichaiterei avei idiferénte ko ñande yvýgui. Por ehémplo, ¿mboy tiémporepa osegíta oikove umi hénte oĩva pe kolektívope haʼekuéra voi oprodusítaramo pe oxíheno, tembiʼu ha y oikotevẽva, ha ndaikatumoʼãiramo omombo hikuái ni peteĩ yty pe ventaníllarupi? ¿Ajépa umi hénte ndoikoveʼaremoʼãi pe kolektívope? Péro ko yvy idiferénte pórke pype ikatu osegi oikove hetaiterei persóna ha animalkuéra. Haʼe ijeheguiete oprodusi oxíheno, tembiʼu ha y ñaikotevẽva, ha umíva núnka ndopái ñandehegui. Umi yty noñemombóiramo jepe pe univérsope, ko yvy osegi iporã ha ikatu gueteri ojeiko pype. ¿Mbaʼéichapa ikatu oiko upéva? Jehová ojapo vaʼekue ko yvy ikatu hag̃uáicha umi yty térã umi mbaʼe hembývagui oiko hag̃ua álgo ideprovécho jeýtava. w20.05 20 párr. 3, 4

Satanás derechoitéma voi heʼi vaʼekue Évape Jehová ijapuha. Péicha Satanásgui oiko peteĩ Diablo pórke haʼe otaky térã oñeʼẽ vai Ñandejára rérare. Ha Évape tuichaiterei ombotavy vaʼekue, pórke haʼe oguerovia chupe (1 Tim. 2:14). Haʼe okonfiave hese Jehová rehe rangue. Upéicha rupi Eva odesidi ojapo pe mbaʼe ivaivéva ikatúva ojapo: Naiñeʼẽrendúi Jehovápe ha hoʼu pe yva ojeproivi vaʼekue chuguikuéra, ha upéi omeʼẽ avei Adánpe (Gén. 3:6). Ñapensamíntena mbaʼépa Eva ikatu vaʼerãmoʼã heʼi kuri Satanáspe. Ñañeimahinami Eva heʼiha chupe kóicha: “Che ndaikuaái mávapa nde, péro aikuaa che Túa Jehovápe ha ahayhu chupe, ha akonfia hese. Haʼe omeʼẽ oréve opa mbaʼe rorekóva. ¿Mbaʼe mbaʼéiko nde rejekree reñeʼẽ vai hag̃ua hese? ¡Tereho chéve koʼágui!”. Ajépa Jehová ovyʼaite vaʼerãmoʼã kuri itajýra péicha ohayhu ha odefendérire chupe (Prov. 27:11). Péro Eva noñandúi vaʼekue mborayhu ifiélva Jehováre, ha Adán upéichante vaʼekue avei. Péicha ndohayhúi rupi Itúape, nodefendéi vaʼekue chupe oñeñeʼẽ vaírõ guare hese. w20.06 4 párr. 10, 11

Ñane ermanakuéra ningo omerese jafelisita chupekuéra opa mbaʼe ojapóvare Jehová servísiope. Por ehémplo, ombaʼapo konstruksiónpe ha ojejapo hag̃ua mantenimiénto, oapoja umi grúpo oĩva ótro idiómape, ha ombaʼapo de voluntária Betélpe. Avei oipytyvõ hikuái oiko jave desástre naturál, oipytyvõ ojetradusi hag̃ua ñane puvlikasionkuéra, ha oservi de prekursóra ha misionéra. Avei umi tembirekokuéra oipytyvõ iménape okumplipa hag̃ua umi rresponsavilida orekóva kongregasiónpe ha Jehová organisasiónpe. Jehová ningo omeʼẽ vaʼekue “koʼã kuimbaʼépe rregáloramo”, ha ojapo hikuái heta mbaʼe oipytyvõ hag̃ua ótrope. Péro ijetuʼuvéta kuri chupekuéra ojapopa hag̃ua koʼã mbaʼe umi hembireko ndoapojáirire chupekuéra (Efes. 4:8). Umi ansiáno iñarandúva ohechakuaa umi ermána haʼeha “peteĩ ehérsito tuicháva” ombaʼapo kyreʼỹva, ha ijapytepekuéra oĩha umi ikatupyryetereíva predikasiónpe. Umi ansiáno avei ohechakuaa umi ermána ijedáva ha ijerovia mbaretéva oipytyvõ porãitereiha umi ermána imitãvévape ombohovái jave umi situasión ijetuʼúva (Tito 2:3-5). ¡Añetehápe ñane ermanakuéra omerese jahayhu ha jaagradese chupekuéra! w20.09 23, 24 párr. 13, 14

Jehová ningo ndahesaráiri umi oservi vaʼekuégui chupe péro peteĩ tiémpore oúva oñemomombyry ipuévlogui. Ha ndahesaráiri avei umi mbaʼe haʼekuéra ojapo vaʼekuégui iservísiope (Heb. 6:10). Proféta Isaías oipuru vaʼekue peteĩ ehémplo iporãitereíva ohechauka hag̃ua mbaʼeichaitépa Jehová ojepyʼapy ipuévlore. Haʼe heʼi: “Peteĩ pastór ojapoháicha, haʼe oñangarekóta ijovechakuérare, ombyatýta umi ovecha raʼýpe ha ogueraháta chupekuéra ijyva ári” (Is. 40:11). ¿Mbaʼéichapa Jehová, pe Pastór iñimportantevéva, oñeñandu peteĩ isiérvo ndoservivéiramo chupe? Jesús ohechauka vaʼekue mbaʼéichapa Jehová oñeñandu oporandúrõ guare idisipulokuérape: “¿Mbaʼépa peẽ peje? Peteĩ kuimbaʼe oguerekórõ 100 ovecha, ha upéi okañy chugui peteĩ, ¿ndohejamoʼãipa umi 99 pe montáñape ha oñepyrũ oheka upe okañy vaʼekuépe? Ha otopáramo pe ovechami, katuete ovyʼavéta pe peteĩmíre, ovyʼa rangue umi 99 ovecha nokañýi vaʼekuére” (Mat. 18:12, 13). w20.06 19, 20 párr. 8, 9

Ñandéve g̃uarã peteĩ priviléhio ñameʼẽ Jehovápe pe iporãvéva (Sal. 27:4; 84:10). Jaguerohoryeterei ningo peteĩ ermáno ojaposéramo hetave mbaʼe Jehová organisasiónpe. Péro haʼe orresivi vove peteĩ asignasión nopensái vaʼerã koʼág̃a iñimportanteveha (Luc. 17:7-10). Upéva rangue haʼe oñehaʼã oservi ótrope umíldemente (2 Cor. 12:15). La Biblia oñeʼẽ umi ehémplo vai oheja vaʼekuére umi persóna opensáva ijehe iñimportantetereiha. Diótrefes oñemombaʼeguasu vaʼekue ha oipota pe primer lugár kongregasiónpe (3 Juan 9). Uzías ijorgullóso vaʼekue ha ojaposemoʼã peteĩ mbaʼe Jehová noasignáiva chupe ojapo hag̃ua (2 Crón. 26:16-21). Absalón oipota vaʼekue oiko chugui rréi. Upévare oñehaʼã ojehayhuka la héntepe ikatu hag̃uáicha oapoja chupe (2 Sam. 15:2-6). Koʼã mbaʼe oñemombeʼúva la Bíbliape ohechauka ñandéve Jehová ndoguerohoryiha umi persóna oñembotuichasévape (Prov. 25:27). Mbeguekatúpe pe oñemombaʼeguasúva ha oipotáva umi ótro oguerohory chupe, opa vaíta katuete (Prov. 16:18). w20.07 4 párr. 7, 8

Oĩ umi família ova vaʼekue ótro paíspe ijetuʼu rupi la situasión hetãme, térã oheka hag̃ua itravahorã. Upévare umi mitã koʼág̃a ohóma vaʼerã peteĩ eskuéla oñeñeʼẽhápe upe país idióma. Tekotevẽne raʼe avei umi tuakuéra oaprende upe idióma otopa hag̃ua itravahorã. ¿Péro mbaʼépa ojapóta hikuái upe lugárpe oĩramo peteĩ kongregasión, térã grúpo oĩva iñidiomakuérape? ¿Mbaʼe kongregasiónpepa oho vaʼerã upe família? ¿Oho vaʼerãpa hikuái pe kongregasión oñeñeʼẽhápe upe país idióma, térãpa oho vaʼerã pe oñeñeʼẽhápe ifamília idióma? Pe omoakãva pe família odesidi vaʼerã mbaʼe kongregasiónpepa ohóta hikuái. Haʼe ohecha vaʼerã mbaʼépa okonvenivéta ifamíliape. Upéva odesidíta upe omoakãva pe família, upévare ñande jarrespeta vaʼerã haʼe odesidíva. Tahaʼe haʼéva la odesidíva, ñande jaasepta vaʼerã, jarresivi porã pe famíliape kongregasiónpe, ha jahechauka jahayhuha chupekuéra (Rom. 15:7). w20.08 30 párr. 17, 18

Jaipotáramo pe podér oúva Jehovágui, nañapensái vaʼerã haʼe ñanemombaʼe hag̃ua odependeha ñande salúre, ñande estúdio, ñande kultúra térã umi mbaʼerepy jaguerekóvare. Koʼã mbaʼére nodependéi Jehová ojevale hag̃ua ñanderehe. Jaikuaa ningo Jehová puévlope “ndaiporiguasuiha umi iñarandúva umi héntepe g̃uarã, ndojeporavói heta ipoderósova, ni heta oúva umi rréi famíliagui” (1 Cor. 1:26). Upéicharõ, ndajarekóiramo jepe umi mbaʼe jaʼe vaʼekue, ikatu hína lomímonte jaservi Jehovápe. Ha umi situasión ningo haʼe vaʼerã ñandéve g̃uarã peteĩ oportunida jahecha hag̃ua mbaʼéichapa Jehová ñanepytyvõ ipodér rupive. Por ehémplo, jakyhyjéramo umi oatakávagui umi mbaʼe jagueroviáva, ñañemboʼe vaʼerã Jehovápe tañanembopyʼaguasu ñadefende hag̃ua umíva (Efes. 6:19, 20). Ha oiméramo ñanderasykatu ha ñandeguereko asyeterei upéva, jajerure Jehovápe tañanemombarete ñanerembiapo heta hag̃ua ikatumiháicha iservísiope. Jahecha jave káda ves mbaʼéichapa Jehová ñanepytyvõ, ñande jerovia imbareteve ha ñande avei. w20.07 16 párr. 9

Ñande ñamotenondeséramo ñande rekovépe pe Rréino, jasegi vaʼerã Abrahán ehémplo. Haʼe ningo vyʼápe ojapo vaʼekue sakrifísio Ñandejára oguerohory hag̃ua chupe (Mar. 10:28-30; Heb. 11:8-10). Ani ñaimoʼã ndajaguerekomoʼãiha provléma. Jaservímaramo jepe Jehovápe ñande rekove pukukue, lomímonte jarekóta provléma (Sant. 1:2; 1 Ped. 5:9). Koʼág̃arupi ningo koʼytevéntema tekotevẽ jasegi ñapensa umi mbaʼe ñaneraʼarõvare. Umi mbaʼe oikóva ko múndope ohechauka porãiterei oñemohuʼã mbotaitemaha umi ára paha. Ñandejára Rréino poguýpe jahupytýta hetaiterei vendisión, umíva apytépe javyʼaitereíta jahecha vove umi jahayhúva oikove jeyha. Upe tiémpope Jehová opremiáta Abrahánpe ojerovia ha ipasiénsia haguére, ha ojapóta upéva omoingove jeývo chupe ha ifamíliape ko yvy ape ári. ¿Ndépa reiméta upépe rerresivi hag̃ua chupekuéra? Ikatúta rejapo upéva resegíramo Abrahán ehémplo ha vyʼápe rejesakrifika Ñandejára Rréino rehehápe, esegíramo ejerovia neprovléma hetáramo jepe, ha nepasiénsiaramo ehaʼarõvo Jehová okumpli ipromesakuéra (Miq. 7:7). w20.08 5, 6 párr. 13, 14; 7 párr. 17

Ñande jaikuaa umi ñane enemígo ñandejukáramo, Jehová ñanemoingove jeytaha. Ikatu ñaime segúro mbaʼeve ojapóva hikuái ndaikatumoʼãiha ñandejoko jasegi hag̃ua jaiko Jehová amígoramo (Rom. 8:35-39). ¡Ajépa Jehová iñaranduete omeʼẽvo ñandéve pe esperánsa oĩtaha rresurreksión! Upévare ndajakyhyjéi umi oapojáva Satanáspe ñaneamenasáramo ñandejukataha, ndajajapói haguére haʼekuéra oipotáva. Avei ñanembopyʼaguasuve jasegi hag̃ua ñandefiél Jehovápe. Jehová enemigokuéra ñaneamenasáramo ñandejukataha, ¿jajeroviátapa haʼe ñanemoingove jeytaha? ¿Mbaʼéichapa ikatu jaikuaa jajeroviataha Jehováre upe moméntope? Upearã ikatu ñañeporandu: “¿Ohechaukápa ajeroviaha Jehováre umi mbaʼe michĩva adesidíva káda día?” (Luc. 16:10). Ikatu avei ñañeporandu: “¿Ohechaukápa aipuru lája che tiémpo ha che pláta ajeroviaha Jehová promésare, omeʼẽtaha chéve aikotevẽva amotenondéramo Irréino?” (Mat. 6:31-33). Ñambohováiramo si koʼã porandúpe, jahechauka hína ñaimeha preparádo ñambohovái hag̃ua oimehaichagua pruéva amo gotyove (Prov. 3:5, 6). w20.08 17, 18 párr. 15, 16

Ñande tekotevẽ ñanevakeáno jaipurúvo Ñandejára Ñeʼẽ. Upéva ikatu ñaaprende jajapo hag̃ua ñane rreunionhápe. Péro ñaipytyvõséramo ótrope oguerovia hag̃ua avei ivaliosoha umi mbaʼe omboʼéva la Biblia, jastudia meme vaʼerã Ñandejára Ñeʼẽ. Jaipurúmante vaʼerã la Biblia ñamombarete hag̃ua ñande jerovia, ha upéva ndeʼiséi jaleénte vaʼerãha. Upearã tekotevẽta jajepyʼamongeta upe jaleévare ha jaheka informasión ñane puvlikasionkuérape, ikatu hag̃uáicha ñantende porã ha jaexplikakuaa la Biblia heʼíva (1 Tim. 4:13-15). Upéi ikatútama jaipuru Ñandejára Ñeʼẽ ñamboʼe hag̃ua ótrope. Upéva heʼise avei ndahaʼemoʼãiha jaleétanteva chupekuéra peteĩ téxto. Ñaipytyvõse umi ñanerendúvape ontende hag̃ua pe versíkulo, ha ohecha hag̃ua mbaʼéichapa ojapokuaa upépe heʼíva. Upéicharõ, ñande jastudia meméramo la Biblia, ikatúta ñanevakeanove jaipurúvo Ñandejára Ñeʼẽ ñamboʼe hag̃ua ótrope (2 Tim. 3:16, 17). w20.09 28 párr. 12

Ikatúta ñamotenonde ñande rekovépe pe predikasión jajepyʼamongetáramo mbaʼeichaitépa Jehová ñanepytyvõ hína. Por ehémplo, haʼe omeʼẽ ñandéve hetaiterei puvlikasión oñeimprimíva térã ojehupíva Internétpe, avei heta áudio ha vidéo ha umi prográma de Broadcasting osẽva jepi. Epensamíntena: ¡Ñande sítio jw-pe ningo jareko informasión mas de 1.000 idiómape! (Mat. 24:45-47). Jasegíramo Jesús ehémplo, upéva ñanepytyvõta avei ñamotenonde hag̃ua ñande rekovépe pe predikasión. Haʼe ndohejái vaʼekue mbaʼeve ojoko chupe opredika hag̃ua (Juan 18:37). Satanás oofresérõ guare chupe “umi goviérno oĩva ko múndope ha umi rrikésa orekóva”, haʼe ndoʼái vaʼekue iñuhãme, ha umi hénte omoĩséramo guare chupe rréiramo, haʼe ndohejái vaʼekue avei upéva omoñuhã chupe (Mat. 4:8, 9; Juan 6:15). Jesús ndohejái vaʼekue ojoko chupe umi rrikésa ojeguerekoséva jepi, ha nomongyhyjéi vaʼekue chupe oĩrõ guare oñemoĩ mbaretéva hese (Luc. 9:58; Juan 8:59). Ñambohováiramo umi situasión ijetuʼúva jajerovia haguére Jehováre, ñanemanduʼa vaʼerã apóstol Pablo konséhore jatopáva pe téxto koestediaguápe. w20.09 10 párr. 6, 7

¡Ajépa javyʼaite jareko haguére heta ermána iguápava kongregasiónpe! Haʼekuéra oĩ rreunionhápe, osẽ opredika ha omboʼe umi notísia porã, oĩ avei umi oipytyvõva ojejapo hag̃ua mantenimiénto umi Salónpe, ha ohechauka ojepyʼapyha ermanokuérare. Péro jaikuaa haʼekuéra ohasaha avei heta mbaʼe ijetuʼúva. Oĩ umi oñangarekóva ituakuéra ijedámavare, ótrore oñemoĩ ihentekuéra, ha oĩ avei umi omongakuaáva haʼeño imembykuérape, ha ombaʼapo jejopy vaʼerã omantene hag̃ua chupekuéra. ¿Mbaʼérepa ñaipytyvõ ha ñamokyreʼỹ vaʼerã ermanakuérape? Pórke ko múndope ndojerrespetái jepi umi kuñáme haʼekuéra omereseháicha. Avei la Biblia ñanemokyreʼỹ ñaipytyvõ hag̃ua chupekuéra. Por ehémplo, apóstol Pablo heʼi vaʼekue pe kongregasión oĩvape Rómape orresivi porã hag̃ua Fébepe, ha oipytyvõ hag̃ua chupe “opa mbaʼe oikotevẽvape” (Rom. 16:1, 2). Pablo oĩ vaʼekue peteĩ kultúra ojeapoʼihápe umi kuñanguérape. Péro oiko rire chugui kristiáno, haʼe osegíma Jesús ehémplo, ha orrespeta kuñanguérape ha imbaʼeporã hendivekuéra. w20.09 20 párr. 1, 2

Ñaipytyvõ hag̃ua ñane estudiántepe opredikase hag̃ua umi notísia porã, ikatu ñaporandu chupe koʼã mbaʼe: “¿Mbaʼéichapa omehoráma nde rekove rejapo rupi la Biblia heʼíva? ¿Ndépa epensa umi ótro tekotevẽha avei ohendu ko mensáhe? ¿Mbaʼépa ikatu ejapo eipytyvõ hag̃ua chupekuéra?” (Prov. 3:27; Mat. 9:37, 38). Jesús heʼi vaʼekue ñandéve ñamboʼe vaʼerãha ótrope ojapo hag̃ua entéro mbaʼe haʼe omanda vaʼekue. Umíva apytépe oĩ hína umi mokõi mandamiénto iñimportantevéva: Jahayhu vaʼerãha Ñandejárape ha ñande rapichakuérape (Mat. 22:37-39). Ñande ningo jahayhúmante vaʼerã Ñandejárape ha la héntepe ikatu hag̃uáicha japredika. Jaikuaa ningo oĩha umi estudiánte okyhyjéva opensávo osẽ vaʼerãha opredika. Péro ikatu jaasegura ñane estudiántepe, Jehová oipytyvõ rupi chupe mbeguekatúpe saʼivéma okyhyjetaha yvyporakuéragui (Sal. 18:1-3; Prov. 29:25). w20.11 3 párr. 6-8

Jajeprepara hag̃ua pe estudiorã iñimportánte ñañemboʼe Jehovápe ñane estudiántere ha umi mbaʼe oikotevẽvare. Jajerure Jehovápe tañanepytyvõ ñaporomboʼe jave jaipuru hag̃ua la Biblia ikatu hag̃uáicha ñag̃uahẽ ñane estudiánte korasõme. Ñanemanduʼa vaʼerã ñande ñaipytyvõseha chupe ojevautisa hag̃ua. Pe estudiánte tekotevẽ avei ojapo álgo ijeheguiete: Tekotevẽ ohendu ha oñeʼẽ Jehovápe. Haʼe ikatu ohendu Ñandejárape oleévo la Biblia káda día (Jos. 1:8; Sal. 1:1-3). Avei ikatu oñeʼẽ Jehovápe oñemboʼévo chupe káda día. Upévare ñañemboʼe vaʼerã ñande pyʼaite guive oñepyrũvo ha opakuévo káda estúdio, ha ñanemanduʼa ñane estudiántere ñane ñemboʼépe. Haʼe ohendúvo ñane ñemboʼe oaprendéta mbaʼéichapa haʼe oñemboʼe vaʼerã ipyʼaite guive, ha ojapo vaʼerãha upéva Jesús rérape (Mat. 6:9; Juan 15:16). Ñapensamíntena mbaʼeichaitépa ñane estudiánte oñemoag̃uivéta Jehováre, káda día oleéramo la Biblia ha oñemboʼe chupe. Péicha haʼe ohendu ha oñeʼẽta hína Jehovápe (Sant. 4:8). w20.10 8 párr. 8; 9 párr. 10, 11

Koʼág̃arupi Jehová organisasión ombaʼapo jejopy pe kongregasión oreko hag̃ua pyʼaguapy ha ani hag̃ua mbaʼeve ojejapo sarambikuépe, yma umi kristiáno ypykue tiémpope guaréicha (Hech. 16:4, 5). Por ehémplo, jaháramo rreunionhápe ótro kongregasiónpe térã ótro paíspe, jaikuaátama mbaʼéichapa ojejapo pe Ñemañaha Ñehesaʼỹijo ha mbaʼe artíkulopa ojestudia hína. ¡Ensegída voi ñañeñandútama ñanderogapeguáicha! Ñandejára espíritu rupive añoite ikatu jareko peichagua unida iporãitéva (Sof. 3:9). ¿Mbaʼépa ikatu jajapo? Iporã ñañeporandu: “¿Añehaʼãpa hína oĩ hag̃ua pyʼaguapy ha unida kongregasiónpe? ¿Cheñeʼẽrendúpa umi ogiávape pe kongregasión? ¿Ikatúpa umi ermáno okonfia cherehe, koʼýte oiméramo areko hína rresponsavilida kongregasiónpe? ¿Chépa chepuntuál ha chekyreʼỹ aipytyvõ hag̃ua ótrope?” (Sant. 3:17). Jahechakuaáramo ikatuha ñamehora, ñañemboʼe vaʼerã Jehovápe ha jajerure chupe tomeʼẽ ñandéve espíritu sánto. Jahejáramo pe espíritu sánto ñanekambia ha ogia umi mbaʼe jajapóva, koʼytevéntema umi ermáno ñanderayhu ha ñandevaloravéta. w20.10 23 párr. 12, 13

Ñande ikatu jaipuru Ñandejára Ñeʼẽ peteĩ espéhoicha (Sant. 1:23-25). Ñande ningo káda día ñamaña jepi espéhope ñandejehe ñasẽ mboyve ñande rógagui. Péicha ikatúta jahecha noiméipa tekotevẽ hína ñakambia peteĩ mbaʼe ótro ñanderecha mboyve. Upéicha avei, jaleéramo la Biblia káda día, jahechakuaáta ñandejehe mbaʼe mbaʼépepa tekotevẽ ñakambia, tahaʼe ñapensa lája térã ñande aktitu. Hetápe oipytyvõ oleéramo pyhareve pe téxto káda diagua osẽ mboyve hógagui. Oheja hikuái upe oleéva okambia chupekuéra opensa lája. Upéi, pe día pukukue, haʼekuéra ohecha mbaʼéichapa ikatu osegi pe konsého oĩva la Bíbliape. Avei jajepokuaa vaʼerã jastudia Ñandejára Ñeʼẽ. Upearã tekotevẽ káda día jalee ha jajepyʼamongeta la heʼívare. Ko mbaʼe haʼetévaicha isensilloitereíva jajapo hag̃ua. Péro upéva hína peteĩva umi mbaʼe iñimportantevéva ikatúva jajapo ha ñanepytyvõtava jasegi hag̃ua jaguata pe tape poʼi oporoguerahávare jeikovépe. Ikatu jaʼe Ñandejára Ñeʼẽ ojoguaha peteĩ mákina ojapóvape rradiografía, pórke ñanepytyvõ jaikuaa hag̃ua umi mbaʼe ndajahecháiva ñande resaitérupi. Péro ñaneumílde vaʼerã ikatu hag̃uáicha ideprovécho ñandéve umi konsého oĩva la Bíbliape, térã umi oúva Ñandejára rrepresentantekuéragui. w20.11 18 párr. 3; 20 párr. 8

Pyʼỹinte ojepersegíramo jepe umi kristiáno síglo primérope guarépe, oreko vaʼekue avei hikuái pe tiémpo oiko haguépe pyʼaguapýpe. ¿Mbaʼéichapa haʼekuéra oaprovecha vaʼekue koʼã tiémpo? Umi kuimbaʼe ha kuña ijerovia mbaretéva opredika vaʼekue umi notísia porã oñentregaʼỹre. Pe lívro de Hechos heʼi hesekuéra ‘ohechauka hague okyhyjeha Jehovágui’. Haʼekuéra osegi vaʼekue opredika umi notísia porã ha upéicha rupi “heta hetave ohóvo” hikuái. Péicha jahecha Jehová ovendesi hague chupekuéra, kyreʼỹme opredika haguére pe tiémpo oiko haguépe hikuái pyʼaguapýpe (Hech. 9:26-31). Umi kristiáno síglo primérope guare oaprovecha vaʼekue entéro oportunida orekóva opredika hag̃ua umi notísia porã. Por ehémplo, apóstol Pablo ohechakuaárõ guare peteĩ oportunida tuichaitereíva oñepresenta hague chupe oĩrõ guare Éfesope, haʼe oaprovecha upéva opredika hag̃ua upe siudápe (1 Cor. 16:8, 9). Umi disípulo osegi ombaʼapo jejopy opredika hag̃ua “umi notísia porã, upéva hína Jehová ñeʼẽ” (Hech. 15:30-35). ¿Mbaʼépa ojehupyty upe haguére? Pe téxto koestediagua omombeʼu ñandéve upéva. w20.09 16 párr. 6-8

Adán omano vaʼekue opeka haguére ha avei enterove umi ifamiliare. Ha koʼag̃aite peve ñande jasufri haʼe naiñeʼẽrendúi haguére. Péro Ñandejára omoingove jey rupi Itaʼýrape, ñande ikatu jareko peteĩ esperánsa iporãitereíva. Apóstol Pablo heʼi vaʼekue ‘umi omanóvape oñemoingove jeytaha peteĩ kuimbaʼe rupive’, haʼéva Jesús. Haʼe oporomopensa voi heʼívo: “Adán káusare enterove omano, upéicha avei Cristo rupive enterovépe oñemoingove jeýta” (1 Cor. 15:22). ¿Mbaʼépa Pablo heʼise vaʼekue heʼírõ guare ‘Adán káusare enterove omanoha’? Pablo heʼi Adán káusare enterove yvypóra pekadór ha imperfektomaha onasévo, ha upévare enterove ñamano (Rom. 5:12). Adán noĩri hína umi oñemoingove jeýtava apytépe, chupe novenefisiamoʼãi Cristo sakrifísio, pórke haʼe peteĩ kuimbaʼe perfékto vaʼekue ha odesidi naiñeʼẽrendumoʼãiha Ñandejárape. Upe oiko vaʼekue Adánre oikóta avei umi ojeʼétavare haʼeha kavara, ág̃a “pe Yvypóra Raʼy” oporohusga vove, upéva heʼise ‘oñehunditaha opa ára g̃uarã’ (Mat. 25:31-33, 46; Heb. 5:9). w20.12 5 párr. 13, 14

Noñemeʼẽiramo ñandéve peteĩ asignasión, ñapensa vaʼerã umi anhelkuéra ifiélva ehémplore. Por ehémplo, rréi Acab ogovernaha tiémpope, Jehová oporandu vaʼekue umi ánhelpe mbaʼéichapa ikatu oñembotavy ko rréi iñañaitévape. Ha unos kuánto ánhel heʼi mbaʼéichapa ikatu ojejapo upéva. Péro Ñandejára oiporavo peteĩ ánhelpente ha heʼi osẽ porãtaha la ijidéa (1 Rey. 22:19-22). ¿Oñedesanimápa raʼe umi ótro ánhel ifiélva ha opensa: “Maʼerã rei piko aperde che tiémpo ha ameʼẽ la che suherénsia”? Nahániri. La Biblia ndohechaukái haʼekuéra opensa hague upéicha. Umi ánhel iñumildeterei ha oipota oñemombaʼeguasu Jehovápe añoiténte (Juec. 13:16-18; Apoc. 19:10). Ñanemanduʼa vaʼerã pe priviléhio tuichavéva ikatúva jaguereko haʼeha jaiko testígo de Jehováramo ha japredika pe Rréino. Umi priviléhio ha asignasiónre nodependéi Ñandejára ñandevalora hag̃ua. Jehová ha umi ermanokuéra añetehápe ñanderayhúta jahechakuaáramo umi mbaʼe ndaikatúiva jajapo ha ñaneumílderamo. Upévare jajerure asýkena Jehovápe siémpre jahechauka hag̃ua koʼã kualida. Jajepyʼamongeta umi Ñandejára siervokuéra iñumíldeva ehémplore ha jatopávare la Bíbliape. Ha kyreʼỹme jaservi ñane ermanokuérape, tahaʼe haʼéva umi mbaʼe ikatúva jajapo hesehapekuéra (1 Ped. 5:5). w20.12 26 párr. 16, 17

Pe kásko de salvasión haʼe pe esperánsa omeʼẽva ñandéve Jehová. Upéva hína pe esperánsa haʼe ovendesitaha enterove ojapóvape ivolunta, ha omanóramo jepe hikuái haʼe omoingove jeytaha chupekuéra (1 Tes. 5:8; 1 Tim. 4:10; Tito 1:1, 2). Pe esperánsa de salvasión oprotehe umi mbaʼe ñapensáva, ñanepytyvõ ñapensa meme hag̃ua Ñandejára promesakuérare, ha ani hag̃ua ñandedesahusia umi provléma. Ñande ñamoĩ hína ñane akãre ko kásko jasegívo ñapensa Ñandejára opensaháicha. Por ehémplo, nañamoĩri ñane esperánsa umi rrikésa ikatúvare oñehundi, síno Ñandejárare (Sal. 26:2; 104:34; 1 Tim. 6:17). Pe espáda omeʼẽva pe espíritu sánto haʼe Ñandejára Ñeʼẽ la Biblia. Pe espáda oreko podér ohundiete hag̃ua japu, ha ñaneguenohẽ hag̃ua umi enseñánsa fálsa poguýgui, ha avei umi vísio poguýgui (2 Cor. 10:4, 5; 2 Tim. 3:16, 17; Heb. 4:12). Ñande ñaaprende jaipurukuaa hag̃ua upe espáda jastudiávo ñaneañoháme, ha avei umi entrenamiénto omeʼẽva rupive ñandéve Ñandejára organisasión (2 Tim. 2:15). w21.03 27 párr. 4; 28, 29 párr. 10, 11

Oĩramo jepe préso, apóstol Juan ohechauka vaʼekue ohayhuha hapichakuérape. Por ehémplo, haʼe oskrivi pe lívro de Apocalipsis, ha oguerahaka upéva umi kongregasionkuérape ikatu hag̃uáicha oikuaa hikuái “umi mbaʼe oikótava koʼẽrõite” (Apoc. 1:1). Ha upéi, oiméne ojepoi rire chugui ha osẽ rire ísla de Pátmosgui, Juan oskrivi pe lívro oñeʼẽ hag̃ua Jesús rekovekuére ha ipredikasiónre. Haʼe oskrivi vaʼekue avei mbohapy kárta omokyreʼỹ ha omombarete hag̃ua iñermáno ha iñermanakuérape. Jahechaháicha, Juan ojesakrifika vaʼekue ótro rehehápe. Ñande ningo ikatu jasegi iñehémplo, ha jahechauka jahayhuha ñande rapichakuérape umi mbaʼe jadesidívare jajapo ñande rekovépe. Satanás múndo oipota ñapensa ñandejehénte ha jaipurupaite ñane tiémpo ha ñane mbaretekue ñagana hag̃ua pláta ha ñanefamóso hag̃ua. Péro ko múndo tuichakuére oĩ heta kristiáno isakrifikádova ha oñehaʼãva oipurupaite itiémpo opredika hag̃ua umi notísia porã, ha oipytyvõ umi héntepe oñemoag̃ui hag̃ua Jehováre. w21.01 10 párr. 9, 10

Jonatán ikatu vaʼekue iñenvidióso ha opyta ipyʼaro David rehe. Jonatán haʼe rupi rréi Saúl raʼy, ikatu vaʼekue oinsisti haʼe ogoverna vaʼerãha itúa rekovia (1 Sam. 20:31). Péro Jonatán iñumílde vaʼekue ha ifiél Jehovápe. Upévare haʼe ipyʼaite guive oapoja Davídpe, pórke Jehová oiporavo vaʼekue chupe oiko hag̃ua chugui pe sigiénte rréi. Jonatán ifiél vaʼekue avei Davídpe, upéva ombopochyetereítaramo jepe Saúlpe (1 Sam. 20:32-34). Jonatán ohayhu rupi Davídpe ipyʼaite guive iñermáno teéicha, ndohechái vaʼekue chupe ikontrárioicha. Jonatán ningo haʼe vaʼekue peteĩ gerréro ipyʼaguasúva ha oipurukuaaitereíva árko ha flécha. Umi hénte heʼi vaʼekue hese ha itúare ipyaʼeveha umi ágilagui ha imbareteveha umi leóngui (2 Sam. 1:22, 23). Upéicharõ Jonatán ikatu vaʼekue oñemombaʼeguasu umi mbaʼe ijojahaʼỹva ojapo vaʼekuére, péro haʼe noñehaʼãi oñembovaleve Davídgui ni noenvidiái chupe ojapo haguére heta mbaʼe porã. Upéva rangue Jonatán ohecharamo Davídpe ipyʼaguasu ha ojerovia haguére Jehováre. Añetehápe, David ojuka rire Goliátpe, Jonatán oñepyrũ vaʼekue ohayhueterei voi Davídpe. w21.01 21 párr. 6; 22 párr. 8, 9

Enterove kristiáno oĩ hína Jesucristo poguýpe, ha haʼe ningo peteĩ líder perfékto. Péro peteĩ ermána omendávo opytáma peteĩ kuimbaʼe imperfékto poguýpe, ha upéva ikatu hína ijetuʼu. Upévare peteĩ ermána omendaséva oñeporandu vaʼerã koʼã mbaʼe: “¿Mbaʼépa ohechauka chéve ko ermáno omoakã porãtaha peteĩ família? ¿Omotenondépa hekovépe Jehová servísio? Ha oiméramo ndojapói hína upéva, ¿mbaʼérepa apensa haʼe chemoakã porãtaha romenda rire?”. Péro pe ermána oñeporandu vaʼerã avei: “¿Mbaʼe kualidápa che areko ovenefisiátava pe matrimóniope? ¿Chépa chepasiénsia ha chembaʼeporã? ¿Arekópa peteĩ amista imbaretéva Jehovándi?” (Ecl. 4:9, 12). Peteĩ ermána odesidi porãramo omenda mboyve, upéva ikatúta oipytyvõ osẽ porã hag̃ua imatrimónio ha ovyʼa hag̃ua hikuái. Hetaiterei ermána ningo omoĩ ehémplo iporãitereíva pórke oñemoĩ hína iména poguýpe. Haʼekuéra omerese voi jafelisita chupekuéra. w21.02 8 párr. 1, 2

Ojapo unos kuánto áño, heta ermáno oñepyrũ hague oaprende ótro idióma oipytyvõ porãve hag̃ua predikasiónpe ha oho hag̃ua oservi peteĩ kongregasión oñeñeʼẽhápe ótro idióma, ha ifaltaitereihápe puvlikadór. Upéva ningo haʼekueraite voi odesidi ikatu hag̃uáicha oservi porãve Jehovápe. Jepe oraha chupekuéra heta tiémpo oñeʼẽ porã hag̃ua upe idióma, haʼekuéra tuichaiterei oipytyvõ pe kongregasiónpe. Umi kualida porã orekóva ha umi mbaʼe ohasa vaʼekue hikuái, omokyreʼỹ ha omombarete pe kongregasiónpe. Ñande ningo ñamombaʼeterei koʼã ermáno ha ermána ojesakrifikaitévape ótro rehehápe. Umi ansiáno ndaikatúi odesidi norrekomendamoʼãiha peteĩ ermánope oservi hag̃ua siérvo ministeriál térã ansiánoramo, noñeʼẽporãi haguérente pe idióma oñeñeʼẽva upe kongregasiónpe. Umi ansiáno ohecha vaʼerã pe ermánopa okumpli umi rrekisíto oĩva la Bíbliape umi ansiáno ha siérvo ministeriálpe g̃uarã, ha ndahaʼéi oñeʼẽ porãpa hína pe idióma upe kongregasionpegua (1 Tim. 3:1-10, 12, 13; Tito 1:5-9). w20.08 30 párr. 15, 16

La hénte ningo ikatu opensa ovyʼataha hesãiramo añoite, ipláta hetáramo térã ojogueraha porãramo añoite ifamíliandi. Péro pe vyʼa Santiago oñeʼẽ hague ou hína Ñandejára espíritugui, ha nodependéi umi mbaʼe jahasávare (Gál. 5:22). Peteĩ kristiáno ningo ikatu ovyʼa, térã oñandu pe vyʼa añetetéva, oikuaágui Jehová oguerohoryha chupe ha osegiha Jesús ehémplo (Luc. 6:22, 23; Col. 1:10, 11). Pe vyʼa ñañandúva ikatu ñambojoja pe tatarendy oĩvare peteĩ lámpara ryepýpe. Upépe pe tatarendýpe oñemoʼã pe yvytu ha amágui, ha upéicha rupi ndoguéi. Péicha avei, ñande ikatu jasegi javyʼa tahaʼe haʼéva umi mbaʼe jahasáva. Pe vyʼa ñande ñañandúva ndopái ñandesogue térã ñanderasykatu jave. Ndoguéi avei oĩramo jepe oñembohorýva ñanderehe, térã ñande rogaygua ni umi ótro hénte oñemoĩramo ñanderehe. Upéva rangue, amáske oñemoĩ ñanderehe hikuái, pe vyʼa oĩva ñande pype koʼýte imbareteve. Umi mbaʼe ñambohováiva jajerovia haguére Jehováre ohechauka ñande haʼeha Cristo disípulo tee (Mat. 10:22; 24:9; Juan 15:20). Upévare Santiago oskrivi vaʼekue umi mbaʼe jatopáva pe téxto koestediaguápe. w21.02 28 párr. 6

Jatopa jave umi téxto bíblico ohechaukáva iñimportanteha ñaime pyʼaguapýpe ha jajerovia Jehováre, ñañehaʼãkena jaikuaa umíva de memória. Upearã iporãta jaleéramo en vos álta térã jaskrivi umi téxto ikatu hag̃uáicha jarrepasa jepi. Jehová heʼi vaʼekue Josuépe siémpre olee hag̃ua pe léi en vos váha, ha péicha iñarandu hag̃ua. Umi mbaʼe oleéva pe léipe oipytyvõta kuri avei chupe ani hag̃ua okyhyje, ha pyʼaguasúpe ogia hag̃ua Jehová puévlope (Jos. 1:8, nóta, 9). Heta versíkulo oĩva la Bíbliape ñanepytyvõta ñaime hag̃ua pyʼaguapýpe oñepresenta jave umi situasión ikatúva ñanekevrantaiterei térã ñanemongyhyje (Sal. 27:1-3; Prov. 3:25, 26). Umi rreunionhápe tuichaiterei ñanepytyvõ umi diskúrso, komentário omeʼẽva umi ermanokuéra ha umi konversasión kyreʼỹ jarekóva hendivekuéra (Heb. 10:24, 25). Ikatu avei ojapo porãiterei ñanderehe ñamombeʼúramo umi mbaʼe ñandepyʼapýva peteĩ ñane amigoite oĩvape kongregasiónpe. w21.01 6 párr. 15, 16

Pejevautisárõ guare ningo pehechauka kuri pejeroviaitereiha Jehováre ha pekonfiaha hese. Ha Jehová ovyʼaiterei kuri penderresivívo ifamíliape. ¿Mbaʼépa koʼág̃a tekotevẽ pejapo? Pesegi vaʼerã pejerovia Jehováre. Ikatu oime ifásil peẽme pejerovia Jehováre pedesidíta jave umi mbaʼe ikatúva okambia pende rekove. ¿Péro mbaʼépa pejapóta ótra situasiónpe? Iñimportanteterei pekonfia Jehováre pedesidíta jave entéro mbaʼe, tahaʼe umi mbaʼe tuicháva térã michĩva jepe. Por ehémplo, umi diversión, traváho térã mbaʼépa pehupytyse pende rekovépe. Ani pejerovia umi mbaʼe peẽ pepensávare oĩ porãha, upéva rangue, peheka la Bíbliape umi konsého penepytyvõtava pedesidi porã hag̃ua, ha upéi pejapo upépe heʼiháicha (Prov. 3:5, 6). Péicha pejapóramo, pembovyʼáta Jehovápe, ha penderrespetáta umi ermanokuéra oĩva kongregasiónpe. Jaikuaa ningo peẽ mitãrusukuéra peneimperfektoha avei enterove persónaicha, ha sapyʼánte pejavy mimítante voi. Péro upéva napendejokói vaʼerã pejapo hag̃ua ikatúva entéro Jehová servísiope. w21.03 6 párr. 14, 15

¿Ñanemoprovlémapa ñane família jaservi haguére Jehovápe? ¿Térã jaikópa peteĩ país ojeproivihápe ñane rembiapo, tahaʼe en párte térã kompletoite voi? Oiméramo upéicha, ñanemokyreʼỹetereíta jaleéramo 2 Timoteo 1:12-16 ha 4:6-11, 17-22. Apóstol Pablo oskrivi vaʼekue koʼã versíkulo oĩ aja kárselpe. Jalee mboyve koʼã versíkulo ñamombeʼu Jehovápe mbaʼépa hína la ñane provléma, ha mbaʼéichapa ñanemoñeñandu upéva. Ñanesinséro vaʼerã hendive, ha jaʼepaite chupe la ñapensa ha ñañandúva. Upéi jajerure Jehovápe tañanepytyvõ ikatu hag̃uáicha jaleekuévo umi mbaʼe Pablo ohasa vaʼekue, jatopa umi konsého ñanepytyvõtava jaikuaa hag̃ua mbaʼépa jajapóta ñambohovái hag̃ua ñane provléma. Jehová ningo oavisa vaʼekue Páblope ojepersegitaha chupe haʼe haguére kristiáno (Hech. 21:11-13). ¿Péro mbaʼéichapa Jehová oipytyvõ vaʼekue Páblope? Haʼe ombohovái iñemboʼe ha omombarete chupe. Jehová oasegura Páblope omeʼẽtaha chupe pe prémio haʼe hetaite ombaʼapo jejopy vaʼekue ohupyty hag̃ua. Avei Jehová ojevale Pablo amigokuéra ifiélvare oipytyvõ hag̃ua chupe heta hendáicha. w21.03 17, 18 párr. 14, 15, 19